Høgskolen i Telemark Styret Møtedato: 16.10.08 Saksnummer: Saksbehandler: Journalnummer: Henning Hanto 2008/1248 RULLERING AV STRATEGISK PLAN FOR HØGSKOLEN I TELEMARK FOR PERIODEN 2005-2009 Saka i korte trekk Det blir her gjort framlegg om rullering av strategisk plan, slik det er fastsett i kapittel 8 i planen. Framlegget inneber ajourføring ut frå utviklinga som har skjedd til no. Av di dette er siste rullering i perioden, er ikkje alle punkt i planen kommenterte. Talfesta resultatmål er vurderte ut frå utviklinga så langt. Framlegget inneheld ikkje gjennomgripande eller prinsipielle endringar, og tek ikkje opp nye tema. Tilråding Med atterhald om endringar som følgje av drøftingsmøte med tenestemannsorganisasjonane 13.10.07 rår eg styret til å gjere slikt vedtak: Styret fastset endringar i Strategisk plan for Høgskolen i Telemark for perioden 2005-2009 i samsvar med framlegg frå høgskoledirektøren 29.09.08. Bakgrunn I S-sak 06/05 i møte 24.02.05 fastsette styret strategisk plan for Høgskolen i Telemark for perioden 2005-2009. I kapittel 8 i planen står det m.a.: Denne strategiske planen skal rullerast årleg, første gong i 2006. I samband med rulleringa skal det gjevast ein rapport om utviklinga, sett i høve til dei måla planen fastset. Planen skal følgjast opp gjennom årsplanar for alle høgskolens driftseiningar og gjennom den årlege budsjetthandsaminga. Planen vart sist rullert av styret i S-sak 72/07. Den korrigerte utgåva følgjer som vedlegg 1. Høgskoledirektøren sende 31.07.08 internt notat til driftseiningane, seksjonane i fellesadministrasjonen, læringsmiljøutvalet, internasjonalt utval, likestillingsutvalet og Studentorganisasjonen i Telemark, med oppmoding om å kome med framlegg til endringar i planen. I notatet heiter det m.a. om rammene for denne rulleringa: Det er ikkje tale om ein fullstendig revisjon av planen no, berre oppdateringar og justeringar som følgjer av utviklinga som har skjedd. Arbeidet med ny strategisk plan for perioden 2010 2014 vil starte i løpet av haustsemesteret. Merksemda bør rettast mot følgjande område:
2 Somme resultatmål bør truleg justerast der utviklinga fram til nå syner at måla er urealistisk høge, eller ser ut til å bli overoppfylte. Omtalen av mål og strategiar bør oppdaterast der det har skjedd ei utvikling som gjer det naturleg (t.d. mastergrads- og doktorgradsstudium). Tiltak/strategiar som er gjennomførte, bør takast ut av planen. Tiltak/strategiar som har blitt mindre aktuelle, eller som det synest urealistisk å få gjennom innan utgangen av 2009, bør takast ut eller omformulerast. Desse høyringsfråsegnene har kome inn: Avdeling for allmennvitskaplege fag (AF), notat 19.09.08 Avdeling for estetiske fag, folkekultur og lærarutdanning (EFL), notat 19.09.08 Avdeling for helse- og sosialfag (HS), notat 10.09.08 IT-tenesta (IT), notat 26.08.08 Driftstenesta, notat 11.08.08 Seksjon for personalsaker og organisasjonsutvikling (PO-seksjonen), notat 16.09.08 Seksjon for studie- og forskingssaker (studieseksjonen), notat 19.09.08 Seksjon for økonomisaker (økonomiseksjonen), notat 19.09.08 Likestillingsutvalet (LU), notat 15.09.08 Driftstenesta og likestillingsutvalet har ingen endringsframlegg. Biblioteket har i e-post meldt om det same. Fråsegnene ligg ved (vedlegg 2-10). Mitt framlegg til rullering av planen følgjer som vedlegg 11. Vurdering Som nemnt i tilsvarande sak i fjor (S-sak 72/07), har eg kome til at ei samordning av strategisk plan med den nye målstrukturen departementet har fastsett, og som ligg til grunn for årsplanen, må vente til utforming av ny strategisk plan for perioden 2010-2014. Økonomiseksjonen meiner at planen kanskje inneheld for mange mål og strategiar, at ein del av formuleringane er lite konkrete, og at det mange stader manglar konkret talfesting av utgangspunkt og mål. Seksjonen