SAMLA SAKSFRAMSTILLING

Side 1 SAMLA SAKSFRAMSTILLING Arkivsak: 10/1750-21206/13 Saksbeh.: Arkivkode: Saksnr.: Utval Møtedato 96/13 Formannskap/ plan og økonomi 07.11.2013 86/13 Kommunestyret 28.11.2013 Kjersti Næss Finne PLAN soneinndeling SAMLA SAK - OMRÅDEREGULERINGSPLAN FOR VOSS NÆRINGSPARK, ISTAD, PLANID 2010014 - GODKJENNING AV PLAN Administrasjonen si innstilling: I medhald av plan- og bygningslova 12-12 godkjenner Kommunestyret områdereguleringsplan Voss Næringspark, Istad, planid 2010014, slik det går fram av plankart sist revidert 30.10.13, føresegner og planomtale sist revidert 1.11.13. Formannskap/ plan og økonomi den 07.11.2013 sak 96/13 Behandling i møte: Administrasjonen delte ut notat med e-post frå Statens vegvesen. Notatet inneheldt nytt pkt. 2 i administrasjonen sin innstilling til vedtak : 2. Det skal tilføyast ei ny setning i pkt 2.11 i føresegnene: Dette gjeld ikkje krav i føresegnene sitt punkt 2.10.5 om etablering av kryss mellom Rv 13 og Dalsmoen. Røysting: Administrasjonen si innstilling vart samrøystes tilrådd. Saksordførar: Arne Mosefinn Tilråding 1. I medhald av plan- og bygningslova 12-12 godkjenner Kommunestyret områdereguleringsplan Voss Næringspark, Istad, planid 2010014, slik det går fram av plankart sist revidert 30.10.13, føresegner og planomtale sist revidert 1.11.13. 2. Det skal tilføyast ei ny setning i pkt. 2.11 i føresegnene: Dette gjeld ikkje krav i føresegnene sitt punkt 2.10.5 om etablering av kryss mellom RV 13 og Dalsmoen.

Side 2 Kommunestyret den 28.11.2013 sak 86/13 Behandling i møte: Røysting: Tilrådinga frå utval for formannskap/plan og økonomi vart samrøystes vedteken. Vedtak: 1. I medhald av plan- og bygningslova 12-12 godkjenner Kommunestyret områdereguleringsplan Voss Næringspark, Istad, planid 2010014, slik det går fram av plankart sist revidert 30.10.13, føresegner og planomtale sist revidert 1.11.13. 2. Det skal tilføyast ei ny setning i pkt. 2.11 i føresegnene: Dette gjeld ikkje krav i føresegnene sitt punkt 2.10.5 om etablering av kryss mellom RV 13 og Dalsmoen. Administrasjonen si utgreiing: 2. DOKUMENT SOM BAKGRUNN FOR SAKA: Dokument merka med * er vedlegg i saka. *30.10.2013 Planomtale m/føresegner og plankart, Voss kommune *Innspel : Fylkesmannen i Hordaland. 12.08.13. Hordaland fylkeskommune. 12.08.13. NVE. 15.07.13. Stadnamntenesta på Vestlandet. 15.08.13. Statens vegvesen, 27.07.13. Christer Kvelvane. 07.18.13 Inger Stalheim 13.08.13. Kjartan Bergsvåg. 13.08.13 Møen & Saue. 23.08.13 Oddrun Bryn. 29.06.13. Birger Flatlandsmo. 05.07.13. Spilde Entreprenør As. 19.08.13 Vedlegg til saka ligg på Voss kommune si heimeside under kunngjeringar; http://www.voss.kommune.no/artikkel.aspx?mid1=405&aid=76 Har de problem med å opne dokument på heimesida, ta kontakt med planavdelinga på tlf 56519626, eller send e-post til zehra.causevic@voss.kommune.no 3. SAMANDRAG AV SAKA: Områdereguleringsplan for Voss Næringspark, Istad, planid 2010014, har vore ute til offentleg ettersyn. Det har kome inn 12 merknader til planforslaget, 5 av desse er frå offentlege instansar. Statens vegvesen fremja motsegn på grunn av for liten byggeavstand mot rv 13 og manglande rekkefølgjekrav for utbygging av nytt kryss mot rv 13. Etter ein dialog om ulike alternativ har ein kome fram til ei løysing som Statens vegvesen har akseptert. Grunnlaget for eigengodkjenning av planen er difor til stades. Voss kommune står som tiltakshavar og fremjer planforslaget. Føremålet med planarbeidet er å tilrettelegge Istadmyrane som eit attraktivt industriområde tilpassa dagens krav til standard og trong for fleksibilitet, og ein skal etablera eit betre grunnlag for opparbeiding av ein tenleg teknisk infrastruktur.

