Fitjar kommune Notat Dykkar dato: Dykkar ref: Vår dato: Vår ref: Arkiv: Sakshandsamar: 19.10.2015 2014/824-7010/2015 002 Andreas Moe Larsen Felles saksutkast intensjonsavtale Framlegg til vedtak 1. XXXXXXX kommunestyre vedtek intensjonsavtale om kommunereform i Sunnhordland som vedlagt. 2. Ordføraren representerer XXXXXXX kommune i dei avsluttande forhandlingane. Utvida formannskap er referansegruppe. 3. Det skal haldast folkerøysting etter at det er semje om ein endeleg avtale. 4. Kommunestyret får saka til endeleg handsaming etter folkerøystinga. Bakgrunn Regjeringa la fram ein plan for kommunereforma i samband med kommuneproposisjonen for 2014 (Prop. 95 S (2013-2014)). I mars la den fram ei melding med nye oppgåver til kommunane. Stortinget har slutta seg til følgjande mål for kommunereforma: 1. Gode og likeverdige tenester for alle innbyggjarane 2. Heilskapleg og samordna samfunnsutvikling 3. Bærekraftige og økonomisk robuste kommunar 4. Styrka lokaldemokrati I samband med kommuneproposisjonen våren 2016 vil regjeringa koma med sitt framlegg til nytt inntektssystem for kommunane. Det blir vidare lagt opp til at regjeringa kjem til Stortinget med ein proposisjon om kommunereforma, inkludert det regionale nivået, våren 2017. Samstundes vil regjeringa leggje fram endringar i kommunestruktur basert på vedtaka i kommunestyrene våren før. Forprosjekt Kommunestyret vedtok DATO at kommunen skulle delta i ein forstudierapport i regi av Samarbeidsrådet for Sunnhordland om moglege scenario for nye kommunegrenser i Sunnhordland. Kommunane Austevoll, Bømlo, Etne, Fitjar, Kvinnherad, Stord og Tysnes gjorde alle vedtak om å gå samla inn i kommunereformprosjektet. Sveio kommune vedtok då å gå i samtalar med kommunane på Haugalandet. Seinare har Sveio òg vedteke å vurdera eit alternativ som omfattar heile Sunnhordland. Samarbeidsrådet vedtok 04.05.15 å senda rapporten til handsaming i kommunane. Austevoll, Bømlo, Fitjar, Stord og Tysnes vedtok å gå vidare i forhandlingar om kommunereform i Sunnhordland. Rapporten skildrar scenario 3 (dei fem kommunane): «Dette er eit mogelegheitsbilde der ein setjar saman 5 av kommunane i Sunnhordland. Det er kommunar som i stor grad har nytta seg av interkommunalt samarbeid på tenestenivå og samfunnsutviklingsområde før regjeringa foreslo dei nye oppgåvene til kommunane Dette vil vera ein mellomstor kommune i både innbyggjartal og areal. Denne kommunen vil bestå av både øyer og fastland. Det vil vera ein kommune der du i dag ikkje vil ha ferjefritt samband til alle
Side 2 av 2 deler av kommunen sjølv om den nye kyststamvegen vil binde fleire saman enn no. Det vil også vera ein kommune som har det aller meste i seg. Tenester Kommunereforma er ei velferdsreform som handlar om betre velferdstenester der folk bur no og i framtida. Denne kommunen vil vera ei samanslåing av kommunar som ikkje avvik nemneverdig frå kvarandre på tenesteområda barnehage, skule, pleie- og omsorg og kultur, mens skilnaden er større på teknisk område og administrasjon. Den demografiske utviklinga fram mot 2040 fører til at arbeidskraftbehovet aukar særleg på omsorgsområdet. Ein kan anta at ein så stor kommune vil ha store fagmiljø som kan styrke dybde og breidde i fagmiljøet. Det vil kunne påverke rekrutteringsmoglegheitene positivt. Det kommunen vil kunne ta ut synergiar på er administrasjon og på generelle stordriftsfordeler på drift av tenester. Avstandane i kommunen vil vera ei utfordring, og det vil vera viktig at ein organiserer basistenestene desentralisert slik at innbyggjarane får dei nær seg og at samlokaliserte tenester også blir lokalisert til fleire stader i kommunen. Her kan ein vurdere dei ulike alternativ som kjem fram på side 18 i denne rapporten. Myndigheitsutøving Kommunen vil ha god fagleg kompetanse, og ein ser ikkje store problem med myndigheitsutøvinga. Samfunnsutvikling Denne kommunen vil vera sterk nok til å klare å handtere mange samfunnsutviklingsoppgåver heilskapleg med handlekraft. Valet mellom ulike prioriteringar vil gjerast i kommunestyret. Når det gjeld planarbeid på areal og samferdsel er det nærliggjande å tru at