VINDAFJORD KOMMUNE SAKSPAPIR Saksnummer Utval Vedtaksdato 107/16 Formannskapet 20.12.2016 083/16 Kommunestyret 20.12.2016 Saksbehandlar: Aarvik, Sissel Sak - journalpost: 16/950-2016018651 Andregongs handsaming, Detaljregulering for fotgjengarundergangar i Ølensvåg Rådmannen sitt framlegg til vedtak Detaljregulering for fotgjengarundergangar i Ølensvåg vert godkjent slik planen ligg føre med plankart og føresegner daterte 10.12.16. 20.12.2016 Formannskapet Rådmannen sitt framlegg til vedtak vart samrøystes tilrådd. FS-107/16 Vedtak: Tilråding frå Formannskapet: Detaljregulering for fotgjengarundergangar i Ølensvåg vert godkjent slik planen ligg føre med plankart og føresegner daterte 10.12.16. Aktuelle lover, forskrifter, avtalar, reglement m.m.: Plan- og bygningslova og naturmangfaldlova. Saka gjeld: Andregongshandsaming av Detaljregulering for fotgjengarundergangar i Ølensvåg. Saksopplysningar / vurdering: Planutkastet vart førstegongshandsama i formannskapet i møte 01.11.16, sak 079/16. Offentleg ettersyn og høyring vart gjennomført i tidsrommet 01.11.16. 06.12.13. Dette vart også kunngjort i Grannar og Haugesunds Avis og på kommunen sine nettsider. Grunneigarar/naboar/rettshavarar og offentlege myndigheiter/interesseorganisasjonar vart orienterte om høyringa i eigne brev. Følgjande merknader kom inn: Statens vegvesen brev datert 10.11.16 Uttalen vert gitt som vegeigar og som statleg fagmynde med sektoransvar for vegtransport.
Dei syner til at dette er eit trafikksikringstiltak som har vore etterspurd lenge og at det vert lagt til rette for å etablera busslommer i tilknyting til undergangane. Dei har følgjande to faglege råd: - På nordsida av E134 er det sett av areal til både trapp og rampe frå undergangen og opp til busslomma. Det vert gitt fagleg råd om å ta bort arealet som er sett av til trapp, slik at det berre blir regulert rampe opp til busslomma. Gangavstanden er omtrent like lang, anten ein vel trappa eller rampa. Dersom ein tek bort trappa kan rampa få ei betre utforming. - Fagleg råd om å regulera fortau på nordsida av E134 frå busslomma mot plangrensa i vest. Det bør etablerast fortau heilt frå busslomma og gjennom krysset inn mot Statoil/Kiwi. Statens vegvesen vil sjå nærmare på dette i samband med byggeplanen. Plankartet er endra i samsvar med vegvesenet sine faglege råd. Ved å fjerna trappa kan rampen få ei betre utforming. Endeleg utforming av anlegget innafor føresegnsområde #2 vil skje i byggjeplanperioden, sjå også merknadane til uttalen frå Omega. Det er regulert inn fortau frå busslomma til plangrensa. Bygging av dette må sjåast i samanheng med framtidig løysing for mjuke trafikkantar på nordsida av europavegen i Ølensvåg. Krysset inn mot Statoil/Kiwi er sterkt trafikkert, også av store køyretøy, til/frå fleire kantar. Rogaland fylkeskommune, regionalplanavdelingen brev datert 06.12.16 Fylkesrådmannen meiner at planforslaget viser ei utforming som svarar på trafikk sikker kryssing av E134, gitt Vegdirektoratet sitt krav om at miljøgateutforming på ein stamveg ikkje kan tillatast. Det er uheldig at alternative tiltak i form av midlertidige trafikksikringstiltak og kryssingspunkt ikkje er vurdert nærare som del av planarbeidet. Fylkesrådmannen vil tru at den utforminga som det no vert lagt opp til vil bli verande i Ølensvåg i lang tid etter at stamvegen er flytta ut av Ølensvåg. Utforminga vil då danna ein sterk barriere