Side 3 Planen vert no fremja for 2. gangs behandling og godkjenning. I tillegg til endringar av planforslaget i tråd med innspel frå Statens vegvesen, er det gjort nokre justeringar og tilpassingar av planen på bakgrunn av andre innspel. Administrasjonen rår til at revidert framlegg for områdereguleringsplan for Voss Næringspark, Istad, vert godkjent. 4. FAKTA OM SAKA: Voss kommune står som tiltakshavar for den nye områdereguleringsplan for Voss Næringspark, og har gjennomført planarbeidet i eigen regi. Ei prosjektgruppe samansett av Plan og Bygg & Eigedom har hatt ansvaret for å utarbeide planen. Planprosess: 20.01.2011 vart det vedtatt oppstart av planarbeidet. Oppstart av planarbeid vart varsla i brev og gjennom lysing i Hordaland i januar 2011. Det kom inn 10 merknader ved oppstart. I tillegg har to innspel kome til undervegs i planarbeidet. 17.02.2011 vart det gjennomført eit offentleg møte. Det vart valt kontaktpersonar frå dei næringsdrivande til ei ressursgruppe. FPL hadde synfaring den 26.05.2011. Det er gjennomført 2 møter i ressursgruppa, den 17.06.2011 og den 28.09.2011. I februar 2012 vart det gjennomført kontordagar med partar. NTA hadde synfaring den 20.03.2012 28.06.2012 vart det lagt fram statusrapport for FPL. Det vart gjort vedtak om å utvide planområdet. I august 2012 vart det sendt ut ei varsling om utvida planområde. Det kom inn 5 merknader. FPL vedtok å legge planen ut til offentleg ettersyn den 6. juni, og planen var ute til høyring frå 15.06.2013 til 20.08.2013. 14.08.2013 vart det gjennomført eit ope møte om planforslaget. Det kom tilsaman 12 innspel til planforslaget etter offentleg ettersyn, mellom anna motsegn frå Statens vegvesen. Motsegn vart trekt etter møte mellom Statens vegvesen og Voss kommune 1.11.13. Føremål med planarbeidet Det er etterspurnad etter industritomter for tyngre plasskrevjande verksemder i kommunen og i regionen. Berre deler av næringsområdet på Istadmyrane er tilrettelagt med veg, vatn og avlaup. Mål med planarbeidet er difor å omarbeida gjeldande reguleringsplan, der ein ynskjer å: Tilretteleggja Istadmyrane som eit attraktivt industriområde tilpassa dagens krav til standard og trong for fleksibilitet. Etablera eit betre grunnlag for opparbeiding av ein tenleg teknisk infrastruktur. Planområdet og eigedomstilhøve Voss kommune eig eller har gjort avtale med grunneigar om overtaking for det aller meste av det ubebygde arealet innafor planområdet. Mesteparten av arealet nærast riksvegen er kjøpt opp/tatt i bruk av ulike næringsverksemder.

