HORDALAND FYLKESKOMMUNE Økonomiavdelinga Arkivsak 200703432-39 Arkivnr. 8211 Saksh. Vetlesand, Nils E. Saksgang Fylkesutvalet Fylkestinget Møtedato 04.12.2008 09.12.2008-10.12.2008 KOLLEKTIVTRANSPORT - KJØP AV BYSTASJONEN TERMINAL OG TOMTEAREAL TIL BUSSANLEGG PÅ ASKØY SAMANDRAG Fylkesrådmannen foreslår i saka å kjøpa fisjonert aksjeselskap frå A/S Nygårdstangen for 15 mill. kr. Selskapet får hand om terminalområdet ved Bystasjonen. Fylkerådmannen foreslår i tillegg å løyva 1 mill. kr til vidare planarbeid for terminalområdet med sikte på å få detaljprosjektering av opprustingsarbeidet gjennomført snarast råd. Frå før står det til rådvelde 5 mill. kr til slikt planarbeid. Fylkesrådmannen foreslår vidare i saka å kjøpa eit tomteareal på om lag 30 dekar ved Skarholmen sør på Askøy til bruk for bussanlegg. Kjøpesummen er 16 mill. kr og med tillegg for dokumentavgift og andre kostnader ved kjøpet foreslår fylkesrådmannen ei løyving på 17 mill. kr. Fylkesrådmannen rår til at kjøpet av aksjeselskapet vert finansiert ved å nytta midlar frå kapitalfondet. Kjøpet av tomtearealet på Askøy vert foreslått finansiert ved å setja ned løyvinga til byggearbeida for Nordahl Grieg videregående skole i 2008. Fylkesrådmannen foreslår at løyvingane til vidare planlegging av opprustinga av Bystasjonen kollektivterminal og løyvinga til festeavgift til Bergen kommune vert finansierte ved sparde leigekostnader som følgje av kjøp av aksjeselskap. Sidan samferdselsutvalet ikkje har fleire møte i 2008, vert saka lagt fram direkte for fylkesutvalet etter samråd med leiaren i samferdselsutvalet.
FORSLAG TIL INNSTILLING 1. Fylkestinget godkjenner kjøp av fisjonert selskap frå A/S Nygårdstangen for 15 mill. kr. 2. Fylkestinget godkjenner avtale om festekontrakt med Bergen kommune av 10. november 2008, slik den går fram av vedlegget. 3. Fylkestinget godkjenner kjøp av g.nr 10 b.nr 13 i Askøy kommune for 16 mill. kr til bruk for bussanlegg slik det går fram av vedlagde kjøpsavtale. Fylkestinget løyver i tillegg 1 mill. kr til kostnader i samband med kjøpet. 4. Fylkestinget godkjenner at budsjettet for 2008 vert endra ved at løyvinga til bygging av Nordahl Grieg videregående skole vert redusert med 17 mill. kr, jf. punkt 3. 5. Fylkestinget godkjenner at budsjettet vert auka med 1,7 mill. kr som følgje av avtale med Bergen kommune om festekontrakt, jf. punkt 2. Fykestinget løyver i tillegg 1 mill. kr til vidare planlegging av Bystasjonen kollektivterminal. 6. Fylkerådmannen får fullmakt til å gjennomføra budsjettendringane som følgje av fylkestinget sitt vedtak slik det er skissert i saka. Paul M. Nilsen Johnny Stiansen Vedlegg: Forprosjekt for utvikling av terminalområdet frå november 2007 Avtale med Bergen kommune av 10. november 2008 om festekontrakt Brev frå advokatfirma Deloitte AS av 28. novemmber 2008 Avtale om kjøp av g.nr. 10, b.nr. 13 i Askøy kommune med kart over tomtearealet 2
FYLKESRÅDMANNEN, 28.11.2008: Sidan samferdselsutvalet ikkje har fleire møte i 2008, vert saka lagt fram direkte for fylkesutvalet etter samråd med leiaren i samferdselsutvalet. Saka gjeld ulike sider ved kollektivsatsinga fylkeskommunen er i gang med. Første del gjeld kjøp av selskap ved Bystasjonen terminal og planlegging av opprustingsarbeida for kollektivterminalen. Andre del gjeld kjøp av tomt til bussanlegg på Askøy i samband med arbeidet med utlysing av rutepakke 2.3 Askøy. I del tre er det forslag til finansiering av tiltaka. 1. Bystasjonen terminal Bakgrunn Fylkesutvalet gjorde i møte 3. desember 2007, sak 288 Nonneseter/Bystasjonen rapport frå forprosjekt og tilråding om vidare arbeid, slikt vedtak: 1. Fylkesutvalet sluttar seg til forprosjektet om utvikling av terminalområdet på Bystasjonen/Nonneseter. 2. Fylkesutvalet ber om at det snarast vert sett i gang detaljprosjektering av terminalområdet. 