HORDALAND FYLKESKOMMUNE Opplæringsavdelinga Fagopplæringskontoret Arkivsak 200703225-113 Arkivnr. 545 Saksh. Svendsen, Anne Sara Saksgang Yrkesopplæringsnemnda Opplærings- og helseutvalet Møtedato 10.01.2012 17.01.2012 STATUSRAPPORT FOR PROSJEKT FLEKSIBEL OPPLÆRING INNAN FAG- OG YRKESOPPLÆRINGA SAMANDRAG Opplæringsavdelinga sette hausten 2007 i gong eit prøveprosjekt innan fag- og yrkesopplæringa, prosjekt Fleksibel opplæring. Prosjektet er ein del av fråfalls-satsinga i Hordaland, og er eit samarbeidsprosjekt mellom elev, føresette, skole, lærebedrift og NAV. Målsettinga er å prøve ut om det blir lettare for lite motiverte elevar - som har føresetnader for å oppnå fag-/sveinebrev - å gjennomføre vidaregåande opplæring dersom dei får kombinere arbeid i ei lærebedrift og teori på skulen alle fire opplæringsåra, og i tillegg får ekstra oppfølging frå kontaktlærar. Fleksibel opplæring er eit godt tilbod for ein del ungdom. Vi arbeider no med korleis ordninga skal vidareførast. Grensegang i høve til dei andre opplæringstilboda er viktig, ut frå kva målsetting vi har med dette tilbodet. Detaljar i ordninga må drøftast ut frå erfaringane som er gjorde i prosjektet. Det må takast høgde for moglege statlege føringar for praksisbrevordninga. FORSLAG TIL INNSTILLING: Opplærings- og helseutvalet tar saka til orientering. Paul M. Nilsen fylkesrådmann Inger Ø. Tønder opplæringsdirektør
FYLKESRÅDMANNEN, 20.12.2011: Bakgrunn Bakgrunnen for prosjektet er Hordaland Fylkeskommune si satsing mot fråfall i vidaregåande opplæring, GIVO-rapporten og Stortingsmelding 16 og ingen stod igjen. Arbeidet med å redusere fråfallet i vidaregåande opplæring går inn som ein naturleg del av dei vidaregåande skolane og lærebedriftene sitt ansvarsområde. Gjennom auka fokus på skolen og bedriftene som lærande organisasjonar, og ha tydeleg leiing og elev-/lærlingmedverknad, kan fråfallet i vidaregåande opplæring bli vesentleg redusert. Fleksibel opplæring (FOFY) er eit samarbeidsprosjekt mellom elev, føresette, skole, lærebedrift/opplæringskontor, OT/PPT og NAV. Skuleeigar har prosjektansvaret, og prosjektleiinga er lagt til fagopplæringskontoret. Opplærings- og helseutvalet er tidlegare orienterte om prosjektet i møte 19.6.07, 30.9.08, 2.12.08 og 21.9.2009. Målsetting Målsettinga er å prøve ut om det blir lettare for lite motiverte elevar - som har føresetnader for å oppnå fag-/sveinebrev - å gjennomføre vidaregåande opplæring dersom dei får kombinere arbeid i ei lærebedrift og teori på skulen alle fire opplæringsåra, og i tillegg får tett oppfølging frå kontaktlærar. Ingen av dei ordinære opplæringsmodellane som fører fram til fag-/sveineprøve omfattar eit oppfølgingsansvar av denne typen. Elevane/lærlingane har opplæring i alle delar av læreplanane, men opplæringa blir fordelt mellom bedrift og skule alle opplæringsåra. Td kan eleven vere tre dagar i lærebedrifta og to dagar på skulen ei vanleg veke. Skulen må skaffe lærebedrift/opplæringskontor til eleven, som har elevstatus dei to første åra og lærlingstatus dei to siste åra. Lærebedrift og skule samarbeider nært om opplæringa av den enkelte eleven/lærlingen. Modellen har vore prøvd ut ved fire skular innan utvalde lærefag sidan 2007. Resultata viser at ein god del ungdom har nytte av denne måten å lære på. Målgruppe Målgruppa er ungdom som er i risikogruppa for å ikkje gjennomføre