Gloppen kommune. Møteinnkalling. Utval: Formannskapet Møtestad: På Søreide Dato: Tid: Kl. 09:00

Gloppen kommune Møteinnkalling Utval: Formannskapet Møtestad: På Søreide Dato: 20.11.2017 Tid: Kl. 09:00 Den som har lovleg forfall eller er ugild i nokon av sakene, må melde frå så snart råd er til tlf. 57 88 38 00 eller til servicetorget@gloppen.kommune.no slik at varamedlem kan bli kalla inn. Varamedlem møter etter nærare innkalling. Gruppeleiarane i Høgre, SV og Miljøpartiet Dei Grøne blir kalla inn til budsjettsaka. Ordføraren ønskjer også å drøfte sak 111/17 om sal av Elvaneset med desse gruppleiarane sidan rådmannen gjer framlegg om å behandle saka etter hasteparagrafen i kommunelova. Sakliste Sak nr. Sakstittel 105/17 Godkjenning av møteprotokoll, innkalling og sakliste 106/17 Referat og orienteringssaker 107/17 Klage - Avslag på søknad om dispensasjon - Tilleggsareal bustadtomt Hovden bustadfelt 108/17 Statusrapport for 2. tertial 2017 109/17 Årsbudsjettet for 2018 110/17 Sal av eigendom på Elvaneset 111/17 Kommunen sitt delegasjonsreglement 112/17 Nye vedtekter for Nordfjord Havn IKS - merknader frå Gloppen kommune Sandane, 14. november 2017 Leidulf Gloppestad ordførar Jan Kåre Fure rådmann

Gloppen kommune Arkiv: FE - 033 JournalpostID: 17/14024 Saksbehandlar: Jan Kåre Fure Saksnr. Utval Møtedato 105/17 Formannskapet 20.11.2017 Godkjenning av møteprotokoll, innkalling og sakliste Ordføraren si tilråding: 1. Formannskapet godkjenner møteboka frå sitt møte den 6. november 2017 2. Formannskapet godkjenner innkallinga og saklista til møtet den 20. november 2017. Møteprotokollen frå siste møtet blir lagt fram til godkjenning. Samstundes ber ordføraren om godkjenning av innkallinga og saklista til dette møtet.

Gloppen kommune Arkiv: FE - 033 JournalpostID: 17/14291 Saksbehandlar: Jan Kåre Fure Saksnr. Utval Møtedato 106/17 Formannskapet 20.11.2017 Referat og orienteringssaker Rådmannen legg ikke fram tilråding i saka. Referatsaker Tittel Riksveg-ferjesambandet Rv651 Volda-Folkestad: Rutetilbod frå 2020 Avsendar/mottakar Eid kommune Orienteringssaker: Næringshalvtimen med AHDA design og arkitektur v/annemieke Koopmans-Holtrop. Frå politikardagen i fylkeskommunen 17. november Ordføraren orienterer. Ordet fritt...

Gloppen kommune Arkiv: GBNR - 81/2, FA - L33 JournalpostID: 17/13665 Saksbehandlar: Ann Mari Bjørlo Saksnr. Utval Møtedato 107/17 Formannskapet 20.11.2017 Klage - Avslag på søknad om dispensasjon - Tilleggsareal bustadtomt Hovden bustadfelt Vedlegg i saka: 26.09.2017 Klage på vedtak - tilleggsareal til bustadtomt Kort samandrag av saka Rådmannen tilrår at klage frå Rigmor Hafstad over formannskapet sitt vedtak i sak 084/17 av 18. september 2017 ikkje vert teken til følgje. Vedtak om avslag på søknad om dispensasjon etter pbl. 19-2 frå kommuneplanen sin arealdel for frådeling av areal frå gbnr. 81/2 vert oppretthalde. Klagen vert sendt Fylkesmannen i Sogn og Fjordane for avgjerd. Rådmannen si tilråding Formannskapet viser til rådmannen si utgreiing i klagesaka og tek klagen frå Rigmor Hafstad ikkje til følgje, jf. forvaltningslova 33. Gloppen kommune sitt vedtak i sak 084/17 av 18. september om avslag på søknad om dispensasjon frå Kommuneplanen sin arealdel for frådeling av areal frå gbnr. 81/2, vert oppretthalde. Klagen vert sendt Fylkesmannen i Sogn og Fjordane for avgjerd. Saksutgreiing Bakgrunn for saka Ved vedtak i sak 084/07 av 18. september 2017 avslo Gloppen formannskap søknad om dispensasjon frå kommuneplanen. Dispensasjonssøknaden var fremja i samband med søknad om frådeling av tilleggsareal til gbnr. 81/34. Det vart motteke klage over vedtaket den 26. september 2017. Fakta i saka Tom Asle Kvile søkte den 15. mai 2017 om løyve til frådeling av areal på om lag 70 m² frå hans eigedom gbnr. 81/2. Arealet skulle nyttast til oppføring av garasje til seksjonsnr. 1 på gbnr. 81/34 i Hovden bustadfelt, eigd av Rigmor Hafstad. Gbnr. 81/34 har eit matrikkeført areal på 878 m² og på eigedomen er det oppført ein tomannsbustad med bakgrunn i søknad motteken 16. april 2012 og løyve gjeve den 23. mai 2012. Det var då samstundes innteikna ein garasje med eit BYA på 36 m². Ut frå situasjonsplanen og seinare seksjoneringssak skulle denne tene som garasje for begge bustadeiningane.