Side 4 Overordna plan Planområdet er avsett i kommuneplanen, og er i hovudsak samanfallande med reguleringsplan vedtatt i 1986, planid 88012. I kommuneplanen sin samfunnsdel er det fleire plasser Kommuneplan undestreka at arbeidet med å tilrettelegge Istadmyrane for ny næringsverksemd, 2011-2022 særskild arealkrevjande verksemder og industri, skal prioriterast. Innhald i planen Planområdet består av ca 640 dekar utbyggingsføremål, samt veg og infrastruktur. Det er etablert ein del verksemder på arealet nærast rv 13. Planen er regulert til 2 delområde med næringsføremål, 8 delområde med forretning/kontor/industri og 1 delområde med næring/forretning/tenesteyting. I tillegg er det 5 mindre område med 6 eksisterande bustadeigedomar. Det er også sett av område til vatn- og avlaupsanlegg og telekommunikasjon, i tillegg til vegføremål. Planen har omsynssoner for frisikt, for høgspentraseen, for bevaring av kulturmiljø og for friluftsliv. Det er i føresegnene sett krav til dokumentasjon som til dømes utomhusplan som skal vise plassering av bygningane, avkøyring, parkering, koter på terreng og på tilgrensande areal, vegetasjonsbelte/tilplanting, lyssetjing, skilting og avfallshandtering. I planen er det sett krav om at alle tomtene skal etablere eit 2 meter breidt vegetasjonsbelte mellom veg og utnytta areal. Ein skal nytte stadeigen vegetasjon eller planter frå ein eigen plantemeny som ligg vedlagt planen. Det også sett krav til dokumentasjon av farge- og materialval, plan, snitt og fasadar, illustrasjonsmateriell, planteval, hantering av overvatn/avrenning og energiløysingar. For næringsbygg med BRA over 500 m² skal det utarbeidast ei energiutgreiing. Desse områda skal i hovudprinsippet ha oppvarming basert på vassbåren varme. Det er opna for bygging av varmeanlegg og kommunaltekniske anlegg innafor alle byggeområda. Rekkefølgjekrav og utbyggingsavtale I rekkefølgjekrav i føresegnene, jf pkt 2.10 er det prioritert ei rekkefølgje på utbygging av vegar og anna naudsynt infrastruktur. Vegane med nr 1 til 3 skal byggjast ut først, etter dette kjem veg 4, veg 6 og veg 5. Det er vidare krav om at vegetasjonsbelte/allè, avkøyringar og lyssetting skal vere på plass før utskriving av ferdigattest. Etter offentleg ettersyn er det tatt med eit nytt rekkefølgjekrav om opparbeiding av nytt kryss mot rv 13: Kryss mellom Rv 13 og Dalsmoen skal opparbeidast i samsvar med reguleringsplan. Statens vegvesen skal godkjenne byggeplanen. Rekkefølgjekravet slår inn ved søknad om rammeløyve, når brutto tomteareal tatt i bruk, av delområde 5, 6, 9 og 11 overstiger 50 %. Ved utbygging av 30 % brutto tomteareal av delområde 5, 6, 9 og 11, skal det gjennomførast ei analyse på trafikktryggleik knytt til begge avkøyringane frå Rv 13, for å vurdere behov for tiltak i forkant av etablering av nytt kryss. Dette skal gjerast i nært samarbeid med Statens vegvesen.