kommunen og regionen kan opptre svært handlekraftig. Kommunen si rolla som samfunnsutviklar er viktig. Denne store kommunen kan vera handlekraftig i forhold til framtidig næringsutvikling, sysselsetting og busetting. For denne kommunen vil det vera ei viktig oppgåve å få arbeidd fram gode samferdsleutløysingar, og å få til etableringar av næring og offentlege og private institusjonar i regionen. Frigjeringa av administrative stillingar ved ei kommunesamanslåing, vil gjera kommunen i betre stand til å drive innovativt arbeid, vera utviklingsaktør og ein kan også frigjera ressursar til tenester. Økonomi Kommunereforma er inga økonomireform. Den økonomiske utviklinga framover er likevel vanskeleg å føresei p.g.a. at regjeringa no vurderer inntektssystemet på nytt. Ein kan uavhengig av inntektssystemet rekna med innsparingspotensial gjennom samordna administrasjon og stordrift av tenester. Demokrati Her har vi ein stor kommune med stor innflytelse. Det vil vera færre politikarar pr. innbyggjar, og det vil vera større avstand til politikarane for mange innbyggjarar og næringsaktørar. Vurderingstemaet blir lett om kva som er viktigast av å ha nært forhold til dei fleste politikarane i ein mindre kommune med mindre innflytelse eller større avstand til dei fleste politikarane i ein større kommune med større innflytelse på ein heilskapleg utvikling i regionen. Her må ein vurdera dei ulike lokalpolitiske alternativ som kjem fram på side 20 i denne rapporten. Anbefaling
Side 3 av 3 Regjeringa sitt ekspertutval meinte at kommunar med generalistprinsipp, bør ha minst 15 000 20 000 innbyggjarar for å kunne utføra sine oppgåver. Regjeringa er ikkje så opptekne i desse tala. Dette blir ein kommune som ligg monaleg over dette folketalet. Her vil det vera geografiske avstandar som er ei utfordring å løysa godt for innbyggjarane. Ei kommunesamanslåing vil både ha fordeler og ulemper. Ut frå ein faktabasert vurdering av fordelar og ulemper på noverande tidspunkt vil ein anbefale kommunen å bruke den resterande del av reformperioden fram til våren 2016 til å gå i forhandlingar med nabokommune/nabokommunar for å finne ut om kor ein vil stå etter ei kommunesamanslåing.» XXXXXXX kommunestyre gjorde DATO følgjande vedtak i saka: HER KJEM VEDTAK. Arbeidsutvalet har bestått av to representantar frå kvar kommune, i tillegg til to arbeidstakarrepresentantar og ein rådmann. Frå XXXX kommune har XXXXX og XXXXX delteke. Fitjar kommune har hatt ansvar for prosessen, som er finansiert med attståande midlar på om lag kr 60 000 frå forprosjektet, og kr 200 000 i tilskot frå Fylkesmannen i Hordaland. Kvar kommune får i tillegg kr 100 000 til innbyggjarinvolvering knytt til kommunereforma. Drøftingane i utvalet har vist at det er naudsynt å ha ein to-delt prosess. I fyrste omgang er det blitt semje om ein intensjonsavtale, før dei kommunane som vedtek intensjonsavtalen skal forhandla ein meir konkret endeleg avtale. Det er i denne omgangen intensjonsavtalen som skal til handsaming. Avtalen legg fast nokre overordna prinsipp for ein eventuell kommunereform i Sunnhordland. Mål og visjon Identitet og lokalsamfunn Kommunal organisering Demokratimodellen Økonomi, eigedomsskatt og kommunale avgifter Samferdsle Prinsipp for tenestetilbod Prinsipp for kompetanse Administrative prosessar Kommunikasjonsstrategi Ordførarane har i samarbeid med Atheno sett på aktuell mål- og visjonsformuleringar for ein ny kommune i Sunnhordland. Gjennom reformarbeidet kan ein byggje ein sterkare Sunnhordland-identitet. Det er likevel semje i gruppa om å leggja vekt på lokal identitet sjølv om ein blir del av ein større kommune. Lokalsamfunna og bygdene sine særpreg skal vera ein styrke for den nye kommunen. Det er vidare lagt vekt på at den nye kommunen skal arbeida for utvikling i alle kommunedelane. Sjølv om tenester og funksjonar blir samlokalisert, skal dei lokaliserast til alle delar av kommunen. Hovudlinene over korleis den nye kommunen skal organiserast blir lagt fast. Dette gjeld fastsetting av kommunesenter, lokalsentra og bygdesentra. Namn og symbol for den nye kommunen skal fastsetjast seinare.
