ENDELEG TILSYNSRAPPORT Skulen sitt arbeid med elevane sitt psykososiale skulemiljø og kommunens system for vurdering og oppfølging på det same området Fyresdal kommune Gimle skule 09.01-11.03.2015 1
Innhald ENDELEG TILSYNSRAPPORT... 1 1 Innleiing... 3 2 Om tilsynet med Fyresdal kommune Gimle skule... 3 2.1 Fylkesmannen fører tilsyn med offentlege skolar... 3 2.2 Tema for tilsyn... 3 2.3 Om gjennomføringa av tilsynet... 3 3. Oppmodingar om tiltak... 4 3.1 Rettslege krav... 4 3.2 Dokumentasjon og vurderingar... 4 3.3 Fylkesmannen sin konklusjon... 5 4. Det systematiske arbeidet ved skulane knytte opp mot 9a-3 andre og tredje ledd varslingsplikta og vedtaksplikta... 5 4.1 Rettslege krav... 5 4.2 Dokumentasjon og vurderingar... 6 4.3 Fylkesmannen sin konklusjon... 8 5. Kommunen sitt system for å sikre at krava i opplæringslova 9a-3 blir oppfylt... 8 5.1 Rettslege krav... 8 5.2 Dokumentasjon og vurderingar... 8 5.3 Fylkesmannen sin konklusjon... 10 6. Frist for retting av lovbrot... 10 2
1 Innleiing Fylkesmannen har i perioden frå 09.01.15 til dags dato gjennomført eit skriftleg tilsyn etter opplæringslova med Fyresdal kommune. I denne tilsynsrapporten er det fastsett frist for retting av lovbrot som er avdekte under tilsynet. Fristen er 30. april. Dersom lovbrota ikkje er retta innan fristen, vil Fylkesmannen i Telemark vedta pålegg om retting med heimel i kommunelova 60 d. 2 Om tilsynet med Fyresdal kommune Gimle skule 2.1 Fylkesmannen fører tilsyn med offentlege skolar Fylkesmannen fører tilsyn med offentlege skular, jf. opplæringslova 14-1 første ledd. Fylkesmannens tilsyn på opplæringsområdet er tilsyn med det lovpålagde, jf. kommunelova 60 b. I dei tilfella der Fylkesmannen konkluderer med at eit rettsleg krav ikkje er oppfylt, blir dette sett på som lovbrot, uavhengig av om det er opplæringslova eller forskrifter fastsett i medhald av denne lova som er brotne. 2.2 Tema for tilsyn Fylkesmannen gjennomførde i perioden 2010-2013 eit felles nasjonalt tilsyn med eit utval av skular i ti kommunar der tema var skulane sitt arbeid med elevane sitt miljø. Det felles nasjonale tilsynet er no over. Fylkesmannen i Telemark ønskjer med bakgrunn i erfaringane frå det felles nasjonale tilsynet å føre tilsyn med dei resterande kommunane på nokre utvalde område der det jamt over blei avdekt lovbrot. Pålegga som blei gitte i det felles nasjonale tilsynet, viser at kommunen som skuleeigar i større grad må involvere seg i dei oppgåvene som skulen har. Fylkesmannen har derfor i dette tilsynet valt å ta med kommunen sitt system for å sikre at krava i opplæringslova blir oppfylte på dei utvalde områda. Tema for tilsynet er: 1. Avgjerder/vedtak som ein følgje av at ein elev eller forelder har bedt om tiltak knytt til det psykososiale miljøet, jf. opplæringslova 9a-3 tredje ledd 2. Det systematiske arbeidet ved skulane, jf. opplæringslova 9a-4, jf. 9a-3 fyrste ledd - knytte opp mot 9a-3 andre og tredje ledd 3. Systemet som kommunen har for å sikre at krava i opplæringslova 9a-3 blir oppfylt, jf. opplæringslova 13-10 andre og tredje ledd Det overordna formålet med tilsynet er å bidra til ei styrking av arbeidet med det psykososiale miljøet ved skulane og skulane si evne til å førebyggje og handtere krenkjande ord eller handlingar. 2.3 Om gjennomføringa av tilsynet Tilsyn med Fyresdal kommune blei opna 09.01.2015. Kommunen blei bedd om å leggje fram dokumentasjon for Fylkesmannen med heimel i kommunelova 60 c. Fylkesmannens vurderingar og konklusjonar er baserte på skriftleg dokumentasjon frå Fyresdal kommune og Gimle skule - sjå oversikten i vedlegg 1. 3
