Miljø, Teknisk, Næring Arkivsak: 2007/1263-38 Arkiv: 143 Saksbehandlar: Sander Sælthun Dato: 18.06.2015 Saksframlegg Utv.saksnr Utvalg Møtedato 42/2015 Formannskap 30.06.2015 Revisjon av kommunedelplan for Fossbergom - høyring og offentleg ettersyn Vedlegg: 1 Plankart - høyringsframlegg 2 Føresegner og retningsliner - høyringsframlegg 3 Konsekvensutgreiing - høyringsframlegg 4 ROS-analyse - høyringsframlegg 5 Planskildring - høyringsframlegg 6 Temakart reguleringsplanar - høyringsframlegg 7 Temakart KU-område (ikkje juridisk bind.) 8 Temakart naturtypar og prioriterte arter (ikkje juridisk bind.) Innstilling frå administrasjonssjefen: Lom kommune vedtek i medhald av plan- og bygningslova 11-14 å legge forslag til kommunedelplan for Fossbergom, planid 05140069, ut til offentleg ettersyn. Frist for å komme med uttale/ motsegn til planforslaget blir sett til minst seks veker frå planen blir lagt ut til offentleg ettersyn. Planforslaget omfattar plankart, planføresegner, konsekvensutgreiing, risiko- og sårbarheitsanalyse, temakart over reguleringsplanar som framleis skal gjelde og planskildring. Vidare er det lagt ved temakart for område som er konsekvensutgreidd, og temakart som viser verdifulle naturtypar og prioriterte arter (ikkje juridisk bindande). Saksprotokoll i Formannskap - 30.06.2015 Behandling Odd Arne Kroken viste til at han er grunneigar i det aktuelle området og at det kan hende det kjem innspel til kommunedelplanen i seinare høve. Kroken ba formannskapet om å vurdere habiliteten hans. Kroken gjekk frå møtet. Formannskapet kjende Odd Arne Kroken habil i saka. Vedtak Lom kommune vedtek i medhald av plan- og bygningslova 11-14 å legge forslag til kommunedelplan for Fossbergom, planid 05140069, ut til offentleg ettersyn. Frist for å komme med uttale/ motsegn til planforslaget blir sett til minst seks veker frå planen blir lagt ut til offentleg ettersyn. Planforslaget omfattar plankart, planføresegner, konsekvensutgreiing, risiko- og sårbarheitsanalyse, temakart over reguleringsplanar som framleis skal gjelde og planskildring. Vidare er det lagt ved temakart for område som er konsekvensutgreidd, og temakart som viser verdifulle naturtypar og prioriterte arter (ikkje juridisk bindande).
Samrøystes. Samandrag Gjeldande kommunedelplan for Fossbergom vart vedteken 14.10.2003. Arbeidet med revisjon av denne planen vart starta opp alt i 2008. I 2009 kom ny plan- og bygningslov som endra rammene for arbeidet, og arbeidet vart derfor reversert med nytt varsel om oppstart av planarbeidet i april 2011. Frå mars 2014 vart Nordplan engasjert for å utarbeide framlegg til revidert kommunedelplan for Fossbergom. Framlegget blir med dette lagt fram for 1. politiske behandling i planutvalet (formannskapet) før utlegging til høyring og offentleg ettersyn. Dei viktigaste endringane i planframlegget samanlikna med gjeldande kommunedelplan er: Nytt område for fritids- og turistformål (utleigeleilegheiter) på Andberg, mellom fv55 og Bøvre Nytt område for fritids- og turistformål (campingplass og utleigehytter) på Nørderøy Massedeponi og nye industritomter i Skjæsarøya, aust for eksisterande industriområde Endring av arealformål for Kulihaugen frå offentleg formål til bustader Endring av arealformål for Lom møbelindustri, frå industri til kombinert formål forretning/ bustad Endring av arealformål for næringsområda på sørsida av alternativ/ framtidig riksvegtrasé, frå forretning, kontor og reiseliv til kombinert formål forretning/ bustad. Endring av formål for deler av sentrum frå forretning, kontor og reiseliv til sentrumsformål Endring av formål til sentrumsformål også for øvre del av eksisterande campingplass på Norddal Enkelte innspel i planprosessen er ikkje vidareført i planforslaget, m.a. bustadtomter på austre del av