Godkjenning av intensjonsavtale mellom Hornindal og Stryn kommunar.

STRYN KOMMUNE MØTEBOK SAK ORGAN MØTEDATO FO 004/16 Formannskapet 20.01.2016 KS 007/16 Kommunestyret 11.02.2016 Avgjerd av: Kommunestyret Ref: 14/768-73 Ark. 002 &23 Sakshandsamar: Per Kristian Storevik Godkjenning av intensjonsavtale mellom Hornindal og Stryn kommunar. Presentasjon: Saka om kommunereform har tidlegare vore handsama av kommunestyret i sakene nr 069/14 og 005/15. Vedtaket i sak nr 069/14 hadde følgjande ordlyd: 1. Stryn kommune viser til kommuneproposisjonen 2015 med underliggande dokumentasjon om målsettinga med og dei økonomiske verkemidla knytt til kommunereforma. Stryn kommune skal vere ein konstruktiv part i lokale og regionale prosessar. 2. Stryn kommune merkar seg dei føringar som ligg i føresetnadene og vil samanhalde med lokalpolitiske prioriteringar medverke til å realisere desse. Det er avgjerande at framtidig inntektssystem sikrar økonomisk berekraft og handlingsrom for den nye kommunen som Stryn vil vere ein del av. 3. Stryn kommune er oppteken av at innbyggarane vert godt opplyst om kommunereforma og får høve til å engasjere seg, og innbyggarundersøkingar el.l. bør vurderast som ein del av dette slik at avgjerdsstyresmaktene får eit best mogleg avgjerdsgrunnlag når endelege vedtak skal fattast. Ved forslag om større endringar bør rådgjevande folkerøysting vurderast. 4. Med tilvising til samrøystes vedtak i Hornindal kommunestyre den 15.09.2014 ynskjer Stryn kommune å inngå drøftingar med Hornindal kommune der målsettinga er å sjå desse to kommunane under eitt anten som ein eigen kommune eller som del av ei større samanslåing. 5. Til å gjennomføre desse drøftingane blir det nedsett ei arbeidsgruppe beståande av ordførar, varaordførar, rådmann, økonomisjef og ein tillitsvald. 6. Formannskap/kommunestyre skal haldast løpande orientert om framdrifta i drøftingane etter pkt 4. 7. Konklusjonane frå arbeidsgruppa, jfr pkt 5, skal danne grunnlaget for vedtak i kommunestyra i Stryn og Hornindal. 8. Med tanke på ein mogleg vidare prosess der også andre kommunar blir inviterte til drøftingar, må konklusjonane frå arbeidsgruppa vere klare innan utgangen av november -14. 1

Arbeidet med reformen vart deretter avgrensa til følgjande modellar i k. sak nr. 005/15: 1. Stryn kommune viser til dei utgreiingskonstellasjonane som den felles arbeidsgruppa for Hornindal og Stryn kommunar har drøfta og ynskjer følgjande samanslåingsalternativ utgreidde: A. Dagens situasjon 0-alternativet B. Utgreiing av samanslåing Hornindal og Stryn. C. Utgreiing av samanslåing Hornindal, Stryn og Stranda. D. Utgreiing av samanslåing Hornindal, Stryn, Stranda og Norddal. E. Utgreiing av samanslåing Hornindal, Stryn, Ørsta og Volda. F. Utgreiing av samanslåing Hornindal, Stryn og Gloppen. G. Utgreiing av samanslåing Hornindal, Stryn og Eid. H. Utgreiing av samanslåing Hornindal, Stryn, Eid og Gloppen. 2. Det vil vere ein føresetnad for at utgreiingsarbeid blir iverksett at kommunane som inngår i dei skisserte utgreiingsmodellane ovanfor samtykkjer i dette og ser modellen som eit realistisk alternativ til dagens situasjon. 3. Stryn kommune vil oppmode Nordfjordrådet om å ta initiativ til at det vert utarbeidd ein utgreiingsmal som kan nyttast felles for dei ulike utgreiingane. 