3. Oppmodingar om tiltak 3.1 Rettslege krav Skuleeigar, skulen og dei tilsette pliktar å sikre elevane sin individuelle rett etter 9a-1 gjennom individuelt retta arbeid. Det individretta arbeidet ved skulen er mellom anna regulert i 9a-3 tredje ledd i opplæringslova. 9a-3 tredje ledd Eleven/ foreldra sin rett til å be om tiltak og saksbehandlinga ved skulen Dersom ein elev eller forelder ber om tiltak som vedkjem det psykososiale miljøet, deriblant tiltak mot kjenkjande åtferd som mobbing, diskriminering, vald eller rasisme, skal skolen snarast mogleg behandle saka etter reglane om enkeltvedtak i forvaltningslova. Om skolen ikkje innan rimeleg tid har teke stilling til saka, vil det likevel kunne klagast etter føresegnene i forvaltningslova som om det var gjort enkeltvedtak. Skulen er pålagd gjennom 9a-3 tredje ledd å behandle oppmodingar frå elevar eller foreldre som gjeld det psykososiale miljøet etter reglane om enkeltvedtak i forvaltningslova. Dersom det ligg føre ei slik oppmoding, må skulen snarast råd ta stilling til om eleven sin rett er oppfylt, og eventuelt kva tiltak som skal setjast i verk. Det blir streka under at skulen alltid skal gjere eit enkeltvedtak når elevar/foreldre oppmodar om tiltak som gjeld det psykososiale miljøet. Skulen har altså ei vedtaksplikt. Dersom skulen ikkje oppfyller plikta til å gjere enkeltvedtak i saka, kan foreldra/eleven likevel klage som om det var gjort enkeltvedtak. Dersom skulen er i tvil om ei oppmoding frå eleven/foreldra er ei oppmoding etter 9a-3 tredje ledd, må skulen avklare dette. Skulen har ei rettleiingsplikt etter forvaltningslova 11. Saksbehandlingsreglane i forvaltningslova gjeld for saker etter 9a-3. 3.2 Dokumentasjon og vurderingar Fylkesmannen bad skuleleiinga svare på seks spørsmål om oppmodingar om tiltak og saksbehandlinga knytt opp mot dette: 1. Har elevar eller foreldre bedt om tiltak knytt til det psykososiale miljøet dei siste to åra? 2. Er det fatta enkeltvedtak med heimel i 9a-1, jf. 9a-3 tredje ledd? 3. Er det i vedtaket eksplisitt opplyst om retten til eit godt psykososialt miljø er oppfylte eller ikkje? 4. Inneheld enkeltvedtak grunngiving der det blir vist til a. heimelen for enkeltvedtaket? b. faktiske forhold som er lagt til grunn? c. kva omsyn som er vektlagte? 5. Inneheld enkeltvedtaket informasjon om a. klagerett? b. klagefrist? c. klageinstans? d. Informasjon om at klagen skal sendast til skulen? 6. Inneheld enkeltvedtaket/avgjerda om tiltak informasjon om retten etter forvaltningslova 18, jf. 19 til å sjå dokumenta i saka? Gimle skule Dokumentasjon Fylkesmannen har motteke atten enkeltvedtak, fire av dei er frå skuleåret 2014-2015. 4
I vedtaket datert 17.12.14 konkluderer skulen med at eleven sin rett til eit godt psykososialt miljø er oppfylt. Det står at skulen «vurderer det slik at sjølv om desse episodane har vore utrivelege, har XXX eit godt psykososialt miljø.» Fylkesmannen si vurdering av dei fire enkeltvedtaka frå 2014-2015 Det blir i vedtaka vist til heimelen for vedtaket, dvs. 9a-1, jf. 9a-3 tredje ledd. Innhaldet i 9a-1 og 9a-3 er gitt att. Det er i vedtaka eksplisitt opplyst om eleven sin rett til eit godt psykososialt miljø er oppfylt eller ikkje. Det går fram av vedtaka kva som har skjedd og kva omsyn skulen har lagt vekt på. Om vedtaket datert 17.12.14: Når skulen, etter å ha vurdert oppmodinga, konkluderer med at det ikkje skal settast inn tiltak knytte til det psykososiale miljøet, må skulen i vedtaket