MEDLEMSBLAD FOR NORDHORDLAND HUSFLIDSLAG. Nr 5 / november Elevarbeid frå eitt av kursa til Ingvild Skår

Transkript

1 MEDLEMSBLAD FOR NORDHORDLAND HUSFLIDSLAG Nr 5 / november 2009 Elevarbeid frå eitt av kursa til Ingvild Skår

2 HUSFLIDENS DAG Laurdag 19. sept. hadde Nordhordland Husflidsslag markering av Husflidens dag i Knarvik. Dette var ein dag med mykje anna aktivitet i senteret. Senterleiar Åge Torsvik hadde sett av god plass til oss oppe i senteret utanfor Monett og Fellini. 15 av våre medlemmer stilte ut eit flott mangfald av det dei produserer. Markeringa vart tatt vel imot av publikum, og to personar melde seg inn i laget vårt. Det var ein trivelig dag, med snorklipping på slyngestokkar som aktivitet for barn. Jarl og Kaspar Hansen med tre og tauprodukta sine og Beate K.Kolstad med smykker, her i samtale med kunde. Arnlaug Hofland med eit stort utval eigne produkt LANDBRUKSDAGEN I AUSTRHEIM Nordhordland Husflidslag vart også i år invitert til å delta på landbruksdagen 3. okt. I år vart den avvikla i Austrheim-hallen. Det var bra, sidan vêrgudane ikkje var på arrangørane si side. Dei utstillarane frå laget fikk vist fram både trearbeid, rosemaling, skinnarbeid, strikkearbeid, hardangersaum, smykker, vev mm. Men med så god plass kunne fleire av laget sine medlemmer synt fram produkta sine. Også der hadde me med slyngestokkar som det såg ut for at borna og vaksne sette stor pris på. Aud Marit Halland Medarbeidarkurs hausten 2009 Det kan vere godt med rettleiing frå ei stødig mannehand. Her er Trygve Olsen Strømsnes hjelpar. Hordaland Husflidslag arrangerte medarbeidarkurs i Bergen i haust. Underteikna deltok frå vårt lokallag.tema på kurset var teknikkar og garn. Me lærte både hakking, pjoning, nålebinding, kontstrikk og gimping. Folkekulturforbundet deltok med informasjon om forbundet og om forslag til nye forskrifter for kursavvikling. Og så vart det tid til besøk hjå Pinnsvin Design, ein butikk med mykje fint garn. Ei kjekk helg med ny lærdom og mange nye bekjentskapar. Vigdis Olsen 2

3 VEVTOG til Hillesvåg 26. september fekk Hillesvåg Ullvarefabrikk besøk av 64 vevinteresserte personar som kom med tog frå Oslo til Bergen dagen før. To turbussar transporterte dei utover til omvisning og storhandel i fabrikken. Hordaland Husflidslag hadde skipa til aktivitetar i Husflidens hus. Det vart vakre filta sommarfuglar i mange fargar, samt snorlaging m.m. Laget vårt hadde laga kjøttsuppe som me serverte til svært svoltne deltakarar. Etter suppa fekk dei kaffi og kringle. Det var mette og nøgde deltakarar som returnerte til Bergen om ettermiddagen for å vitja museum. Tilbakemeldinga har vore god for opplegget denne dagen. Helsing Suppegjengen Handarbeidstreffa i Hillesvåg Kari Hetlevik og Marta Hvidsten ivrige med pjoninga. Sidan siste nummer av Primstaven har me halde 2 handarbeidstreffi Hillesvåg. På det første treffet 5. oktober var temaet hakking og resultatet vart fine gryteklutar. Vigdis instruerte oss i teknikken og alle fekk det til. På neste handarbeidskveld, 2. november,prøvde me oss på pjoning. Marta hadde laga fleire nydelege par pulsvarmarar. Ingrid viste oss fine pjona vottar. Hillesvåg hadde laga modellar til luer og vottar, samt sponsa mønster til oss. Vigdis hadde tjuvtrena på teknikken, og demonstrerte for oss korleis me skulle gjera det. Dette gjekk bra for dei fleste.me fekk og sjå nokre spesielle modellar som kunne nyttast til diverse andre ting.trivelege kveldar som aktiviserte eit snes personar kvar kveld. Neste handarbeidskveld vert 30 november. Då prøver me oss på gimping. Medlemmar og andre interesserte er hjarteleg velkomne til å vera med. Det blir kjekt å friske oppatt gamal kunnskap. Styret vil med dette takke for all dugnadsinnsatsen i året som har gått og ynskje alle ei fredeleg jul og eit godt nytt husflidsår. 3