vidaregåande opplæring, og som derfor vil ha større utbyte av eit meir fleksibelt, tilpassa opplegg enn dei vanlege opplæringsløpa. Tett oppfølging er også eit sentralt element. Motivasjonen til å kunne gjennomføre vidaregåande opplæring vil for mange unge vere avhengig av å kunne kome seg i arbeid, i staden for å vere heildagselev. Dette har vore utgangspunktet for prosjektet. Opplæringa i bedrift skal starte så tidleg som mogeleg. Målgruppa samsvarer i stor grad med OT/PPT si målgruppe: Ungdom som ikkje søkjer vidaregåande opplæring Dei som søkjer vidaregåande opplæring, men takkar nei til plass Dei som startar i vidaregåande opplæring, men sluttar etter ei tid. Dette er gjerne ungdom som har stort fråver den tida dei går i skulen. 2
Dei viktigaste aktivitetane i modell fleksibel opplæring Skolen må engasjere ein lærar (koordinator) som er interessert i og egna til å jobbe så tett med elevane og dei andre involverte partane som denne ordninga krev. Skolen og bedrifta følgjer straks opp dersom eleven uteblir ein dag, ved at koordinator kontaktar eleven. Koordinator følgjer opp dersom det er nødvendig med tiltak slik at eleven kan følgje opplæringa. Læreplanarbeid: bruke mogelegheitene i planverket for best mogleg tilpassing til målgruppa. Elev-/lærlingmedverknad, som gir høve til å påverke eigen arbeidsplan, og dermed betre innsikt i og oversikt over dei fire åra i vidaregåande opplæring. Dette kan igjen gi auka motivasjon og dermed auka læringsutbytte. Involvering av og meir strukturert samarbeid med føresette, som har ei viktig rolle når det gjeld å førebygge fråfall. Godt og formalisert samarbeid med avgjevarskolen for å tidlegast mogeleg kunne fange opp elevar som står i fare for å droppe ut Dersom eleven likevel ikkje trivst med opplæringa skal alternative ordningar vurderast. Dette kan vere td full opplæring i bedrift, lærekandidatordninga eller heilt andre tilbod. Det finst i dag ulike vegar fram til fag-/sveinebrev og kompetansebevis: 2+2 modellen består av to års opplæring i skule og deretter to år i lærebedrift. Dette er den vanlegaste vegen til fag-/sveinebrev. Full opplæring i bedrift : 1+3 modellen (eitt år i skule og tre år i bedrift, teori i form av lærlingskule ) og 0+4 modellen (fire år i bedrift inkl. teori). Dette er ein modell for dei som ønskjer/treng ei ordning der meir av opplæringa skjer i bedrift og er knytt til praktisk arbeid eller evt ønskjer eit fag-/sveinebrev i programområde som vidaregåande skular i fylket ikkje har relevant Vg1 eller Vg2 opplæringstilbod i. Ved full opplæring i bedrift har lærlingen teoriundervisning td ein dag i veka, men får i liten grad individuell oppfølging og tilrettelegging. Lærekandidatordninga Lærekandidaten følgjer dei delar av læreplanane som ligg best til rette for vedkomande, og går opp til kompetanseprøve etter fire år. Lærekandidaten kan evt bygge på til fagbrev. Målgruppa er ungdom som av ulike grunnar ikkje vil ha fag- eller sveinebrev som målsetting, men går mot grunnkompetanse. Praksisbrev Nokre fylke er med i ei forsøksordning der det vert gitt tilbod om opplæring som fører fram til praksisbrev. Dette er eit to-årig opplæringstilbod med både teori og praksis, som gir kompetansebevis. Målgruppa er elevar som har svake føresetnader for å gjennomføre vidaregåande opplæring med dagens krav til teoriopplæring i alle faga. Desse