3. Fylkesutvalet ber om at det vert lagt fram eiga sak om finansiering av den planlagde ombygginga av terminalområdet. I saka vart det peika på at terminalområdet er over 50 år gammalt og ikkje tilpassa dei krav og forventingar kollektivreisande har i dag. Bystasjonen er det viktigaste knutepunktet for kollektivtransporten i Bergen der buss, jernbane og bybane vil møtast. Med den sentrale rolla Hordaland fylkeskommune har i kollektivtransporten, meiner fylkesrådmannen det er avgjerande å få hand om dette viktige knutepunktet. På denne måten sikrar ein offentleg tilgang til ei viktig brikke i Hordaland fylkeskommune si kollektivsatsing. Kjøp av Bystasjonen terminal A/S Nygårdstangen har i dag festekontrakt for arealet der kollektivterminalen er plassert. Grunneigar er Bergen kommune. Fylkesrådmannen har arbeidd med spørsmålet om å overta A/S Nygårdstangen sin festekontrakt for den delen som vedkjem kollektivterminalen. Arbeidet har teke noko lengre tid enn rekna med. I talen til fylkestinget i oktober nemnde fylkesrådmannen at grunnen til dette i stor grad gjaldt om fylkeskommunen kunne få fritak for festeavgift. Fylkesrådmannen har forhandla fram avtale med Bergen kommune om at fylkeskommunen skal betala festeavgift på 1,7 mill. kr årleg dei tre første åra av kontraktstida. Forslag til avtale med Bergen kommune om festeavtale ligg ved saka. Fylkesrådmannen foreslår å løyva 1,7 mill. kr til festeavgift for 2009 og kjem attende til åra 2010 og 2011 i dei årlege budsjetta. Finansieringa av løyvingane er omtala nedanfor. Overtaking av A/S Nygårdstangen sin del som gjeld kollektivterminal vert foreslått ordna ved å overta eit fisjonert selskap frå A/S Nygårdstangen som fylkeskommunen kjøper. Etter tingingar over noko tid er ein komen fram til ein kjøpesum for det fisjonerte selskapet på 15 mill. kr. Overtakinga er gjennomgått av advoktatfirmaet Deloitte v/advoktat Disch. Brev frå Deloitte AS ligg ved saka. Fylkesrådmannen rår til at aksjeselskapet vert vidareført i fylkeskommunal regi under namnet Bystasjonen AS. Fylkesrådmannen kjem attende til selskapsskipinga med m.a. val av styre i eiga sak. 3
Vidare planarbeid for Bystasjonen terminal Fylkesutvalet har slutta seg til det framlagde forprosjektet for utviklinga av terminalområdet, jf. ovanfor. Fylkesutvalet har prioritert dette planarbeidet på topp ved søknad om midlar frå det statlege Tilgjengelighetsprogrammet dei såkalla BRA-midlane jf. fylkesutvalssak 284/07. Hordaland fylkeskommune har fått tildelt 3,75 mill. kr, og i fylkestingssak 39/08 vart eigendelen på 25% tilsvarande 1,25 mill. kr løyvt. Samla er det dermed 5 mill. kr til disposisjon for planarbeid. Ein legg opp til å vidareføra planarbeidet som er sett i gang, m.a. arbeidet med detaljering av det forprosjektet som ligg ved denne saka. Det er rekna med å nytta 2 mill. kr til dette arbeidet. Ein vil då få oversyn over framdriftsplan og samla budsjett for opprustingsarbeida. Til detaljprosjektering av terminalområdet er det rekna med ein sum på 4 mill. kr i 2009. I detaljprosjekteringa vert m.a. anbodsgrunnlag for oppgraderingsarbeidet utarbeidd. Samla er det dermed trong for 6 mill. kr til plan- og prosjekteringsarbeid i 2009. Fylkesrådmannen foreslår å løyva 1 mill. kr i tillegg til løyvinga som står til disposisjon frå før. Finansieringa er omtala nedanfor. Fylkesrådmannen vil koma attende til saka når detaljprosjekteringa ligg føre. 2. Kjøp av tomteareal til bussanlegg - Askøy Fylkesrådmannen fekk i fylkesutvalssak 289/07 Konkurranseutsetting av bussruteproduksjonen tilgang til bussanlegg, fullmakt til å forhandla om kjøp av bussanlegg eller areal til å etablera slike anlegg. Fylkesrådmannen har vurdert ulike løysingar for området Askøy/Bergen vest som skal på anbod. Vurderingane går i hovudsak på å kjøpa/leiga eksisterande anlegg kontra å kjøpa tomteareal for å opparbeida bussanlegg og oppstillingsplass frå grunnen av. I denne saka går ein inn på løysinga som vert foreslått for rutepakke 2.3 Askøy. Bussanlegg og oppstillingsplassar for dei andre rutepakkane i Bergensområdet kjem fylkesrådmannen attende til. Tomteareal På Askøy