Vågå kommune Arkivsak: 2014/44-52 Arkiv: Saksbehandlar: Solveig Nymoen/ Iselin Jonassen Utv.saksnr Utval Møtedato 6/16 Kommunestyret 02.02.2016 Forhandlingsfasa og avgjerdsfasa kommunereformen Vågå og Sel - intensjonsavtale og plan og føresetnadar under prosessen Vedlegg: 1 Forslag intensjonsavtale - frå styringsgruppa 12.01.2016 2 Forslag plan og føresetnader fase 2 og 3 Vågå-Sel frå styringsgruppa 12.1.2016 3 Møteplan forhandlingsfasa og avgjerdsfasa kommunereformen 4 Videre arbeid med kommunereformen 5 Fylkesmannens forventningar til og vurderingar av kommunenes kommunereformvedtak 6 Prosjektplanen versjon 3-12.1.2016 Saksframlegg: Kommunestyret i Sel kommune fatta slik vedtak i møte den 16. november 2015 da dei tre rapportane frå utgreiingsfasa vart lagt fram og kommunestyret tok stilling til det vidare arbeidet med kommunereformen: 1. Rapportane gjev eit godt faktagrunnlag for fase 2, Forhandlingsfasa. Kommunestyret tar rapportane til etterretning. 2. Sel kommunestyre stadfestar tidlegare vedtak og si tilslutning til prosjektplanen. 3. Sel kommunestyre ber styringsgruppa innan utgangen av januar 2016 legge fram ei sak som viser framdrift for fase 2 og fase 3, plan for informasjon/involvering og disposisjonen i ei intensjonsavtale. 4. Sel kommunestyre ber rådmannen samarbeide med rådmannen i Vågå om ein søknad om skjønnsmidlar for 2016. Kommunestyret i Vågå kommune fatta tilsvarande vedtak i møte den 24. november 2015 for punkt 1-4, og med tillegg av punkt 5 og 6: 1. Rapportane gjev eit godt faktagrunnlag for fase 2, Forhandlingsfasa. Kommunestyret tar rapportane til etterretning. 2. Vågå kommunestyre stadfestar tidlegare vedtak og si tilslutning til prosjektplanen. 3. Vågå kommunestyre ber styringsgruppa innan utgangen av januar 2016 legge fram ei sak som viser framdrift for fase 2 og fase 3, plan for informasjon/involvering og disposisjonen i ei intensjonsavtale. 4. Vågå kommunestyre ber rådmannen samarbeide med rådmannen i Sel om ein søknad om skjønnsmidlar for 2016. 5. Vågå kommune vil på ny invitere dei andre kommunane i Nord-Gudbrandsdalen til dialog om kommunereformarbeidet.
6. Vågå kommune ønskjer at det regionale perspektivet skal vera eit eige sjølvstendig punkt, der både eventuell utviding av reformarbeidet, vidare regionalt samarbeid og dei andre kommunane i Nord-Gudbrandsdalen sitt reformarbeid blir teke hensyn til i forhandlingane med Sel. Kommunestyra bad styringsgruppa om å førebu sak om framdrift for fase 2 og fase 3, plan for informasjon/involvering og disposisjonen i ei intensjonsavtale. Prosjektgruppa førebudde arbeidet i to møte 16.12.15 og 6.1.16. Styringsgruppa handsama og ferdigstilte i møte 12.01.16 utkast til Plan og føresetnadar for fase to, forhandlingsfasa, og fase tre, avgjerdsfasa, samt utkast til Intensjonsavtale mellom Vågå og Sel kommunar. Dokumenta følgjer saken som vedlegg. Styringsgruppa slutta seg i same møte til oppdatert prosjektplan versjon 1.3 som også følgjer vedlagt. Punkt 4 i kommunestyrevedtaka i november søknad om skjønnsmidlar utløyste ei løyving på 0,5 mill.kr. i skjønnsmidlar for arbeidet i 2016. Tilsvarande løyving i 2015 var 0,65 mill.kr. Forhandling om intensjonsavtale Styringsgruppa foreslår at det blir nedsett eit forhandlingsutval under arbeidet med intensjonsavtala samansett av ordførarar, varaordførarar og opposisjonsleiarar Mette Vårdal (Sp) frå Vågå og Eldri Siem (Sp) frå Sel. Utkast til mal for innhald og innretting av intensjonsavtala følgjer som vedlegg. I styringsgruppa sitt forslag til framdriftsplan skal den framforhandla avtala leggjast fram for kommunestyra i siste del av april. Kommunereformarbeidet i regionen Styringsgruppa oppfattar dei to siste punkta i vedtaket i Vågå slik at vi skal informere nabokommunane om Sel og Vågå sitt arbeid med kommunereformen. Tilsvarande skal vi halde oss oppdaterte om deira prosessar. Vidare skal vi fortløpande vurdere og drøfte kva for konsekvensar ein ny kommune Sel-Vågå vil ha på det regionale samarbeidet. Ordførarane har i Regionrådets arbeidsutval drøfta situasjonen i Nord-Gudbrandsdalen i møte 15.01.16. Etter dette møtet har regionrådsleiaren sendt ut følgjande pressemelding: Kommunereform i