ungdommane kan ha nytte av å arbeide mot eit nærare mål enn fagbrev og skaffe seg formalisert kompetanse på eit lågare nivå enn det som trengst for å ta fag-/sveinebrev. Hordaland fylkeskommune gir så langt ikkje tilbod om praksisbrev. Praksisbrev er i utgangspunktet ei toårig ordning. Nokre av prøvefylka som har innført ordninga, praktiserer likevel ordninga som fireårig der kandidatane skal avslutte med å avleggje fag-/sveinebrev. Praksisbrevordninga vil då ha ein del likskapar med fleksibel opplæring. 3
Roller og ansvar i fleksibel opplæring Hordaland Fylkeskommune v/opplæringsavdelinga er prosjektansvarleg. Skolen si rolle: Skolen skal ha hovudansvaret for den enkelte av elevane dei to første åra, og skal også ha kontakt med og oppfølging av lærling og bedrift dei to siste opplæringsåra. Skolen engasjerer ein lærar (koordinator) som jobbar tett med elevane alle fire opplæringsåra. Koordinator syter for at eleven får plass i lærebedrift, og for at det blir skrive ein intensjonsavtale mellom elev-føresette-skole og bedrift/opplæringskontor. Koordinator er bindeledd mellom skole og bedrift. Ho/han gir bedrifta støtte og rettleiing i å ivareta eleven og eleven si utvikling, og skal ha jamleg kontakt med bedrifta. Koordinator skal finne alternativ dersom eleven har vald feil og/eller bedrifta opplever at opplæringssituasjonen er for krevjande. Koordinator besøker elev/bedrift td annankvar veke. Elevane skal følgjast opp i si ordinære arbeidstid i bedrifta. Koordinator er hovudansvarleg for planlegging og dokumentasjon av opplæringa. Lærebedrifta/opplæringskontoret si rolle: Bedrifta velgjer om/kven dei ønskjer å ta inn i arbeid med tanke på lærekontrakt Bedrifta er hovudansvarleg for opplæring av lærlingen tredje og fjerde år Det blir teikna ein intensjonsavtale om læreplass når elevane startar i praksis Det blir teikna lærekontrakt etter to års opplæring ordinære lærlingvilkår Koordinator på skulen er samarbeidspart NAV og OT/PPT si rolle: er innsøkjande instans for ungdom som kan ha nytte av tilbodet. NAV har i prosjektperioden ytt individstøtte etter gjeldande reglar, frå nyttår første opplæringsår Kven kan få tilbod om fleksibel opplæring? Ordninga er eit tilbod til elevar som søkjer ordinært inntak og som har ungdomsrett Eleven må vere innanfor målgruppa for fleksibel modell Dersom klassen skulle ha ledige plassar kan elevar utan rett takast inn. Skulen kan då vere fleksibel med tanke på alder og bakgrunn for dei som blir tekne inn. Føresetnaden er at dette ikkje går ut over rettselevar. Dersom elevar kjem seint inn i ordninga må opplæringstida forlengast tilsvarande, slik at eleven/lærlingen får full læretid. Skulen må vere obs på tilhøve som vandel og rusproblematikk i høve til lærefag og arbeidsplass Lærar/rådgivar/elevinspektør får tidleg god oversikt over elevane som tek til ved skulen. Elevar som kjem inn på andre- eller tredjevalet sitt er potensielle sluttarar. Startsamtalen vil kunne avsløre meir om motivasjon for det utdanningsprogrammet dei har kome inn på. Elevar som ser ut for å vere i faresona for å ikkje gjennomføre skulegangen kan få tilbodet om ei meir fleksibel ordning. Skulen må gi grundig informasjon til elevane og dei føresette. Både eleven og føresette må vere innforståtte med at eleven følgjer eit avvikande løp. Det må lagast skriftleg avtale mellom elev, føresette og