peikar på ei rad døme på dette, men seier og at dette neppe kan endrast fullt ut i denne rulleringa. Eg er samd i dei prinsipielle merknadene. På ein del av punkta har ønsket om talfesting vore framme tidlegare, men det har vore vanskeleg å finne gode tal. Sidan dette er siste rullering i denne planperioden, finn eg det ikkje tenleg å gjere eit omfattande arbeid med omarbeiding av planen. Eg kommenterer derfor ikkje alle punkta økonomiseksjonen viser til. Det er og andre punkt i planen som i og for seg kunne ha vore kommenterte, men som eg av same grunn ikkje ser tilstrekkeleg nytte av å gå inn på no. Fleire høyringsinstansar har refleksjonar omkring innhald, struktur og detaljeringsgrad i ny strategisk plan. Dette går eg ikkje nærare inn på her. EFL ønskjer at dei mange prikkpunkta skal nummererast for å lette navigeringa i og tilvisingar til planen. Eg tar framlegget til følgje ved å endre prikkpunkt til bokstavpunkt, og nyttar dette i tilvisingane i denne saksutgreiinga. Elles refererer og kommenterer eg dei endringsframlegga som er komne, og nokre eigne framlegg, i den rekkefølgja som følgjer av planen.
3 PLANENS KAPITTEL 1 - GRUNNLAG 1.4 Vekst og utvikling Det er sett som mål at studenttalet (heiltidsekvivalentar finansierte over grunnløyvinga) skal vekse frå om lag 4 500 i 2004 til om lag 4 700 i 2009 (redusert frå 5 000 ved rulleringa i fjor). Utviklinga i åra 2004-2006 har vore slik: 4556 4574 4443 4 503. Økonomiseksjonen reiser spørsmålet om målet er realistisk. I årsplanen for 2008 er måltalet sett til 4 642, basert på vedtaket i S-sak 119/07. Resultatet blir rapportert per 1. oktober. Ut frå det vi veit no, gjer eg ikkje framlegg om endring av måltalet på 4 700. 1.5 Fagprofil EFL problematiserer omgrepet vekstområde, der det går fram at helse- og sosialfaga og idretts-, kroppsøvings- og friluftslivsfaga skal ha størst kvantitativ vekst, og meiner at både allmennlærarutdanning, førskolelærarutdanning og folkekulturstudia kan eller bør vekse. Under punkt 2.2.2.a), der dei same vekstområda er nemnde, viser avdelinga til at studenttalet innanfor førskolelærarutdanning og økonomisk/administrative fag også har blitt auka, og meiner det bør reflekterast her. Vidare meiner EFL at ein auke i talet på allmennlærarstudentar bør vere eit uttrykt mål i planen. HS har generelle kommentarar om utvikling innanfor sine fagfelt, og peikar på behov for ressursar og praksisplassar for å kunne ekspandere vidare. Eg viser til at målet i strategisk plan gjeld perioden 2004-2009 sett under eitt, og ser ikkje grunn til å endre formuleringane om vekstområde no. Lærarutdanninga er mellom dei felta der målet i planen er å halde omfanget oppe i planperioden. Eg ser det ikkje som tenleg å innføre måltal for einskilde studieprogram ved rullering av strategisk plan, og viser til at årlege måltal vert fastsette i tiltaksplanane og i styret si handsaming av studieprogram og resultatkrav. Det humanistiske området (språkdidaktikk) er nemnt under spissingsområde, og mastergrad er sett som mål. Studieseksjonen peikar på at denne utdanninga no er akkreditert. Også EFL meiner punktet kan strykast. Sidan utdanninga ikkje er starta opp, meiner eg referansen framleis kan stå. Det gjeld og under punkt 2.2.1. I S-sak 102/07 vedtok styret å søkje om akkreditering av doktorgradsstudium med tittel Doktorgradsstudium i økologi. Den tidlegare nemninga miljø og genetisk mangfald må derfor endrast. Det same gjeld under punkt 2.2.1. PLANENS KAPITTEL 2 - UTDANNING OG LÆRINGSMILJØ I innleiinga heiter det m.a. at HiTs utdanningstilbod skal femne om grunnutdanning, vidareutdanning, etterutdanning og doktorgradsutdanning. EFL lurar på kor mastergradsutdanning kjem inn, og meiner teksten bør bli tydelegare. Slik eg ser det, bør slik drøfting av terminologi utstå til arbeidet med ny strategisk plan.