4. Kvar utgreiing blir prosjektorganisert og Stryn kommune vil oppmode om at det i størst mogleg utstrekning blir etterstreba å nytte same prosjektleiar, og at det blir ein gjennomgåande representasjon i dei styrande organa i prosjekta. 5. Utgreiingane bør ligge føre hausten 2015 slik at dei kan danne grunnlaget for kunnskapsbaserte innbyggarundersøkingar. Den politiske slutthandsaminga vil dermed kunne skje våren 2016. 6. Stryn kommune vel ein prosess som tek sikte på kommunestyrevedtak før sommaren 2016. Hornindal og Stryn kommunar utnemnde tidleg ei felles arbeidsgruppe som saman har hatt møte både internt og med andre kommunar. Det vart etablert eit reformprosjekt beståande av kommunane Gloppen, Eid, Hornindal og Stryn. Det vart utarbeidd ei prosjektmandat og tilsett prosjektleiar våren 2015. Det føreligg ei utgreiing «Ein ny og større kommune i midtre og indre Nordfjord?». Denne utgreiinga byggjer i hovudsak på utgreiingsmandat dat. 19.03.2015 «Gloppen-Eid-Hornindal-Stryn. Ein ny kommune? Kva trengst av grunnlagsmateriale for å kunne ta stilling til dette?». I tillegg er det henta relevant materiale/innhald frå andre utgreiingar i tilknyting til kommunereforma kringom i landet. Det vart vidare gjennomført ei grov innbyggarundersøking i alle Nordfjordkommunane i august -15. Aktuelt sakstilfang: Vedlagt saka: Framlegg til felles intensjonsavtale om samanslåing av Hornindal og Stryn kommunar. 2

Faktagrunnlaget «Ein ny og større kommune i midtre og indre Nordfjord» med vedlegg. Brev dat. 11.01.2016 frå fagorganisasjonane i Stryn Saksopplysningar: Det har vore arbeidd med alle dei alternativa som vart skisserte i k.sak nr. 005/15, og resultatet av dette vil bli gjennomgått nedanfor: A. Dagens situasjon 0-alternativet: Mykje har skjedd etter at dei opphavelege skissene til kommunereform vart presenterte av styresmaktene. Regjeringa sitt utgangspunkt bygde i stor utstrekning på Ekspertutvalet sine utgreiingar. I ettertid er signala blitt endra på ein slik måte at kravet til kommunestorleik er dempa ned. Det er i ettertid også kome ei eiga melding om oppgåveoverføring til kommunane, og innhaldet i denne byggjer i liten utstrekning opp under behovet for ei radikal reform med sikte på store eigningar. Før jul 2015 vart forslaget til nytt inntektssystem gjeldande f.o.m. 2017 lagt fram. Dette inneber ein del endringar først og fremst for dei minste kommunane, men sidan framlegget ikkje er økonomisk kvantifisert, er dei økonomiske utslaga i skrivande stund vanskeleg å vurdere. Konklusjonen er at for Stryn kommune sin del vil 0-alternativet vere mogleg å legge til grunn i framhaldet, men også for Stryn sin del vil eit større folketalsunderlag vere positivt. Sjølv om Stryn kommune er stor i utstrekning, er det relativt lite areal som kan nyttast til ulike former for utbygging. I Hornindal tykkjest potensialet for dette relativt sett å vere større slik at ein ny kommune samla vil vere betre i stand til å møte ei positiv utvikling. B. Utgreiing av samanslåing Hornindal og Stryn. Det føreligg framlegg til intensjonsavtale om samanslåing av kommunane Hornindal og Stryn. Framlegget har tilslutning frå den felles arbeidsgruppa som har arbeidd med dette. Av dei nemnde utgreiingsmodellane er dette den einaste intensjonsavtalen som pr dags dato føreligg. Innhaldet vil bli gjennomgått og kommentert under. C. Utgreiing