OSTERØY KOMMUNE SAKSPAPIR Styre, komite, utval Møtedato Saksnr Sbh Osterøy heradsstyre 31.05.2006 029/06 ARA Formannskapet 06.12.2006 243/06 ARA Osterøy heradsstyre 31.01.2007 001/07 ARA Osterøy heradsstyre 20.06.2007 029/07 ARA Formannskapet 05.12.2007 194/07 HADY Formannskapet 29.10.2008 133/08 HADY Formannskapet 26.11.2008 142/08 HADY Osterøy heradsstyre 10.12.2008 101/08 HADY Osterøy heradsstyre 01.04.2009 020/09 HADY Formannskapet 09.09.2009 151/09 HADY Formannskapet 09.06.2010 074/10 MBNH Formannskapet 25.08.2010 114/10 MBNH Formannskapet 17.11.2010 159/10 MBNH Formannskapet 02.02.2011 013/11 MBNH Osterøy heradsstyre 16.02.2011 003/11 MBNH Saksansvarleg May Britt Nesje Hernes Arkiv: N-101.3 Objekt: Sak ID 06/747 KOMMUNEPLANEN SIN AREALDEL 2011-2022- 2.GONGS HANDSAMING OG ENDELEG VEDTAK RÅDMANNEN SITT FRAMLEGG TIL VEDTAK Formannskapet har handsama framlegg til kommuneplanen sin arealdel 2011-2023, ei rullering av tema bustad, fritidsbustad og næring. Planen består av Planskildring med konsekvensutgreiing og ROS-analyse revidert 25.01.11, Plankart, revidert 24.01.11, Føresegn, revidert 25.01.11 Formannskapet rår Heradsstyret til å gjera slikt vedtak: I medhald av plan og bygningslova 11-15 vert kommuneplanen sin arealdel 2011-2023, ei rullering av tema bustad, fritidsbustad og næring vedteken slik han ligg føre. Planen består av Planskildring med konsekvensutgreiing og ROS-analyse, revidert 25.01.11, Plankart, revidert 24.01.11 og Føresegn, revidert 25.01.11. 02.02.2011 FS-013/11 UTVALET SI HANDSAMING: Seksjonsleiar plan var til stades i møtet under utvalet si handsaming. Ragnar J. Tyssebotn, FRP, og Arne Dag Kleiveland, FRP, tok opp spørsmålet om inhabilitet for sitt vedkomande.
Rådmannen viste til at saka gjeld handsaming av arealdelen samla og inhabilitet oppstår då normalt ikkje. Ved handsaming av enkeltområde i planen kan inhabilitet oppstå. Rådmannen opplyste før utvalet si handsaming at motsegn frå Noregs vassdrags- og energidirektorat er trekt (pr. telefon 02.02.11), og at endeleg vedtak om kommuneplanen difor kan gjerast. Seksjonsleiar orienterte kort om endringar/justeringar i planen som følgje av prosessvedtak, innkomne motsegner og merknader. Framlegg til grenser for områdeplan Valestrand sentrum vart vist på kartet. Det same vart næringsområde i Mjøsdalen (N1 og N2). ---------------------------------- AVRØYSTING Rådmannen sitt framlegg vart vedteke med 5 røyster (2AP,1uavh.,1KRF,1SP) mot 2 røyster (2FRP) ------------------------------------ Formannskapet har etter dette gitt slik tilråding til vedtak i heradsstyret: I medhald av plan og bygningslova 11-15 vert kommuneplanen sin arealdel 2011-2023, ei rullering av tema bustad, fritidsbustad og næring vedteken slik han ligg føre. Planen består av Planskildring med konsekvensutgreiing og ROS-analyse, revidert 25.01.11, Plankart, revidert 24.01.11 og Føresegn, revidert 25.01.11. 16.02.2011 HS-003/11 UTVALET SI HANDSAMING: Rådmannen orienterte kort om planprosessen, utfordringar undervegs, plantema og vurderingar ein har gjort i høve til desse, politiske vedtak, dialog med andre mynde og innkomne merknader og innspel etter offentleg høyring. Rådmannen viste og til lovkrav om utarbeiding av planstrategi i neste valperiode, der også ei ny rullering av kommuneplanen må vurderast. ----------------------------------- Ove Håland, FRP, gjorde slikt framlegg om endring i føresegnene, pkt. 6.2 Setning som utgår: Bandlegging gjeld maksimum 2 år frå vedtatt kommuneplan. Setning som erstattar den utgåtte: Bandlegging gjeld maksimum 1 år frå vedtatt kommuneplan. Framlegget vart ikkje røysta over, jfr. endringsframlegg frå ordføraren. Ragnar J. Tyssebotn, FRP, gjorde slikt framlegg: Kommuneplanen vert i sin heilskap sendt attende til planutvalet, slik at alle innspela vert behandla på ein seriøs og rettvis måte for innbyggjarane i Osterøy. AVRØYSTING utsetjingsframlegg