4 2.2.1 Studietilbod og studiegjennomføring EFL meiner ein bør fastsetje konkrete tidspunkt for oppstart av master- og doktorgradsstudium i staden for å gjere dette avhengig av framdrift og kostnader (nest siste avsnitt). Eg skjønar synspunktet, men meiner mange usikre faktorar gjer at slik tidfesting kan vere vanskeleg og bli for rigid. I alle høve ser eg ikkje grunn til å gjere endring i formuleringa no. 2.2.2 Dimensjonering og resultat Når det gjeld punkt a) viser eg til merknadene til punkt 1.5 ovanfor. I punkt b) heiter det at studiepoengproduksjonen pr student skal auke med 5 % i løpet av perioden. Målet vart endra frå 10 % ved rulleringa i 2006. Tala frå 2004 til 2006 er i rekkefølgje 44,2, 43,1, 45,0 og 44,6. Målet om minst å liggje på gjennomsnittet for statlege høgskolar er oppfylt, det var 44,5. Men målet om 5 % vekst i planperioden vil tilseie 46,4 i 2009. Som økonomiseksjonen er eg i tvil om dette er realistisk, men eg gjer ikkje framlegg om endring av måltalet. For kandidatproduksjonen, punkt c), er målet at han skal følgje auken i produksjonen av studiepoeng pr student og talet på heiltidsekvivalentar. Utviklinga frå 2004 til 2007 er slik: 868, 877, 849, 874, dvs stort sett stabilitet. Denne typen talfesting er elles neppe tenleg framover. I punkt d) heiter det, etter endring i fjor, at talet på kurstimar i eksternt finansiert etterutdanning skal auke med minst 25 %. Tala for 2004-2007 er 928, 556, 1174 og 1185. Auken frå 2004 til 2007 er såleis på ca 28%. EFL meiner at ordningane med arbeidsplanar og overtidsbetaling gjer målet urealistisk. Desse tala svingar nok frå år til år, men ut frå det som ligg føre, ser eg ikkje grunn til å gjere endring i målet. I så fall måtte det høgdast. 2.3.1 Studietilbod og studiegjennomføring EFL meiner at punkt a) om femårig lærarutdanning med integrert praktisk-pedagogisk utdanning i samarbeid mellom EFL og AF kan takast ut, av di vi er i mål med dette. Det same gjeld punkt b) om at høvet til å ta mastergrad for lærarar skal bli utvida i samarbeid mellom dei to avdelingane, og marknadsførast betre. Det er ikkje rett at desse tiltaka fullt ut er gjennomførde, og eg meiner derfor punkta bør bli ståande. AF meiner det bør nemnast kva konkrete studium som på ein særleg måte er med på å profilere høgskolen i nasjonal samanheng, for at drifta av desse skal bli meir forpliktande for institusjonen. Eg kan i prinsippet vere samd i det, men det er ikkje noko som har gjort dette meir aktuelt no enn då planen vart utforma, og eg finn det ikkje tenleg å gå inn på ein slik diskusjon i denne samanhengen. Det får eventuelt utstå til arbeidet med ny strategisk plan. 2.3.2 Finansiering og ressursfordeling Punkt b) seier at HiT kvart år skal setje av strategiske satsingsmidlar til planlegging av master- og doktorgradsstudium. EFL meiner at planleggingsstadiet er over, og at midlane no bør gå til oppstart. EFL har i hovudsak rett i dette, men det trengst enno nokre midlar til planlegging av doktorgradsstudium i førebyggjande helsearbeid. Det er rett at det også blir sett av særskilte midlar til oppstartfasen, før drifta går inn i den ordinære ramma. Formuleringa bør derfor vere planlegging og oppstart.