Side 5 Ein føreset at det vert inngått avtale, eventuelt utbyggingsavtale, med dei einskilde utbyggjarane, som sikrar ei opparbeiding av næringstomter og naudsynt infrastruktur. Utgreiingar og ROS-analyse Det er gjennomført ei kulturminneundersøking, ei kartlegging av grunnforhold for delar av planområdet, og ein har undersøkt informasjon i naturbasen. Det er ikkje avdekka særskilde konflikter knytt til naturmangfald eller kulturminne. Det er lagt inn ei 40 meter brei omsynssone for bevaring av kulturmiljø langs dei gamle vassfylte gruvane etter skiferbrota, for å ivareta dette elementet i landskapet. Det er gjennomført ei risiko- og sårbarheitsanalyse for planområdet. Det er ikkje avdekka særskild risiko ved gjennomføring av planen. Ein vurderer at trafikktryggleiken vert betra ved gjennomføring av planen på grunn av utbetring av nytt kryss mot rv 13, og etablering av fortau og gateljos langs hovudvegane inne i næringsområdet. Moglege konsekvensar knytt til støy, forureining og liknande skal dokumenterast og handterast i samband med dei einskilde byggesakene. 5. ADMINISTRASJONEN SI VURDERING: Det har kome 12 merknadar til planen i samband med offentleg ettersyn. Alle innspel ligg som vedlegg til planen, samtidig som dei er oppsummert og kommentert i kapittel 8 i planomtalen. Det viktigaste innhaldet er referert og kommentert under. Fylkesmannen i Hordaland. E-post 12.08.13. Fylkesmannen viser til at planen er i samsvar med kommuneplanen, og at den verkar tilpassa utfordringane i området. Ingen kommentar. Hordaland fylkeskommune. Brev datert 12.08.13. Har merknader til planforslaget når det gjeld arealbruk, estetikk, landskap, friluftsliv og folkehelse. Dei meiner samlokalisering med bustader er uheldig, og saknar dokumentasjon på konsekvensar for landskap og friluftsliv. Dei meiner og at føresegnene bør sikre tilrettelegging for sykkelparkering. Bustadene innafor planområdet var etablert før området vart regulert første gang i 1986, og samlokaliseringa er difor ikkje ein ny situasjon. Huseigarane ynskjer å vidareføre eigedomane som bustader, og kommunen ynskjer ikkje å gå til innløysing av eigedomane. Eigedomane vert difor vidareført med bustadføremål. Eventuelle ulemper knytt til etablering av nye verksemder, skal handterast i samband med byggesøknad for kvar einskild tomt, jf punkt 2.9 i føresegnene. Det er etterspurt dokumentasjon av konsekvensar av planforslaget, både når det gjeld landskapseffektar og friluftsliv. Administrasjonen meiner at arealbruken her har vore avklart i

Side 6 lang tid, og planen opnar difor ikkje for ny arealbruk i området. Eit viktig føremål med planarbeidet er å styrke dei visuelle kvalitetane og konsekvensane av planforslaget med tanke på nær- og fjernverknad vil vere positiv. Det er krav til visualisering av nye byggetiltak, jf pkt 2.9.1 i føresegnene. Når det gjeld friluftsliv og tilkomstmoglegheiter for områda rundt meiner ein at planen også på dette punktet vil betre situasjonen med tanke på ferdsle gjennom planområdet, pga fortau og gang/sykkelveg langs dei fleste vegane. Det er i tillegg lagt inn ei omsynssone friluftsliv mellom Veg 2 og pumpestasjon, KA2 for å sikre tilkomst til opparbeidd tursti inn mot badeplass i Moensvatnet. Ut i frå ei samla vurdering meiner administrasjonen at planen ivaretek både landskapsomsyn og omsyn til friluftsliv på ein tilfredsstillande måte. Når det gjeld sykkelparkering, må dette vurderast i samband med søknad om tiltak, og sykkelparkering er tatt med saman med parkering jf pkt 2.9.1 i føresegnene. NVE. Brev datert 15.07.13. NVE har ingen merknader til planframlegget. Ingen kommentar. Stadnamntenesta på Vestlandet. Brev datert 15.08.13. Tilrår namnet Skyttarvegen som offisiell vegnamnform. Ingen kommentar. Statens vegvesen. Brev datert 27.07.13. Dersom det ikkje vert sett rekkefølgjekrav til utbetring av det sørlege krysset i planområdet; mellom rv 13 og Dalsmoen, varsler dei motsegn til planen. Dei har og sett krav om byggegrense på 50 meter, og sikringssone på 15 meter frå midtlinje riksveg. Også dette kravet er fremja som motsegn. Viser og til at planen omtaler riksveg som fylkesveg, og at det står at avkøyringane er retningsgjevande, -noko som ikkje er tilfelle for tilkomst frå Rv 13. Dei krev at dette vert retta opp. Når det gjeld byggegrense mot riksveg, har ein blitt einig med Statens vegvesen om at kan vidareføre byggegrense frå tidlegare reguleringsplan på 30 meter. Det er sagt i føresegnene at det skal vere ei sikringssone på 15 meter, men det er opna for at Statens vegvesen kan godkjenne mindre avstand dersom dette ikkje kjem i konflikt med sikringssone eller siktlinje. Det har vore ein dialog mellom Voss kommune og Statens vegvesen vedkomande rekkefølgjekrav og innslagspunkt, og ein har blitt einig om følgjande: 2.10.5 Kryss mellom Rv 13 og Dalsmoen skal opparbeidast i samsvar med reguleringsplan. Statens vegvesen skal godkjenne byggeplanen. Rekkefølgjekravet slår inn ved søknad om rammeløyve, når brutto tomteareal tatt i bruk, av delområde 5, 6, 9 og 11 overstiger 50 %.