grunngi kvifor han meiner at denne eleven sin rett til eit godt psykososialt miljø som fremjar helse, trivsel og læring er oppfylt. Vedtaka inneheld informasjon om klageretten, klagefristen og kor klaga skal sendast. Vedtaka inneheld ikkje informasjon om klageinstans. Klageinstans er Fylkesmannen i Telemark. Vedtaka inneheld ikkje informasjon om retten etter forvaltningslova 18, jf. 19 til å sjå dokumenta i saka. 3.3 Fylkesmannen sin konklusjon Fyresdal kommune Gimle skule oppfyller ikkje alle krava i opplæringslova og forvaltningslova når det gjeld å fatte enkeltvedtak. 4. Det systematiske arbeidet ved skulane knytte opp mot 9a-3 andre og tredje ledd varslingsplikta og vedtaksplikta 4.1 Rettslege krav 9a-4, Systematisk arbeid for å fremje helsa, miljøet og tryggleiken til elevane (internkontroll) Skolen skal drive eit kontinuerleg og systematisk arbeid for å fremje helsa, miljøet og tryggleiken til elevane, slik at krava i eller i medhald av dette kapitlet blir oppfylte. Skoleleiinga har ansvaret for den daglege gjennomføringa av dette. Arbeidet skal gjelde det fysiske så vel som det psykososiale miljøet. 9a-3 første ledd, Det psykososiale miljøet Skolen skal aktivt og systematisk arbeide for å fremje eit godt psykososialt miljø, der den enkelte eleven kan oppleve tryggleik og sosialt tilhør. Det systematiske skulemiljøarbeidet skal sikre at elevane sin rett blir oppfylt ved at skulen arbeider kontinuerleg og systematisk for eit godt skulemiljø. Det avgjerande er at skulemiljøarbeidet er eigna til å sikre elevane eit godt psykososialt miljø og at brot på retten til eit godt miljø blir oppdaga og handtert på ein effektiv måte. Føremålet med skulen sine plikter etter 9a-4 er å sikre at uønskt/krenkjande åtferd blir oppdaga og teke hand om tidleg. Ein naudsynt føresetnad for det systemretta arbeidet er at skulen overfører krava i kapittel 9a til konkrete mål og handlingar. Skulen må ha planar og rutinar for korleis elevane sin rett skal oppfyllast. 5
Skuleeigar, skulen og dei tilsette pliktar å sikre elevane sin individuelle rett etter 9a-1 gjennom individuelt retta arbeid. Det individretta arbeidet ved skulen er regulert i 9a-3 andre og tredje ledd i opplæringslova. Varslingsplikta Dersom ein tilsett ved skolen, får kunnskap eller mistanke om at ein elev blir utsett for krenkjande ord eller handlingar, skal rektor varslast. Skulen, ved skuleleiinga, pliktar å undersøkje saka ytterlegare dersom det er behov for dette, og setje i verk eigne tiltak. 9a-3 andre ledd plikten til å undersøke, varsle og gripe inn Dersom nokon som er tilsett ved skolen, får kunnskap eller mistanke om at ein elev blir utsett for krenkjande ord eller handlingar som mobbing, diskriminering, vald eller rasisme, skal vedkommande snarast undersøkje saka og varsle skoleleiinga, og dersom det er nødvendig og mogleg, sjølv gripe direkte inn. Skulen og alle dei tilsette sine må ha ei felles forståing av når det skal varslast, og korleis varslinga skal skje. Rutinane for varsling til skuleleiinga må innarbeidast i internkontrollen etter 9a-4. jf. 9a-3 fyrste ledd. Vedtaksplikta Skulen er pålagd å behandle oppmodingar frå elevar eller foreldre som gjeld det psykososiale miljøet etter reglane om enkeltvedtak i forvaltningslova. 