Utsnitt frå situasjonskart frå søknad om løyve Flyfoto, dagens situasjon I brev av 12. juni 2017 orienterterte kommunen partane om at det omsøkte arealet ligg i LNFområde, og at det difor var naudsynt med ein søknad om dispensasjon eller planendring. Søknad om dispensasjon vart motteken den 21. juni 2017. I grunngjevinga vart det vist til at det ikkje er tilstrekkeleg med plass til garasje for to bilar på gbnr. 81/34. Det aktuelle arealet er regulert til «planlagd bustadområde» i gjeldande plangrunnlag, som er arealdelen i kommuneplanen for Gloppen kommune 2009-2020 vedteken 12. oktober 2009. I føresegnene punkt 4.2 nr. 1 er det vidare lagt til grunn at «For alle nye byggeområde er det krav om reguleringsplan før tiltak [ ] kan gjennomførast». Det går fram av tekstdelen til kommuneplanen at området er meint sett av som ei utviding av Hovden bustadfelt, nr. 58 på plankartet. Utsnitt frå kommuneplankartet med aktuelt område. Utsnitt frå situasjonsplan i søknad om deling markering av Formannskapet avslo søknaden ved vedtak av 18. september 2017, etter å ha gjennomført synfaring av eigedomen og det aktuelle tilleggsarealet. I vurderinga av om vilkåra etter pbl. 19-2 var oppfylt, la kommunen i saksutgreiinga vekt på at det er plass til å føre opp ein garasje på gbnr. 81/34, samt at delinga vil kunne påverke utnyttinga av det framtidige bustadområdet som det aktuelle arealet skal vere ein del av. Rigmor Hafstad har klaga over vedtaket. Ho peikar innleiingsvis på at kommunen har gjeve ulike opplysningar om planstatus i starten av prosessen. Som grunnlag for klagen viser klagar til at det ikkje er korrekt at det er 4 meter frå huset til nabogrense. Vidare meiner klagar at det ikkje er mogeleg å byggje ein garasje på dei alternative områda slik kommunen legg til grunn, då ho ønskjer at bygget også skal romme ekstra lagerplass. Klagar meiner også at det er naturleg at seksjonane har garasje på kvar si side av bygningen. Avslutningsvis finn klagar det vanskeleg å forstå at frådeling av

tilleggsarealet skal bli stogga på grunn av mogeleg framtidig utbygging av bustadfeltet, all den tid det i saksutgreiinga vert vist til at det aktuelle arealet mest truleg ikkje vil gje nokre konsekvensar for tomteutnyttinga av området dersom det vert vidare utbygging. Økonomiske konsekvensar for kommunen Ingen. Rådmannen si vurdering Slik saka er opplyst skal klagar etter avtale med grunneigar erverve arealet som er omsøkt frådelt. Kommunen legg difor til grunn at klagar har rettsleg klageinteresse, jf. forvaltningslova av 10.02.1967 28 første ledd. Klagen er rettidig, jf. forvaltningslova 28. Spørsmålet er om vedtak om avslag om dispensasjon skal opphevast eller endrast på grunnlag av motteken klage, jf. forvaltningslova 33 andre ledd. Rådmannen seier seg lei for at det vart gjeve feil informasjon om planstatus i brevet av 12. juni 2017, men kan ikkje sjå at dette har verka inn på klagar sin søknad om dispensasjon eller kommunen si vurdering av saka. Klagegrunnane knyter seg til vurderinga av om vilkåra for dispensasjon i pbl. 19-2 andre ledd er oppfylt. Vurderingstema er då for det første om omsyna bak reguleringa av det aktuelle arealet til «framtidig bustadområde» med plankrav vert «vesentlig tilsidesatt» ved at dette vert skilt frå og nytta som garasjetomt for gbnr. 81/34 seksjon nr. 1. Føremålet med reguleringa er å sikre areal for utviding av Hovden bustadfelt for utlegging av fleire bustadtomter, herunder at desse skal kunne regulerast på ein tenleg måte til gode for framtidig utbygging. Klagar anfører at desse omsyna ikkje vert tilsidesett, og syner til at kommunen i saksutgreiinga skriv at «Det er uvisse knytt til konsekvensane for framtidig bustadareal i kommuneplanen, sjølv om konsekvensane mest truleg er små.» Til dette viser rådmannen til dei øvrige vurderingane i saksutgreiinga, der det går fram at denne formuleringa har som utgangspunkt at elva vil utgjere ei naturleg plangrense, men at dette ikkje kan leggast til grunn då det ikkje er laga ei planskisse for ei eventuell utviding av Hovden bustadfelt. Avgjerande for kommunen si vurdering er at det ikkje bør leggjast potensielle hindringar for seinare planar om effektiv og god bustadutnytting av dette området. På denne bakgrunn fastheld rådmannen sitt syn på at ei deling vil «vesentleg» setje til side føremålsreguleringa av det aktuelle området. Vidare er spørsmålet om fordelane ved å dele frå dette arealet til bruk som garasjetomt for gbnr. 81/34 er «klart større enn ulempene etter en samlet vurdering». Lovgjevar har lagt til grunn at aktuelle fordelar må liggje innanfor rammene av pbl., slik at det i utgangspunktet er areal- og ressursdisponeringsomsyn som kan grunngje ein dispensasjon. Eit dispensasjonsvedtak kan normalt ikkje grunngjevast med privatrettslege og personlege grunnar. Sivilombodsmannen har vidare i sak SOM-2015-3269 lagt til grunn at: «Det er under enhver omstendighet ikke tilstrekkelig for å innvilge dispensasjon at ulempene ved dispensasjonen eventuelt skulle være beskjedne. Fylkesmannen må vurdere de fordelene og ulempene ved dispensasjonen som gjør seg gjeldende i saken. Vurderingen må vise at det foreligger relevante, klare og positive fordeler som er "klart større" enn ulempene dispensasjonen fører til. Lovens vilkår om kvalifisert interesseovervekt krever at de relevante fordelene må ha stor vekt dersom vilkåret skal være oppfylt».