R. J. Tyssebotn sitt framlegg fall med 20 røyster (8AP,4H,2SP,2KRF,1V,3uavh.) mot 6 røyster (6 FRP) Ordføraren gjorde slikt framlegg: Føresegnene i pkt. 6.2 vert endra slik:. Bandlegging gjeld maksimum 1,5 år frå vedteken kommuneplan. AVRØYSTING Formannskapet sitt framlegg med slik endring som foreslått av ordføraren vart vedteke med 21 røyster (8AP,4H,2SP,2KRF,1V,3uavh.,1FRP) mot 5 røyster (5FRP). ------------------------------------------- Heradsstyret har etter dette gjort slikt vedtak: I medhald av plan og bygningslova 11-15 vert kommuneplanen sin arealdel 2011-2023, ei rullering av tema bustad, fritidsbustad og næring vedteken slik han ligg føre. Planen består av Planskildring med konsekvensutgreiing og ROS-analyse, revidert 25.01.11, Plankart, revidert 24.01.11 og Føresegn, revidert 25.01.11, og med slik endring i pkt. 6.2.: Bandlegging gjeld maksimum 1,5 år frå vedteken kommuneplan. ------------------------------------------- Ragnar J. Tyssebotn, FRP, gjorde slikt framlegg: Saka vert anka til Fylkesmannen av di lova og sakshandsamingsreglane er ikkje fylgde. På spørsmål fekk rådmannen stadfesta at framlegget inneber krav om lovlegkontroll av vedtaket i saka. Sak om lovlegkontroll vil difor verta lagt fram i neste møte. ------------------------------------------ SAMANDRAG Planforslag til kommuneplanen sin arealdel med tema bustad, fritidsbustad og næring har vore ute på høyring og til offentleg ettersyn. Det kom inn over 100 merknader. Merknadane med kommentar til korleis dei er vurderte ligg ved. Det vart fremja 4 motsegner frå Hordaland fylkeskommune, 1 frå Fylkesmannen i Hordaland og 1 frå Noregs vassdrags- og energidirektorat. Etter arbeidsmøte, prosessvedtak i formannskapet samt dialog med regionale og statlege organ har rådmannen arbeidd fram eit planforslag til 2. gongs handsaming. Planforslaget som no ligg til handsaming har teke motsegnene frå Fylkeskommunen og Fylkesmannen til fylgje. Det manglar avklaringar frå sentralt hald vedrørande motsegn frå NVE. Endeleg løysing vert lagt fram for Formannskapet i møtet. Det kan ikkje fattast endeleg vedtak før motsegn er trekt. Kommuneplanen skal vedtakast av heradsstyret sjølv i medhald av plan og bygningslova 11-15. Vedtaket kan ikkje påklagast. I sakspapiret til 1.gongs handsaming vart planforslaget presentert med fakta og vurderingar. Vedtaket ligg ved som orientering til Heradsstyret. FAKTA Planprosessen:
Formannskapet vedtok 09.06.10 å leggje planframlegget ut på høyring og offentleg ettersyn. Dette vart kunngjort i Bygdanytt, Bergens Tidende og på kommunen si heimeside med frist til 27.august for å kome med merknader. Etter førespurnad fekk Fylkesmannen, Fylkeskommunen, Noregs vassdrags- og energidirektorat og Fiskeridirektoratet forlenga uttalefrist til 20. september. I løpet av tida planforslaget var på høyring vart det halde 3 opne kontordagar i Heradstyresalen. Tidspunkt vart kunngjort i avis og på heimeside. Det