av samanslåing Hornindal, Stryn og Stranda. Det har vore gjennomført fleire møte mellom Hornindal/Stryn og Stranda både politisk og administrativt. Konklusjonen har vorte at det pr dags dato ikkje er grunnlag for å gå vidare med utarbeiding av ein felles intensjonsavtale innanfor denne konstellasjonen. Ei utfordring i drøftingane har vore at prosessen i Sogn og Fjordane og Møre og Romsdal har vore asynkron, og dette har medført at framdrifta i arbeidet har vore ulik i dei to fylka. Stranda kommunestyre gjorde i sak nr 118/15 følgjande vedtak: «1. Stranda kommune går ikkje vidare i arbeidet med ei storkommune på Nordre Sunnmøre, det same gjeldande Stryn og Hornindal. 2. Stranda kommune går inn i samtaler gjennom forhandlingsmøte med Sykkylven kommune. 3. Stranda kommune går inn i samtaler gjennom felles formannskapsmøte med Norddal kommune. 3

«4. Stranda kommune utgreier 0-alternativet. 5. Samansetting av prosjektgruppe: Jostein Dalen, Ole Jørgen Sve, Amalie Birkhol, Elisabeth Opsvik, tillitsvalde, rådmannen (2). 6. Samansetting av forhandlingsutval: Jan Ove Tryggestad, Frank Sve, Arild Ringdal, Elisabeth Opsvik. Vedtaket ovanfor inneber at vidare drøftingar med Stranda kommune kan skrinleggast. D. Utgreiing av samanslåing Hornindal, Stryn, Stranda og Norddal. Som ein del av utgreiingane etter pkt C ovanfor, var også Norddal i innleiande fase ein del av dette, men det framkom tidleg at Norddal ikkje såg på ei kommuneeining beståande av dei 4 kommunane som eit aktuelt alternativ å gå vidare på for deira del. E. Utgreiing av samanslåing Hornindal, Stryn, Ørsta og Volda. Det har vore fleire rundar med samtaler mellom desse kommunane utan at det så langt har medført nokon konklusjon. Asynkron framdrift mellom prosessane i dei to fylka er ein del av forklaringa. Drøftingane innanfor dette utgreiingssamarbeidet er så langt ikkje sluttført, og det er heller ikkje gjort grunnarbeid/faktasamanstilling for ei slik kommuneeining. Det er difor for tidleg å trekkje klåre konklusjonar om dette på noverande tidspunkt. F. Utgreiing av samanslåing Hornindal, Stryn og Gloppen: Frå Gloppen kommune er det gjeve melding om at ei slik kommuneeining er uaktuell frå deira side. G. Utgreiing av samanslåing Hornindal, Stryn og Eid. Frå Eid kommune er det gjeve melding om at ei slik kommuneeining er uaktuell frå deira side. H. Utgreiing av samanslåing Hornindal, Stryn, Eid og Gloppen. Det er denne konstellasjonen det har vore arbeidt mest med utan at det vart oppnådd semje om ein felles intensjonsavtale. Ordførarane i dei 4 kommunane har sendt ut følgjande felles pressemelding: «Dei politiske forhandlingsutvala i Stryn, Hornindal, Eid og Gloppen er samde om å avslutte arbeidet med intensjonsavtale om å slå saman dei fire kommunene til éi felles kommune, og i staden arbeide vidare med intensjonsavtaler om å slå saman kommunene Stryn/Hornindal og Gloppen/Eid. Dei fire kommunane vil samtidig gå vidare med å utarbeide ei sterk samarbeidsavtale for dei nye kommunane i midtre/indre Nordfjord som utvidar samarbeidet både om kommunale tenester, samfunns- og næringsutvikling. Målet er å få dette samla avtaleverket på plass i løpet av januar 2016. - Sjølv om vi ikkje ved dette høvet kjem i mål med å bli éi felles kommune, er vi heilt samde om at tida er inne for å styrke samarbeidet og stå saman i viktige saker for regionen seier ordførarane Sven Flo i Stryn, Stig Olav Lødemel i Hornindal, Leidulf Gloppestad i Gloppen og Alfred Bjørlo i Eid. 4