9a-3 tredje ledd Eleven/ foreldra sin rett til å be om tiltak og saksbehandlinga ved skulen Dersom ein elev eller forelder ber om tiltak som vedkjem det psykososiale miljøet, deriblant tiltak mot krenkjande åtferd som mobbing, diskriminering, vald eller rasisme, skal skolen snarast mogleg behandle saka etter reglane om enkeltvedtak i forvaltningslova. Om skolen ikkje innan rimeleg tid har teke stilling til saka, vil det likevel kunne klagast etter føresegnene i forvaltningslova som om det var gjort enkeltvedtak. Skulen må ha skriftlege rutinar for korleis oppmodingar om tiltak skal behandlast, og desse må innarbeidast i internkontrollen etter 9a-4. jf. 9a-3 fyrste ledd. Det må gå fram av rutinen kven som har oppgåva med å handtere oppmodingane, kven som har i oppgåve å fatte enkeltvedtak på skulen sin vegner, og kven som har oppgåva med å handtere og vidaresende ei eventuell klagesak frå eleven eller foreldra. 4.2 Dokumentasjon og vurderingar Fylkesmannen bad skuleleiinga svare på spørsmål om skriftlege rutinar for varsling til skuleleiinga og for korleis oppmodingar om tiltak skal behandlast: 1. Har skulen ein skriftleg rutine for varsling til skuleleiinga dersom ein tilsett får kunnskap eller mistanke om at ein elev blir utsett for krenkjande ord eller handlingar? 2. Varetek denne rutinen krava knytte til varsling i opplæringslova 9a-3 andre ledd? 3. Har skulen ein skriftleg rutine/plan for korleis oppmodingar om tiltak skal behandlast? 4. Varetek denne rutinen/planen krava til saksbehandling i opplæringslova 9a-3 tredje ledd? 6
Gimle skule Varslingsplikta skriftlege rutinar Dokumentasjon o Skulen har sendt «Plan for psykososialt miljø på Gimle skule». I punkt 8 «Handlingsplikt» er 9a-3 andre ledd gitt att, og det blir vist til vedlegg 2. o Vedlegg 2 er «Plan for mobbehandtering». Der står det at kontaktlærar handterer saka ved mistanke om mobbing, og kontaktlærar/sosiallærar/ leiinga når «mobbing avdekkast». o Skulen har eit skjema «Meldeskjema om bekymring for elevens psykososiale skulemiljø». Rektor skriv i eigenvurderingsskjemaet at vi «har ikkje motteke skriftlege varsel på meldeskjema, bare munnlege varsel.» Fylkesmannen si vurdering o Skulen og alle dei tilsette sine må ha ei felles forståing av når det skal varslast, og korleis varslinga skal skje. Det står ikkje noko om når skuleleiinga skal varslast eller korleis varsling skal skje i «Plan for psykososialt miljø på Gimle skule» eller i «Plan for mobbehandtering». o «Meldeskjema om bekymring for elevens psykososiale skulemiljø» er i praksis ikkje i bruk. Ordet «bekymring» i tittelen er misvisande; dei tilsette skal varsle skuleleiinga når dei får mistanke eller kunnskap om at ein elev blir utsett for krenkjande ord eller handlingar, uavhengig av om dei er bekymra eller ikkje. o Rutinane i «Plan for psykososialt miljø på Gimle skule» varetek ikkje krava knytte til varsling i opplæringslova 9a-3 andre ledd. Oppmodingar om tiltak og vedtaksplikta Dokumentasjon o Skulen har sendt «Plan for psykososialt miljø på Gimle skule». o Det står i punkt 9 i planen at skulen skal fatte einskildvedtak når føresette eller elvar kjem med eit ynskje om tiltak eller forslag til tiltak. o Det står vidare at: «skulen oppmodar om, dersom saka er av slik alvor, å levere ei skriftleg melding om tiltak (sjå vedlegg 1). Skriftleg melding vil alltid utløyse einskildvedtak.» Dersom føresette /elev kjem med ei bekymringsmelding, har skulen «informasjonsplikt om retten til tiltak, einskildvedtak og klagerett. Skulen spør om føresette ynskjer vedtak om tiltak, eller om dei vil at skulen i fyrste omgang undersøkjer saka, og ser kva som kjem fram i den fasen. Partane skal saman vurdere alvorsgraden, og utifrå desse vurderingane avgjere om det skal lagast einskildvedtak eller ikkje.» o I vedlegg 2 «Plan for