Kommunen har i sak 084/17 lagt til grunn at klagar ikkje har eit særleg behov for det aktuelle arealet, då det er mogeleg å føre opp garasje på gbnr. 81/34, slik opphavleg omsøkt og seksjonert i 2012/2013. Det er herunder peika på at det omsøkte tilleggsarealet ikkje framstår som ei naturleg utviding av tomten. Klagar anfører at det ikkje er korrekt at det er tilstrekkeleg areal for garasje på gbnr. 81/34, då det er ønskjeleg med eit større bygg som også rommar ekstra lagerplass, samt at det er naturleg at kvar av tomannsbustadene har garasje på kvar si side av bygget. I vurderinga vert det lagt til grunn at ulempene knyter seg til konsekvensane for seinare utviding av bustadfeltet, jf. ovanfor. Fordelane knyter seg til at klagar får eit større bygg med lagerplass, samt at tomten får meir ledig areal. Rådmannen kan ikkje sjå at klagen gjev grunnlag for ei endra vurdering på dette punkt, og viser til saksutgreiinga i sak 084/17 og ovannemnde rettslege utgangspunkt. Situasjonsplanen i søknaden av 2012 synleggjer at at det mogeleg å etablere ein garasje på gbnr. 81/34. Det er i det høve eit poeng at tomtestorleik- og utforming ikkje synes å vere endra sidan dette tidspunkt. Ekstra lagerplass bør i tillegg kunne løysast på anna måte enn ved bygging av ein større garasje. I denne saka meiner rådmannen difor at areal- og ressursdisponeringsomsyn talar for at dispensjon ikkje skal gis, då det veg tyngre å sikre ei god planlegging av det framtidige bustadområdet enn at klagar får anna utnytting av tomten og ekstra lagerplass. Rådmannen finn at klagar sine fordelar ved å byggje ein større garasje utanfor eigen eigedom etter ei samla vurdering ikkje er «klart større» enn ulempene ved å disponere eit areal som er regulert til planlagd bustadområde. På grunnlag av ovannemnde er det rådmannen si tilråding at klagen ikkje vert teken til følgje og at saka vert sendt Fylkesmannen i Sogn og Fjordane for avgjerd.

Gloppen kommune Arkiv: FE - 212, HIST - 16/534 JournalpostID: 17/13978 Saksbehandlar: Jan Kåre Fure Saksnr. Utval Møtedato 036/17 Helse- og omsorgsutvalet 15.11.2017 034/17 Oppvekstutvalet 15.11.2017 087/17 MULTEK-utvalet 16.11.2017 108/17 Formannskapet 20.11.2017 Kommunestyret Statusrapport for 2. tertial 2017 Vedlegg i saka: 07.11.2017 Rapport 2-2017 Rådmannen si tilråding Kommunestyret tar rapporten for 2. tertial til orientering. Saksutgreiing Bakgrunn for saka Vedlagt er ein kort statusrapport for 2. tertial (januar til august) 2017. Rådmannen har som sist laga ein samla rapport for alle sektorane, med mellom anna oversikter over skatteinngang, bruk av disposisjonsfond og sjukefråværet. Nytt av året er ein status for investeringsprosjekta. Når det gjeld sjukefråværet, kan det leggast fram detaljerte tal for kvart ansvar i budsjettet. Mange av ansvara har så få tilsette at slike detaljerte rapportar ikkje kan leggast fram i opne saker og drøftast i opne møte. --- Rådmannen sin hovudkonklusjon for 2. tertial er at det blir vanskeleg å unngå eit underskot på 2017- rekneskapen. Sjølv om vi har ein gledeleg auke både i folketal og skatteinntekter, aukar utgiftene meir enn rekna med. Det er naturleg nok dei store sektorane som slit med å halde budsjettet. Eg viser til kommenrtarane i rapporten. Investeringsoversikta viser som tidlegare år at vi er for optimistiske når det gjeld oppstart og framdrift på nokre av prosjekta. Vi greier ikkje å bruke så mykje pengar som budsjettert i oppstartsåret. Rådmannen kjem tilbake til kommunestyret med sluttrapport på enkeltprosjekt i lag med rekneskapsavslutninga for 2017. Det er nødvendig å betre den økonomiske styringa og oppfølginga av prosjekt. Dette gjeld både på driftssida og på investeringssida. Rådmannen meiner vi i løpet av 2018 bør få på plass ei controllerstilling på økonomiavdelinga, gjerne som ein trainee. Eg er heilt sikker på at vi vil ha igjen for dette økonomisk. Ei slik stilling både kan og bør finansierast som ein del av alle prosjekta. Rådmannen vil

kome tilbake til saka. --- Rådmannen seier seg lei for at rapporten ikkje har vore lagt fram tidlegare. Det skal bli betre til neste år. Saka blir lagt fram til orientering.