Nord-Gudbrandsdalen. - Ordførarane vil syrgje for at dei igangsette prosessane mellom to og to kommunar vert vidareført med vedtak om eventuell samanslåing innan fastsatt frist. - Ordførarane vil tilrå at rådgjevande folkeavrøystingar blir halde på same datoen i mai/juni. - Som ein del av kommunereform arbeidet har ordførarane ambisjonar om at det vert vurdert kva for nye områder som kan være aktuelt å løyse i eit interkommunalt og regionalt samarbeid. Vel etablerte samarbeid som NGLMS, NGR og Regiondata (IT samarbeid) må styrkast og vidareutviklast. * * * Høyring Styringsgruppa legg til grunn at høyringa av veljarane skal skje gjennom ei rådgjevande folkerøysting. Det er difor ikkje lagt inn forslag om innbyggarundersøking i planen. Det er kommunelova 39a som regulerer folkerøystingar i kommunen. Det er viktig å merke seg kommentaren i Ot.prp. nr. 32 (2008 2009) s. 45 pkt. 4.6.4: «Departementet meiner at det ikkje er aktuelt å lovfeste korleis slike folkerøystingar skal gjennomførast i praksis, sjølv om det kan vere naturleg at kommunane tek utgangspunkt i regelverket i vallova. Det skal framleis vere opp til kommunane sjølve å avgjere dette ut frå lokale tilhøve, til dømes om folkerøystinga skal gjelde heile eller delar av kommunen.» Vallova eller andre lover utover Kommunelova seier ingen ting om rådgjevande folkerøystingar.
Styringsgruppa meiner ein med fordel kunne hatt same datoen for folkerøystinga i alle kommunane i Norddalen, gjerne óg i Midtdalen. Midtdalen har så langt planlagt folkerøysting måndag 22. mai. Dovre og Lesja har i sin plan sett datoen til 13. juni. Ordførarane i Norddalen har bede regionrådsleiaren ta eit initiativ for om mogleg å finne fram til ein felles dato for Nord- og Midtdalen. Involvering Det er lagt opp til felles folkemøte for kommunane på Lalm den 4. april 2016 der innbyggjarane blir invitert til å gje sitt syn under vegs i arbeidet med intensjonsavtala. Vidare er det lagt opp til en serie på tre folkemøte 2. - 4. mai 2016 med presentasjon av intensjonsavtala før det blir halde folkerøysting. Det vil bli sendt ut informasjonsbrev til innbyggjarane under vegs i arbeidet. I tillegg vil ordførarane og andre politikarar møte lag/foreiningar, næringsliv og ungdom. Avgjerd I juni er det planlagt kommunestyremøte i kommunane der dei kvar for seg tek avgjerd i saka om kommunane saman skal danne ein ny kommune. Den 20. juni 2016 er det planlagt felles kommunestyremøte med fylkesmannen i Oppland der vedtak om kommunesamanslåing blir stadfesta under føresetnad av positive vedtak i båe kommunane. Fylkesmannen har stadfesta at datoen er reservert for møte med kommunane. I høve inndelingslova 25 skal følgjande drøftast i fellesmøtet: «a) forslag til navn på den nye kommunen b) antall medlemmer i det nye kommunestyret c) kriterier for sammensetning av og funksjoner til fellesnemnd etter 26 i denne loven d) valg av revisor for virksomheten i fellesnemnden e) oppretting av eventuelle andre fellesorgan for å sikre gjennomføringen av sammenslåinga» Vurdering: Dei nye kommunestyra stadfesta i november 2015 etter valet i fjor at ein no var klar for å gå inn i reelle drøftingar om grunnlaget for ei ny kommune. I vekene og månadene etter desse vedtaka har utviklinga regionalt og nasjonalt underbygd fornuften i dette vedtaket. Endringar i verdsøkonomien, med ein pris på olje og gass som ekspertane meiner ville ligge varig godt under det vi har sett dei siste åra, slår kraftig inn i norsk økonomi. Framover vil det truleg bli naudsynt for regjeringar og Stortinget å prioritere hardare enn vi har vore vande med. Det er difor sannsynleg at vi får ein strammare kommuneøkonomi. Samstundes seier regjeringa i framlegget til endringar i det kommunale inntektssystemet at ein ikkje utan vidare vil vidareføre tilskott til småkommunar som vel å fortsette å vere små. Eit anna utviklingstrekk er at det i følgje nasjonale målingar er fleire som stiller seg positive til samanslåing av kommunar no enn for eitt år sidan. Frå andre, politiske saker veit vi at korkje regjeringar eller Stortinget er upåverka av kor vinden bles i opinionen. Det er frå før eit fleirtal på Stortinget som helsar endringar i kommunekartet