4 TOVEKURS I HILLESVÅGEN sept/okt TOVA BILDE I ULL Kurset var tydeleg ein suksess. Så mange melde seg på at ein hadde nok kursdeltakarar til to kurs. Ingvild Skår sa seg villig til å ha to kurs, og heldige var me som fekk vera med på dette. Håpar at andre og får høve til å lære å laga bilde i ull. 1.kurskveld tova me bilde i ull (C1-ull) Dette er eit bilde me kan klippa i etter at det tova bildet har tørka. Me bruka nålefilt som underlag. Tre lag ull i ulike fargar, eit lag vassrett, eit lag loddrett og eit lag vassrett. Så var det toving med varmtvatn og grønsåpa. 2. kurskveld tova me landskapsbilde. Nålefilt som underlag. Til dette bruka me mest merinoull, men her og kan me bruka C1- ull. Turid Tenden leitar etter rette motivet for ramma Kurshaldar Ingvild Skår Å tova landskapsbilde, krev ein anna måte å byggja opp bilde. Her brukar me både langhåra- og korthåra merinoull. Som effektar kan me bruka silke og trådar. Alt vert gjort klart før ein tek varmt vatn på og byrjar tovinga 3. kurskveld tova me blomsterbilde. Her kan me bruke ulike teknikkar, kanskje med fleire lag med nålefilt, i ulike fargar. Me brukar langhåra merinoull og/eller silke. Kan forfilta, bruke restar frå anna arbeid til å klippa blomar og blad eller me kan forme til andre motiv. Kan og leggja langhåra merinoull loddrett på nålefilten(tett) Kan så leggja på silke oa. på som trestammar. Som småblomster kan me klippa opp trådar, silke, fortova bitar. Så er det klart for toving. Når bildet er ferdig går det fint an å brodere både blad og blomstrar på bildet. Før me gjekk heimatt om kvelden, hadde me utstilling, der me beskua alle bilda og prøvde med passpatu, - og dermed kunne me sjå kor flotte kunstverk me hadde laga. Reidun Kvamme (kursdeltakar) Kulturmidlar 2009 Husflidslaget har søkt kommunane i distriktet om kulturmidlar. Frå Austrheim kommune og Radøy kommune har vi fått kr 3000, Lindås har gitt oss kr 5000 og Masfjorden har støtta oss med kr Me rettar ei stor takk til kommunane for desse bidraga. Årsmøtet 2010 vert avvikla måndag kl 18 i Husflidshuset i Hillesvågen. Saker må vere styret v/ Aud Marit Halland i hende seinast 6 veker før møtet. 4

5 Kurs vår 2010 Kurs Kursleiar Timar Start Stad Pris Veving av band til Nordhordlandsbunad Kjersti Børilden/ Grete Vetås 12 Januar Husflidsstova Påmelding: Kr 740 Strikkekurs Nybegynnarar/ vidarekommande Beate Skag Stolheim/ Ingrid Hopland 15 Januar Bestemmast seinare Påmelding: Kr 880 Bilde i ull Ingvild Skår , 18. og Hillesvåg Påmelding: Kr 740 Pilefletting Lise Dyrhovden 14 Helg i mars Matre, påmelding Vevkurs/Flatvev Aud Marit Halland 48 Januar Dale Grendahus Påmelding: Brakekledningskurs Arne Mjelde 16 Helg Stølebrøtet, Seim Påmelding: Kr 830 Kr 2160 Kr 920 Kniplingkurs Nina Karin Knutsen 28 Dato for oppstart kjem seinare Årås (gamle banken) påmelding Kr 1460 Bikkevevkurs Nybegynnarar/ vidarekommande Sonja Berlin 40 Veke 31 Sandnes, Masfjorden Påmelding Kr 2000 Utgifter til materiell kjem i tillegg til kursavgifta. Med lemmer i Nordhordland Husflidslag får 10 % rabatt på kursavgifta. Aldersgrense for å delta på kurs er 14 år. Det vert utdelt bankgiro første kurskveld for betaling av kurspengar. Påmelding til kurs er bindande. Velkomen til kurs i Nordhordland Husflidslag 5