Gloppen kommune Arkiv: FE - 151, HIST - 16/971 JournalpostID: 17/14121 Saksbehandlar: Saksnr. Utval Møtedato 038/17 Helse- og omsorgsutvalet 15.11.2017 036/17 Oppvekstutvalet 15.11.2017 091/17 MULTEK-utvalet 16.11.2017 028/17 Rådet for menneske med nedsett funksjonsevne 20.11.2017 019/17 Eldrerådet 20.11.2017 109/17 Formannskapet 20.11.2017 Årsbudsjettet for 2018 Vedlegg i saka: 11.11.2017 Rådmannen sitt framlegg til årsbudsjett for 2018 Rådmannen si tilråding Rådmannen kjem ikkje med tilråding i saka i denne fasen av budsjettarbeidet. Saksutgreiing Bakgrunn for saka Rådmannen presenterte sitt framlegg til årsbudsjett for 2018 for kommunestyret den 13. november i år. Det er formannskapet som kjem med framlegg til kommunestyret om årsbudsjett for neste år. Som vanleg er det lagt opp til at råda og hovudutvala kjem med uttale til budsjettframlegget før formannskapet gjer vedtak om utlegging til offentleg gjennomsyn. Saksutgreiing: Rådmannen skriv dette i samandraget i budsjettdokumentet: Rådmannen sitt framlegg til årsbudsjett for 2018 er balansert ved å bruke 7,9 millionar av disposisjonsfondet. Det er likevel ei klar målsetting at det ikkje skal vere nødvendig å bruke dette beløpet til neste år. Dette føreset at rådmannen med sine leiarar, i fellesskap med dei folkevalde, i løpet av vinteren tar ein totalgjennomgang av kommunen si drift. Målsettinga må vere i første omgang å balansere 2018-budsjettet utan å bruke disposisjonsfondet til ordinær drift, og i tillegg sjå på ytterlegare tiltak som kan gje rom for dei investeringane som no er utsette. Tiltaka som skal balansere 2018-budsjettet må vere klare før påske. Det er fleire årsaker til at rådmannen ikkje har greidd å legge fram eit framlegg til årsbudsjett utan å legge inn bruk av disposisjonsfondet: Tilskotet/refusjonen for mottak og busetting av flyktningar går vesentleg ned i høve til 2017, både som følgje av at flyktningane våre no har budd her så lenge at tilskotet tar slutt, og som følgje av omlegginga av tilskotet til mindreårige asylsøkjarar. Vi har ikkje greidd å ta ned utgiftene så mykje som inntektsnedgangen på til saman 8,5 mill. tilseier. I 2017 kom det såkalla Myklebusttunet på Kleivedammen i drift. Føresetnaden som vart

lagt til grunn både i budsjettet for 2017 og i sist vedtekne økonomiplan om drift av tilbodet har ikkje vore råd å gjennomføre. Drifta av det nye tilbodet kostar rundt 5 mill. i året. Vi har i ei årrekkje lagt alt for lavt tilskot til private barnehagar inn i budsjettet. I 2017 er feilbudsjetteringa rundt 6 mill. I framlegget for 2018 er dette korrekt budsjettert. Tenestene kommunane yter på oppvekstområdet og helse- og omsorgsområdet er i all hovudsak styrde av lovfesta rettar og sentrale reglar. Tilboda kan ikkje takast vekk eller reduserast med grunngjeving i manglande budsjettmidlar. Det er eit faktum at vi ikkje kan drive desse tenestene utan meir ressursar når talet på barn og elevar og behovet for kommunal omsorg aukar. Dette er hovudårsaka til at kommunebudsjetta landet rundt ikkje går i hop når løyvingane ikkje aukar meir enn lønns- og prisveksten og knapt nok det. Tiltak og forutsetningar i rådmannen sitt framlegg I budsjettframlegget er det gjort tiltak og lagt inn fleire forutsetningar for å kome ned på den bruken av disposisjonsfondet som ligg no inne: Skatteveksten ut over det budsjetterte i 2017 (på 5,5 mill. per oktober) er vidareført til 2018 Tilbodet og tiltaka til tidlegare mottekne flyktningar er redusert noko, men ikkje så mykje som inntektsnedgangen tilseier Det er budsjettert optimistisk for lønnsveksten i 2018. 2 % auke er lagt inn frå 1. mai Lønnskostnadene til nokre tilsette som jobbar mykje med prosjekt er ført på prosjekta. Samanlikna med 2017 er dette auka med 1,5 mill. Styret i Trivselshagen har lagt inn ein kraftig auke i husleiga i høve til 2017. For kommunen utgjer auken 1,3 mill. Berre auke for lønns- og prisvekst er lagt inn. Det betyr at styret for Trivselshagen må ta igjen sitt budsjett På grunn av seinare framdrift på nokre av investeringsprosjekta er det lagt inn seinare låneopptak og 1 mill. mindre i avdrag Det er budsjettert optimist på utbytte og på sal av konsesjonskraft Auken i eigedomsskatten på bustader og fritidseigedomar er lagt inn som forutsett i økonomiplanen. Utover dette er 2018-budsjettet i all hovudsak ei vidareføring av drifta frå 2. halvår 2017. Mottak av flyktningar Det er lagt til grunn at vi tar imot 15 nye flyktningar i 2018 slik staten har bede om. To av desse er mindreårige asylsøkjarar. I tillegg til dette kan kome familie til flyktningar som alt er busette her. Dette er ikkje lagt inn i budsjettet, verken på inntekts- eller utgiftssida. Gjennomgangen som Gloppen kommune har vore med på som ein del av berekningsutvalet sitt arbeid med å kartlegge kommunane sine inntekter og kostnader med mottak og busetting av flyktningar, viser at vi går om lag i balanse så lenge staten betalar tilskot. Med god intergering og sysselsetting bør vi då ikkje har ekstrautgifter på mottak av flyktningar. Vi er ikkje der i 2018- budsjettet, men målsettinga må vere å kome dit i den gjennomgangen som rådmannen varsla innleiingsvis. Nye stillingar I budsjettet for 2017 la vi for første gong inn ei oversikt over kor mange årsverk som ligg i budsjettframlegget og samanlikna dette med talet på årsverk i budsjettet frå året før. I årets budsjett ligg det vel 497 årsverk. Tilsvarande for 2017-budsjettet var vel 486 årsverk. Auken er altså nesten 11 årsverk. Mesteparten av dette er i helse og omsorg. I kap. 6 er endringane i årsverk kommentert og forklart. Auken i årsverk har i stor grad skjedd i løpet av budsjettåret 2017. Investeringsbudsjettet