mobbehandtering» står det at det skal fattast enkeltvedtak dersom ein elev eller forelder ber om tiltak som vedkjem mobbing. o Skulen har eit skjema «Meldeskjema om bekymring for elevens psykososiale skulemiljø», der eit av spørsmåla er: «Kva dreiar bekymringa seg om? (mobbing, vald, rasisme, diskriminering, utestenging)». Fylkesmannen si vurdering o Det står i «Plan for psykososialt miljø på Gimle skule» at skulen skal spørje dei føresette om dei ynskjer vedtak om tiltak, eller om dei vil at skulen i fyrste omgang skal undersøkje saka. Det står vidare at partane saman skal vurdere alvorsgraden og utifrå desse vurderingane avgjere om det skal lagast enkeltvedtak eller ikkje. Dette er ikkje i samsvar med opplæringsloven 9a-3 tredje ledd. Skulen blir i 9a-3 tredje ledd pålagde å behandle oppmodingar frå elevar eller foreldre som vedkjem det psykososiale miljøet etter reglane om 7
enkeltvedtak i forvaltningslova. Dette gjeld uavhengig av om oppmodinga er skriftleg eller munnleg. Skulen skal alltid undersøkje saka; det følgjer av forvaltningslova 17 «(forvaltningsorganets utrednings- og informasjonplikt)». Når skulen får ei munnleg eller skriftleg oppmoding, må skulen snarast mogeleg ta stilling til om eleven sin rett til eit godt psykososialt miljø er oppfylt, og eventuelt kva tiltak som skal setjast i verk. Det blir understreka at skulen alltid skal fatte enkeltvedtak når elevar eller foreldre ber om tiltak som vedkjem det psykososiale miljøet. Skulen har ei vedtaksplikt. o Det står ikkje noko i planane om kven som skal handtere oppmodingar, kven som skal gjere enkeltvedtak og kven som handtere og vidaresende ei eventuell klage frå eleven eller foreldra. o Ordet «bekymring» i «Meldeskjema om bekymring for elevens psykososiale skulemiljø» er misvisande; ein elev eller forelder kan godt be om tiltak som vedkjem det psykososiale miljøet utan å vere bekymra. o Rutinane i «Plan for psykososialt miljø på Gimle skule» varetek ikkje krava knytte til saksbehandling i opplæringslova 9a-3 tredje ledd. 4.3 Fylkesmannen sin konklusjon Fyresdal kommune Gimle skule sine skriftlege rutinar varetek ikkje krava i lova når det gjeld varsling til skuleleiinga og handtering av oppmodingar om tiltak. 5. Kommunen sitt system for å sikre at krava i opplæringslova 9a-3 blir oppfylt 5.1 Rettslege krav Opplæringslova 13-10 andre ledd er ei overordna føresegn som pålegg skuleeigar å ha eit forsvarleg system for oppfølging av alle lovkrav. Kommunen som skuleeigar er dermed øvste ansvarlege for at skuleleiinga ved kvar enkelt skule oppfyller krava og pliktene i kapittel 9a. 13-10 andre og tredje ledd system for vurdering og oppfølging av resultat Kommunen skal ha eit forsvarleg system for vurdering av om krava i opplæringslova og forskriftene til lova blir oppfylte. Systemkravet inneber eit krav til aktiv, planmessig og kontinuerleg styring for å sikre at krava Kommunen i opplæringslova skal ha eit blir forsvarleg oppfylte i system kommunen. for å Dette følgje inneber opp resultata krav til frå rutinar dessefor kommunikasjon vurderingane og samhandling mellom kommuneadministrasjonen sentralt og skulane. Skuleeigar sitt system skal vere skriftleg for å sikre at systemet er robust mot endringar i personalet og i kommunane sin organisasjon. Det skal gå fram av systemet kva rutinar for kartlegging, vurdering, korrigering, kommunikasjon og samhandling som skal følgjast. Systemet skal vere eigna til å avdekkje forhold som er i strid med regelverket, og til å sikre at adekvate tiltak blir sette i verk når det blir brot avdekt på regelverket. Systemet må ha rutinar for innhenting og analyse av data frå skulane, og for vurdering av desse opp mot lovkrava. Systemet må sikre at brukarane har tilstrekkeleg kompetanse til å vurdere kva tiltak som kan settast inn, og rutinar for å vurdere om tiltaka verkar etter meininga. Systemet må gi retningslinjer for rapportering og informasjonsflydd i organisasjonen. 5.2 Dokumentasjon og vurderingar Fylkesmannen bad skuleeigar, dvs. kommunen, svare på fire spørsmål i eit eigenvurderingsskjema: 8
