Nord-Fron kommune Politisk sak Reguleringsplan for Furusjøen hytteområde - endeleg behandling Utval Saksnr Møtedato Saksbehandlar Planutval 102/13 11.10.2013 ASK Kommunestyret 087/13 22.10.2013 ASK Saksansv.: Arne Skuterud Arkiv: L12 Arkivsaknr.: 13/735 Journalpost: 13/12277 Vedlegg: 1. Plankart 2013 08 19 M5000 (A0).pdf 2. Reg.føresegner - utkast 29.07.2013.doc 3. Planforklaring 30.09.2013 - justert etter PU-sak 65-13, 25.06.13.doc 4. Samandrag - vurdering 4. ettersyn.docx 5. Brev 26.09.2013 frå Fylkesmannen.pdf Utrykte vedlegg: 1. Reguleringsplan for Furusjøen hytteområde av 27.09.2001. 2. Reguleringsplan for båtplass i Røssumbuvika av 06.07.2004. 3. Kommuneplan for Nord-Fron, arealdelen av 21.06.2011. 4. E-post av 02.08.2013 frå Øyvind Nordbø. 5. Brev av 11.09.2013 frå Furusjøen båtplassforening v/tore Castberg. Bakgrunn for saka: Gjeldande reguleringsplan for Furusjøen hytteområde vart vedteken 29.03.2001 og 27.9.2001, sak 20/01 og sak 63/01. Etter kvart har det vist seg at det er store manglar ved denne planen. Det har ført til mange dispensasjonssøknader. Dette er arbeidskrevjande på behandle desse. Kommunen starta derfor i 2008 arbeidet for å utforme ein meir oppdatert og tidsrett plan. Det vart i utgangspunktet lagt opp til følgjande endringar og forbetringar av planen: Regulere bilveg fram til alle hyttene. Regulere to nye båtplassar for å dekkje behovet for fleire hytteeigarar og andre. Oppdatere regelverket i planen i samsvar med kommuneplanen av 2005, seinare kommuneplanen av 2011. Forbetre og klargjera plankartet, i samsvar med gjeldande eigedomsgrenser, nye kartreglar etter plan- og bygningslova av 2008 og ved bruk av moderne datateknologi. I løpet av planprosessen har også ein del andre viktige tema vorte sentrale i denne planen. Det gjeld særleg følgjande forhold: Skal skiløypene delvis liggje på bilvegar, eller konsekvent utanom. Skal det vera mogleg å brøyte bilvegane for biltrafikk om vinteren. Kva skal vera utnyttingsgraden på hyttetomtene? Skal det kunne byggjast maks 150 m2 eller maks 110 m2 pr tomt. Skal det vera andre reglar for bygging i strandsona langs vatn og vassdrag enn elles i planområdet?
Planstart vart kunngjort 11.2.2008. Det kom 32 merknader. Pga mange andre viktigare planoppgåver (særleg kommuneplanen), kom arbeidet med Furusjøplanen ikkje for alvor i gang før i 2010. Etter det har det vore ein omfattande prosess for å få vedteke ny plan for området: Plan- og næringsutvalet 01.09.2011, sak 70/11: 1. gongs behandling. 1. gongs ettersyn 08.09. 21.10.2011. Det kom 72 merknader. Planutvalet 17.04.2012, sak 40/12: 2. gongs behandling. Planutvalet 08.05.2012, sak 54/12: 3. gongs behandling. 2. gongs ettersyn 14.06. 31.08.2012. Det kom 39 merknader. Planutvalet 10.10.2012, sak 108/12: 4. gongs behandling. 3. gongs ettersyn 15.11.2012 18.01.2013. Det kom 26 merknader. Planutvalet 05.03.2013, sak 23/13: 5. gongs behandling. 4. gongs ettersyn 14.03. 26.04.2013: Det kom 28 merknader. Planutvalet 25.06.2013, sak 65/13. 