Nord-Fron kommune Politisk sak Detaljreguleringsplan for Brekka fjelltak - 1. gongs behandling Utval Saksnr Møtedato Saksbehandlar Planutval 075/16 14.06.2016 Reidun Inger Tøfte Saksansvarleg Arkiv Arkivsaknr. 15/1064 Reidun Inger Tøfte L13 Journalpost 16/6791 Vedlegg: 1 Brekka_Plankart_20160603 2 Reguleringsbestemmelser_Brekka fjelltak_20160606 3 Planbeskrivelse Brekka_20160604 4 BrekkaFjelltak_KU_20160513 5 ROS_BrekkaFjelltak_20160502 6 NOT001v2 Brekka Fjelltak Støyutredning 7 Brekka_Feltregistrering_MoserLavSoppBregner_20160425 8 BrekkaFjelltak_Uttalelser ved oppstart Oppsummering av saka: Forslag til detaljreguleringsplan for Brekka fjelltak er motteke til behandling av kommunen. Formålet med planarbeidet er å regulere steinuttak på eigedomen Brekka som ligg aust for noverande E6 mellom Kvam og Vinstra, i eit område der det tidlegare har vore drivi prøvedrift. Det tilrås at planen blir lagt ut til offentleg ettersyn. Bakgrunn for saka: Forslag til detaljreguleringsplan for Brekka fjelltak er utarbeida av konsulentfirmaet Norconsult AS på vegne av Ahsco Entreprenør AS, og er innsendt til kommunen til 1. gongs behandling i planutvalet. Ahsco Entreprenør AS fekk innvilga dispensasjon frå kommuneplanen sin arealdel for prøveuttak i området i 2013 (PU-sak 17/13, i møte 5.3.2013). Prøveuttaket var avgrensa til 2 år og inntil 1.000 m3. Evt. vidare drift var føreset å skulle skje etter godkjent reguleringsplan. Prøveuttaket har gjort at dei nå ønskjer å etablere fjelluttak for meir permanent drift. Planforslaget har til formål å regulere areal til steinuttak, dvs. område der det kan tas ut og foredlast steinprodukt, på eigedomen Brekka, gnr. 315 bnr. 7 og 48 (i matrikkelen heiter eigedomen Stø nordre nedre). Eigar er Christina Stø. Uttaket gjeld stein som er eigna for muring og ein ser for seg knusing av vrakstein. Planområdet ligg aust for Gudbrandsdalslågen, på Brekka mellom Vinstra og Kvam, og omfattar område for fjelltak og tilkomsten til uttaket. Tilkomst vil vere frå E6 via den kommunal vegen Støsvegen fram til uttaksområdet, ei strekning på omlag 950 meter. Prøveuttaksområdet ligg i nærleiken av avkøyringa frå Støsvegen. Det aktuelle uttaksområdet er vist som landbruks-, natur- og friluftsområde i arealdelen av kommuneplan 2011-2022.
Planstart og planprogram for detaljregulering med konsekvensutgreiing (KU) vart annonsert i lokalaviser og i brev til berørte partar 8.7.2015. Planprogram vart vedteke i planutvalet i møte 8.12.2015, sak 136/15. I oppstartsperioda kom det inn 10 merknader. Merknadene er oppsummert og kommentert i planforklaringa, kap. 4. Innhald i planforslaget: Planforslaget og bakgrunn for dette kjem fram av vedlegg 1-8. Planforslaget regulerer anslagsvis eit massetak for planområdet på om lag 384.555 m3, jf. vedlegg 4. Mineralressursen i uttaksområde er betydeleg og vil kunne drivast i fleire ti-år. Det er krav til driftsplan for området før uttak kan setjast i gang og uttak skal skje etappevis. Planforslaget viser område regulert til steinbrudd og massetak på om lag 33 daa. Det er i tillegg avsett ein minimum 20 m brei vegetasjonsskjerm rundt heile uttaksområdet for å hindre innsyn, og redusere støy og støvflukt. Planområdet på tilsaman 75,1 daa er utvida slik at det er eit samanhengande areal etter oppstartsvarselet som den gongen omfatta to adskilte område, dvs. uttaksområde og kryssutbetring ved noverande E6 (Gudbrandsdalsvegen), men ikkje Støsvegen i mellom. Rekkjefølgjebestemmelsar pålegg den som skal drive steinbruddet å utbetre krysset mellom Støsvegen og E6, bygge ny felles adkomstveg (SKV 3) til 5 boligtomter, utvide vegen (SKV 1) i breidda mellom krysset og den nye boligavkjørsla, endre den noverande boligadkomsten til gangveg og å bygge ei forlenging av gang- og sykkelvegen langs noverande E6 slik som planforslaget viser. På parsell SKV 2 av Støsvegen skal det av drivar av steinbruddet bli etablert/utbetra møteplassar og gjerast utviding av breidda i kurver slik som planforslaget viser. Desse tiltaka skal utførast før drifta av steinbruddet kan starte. Det planlagte uttaksområde, som