5 2.3.3 Studiekvalitet og læringsmiljø HS gjer framlegg om at det blir sett i gang ei evaluering av kvalitetsreforma ved HiT både når det gjeld studiekvalitet, læringsmiljø, kvalitetssikring, ressursbruk m.v., og meiner dette bør takast inn som eit eige punkt i planen. Ei slik evaluering ville vere eit omfattande og ressurskrevjande prosjekt, der både metode, kostnader og nytteverdi må vurderast før det eventuelt blir realisert. Eg finn derfor ikkje å kunne gjere framlegg om at det vert tatt inn i strategisk plan ved denne rulleringa. 2.3.5 Rekrutteringstiltak Punktet seier at høgskolen skal arbeide ut nye strategiar for rekrutteringsarbeidet basert på auka kunnskap om studentrekruttering. AF meiner formuleringa er noko upresis, og tilrår samstundes at ein framhevar ei konkret målsetjing om aktive og levende campus er. HS viser, som ved rulleringa i fjor, til at somme av mastergradstilboda slit med rekrutteringa, og meiner det bør stå i planen at marknadsføringa av desse bør styrkjast. Slik eg oppfattar det, er dette eigentleg innspel til innhaldet i marknadsføringsstrategien. Det er i gang eit kontinuerleg arbeid med omdømebygging og marknadsføring, med høgskolens leiargruppe som styringsgruppe. Her blir strategi og innretting av arbeidet vurdert og fastsett. Eg ser ikkje behov for endringar i formuleringa no, men reknar med at dette viktige innsatsfeltet blir drøfta i samband med utarbeiding av ny strategisk plan. Etter mitt syn høyrer eventuelle nærare retningsliner om marknadsføring av spesielle studietilbod i alle høve betre heime i års- eller tiltaksplanar enn i ein strategisk plan. PLANENS KAPITTEL 3 FORSKING OG FAGLEG OG KUNSTNARLEG UTVIKLINGSARBEID 3.2 Mål Punkt a) set som mål at FoU-produksjonen skal doblast målt i talet på publikasjonar innanfor dei kategoriane som vert lagde til grunn i finansieringssystemet. Den mest interessante resultatindikatoren er publikasjonspoeng, og eg rår til at formuleringa i planen blir endra. Ved rulleringa i fjor vart målet auka frå 20 % vekst til ei dobling, ut frå dei resultattala som låg føre då. Tala er seinare justert noko i DBH. Det som nå ligg føre, syner slik utvikling frå 2004 til 2007: 37,5, 61,2, 54,5 og 73,3. Auken frå 2004, som var eit dårleg år, til 2007 er dermed på 97 %, dvs. at målet er så godt som nådd. 3.3 Strategiar HS legg her fram fleire synspunkt på korleis FoU-produksjonen kan stimulerast, men kjem ikkje med konkrete endringsframlegg. Det gjeld m.a. samarbeid mellom avdelingane, styrking av profesjonsforskinga og styrking av FoU-administrasjonen. Slik eg oppfattar det, er dette synspunkt som bør kome fram m.a. i samband med arbeidet med ny strategisk plan, og som delvis var framme i samband med S-sak 12/08, sjå nedanfor. Eg kommenterer dei derfor ikkje her.