1. Har kommunen definert kva opplysningar som trengst for å vurdere om skulane oppfyller krava i opplæringslova 9a-3? 2. Har kommunen laga rutinar for å innhente desse opplysningane frå den einskilde skulen? 3. Har kommunen laga rutinar for korleis desse opplysningane skal behandlast/ bli vurdert? 4. Har kommunen laga rutinar for korleis desse vurderingane skal følgjast opp? Spørsmål 1 Har kommunen definert kva opplysningar som trengst for å vurdere om skulane oppfyller krava i opplæringslova 9a-3? Dokumentasjon Kommunen har sendt «Rapport tilsyn Gimle skule 2013/2014». I rapporten svarar rektor skriftleg på spørsmål som: «Har skulen planar og rutinar som sikrar aktivt og systematisk arbeide for å fremje det psykososiale miljøet?» «Har skulen fått krav om å rette på det fysiske eller psykososiale miljøet siste driftsår?» «Har det siste skuleår vore hendingar eller anna som gjer at skulen vil vurdere spesielle tiltak innafor det psykososiale miljøet?» «Dersom skulen får melding frå nokon i skulemiljøet, det vere elev, foreldre, tilsette om noko dei er uroa for har skulen rutinar for loggføring/journalføring av slike meldingar, og kva som vert gjort i slike høve?» Fylkesmannen si vurdering Fylkesmannen kan ikkje sjå av tilsynsrapporten at skuleeigar har kartlagt kva lovkrava i 9a-3 er, og spørsmåla i tilsynsrapporten kan derfor heller ikkje gi skuleeigar dei opplysningane han treng for å vurdere om skulen oppfyller krava. Fylkesmannen meiner at kommunen ikkje har definert kva opplysningar som trengst for å vurdere om skulen oppfyller krava i opplæringslova 9a-3. Spørsmål 2 Har kommunen laga rutinar for å innhente desse opplysningane frå den einskilde skulen? Dokumentasjon Kommunen viser i eigenvurderingsskjemaet til tilsynsrapporten. Fylkesmannen si vurdering Sidan skuleeigar ikkje har definert kva opplysningar som trengst for å vurdere om skulen oppfyller lovkrava i 9a-3, så har han heller ikkje rutinar for å innhente desse opplysningane. Spørsmål 3 Har kommunen laga rutinar for korleis desse opplysningane skal behandlast/ bli vurdert? Dokumentasjon Kommunen skriv i eigenvurderingsskjemaet : «Dei blir drøfta i personalmøte, elevrådet, FAU og SAMU.» Fylkesmannen si vurdering Fylkesmannen kan ikkje sjå at kommunen har dokumentert at den har rutinar som viser for korleis opplysningar frå skulen knytte til oppfylling av krava i 9a-3, skal behandlast/vurderast på kommunenivå. 9
Spørsmål 4 Har kommunen laga rutinar for korleis desse vurderingane skal følgjast opp? Dokumentasjon Det står i tilsynsrapporten at om det vert avdekka avvik frå lovkrava, er det kommunalsjefen sitt ansvar å «syte for at endringar vert gjennomførte». Kommunen skriv i eigenvurderingsskjemaet: «Det er rektor sitt ansvar å ta tak i område som må utbetrast.» Fylkesmannen si vurdering Fylkesmannen kan ikkje sjå at kommunen har dokumentert at den har rutinar som viser for korleis vurderingar knytte til lovkrava i 9a-3, skal følgjast opp på kommunenivå. 