dyrka mark på Andvord (foreslått i tettstadanalysen) og fleire bustadtomter ved Kroken. Flomliner for 200-årsflom er ikkje ferdig utarbeidd enno, og vil bli ettersendt saman med kart over omsynssone flom til NVE og andre relevante høyringspartar så snart dei ligg føre. Saksutgreiing Gjeldande kommunedelplan for Fossbergom vart vedteken 14.10.2003. Arbeidet med revisjon av denne planen vart starta opp alt i 2008. Det vart gjennomført analyser og utgreiingar i samsvar med vedteke planprogram, m.a. intern analyse av behov for areal til bustader og næringsbygg (MTN 2008), intern analyse av nye tiltak sett opp mot omsyn til jordvern (MTN 2008), tettstadanalyse Fossbergom (Rambøll 2008) og kartlegging av faregrenser for skred (NGI 2009-2010). I 2009 kom ny plan- og bygningslov som endra rammene for arbeidet, og arbeidet vart derfor reversert med nytt varsel om oppstart av planarbeidet i april 2011. Framlegg til planprogram vart sendt på høyring saman med oppstartvarselet, planprogrammet vart vedteke av kommunestyret 07.02.2012, sak 7/2012. På grunn av vakanse i planleggarstilling frå 01.10.2013 vart det ved budsjettsaldering i 2014 lagt inn kr 150 000 i driftsbudsjettet til tenestekjøp frå ekstern konsulent, for å setje kommunen i stand til å fullføre påbegynte planarbeid. Vidare gjorde kommunestyret i sak 17/2014 revisjon av planstrategi 2012-2015 - vedtak om å setje av kroner 200.000 frå næringsfondet i 2014 og 200.000 i 2015 for å oppnå den nødvendige framdrift i planarbeidet, dvs. til ferdigstilling av kommunedelplan Fossbergom og til gjennomføring av revisjon av kommuneplanen frå 2003. Det vart sendt tilbodsinnbyding til 3 konsulentfirma i januar 2014, og etter vurdering av innkomne tilbod vart oppdragsavtale med Nordplan underteikna 14.03.2014. Nordplan har etter dette utarbeidd framlegg til revidert kommunedelplan Fossbergom, i tett samarbeid med sakshandsamar i kommunen. Framlegget blir med dette lagt fram for 1. politiske behandling i planutvalet (formannskapet) før utlegging til høyring og offentleg ettersyn.
Dei viktigaste endringane i planframlegget samanlikna med gjeldande kommunedelplan frå 2003 er som følgjer: Nytt område for fritids- og turistformål (utleigeleilegheiter) på Andberg, mellom fv55 og Bøvre Det vart alt i 2006 lagt fram eit privat forslag til reguleringsplan for deler av eigedomen Andberg. Føremålet for planen var utbygging av fritidsleilegheiter på nedsida av fv55. Planen omfatta den gongen leilegheitsbygg med 15 terrasserte bueiningar. Tiltaket vil ligge innanfor vassdragsbeltet for Bøvre, som er eit varig verna vassdrag. Likeeins ligg tiltaket innafor føreslegne grenser for det nasjonale kulturlandskapsområdet i Bøverdalen. Tiltaket vil legge beslag på eit mindre areal dyrka jord, ca 5 dekar, men arealet er brattlendt og dårleg arrondert. Nytt område for fritids- og turistformål (campingplass og utleigehytter) på Nørderøy Også her vart det i 2006 lagt fram eit privat forslag til reguleringsplan for deler av eigedomen Nordre Øy. Føremålet for planen er utbygging av campingplass mellom fv55 og Bøvre. Det har seinare kome innspel frå grunneigar med ønskje om utbygging for turistverksemd (utleigehytter) også i tilknyting til tun og dyrka mark på oversida av vegen. Deler av tiltaket vil ligge innanfor vassdragsbeltet for Bøvre, som er eit varig verna vassdrag. Likeeins ligg tiltaket innafor føreslegne grenser for det nasjonale kulturlandskapsområdet i Bøverdalen. Fareområde for skred med sannsyn større enn 1:1000 (kartlagt av NGI i 2009) omfattar tunet og størsteparten av arealet på oversida av vegen. På bakgrunn av konsekvensutgreiinga er det i planframlegget berre opna for deler av tiltaket, camping på ca 8,5 dekar dyrka jord mellom fv55 og Bøvre, mot Lom Camping. Det har tidlegare vore