skule. Skulle det bli stor interesse og mange om plassane må skulen velje ut dei som skal få plass gjennom samtale/intervju og/eller personleg søknad. Skulen bør bruke tida fram til haustferien til å velje ut dei elevane som vil ha nytte av å få opplæring etter fleksibel modell. Elevane går i vanleg klasse fram til utvelginga er gjort. Dersom elevane startar i bedrift straks etter skulestart, ser dette ut til å kunne medføre fleire endringar i klassen enn om elevane får gjort seg betre kjende med skulen og tilbodet først. Erfaringane frå prosjektet viser at 9-10 elevar er ein grei klassestorleik for desse klassane. Klassen bør derfor ha maksimum 10 elevar, minimum 6-7 elevar. Det vil då også bli plass til eventuelle elevar som kjem til utover hausten. 4
Opplæringa Elevane må i løpet av dei 4 åra ha fullt timetal i teori, men skal gjennomføre denne parallelt med å vere i bedrift. I programfaga kan delar av opplæringa gjerast i samband med praksis i bedrift. Teorien kan takast i modular dersom dette er føremålstenleg, og opplæringsansvarleg kan i samarbeid med eleven finne ei rekkefølgje på faga som kan motivere den enkelte til å kome gjennom teorien. Koordinator i skulen og fagleg ansvarleg i bedrift har ansvaret for at opplæringa vert planlagd og tilrettelagd for heile læretida. Lærlingen skal vere med å planleggje opplæringa si. Avviket i høve til dei eksisterande ordningane blir progresjonen i dei teoretiske faga, altså ei tempodifferensiering. Fagfordelinga blir annleis, og undervisninga strekkjer seg over heile opplæringsløpet. Dette blir gjort for å få ein gevinst for den enkelte, ei individuell tilrettelegging. Innanfor 4-årsperioden får eleven/lærlingen ivaretatt alle rettar, og får ei fullverdig opplæring med sikte på å kunne oppnå fag-/sveinebrev. Skular og lærebedrifter/opplæringskontor som er med i prosjektet Tre skular har vore med sidan prosjekt-ideen vart lansert, Fitjar, Sandsli og Åsane vgs. Skulane deltok også i utforminga av modellen. Fitjar har gitt tilbod om fleksibel opplæring i utdanningsprogrammet helse- og sosialfag, Sandsli i restaurant- og matfag og Åsane i teknikk- og industriell produksjon. Askøy vgs kom inn i prosjektet i 2009 med bygg- og anleggsteknikk. Dei valde utdanningsprogramma er alle utdanningsprogram som har hatt høgt fråfall både nasjonalt og her i fylket. Skulane har brukt sitt eige kontaktnett av bedrifter og opplæringskontor til å skaffe lærlingane praksisplass/læreplass. Fitjar har i samarbeidd med Opplæringskontoret for kommunale fag, og også enkelte private barnehagar. Sandsli har samarbeidd med Opplæringskontoret for hotell- og restaurantfag i Hordaland Åsane vgs har skaffa plass til sine elevar både hos Bilbransjens opplæringskontor, Ifos og hos sjølvstendige lærebedrifter. Askøy har samarbeidd med både opplæringskontor og lærebedrifter innan byggebransjen. Status klassar, elevtal ved oppstart og fag Fitjar v.g. Barne- og ungd. Helsefagarbeidar Sandsli v.g. Kokk Servitør Åsane v.g. Lette køyretøy CNC-faget Askøy v.g. Tømrar Rørleggjar Reinhaldsoperatør Mur Betong/forskaling Anleggsmaskinførar 2007-08 2008-09 2009-10 2010-11 2011-12 9 elevar 9 elevar 7 elevar 6 elevar 10 elevar 9 elevar 10 elevar 9 elevar 9 elevar 11 elevar 7 elevar 7 elevar 5