Sjølv om rådmannen gjer framlegg om å utsette rehabiliteringa av skuleanlegget i Hyen og bygginga av nytt omsorgsbygg, kjem framlegget til investeringsbudsjett for 2018 på nesten 116 mill. Oppsummert ser framlegget slik ut: Sum Finansiering investering Momskomp. Tilskot/ref. Fond Gamle lån Nye lån Sum finansiering Bustader og 18.000-400 -11.500 3.280-380 -9.000-18.000 bustadfelt VAR-området 31.300 - -31.300 31.300 Andre investeringar 66.500-12.600-1.700 - -5.640 - -67.000 1.500 45.060 SUM 115.800-13.000-13.200 1.780-6.020-85.360 115.800 Samla låneopptak er 85,4 mill. Av dette beløpet er vel 25 millionar investeringar som ikkje gjev inntekter som dekkjer renter og avdrag. Dei største prosjekta er i 2018: Prosjekt Budsjettert Beløp i Merknad kostnad 2018 Nytt industribygg 26 mill 26 mill Leigeinntektene skal dekke alle utgiftene Renseanlegget på 27,4 mill 23,4 mill Gebyret skal dekke alle utgiftene Byrkjelo Heradshuset 27,8 mill 14 mill Forsikringa dekkjer 40% av totalsummen (27,8 mill) Ombygging av dagsenteret 12,5 mill 9,2 mill Gjev husleige for 4 nye husvære Oppdatert kostnadsoverslag for nytt omsorgsbygg er i underkant av 81,3 mill. Vi har ikkje oppdaterte tal for skuleanlegget i Hyen. I økonomiplanen er kostnaden lagt inn med knapt 53,8 mill.

Gloppen kommune Arkiv: FE - 611, HIST - 16/188 JournalpostID: 17/13963 Saksbehandlar: Kjell Petter Solhaug Saksnr. Utval Møtedato 110/17 Formannskapet 20.11.2017 Sal av eigendom på Elvaneset Vedlegg i saka: 13.11.2017 Kjøpekontrakt - Elvaneset - Endeleg versjon - 13.11.2017 Rådmannen si tilråding Gloppen formannskap godkjenner for kommunen sin den vedlagde avtale med Fellesskapet Elvaneset AS. Vedtaket er gjort i medhald av 13 i kommunelova. Saksutgreiing Bakgrunn for saka Rådmannen orienterte formannskapet i sak 43/17 om ei mogeleg utbygging på Elvaneset, og rådmannen blei då beden om å arbeide vidare med saka. Det ligg no føre eit utkast til avtale mellom Gloppen kommune og Fellesskapet Elvaneset AS (under namnendring frå Athomstart Invest 150 AS, org. 818 054 432). Bak Fellesskapet Elvaneset AS står K-A Holding AS, org. 817 367 712, og i styret for Fellesskapet Elvaneset AS, sit Kristian Aamund Petersen (styreleiar) og Jesper Melin Ganc-Petersen. Fakta i saka Kommunestyret behandla i sak 94/16 innløysinga av det tidlegare industribygget på Elvaneset, kor det i saksutgreiinga også blei opplyst om kostnaden for kommunen for å få hand om alt på Elvaneset. Etter desember 2016 har rådmannen jobba med ei utvikling av bustadområdet på Elvaneset, regulert gjennom ein intensjonsavtale med Jesper Meling Granc-Petersen, som representant for framtid kjøpar av området. Kjøpar har presentert eit forslag til utbygging av Elvaneset, som igjen dannar grunnlaget for arbeidet med denne avtalen. Området på Elvaneset er regulert til bustadformål i reguleringsplan planid. 201207 Vonheim Storebrua. Sidan planen var vedteken er det fleire ulike aktørar som har gjort forsøk på å få til ei utbygging utan å lukkast. Det er truleg mange grunnar til dette, men ein av dei grunnane som er nemnd har vore store grunninvesteringar tidleg i prosjektet. Denne avtalen har prøvd å ta omsyn til nokre av dei faktorane som ofte kan ha negativ innverknad på oppstarten. Heile avtaleutkastet ligg som vedlegg til denne saka, slik at det nedanfor er berre medteke hovudelementa frå sjølve avtalen: Kommunen sel gnr. 77 bnr. 692 og 179 (inkl. fnr. 1), og eigedommen skal overtakast slik den er. Kjøpar skal dekke alle kostnader med opparbeiding av tomt, inkl. riving av eksisterande

bygningsmasse og flytte trafo. Kjøpar har all risiko for reguleringsendringar Som vederlag for tomta, skal kommunen overta ein bustad til ein marknadsverdi på minimum 4 mill. Kommunen stiller denne bustaden til disposisjon som ein visningsbustad for ein avtalt periode (maks 18 mnd.) Kommunen skal byggjer ut vatn og avløp i vegen frå Fv 615, til kaia. Kommunen har ansvaret for evt. forureining i grunn og sjøsediment. Overtaking er sett til 1. desember 2017. Kommunen har ein rett (ingen plikt) til å kjøpe tilbake eigedommen dersom det ikkje har vore byggestart innan tre år eller dersom det har vore stopp i byggearabeidet meir enn i to år. Dersom kommunen nyttar seg av denne retten, skal kommunen dekke alle dokumenterbare kostnader. Økonomiske konsekvensar for kommunen Som det går fram av k-sak 94/17 har Gloppen kommune brukt 4,04 mill. på å kjøpe tilbake eigendomane på Elvaneset. Denne avtalen vil gje kommunen eigedomsretten til ein bustad på området til ein marknadsverdi på minimum 4 mill. Kommunen sine kostnader med utbygging av vatn og avløp vil inngå i sjølvkostområdet. Rådmannen si vurdering Elvaneset som område er for fint til å ligge ubebygd, og rådmannen vurderer dette som eit godt og realistisk prosjekt som kan føre til at ei utbygging kjem i gang. I dei skissene som er presenterte er det vist i alt 14 bustader, men dette kan nok endre seg setter kvart som prosjektet blir utvikla. Eit prosjekt som består av fleire ulike einingar, opnar for at prosjektet kan byggast ut i etappar, som igjen reduserer risikoen for utbyggar. Denne avtalen prøver å ta høgde for dei faktorane som kan ha negativ innverknad på oppstarten av eit prosjektet, som til dømes framtunge betalingsplanar. Dette prosjektet går inn i rekka av andre kommunale bustadprosjekt, der målet er å prøve å få dekka kostnadene i prosjektet ved eit sal av eigendomen. Gevinsten ved at det blir gjennomført ei utbygging vil vere betydeleg større enn eit konkret sal av sjølve eigedomen. Rådmannen har ikkje gått breidt ut i marknaden i forkant av denne avtalen, men har forhandla med den aktøren som har teke kontakt og vist interesse for området. Rådmannen håpar at denne avtalen er det siste kapittelet i «soga om Elvaneset». Grunnen til dette er at det verkar for at det er ein stor positivitet i bustadmarknaden i og rundt Sandane, og kjøpar har frå andre område vist stor gjennomføringsevne. Ut ifrå dei skissene som er presenterte, ligg det føre planar om å tilby «noko nytt» til marknaden. Spennande bustader på ei flott tomt ved sjøen, har aldri vore feil. Utbyggar er ivrig etter å kome i gang. Rådmannen håpar derfor at formannskapet går med på å godkjenne avtalen etter 13 i kommunelova den såkalla hasteparagrafen.