gjeve tidsavgrensa dispensasjon for campingplass på arealet. Massedeponi og nye industritomter i Skjæsarøya, aust for eksisterande industriområde Det finst svært lite ledig areal for industritomter nær Lom sentrum, ikkje minst fordi arealdisponeringa for deler av industriområdet er låst gjennom regulering til framtidig/ alternativ trasé for rv15 utanom Fossbergom. Det er derfor foreslått ei utviding av industriområdet med ca 11 dekar mot aust mellom Åsjo naturreservat og elveforbygginga mot Ottaelva. Det vil vere nødvendig å heve terrenget noko gjennom oppfylling/ massedeponi for overskotsmassar, eit formål det er stort behov for. Arealet ligg i direkte tilknyting til eksisterande industri-område, og kan enkelt knytast til eksisterande veg-, vatn- og avløpsnett. Området er konfliktfylt ved at det grenser til Åsjo naturreservat og ligg nær eit registrert habitat for den prioriterte arten elvesandløper (på andre sida av elveforbygginga). Disponering av området til industritomter vil beslaglegge dyrkbar jord. Området sin funksjon som trekkveg for vilt mellom Åsjo og elvesletta/ fuktskogen langs Ottaelva er foreslått ivareteke gjennom ein ca 50 m brei korridor mellom dei nye industritomtene og dyrka mark lenger aust. Endring av arealformål for Kulihaugen frå offentleg formål til bustader Kulihaugen er i dag nytta som landbruksområde (grasproduksjon), men er i gjeldande kommunedelplan for Fossbergom sett av til byggeområde for offentlege formål. Sidan kommunedelplanen vart vedteken i 2003 er det ikkje arbeidd vidare med slik bruk av området, med unntak av at deler av området på vestsida/ innsida av Gamlevegen - i eit planframlegg frå 2011 vart foreslått som lokalisering for nytt helsesenter. Dette planframlegget vart seinare lagt til sides. Samtidig er det stor etterspørsel etter sentrumsnære bustader, og arealet på utsida av Gamlevegen blir derfor foreslått omdisponert til bustadområde med krav om høg fortetting.
Endring av arealformål for tidlegare Lom møbelindustri, frå industri til kombinert formål forretning/ bustad Festar av tomt og eigar av bygningsmasse etter tidlegare Lom møbelindustri har kome med innspel om endringa av arealformål for ei omforming av bygningsmassen til kombinert formål bustad og forretningar. Den aktuelle plasseringa er svært sentrumsnær, og det er alt i dag etablert turveg langs Bøvre til Nordal og sentrum. Sjå punkt 7.1.1 og 7.1.5 i planskildringa. Plassering nær alternativ riksvegtrasé utanom sentrum kan vere konfliktfylt, det same gjeld lokalisering på/ like inntil område for reserve vassforsyning kommunalt vassverk. Med unntak av vaktmeister- og tilsynsbustader har det ikkje vore opna for bustadetablering i industriområdet tidlegare. Området må avklarast for eventuell flaumfare, sjå eige punkt om dette. Endring av arealformål for næringsområda på sørsida av alternativ/ framtidig riksvegtrasé, frå forretning, kontor og reiseliv til kombinert formål forretning/ bustad. Endringa er først og fremst relevant for området ved Kolden-bygget, da det vil bli opna for delvis omregulering til bustader i det gamle forretningsbygget her. På grunn av trafikkstøy/ nærleik til veg er det sannsynlegvis berre deler av bygget/ området som egnar seg for etablering av leilegheiter. Endring av formål for deler av sentrum frå forretning, kontor og reiseliv til sentrumsformål Arealformålet sentrumsformål vart innført på kommuneplannivå med plan- og bygningslova frå 2009. Formålet omfattar forretningar, tenestyting, bustader og grøntareal. Dette er altså eit relativt vidt formål som vil ha som konsekvens at det blir opna for omregulering for etablering av bustader i område som tidlegare har vore avsett til forretning, kontor og reiseliv t.d. leilegheiter i 2. etasje i forretningsbygg. Det har vore fleire innspel