Kvam herad Sakspapir SAKSGANG Styre, utval, komite m.m. Møtedato Saksnr Sakshands. Nærings-, plan- og bygningsutvalet OLHE Avgjerd av: Saksh.: Olav Helleve Frikjøpsordning for parkering. Arkiv: N-135 Objekt: Arkivsaknr 10/306 Samandrag: Etter 69 i Plan- og bygningslova skal det i samband med bygging m.a. sikrast parkeringsplass for bilar i nødvendig utstrekning. Sikring av tilstrekkeleg parkeringsplassar vert i dag lagt stor vekt på ved utarbeiding av reguleringsplanar, og godkjenning av bygg av ulik slag. Problemstillinga melder seg ved utbygging i sentrale område, og særleg ved bruksendring / ombygging av bygg m.v. Då vil kravet til naudsynt parkeringsdekning slå inn. I medhald til 69 pkt. 4 kan kommunen gjennom vedtekt gje samtykke til at det i staden for parkeringsplass på eigen grunn eller fellesareal kan innbetalast til kommunen ein sum pr. manglande plass for bygging av parkeringsanlegg. Dette ser vi som ei tenleg ordning for både brukaren og heradet. Rådmannen vil tilrå at Kvam herad gjer vedtak om å oppretta slik vedtekt. Rådmannen sitt framlegg til vedtak: Kvam heradsstyre gjer vedtak om at det vert innført slik vedtekt til 69 pkt. 4 i plan- og bygningslova: 1. Nærings-, plan- og bygningsutvalet kan gje samtykke til at det i staden for parkeringsplassar på eigen grunn eller fellesareal vert innbetalt ein sum pr. manglande biloppstillingsplass til Kvam herad for bygging av parkeringsanlegg. 2. Kvam herad disponerer dei innbetalte midlane, og syter for at dei vert brukte til føremålet. 3. Pr. 2010 skal summen vera kr. 30.000,- som eingongssum pr. biloppstillingsplass. Summen kan justerast kvart år i samband med budsjetthandsaminga. 4. Ordninga gjev ikkje eksklusiv rett til ein bestemt oppstillingsplass. Den som har frikjøpsordning har same rettar og plikter som andre brukarar av offentlege parkeringsplassar.
Lista inneheld sentrale dokument som det er referert til eller sitert frå i saksframstillinga: JournalID Journaldato Tittel Avsendar For å opne dokument det er referert til i tabellen må du klikke på lenka under her. Skriv så inn JournalID i søkefeltet DokumentID og utfør søket. http://www.kvam.no/innsyn5/wfinnsyn.aspx?response=journalpost_sok&simple=false
Saksopplysningar: Etter 69 i Plan- og bygningslova skal det i samband med bygging m.a. sikrast parkeringsplass for bilar i nødvendig utstrekning. Reglar for parkeringsdekning vert fastlagt i reguleringsplanar, og dette vert lagt til grunn ved godkjenning av bygg og anlegg av ulike slag. Eit byggeløyve forutset at m.a. parkeringsspørsmålet vert løyst. I mange eldre sentrumsområde er det ei sterk arealutnytting. Tomtene er ofte små. Det er ikkje teke høgde for den utviklinga vi har hatt med stadig større bilbruk og tilhøyrande parkeringsbehov. Dette vert særleg synleggjort ved utbygging i slike område, og ikkje minst ved bruksendring / ombygging m.v. Då vil kravet til naudsynt parkeringsdekning slå inn. Etter 69 nr. 3 kan kommunen gjennom vedtekt gje bestemmelser om utforming og opparbeiding av ubebygd del av tomt og av fellesareal. Dette vart gjort 26.05.1967, og vedtekta lyder slik: I busetnadsplanar og reguleringsplanar skal det gjerast greie for plassering av dei anlegg som er nemnde i 69, nr. 1. I den mon trongen for slike anlegg er dekka på tilstøytande areal må dette dokumenterast. Anlegga må synast i sin samanheng med køyrevegar, gangvegar og friareal. Etter 69 pkt. 4 kan kommunen gjennom vedtekt gje samtykke til at det i staden for parkeringsplass på eigen grunn eller fellesareal kan innbetalast ein sum til kommunen pr. manglande plass for bygging av parkeringsanlegg. Det er dette spørsmålet denne saka tek opp. 69 pkt. 4 og 5 lyder slik: 4. Ved vedtekt kan bestemmes at kommunen kan samtykke i at det i stedet for parkeringsplass på egen grunn eller på fellesareal blir innbetalt et beløp pr. manglende plass til kommunen for bygging av parkeringsanlegg. Kommunestyret bestemmer hvilke satser som til enhver tid skal gjelde i slike tilfelle. 5. Bestemmelsene i nr. 1-4 vedrørende parkeringsplasser får tilsvarende anvendelse ved bruksendring. Manglande parkering kan føra til at naudsynt utbygging og bruksendring ikkje kan gjennomførast, noko som kan leggja dempar på utviklinga og føra til manglande fornying og oppgradering av eldre sentrumsområde. Kvam herad har møtt dette spørsmålet i aukande grad gjennom åra. Det er nærliggjande å nemna to saker frå seinare tid: - Sak 131/07 DRAD. vedk. riving av sjøbu mv., og bygging av husvære på gnr. 44, bnr. 33. Pga. utilstrekkeleg parkeringsdekning vart det inngått avtale med Kvam herad om gjesteparkering for 4 bilar på Øystesekaien på vilkår av at Østensjø Eigedom AS murar igjen ein brekk på kaien ved sjøkanten - Sak 066/09 NPB vedk. bruksendring frå kontor til bustad på gnr. 11, bnr. 124. (Bruflat eiendom AS) Det mangla ein del på at det var parkeringsdekning etter reglane. NPB-utvalet gjorde slikt vedtak: Ein vurderer parkeringssituasjonen som god og kan ikkje sjå at parkeringssituasjonen vert forverra då tiltaket medfører fleire parkeringsplassar enn dagens situasjon. Parkering ved inngrep i fortau vert ikkje tillete. Ei frikjøpsordning vil kunna begrensa slike skjønsmessige vedtak, som lett kan få utilsikta verknader som td. manglande likebehandling, press på off. parkeringsplassar m.v.
