GLOPPEN KOMMUNE SAKSPAPIR SAKSGANG Styre, utval, komite m.m. Møtedato Saksnr Formannskapet 29.01.2015 022/15 Kommunestyret 02.02.2015 010/15 Avgjerd av: Formannskapet Saksbehandlar: Jan Kåre Fure Objekt: Arkiv: 002 Arkivsaknr.: 14/1737-33 Kommunereforma: Vidare deltaking i utgreiingsarbeidet i Sunnfjord Vedlegg: Dok.nr Tittel på vedlegg 239849 Mandat og spelereglar Sunnfjord 239444 Utfordringsdokument Frå tidlegare behandling av saka: Bakgrunn for saka: I kommunestyresak 80/14 vart slikt vedtak fatta: 1. ( ) 2. ( ) 3. Kommunestyret ber ordføraren, varaordføraren, ein tillitsvald og rådmannen arbeide vidare med saka, og i første omgang kome med framlegg om kva alternativ i Nordfjord og Sunnfjord som er aktuelle for Gloppen å utgreie nærare. Gloppen som eigen kommune er eit av dei alternativa som er med vidare. Det vidare utgreiingsarbeidet må ta utgangspunkt i kvaliteten i tenestetilbodet og korleis vi kan utvikle desse til å verta betre for innbyggarane. Dei tilsette skal ha god informasjon om arbeidet og dei tillitsvalde vert invitert til å delta i prosessen. Formannskapet skal vere styringsgruppe for arbeidet og kommunestyret skal informerast undervegs. 4. ( ) Saksutgreiing: Før kommunestyret gjorde sitt vedtak den 3. november i år fekk Gloppen ein invitasjon frå SiS-kommunane (Jølster, Førde, Gaular, Naustdal og Flora) om eit møte for å drøfta om Gloppen kan vere aktuell deltakar i det utgreiingsarbeidet SiSkommunane skal sette i gang. I tillegg til dette har Gloppen fått ei oppmoding frå Jølster om å vere med på utgreingane sørover. Ordføraren og rådmannen var med på SiS-møtet i Gaular 31. oktober i år. På møtet vart det presisert at eventuelt andre kommunar som ønskjer å vere med på utgreiingsarbeidet til SiS-kommunane må melde seg på innan 1. desember. SiS-
kommunane vil så ta stilling til «påmeldinga», truleg før jul. Endeleg påmelding må så gjerast i løpet av januar 2015, og denne påmeldinga må vere vedteken av kommunestyret. Utanom Gloppen er også Askvoll aktuelle for å slutte seg til SiS-kommunane sitt utgreiingsarbeid. Høyanger kommune har hatt møte med SiS-kommunane, men slik rådmannen har forstått det, kom det ikkje noko konkret ut av dette møtet. Opplegget for SiS-kommunane sitt arbeid med kommunereforma går fram av det vedlagde mandatet. Viss Gloppen kommune blir med i arbeidet, er det dette mandatet som gjeld. I mandatet er det m.a. ein fastsett tidsplan for arbeidet. Økonomiske konsekvensar for kommunen: Det følgjer av pkt 6 i mandatet for kommunereformarbeidet i Sunnfjord korleis dette skal handterast. Punktet lyder slik: Prosessen skal ha eige budsjett. Kommunane dekker kostnadane i fellesskap. Ved eventuell eigendel, vert halvparten dekt likt og den andre etter innbyggartal. Kvar kommune dekker arbeid og kostnader i eigen kommune eventuelt også reise og opphald. Dette gjeld og tilskot og kostnadar til å høyre innbyggarane. Eventuelle nye kommunar som kjem inn, skal dekke sine kostnader for heile prosessen. Dersom ein kommune går ut, får dei ikkje med seg noko av fellestilskotta. Utgangspunktet må vere at prosjektet får så mykje utgreiingsstøtte at kostnaden på kvar av kommunane ikkje blir vesentleg. Som sagt i budsjettframleget frå rådmannen, er det ikkje sett av kommunale midlar til arbeidet med kommunereforma. Dersom det er råd å seie noko meir konkret om kostnadene med å delta i SiS sitt utgreiingsarbeid, vil rådmannen sjølvsagt gjere dette i kommunestyresaka i januar 2015 der vi skal ta endeleg stilling til om vi skal vere med. Rådmannen si vurdering: Det ligg i kommunestyret sitt vedtak i sak 80/14 at vi skal utgreie ei eventuell kommunesamanslåing mot Sunnfjord. Det er ikkje andre reelle alternativ til dette no enn å takka ja til å vere med på SiS-kommunane si utgreiing. Så vil det vise seg truleg også gjennom det utgreiingsarbeidet som blir gjort i lag med SiS-kommunane om andre Sunnfjord-alternativ kan vere aktuelle for Gloppen sitt vedkomande. I møtet med SiS-kommunane den 31. oktober i år kom det fram at dei i alle fall skal greie ut to alternativ i Sunnfjord: med og utan Flora. Rådmannen vil åtvare mot at vi går inn i for mange alternative utgreiingar. Dette har vi kort og godt ikkje ressursar til. Også Fylkesmannen åtvarar mot dette, og han sa vel at det som hovudregel ikkje bør vere meir enn to alternativ. Rådmannen ber om formannskapet si godkjenning på at vi melder oss på SiSkommunane sitt utgreiingsarbeid.