i planprosessen med ønskje om dette, både frå Lom handelsstand og frå private eigarar av forretningsbygg. Etablering av bustader/ leilegheiter vil krevje omregulering der det er regulert til andre formål enn bustad. Endring av formål til sentrumsformål også for øvre del av eksisterande campingplass på Norddal I gjeldande kommunedelplan frå 2003 er heile sentrumsområdet inkludert campingarealet på Nordal vist som erverv/næringsområde for forretning, kontor og reiseliv. I planframlegget er øvre del av campingområdet mellom Nordal/ Esso og Gjeisarhaugen lagt ut som sentrumsområde, dette er i samsvar med konklusjonane til prosjektgruppa for arbeidet med tettstadanalysen i 2008. Ved å legget til rette for utbygging av mindre forretningsbygg på nedsida av rv15 vil ein på sikt kunne utvikle ei ny handlegate parallelt med riksvegen her. Sjå punkt 7.1.5 i planskildringa. Nedre del av campingområdet, saman med området på sørsida av Stupulvegen, er sett av til kombinert formål forretning, bustad samt fritids- og turistformål. For alle dei nye tiltaka som er nemnt ovanfor gjeld at det må utarbeidast nye reguleringsplanar, alternativt omregulerast, før tiltaka kan setjast ut i livet. Enkelte innspel i planprosessen er ikkje vidareført i planforslaget, m.a. bustadtomter på austre del av dyrka mark på Andvord (foreslått i tettstadanalysen) og fleire bustadtomter ved Kroken. Sjå punkt 4.2 og 4.3 i konsekvensutgreiinga. Det har kome innspel om frå Lom biovarme med ønskje om at Klokkargardtomta blir reservert for nytt biovarmeanlegg på sørsida av Bøvre. Dette er ikkje vidareført i planframlegget, men det er i staden foreslått opna for fjernvarmeanlegg innanfor det kombinerte arealformålet på sørsida av Stupulvegen, vest for fylkesvegen (Liavegen). Det finst unytta areal i dette området (på privat grunn) som det kan vere aktuelt å omdisponere til slikt formål.
Risiko-og sårbarheitsanalyse for nye utbyggingsområde er lagt ved som eige plandokument. Analyse knytt til temaet generell samfunnstryggleik blir dekt opp gjennom ROS- analysar for Lom og Skjåk frå 2010, og det pågåande arbeidet med heilheitleg interkommunal ROS-analyse. Omsynssone skred: Omsynssone for alle typar skred, sikkerheitsklasse S1 (årleg sannsyn for skred 1:1000) er vist på plankartet. NGI sin kartlegging frå 2009 er lagt til grunn for omsynssona. Omsynssone flom - flomlineberekningar: NVE har ikkje utarbeidd flomliner for t.d. 200-års flom i Lom. På grunn av at det er stilt spørsmål frå NVE om flomverket langs industriområdet mot Bøvre oppfyller dagens krav, har kommunen engasjert firmaet HydraTeam AS til å utarbeide flomlineberekning for 200-årsflom for Bøvre nedanfor Prestfossen og for Ottaelva den første strekninga etter samløpet med Bøvre. Hydratem gjennomførte nødvendig kartlegging like etter isgang våren 2015. Det er nødvendig å kalibrere desse registreringane mot målingar ved høg vassføring. På grunn av svært sein vår og sein snøsmelting har det pr. 20.06 ikkje vore mogeleg å få gjort desse siste målingane. Kart med påteikna omsynssone vil bli ettersendt til NVE og andre relevante høyringspartar så snart dei ligg føre, dvs. når HydraTeam har ferdigstilt berekningane av 200-års flom. Vurdering Administrasjonssjefen viser til konsekvensutgreiing og risiko- og sårbarheitsanalyse i plandokumenta, og til dei vurderingar som går fram av planskildringa, m.a. vurdering etter naturmangfaldlova 8-12. Temaet generell samfunnstryggleik blir dekt opp gjennom ROSanalyse for Lom og Skjåk frå 2010, og arbeidet som pågår med utarbeiding av heilheitleg ROSanalyse for Lesja, Dovre, Sel, Vågå, Lom og Skjåk. Administrasjonssjefen vurderer planframlegg med tilhøyrande dokumentasjon som tilstrekkeleg gjennomarbeidd, og rår til at framlegget blir lagt ut til offentleg ettersyn.