6 3.3.1 Finansiering og ressursfordeling Studieseksjonen viser til S-sak 12/08 der styret vedtok strategiar for å auke tildelinga av midlar frå Forskingsrådet, og meiner at desse må innarbeidast i strategisk plan. Vedtaket var slik: 1. Styret vedtar som strategier for å øke tildelingen av forskningsmidler fra Forskningsrådet at HiT skal prioritere inntil 3 forskningsklynger som består minimum av 3-4 personer med toppkompetanse, minimum 2 stipendiater og noe administrativ støtte, og der minst en av forskningsklyngene har personer med toppkompetanse fra flere institutter. styrke samarbeidet mellom relevante, aktive forskningsmiljøer innenfor høgskolen og videreutvikle samarbeidet med relevante nettverk utenfor høgskolen. vurdere å heve uttellingen gjennom forskningskomponenten i den interne budsjettfordelingsmodellen i forbindelse med revidering av denne modellen. differensiere sterkere mellom undervisnings- og FoU-tid slik at ytterligere FoU-tid frigjøres til aktive forskere. 2. Styret ber om å få seg forelagt en sak om tiltak tilknyttet de ulike strategiene. 3. Styret ønsker at det etableres et FoU-utvalg som kan fungere som styringsgruppe for det videre arbeidet, og ber om at det legges fram en sak om sammensetning og mandat for et slikt utvalg. Punkt 2 i vedtaket er følgd opp i S-sak 73/08. Strategiane og føremålet kan seiast å vere forankra i strategisk plan punkt 3.2.c, om å auke omfanget av eksternt finansiert FoU. I årsplanen for 2008 er det sett mål for tildelingar frå Forskingsrådet, og tiltaket med forskargrupper er ført opp. Som nemnt ovanfor, må samordninga av strategisk plan med den nye målstrukturen, og dermed med årsplanane, vente til ny strategisk plan blir utarbeidd. I det arbeidet må det vurderast nøye kva detaljeringsnivå planen skal liggje på. I denne omgangen meiner eg det greier seg å setje inn eit slikt nytt underpunkt: HiT skal auke tildelinga av midlar frå Forskingsrådet gjennom dei strategiane styret vedtok i S-sak 12/08. PLANENS KAPITTEL 4 FORMIDLING, KOMMUNIKASJON OG SAMFUNNSKONTAKT 4.2 Mål Punkt a) set eit mål om 20 % vekst i talet på publikasjonar i formidlingskategoriane. Oppdaterte tal på slike publikasjonar i åra 2004 til 2006 er 53, 32, 41 og 53, dvs stillstand frå 2004 til 2007. Men talet i 2004 er særleg usikkert av di kategoriane er endra. Frå 2005 ser det ut til å vere god auke, og eg rår til at måltalet blir ståande. Punkt b) seier at HiT skal auke talet på studierelaterte partnerskapsavtalar o.l. og ha aktive samarbeidstiltak under alle inngåtte avtalar. HS meiner det bør leggjast til at ein skal gjennomgå dei eksisterande avtalane med tanke på avvikling og fornying. Avtalane bør og i størst mogleg grad samordnast og gjerast meir tilgjengelege. Eg er samd med HS i sak, men er i tvil om det er realistisk å få gjort ein fullstendig gjennomgang og samordning innan utgangen av planperioden. Mykje av intensjonen er dessutan alt dekt i formuleringa om at alle avtalar skal vere aktive. HS gjer framlegg om at punkta 4.2.f) og 4.3.j), som båe gjeld samarbeidstiltak med høgskolar i nærleiken, blir flytta fram til punkt 1.3 (Langsiktig hovudmål) og 1.4 (Vekst og utvikling). Grunngjevinga er at slike tiltak er svært viktige. Eg kan ikkje sjå at den faktiske prioriteringa av nettverkssamarbeid vil bli endra gjennom ei slik redigering, som også vil gjere strukturen i planen meir uklår.