Side 7 Ved utbygging av 30 % brutto tomteareal av delområde 5, 6, 9 og 11, skal det gjennomførast ei analyse på trafikktryggleik knytt til begge avkøyringane frå Rv 13, for å vurdere behov for tiltak i forkant av etablering av nytt kryss. Dette skal gjerast i nært samarbeid med Statens vegvesen. Innspel om riksveg og avkøyringar er retta opp og presisert i tråd med Statens vegvesen sitt krav. Christer Kvelvane. Brev datert 07.18.13 Mange gode tiltak for næringsliv og bebuarar i området, men ber likevel om at delfelt E1 og E2 (felt 7 og delar av felt 8 i plankartet) på kartskisse -illustrasjonsplan, vedlegg 3, vert revurdert med tanke på bustadføremål. Området er ein utstikker frå resten av industriområdet og ligg nær skule og barnehage. Det er etterspurnad etter bustader, og området vert i stor grad nytta til skiløyper og hundetrening. Innspelet vart også fremja ved oppstart, og vurdert, -men ikkje tilrådd, i samband med utlegging til offentleg ettersyn. I kommuneplanen er området omtalt som eit viktig og prioritert næringsområde for kommunen, og området har vore avsett til næringsføremål i lang tid. Ein konsekvens vil sjølvsagt vere at vil bebuarane rundt miste tilgangen på å bruke dette arealet til ulike friluftsføremål når utbygginga av området starter. Men, det vil framleis vere tilgang på turterreng i områda rundt. Inger Stalheim. Brev datert 13.08.13. Ynskjer at del av eigedomen som grensar mot gnr 173, bnr 27 vert halde utanfor reguleringsplanen, og lagt til naboeigedom som bustadareal. Viser til vedlagt målebrevkart, og at overføring av dette arealet hadde vore ein avtale mellom tidlegare eigarar. Eigar av gnr 173, bnr 12 ynskjer å overføre ca 3-400 kvm av eigedomen som tilleggsareal til gnr 173, bnr 27. Samtidig vil avstanden mellom næringsområdet og bustadhuset auke frå ca 6 til 20 meter. Administrasjonen har ingen innvendingar mot dette og har endra planen i tråd med innspelet. Kjartan Bergsvåg. Brev datert 13.08.13 Eig ca 9,5 daa som grenser inn til næringsparken. Ynskjer å få dette regulert til næringsføremål. Har tidlegare hatt kontakt med kommunen om dette, men meiner saka må ha stoppa ein plass. Viser og til at det kan vere interessant å ta imot jordmassar på garden han eig berre nokre hundre meter unna. Bergsvåg kom med dette innspelet i samband med oppstart. Det vart då sagt at sidan området ligg som LNF-område i kommuneplanen, bør spørsmålet om ny arealbruk takast opp ved neste rullering. Ein har hatt kontakt med Bergsvåg og informert om pågåande kommuneplanprosess.