har Tide i dag eit bussanlegg på Haugland, ca. 7 km nord for Askøybrua. Eit bussanlegg på Askøy skal og dekka område i Bergen vest. Eit bussanlegg på Haugland vil føra til mykje unødvendig tomkøyring. Det er difor ønskjeleg med eit anlegg nærare Bergen vest. Fylkesrådmannen har for rutepakke 2.3 Askøy festa seg ved eit tomteareal på Byneset ved Skarholmen heilt sør på Askøy og i kort avstand til avkjørsla frå Askøybrua. Fylkeskommunen har fått tilbod om å kjøpa eit tomteareal i dette området på om lag 30 dekar som kan nyttast til bussanlegg. Fylkesrådmannen vurderer lokaliseringa og tomta som veleigna. Området har tidlegare vore nytta til landbruk, men ligg i dag brakk. På delar av tomta er det fylt ut med massar i samband med bygginga av Askøybrua. Det blir vurdert som uproblematisk å få området planavklart til bruk som bussanlegg. Det aktuelle området er som nemnt på om lag 30 dekar og er delt i tre av kommunale vegar. Den delen som grensar til sjø er ikkje aktuell å ta i bruk til bussanlegg, men ut frå ei totalvurdering vil ein foreslå å ta med også denne delen då tilleggskostnaden er marginal. Dei to andre områda kan nyttast til bussanlegg. På det minste området på ca. 5 dekar er det plass til parkeringsareal for sjåførar og andre tilsette. Det største arealet på ca. 20 dekar vil gje oppstillingsplass for ca. 80 bussar med plass til tilhøyrande lokale for vask, service med meir. 4
Kjøpsavtale I vedlagte intensjonsavtale for kjøp av området er prisen avtalt til 16 mill. kr. I tillegg kjem dokumentavgift, andre kostander ved kjøpet og utgifter til planavklaring på opp mot 1 mill. kr. Fylkesrådmannen foreslår dermed ei løyving på 17 mill. kr. Ved utlysing av rutepakken vil tilbydarane vera pliktige til å nytta anlegget som vert stilt til rådvelde, og fylkeskommunen sine kapitalkostnader som følgje av kjøpet vil verta dekka gjennom anbodsutsetjing. Vidare arbeid Tomtearealet må planerast og det må førast fram vatn og kloakk til området. I tillegg må det setjast opp m.a. vaskeanlegg og andre turvande bygg. Fylkesrådmannen har enno ikkje oversyn over kostnadene med dette, men vil koma attende med kostnadsoverslag i eiga sak med sikte på å kunna starta byggearbeida i 2009 om fylkstinget sluttar seg til kjøpet av tomtearealet. 3. Finansiering Fylkesrådmannen foreslår følgjande løyvingar i saka: Kjøp av aksjeselskap del av A/S Nygårdstangen Kjøp av tomteareal Askøy Festeavgift til Bergen kommune for 2009 Restsum for vidareføring av planarbeid Sum 15,0 mill. kr 17,0 mill. kr 1,7 mill. kr 1,0 mill. kr 34,7 mill. kr Aksjekjøp kan ikkje finansierast med lånemidlar og fylkesrådmannen foreslår difor å nytta midlar frå kapitalfondet for å finansiera aksjekjøpet. I budsjettet for 2008 er det sett av 180 mill. kr til bygging av Nordahl Grieg videregående skole. Det viser seg at forbruket ikkje vert så høgt, og fylkesrådmannen foreslår difor å omdisponera 17 mill. kr innanfor investeringsbudsjettet frå bygginga av Nordahl Grieg videregående til kjøp av tomteareal til bussanlegg på Askøy. Fylkerådmannen vil koma attende til løyvinga til Nordahl Grieg videregående skole. Dei to andre postane på til saman 2,7 mill. kr vert foreslått finansiert ved sparde leigekostnader etter kjøp av del av A/S Nygårdstangen. Innsparinga kjem som følgje av at Hordaland kollektivservice AS i dag har leigeavtalar med A/S Nygårdstangen med ein årleg kostnad på om lag 3 mill. kr. Denne kostnaden vil falla bort når fylkeskommunen kjøper del av A/S Nygårdstangen. Fylksrådmannen vil elles visa til fylkesutvalssak 244/08 der det er vedteke å omdefinera Hordaland kollektivservice AS til å stå for infrastrukturdelen av bybanedrifta. Fylkesrådmannen vil koma attende til andre budsjettmessige konsekvensar av omdefineringa i eiga sak. Oppsummert vert det foreslått slik finansiering: Bruk av kapitalfond Ompostering på investeringsbudsjettet Sparde leigekostnader Hordaland kollektivservice Sum 15,0 mill. kr 17,0 mill. kr 2,7 mill. kr 34,7 mill.kr 5