ligg i sterkt skrånande terreng, går over til LNFRområde etter endt drift og istandsetjing. Aktuelle konsekvensar og eventuelle avbøtande tiltak er vurdert i vedlegg 4, konsekvensutgreiing. Miljøfagleg vurdering: I KU kapittel 5.1 Virkninger for naturmangfold er forhold rundt naturmangfaldet utreda. I tillegg til kjent kunnskap så er det gjort ei enkel supplerande undersøking på lav, mose, sopp og bregnar. Det vurderast til at utredningane gjort av Norconsult på temaet er tilstrekkeleg og at kunnskapen om naturmangfaldet for område er godt nok. Det konkluderast derfor med at krava i Naturmangfoldlovens 7 jf 8-12 er oppfylt. Landbruksfagleg vurdering: Landbruk: Kart frå NIBIO syner at omsøkt areal består av produktiv skog. Arealet er ikkje definert som dyrkbar jord jf. jordlova sin 9. Området er ikkje registert som biologisk verdifullt. Søk med omsyn til kulturminne syner ikkje registreringar.
Tiltaket kan kome i berøring med ein eksisterande traktorveg/råk som blir brukt ved flytting av husdyr (storfe) til og frå beite. Det er viktig at råket blir oppretthalde og ikkje på nokon måte blir stengt som følgje av tiltaket. Uttaksområde må sikrast slik at dyr ikkje kjem til skade. Vilt: Jf. viltområdekartet er det registert trekkrute for gaupe i området. Tiltaket grensar inntil eit område med generelt god bestand av rådyr. Samla sett vurderer ein ikkje dette til å vere viltfaglege kvalitetar som er av ein slik karakter at ein går imot tiltaket. Planfagleg vurdering: Steinuttak på Brekka er ikkje heimla i arealdelen av kommuneplan. Det er difor krav om utarbeiding av planprogram og konsekvensutgreiing. I vedlegg 4 er aktuelle konsekvensar som følgje av tiltaket vurdert, samt at avbøtande tiltak er foreslått. Drift av steinbruddet vil medføre støy ved fjellboring, sprenging, pigging og knusing i uttaksområdet, og ved transport langs Støsvegen. I tillegg kjem støvproblematikk. Det er ingen busetnad innafor avgrensinga av planområdet. Det er fleire boligar og fritidsboligar i ein avstand på mellom 80-340 meter frå uttaksområdet. Det ligg også fleire boligar langs Støsvegen. Det er gjennomført ei støyanalyse for tiltaket, jf. vedlegg 6. Rapporten viser at støy frå nokon av arbeidsoperasjonane kan overstige eller ligge nær grenseverdiane for støy som er fastsett i forurensningsforskrifta for den nærmaste bebyggelsen nedanfor steinbruddet, Det vil fyrst og fremst kunne vere tilfelle i ei tidleg driftsfase og utan at avbøtande tiltak blir gjennomført. Ved gjennomføring av avbøtande tiltak viser støyanalysa at ein vil kome under grenseverdiane for støy. Avbøtande tiltak for støy er innarbeida i reguleringsføresegnene, i tillegg er det sett driftstider for støyande verksemd. Bebuarar langs Støsvegen sitt krav om støyskjerming mellom Støsvegen og bebyggelsen er ikkje imøtekome i planforslaget, jf. at støyvurderinga viser at støy frå trafikk langs Støsvegen ikkje vil kome opp mot dei grenseverdiane for støy som er fastsett i forurensningsforskrifta. Planforslaget har imøtekome bebuarar sitt ønskje om ei ny felles boligavkøyring til 5 boligeigedomar nedst i Støsvegen. Planlagt drift i steinbrotet vil kunne gje ei auke av ÅDT på Støsvegen innafor planområdet på 50-61, dvs. ei relativt stor trafikkauke i høve til dagens trafikk som er berekna til 39 kjøretøy pr. døgn. Om lag halvparten av auka som utløysast av tiltaket, er tyngre kjøretøy, dvs. lastebiltrafikk. Trafikken på den aktuelle vegstrekninga er likevel vurdert til å vere beskjeden, jf. KU (vedlegg 4). Utbetring av vegnettet er naudsynt m.a. for at det skal tåle belastninga som etablering av steinuttaket vil medføre i form av massetransport og anleggstrafikk. Støsvegen er relativt smal og bratt, og standard på vegen er utifrå dagens bruk. I planen er det regulert nødvendig areal for ei evt. framtidig breiddeutviding av Støsvegen på strekninga frå krysset mot dagens E6 og opp til det planlagte steinbruddet. For den nedre del av Støsvegen opp til ny boligavkøyring, er det sett krav om breiddeutviding av vegen til minst 6 m kjørebanebreidde før drifta i steinbruddet kan starte.