velkomen. Skulle meiningsmålingane fortsatt vise stor og aukande tilslutning til Kommunereformen vil dette truleg påverke innhaldet i og omfanget av Stortinget sitt endelege vedtak. Både Ap og Høgre har helde døra open for å overprøve eit nei til samanslåing i einskilde kommunar. Sel kommunestyre har vore tydelege på at ein har ønskt ei samanslåing med Vågå og at andre alternativ ikkje har vore aktuelle å utgreie. I Vågå har det vore meir ope. Nokon har meint ein burde utgreie eit alternativ med Lom og Skjåk, med eller utan Sel. Det er no ei omforeint og klar tilråding frå alle 6 ordførarane om å gå vidare med to og to kommunar. Dette er klargjerande. All kraft og merksemd må no rettast mot å få fram ein intensjonsavtale som eit fleirtal av veljarane i både Sel og Vågå kan slutte seg til.
Organiseringa av fase 2 og 3 Styringsgruppa tilrår at vi vidarefører eksisterande struktur med ei styringsgruppe og ei prosjektgruppe. Men for å få ein rasjonell forhandlingsprosess blir det foreslått å etablere eit forhandlingsutval med færre medlemmar enn i styringsgruppa. Forhandlingar om ein intensjonsavtale er dessutan eit reint politisk ansvar, difor må forhandlingsutvalet vere samansett av leiande politikarar. Prosjektkoordinator Solveig Nymoen blir med vidare i prosessen med kontordagar både i Sel og Vågå. Det er aktuelt å nytte ekstern fagressurs i arbeidet med informasjon før ei folkerøysting. Intensjonsavtala Ei ferdig intensjonsavtale tilrådd av forhandlingsutvalet er grunnlaget for vedtaket i kommunestyra i april. Styringsgruppa har enda opp med å tilrå at avtala skal vere relativt detaljert og dermed gje svar på og tilråding i mange av dei spørsmåla veljarane er opptekne av. Vi har døme på intensjonsavtalar frå andre deler av landet som i langt mindre grad gjev svar på sentrale spørsmål. I staden skyv ein da avklaringane ut til etter at det eventuelt er vedteke å danne ei ny kommune. Styringsgruppa meiner mange veljarar forventar tydelege svar før dei vil ta stilling til om dei vil stemme for eller i mot ei ny kommune. Manglande avklaring vil kunne påverke resultatet i ei folkerøysting. Involvering og informasjon Interessa og engasjementet hos folk flest var jamt over lite i utgreiingsfasa. Erfaringane frå tilsvarande prosessar andre stader viser at det er når ein skal definere den nye kommunen når ein set seg til forhandlingsbordet - at ein får engasjement og respons. Då ser veljarane at det er realitetar i saka. Det er difor viktig at vi framover gjev god og nok informasjon, organiserer arenaer for informasjon, spørsmål og drøfting og utfordrar lag, foreiningar og næringsliv til å sette «ny kommune» på dagsordenen. I fase 2 ligg det inne berre eitt ope møte, nemleg på Lalm samfunnshus. Styringsgruppa meiner det er eit poeng i seg sjølv at vi no samlar oss i eit felles møte. Når intensjonsavtala skal presenterast meiner vi det er rett å arrangere eigne møte i begge kommunane. Elles må vi informere gjennom nettsidene våre, i flygeblad til alle postkasser og gjennom avisene og sosiale media. Folkerøysting Sel kommunestyre har hittil ikkje gjort eit eksplisitt vedtak om å gjennomføre folkerøysting. Men folkerøysting er lagt til grunn i tidligare versjon av prosjektplanen som kommunestyret har slutta seg til. Kommunestyret i Vågå har gjort særskilt vedtak om folkerøysting. Ordføraren i Sel vil tilrå at óg Sel kommunestyre no gjer eit tilsvarande vedtak. Kommunen har ansvaret og står i prinsippet fritt i måten folkerøystinga blir avvikla på. Ordføraren vil likevel tilrå at ein legg til grunn prinsippa i vallova. På denne måten er ein trygg på at folkerøystinga blir planlagd og gjennomført på ein god måte. Ordføraren foreslår at formannskapet er valstyre. Vidare foreslår ordføraren at kommunestyret delegerer til valstyret alle spørsmål i samband med folkerøystinga som ikkje må avgjerast av kommunestyret. Kommuneloven heimlar berre rådgjevande folkerøysting. Men eit kommunestyre kan på førehand legge føringar for korleis eit resultat vil bli handsama av kommunestyret. Til dømes at ein uansett vil følgje resultatet, eller at ein vil vurdere resultatet opp mot margin mellom ja/nei, den prosentvise deltakinga i røystinga mv.