Ei tilsvarande sak vil bli lagt fram så snart vi har klarlagt kva alternativ som er aktuelle å utgreie i «Nordfjord-alternativet». Ordførar og rådmann skal møte kommunane Eid, Stryn og Hornindal før formannskapet gjer sitt vedtak i denne saka. Gjennom drøftingane med desse kommunane vil det truleg bli avklara om heile Nordfjord er eit alternativ som alle Nordfjord-kommunane vil utgreie. RÅDMANNEN SI TILRÅDING: Gloppen formannskap viser til kommunestyret sitt vedtak i sak 80/14 og ber om at Gloppen kommune får vere med i prosessen som kommunane i SiS-samarbeidet har vedteke for sitt arbeid med kommunereforma. 19.11.2014 FORMANNSKAPET Desse dokumenta vart delt ut: Eit utkast til mandat for utgreiing av kommunereforma i Nordfjord datert 18. november 2014 Notat frå rådmannsmøte i SiS 14. november 2014. 120/14 VEDTAK: Gloppen formannskap viser til kommunestyret sitt vedtak i sak 80/14 og ber om at Gloppen kommune får vere med i prosessen som kommunane i SiS-samarbeidet har vedteke for sitt arbeid med kommunereforma. Vedtaket var samrøystes. Vidare behandling av saka: Etter at formannskapet gjorde sitt vedtak den 19. november i fjor har Gloppen kommune vore med i SiS-kommunane sitt arbeid med kommunereforma. Også kommunane Askvoll, Fjaler og Hyllestad har vore med på same måte som Gloppen. Arbeidet det er snakk om har i hovudsak vore å utarbeide eit såkalla «utfordringsdokument», som gjev grunnlaget for vidare framdrift i Sunnfjord-samarbeidet. Dette utfordringsdokumentet vart gjennomgått og drøfta på fellesmøtet i Førde den 23. januar i år mellom formannskapa i SiS-kommunane og dei fire andre kommunane som har meldt seg på. I tillegg til gjennomgangen av utfordringsdokumentet var føremålet med fellesmøtet i Førde at kommunane skulle få eit grunnlag til å avgjere om dei ville gå vidare i prosessen. Det er det denne saka dreier seg om. Rådmannen si vurdering: Når dette er skrive (27. januar 2015), har rådmannen ikkje motteke noko revidert utfordringsdokument for Sunnfjord-samarbeidet. Det kan hende at møtet i Førde gjev nokre endringar i dokumentet, men neppe på hovudinnhaldet. Utfordringsdokumentet vil sjølvsagt bli lagt fram i «siste versjon» så fort det let seg gjere.
Konklusjonen på møtet i Førde er slik rådmannen oppfatta det at ingen av kommunane no vel å hoppe av prosessen i Sunnfjord. Fleire av kommunane, og mellom desse Gloppen, er skeptiske til ein stor-kommunane med alle dei ni som så langt er med. Viss alle kommunestyra no følgjer opp dei signala som kom fram på møtet (altså å gå vidare i prosessen), vil desse alternativa bli utgreidde: ei samanslåing av kommunane Jølster, Førde, Gaular og Naustdal (såkalla «liten SiS») ei samanslåing av kommunane Jølster, Førde, Gaular, Naustdal og Flora (såkalla «stor SiS» ei samanslåing av alle dei ni kommunane: Jølster, Førde, Gaular, Naustdal, Flora, Gloppen, Askvoll, Fjaler og Hyllestad. Parallelt med dette vil alle kommunane utanom «liten SiS» også vurdere andre alternativ. For Gloppen sitt vedkomande snakkar vi då om samanslåing mot ein eller fleire av kommunane Hornindal, Stryn og Eid. --- Sjølv om rådmannen ikkje ser føre seg ein kommune som strekkjer seg frå Myklebustdalen til Bulandet, vil eg ikkje tilrå at Gloppen tar sjansen på å trekkje seg frå Sunnfjord-utgreiinga no. Eg legg då vekt på at kommunestyret tidlegare har sagt at vi skal vurdere ei samanslåing sørover, og at vi ikkje har eit handfast alternativ mot resten av Nordfjord enno. Rådmannen legg sjølvsagt til grunn at eit slikt alternativ vil kome. Rådmannen vil også minne oss på at alternativet om å stå åleine ikkje må avskrivast. Det vil styrke dette alternativet viss vi konkluderer med at Gloppen skal halde fram som eigen kommune at vi har vurdert fleire andre alternativ. Vi må også ha i bakhovudet at dei andre kommunane i Sunnfjord-samarbeidet kan «velje oss vekk». Dei kan gjere det no, og dei kan gjere det seinare i prosessen. På same måte som vi kan «velje dei vekk». Det er likevel