Frikjøpsordning er innført i andre kommunar, m.a. Odda og Voss. Dette er ei smidig ordning, som er til hjelp for dei som ikkje kan realisera parkeringsplass på eigen grunn. Den innbetalte summen vil samstundes vera med å setja kommunen i stand til å byggja fleire parkeringsplassar i sentrale område, noko som vil koma heile sentrumsområdet til gode. Det må understrekast at dette er ei ordning der byggherren kan kjøpa seg fri frå eit parkeringskrav, det er ikkje ei ordning der byggherren kjøper parkeringsplass. Investeringsfond. Det vert oppretta eit bunde kapitalfond (Investeringsfond) der midland vert sett inn. Ein har vurdert om heradet bør tilbakebetala ein forholdsmessig sum dersom den som har frikjøpsordning etter ei nærare bestemt tid (for eksempel. 10 år) finn annan parkeringsløysing eller det vert bruksendring på eigedomen som tilseier mindre parkeringsplassar. Dette er truleg lite aktuelt. Det er heller ikkje logisk å tilbakebetale etter at dei innbetalte midlane er brukte til nye parkeringsplassar. Eingongssummen er sett opp på grunnlag av erfaringstal. Pris utlikna på kvar biloppstillingsplass i Myra, Norheimsund som no er under opparbeiding er om lag kr. 15.000,- + mva. I tillegg kjem naudsynt leidningsnett, grunnkostnad, byggadministrasjon m.v., og årlege vedlikehalds- og brøytekostnader. Dersom ein tek omsyn til at prisen må vera så høg at den ikkje stimulerer til ei slik ordning, bør prisen vera minst kr. 30.000,-. Ein har inntrykk av at prisane varierer ein del frå kommune til kommune: Odda : kr. 12.000,- (2006) Voss kr. 100.000,- (2008) Bergen: kr. 112.000,- (2006) Snøbrøyting. I samband med denne saka er det frå driftsavdelinga blitt påpeika vanskar med parkerte bilar som står i vegen for snøbrøyting, tilfeldig plassert. Dette meiner dei kan verta forverra ved frikjøpsordninga. Det var særleg vanskeleg denne vinteren. Vi trur at dette spørsmålet må løysast på annan måte, gjennom lovverk og vedtekter, f.eks. Politivedtektene. Slike føringar ligg til grunn for framlegget: Ordninga føreset at det er offentleg parkeringsplass i rimeleg nærleik. Kva som er rimeleg nærleik må NPB-utvalet ta stilling til i kvar enkel byggesak. Ordninga må gjelda i heile kommunen. NPB-utvalet må ta stilling til om føresetnadene er til stades i kvart enkel byggesak.. Ordninga bør ikkje vera eksklusiv, dvs. at brukaren får ikkje disponera ein bestemt oppstillingsplass. Brukaren må finna ledig oppstillingsplass på ein offentleg parkeringsplass, på linje med andre brukarar. Ordninga må vera ei nødløysing, som berre vert nytta når det ikkje er mogeleg å finna andre brukbare løysingar. Prisen må vera såpass høg at det ikkje stimulerer til å bruka denne ordninga framfor andre. Altså ein streng praksis. Av praktiske årsaker bør det vera same pris for alle områder innan heradet. Ordninga bør vera lett å administrera. Det er heradet som skal bestemme når nye parkeringsplassar skal byggjast, og kvar dei skal byggjast. Dersom det seinare vert innført ordning for parkeringsavgift i heradet, må vedkomande organisasjon finna ei tilfredssstillande ordning for den som har frikjøpsordning. Ny plan og bygningslov. Den nye plan- og bygningslova frå 2008 vil gjelda frå 01.07.2010. I 28-7, tredje ledd og fjerde ledd står det slik:
Det kan bestemmes i kommuneplanen at kommunen kan samtykke i att det i stedet for parkeringsplass på egen grunn eller på fellesareal blir innbetalt et beløp for hver manglende plass til kommunen for bygging av parkeringsanlegg. Kommunestyret bestemmer hvilke satser som til enhver tid skal gjelde. Innbetalte beløp kan bare benyttes til opparbeiding av offentlige parkeringsanlegg. Bestemmelsen i første til tredje ledd gjelder tilsvarende ved bruksendring. Dette medfører at vedtekta i neste omgang vil verta knytta til kommuneplanen. Vurdering: Manglande parkeringsdekning syner seg å vera ei reell utfordring i mange høve, og rådmannen meiner framlegget ivaretek både dei private og offentlege interessene på ein tilfredsstillande måte. Rådmannen tilrår difor at framlegget vert vedteke.