Både Fitjar, Sandsli og Åsane har gitt elevane tilbod om å velje mellom to lærefag innanfor utdanningsprogrammet. Askøy har vald å la elevane stå friare, og har derfor samarbeidd med lærebedrifter i mange fag. Utfordringa med dette er å kunne gi tilbod i alle programfaga, men dette har skulen handtert greitt. Innan bilfag har det i fleire år vore vanskeleg å finne nok læreplassar for alle som søkjer. Dette fikk også konsekvensar for elevane ved Åsane vg, der det har tatt tid å få læreplass for fleire av elevane. Enkelte av elevane har derfor gått mot andre av lærefaga innan same område. Resultatet av fleksibel opplæring dei fire første åra Fleksibel opplæring Praksisbrev Oppstart 2007 2008 2009 2008 Bygg- og Bygg- og Utdanningsprogram nye klassar anleggsteknikk anleggsteknikk Restaurant- og matfag Restaurant- og matfag Restaurant- og matfag Teknikk- og ind.prod. Teknikk- og ind.prod. Teknikk- og ind.prod. Helse- og sosialfag Helse- og sosialfag Helse- og sosialfag Helse- og sosialfag Service- og samferdsel Tal ungdommar som starta 27 100 % 28 100 % 18 100 % 51 100 % Fråfall første to år 13 48 % 11 39 % 11 61 % 10 20 % - Til andre opplæringstilbod 2 4 8 7 - Til arbeid 2 2 2 2 - Ukjent grunn 1 1 - Sjukdom 3 2 1 - Svangerskap 3 - Mistrivsel/fråver 3 2 Gjennomført to år 14 52 % 17 61 % 7 39 % 41 80 % - Bestått praksisbrevprøve 38 75 % - Realkompetanseprøve 2 - Ikkje tatt prøve 1 - Bestått fellesfag (norsk/matte/samf.) 40 Ønska læreplass 14 52 % 17 61 % 7 39 % 31 Fått læreplass 12 44 % 15 54 % 7 39 % 25 49 % Heving av lærekontrakt 2 3 Gjennomført fagprøve 8 37 % Fagprøve vinter 11/12 2 Av dei 27 elevane som starta hausten 2007 slutta 13 i løpet av dei to første åra. Alle desse har likevel ikkje falle ut av vidaregåande opplæring. 4 elevar har gått vidare til anna opplæring eller arbeid, medan 6 har slutta pga sjukdom/svangerskap. Tre av elevane har slutta pga mistrivsel. Av dei 14 som søkte læreplass fikk 12 plass, og 10 av desse ser ut til å fullføre fag-/sveinebrev. 6
Med utgangspunkt i at desse elevane ved inntaket til fleksibel-klassane vart vurderte til å sannsynlegvis ville slutte om ikkje dei fikk eit meir tilpassa tilbod, er gjennomføringa bra. Tilbakemeldinga frå dei involverte skulane er at med fleksibel opplæring har 10 ungdommar fullført, som elles ikkje ville ha gjort dette. Samanliknar vi med nasjonale tal ser vi at av ei elevgruppe med karaktersnitt på 0-3 frå ungdomsskulen sluttar 65% i vidaregåande opplæring, og 8% fullfører på normert tid. I praksisbrevforsøket fullfører 80% dei to første åra, og halvparten går vidare mot fullt fagbrev. Kor mange av desse som fullfører fagprøven veit ein ikkje før sommaren 2012. (Tal frå Nifu/Høst sin sluttrapport om praksisbrevforsøket http://www.udir.no/tilstand/forskning/forskningsrapporter/nifu/vellykket-forsok-med-praksisbrev/ Erfaringar frå dei involverte i fleksibel opplæring Elevane/lærlingane sin erfaringar: Ein av elevane ved Åsane vidaregåande var for eit par år sidan med i NRK Brennpunkt, der tema var fråfall i vidaregåande opplæring og alternative opplæringstilbod i Hordaland. Eleven uttrykte at han var godt nøgd med opplæringstilbodet. Elevar/lærlingar på Fitjar uttalte i fjor: Hadde ikkje vore i vidaregåande opplæring dersom vi ikkje hadde fått dette tilbodet! Ser betre samanheng mellom teori og praksis. Får jobberfaringar. Blir ikkje lei av skulen når me jobbar. Ikkje skule kvar dag. Føresette sine erfaringar: Skulane har hatt kontakt med dei