i tettstaden. Nasjonal transportplan 2018-2029 (NTP) skal vedtakast i 2017, men det er usikkert om ny E134 Bakka-Solheim utanfor Ølensvåg blir prioritert. Dersom denne traseen vert sikra finansiering i NTP rår dei til at kommunen tar planen opp til ny handsaming. Ein ev. ny plan for dette kryssingspunktet i Ølensvåg bør leggja til rette for miljøgate utforming med gode og midlertidige trafikksikringstiltak. Det er fylkesrådmannen si erfaring at Vegdirektoratet kan vurdera avvik frå eigne normer for stamvegnett dersom finansiering av omkjøringsveg er sikra. Ei trafikksikker kryssing av vegen, som samtidig byggjer ned dagens E134 som en barriere, vil kunne bidra til at det vert skapt ein meir attraktivt og levande tettstad i Ølensvåg den dagen tungtrafikken og gjennomgangstrafikken er borte. Fylkesrådmannen ser at det er gode grunnar til at kommunen sørgjer for at planforslaget vert godkjent før 31.12.2016, for å få samanhengande planlegging og gjennomføring av både undergangar og gang-/sykkelveg mellom Ølen og Ølensvåg i samsvar med vegvesenet sitt regelverk for gjennomføring av tiltak på riksvegnettet. Fylkesrådmannen støttar kommunen i at dette er riktig prioritering, spesielt dersom NTP ikkje skulle sikre finansiering av E134 Bakka-Solheim. Planen dekker ikkje berre behovet for trafikksikker kryssing av E134, men legg også til rette for strategisk plasserte og universelt utforma busshaldeplassar i Ølensvåg. Sjølv om E134 på sikt blir lagt om, vil denne strekninga også i framtida sannynlegvis vera den mest trafikkerte i kommunen i lang tid framover. ÅDT mellom Ølen og Ølensvåg er i dag meir enn 3.000 høgare enn resten av E134 i Vindafjord. Trafikken i planområdet vil vera trafikk mellom Ølen og Ølensvåg, sannsynlegvis inkl. dei som skal mellom Bjoa/Ølensvåg og FV 514 (Sandeidvegen) og dei som skal til/frå Vågshagen med skule, barnehage og bygdahus. Ved å heva
E134 i det aktuelle området, vil det også bli ei flatare og betre utforma utkøyring frå Vågshagen. Som fylkesrådmannen skriv, så er det på noverande tidspunkt usikkert om ny E134 Bakka- Solheim kjem inn i NTP 2018-29 og i såfall kor mykje midlar som vil bli sett av. Det er såleis uavklart når ny E134 kan bli bygd. Ein reguleringsplan kan til ei kvar tid opphevast av eit nytt planvedtak. Rådmannen vil ikkje rå til no å ta standpunkt til ev. endring av planen som følgje av ev. positivt vedtak for E134 Bakka-Solheim i NTP 2018-29. Fylkesmannen i Rogaland brev datert 02.12.16 Har ingen merknadar i saka, og støttar vegprosjektet om betre trafikktryggleik ved kryssing av E134 i Ølensvåg. Som samordnande statsetat refererer dei Statens vegvesen sine faglege råd, og legg ved brevet frå vegvesenet. Mattilsynet brev datert 03.11.16 Planen er ikkje i konflikt med regelverket dei forvaltar. Omega brev datert 06.12.16 Dei viser generelt til at dersom det skal etablerast undergang er plassering som i tidligare høyringsforslag betre tilrettelagt for å vidareføra gode løysningar for fotgjengarar og syklistar, samt forholda rundt deira verksemd. Dei meiner at det er generelt uheldig at det ikkje samtidig med reguleringsplanen for undergangen også vert vist korleis forholda på nordsida av E-134 er tenkt løyst. Dei peikar spesielt på deira framtidige utbyggingsbehov og godkjent utbygging. Dei har nå gjort ferdig grunnarbeidet for neste byggetrinn. Området over byggjegrunnen er foreløpig asfaltert og vert