7 4.3 Strategiar I S-sak 13/08 gjorde styret vedtak om strategiar for å auke omfang og resultat av den eksternt finansierte verksemda (EFV). Studieseksjonen meiner at desse bør innarbeidast i strategisk plan. Styrevedtaket var slik: Styret vedtar som strategier for å øke omfang og resultat av den eksternt finansierte virksomheten: Hver avdeling bes om å peke ut 1-2 satsingsområder for denne virksomheten, gjerne på tvers av avdelingsgrensene. Det administrative støtteapparatet for denne virksomheten skal gjennomgås, herunder skal det vurderes om AKO ved EFL kan gis ansvar for all eksternt finansiert virksomhet i høgskolen rettet mot barnehager og skoler. Det skal fastsettes mål- og resultatkrav på dette området for hver avdeling ved fordelingen av 2009-budsjettet og fastsetting av årsplan for 2009. Spørsmålet om incentiver rettet mot den eksternt finansierte virksomheten skal vurderes i forbindelse med gjennomgangen av høgskolens budsjettfordelingsmodell og en fremtidig revisjon av høgskolens lokale lønnspolitikk. Vedtaket er følgd opp med utpeiking av satsingsområde i S-sak 74/08. I strategisk plan er det ikkje sett konkrete mål for omfanget av EFV, med unnatak av ei generell formulering under punkt 1.2 Utfordringar, om kurstimar i etterutdanning (2.2.2.d) og om eksternt finansiert FoU i punkt 3.2.c. I årsplanen, som er sett opp etter den nye målstrukturen, er det derimot sett konkrete mål, og eg reknar med at dette vil bli integrert i ny strategisk plan. I denne omgangen gjer eg framlegg om eit slikt nytt underpunkt: HiT skal auke omfang og resultat av den eksternt finansierte verksemda gjennom dei strategiane styret vedtok i S-sak 13/08. PLANENS KAPITTEL 5 - INTERNASJONALISERING 5.2 Mål I punkt b) og c) er måltala for ut- og innreisande utvekslingsstudentar sette til 100 for kvar kategori. Til saman er utviklinga slik frå 2004 til 2007: 80, 91, 107 og 154. Talet i 2007 fordeler seg med 88 innreisande og 66 utreisande. Utviklinga synest altså å vere i god gjenge, og målet om 200 i alt innan 2009 bør stå fast. Punkt f) seier at talet på avtalebaserte lærar- og forskarutvekslingar ut og inn skal auke til minst 150 pr år. Utviklinga har vore slik frå 2004 til 2007: 93, 41, 39 og 66. Målet kan synest vanskeleg å oppnå, men bør stå fast til vidare. Sjuande prikkpunkt seier at HiT skal søkje om å få tildelt ECTS (European Credit Transfer System) label, dersom ordninga held fram. Etter innspel frå studieseksjonen kan dette opplysast: I fjor var det usikkert om det kom til å bli fleire slike sertifiseringsrundar. Det er no kunngjort ein ny runde med søknadsfrist på nyåret 2009. Det kan søkjast både om ECTS-label og såkalla DS (Diploma Supplement) label. HiT har DS-label frå tidlegare. Den må rett nok fornyast, men det treng ikkje å stå i strategisk plan. Vi har ikkje tidlegare hatt ECTS-label. Ein søknad er under førebuing, og eg gjer framlegg om at punktet vert endra til HiT skal søkje om å få tildelt ECTS-label.
8 5.3 Strategiar Til punkt b) har HS tilsvarande framlegg som til punkt 4.2.b. Eg viser til mine merknader der. PLANENS KAPITTEL 6 PERSONAL- OG ORGANISASJONSUTVIKLING HS peikar på at eit tydeleg fokus på identitetsbygging, samkjensle og arbeidsmiljø er viktige faktorar for å kunne bli universitet, og meiner at strategiar for dette bør gjerast tydelege her. Avdelinga kjem ikkje med konkrete framlegg. Eg meiner dette kjem etter måten godt fram i planen samla sett, sjølv om det er rom for forbetringar. Slik eg ser det, er det ikkje tenleg å planfeste eit særskilt strategiarbeid innanfor personal- og organisasjonsutvikling no. Eg viser i den samanhengen til den kultur- og verdiprosessen som er gjennomført, til arbeidet med ei større arbeidsmiljøkartlegging som er i gang, til vedtak om overordna personalpolitikk i S-sak 76/08 og til arbeidet med ny strategisk plan som er i startgropa. 