- Stryn, Hornindal, Eid og Gloppen er ein region med over 20.000 innbyggjarar og eit sterkt næringsliv. Vi har eit stort uforløyst potensiale for vidare vekst som vi må stå sterkare saman om å utvikle - også i samarbeid med resten av Nordfjord og regionar nord og sør for oss. Vi vil difor parallelt med forhandlingane om intensjonsavtaler Eid/Gloppen og Stryn/Hornindal utarbeide ein felles samarbeidsplattform for alle fire kommunane. - Det felles utgreiingsarbeidet vi har lagt ned i samband med kommunereformen har i seg sjølv bunde oss sterkare saman. Kommunereformprosessen mellom oss fire saman har difor vore viktig og matnyttig for vidare utvikling av regionen, sjølv om vi ikkje no vil gå vidare med planer om å slå oss saman til éi kommune med eitt felles kommunesenter, seier ordførarane. «Det som etter dette står att som aktuelle samanslåingsalternativ i midtre/indre Nordfjord er Hornindal/Stryn og Gloppen/Eid i tillegg til 0-alternativa. I tillegg er tilhøvet til Ørsta/Volda uavklara i skrivande stund. Det er i vedtaket i k. sak nr. 069/14 sagt at «ved forslag om større endringar bør rådgjevande folkerøysting vurderast». I k. sak nr 005/15 er det i vedtaket sagt at «Utgreiingane bør ligge føre hausten 2015 slik at dei kan danne grunnlaget for kunnskapsbaserte innbyggarundersøkingar. Den politiske slutthandsaminga vil dermed kunne skje våren 2016». Det har vore drøfta kva som vil vere mest tenleg av innbyggarundersøking kontra folkerøysting. Det er etter rådmannen si oppfatning tvillaust at ei innbyggarundersøking som i undersøkingsgrunnlaget «tek opp i seg» alle grupper (kjønn, alder, geografi mv.v.) vil kunne vere meir representativ enn ei folkerøysting. Låg og «skeiv» valdeltaking vil truleg gje eit resultat som vil vere mindre representativt enn ved bruk av innbyggarundersøking. Fagorganisasjonane har merknader til spesielt pkt 4 og pkt 10 i avtaleframlegget. Det er i intensjonsavtalen lagt vekt på at administrasjonen skal fordelast mellom dei tidlegare kommunesentra. Kva som konkret blir resultatet etter at fellesnemnda har skissert ei ny organisering frå 2020 gjenstår å sjå, men det er ein klår intensjon om ei mest mogleg fornuftig fordeling av administrative funksjonar. Etablering av fellesnemnd og mandatet for denne framgår av Inndelingslova av 15.06.2001 26. Dei detaljerte presiseringane kring tilhøvet til tilsette vil bli regulert her. Slik rådmannen ser det, vil det ikkje vere mogleg å legge til grunn ein detaljeringsgrad i tilknyting til pkt 10 i avtaleframlegget som fagorganisasjonane no spelar inn. Endra organisering f.o.m. 2020 vil kunne gje svar på dette herunder tiltak som skal settast i verk for å møte dei utfordringane som ei endra organisering måtte innebere. Vurdering: Den politiske og administrative leiinga i Hornindal og Stryn kommunar har i fellesskap utarbeidd det vedlagde intensjonsavtaleforslaget. I tillegg har også tillitsvalde vore med i arbeidet. Etter eit ev fellesvedtak i juni 2016 skal det etter Inndelingslova oppnemnast ei fellesnemnd som skal førebu den formelle samanslåinga f.o.m. 01.01.2020. Intensjonsavtalen vil tene til å legge føringar for det arbeidet og den retninga fellesnemnda skal legge til grunn for sitt arbeid. Slik rådmannen ser det, vil kommunane Hornindal og Stryn saman utgjere ei godt arrondert kommuneeining. Kommunane har gjennom mange år hatt mange samanfallande interesser, 5