5.3 Fylkesmannen sin konklusjon Fyresdal kommune har ikkje eit forsvarleg system for vurdering og oppfølging av om skulen oppfyller krava i opplæringslova 9a-3, jf. opplæringslova 13-10 fyrste og andre ledd. 6. Frist for retting av lovbrot Fylkesmannen har i kapittel 3-5 konstatert lovbrot. I denne rapporten får Fyresdal kommune frist til å rette det ulovlege forholdet, jf. kommunelova 60 d. Det er kommunen som har det overordna ansvaret for at krava i opplæringslova blir etterlevde, jf. opplæringslova 13-10 fyrste ledd. Kommunen er derfor adressat for denne tilsynsrapporten. Frist for retting er 30. april 2015. Kommunen må innan denne datoen sende dokumentasjon frå skuleeigar og Gimle skule som viser at lovbrota er retta. Kva skriftlege rutinar/prosedyrar som skal sendast inn, går fram av korreksjonspunkta under kvart av pålegga som er aktuelle å vedta etter rettefristen. Dersom forholdet ikkje er retta innan den fastsette rettefristen, vil Fylkesmannen vedta pålegg om retting. Eit eventuelt pålegg om retting vil ha status som enkeltvedtak og kan klagast på etter reglane for dette i forvaltningslova, jf. forvaltningslova kapittel VI. Følgjande pålegg er aktuelle å vedta etter utløpet av rettefristen i den endelege tilsynsrapporten: 1. Fyresdal kommune skal syte for at Gimle skule behandlar oppmodingar om tiltak ved å gjere enkeltvedtak etter reglane om dette i forvaltningslova. Fyresdal kommune må i denne samanhengen sjå til at Gimle skule: a. viser i grunngivinga at han har lagt til grunn elevens subjektive oppleving av det psykososiale miljøet i vurderinga av om retten er oppfylt. b. gir informasjon om kven som er klageinstans. c. viser til forvaltningslova 18, jf. 19, når det gjeld retten til å sjå dokumenta i saka. 2. Fyresdal kommune skal sjå til at Gimle skule arbeider aktivt, systematisk og kontinuerleg for å forhindre at uønskt åtferd oppstår. Fyresdal kommune må i denne samanhengen sjå til at Gimle skule: a. utarbeider rutinar for kva dei tilsette skal gjere om dei får kunnskap eller mistanke om at ein elev blir utsett for krenkjande ord eller handlingar og sikrar at rutinane er i samsvar med krava i 9a-3 andre ledd i opplæringslova. 10
b. utarbeider rutinar for korleis oppmodingar om tiltak skal behandlast. Det skal gå fram av rutinen kven som skal handtere oppmodingar, kven som skal gjere enkeltvedtak og kven som handtere og vidaresende ei eventuell klage frå eleven eller foreldra. 3. Fyresdal kommune må etablere eit forsvarleg system for vurdering og oppfølging av om Gimle skule oppfyller krava i opplæringslova 9a-3, jf. opplæringslova 13-10 fyrste og andre ledd. Fyresdal kommune må i denne samanhengen: a. lage ein rutine/plan for vurdering og oppfølging av Gimle skule som sikrar at skulen oppfyller krava i opplæringslova 9a-3. Det skal gå fram av rutinen/planen - kva opplysningar som skal innhentast frå skulen - korleis dette skal skje - korleis dei innhenta opplysningane skal behandlast - korleis dei vurderingane som kommunen gjer, skal følgjast opp. Kommunen har rett til innsyn i saksdokumenta, jf. forvaltningslova 18. Solrun Nistad Fleischer utdanningsdirektør Reidun Fløseth tilsynsleiar 11
Vedlegg 1: oversikt over innsendt dokumentasjon Frå Fyresdal kommune: Eigenvurderingsskjema for skuleeigar Rapport tilsyn Gimle skule 2013/2014 Frå Gimle skule: Eigenvurderingsskjema for skuleleiinga Oppdatert eigenvurderingsskjema for skuleleiinga Plan for psykososialt miljø på Gimle skule Enkeltvedtak o Fire frå skuleåret 2014-2015 o Ti frå skuleåret 2013-2014 o Fire frå skuleåret 2012-2013 12