6.1 Overordna målsetjingar Siste avsnitt lyder slik: Høgskolen skal ha ei organisasjonsform, styringsorgan og fagleg og administrativ leiing som fremjer fagleg utvikling, likestilling, samarbeid og effektivitet. PO-seksjonen gjer framlegg om at fagleg og administrativ vert stroke av di det er eit unødvendig skilje, og at mangfald kjem inn mellom dei måla som skal fremjast. Det siste er knytt både til signal frå styresmaktene og til at det inngår i høgskolens verdigrunnlag. Eg sluttar meg til framlegget. 6.2 Mål I punkt c) er det sett som mål at prosentdelen kvinner i første- og toppstillingar (fast tilsette) skal auke frå 15 til minst 30 % (auka frå 25 % ved rulleringa sist). PO-seksjonen seier at parentesen må takast vekk, av di teljinga gjeld både fast og mellombels tilsette. Det same gjeld i punkt i). Eg tar dette til etterretning. Prosentdelen var 28 % i 2007. Punkt d) går ut på at prosentdelen kvinner i leiarstillingar skal auke frå 30 til minst 40 %. Tala for åra 2004-2007 er 30, 35, 32 og 34 %. Det er ikkje så mange slike stillingar, og dermed vil skifte av enkeltpersonar gje merkbare prosentvise utslag. Eg meiner målet om 40 % bør stå fast. PO-seksjonen gjer framlegg om at kvalitetssikring går ut i punkt g), av di det inngår i omgrepet kvalitetsutvikling. Eg sluttar meg til dette. Punkt i) seier at prosentdelen første- og toppstillingar av alle undervisnings- og forskarstillingar skal auke frå 41 til 50 %. Som opplyst i S-sak 09/08, har det synt seg at desse tala var utrekna på feil grunnlag. Oppdaterte tal syner stillstand (32, 34, 32 og 33 %). PO-seksjonen gjer framlegg om at målet vert endra til 35 %. Dette er i samsvar med årsplanen for 2008, og eg sluttar meg til framlegget. Punkt j) gjeld prosentdelen høgskolelærarar. Tilsvarande punkt vart tatt ut av årsplanen i S-sak 09/08 av di tala er små og seier lite om det samla kompetansenivået i høgskolen. Eg gjer framlegg om at det vert tatt ut her også.
9 6.3 Strategiar PO-seksjonen viser til at punkt d), om ein kultur- og verdiprosess, er gjennomført. Seksjonen meiner likevel punktet kan bli ståande for å markere at denne prosessen skal følgjast opp vidare. Eg tar dette til etterretning. PLANENS KAPITTEL 7 INFRASTRUKTUR OG STØTTETENESTER IT viser til at Datatilsynet og Riksrevisjonen stiller krav til at høgskolens personopplysningar blir forvalta i tråd med Personopplysningslova. På bakgrunn av dette er det sett i gang ein prosess for å utvikle ein informasjonstryggleikspolicy for HiT. IT meiner dette og anna arbeid for IT-tryggleik bør forankrast i strategisk plan. IT gjer framlegg om nye formuleringar, som eg kan slutte meg til. Setning 2 i punkt 7.1 Overordna målsetjingar får etter framlegget slikt tillegg (understreka): HiT skal ha IT-, bibliotek- og drifts- og administrative tenester som medverkar til å oppfylle høgskolens primæroppgåver og samfunnets krav til informasjonstryggleik gjennom rett organisering, bemanning og kompetanse og moderne arbeidsverkty. Nytt prikkpunkt under avsnitt 7.2 mål: Høgskolens informasjonstryggleik skal tilfredsstille krava i Personopplysningslova. Nytt prikkpunkt under 7.3: Strategiar: Høgskolen skal ha ein informasjonstryggleikspolicy for å sikre tilgang til og trygging av personopplysningar og annan viktig informasjon. Nils Røttingen høgskoledirektør Vedlegg: 1. Strategisk plan, rullert av styret 21.06.07 2. Notat frå Avdeling for allmennvitskaplege fag 19.09.08 3. Notat frå Avdeling for estetiske fag, folkekultur og lærarutdanning 19.09.08 4. Notat frå Avdeling for helse- og sosialfag 10.09.08 5. Notat frå Driftstenesta, 11.08.08 6. Notat frå IT-tenesta 26.08.08 7. Notat frå Seksjon for personalsaker og organisasjonsutvikling 16.09.08 8. Notat frå Seksjon for studie- og forskingssaker 19.09.08 9. Notat frå Seksjon for økonomisaker 19.09.08 10. Notat frå Likestillingsutvalet 15.09.08 11. Framlegg frå høgskoledirektøren til rullert strategisk plan 29.09.08