Side 8 Når det gjeld jordmassar, må dette vurderast i samband med vidare utvikling av området. Møen & Saue. Brev datert 23.08.13 Har sendt over informasjon om planlagt utbygging for eigedomane sine, gnr 173, bnr 71 og 172, gnr 47. Det er viktig at desse planane ikkje kjem i konflikt med nye krav i områdeplanen. Så langt ein kan sjå ut i frå dei vedlagte skissene vil den planlagte bygningen ikkje kome i konflikt med områdeplanen med tanke på byggegrense, % BYA, byggehøgde og omsynssone høgspentlinje. Dei har og planlagt ein grøn sone i form av ein jordvoll med beplantning i tråd med føresegner i ny plan. I samband med byggesøknaden vil det vere krav til ytterlegare dokumentasjon av prosjektet, jf pkt 2.9 i føresegnene, og søknaden må då vurderast på vanleg måte. Oddrun Bryn. Brev datert 29.06.13. Ynskjer at den private vegen inn til hennar eigedom vert kortare enn det som er vist på plankartet, pga utfordringar med vedlikehald på vegen. Det er gjort ei ny vurdering av avkøyringa for den aktuelle vegen (Felles privat veg 1). Ein har funne det mogleg å korte vegen med ca 70-80 meter, og planen er difor endra. Det vart nyleg starta ein oppmålingsforretning på eigedomen til Bryn, gnr 173, bnr 8, i samband med sal av parsell til kommunen. Det vart avdekka at del av eigedomen som framleis skulle tilhøyre Bryn, ca 4 daa inn mot hennar tun, framleis låg inne i planen. Arealet skulle ligge igjen på hovudbruket som ein del av avtalen med kommunen, og ved ein feil vart området ikkje tatt ut av planen før offentleg ettersyn. Dette er no retta opp. Birger Flatlandsmo. E-post 05.07.13. Viser til at gnr 173, bnr 11 eig ein liten del av eit areal i område A02c. Viser til feil i kartet, og at det nyaste bustadhuset på gnr 173, bnr 11 ikkje er med. Etter planen vil også vegen kome ein meter frå husveggen. I innspelet vert det vist til ein kartskisse som låg vedlagt ein søknad om frådeling. Generelt er det slik at eigedomsgrenser må avklarast i eigne oppmålingsforretningar viss det er uklarheit om desse. Når det gjeld vegen forbi eigedom 173/16 (ikkje 15), vil den i den nye planen kome 11-12 meter unna næraste bygning, medan den i dag ser ut til å ligge i overkant av 1 meter unna. Situasjonen vil difor bli betre ved realisering av den nye områdeplanen. Spilde Entreprenør As. Brev datert 19.08.13 Viser til tidlegare innspel, datert 26.03.12. Meiner ikkje deira synspunkt er tatt omsyn til i planforslaget, og ynskjer difor å utdjupe desse. Viser til historikken for sin eigedom og utviklinga i feltet, og stiller spørsmål ved at heile området no vert omregulert frå industri til næring. Dette meiner dei er ulogisk med tanke på kva verksemder som er etablert i området i dag. Dersom omreguleringa vert gjennomført, vil deira firma ikkje kunne bygge eller nytta eigedomen til det føremålet som dei kjøpte eigedomen til. Dei ber difor om at området ikkje vert omregulert frå industri til næring.