Side 4 av 4 Det er lagt opp til lokalutval innan dei geografiske grensene for dei eksisterande kommunane, som skal ha ansvar for saker innan kultur, idrett og stadsutvikling. Dei skal vidare vera høyringsinstans for saker som vedkjem områda. Ein ny kommune kan drifta støtte- og stabsfunksjonar meir effektivt enn dei eksisterande kommunane, noko som kan gje redusert nivå på kommunale avgifter og redusert trong for eigedomsskatt. Dersom den nye kommunen finn å måtta ha eigedomsskatt, vil det vera trong for ei harmonisering av sats og takstgrunnlag. Det er mogleg å nytta overgangsordning for harmonisering av eigedomsskatten. Inndelingstilskotet gjer at den nye kommunen held på grunntilskot på om lag 12 mill. kroner frå kvar av samanslåingskommunane. Den nye kommunen tek i tillegg med seg om lag 5,4 mill. kroner i småkommunetillegg frå kvar av kommunane Fitjar og Tysnes. Ordninga gjeld i ein periode på 15 år, og så ei nedtrapping over 5 år. Samanslåinga vil utløysa tilskot til eingongskostnadar på 55 mill. kroner og reformtilskot på 25 mill. kroner. Samferdsleløysingar som knyt saman den nye kommune, særskilt høvesvis øyane Tysnes og Austevoll, vil bli prioritert i den nye kommunen. Organiseringa av den nye kommunen skal byggja på beste praksis frå dei eksisterande kommunane. Det blir ikkje endringar i skule- eller sjukeheimsstruktur i samband med reforma. Ettersom dei eksisterande kommunane er del av ulike helseforetak, politidistrikt og 110-område, må det fastsetjast nye grenser for desse funksjonane. Ingen tilsette skal mista jobben i samband med prosessen, men det kan bli naudsynt med nye arbeidsoppgåver, oppmøtestadar og stillingstitlar. Vegen vidare Proesessen med kommunereform i Sunnhordland går i tre trinn, og denne avtalen er trinn 2 i prosessen. Trinn 1 er Samarbeidsrådet for Sunnhordland sin rapport «Forprosjekt ny kommunereform i Sunnhordland», som blei sendt til kommunane i juni 2015. Forprosjektet lagde eit faktagrunnlag for den vidare prosessen. Trinn 1 forprosjekt Samarbeidsrådet for Sunnhordland Trinn 2 Trinn 3 Endeleg avtale Bakgrunnen for å dela prosessen i tre trinn, er å få naudsynt forankring i kommunestyra før ein forhandlar om den endelege avtalen. Gjennom vedtak av intensjonsavtalen viser kommunen at den ønskjer å koma til semje om ein endeleg avtale. Vilkåra for endelege forhandlingar er ulike basert på kor mange kommunar som deltek, og det er difor viktig at kommunane tek eit aktivt val om å delta vidare i prosessen. Dei kommunane som vedtek intensjonsavtalen går i avsluttande forhandlingar. Den endelege avtalen må presisera fleire av punkta i intensjonsavtalen. november/ desember 2015 Endeleg avtale januar 2016 folkerøysting/ innb.undersøking mars 2016 Avgjerd i kommunestyra april/mai 2016
Side 5 av 5 Det blir lagt opp til folkerøysting i alle kommunane samstundes. Arbeidet med å organisera folkerøystingane vil ta til etter vedtak i denne saka. Avtalen vil bli sendt ut til alle husstandar i kommunane før folkerøystinga, slik at innbyggjarane skal ha høve til å setje seg grundig inn i føresetnadane for saka. Kommunestyra vil gå til endeleg handsaming av kommunereform i Sunnhordland etter at folkerøystingane er gjennomført. Tilråding Gjennom drøftingar i arbeidsutvalet for kommunereform i Sunnhordland har ein kome til semje om overordna prinsipp for ein eventuell kommunesamanslåing, som skildra i intensjonsavtalen. Representantane meiner desse prinsippa kan leggja grunnlaget for ein kommunereform. Det skal etter vedtak i denne saka forhandlast vidare om konkrete punkt i ein endeleg avtale, som til dømes lokalisering av einskilde tenester, skulestruktur og nærare skildring av politisk struktur. Inngåing av ein intensjonsavtale er eit tydeleg signal om at ein ønskjer å kome til semje om ein endeleg avtale, som kan danna grunnlaget for ein kommunereform i Sunnhordland. Ein bitt seg ikkje til eit resultat på noverande tidspunkt, men ein knyt seg til ein intensjon om kommunereform i Sunnhordland. Representantane meiner den føreliggjande avtalen dannar eit godt fundament for avsluttande forhandlingar, og tilrår vedtak som framlegg i saka. Ein kan først ta endeleg stilling til saka når det endelege forhandlingsresultatet er kjent og innbyggjarane sitt syn på saka er henta inn gjennom folkerøysting. Fornamn Etternamn ordførar