kom inn 101 merknader, i tillegg vart 3 merknader oppretthaldne gjennom politisk vedtak av 25.08.10. Merknader frå sokneråd og grunneigarar til foreslått gravplass er og vurdert i denne samanheng. Alle merknadene vart lagt fram i arbeidsmøte med utvida planutval 27.10.10 som vart fylgt med eit prosessvedtak 17.11.10. Planforslaget har fått fylgjande motsegn: Hordaland Fylkeskommune: Kulturminne: a) Alle automatisk freda kulturminne med 5 meters sikringssone må visast med rune-r i plankartet, eventuelt markert med omsynssone d. Føresegn 5.0 må endrast i høve dette. Kommentar: Motsegn er tatt til fylgje. Automatisk freda kulturminne er lagt inn med rune-r i basiskartet. Tre kulturminne har fått omsynssone d, 2 av dei er vidareføring frå gjeldande plan. Føresegn i 5.0 er endra b) Gjerstad, Askeladden id 135884 må markerast med rune- R eventuelt omsynssone d. For å sikre heile området, må det i tillegg leggast ei omsynssone c over det automatisk freda kulturminne, eksisterande kyrkje, kyrkjegard og framtidig kyrkjegard, med tilhøyrande retningsliner. Kommentar: Motsegn er tatt til fylgje. Automatisk freda kulturminne er vist med omsynssone d). Det òg lagt omsynssone c over kyrkjestaden. Retningsliner er i planskildringa kap 5. c) Følgjande føresegn må takast inn under føresegner for LNF-spreidd bustadbygging: Det skal ikkje gjevast løyve til tiltak som kjem i konflikt med verdifulle kulturminne eller forstyrrar heilskapen i verdifulle kulturlandskap. Kommentar: Føresegn er tatt inn under LNF-spreidd Strandsone: Kultur og ressursutvalet vil rå til at det vert spesifisert byggegrense i strandsona for det einskilde byggeområde og i LNF-områda der spreidd bustadbygging er tillete. Dette for å unngå å erstatte den generelle byggeforbodsona på 100m med ei 20 m grense, slik Osterøy kommune har foreslått. Kommentar: Det er spesifisert byggegrense i føresegna for alle framtidige byggeområde og LNF- spreidd, der det framleis er høve til utbygging. For eksisterande uregulerte område som er bebygd vert 20 meter oppretthalde. For eksisterande bygg i byggeområde utan reguleringsplan, som ligg mellom 0-20 m, kan det søkast om løyve til tiltak etter pbl 20-2. For regulerte område gjeld framleis reguleringsplan. Etter dialog med Fylkeskommunen er ein samde om at strandsona no er tilstrekkeleg ivareteke. Fylkesmannen i Hordaland: Det er fremja motsegn mot N7 Loftås i høve til jordvern og omsynet til vassdrag. Kommentar: I prosessvedtak FS 159/10 punkt 3 vart det vedtatt av N7 Loftås vert teke ut av planen etter motsegn frå Fylkesmannen. Vedtaket er sendt Fylkesmannen som har dermed har trekt motsegn. Noregs vassdrag og energidirektorat:
NVE finn å måtte fremje motsegn mot planen. Grunnlaget for motsegna er at potensielt skredutsett areal i planområdet ikkje er synt med omsynssone i plankartet. Kommentar: Osterøy kommune er opptatt av finne ein forsvarleg løysing på handtering av skred, men er ikkje sams i at ei omsynssone over store delar av kommunen er den einaste og mest forsvarlege måten å løyse dette på. Ein er samstundes usikker på om NVE kan krevje at deira løysing vert teke inn i planen. Det har vore avklaringsmøte mellom kommunen og NVE utan at ein fekk avklart problemstillinga. Det er trong for ein prinsipiell avklaring kring bruk av omsynssoner og høve til å fremje motsegn grunna manglande omsynssoner. Fylkesmannen deltok derfor på møtet. Det er oppretta