Side 9 Det vart gjennomførte eit møte med Spilde den 3. september, for å oppklare eventuelle mistydingar. Det aktuelle området vil framleis vere regulert til industri, i tillegg til forretning og kontor, og Spilde vil fortsatt kunne drive si verksemd på eigedomen og utvikle den vidare. Dei var likevel bekymra for at nye krav til utforming og begrensingar på moglegheiter for utelagring m.m. kunne gjere det vanskeleg for dei å halde fram verksemda si på Istadmyrane. Administrasjonen ser at det kan bli ei utfordring for nokre av dei eksisterande verksemdene å tilpasse seg nye krav i t.d. delområde 2, som har dei strengaste krava til utforming og lagring. Ein har vore tydelege på at ingen skal vere nødt til å flytte på grunn av den nye planen, men at ein ynskjer å kanalisere nye verksemder til dei områda som er best tilpassa aktiviteten. Administrasjonen har difor foreslått ei ny setning under pkt 2.11 om avvik frå reguleringsplanen; 2.11 Avvik frå reguleringsplanen Kommunen kan godkjenna mindre vesentleg avvik frå planen og føresegnene. For verksemder som var etablert før planen vart godkjent, kan kommunen gjere unntak frå krav sett i føresegnene. Dette er tatt med for å sikre at ein skal kunne vurdere krava særskild for dei som allereie er etablert i området. Vidareutvikling av området og prioritering av vegar Rekkefølgje på utbygging av vegar, og vidare utvikling av Næringsparken på Istad, er tema som har vore drøfta undervegs. Det har ikkje kome konkrete innspel på prioriteringa av vegane som er skissert i planen. Veg 4 er den viktigaste vegen for busetnaden i området. Veg 1 til 3 som i planføresegnene er prioritert først, er kanskje viktigast for næringslivet. Dette er vegar som delvis er opparbeidde i dag, men som ikkje er tilfredsstillande med tanke på standard og utforming. Ved sluttføring av veg 3 vil den også utløyse nye store næringsareal. For å sikre opparbeiding av nye næringsareal, og samtidig ein best mogleg økonomi i utvikling av området, meiner administrasjonen at det vil vere rett å halde på prioriteringa som er sett opp, jf pkt 2.10.1 i føresegnene. Dette vil sei ei rekkefølgje på veg 1-3 først, så veg 4, 6 og 5. Når det gjeld organisering av den vidare utviklinga i området, vil dette verte fremja som ei eiga sak. Oppsummering og konklusjon Det er gjort følgjande endringar av planframlegget etter offentleg ettersyn: - Det er lagt inn ei omsynssone friluftsliv i plankartet mellom veg 2 og KA_2 for å sikre tilkomst til badeplass ved/moensvatnet, samt tilhøyrande føresegner jf pkt 5.4 i føresegnene. - Det er presisert i føresegner at det er riksveg som grenser til næringsområdet jf pkt 2.1.2, og at det er avkøyringspilane jf pkt. 4.4.3. - Det er presisert ein byggegrense på 30 meter og sikringssone på 15 meter mot midtlinje riksveg 13, jf pkt 2.1.2 i føresegnene. - Det er tatt med eit nytt punkt om rekkefølgjekrav på opparbeiding av kryss Dalsmoen Rv 13, jf pkt 2.10.5 i føresegnene. - Ein mindre del av eigedom gnr 173, bnr 12 er tatt ut av planen i tråd med ynskje frå grunneigar.

Side 10 - Tilkoplingspunkt mellom Felles privat veg 1 og Veg 3 er lagt litt om i tråd med ynskje frå brukar av vegen. - Ein mindre del av gnr 173, bnr 8, er tatt ut av planen i tråd med avtale mellom grunneigar og Voss kommune. - I føresegnene er det satt inn ein ny setning i pkt 2.11: For verksemder som var etablert før planen vart godkjent, kan kommunen gjere unntak frå krav sett i føresegnene. - Sykkelparkering skal saman med parkering visast på situasjonsplan ved søknad om rammeløyve, jf pkt 2.9.1 i føresegnene. - Planomtalen er i tillegg oppdatert i tråd med endringane. Planen for Voss Næringspark legg opp til ei differensiert forvaltning av området på bakgrunn av avstand frå riksvegen og omsyn til omgjevnadene. Det vert lagt til rette for den «tyngste» aktiviteten og minst krav til skjerming og utforming lengst inn i området. Målet er få tilgang på nytt tilrettelagt næringsareal, og at heile området skal få gode kvalitetar og betre struktur gjennom oppfølging av planen. Omsynet til barn, unge, behov for trygg skuleveg og tilkomst til naturområda rundt, er ivaretatt gjennom etablering av gang- og sykkelveg og fortau, og ved lyssetting av hovudvegane. I tillegg er det lagt inn ei omsynssone friluftsliv for å sikre tilkomst til badeplass ved Moensvatnet. Restane etter gamal gruvedrift skal takast vare på gjennom ei eigen omsynssone. Administrasjonen tilrår at områdereguleringsplanen med plandokument sist revidert 30.10.13 vert godkjent.