Side 1 SAMLA SAKSFRAMSTILLING Arkivsak: 09/1467-19413/09 Saksbeh.: Jofrid Fagnastøl Arkivkode: PLAN soneinndeling Saksnr.: Utval Møtedato 109/09 Formannskap/ plan og økonomi 05.11.2009 SAMLA SAK - DETALJREGULERINGSPLAN FOR VIDAREGÅA... I SKULESTADMOEN SØKNAD OM OPPSTART AV REGULERINGSPLANARBEID Administrasjonen si innstilling: 1. I medhald av 12-9 i Plan- og bygningslova vedtek FPL at planprogram for detaljreguleringsplan for vidaregåande skule i Skulestadmoen vert lagt ut til offentleg ettersyn. 2. I medhald av 12-11 i Plan- og bygningslova rår FPL til at det kan setjast i gang arbeid med detaljreguleringsplan for vidaregåande skule i Skulestadmoen. Formannskap/ plan og økonomi den 05.11.2009 sak 109/09 Behandling i møte: Administrasjonen si innstilling vart samrøystes vedteken. Vedtak: 1. I medhald av 12-9 i Plan- og bygningslova vedtek FPL at planprogram for detaljreguleringsplan for vidaregåande skule i Skulestadmoen vert lagt ut til offentleg ettersyn. 2. I medhald av 12-11 i Plan- og bygningslova rår FPL til at det kan setjast i gang arbeid med detaljreguleringsplan for vidaregåande skule i Skulestadmoen. Administrasjonen si utgreiing: 2. DOKUMENT SOM BAKGRUNN FOR SAKA: Dokument merka med * ligg ved. Dato Frå/ til Tittel på dokument * 09.10.09 Hordaland fylkeskommune Referat frå oppstartsmøte * 19.10.09 ABO Plan & arkitektur Søknad om oppstart av detaljregulering for ny vidaregåande skule i Skulestadmo * 19.10.09 ABO Plan & arkitektur Kart med planavgrensing ( Ikkje i målestokk) * 19.10.09 ABO Plan & arkitektur Planprogram 3. SAMANDRAG AV SAKA:
Side 2 ABO Plan & Arkitektur søkjer på vegne av Hordaland fylkeskommune om å få setje i gang planarbeid. Søknad om utarbeiding av detaljreguleringsplan gjeld for området kring det som i dag er Voss jordbruksskule i Skulestadmoen. Føremålet med reguleringsplanen er å utarbeide detaljreguleringsplan som legg til rette for utviding av noverande Voss jordbruksskule til vidaregåande skule for fleire utdanningsprogram. Planarbeidet vil også avklare plassering av ny avkøyrsle til skuleområdet, frå E16. Administrasjonen finn at planprogrammet som er lagt fram, har teke opp i seg dei problemstillingane som vi meinar er viktige å ta hand om i planarbeidet. Planprogrammet gjer greie for føremålet med planarbeidet, planprosessen og medverknad i planprosessen. Vidare er det gjort greie for kva alternativ som vil verte vurderte, viktige problemstillingar, samt kva utgreiingar som ein finn naudsynt i samband med planarbeidet. Administrasjonen rår til at framlegg til planprogram kan leggjast ut til offentleg ettersyn, samt at det kan setjast i gang arbeid med detaljreguleringsplan for vidaregåande skule i Skulestadmoen. 4. FAKTA OM SAKA: ABO Plan & Arkitektur søkjer på vegne av Hordaland fylkeskommune om å få setje i gang planarbeid. Søknad om utarbeiding av detaljreguleringsplan gjeld for området kring det som i dag er Voss jordbruksskule i Skulestadmoen. Føremålet med planarbeidet Føremålet med reguleringsplanarbeidet er å utarbeide detaljreguleringsplan som legg til rette for utviding av noverande Voss jordbruksskule til vidaregåande skule for fleire utdanningsprogram. Skuleanlegget i Skulestadmoen omfattar i dag mange bygningar. Det går fram av søknad om oppstart at det vil vera aktuelt å rive nokre av dei eksisterande bygga for å gje