og begge bygger på ein felles kultur og identitet. I tillegg vil sjølve samanslåingsprosessen vere oversiktleg. Med tilvising til det som framgår ovanfor vil rådmannen hevde at ei grundig innbyggarundersøking vil nå ut til fleire grupper blant innbyggarane enn ei folkerøysting ved at innbyggarundersøkingar baserer seg på eit representativt utval blant innbyggarane. Forsking viser at valdeltakinga blant dei yngre med røysterett (inntil 30 år) er langt lågare enn hos eldre innbyggarar, og dermed blir representativiteten med ei folkerøysting tvilsam. Det føreliggande framlegg til intensjonsavtale er balansert i den forstand at partane har ein klår intensjon om å halde oppe eit desentralisert tenestemønster. Ei samanslåing vil såleis ikkje representere noko retningsskifte i høve til etablert praksis. Det er ein føresetnad at begge kommunestyra gjer samanfallande vedtak. I motsett fall føreligg det ingen omforent avtale. Dersom det er tilhøve ved avtalen som kommunestyra ynskjer nærare belyst og/eller endra, vil saka vere betre tent med utsetting enn av realitetsforskjellar i mellom vedtaka. Partane vil i ein slik situasjon måtte setje seg saman og vurdere endringar i fellesskap før saka igjen kjem til politisk realitetshandsaming. Rådmannen sitt framlegg til vedtak: 1. Framlegget til intensjonsavtale om samanslåing av Hornindal og Stryn kommunar blir godkjent. 2. Det skal i løpet av våren gjennomførast innbyggarundersøking i dei to kommunane der den føreliggande intensjonsavtalen blir vurdert opp mot 0-alternativet (oppretthalding av dagens kommunestruktur). 3. Prosessen mot Ørsta/Volda skal halde fram inntil partane har avklara posisjonane. Slike avklaringar må føreligge i god tid før ei innbyggarundersøking blir gjennomført slik at også dette kan inngå i undersøkinga dersom eit framforhandla avtaleframlegg føreligg. Handsaming i Formannskapet 20.01.2016. FO-004/16 Vedtak: Rådmannen sitt framlegg samrøystes tilrådd. Handsaming i Kommunestyret 11.02.2016. Sp v/per Kjøllesdal sette fram forslag om at pkt 3 i tilrådinga blir stroke. Han ynskte at det skulle haldast prøverøysting over dette framlegget. Ved prøverøystinga røysta 7 for framlegget frå Sp, medan 18 røysta mot. Sp v/per Kjøllesdal trekte deretter framlegget. Ordføraren fremja forslag om at pkt 1 skulle få følgjande ordlyd: 6

«Framlegget til intensjonsavtale om samanslåing av Hornindal og Stryn kommunar blir godkjent, bortsett frå at avgjerda om kommunenamnet blir utsett til seinare.» Ordføraren føreslo vidare at første setninga i pkt 3 skulle få følgjande ordlyd: «Prosessen mot Ørsta og/eller Volda skal halde fram inntil partane har avklara posisjonane.» KS-007/16 Vedtak: Det vart deretter røysta punktvis over tilrådinga frå formannskapet: Pkt. 1 med dei tillegg som framgår av forslaget til ordføraren vart samrøystes vedteke. Pkt 2 vart samrøystes vedteke i samsvar med tilrådinga frå formannskapet. Pkt 3 med endringsframlegg frå ordføraren vart samrøystes vedteke. Sign. Per Kristian Storevik - sekr.- Utskrift av endeleg vedtak vert sendt til: Hornindal kommune Fylkesmannen i Sogn og Fjordane 7