dialog mellom NVE og Miljøverndepartementet for å avklaring av juridiske tolkingar. I planframlegget meiner ein å ha løyst det forsvarleg ved at utarbeidd temakart for skred er lagt inn i planskildringa og knytt føresegn til. I føresegna vert det stilt krav til faresonekartlegging, fagkunnige vurderingar og at eventuelle sikringstiltak skal vere gjennomført før området kan takast i bruk. Ein har og lagt ved sjekkliste for skred til bruk i handsaming av byggesak og reguleringsplanar. Plassering av tiltak i potensielt skredfarlege område er òg ivaretatt gjennom byggeteknisk forskrift 7-3 Endeleg løysing vert lagt fram for formannskapet i møte. Andre merknader: Det er komen mange merknader som ikkje er tatt til fylgje. Fleire av desse er gjentaking av det som kom inn som innspel til planarbeidet, men som ikkje er teke med i planen. Vurderinga av desse er å finne i grovsilingsdokument handsama 09.09.09 og i konsekvensutgreiinga og ROS-analysa som fylgjer planomtalen og vert soleis ikkje teke opp att no. Alle merknader er gjennomgått med tanke på eventuelle nye moment. Det er og komen inn ein rekke innspel til heilt ny arealbruk som ikkje tidlegare har vore vurderte. Dette gjeld både arealbruk innanfor rullerte tema, men og fleire ynskje om mellom anna naust og flytebryggjer. Ny arealbruk vil innebere at det vert utarbeidd konsekvenutgreiing og ROS-analyse for områda og at planen må ut på ny høyringsrunde. I prosessvedtak FS 159/10 vedtok formannskapet at ein skulle vurdere merknadane etter om dei ville føre til ei ny høyringsrunde eller ikkje. Merknader som gjeld ny arealbruk er dermed ikkje teke til fylgje i planframlegget. Endringar i planen: N 3 Espevoll: Etter at kommuneplanen har vore på høyring, er det meldt oppstart av planarbeid på Espevoll. Planprogrammet, som har vore ute på høyring, har teke omsyn til dei merknadane som kom til området i kommuneplanen. Etter styringsgruppa si handsaming av merknader til oppstart og planprogram er planområde redusert til om lag 550 daa mot 603 daa. Omsynssone høgspent er justert tilsvarande. Gravplass: Det vart lansert to alternativ til ny gravplass i planframlegget. Mange av merknadene ytrar eit sterkt ynskje om at kommunen skal løyse gravsituasjonen med å setje av areal i tilknyting til kyrkjene og er skeptiske til ein større gravplass for fleire sokn. Ein har vurdert at det er trong for å setje av eit større areal til gravplass i planen. Ut frå merknader har ein da valt å ta ut alternativet i Lonevåg, ved Husavatnet og let alternativ Hauge, Hallandsflatane fylgje planen vidare. KA1 Klubbelia Eit område på 11.9 daa vart satt av til føremål kombinert bygg og anlegg med tanke på kommunale tenester. Etter merknad om at område er i bruk til beite, samt at det per dags dato ikkje føreligg konkrete planar om bruk av arealet, vert det foreslått å ta området ut av planen. Mindre justering av arealgrense
Etter merknad om bruk av område, er grensa til eksisterande område Museumsområde på Gjerstad utvida mot sør- vest. Grense mot veg er utvida for næring på Furuholmen (Lobas, Fotlandsvåg) Føresegn: Fylkesmannen kome med fleire planjuridiske råd om kva for heimel som bør nyttast i føresegna. Dette har lite betyding for innhaldet i planen, men gjer at føresegna i planen vert juridisk haldbare. Nokre føresegner er justerte eller utdjupa for å gjere dei tydlegare og dermed lettare for kommunen å praktisere. Det spesifisert