Gjennom rekkjefølgjebestemmelsar er det sett fleire krav til utbetring av Støsvegen, samt utbetring av krysset mellom Støsvegen og noverande E6, før drifta av steinbruddet kan starte. Kommunen føreset at drivar av steinbruddet tek kostnadene med utbetringstiltaka. I konsekvensutgreiinga er det foreslått nedsett fartsgrense på Støsvegen opp til to boligar som ligg om lag 500 m opp frå krysset mot dagens E6 eller evt. opp til det planlagte steinbruddet, for å betre trafikksikkerheita. Dette er eit tiltak kommunen som vegeigar vil følgje opp. Støsvegen er ein grusveg. Det bør vurderast om det skal leggjast fast dekke på nedre del av vegen for å redusere støvproblematikk for dei nederste boligane. Utifrå ei samla vurdering der ein m.a. vektlegg den relativt lange avstanden mellom boligbebyggelsen og steinuttaket, vil ein tilrå at det i staden blir iverksett avbøtande tiltak i tørre periodar som vatning og «strøing» med bindemiddel for å unngå/redusere støvplagene. I plandokumenta er det teke inn bestemmelsar som forpliktar drivaren av steinbruddet til å iverksetje tiltak i tørre periodar for å redusere støvplagene. Støsvegen har i dag aksellast på BK 8. Dersom drivar av steinbruddet har behov for ein høgare standard på vegen, føreset kommunen at det er drivar av steinbruddet som må oppgradere vegen til ønska standard. På plankartet er det vist eit gamalt råk som går nedanfor planområdet og som ikkje vil bli berørt av tiltaket. Ein viser elles til vedlegg 4 s. 25 for omtale av ein traktorveg/sti som går gjennom prøveuttaksområdet og som i dag ikkje lenger kan nyttast pga prøveuttaket. Råk som går nedanfor planområdet sikrar framkommelegheit forbi steinuttaket og nyttast som turstig, i samband med fedrift etc. Rådmannsleiinga si vurdering: Rådmannsleiinga viser til vurderingane gjort ovanfor. Administrasjonssjefen legg saka fram for planutvalet med slik Innstilling: 1. I medhald av plan- og bygningslova 12-10 vedtek planutvalet å leggje forslag til reguleringsplan for detaljreguleringsplan for Brekka fjelltak ut til offentleg ettersyn slik det går fram av vedlagte plandokument. 2. Administrasjonssjefen får fullmakt til å gjere evt. redaksjonelle endringar i plandokumenta. Administrasjonssjefen i Nord-Fron Arne Sandbu PU-075/16 14.06.2016 Behandling: Det vart lagt fram følgjande redaksjonell endring i innstillinga pkt. 1:
I medhald av plan- og bygningslova 12-10 vedtek planutvalet å leggje forslag til detaljreguleringsplan for Brekka fjelltak ut til offentleg ettersyn slik det går fram av vedlagte plandokument. PU-075/16 14.06.2016 Vedtak: Samrøystes som redaksjonell endra innstilling.