Gloppen kommune Arkiv: FE - 044, HIST - 14/944 JournalpostID: 17/12318 Saksbehandlar: Jan Kåre Fure Saksnr. Utval Møtedato 037/17 Helse- og omsorgsutvalet 15.11.2017 035/17 Oppvekstutvalet 15.11.2017 090/17 MULTEK-utvalet 16.11.2017 Administrasjonsutvalet 111/17 Formannskapet 20.11.2017 Kommunestyret Kommunen sitt delegasjonsreglement Vedlegg i saka: 27.09.2017 Rådmannen sin instruks - Gloppen kommune 07.11.2017 Delegasjonsreglement for Gloppen kommune Rådmannen si tilråding Kommunestyret viser til rådmannen si saksutgreiing og 1. godkjenner for sin del delegasjonsreglementet for Gloppen kommune slik det er presentert i saka 2. tar til orientering den delegasjonen av oppgåver og mynde som rådmannen har gjort til sin administrasjon 3. opphevar rådmannen si instruks frå 1994. Kommunestyret viser til pkt 3 i sitt vedtak i sak 81/16 der tilrådingsretten i saker som blir lagt fram for folkevalde organ blir lagt til rådmannen. Unntaket frå dette er saker til kontrollutvalet og saker som gjeld val av folkevalde til verv og representasjon. Saksutgreiing Bakgrunn for saka Etter 39, nr 2 i kommunelova skal kommunestyret sjølv «vedta reglement for delegasjon av avgjørelsesmyndighet og for innstillingsrett innen 31. desember året etter at kommunestyret og fylkestinget ble konstituert». Ei sak om dette vart lagt fram for kommunestyret den 26. september i 2016, og slikt vedtak vart gjort: 1. ( ) 2. Kommunestyret er innforstått med at rådmannen ikkje greier å legge fram eit delegasjonsreglement til politiske behandling innanfor den fristen kommunelova fastset, men ber rådmannen ha klart eit framlegg til politisk behandling seinast 1. mars 2017. 3. Kommunestyret vidarefører ordninga med at rådmannen tilrår i alle saker som blir lagt fram for folkevalde organ, unnateke kontrollutvalet, og vidare unnateke i saker som gjeld val av folkevalde til verv og representasjon. 4. Kommunestyret er samd rådmannen i at saka om ny instruks for rådmannen blir utsett til ny kommunelov er vedteken.

I samband med gjennomgangen av forvaltningsrevisjonsrapporten om saksgang og dokumenthandtering i kommunestyret den 15. juni i år vart fristen for å legge fram delegasjonsreglementet utsett til 31. desember 2017. Fakta i saka Rådmannen sitt framlegg til delegasjonsreglement er no klart. Reglementet er omfattande og er best tilgjengeleg på nettet under denne linken: https://delegering.kommuneforlaget.no/delegering/publikum?orgid=1445 Reglementet som ligg ved saka er ein utskriftsversjon, som ikkje er fullstendig. Reglementet brukar Kommuneforlaget sitt program KF Delegering. Dette programmet tar utgangspunkt i at det er mynde etter lovverket som skal delegerast. Rådmannen har supplert reglementet med det regelverket kommunen sjølv har vedteke slik at delegasjonsreglementet blir komplett. Til reglementet høyrer det ein framsidetekst som ikkje er med i papirversjonen, altså i vedlegget til saka. Denne ser slik ut: Dette er Gloppen kommune sitt delegasjonsreglement. I utgangspunktet er all kommunal avgjerdsrett lagt til kommunestyret. Fullmakter til administrasjonen frå folkevalde organ skal gjevast til rådmannen og ikkje direkte til andre tilsette. Dette følgjer av 23, 4. ledd i kommunelova. I reglementet ser du korleis avgjerdsretten er delegert. Delegering inndelt etter lovheimel finn du på venstre side og delegering inndelt etter organisasjonsstruktur finn du på høgre side. Sjå retningslinjene for bruk av delegert mynde. Sjå også - reglement for saksbehandling i folkevalde organ og - reglar for saksbehandling. Kommunen sin organisering Gloppen kommune er administrativt inndelt i to nivå under rådmannen: Nivå 1 er sektorleiarane og nivå 2 er einingsleiarane. Organisasjonssjefen har status som sektorleiar. Sektorleiarane er rådmenn for sine fagområde. Til saman utgjer rådmannen og sektorleiarane rådmannen si leiargruppe. Det er to typar «boksar» i organisasjonskartet: Boksar med heil strek rundt er ei organisatorisk eining, medan boksar med stipla linje anten er avdelingar eller funksjonar. Dei organisatoriske einingane har sjølvstendig ansvar for eigen økonomi, administrasjon og personell. Leiaren har eige budsjettansvar med tilhøyrande tilvisingsrett i økonomisystemet og er plassert i kap. 3.4.1 (sektorleiarane) og 3.4.2 (einingsleiarane) i hovudavtalen. Ansvar og oppgåver som etter lovverket er lagde til ein "institusjon" eller ei "teneste", t.d. ein skule etter opplæringslova eller til barnevernstenesta, er lagde til einingsleiar for "institusjonen" eller "tenesta", altså til rektor når vi snakkar om ein skule og til barnevernsleiar når vi snakkar og barnevernstenesta. Avdelingane og funksjonane i organisasjonskartet har som regel eigen fagansvarleg, men har ikkje sjølvstendig personal- eller økonomiansvar. Dette ansvaret litt til leiaren av eininga over. Spesielt om klage Reglane om klage og omgjering av vedtak følgjer av forvaltningslova. Klageorgan på enkeltvedtak etter særlov er Fylkesmannen. Dette gjeld uavhengig av kva kommunalt organ eller stilling som har gjort vedtaket.