nytta som parkering fram til dei startar neste etappe. Parkeringsdekninga på dette området vil då utgå. Ut frå dette er det heilt sentralt at forholda knytt til parkeringsdekning vert oppretthalde på dagens nivå. Endelig løysning på utforming og plassering av undergang må gjerast på ein slik måte at konsekvensane for Omega sine område vert minimalisert. I e-post av 1.des. 2016 frå Vindafjord kommune går det fram at det er avklara med Statens vegvesen at p-plasser som går tapt vil gis økonomisk erstatning for. Vidare heiter det at eventuelle parkeringsplassar som går tapt ved utbygging må løysast i reguleringsplanen for resten av området. Dei vil også kommentera at det er ein føresetnad at det i reguleringsplanen som er under arbeid blir lagt inn tenlege parkeringsplassar som erstatning. Det vert føresett at framdrifta med dette planarbeidet har høg prioritet, slik at det ikkje får konsekvensar for neste byggetrinn på tilbygget deira. Merknad frå Statens vegvesen «P-plasser vil ikke kunne erstattes innenfor foreliggende planområde, og eventuelle erstatningsplasser må derfor reguleres i planen for resten av sentrumsområdet. SVV vil forsøke å minimalisere inngrepet på nordsiden av vegen, og tilby økonomisk erstatning for p- plassene som går tapt». Rådmannen er samd i at heile Ølensvåg sentrum helst skulle vore regulert under eitt. Arbeidet med ein slik plan har pågått lenge, men er av ulike grunnar ikkje blitt fullført. For å kunna realisera tiltaka som går fram av planutkastet i nær framtid, må dette planarbeidet forserast. Dette heng m.a. saman med at arbeidet med gang- og sykkelvegen mellom Ølen og Ølensvåg skal starta opp våren 2017 og at det vil vera både økonomisk og praktisk gunstig å koordinera desse to prosjekta. Statens vegvesen sitt regelverk seier m.a. at for tiltak på riksveg må godkjend regulerings plan liggja føre pr. 31.12.16 for å kunna ha oppstart i 2018.
Ved å plassera undergangen under E134 slik det er gjort i planforslaget, vil ein ved å heva E134 her få ei flatare og betre utkøyring frå Vågshagen. Plankartet er endra i samsvar med det faglege rådet frå Statens vegvesen om å ta vekk trappa i tilknyting til busslomma på nordsida av E134. Dette for å forsøka å minimera inngrepet på nordsida av vegen, mot Omega. Parkeringsplassar vil bli ein viktig del av det som skal avklarast i den komande reguleringsplanen for Ølensvåg sentrum. Arbeidet med denne planen vil no bli teken opp att, då det m.a. har skjedde ein del avklaringar av eigedomsforhold, ynskje og planar hos grunneigarar, utbyggjarar og næringslivet i Ølensvåg i den vestre delen av sentrumsområdet. Det vert elles vist til uttalen ovanfor frå Statens vegvesen. Magne Andreassen og Grete Andreassen, gnr. 294 bnr. 70 brev datert 27.11.16 Store delar av huset ligg i raud støysone i flg. støyrapporten. Dei krev støyskjerming av heile langs eigedomen mot E134. Støyskjerming vil bli ivareteke i samsvar med T-1442, jf. pkt. 3.3 i føresegnene: «Tilrådingane i T-1442/2012 Retningslinje for behandling av støy i arealplanlegging og rettleiaren til denne (TA-2115), skal så langt det er teknisk mogeleg og økonomisk forsvarleg etter kost-/nyttevurderingar, overhaldast. Vidare gjeld Vegdirektoratet sine retningsliner for praktisering av støy. Desse, skal så langt det er teknisk mogleg og økonomisk forsvarleg etter kost-/nyttevurderingar, tilfredstillast. Reguleringsplanen for fotgjengarunderangar