plass til eit eller fleire nybygg. Arealbehovet med ny skulestruktur er ca. 7200 m2 (BTA), det omfattar ikkje driftsbygningar, gartneri og internat. Vidare er det ynskje om å leggje inn arealpotensiale for ei eventuell framtidig utviding av skulen som fylgje av endring eller utviding av utdanningsprogramma. Planarbeidet vil også avklare plassering av ny avkøyrsle til skuleområdet, frå E16. Det vil skje i tett samarbeid med Statens vegvesen. Området vert søkt om å regulere til bygg og anlegg- undervisning, samferdselsanlegg og teknisk infrastruktur, grønstruktur, landbruks- natur- og friluftsføremål og bruk og vern av sjø og vassdrag, med tilhøyrande strandsone. I planarbeidet vil ein også sjå på endring av arealføremål på eigedommen gnr. 53, bnr. 11, frå næringsføremål til bustadføremål. jf. vedtak i KST 09.12.04 sak 0105/04. Eigedommen er lagt ut til næringsføremål, og ligg rett sørvest for Voss rafting sitt område. Planområdet Området det vert søkt om å få regulera omfattar eigedommane: gnr/ bnr 52/ 2, 53/ 5,6,8,11,13, 54/ 1,5,7,12,17,20,97
Side 3 Planområdet er på omlag 260 daa og ligg i Skulestadmoen, nord for Voss sentrum. Området grensar mot Nedkvitnevegen i nord, Lundarvatnet mot aust og mot Voss barneheim i sør. I vest grensar planområdet delvis mot E16, men omfattar også eit stykkje på vestsida av E16, mot Ringheimsvegen. Overordna plan Området for detaljreguleringsplanen er i kommuneplanen delvis lagt ut til offentleg føremål, samt landbruks-, natur-, og friluftsområde. Søknad om oppstart er i tråd med gjeldande kommuneplan. Oppstartsmøte for plansaka vart halde 25.09.09. I søknad om oppstart er det opplyst at planarbeidet ikkje vert omfatta av krav om konsekvensutgreiing. Planprogram I samsvar med 12-9 i Plan og bygningslova, er det krav til planprogram for reguleringsplan som kan få vesentleg verknad for miljø og samfunn. Planprogrammet skal tilpassast den konkrete plansituasjonen og planbehovet, men skal gjere greie for fylgjande: - klargjere føremålet med planarbeidet - vise korleis planprosessen med fristar og deltakarar skal gå føre seg - klargjere opplegget for medverknad, spesielt i høve dei gruppene ein går utifrå vert særleg råka - klargjere kva alternativ som vert vurdert - drøfte aktuelle problemstillingar i planarbeidet - drøfte behov for utgreiingar I planprogram for ny vidaregåande skule i Skulestadmoen går det fram at det i samband med planarbeidet vil verta vurdert alternative løysingar knytt til tilkomst, plassering av bygningar, grense mellom byggjeføremål og jordbruksareal, og plassering av parkering. Viktige problemstillingar for planområdet som skal sjåast nærare på i planarbeidet er vurdert å vera: - Trafikk og teknisk infrastruktur - Natur og miljø - Kultur - Sosial infrastruktur - Risiko og sårbarheit - Universell utforming Vidare er det nemnt at det skal utarbeidast ROS- analyse og støyanalyse. 5. ADMINISTRASJONEN SI VURDERING: I kommuneplanen er det aktuelle planområdet delvis lagt ut til offentleg føremål, samt Landbruks-, natur-, og friluftsområde. Skisserte føremål i søknad om oppstart av detaljreguleringsplan er såleis i samsvar med kommuneplanen. Føremålet med planarbeidet er å utarbeida detaljreguleringsplan som legg til rette for utviding av noverande Voss jordbruksskule til vidaregåande skule for fleire utdanningsprogram.