6 HUSFLIDSMESSE PÅ STØLEN Husflidsmessa i november 2009 finn stad i nye lokale, nye for husflidslaget, og delvis nye for Knarvik vidaregåande skule. Det har vore stor byggeaktivitet her ei stund no. Høyrer de om Stølen i framtida, så skal de vita at det er namnet på tidlegare Lindås gymnas; Myra eller Kvernhusmyrane er namnet på tidlegare yrkesskulen. I år var messa på Stølen. Mange fann vegen, i 12 tida hadde over 200 betalt seg inn. Det var bra, for vegen kan vera vrien nok om du ikkje ferdast i Knarvik dagleg. Det er og har vore store endringar, både for gåande og køyrande ei tid no. Men dei heldige fann fram til vestibylen og breie gangar med godt med plass og godt lys på Stølen laurdag Mange hadde meldt seg på, nokre måtte melde avbud; ein grunn var svineinfluensa. Mangfaldet er som alltid stort på messa: tre, rosemåling, glas, boksal,broderi, vev, bunad, skinnfell, strikking, juledekorasjonar, lefse, sirup og kafe med stumpekaker og rundstykke. Aud Marit Halland og Grete Spurkeland frå styret i laget seier seg nøgde med lokala, og gleder seg over auka tilstrøyming av folk utover dagen. Praktisk at utstillarane kan køyre heilt inn til inngangsdøra, seier Aud Marit, og at lokale er utan trapper. På Stølen er det heis, og barnevogn og rullestol og dei med problematiske bein kunne komme seg ned i kafeen med den, utan å gå trappa. - Stumpekakebakarar i kantina er her Marita Halland og Marisol Lopena. Dei selde for kafeen, og for å ta med seg heim. - Liv Knudsen frå Arna husflidslag med sine nisser. Inni er piperensarar, sko og ansikt er sjølvlaga, av brent leire der ansikta har yndige uttrykk. Liv forteller ho jobbar med nisser året rundt. - Juledukane er brodert av Nini Holmefjord frå Samnanger. 6

7 - Ingvild Skår fra Knarvik har laga desse sarte englane av ull og silke. - Strikkehuer i alpakkagarn og ull er laga av Gunn Husa og Vivian Husa. - Kjersti Børilden frå Austrheim arbeidar med vev og skinnfell. Her har ho ein livstidspose: når babyen er stor, knappar du opp i sidene og vips har du ein skinnfell i godstolen. Kjersti fortel om ei dame som stansa ved standen og fortalte at ho kjøpte seg ein slik pose då ho fekk sitt første born. Alle hennar fire barn og no tre barnebarn har brukt posen, og enno er ikkje posen utslitt. - Hildur Skage og Marianne Osa frå Radøy har produsert bordet fullt av glas-smykke, med nissa som bakgrunn. 7 - Ny på stand i Nordhordland er Caroline Lehmann med granskudd- og rognebærsirup. Smaksprøver fortel alt, dette er godt! Granskuddsirup er godt mot sår hals, tørr hals og forkjølelse, men er fin å ha når du lagar Irish Coffeee. Rognebærsiruppen er bittersøt og vert nytta til kjøttrettar, steikt fisk og i osteanretningar. Caroline fortel at 10 produsentar i Buskerud har gått saman under felles merke. Sjølv er ho frå Ulvik, og er gruppa sin vestlandskontakt :-)

8 Invitasjon til julemøte i Hillesvågen Nordhordland husflidslag inviterer medlemar og andre interesserte til ei sosial samling før jul i Husflidshuset i Hillesvågen. Me samlast tysdag 24. nov kl til julegraut m/ mandel (premie) kaffi/te og enkel julebakst. Denne kvelden vil ein tilsett frå ullvarefabrikken rettleia oss i å laga pynt i ull. Magnhild Haugen vil kåsere om jul i gamle dagar. Utlodding. Pris pr. pers. kr Alle er hjarteleg velkomne For styret Aud Marit Halland POST TIL PRIMSTAVEN Har de stoff til redaksjonen, som de trur kan vera av interesse for andre, ver gild å ta kontakt med oss: Øyvor H. Larsen, Bruvegen 44, 5914 Isdalstø Tlf / ; e-post: oyvorhl@c2i.net Anne Grete Breisnes, Kvalvågen, 5943 Austrheim Tlf / , e-post: agbrei@online.no Utgjevar: Nordhordland Husflidslag, Returadr.: Anne Grete Breisnes, 5943 Austrheim 8