saksframlegg Dato: Referanse: Vår saksbehandlar: 22.04.2015 27706/2015 Sverre Hollen Saksnr Utval Møtedato Utdanningsutvalet 30.04.2015 Yrkesopplæringsnemnda 28.05.2015 Fylkesutvalet 27.05.2015 Fylkestinget 15.06.2015 Kvalitetsplanen for vidaregåande opplæring i Møre og Romsdal 2015-2019 Bakgrunn Fylkestinget vedtok i sak T-78/09 den overordna strategien for arbeid med kvalitet i vidaregåande opplæring Møre og Romsdal. I det overordna strategidokumentet blir det gjort nærare greie for arbeidet med sikring-, utvikling og vurdering av kvalitet i opplæringa. I flg. strategien skal fylkestinget kvart år behandle plan for kvalitet, jf. sak T-30/10 og melding om kvalitet jf. sak T-75/10. Framlegg til kvalitetsplan for 2015-2019 og eit notat om fagnettverka sin gjennomføring av kompetansetiltak ligg ved saka. Kvalitetsplanen tek utgangspunkt i opplæringslova med tilhøyrande forskrifter samt nasjonale prioriteringar. Kvalitetsplanen og kompetansestrategien har vore sendt til høyring til skolane, elev- og lærlingombodet, elevorganisasjonen, lærarorganisasjonane og opplæringskontora. Ungdomspanelet har behandla kvalitetsplanen i eiga sak UP-5/15. Nasjonale prioriteringar I St.meld. nr. 20 (12/13) «På rett veg», er dei nasjonale og utdanningsprioriterte måla for grunnopplæringa at: - Alle elevar som går ut av grunnskolen, skal meistre grunnleggjande ferdigheiter som gjer dei i stand til å delta i vidare utdanning og arbeidsliv. - Alle elevar og lærlingar som er i stand til det, skal gjennomføre vidaregåande opplæring med kompetansebevis som vert anerkjent for vidare studiar eller i arbeidslivet. - Alle elevar og lærlingar skal inkluderast og oppleve meistring. St.meld. nr. 44 (08/09) Utdanningslinja, blir auka gjennomføring i vidaregåande opplæring framheva som eit hovudsatsingsområde i arbeidet med kvalitet i opplæringa.
Gjennom det nasjonale programmet for betre gjennomføring er satsinga innafor Ny GIV vidareført med ei innretning som skal forsterke innsatsen for å betre gjennomføringa med tettare oppfølging i opplæringa. Om struktur og oppbygging av kvalitetsplanen Denne kvalitetsplanen er bygt opp med ein struktur med kvalitetsområda struktur, prosess og resultat. Innafor kvart område har ein målsettingar, tiltak og indikatorar på kvalitet. Kvalitetsindikatorane er bygt på brukarundersøkingane for elevar, lærlingar og personalet. Som datakjelder er brukt KOSTRA, Gjennomføringsbarometeret, data frå inntakssystemet VIGO og portalen PULS (Pedagogisk utvikling og læringsspeil). For kvart kvalitetsområde bruker ein kvalitetskjenneteiknmed gradering på fire (3) nivå. Skoleeigar sine prioriteringar I samband med behandlinga av kvalitetsmeldinga i fylkestinget 09.12.2014 vart følgjande kvalitetsutviklande tiltak prioritert; Det skal arbeidast systematisk med utvikling av tilpassa opplæring, læringsmiljøet og den formative vurderinga i skolane Det skal arbeidast med å vidareutvikle varige samarbeidsstrukturar med kommunane både når det gjeld overgangen mellom ungdomsskole og vidaregåande opplæring og utvikle strukturar rundt elevar som treng særskilt oppfølging Saman med lokalt og regionalt arbeidsliv skape lære- og opplæringsplassar for elevar som tek yrkesfagleg opplæring. Gjennom avtalar om utplassering i prosjekt til fordjuping må skolane arbeide for å formidle fleire elevar til læreplass innafor yrkesfaga. Skolane skal arbeide aktivt med fagleg relevans i fellesfaga gjennom den nasjonale FYR-satsinga for å gjere elevane betre i stand til å sjå samanhengen mellom fellesfag og yrkesfaget. På bakgrunn av den forskingsbaserte kunnskapen ein har fått når det gjeld rådgiving om yrkes- og studieval for elevar skal ein utvikle denne elevtenesta slik at elevane får eit godt grunnlag for å gjere val om utdanning. Skolane sitt arbeid med skolebasert vurdering skal dokumenterast i ei årleg årsmelding. Årsmeldinga skal publiserast på skolane sine nettsider. Desse kvalitetsutviklande tiltaka er bygt inn i kvalitetsplanen. Betre gjennomføring har vore fanesak for Møre og Romsdal fylkeskommune dei siste åra. Satsinga er i samsvar med nasjonale målsettingar peika ut som hovudinnsatsområde når det gjeld arbeidet med kvalitet i vidaregåande opplæring dei næraste åra. I det nasjonale overgangsprosjektet har ein identifisert ni kritiske fasar på vegen mot fullført og greidd vidaregåande opplæring, jf. figur 1.
Figur 1 Det nasjonale prosjektet Program for betre gjennomføring gir innretning for det arbeidet som departementet forventar av fylkeskommunane. Sentrale område er overgangar, oppfølging og fagleg relevans i alle fag (FYR-prosjektet). I samband med dette har ein og ei statistikkoppfølging kor resultat vert publisert i Gjennomføringsbarometeret. Fylkeskommunane er og invitert av departement og direktorat til å søkje midlar til forskjellige prosjekt t.d.; - Hospitering (utveksling lærar-instruktør skole/bedrift) - Veksling mellom skole og bedriftsopplæring - «Læreplasskurs» med ulike modellar I tillegg støtter departementet fylkeskommunane med øyremerka tilskott for tettare oppfølging av elevar. Dette er midlar som blir tildelt skoleprosjekt etter søknad.