verd å merke seg at dei kommunane som no går vidare med Sunnfjordutgreiinga er med som likeverdige partar. Vi blir ikkje lenger nokon «observatør» eller «assosiert medlem» i samarbeidet slik vi har vore så langt. Mandatet som ligg til grunn for Sunnfjord-samarbeidet må naturlegvis endrast slik at alle kommunane står bak. Rådmannen har ikkje oppfatta det slik at nokon er usamd i dette. Rådmannen meiner det er grunn til å rekne med at det vidare utgreiingsarbeidet i Sunnfjord vil føre til at andre samanslåingsalternativ sørover kan kome opp. Sjølv om Gloppen naturleg vis ikkje kan seie noko konkret om kva alternativ vi helst vil ha no, ser ikkje rådmannen føre seg noko samarbeid sørover utan at dette inkluderer Jølster kommune. Sidan alle kommunestyra ikkje vil ha gjort sine vedtak når vårt kommunestyre må gjere sitt, meiner rådmannen at formannskapet må få ei fullmakt til å korrigere Gloppen kommune sitt vedtak på februar-møtet, viss føresetnadene for vår deltaking blir vesentleg endra. Eit døme på slike endra føresetnader kan vere at kommunestyret i Jølster no takkar nei til å vere med vidare. ---
Det er varsla frå SiS-sekretariatet at dei vil lage ei felles saksutgreiing for alle kommunane. Denne er ikkje klar. Det kan tenkjast at rådmannen vil endre si tilråding når vi har fått utkastet til felles saksutgreiing, med eventuelt oppdatert mandat og utfordringsdokument. RÅDMANNEN SI TILRÅDING: 1. Gloppen kommunestyre ber om at Gloppen får vere med vidare som likeverdig part i det utgreiingsarbeidet Sunnfjord-kommunane legg opp til med kommunereforma 2. Kommunestyret godkjenner utfordringsdokumentet i samarbeidet slik det ligg føre og mandatet som reformarbeidet byggjer med den føresetnaden at dette blir endra slik at alle deltakande kommunar blir behandla likeverdig 3. Dersom vedtaka i dei andre kommunane i samarbeidet endrar føresetnaden for Gloppen for å vere med i samarbeidet, får formannskapet fullmakt til å avgjere korleis Gloppen kommune då skal stille seg til Sunnfjord-utgreiinga. 29.01.2015 FORMANNSKAPET Framlegg frå Arnfinn Brekke (Krf): Gloppen kommunestyre takkar nei til å vere med vidare i utgreiingsarbeidet Sunnfjordkommunane legg opp til med kommunereforma. På bakgrunn av framlegget til felles saksutgreiing for kommunane i Sunnfjord-samarbeidet, som no ligg føre, endra rådmannen si tilråding i saka til: 1. I samband med arbeidet med ny kommunereform i regi av SiS, sluttar Gloppen kommunestyre seg til det vidare arbeidet med å lage eit utgreiingsprogram og intensjonsavtale for ein ny kommune. Kommunane deltek med fulle rettar og plikter i samsvar med vedteke mandat for SiS-kommunane 2. Styringsgruppa har ansvar for å samordne utgreiingane og tingingane om intensjonsavtalar for så å legge fram eit felles framtidsbilete og ei samla vurdering innan 01.06.15 i samsvar med konklusjonane i felles formannskapsmøte 23.01.15. Det vart røysta alternativt mellom rådmannen si endra tilråding som fekk åtte røyster og framlegget frå Arnfinn Brekke som fekk ei røyst. 022/15 VEDTAK: Rådmannen si endra tilråding vart innstilt mot ei røyst. 02.02.2015 KOMMUNESTYRET Framlegg frå Arnfinn Brekke (Krf): Gloppen kommunestyre takkar nei til å vere med vidare i utgreiingsarbeidet Sunnfjordkommunane legg opp til med kommunereforma. Ved alternativ røysting fekk
framlegget frå Arnfinn Brekke fire røyster og formannskapet si innstilling 22 røyster. 010/15 VEDTAK: 1. I samband med arbeidet med ny kommunereform i regi av SiS, sluttar Gloppen kommunestyre seg til det vidare arbeidet med å lage eit utgreiingsprogram og intensjonsavtale for ein ny kommune. Kommunane deltek med fulle rettar og plikter i samsvar med vedteke mandat for SiS-kommunane 2. Styringsgruppa har ansvar for å samordne utgreiingane og tingingane om intensjonsavtalar for så å legge fram eit felles framtidsbilete og ei samla vurdering innan 01.06.15 i samsvar med konklusjonane i felles formannskapsmøte 23.01.15. Vedtaket vart gjort mot fire røyster.