er definert som punktutbetring. Det endelege omfanget av støytiltak vert vurdert i samband med gjennomføring av vegprosjektet». Det vert også vist til fagrapporten om støy som er utarbeidd for planforslaget. Astri Norunn Brekke Hustveit og Peder Hustveit, gnr. 294 bnr. 27 brev datert 29.11.16 Store delar av huset ligg i raud støysone i flg. støyrapporten. Dei krev støyskjerming av heile langs eigedomen mot E134. Dei ynskjer i tillegg at fjellnabben som ligg i grensa mellom E134 og eigedomen består som i dag. For å redusera trafikkstøyen ynskjer dei løyve til å byggja garasje/uthus bak fjellnabben langs E134. Dette inneber at det må gis løyve til å føra opp bygget ca. 9 m frå senter veg på E134. Om støyskjerming generelt, vert det vist til det som er sagt ovanfor, under uttalen frå Andreassen. Store delar av haugen/fjellnabben som det vert vist til i uttalen ligg innafor arealet som er føreslått regulert til midlertidig anleggs- og riggområde. I den grad det skjer inngrep i denne i anleggsfasen, skal terrenget tilbakeførast til opphavleg stand etter avslutta arbeid, jf. føresegnene 7.1: «Etter avslutta anleggsperiode, og seinast eit år etter vegopning, skal området vere tilbakeført og revegetert i samsvar med byggeplan. Areala skal tilbakeførast til opphavleg stand». Når det gjeld oppføring av garasje/uthus så kan det søkjast dispensasjon frå byggjegrensa og få dette vurdert når veganlegget er bygd. Behovet for å plassera garasjen/uthuset på skissert plass, så nær vegen, må sjåast i ljos av andre støyskjermingstiltak som blir utført som følgje av planen. Ronny Vågen, gnr. 294 bnr. 57 brev datert 29.11.16 Han skriv at huset hans vil bli veldig innestengt, noko som igjen vil resultera i at det vil bli lite friplass og mykje innsyn og støy. Dette vil skapa mistrivsel i forhold til dagens standard.han
ser ikkje noko grunn for å ha sykkelveg inn mot tomta på vestsida, då det allereie fins sykkelveg på andre sida av avkjørsla til Vågehagen. Håpar dette blir endra og at sykkel vegen kan trekkjast lenger i frå huset eller kortast inn på breidda. Han skriv at planen vil medføra stor verdiforringelse av eigedomen. Merknad frå Statens vegvesen «Dette må tas opp og drøftes i forbindelse med grunnforhandlingene». Gang- og sykkelvegen på vestsida av huset (austsida av vegen til Vågshagen) kan ikkje sløyfast. Den må nyttast av dei mjuke trafikantane som kjem frå Vågshagen og skal til busslomma på sørsida av E134, dei som skal austover på gang- og sykkelvegen eller som skal vestover på gang- og sykkelvegen eller til busslomma på nordsida av E134 og som ikkje kan nytta trappa. Tilsvarande, men motsett, vil vera for dei som skal til Vågshagen. Oppsummering / konklusjon Det har lenge vore etterspurt trafikksikker kryssing av E134 i Ølensvåg. Det er og frå fleire hald peika på at utkøyringa frå Vågshagen er bratt og trafikk farleg, særleg på vinteren. Ved gjennomføring av denne planen vil det bli ei trafikksikker kryssing av E134, ei flatare og betre utforma utkøyring til europavegen frå Vågshagen og strategisk plasserte og universelt utforma busslommer i Ølensvåg. Vurderingar etter naturmangfaldlova er gjort ved førstegongshandsaminga av planutkastet. Det er ikkje registrert konfliktar. I høyringa har det ikkje kom fram merknadar som tilseier at planen ikkje kan vedtakast slik han ligg føre. Vedlegg: FØRESEGNER 10.12.16 PLANSKILDRING 10.12.16 Plankart 101216