Ein klage skal først behandlast av den som har fatta vedtaket det blir klaga på. Dette er behandling av klagen i underinstansen. I administrative vedtak, der Fylkesmannen er klageorgan, er det aktuelle hovudutvalet underinstans i klagesaka, dersom klagen ikkje er ein brukar-, pasient-, klient- eller elevklage. Klage på avslag om skuleskyss skal likevel behandlast av oppveksutvalet som underinstans. Godkjenning og oppdatering Kommunestyret sjølv skal etter kommunelova 39, nr 2 vedta delegasjonsreglementet i kvar valperiode. Dette er sist gjort i k-sak xx/17. Delegasjonsreglementet blir oppdatert fortløpande av rådmannen. Siste oppdatering er 18. oktober 2017. Slik rådmannen ser det, er det ikkje laga noko «ny rett» i reglementet. Kva som er meint med formuleringa i 11 i rådmannen sin gamle instruks om at «rådmannen har ei generell fullmakt til å utføre oppgåver og fatte vedtak på kommunen sine vegne i alle kurante saker etter særlov, dersom oppgåvene ikkje etter lova er lagt til spesielle organ», er no konkretisert. Det går tydeleg fram kven som «er kommunen» i dei lovparagrafane som opnar for delegering. Viss ikkje noko er sagt, er det kommunestyret som er kommunen. Rådmannen er klar over at ikkje alt kommunalt regelverk er oppdatert, men legg ikkje opp til ein gjennomgåande revisjon av dette. Meininga er å ajourføre det lokale regelverket når ei sak gjer dette aktuelt. Det kommunale regelverket er samla i ein lokal «lovdata»-base, som er lett tilgjengeleg både på heimesida vår og på intranettet. Økonomiske konsekvensar for kommunen Ingen som direkte følgjer av denne saka. Rådmannen si vurdering Rådmannen er sjølvsagt lei seg for at det har gått så lang tid før delegasjonsreglementet har vore klar til politisk behandling. Som det forhåpentlegvis går fram av saka, ligg det eit stort og omfattande arbeid bak det reglementet som rådmannen no legg fram. Dette er sjølvsagt årsaka til at reglementet ikkje har kome før. Rådmannen har forhøyrt seg med nabokommunane om deira syn på ein instruks for rådmannen. Ingen av Nordfjord-kommunane har oppdaterte instruksar for rådmannen, og fleire seier i si tilbakemelding av det er delegasjonsreglementet som gjeld og at dette erstattar behovet for ein rådmannsinstruks. Rådmannen tilrår at dette blir gjort på same måten i Gloppen. Eg tilrår derfor at kommunestyret opphevar rådmannen sin instruks frå 1994 når delegasjonsreglementet no blir vedteke. Det følgjer av kommunelova 23, 4. ledd at folkevalde organ berre kan delegere fullmakter og oppgåver til rådmannen, og ikkje direkte til andre i administrasjonen. Når rådmannen no legg fram eit samla delegasjonsreglement til godkjenning, som også viser korleis rådmannen har delegert sine oppgåver og fullmakter, endrar dette sjølvsagt ikkje desse formalitetane. På same måte som folkevalde berre kan delegere til rådmannen, delegerer rådmannen ikkje forbi sine sektorleiarar. Når reglementet t.d. viser utmarksforvaltaren sine fullmakter, går det tydeleg fram at fullmakta går via teknisk sjef og landbrukssjefen ikkje direkte frå rådmannen til utmarksforvaltar. Rådmannen vil oppdatere reglementet forløpande, både når det kjem lovendringar og når det blir gjort nye delegeringsvedtak. For ordens skuld tar rådmannen med i tilrådinga punktet om tilrådingsrett/-plikt slik at saka samla

omhandlar dei forholda som 39, nr 2 i kommunelova seier noko om.