Som nemnd i saksutgreiinga er det ikkje avklara om vi får til folkerøysting på same datoen i Norddalen og Midtdalen. Eg vil difor tilrå at vi førebels held datoen open og at det blir lagt fram ei eiga sak om folkerøystinga i neste kommunestyremøte. I denne saka må kommunestyret i tillegg avklare andre føringar for folkerøystinga som ikkje kan delegerast til valstyret, men må vedtakast av kommunestyret. Dette vil mellom anna måtte gjelde eventuelle føringar for kva status resultatet av røystinga skal ha når kommunestyret handsamar saka etter folkerøystinga. Andre spørsmål som må gjevast gode svar er korleis spørsmålet i folkerøystinga skal formulerast, kven som skal ha røysterett, om 16- og 17-åringar skal få delta, om ein skal ha røysting over 1 eller 2 dagar, kva vallokale/stemmekretsar som skal nyttast, om ein skal kunne førehandsrøyste og om ein skal opne for poststemmegiving. Ordføraren tek ansvar for at sak blir fremma i neste kommunestyremøte. Ordføraren sitt forslag til vedtak: 1. Kommunestyret vedtek Plan og føresetnader for fase 2, Forhandlingsfasa, og fase 3, Avgjerdsfasa. 2. Kommunestyret vedtek disposisjon for Intensjonsavtale mellom Vågå og Sel kommunar. 3. Kommunestyret vel ordførar, varaordførar og opposisjonsleiar Mette Vårdal som sine representantar i forhandlingsutvalet. 4. Kommunestyret vedtek å legge resultatet av forhandlingane, Intensjonsavtala, fram for veljarane i ei folkerøysting. 5. Kommunestyret vel formannskapet som valstyre. 6. Kommunestyret ber ordføraren legge fram eige sak i neste kommunestyremøte med forslag til føringar og ramar for folkerøystinga. 7. Kommunestyret delegerer til valstyret alle spørsmål i samband med folkerøystinga som ikkje må avgjerast av kommunestyret. 8. Kommunestyret sluttar seg til oppdatert prosjektplan versjon 1.3. Saksprotokoll i Kommunestyret - 02.02.2016 Behandling: Endringsforslag frå Senterpartiet v/mette Vårdal til pkt. 3.; Kommunestyret vel ordførar, varaordførar og som representant frå opposisjonen Mette Vårdal med Anne Sjetne som vara, som sine representantar i forhandlingsutvalet. Innspel frå Senterpartiet v/ørjan Venås; «Det har ikkje vore tid til innbyggjarundersøking. Folkeavrøystinga kan væra ei moglegheit for dette, dog i mindre skala. Slik vi les pkt. 6, så kan dette gjerast ved at det blir opna for fleire spørsmål og at formannskapet definerer desse. I tillegg håpar vi det blir lagt opp til spørsmål utover samanslåing av kun Sel og Vågå. Eit alternativ er å kunne krysse av for kva for andre kommunar kunne ein tenkje seg å slå seg saman med.» Samrøystes
Vedtak: 1. Kommunestyret vedtek Plan og føresetnader for fase 2, Forhandlingsfasa, og fase 3, Avgjerdsfasa. 2. Kommunestyret vedtek disposisjon for Intensjonsavtale mellom Vågå og Sel kommunar. 3. Kommunestyret vel ordførar, varaordførar og representant frå opposisjonen Mette Vårdal med Anne Sjetne som vara, som sine representantar i forhandlingsutvalet. 4. Kommunestyret vedtek å legge resultatet av forhandlingane, Intensjonsavtala, fram for veljarane i ei folkerøysting. 5. Kommunestyret vel formannskapet som valstyre. 6. Kommunestyret ber ordføraren legge fram eige sak i neste kommunestyremøte med forslag til føringar og ramar for folkerøystinga. 7. Kommunestyret delegerer til valstyret alle spørsmål i samband med folkerøystinga som ikkje må avgjerast av kommunestyret. 8. Kommunestyret sluttar seg til oppdatert prosjektplan versjon 1.3.