Side 4 Ein vidaregåande skule vil vera ein stor arbeidsplass, både for tilsette og elevar. Ei samlokalisering av fleire ulike utdanningsprogram er ei utfordring som set krav til planlegginga, både når det gjeld planprosessen og den endelege utforminga av planen. Det er mange ulike krav og behov som skal løysast og stettast i det endelege resultatet. I oppstartsmøte vart det peika på fleire viktige problemstillingar for planarbeidet: Uteareal og kommunikasjonsliner er viktig å få på plass. Uteområde for den nye vidaregåande skulen vil ha fleire funksjonar, og vil såleis vera utfordrande å gje ei god og funksjonell utforming. Uteområdet skal fungere både som læringsarena og uteopphaldsareal. Dersom ein vidarefører internatfunksjonar vil dette gje uteområda enno ein viktig funksjon. Administrasjonen meinar at det i planarbeidet må synleggjerast med illustrasjonar, korleis ein skal løyse alle funksjonane for uteområda på ein god måte. Tilkomst til området, med tilrettelegging for tilstrekkeleg med parkering, samt kommunikasjonsliner i samband med denne for både køyrande og gåande må løysast. Generelt vil kommunikasjonsliner inn til området og innad i planområdet vil vera viktig for å få til ei god utforming i planområdet. Organisering av bygningsmassen vil krevje god planlegging. Det er mange funksjonar i høve til dei ulike utdanningsprogramma som skal løysast. Mykje ny bygningsmasse og ein del eksisterande bygningsmasse som skal skapa ein god heilskap i området både funksjonelt, arkitektonisk og estetisk. Strandsona langs Lundarvatnet er vesentleg å ta omsyn til i planarbeidet, både fordi det er del av eit verna vassdrag, og som ein ressurs for dei som oppheld seg i området. Universell utforming må liggje til grunn for planarbeidet. Det må leggjast vekt på at planen skal gje tilgjenge for alle, og setje krav som gjev både funksjonelle og estetisk gode løysingar. Støy vil vera eit viktig tema for planarbeidet, med E16 som går gjennom planområdet. Tilhøvet til støy, både i bygningane og for uteområda vil vera viktig å ta med i planarbeidet for å sikra gode løysingar. I dette planarbeidet er det særs viktig at ein legg opp til brei medverknad i planprosessen. Tilsette og elevar som i dag høyrer under dei ulike studieretningane/ utdanningsprogramma, bør vera med i heile planprosessen for å sikre at dei kan vera med å påverke sine framtidige omgjevnadar for arbeid og studiar. Administrasjonen finn at planprogrammet som er lagt fram, har teke opp i seg dei problemstillingane som vi meinar er viktige å ta hand om i planarbeidet. Planprogrammet gjer greie for føremålet med planarbeidet, planprosessen og medverknad i planprosessen. Vidare er det gjort greie for kva alternativ som vil verte vurderte, viktige problemstillingar, samt kva utgreiingar som ein finn naudsynt i samband med planarbeidet. I høve medverknad meiner administrasjonen at planleggjar bør vurdere å involvere tilsette og elevar, som kjem innunder dei utdanningsprogramma som skal lokaliserast i planområdet, på eit enno tidlegare tidspunkt. Det er lagt opp til eit informasjonsmøte i samband med offentleg ettersyn av planframlegget, men kan hende det vil vera positivt å involvera denne gruppa på eit tidlegare tidspunkt.
Side 5 I høve eigedom med gnr. 53, bnr. 11 vil ein i planprosessen sjå på om arealføremålet på denne eigedommen bør endrast frå næringsføremål til bustadføremål. Ein kan då sjå området sør for Nedkvitnevegen under eitt, og få sett eigedommen i samanheng med naboeigedommane. Konklusjon Administrasjonen rår til at framlegg til planprogram kan leggjast ut til offentleg ettersyn, samt at det kan setjast i gang arbeid med detaljreguleringsplan for vidaregåande skule i Skulestadmoen.