byggegrense mot sjø for framtidige byggjeområde og område sett av til spreidd bustadbygging. Det er i tillegg opna for at ein kan byggje i eksisterande bustadområde som er heilt eller delvis bygd ut utan reguleringsplan. Det er satt vilkår for at dette skal kunne gjerast. Det er laga føresegn som betre skal ivareta tiltak i potensielt skredutsette område. Plankartet: I plankartet er det påført fleire nye omsynssoner. Omsynssoner er eit nytt verkemiddel i Pbl og skal i naudsynt utstrekning syne omsyn og restriksjonar for bruk av areala. Det vart brukt fleire ulike omsynssoner i planforslaget, og etter merknader har ein vurdert å legge inn fleire. Mellom anna er det lagt omsynssone med utgangspunkt i støykart frå Statens vegvesen, der ein skil mellom raud og gul sone. Det er lagt omsynssone over Loneelvi 50 meter frå vasstreng, over kulturminne og skredutsette område, syner til planomtalen for fullstendig liste. Område der det er pågåande planarbeid som ikkje var i tråd med overordna plan er no markert i kartet med planens føremål. Dette gjeld planer som har vore høyring og ikkje fått merknader til arealbruk. Det er elles gjort mindre tekniske endringar i kartet. Planskildringa: Her er enkelte tema utdjupa med retningsliner i tråd med merknader. Det er lagt til liste over alle omsynssoner og liste over gjeldande reguleringsplanar. Det er ikkje gjort endringar som endrar formåla med planen. Oppsummering: Framlegg til kommuneplanen sin arealdel er foreslått endra på fleire punkt. Endringane er gjort for å imøtekome merknader i høyringa som ikkje er strid med hovudmåla i planen. Planomtalen er utdjupa på nokre punkt. Plankartet er oppdatert og påført fleire omsynssoner. Føresegna er gjort meir juridisk haldbare. RÅDMANNEN SI VURDERING Planforslaget til Osterøy kommune var blant dei fyrste kommuneplanane i Hordaland som vart lagt ut på høyring etter at ny plan- og bygningslov trådde i kraft 01.07.09. Det har vore til dels krevjande utan mange løysingar å sjå til og utan at rettleiarar er utarbeidd. I særs gjeld dette i høve plankartet. Kartforskrifta har endra seg fleire gonger under utarbeiding av plankartet og når det gjeld bruken av omsynssoner er det framleis mangel på sentrale avklaringar. Tilbakemeldingane frå ulike statlege og regionale organ har difor nokre gangar ikkje vore samsvarande. Planprosessen til denne rulleringa har teke lengre tid enn førespegla. Dette av ulike grunnar. Dei mange innspela om ny arealbruk gir kommunen eit viktig bilete på kva for tema/område som bør ha fokus i neste rullering. Det er komen mange merknader til bruk av strandsona og til akvakultur. I tillegg peikar sentrale mynde på trong for å rullere desse områda. Gjeldande kommuneplan vart vedteke i 2003 og Rådmannen ser det som særs viktig å få ein ny oppdatert plan som stettar utfordringane dei komande åra. Planforslaget som har vore ute på høyring og offentleg ettersyn og justert etter innkomne merknader, er basert på heilskapelege vurderingar. Rådmannen rår til at planen vert vedteke slik han no ligg føre.
Dato for saksutgreiing: 24.01.11 Trykte vedlegg: Merknader med kommentarar FS 074/10 Kommuneplanens arealdel 2010-2022 utlegging til høyring og offentleg ettersyn Planskildring, 04.06.10 sist revidert 25.01.11 Plankart vedlegg A 04.06.10, sist revidert 24.01.11 Føresegn, vedlegg B, 02.06.10, sist revidert 25.01.11 Konsekvensutgreiing og ROS-analyse, vedlegg C