6. gongs behandling. Motsegner til planforslaget: Heilt frå planstart og ved alle fire høyringane av planforslaget har fylkesmannen og til dels fylkeskommunen hatt motsegn til planforslaget. Fylkeskommunen har nå trekt sine motsegner. Etter den siste høyringa stod det likevel att to motsegner frå fylkesmannen: Motstand mot å ha reglar i planen som ikkje set forbod mot at bilvegane i planområdet kan brøytast for vintertrafikk. Motstand mot å vidareføre dagens reglar frå 2001 med utnyttingsgrad på 150 m2 pr tomt. Motsegnene er grunngitt med at store hytter og biltrafikk inn til hyttene særleg om vinteren vil auke bruken av hyttene for fleire personar, som i neste omgang kan koma inn i villreinområda i Rondane og forstyrre villreinen. I samband med tredje ettersyn av planen arrangerte kommunen møte med fylkesmannen og fylkeskommunen 7.1.2013 på Rondablikk. Møtet vart kombinert med synfaring i planområdet, dessverre med dårlege vêrforhold (tjukk skodde). Kommunen og enkelte andre partar i saka fekk her gitt gode orienteringar om sine argument i plansaka. For ytterlegare å få opplyst saka, hadde kommunen møte med fylkesmannen 11.4.2013. I møte 25.6.2013 vedtok planutvalet i sak 65/13 ein del mindre endringar i planen. I tillegg vedtok utvalet følgjande i pkt. 2: Planutvalet vedtar å sende planen over til mekling før kommunestyret behandlar saka. Planutvalet får saka til behandling før den går vidare til endeleg behandling i kommunestyret. I brev av 12.8.2013 ba kommunen om meklingsmøte med fylkesmannen. Møtet vart seinare fastsett til 3.10.2013. I brev av 26.9.2013 har også fylkesmannen trekt sine motsegner til planforslaget, jf. vedlegg 5. Dette er grunngitt med konklusjonane i Miljøverndepartementet sitt vedtak i brev av 17.9.2013 om Regional plan for Rondane-Sølnkletten. I denne planen er heile planområdet for Furusjøplanen lagt innafor utviklingssona, sone 3. I denne sona skal det leggjast stor vekt på samfunnsutvikling. Dette meiner Fylkesmannen gjer at «grunnlaget for motsegna til vinterbrøyting av vegar innafor
etablert hytteområde er svært svekka eller fell bort.» Samtidig understrekar Fylkesmannen at «delar av utviklingssonene er biologiske leveområde for villrein, slik at m.a. avbøtande tiltak og kanalisering av ferdsel skal vektleggjast.» Fylkesmannen føreset nå at planen blir vedteken slik den var fremma ved 4. gong ettersyn. Kommunen blir likevel beden om å vurdere «om det kan vera enkelte vegstrekningar innafor planområdet som bør bli unnateke frå vinterbrøyting, etter ei samla vurdering. I ei slik vurdering bør omsynet til å unngå auka ferdsel inn i villreinens vinterbeiteområde vektleggjast.» «Fylkesmannen vil invitere kommunen til eit møte om prosessane som er omskrivne ovanfor.» Tilleggsmerknader: Etter at planen vart behandla i planutvalet 25.6.2013, har det kome to merknader i tillegg til dei som går fram av vedlegg 4: Øyvind Nordbø beklagar i e-post av 2.8.2013 (jf. utrykt vedlegg 4) at han brukte feil gnr./bnr. på sin hytteeigedom i ein tidlegare merknad, men er samtidig tilfreds med at planutvalet i sitt siste vedtak legg opp til at det bli mogleg å brøyte fram til hans hytte ved Bergemillomvegen. Furusjøen båtplassforening ved Tore Castberg argumenterer i brev av 11.9.2013 (jf. utrykt vedlegg 5) mot at båtplassen i Røssumbuvika kan utvidast (jf. forslaget om dette frå Kvamsfjellets Vel). «En eventuell økning av båtplassen ved utvidelse av bestøende eller etablering av helt ny molo vil være fullstendig uakseptabel for oss, og vil bli sett på som et veritabelt tillitsbrudd mellom Nord-Fron kommune og oss basert på tidligere uttalelser og regulerings-planer.. Vi anmoder kommunen om å arbeide videre med å etablere flere mindre båtplasser rundt Furusjøen, med begrensete ulemper for hytteeierne i nærområdet, og med de positive effekter det har for store grupper av hytteeiere på Kvamsfjellet.» Planfagleg vurdering: Denne