Gloppen kommune Arkiv: HIST - 15/1272, FA - P00 JournalpostID: 17/14198 Saksbehandlar: Jan Kåre Fure Saksnr. Utval Møtedato 112/17 Formannskapet 20.11.2017 Nye vedtekter for Nordfjord Havn IKS - merknader frå Gloppen kommune Vedlegg i saka: 09.11.2017 Møteprotokoll for nye vedtekter 9. november 2017 Rådmannen si tilråding Gloppen kommune v/formannskapet har ingen merknader til protokollen frå møtet den 9. november 2017 mellom ordførarane og rådmennene i medlemskommunane i Nordfjord Havn IKS, og ber om at nye vedtekter for hamnesamarbeidet blir utarbeidde i samsvar med konklusjonane frå møtet. Slik Gloppen kommune tolkar vedtektene kan ikkje Stryn kommune ta over Eid kommune sine plikter ved uttredetidspunktet og dermed held Eid kommune fram med å vere ansvarleg for sin del (13 %) av gjelda til Nordfjord Havn IKS på utmeldingstidspunktet. Stryn kommune heftar med 26 % for ny gjeld tatt opp etter at Eid kommune gjekk ut av Nordfjord Havn IKS. Saksutgreiing Bakgrunn for saka Eid kommune si utmelding av Nordfjord Havn IKS gjer det nødvendig å endre vedtektene for det interkommunale selskapet. Etter litt fram og tilbake, ser det no ut som om dei attverande eigarane: Vågsøy, Selje, Stryn og Gloppen kommunar er samde om korleis vedtektene skal endrast som følgje av Eid si utmelding. Fakta i saka Eid kommune si utmelding av Nordfjord Havn IKS gjer det nødvendig å endre vedtedtekene på i alle fall to område: styresamansettinga og eigardel. Etter vedtak i hamnerådet 19. juni i år vart eit framlegg til nye vedtekter sendt ut der eigardelane vart endra slik: - Vågsøy kommune, frå 48 % til 49,99 % - Gloppen, Stryn og Selje kommunar, frå 13 % til 16,67 %. I framlegget vart styret og hamnerådet redusert frå sju til fem medlemmer, der Vågsøy fekk to og dei tre andre kommunane ein kvar. I arbeidet med nye vedtekter har det i alle fall frå Gloppen si side blitt stilt spørsmål om korleis Eid kommune sin del av gjelda til Nordfjord Havn IKS ved utmeldingstidspunktet er handtert. Både lova om interkommunale selskap og vedtektene til Nordfjord Havn IKS seier korleis dette skal handterast. Ein kommune som melder seg ut vil halde fram med å vere ansvarleg for sin del av fellesgjelda på utmeldingstidspunktet. Derfor kan ikkje dei attverande kommunane utan vidare auke

opp sin eigardel og dermed også sitt gjeldsansvar slik det vart gjort i framlegget frå hamnerådet. For å samordne dei attverande kommunane si behandling av saka var ordførarane og rådmennene inviterte til eit møte i Måløy 9. november i år. På grunn av møtekollisjonar for ordførar og budsjettarbeid for rådmannen, representerte Svein-Ottar Sandal frå formannskapet og organisasjonssjef Geir Liavåg Strand Gloppen kommune på møtet. Protokollen frå møtet ligg ved. Møtet om vedtekene i Måløy konkluderte altså med at Stryn kommune tar over Eid kommune sin eigardel i Nordfjord Havn IKS og Eid kommune sin plass i styret og hamnerådet. Slik Gloppen kommune tolkar vedtektene kan ikkje Stryn kommune ta over Eid kommune sine plikter ved uttredetidspunktet og dermed held Eid kommune fram med å vere ansvarleg for sin del (13 %) av gjelda til Nordfjord Havn IKS på utmeldingstidspunktet. Stryn kommune heftar med 26 % for ny gjeld tatt opp etter at Eid kommune gjekk ut av Nordfjord Havn IKS. Samanslåinga av Vågsøy kommune med Flora til Kinn kommune frå 1. janaur 2020 vil naturlegvis ha noko å seie for hamnesamarbeidet i Nordfjord og dermed også for Nordfjord Havn IKS. Det er derfor naturleg at kommunane i Nordfjord Havn IKS ber om Vågsøy og Flora avklare korleis dei ser føre seg hamnesamarbeidet i ny kommunestur. Møtet i Vågsøy bad også om dette. Sjølv om ikkje Stryn var representerte på møtet, er framlegget om at Stryn tar over Eid kommune sin eigardel m.m. og Eid kommune sitt gjeldsansvar klarert med ordføraren i Stryn. Økonomiske konsekvensar for kommunen Ingen direkte. Dei økonomiske konsekvensane dreier seg her om den delen av Nordfjord Havn IKS si gjeld som Eid kommune er ansvarleg for på det tidspunktet dei melde seg ut. Dette er avklara både gjennom lova om interkommunale selskap og vedtektene. Rådmannen si vurdering Arbeidet med å endre vedtektene for Nordfjord Havn IKS etter at Eid kommune melde seg ut har vore litt uryddig. Møtet i Måløy sist veke var derfor på sin plass og heilt nødvendig for å kome i land på ein god måte. Vidare framdrift er no at kvar kommune gjev tilbakemelding på proktokollen frå møtet den 9. november. Deretter utarbeider styret og hamnerådet eit nytt framlegg til vedtekter som kvart kommunestyre i IKS-et må godkjenne. Planen er at hamnesrådet behandlar saka i møte den 15. desember i år. Rådmannen sluttar seg til konklusjonen frå møtet mellom ordførarane og rådmennene i hamnesamarbeidet i Nordfjord den 9. november. Dagens eigar- og ansvarsfordeling i Nordfjord Havn IKS avspeglar ikkje aktiviteten og anleggsstrukturen i samarbeidet. Det er i all hovudsak i Vågsøy og Stryn kommunar at hamneselskapet har aktivitet og store anlegg. Det er derfor både rett og fornuftig at dette viser att i eigar- og ansvarsfordelinga. Det er også fornuftig at alle eigarkommunane er representerte i styret, og at ingen kommunar åleine har fleirtal i styret og hamnerådet. Mi tilråding er at formannskapet gjev tilbakemelding til Nordfjord Havn IKS. Dei nye vedtektene må sjølvsagt behandlast av kommunestyret når desse er klare.