Digitale ferdigheiter med "Søk og finn"

Transkript

1 Digitale ferdigheiter med "Søk og finn" Volda ungdomsskule, Volda, Møre og Romsdal (8 10) Av Mari-Anne Mørk Etter at dei fekk plass i Program for skulebibliotekutvikling, har Volda ungdomsskule på Sunnmøre opplevd mykje større aktivitet i biblioteket, både som læringsarena og som møteplass. Det toppmoderne skulebiblioteket, som tidlegare stod mykje tomt, blir stadig nytta av både lærarar og elevar.

2 Travel læringsarena Volda ungdomsskule har ein visjon om at skulebiblioteket skal vere ein læringsarena i fleire fag enn norsk. Skulen har også eit mål om å auke elevane sine digitale ferdigheiter og lærarane sin kompetanse på bruk av IKT i undervisninga. For å nå dette målet har skulen sett bibliotekbruk i system. I prosjektperioden har skulebiblioteket blitt integrert i læreplanar, halvårsplanar og vekeplanar. Alle lærarane har blitt kursa i elektronisk katalog, og arbeidet på biblioteket er planfesta. Kvar haust får 8. trinn opplæring i biblioteket med sjølvbetent utlån og eit kurs på to timar i informasjonssøk, nettvett og kjeldekritikk utvikla av IKT-ansvarleg ved skulen. Skulen har også utarbeidd felles rutinar for kjeldetilvising, som er dei som skal gjelde for alle elevar. Søk og finn I utviklingsprosjektet Hjartet i skulen har Volda ungdomsskule valt å satse spesielt på kjeldebruk. Her har skulen henta inspirasjon frå Skåredalen skule, som var ressurskule i Volda ungdomsskule har laga eit opplegg som skal lære alle elevane opp i kjeldesøk, kjeldekritikk og kjeldetilvising i ein bibliotektime med namnet Søk og finn. I Søk og finn arbeider elevane i halve grupper med oppgåver som krev kjeldesøk i naturfag, samfunnsfag, RLE og matematikk. Elevane nyttar både digitale og trykte kjelder. Hovudmåla for opplegget er å lære elevane å skilje mellom nyttig og unyttig informasjon og få

3 dei til å setje saman informasjonsdelar til kunnskap. Allereie i prosjektperioden har skulen merkt at elevane har fått markant betre informasjonskompetanse. Kvart årstrinn samarbeider no om å lage oppgåver ut over læreboka. Tverrfagleg temaarbeid For vidare å øve opp elevane sine digitale ferdigheiter har Volda ungdomsskule sett i gang eit temaarbeid for alle årstrinna der skulebiblioteket er læringsarena og IKT arbeidsverktøy. Også her har skulen henta modellen frå Skåredalen skule. Tidsbruken er sett til 15 timar, og elevane skal planlegge prosjekta sine sjølve. Åttande trinn arbeider med temaet Astronomi i naturfag og samfunnsfag. I dette prosjektet står søk og bruk av kjelder sentralt. Temaarbeidet på 9. trinn har fått namnet På reisefot og er eit tverrfagleg prosjekt mellom matematikk, samfunnsfag og norsk der matematikk er hovudtemaet. Det blir lagt vekt på at elevane skal lære å lage ein god digital presentasjon. Ung i dag er tittelen på prosjektet på 10. trinn. Elevane arbeider med seksualitet og samfunn i samfunnsfag, naturfag og RLE. Etter at arbeidet er avslutta, skal elevane presentere prosjekta sine for klassen, og dei blir vurderte med karakter.

4 Frå kjelde til eige språk Volda ungdomsskule har erfart at elevane synest det er vanskeleg å nytte eige språk når dei skal skrive tekstar, og at dei fort tyr til klipp og lim. Biblioteklæraren arbeider med å utvikle eit undervisningsopplegg som går ut på at elevane får konkrete oppgåver, der dei skal hente ut informasjon i digitale kjelder. Dei får også opplæring i kva slags arbeidsmetode dei skal nytte for å gjere språket til sitt eige. Opplegget startar med små oppgåver og notatteknikk på papir i 8. trinn og blir vidareutvikla for 9. og 10. trinn. Samarbeid med Nynorsksenteret Volda ungdomsskule samarbeider med Nynorsksenteret om skriveopplæring i alle fag. Målet for samarbeidet er at elevane skal utvikle god kompetanse i å utrykkje seg skriftleg på nynorsk. Gjennom bruk av læremiddel og læringsressursar på nynorsk i faga samfunnsfag, RLE og naturfag arbeider skulen med dei grunnleggande ferdigheitene skriving, lesing og bruk av IKT-verktøy. Arbeidet som har blitt gjort i samband med prosjektet, er innarbeidd i dei lokale læreplanane.

5 «Det at vi vart ressursskule, har gjort at arbeidet vårt ikkje vart «ei døgnfluge». Ved å halde trykket oppe i eitt år til har vi klart å gjere mykje av arbeidet til ein naturleg del av skulekvardagen for elevar og lærarar. Barnesjukdommar er rydda bort, og fleire ser no at dette er eit viktig arbeid. Biblioteklærar Kathrine Skarseth Kristiansen Volda ungdomsskule (8 10), Volda kommune, Møre og Romsdal 285 elevar, 44 lærarar, biblioteklærar 5,5 timar per veke Ressursskule på: Søk, vurdering av kjelder. Strategiar for lesing og skriving av fagtekst.