føresette, men i ulik grad. Tilbakemeldingane frå skulane er at dei føresette også opplever fleksibel opplæring som eit godt tilbod for lite motivert ungdom. Skulen sine erfaringar: Dei involverte skulane har gjort eit stort arbeid med elevane/lærlingane i fleksibel opplæring. To av skulane har vald å ikkje starte nye klassar etter 2009. Årsaka til dette har både med søkjartal å gjere, og at skulane finn andre måtar å førebygge fråfall på. Fitjar har fått kontinuitet i tilbodet, og ser store fordelar med dette fordi tilbodet då vert kjent og føreseieleg. Dei siste åra har det vore relativt få interesserte til ordninga, men i år er det 10 elevar i klassen. Bedrifter og opplæringskontor: Læreverksemdene er ikkje med i prosjektorganisasjonen. Men i kontakten med bedriftene er dei positive til ordninga. OT/PPT har ikkje formidla så mange ungdommar til desse klassane som tenkt på førehand. Men tilbodet har heller ikkje vore tilgjengeleg ved så mange skular. OT meiner likevel at dette tilbodet er eit godt supplement til dei andre. Tilsvarande gjeld for NAV. Kun få ungdommar har vore kanaliserte frå NAV. Ekstern evaluering Ein masterstudent ved Universitetet i Bergen (sosiologisk institutt) vil skrive avsluttande oppgåve om prosjekt Fleksibel opplæring. Masteroppgåva blir ferdig til jul 2012. 7
Fleksibel opplæring framover Fleksibel opplæring er eit godt tilbod til ein del ungdom, sjølv om ein ved oppstart av prosjektet vona at fleire skulle fullføre ved hjelp av dette tilbodet. Hausten 2012 planlegg Fitjar og Askøy vgs å starte nye klassar tilsvarande hausten 2011. Ulike tilhøve må drøftast nærare når det gjeld vidareføring av tilbodet: Grensegang i høve til dei andre opplæringstilboda er viktig. Kva tilbod skal Hordaland ha, og for kva slags målgrupper. Dess fleire modellar dess vanskelegare blir det å orientere seg for elevar og føresette. Dette må vi sjå på. Praksisbrevordninga har vore utprøvd i fleire fylke, og resultata viser seg å vere gode. Denne ordninga er i praksis blitt fireårig, med muligheit for å ta fagbrev. Ei fireårig praksisbrevordninga har mykje til felles med fleksibel opplæring. Vi ønskjer å sette oss inn i detaljane i ordninga, og fortløpande vurdere dei to modellane opp mot kvarandre. Evt føringar frå Utdanningsdirektoratet vert avgjerande. Skal det satsast vidare på fleksibel opplæring etter 2012 må dette frå hausten 2013 av bli eit tilbod ved fleire skular, og i fleire fag, slik at vi kan nå flest mogleg ungdommar i målgruppa. Det må vurderast korleis dette skal skje i praksis. Tilbodet er i dag avhengig av eit visst søkjartal på Vg1, dette har sett avgrensingar for nye fleksibel-klassar. Den nye skulebruksplanen vil gi svar på om det kan bli enklare å få oppretta nye klassar. Prosjektperioden gikk ut sommaren 2011, men vart forlenga med eitt år slik at vi fikk betre tid til å vurdere Fleksibel opplæring i samband med satsinga på NyGiv. Fleksibel opplæring er no ein del av Oppfølgingsprosjektet i NyGiv. Dersom Fleksibel opplæring går over i ein ordinær driftsfase frå sommaren av, har NAV signalisert at dei ser si rolle som avslutta. Dette tyder at NAV ikkje lenger yter individstøtte til elevane frå nyttår første opplæringsår og i halvanna år. Dette kan kompenserast for ved at HFK gir meir tilskot til bedriftene, som igjen betaler løn til elevane. Detaljane i dette må drøftast nærare. 8