Dei nasjonale målsettingane og skoleeigar sine målsettingar er innarbeidd i kvalitetsplanen. Gjennom handlingsplanar vert konkrete tiltak prioritert slik at det er samanheng i verkemiddel frå nasjonalt nivå, skoleeigarnivå og til skolenivået. Det krevst eit gjennomgåande systematisk arbeid i heile organisasjonen og arbeidslivet for å arbeide med alle desse fasane. Prioriterte tiltak vil bli konkretisert og innarbeidd i fylkesutdanningssjefen sin handlingsplan og i skolane sine handlingsplanar. I forvaltningsrevisjonsrapporten om gjennomføring i vidaregåande opplæring peikte ein m.a. på at det ikkje alltid er opplevd samanheng mellom sentralinitierte tiltak og tiltak som er forankra i den lokale skolekvardagen. Alle sentralinitierte tiltak er søknadsbasert (m.a. midlar til tettare oppfølging) kor skolane sjølv vel om dei vil delta. Ein føreset då at dei tiltaka dei søker på er forankra lokalt og knytt til lokal handlingsplan. Sentral initierte tiltak både nasjonalt og frå skoleeigarnovået er nødvendig for å sikre at tiltaka som skolane set i verk er forskingsbaserte og vil ha effekt på elevane sin læring. Sjølv om betre gjennomføring har ei hovudinnretning for å følgje tettare opp elevar med svake prestasjonar, elevar med høgt fråvær og elevar med svak motivasjon må ein og ta høgd for at skolen skal gi utfordringar til heile elevgruppa, dei som presterer med gode resultat treng og ekstra utfordringar i dei ulike faga. Dette er noko ein vil arbeide med for at elevar og kan få tilbod om følgje fag som er knytt til høgskole-/universitetsutdanning. Med innføring av studiesenter med videokonferanseutstyr på dei vidaregåande skolane vil ein betre moglegheitene for at elevar kan følgje fag i høgare utdanning. Skoleeigar har gjennom SAFOsamarbeidet vore i dialog med NTNU om ei slik ordning, og NTNU arbeider med modellar om korleis dette kan gjennomførast i praksis. Det er og viktig at dei vidaregåande skolane kan leggje tilhøva til rette for ungsdomsskolelevar som ønskjer å følgje fag i vidaregåande opplæring. Kompetanseutvikling Kompetanseutvikling av dei tilsette er den viktigaste innsatsfaktoren for at elevar og lærlingar i den vidaregåande opplæringa får ei opplæring med høg kvalitet og relevans til arbeidsliv og studiar. For å sikre kompetansebygging skal fylkesutdanningssjefen bruke dei innarbeidde systema (fagnettverk, fylkesakademiet, «Kompetanse for kvalitet», leiarsamlingar m.m.) for at undervisningspersonale, skoleleiarar og personale med særoppgåver i skoleverket får nødvendig kompetanseutvikling. Fylkesutdanningssjefen skal og sikre at bedriftene har instruktørar og faglege rettleiarar med kompetanse slik at opplæringa følgjer læreplanmåla og bidreg til å fornye og utvide den faglege og pedagogiske kunnskapen innafor den vidaregåande opplæringa i bedrift gjennom eigne samlingar for opplæringsansvarlege i bedriftene. Vurdering I perioden 2015-2019 vil kvalitetsutviklinga i den vidaregåande opplæringa i hovudsak bli prega av nasjonale prioriteringar og satsingar innafor programmet for betre gjennomføring. I tillegg har ein m.a. utviklingsprosjekt innafor karriererettleiing, sosialpedagogisk rådgiving, utvikling av hospiteringsordningar innafor fag- og yrkesopplæringa og vidareføring av vurdering for læring.
Dei nasjonale satsingane samsvarer godt med det utviklingsarbeidet som fylkeskommunen allereie har lagt til grunn i sine kvalitetsplanar og handlingsplanar. Kvalitetsplanen er grunnlaget for at skolane utarbeider eigne tiltaksplanar for skoleåret 2013-2017. Tiltaksplanane skal leggast ut på skolane sine heimesider innan 15. juli. Det blir forventa at betre gjennomføring og tettare oppfølging kjem til uttrykk i skolane sine tiltaksplanar for skoleåret 2013-2014. Forslag til vedtak: 1. Betre gjennomføring og tettare oppfølging skal i planperioden 2015-2019 ha eit gjennomgåande fokus i arbeidet med kvalitet i vidaregåande opplæring i Møre og Romsdal. 2. Kvalitetsplanen for 2015-2019 blir vedteken med dei målsettingane og tiltaka som kjem fram i planen. 3. Kvalitetsplanen skal evaluerast i årleg kvalitetsmelding til fylkestinget. 4. Kvalitetsplanen skal leggast til grunn for utarbeiding av lokale arbeidsplanar for lærarane, og inngå i kriteriegrunnlaget for lokal lønnsfastsetting for lærarar og skoleleiarar. Ottar Brage Guttelvik fylkesrådmann Sverre Hollen fylkesutdanningssjef Vedlegg 1 Kvalitetsplanen for vidaregåande opplæring i Møre og Romsdal 2015-2019 2 Aktivitet i fagnettverka 2014