reguleringsplanen omfattar eit stort planområde med ca. 350 hytter. I den omfattande og langdryge planprosessen har det vore vurdert ei lang rekkje alternative forslag, ønskje og problemstillingar. Ved kvar av dei fire høyringane og ved planstart har ca. 600 partar fått høve til å uttale seg. Til saman har kommunen i denne saka vurdert 200 merknader. Det er gjennomført ein omfattande planprosess med bl.a. fleire synfaringar i planområdet og eigne møte med fleire av både offentlege og private partar. I planen som nå ligg til behandling er det gjort ei stor opprydding og klargjering av tomtegrenser og avgrensing av byggjeområde og frilufts-/naturområde. Dersom kommunestyret vedtek planen i samsvar med dei forslaga som har vore på høyring, vil kommunestyret nå kunne eigengodkjenne planen, så lenge alle motsegnene er trekt. Den nye planen vil da ta til å gjelde frå same dag som vedtaket er gjort. Samtidig må kommunestyret vedta å oppheve dei to gjeldande planane for området: Reguleringsplan for Furusjøen hytteområde av 29.3.2001/27.9.2001. Reguleringsplan for båtplass i Røssumbuvika av 6.7.2004. I vedlegg 4 er det gitt samandrag og vurdering av merknadene ved 4. ettersyn. Her er det i fleire punkt konkludert med at planen bør vedtakast slik forslaget viser ved 4.
ettersyn, mens det i fem punkt er tilrådd at kommunen vel andre løysingar. Planutvalet slutta seg i møte 25.6.2013, sak 65/13 til desse tilrådingane, med nokre mindre justeringar. Planutvalet sitt vedtak er følgd opp i plankartet og reguleringsføresegnene slik det nå går fram av vedlegg 1 og 2. Vinterbrøyting Sjølv om Fylkesmannen har trekt motsegna om vinterbrøyting av bilvegane, blir det bede om at kommunen vurderer om enkelte vegar likevel ikkje skal brøytast. Det er framleis omsynet til villreinen som ligg bak dette synspunktet. Poenget er å minske sjansen for trafikk inn i leveområdet for villrein. Ved 4. ettersyn av planen var det lagt til grunn at Nysetervegen frå Hovdmyra mot Flakken og Bergemillom ikkje skulle kunne brøytast. Kommunen si grunngjeving for dette var at villreinen i større grad nyttar områda ved Flakken og Bergemillom, i samband med trekk inn i og ut av Tjønnseterfjellet. Da planutvalet behandla saka i møte 25.6.2013, vart dette endra slik at vegen likevel kan vinterbrøytast. For å imøtekoma Fylkesmannen si oppmoding i brev av 26.9.2013 om å vurdere vegar som ikkje bør brøytast om vinteren, bør planen på dette punktet vedtakast i samsvar med planforslaget ved 4. ettersyn. Eg kan ikkje sjå at det er andre vegar i planområdet der det er aktuelt å gjera ei liknande vurdering. I denne samanheng er det også viktig å understreke den store innsatsen som i mange år har vore gjort for å kanalisere trafikken og aktiviteten på Kvamsfjellet til dei lågareliggjande delane av fjellområdet, og altså ikkje inn i villreinområda, ved å opparbeide skiløyper, båtplassar, gapahuk, turstiar og sykkelstiar. Båtplassar Ved 4. ettersyn av planen var båtplassen i Kvamvika teke ut av planen. Som erstatning for dette, vart det frå Kvamsfjellets Vel foreslått å utvide båtplassen i Røssumbuvika. Dersom det skal gjerast, vil det krevja enda ei høyring av planen. Derfor vart dette ikkje følgd opp da planutvalet behandla saka i møte 25.6.2013. Dersom kommunen kjem til at ei slik utviding er aktuell, må dette vedtakast som ei endring av reguleringsplanen på eit seinare tidspunkt. Slik planforslaget var lagt ut ved 4. ettersyn, var det vist to båtplassar: den eksisterande i Røssumbuvika og ein ny ved Karelen. Båtplassen i Kvamvika har det gjennom heile planprosessen vore sterk motstand mot frå dei fleste naboane i området. Dette er vel grunnen til at plassen vart teke ut ved 4. ettersyn. Det er mogleg å ta inn att denne plassen når planen nå blir sluttbehandla, i og med at han har vore med i 1., 2. og 3. ettersyn. Det vil temmeleg sikkert føre til at det blir klage på planen på dette punktet. Dette vil føre til meirarbeid. Signal frå planutvalet tyder også på at det er lite aktuelt for kommunen å følgje opp med ekspropriasjon av grunn for å få bygd båtplassen. Eg vil derfor tilrå at båtplassen i Kvamvika ikkje blir teke inn att i planen nå. Dersom det seinare melder seg eit klart og eintydig ønskje/krav om ein tredje båtplass, kan det takast opp som ei endring av reguleringsplanen på eit seinare tidspunkt. Kvar ein slik plass da skal leggjast, kan vurderast heilt på nytt. Rådmannsleiinga si vurdering: Denne saken har vore tidkrevjande for både administrasjon og politiske organ over mange år! Det har vore vurdert ulike alternativ på mange pkt., jf. detaljert oppfølging
av innkomne merknader ved mange høyringsrunder og ajourført planforklaring av 30.september 2013. Siste året har det i all hovudsak vore eit samla Planutval som har behandla detaljar i planen. I tillegg har det vore mykje lokalt engasjement rundt forvaltningsplanen for Rondane Sølnkletten, som etter ein lang prosess nå i haust er sluttbehandla av Miljøverndep., med konklusjonar som i noko grad støtter opp om lokale haldningar til planen. Samfunnsutvikling i fjellområda har nå blitt lagt meir vekt på enn kva statlege styresmakter gikk inn for FØR Miljøverndep. konkluderte i saka. Dette viser at lokalt engasjement for å finne fram til etter vår vurdering ei balansert avveging mellom vern og bruk av viktige naturområder inn mot nasjonalparkområda i Rondane kan gje resultat. Nord-Fron kommune skal ha fokus på å ta vare på miljøverdiane vi har i fjellområda våre. I denne planen meiner adm.sjef at Planutvalet har hatt fokus på både samfunnsutvikling og vern av viktige naturverdiar! På eit pkt. har adm.sjef anna konklusjon enn planfagleg vurdering; det gjeld høve til vinterbrøyting av veg frå Hovdmyra retning Nysetra / Bergemillom. Ingen har ønskje om stor trafikk inn i dette området, men for dei relativt få hyttene som er i området vil høve til å kome nærme hyttene også på vinteren bety mykje. Adm.sjef vil derfor rå til at Planutvalet held fast på standpunktet dei hadde i juni 2013 ved sluttbehandlinga nå i oktober mnd. 2013. Elles er det verdt å vise til planfagleg vurdering om at det kan vere fleire pkt. som ein i komande år kan kome til å vurdere annleis, dette gjeld m.a. høve til båtplass ved Kvamvika. Nå er det avgjerande å få sluttbehandla planen! Administrasjonssjefen legg saka fram for planutvalet med slik Innstilling: Planutvalet tilrår at kommunestyret gjer slikt vedtak: 1. Kommunestyret eigengodkjenner reguleringsplan for Furusjøen hytteområde med heimel i 12-12 i pbl slik det går fram av vedlegg 1 og 2. 2. Følgjande planar blir oppheva samtidig med at den nye planen blir vedteken: Reguleringsplan for Furusjøen hytteområde av 29.3.2001 / 27.9.2001. Reguleringsplan for båtplass i Røssumbuvika av 6.7.2004. Administrasjonssjefen i Nord-Fron Arne Sandbu PU-102/13 11.10.2013 Behandling: Samrøystes som innstillinga. KOM-087/13 22.10.2013 Vedtak: Samrøystes som innstillinga.