Fjell kommune Arkiv: 256 Saksmappe: 2013/2644-28319/2016 Sakshandsamar: Aud Raknem Dato: 29.11.2016 SAKSDOKUMENT Utvalsaksnr Utval Møtedato 115/16 Komité for drift og forvaltning 06.12.2016 Godkjenning av arbeidsprogram for plan for kulturminne 2016-2020 Samandrag av saka: Komité for drift og forvaltning vedtok 07.06.2016 å sende framlegg til arbeidsprogram for kulturminne 2016-2020 ut til høyring og offentleg ettersyn. Vedtaket vart kunngjort 19.07.2016 med frist på seks veker. Høyringsperioden vart i ettertid utvida med tre veker til 21. september etter delegert vedtak. Det har kome ni merknader: tre frå regionale styresmakter, to frå kommunale nemnder og ein frå nabokommune. Tre lag og organisasjonar har levert merknad. I høyringsperioden har administrasjonen møtt i Eldrerådet og Ungdommens Kommunestyre og hatt møte med Bjorøy og Tyssøy Velforening. Rådmannen rår til at framlegg til arbeidsprogram for plan for kulturminne vert godkjend slik det ligg føre. Innstilling: Komité for drift og forvaltning godkjenner framlegg til arbeidsprogram for plan for kulturminne slik det ligg føre. Straume, den 29.11.2016 Steinar Nesse Rådmann Berit Karin Rystad Plan- og utbyggingssjef Handsama i Komité for drift og forvaltning - 06.12.2016: Prosjektleiar Aud Raknem var til stades i møtet og heldt ein kort presentasjon av arbeidsprogrammet for plan for kulturminne og den vidare prosessen med kulturminneplanen, supplert av saksordførar Andreas Sjalg Unneland (SV). Etter
presentasjonen nytta komiteen høvet og stilte spørsmål om mellom anna innkomne høyringsinnspel. Innstillinga vart samrøystes vedteken. Vedtak i Komité for drift og forvaltning - 06.12.2016: Komité for drift og forvaltning godkjenner framlegg til arbeidsprogram for plan for kulturminne slik det ligg føre. Dokument vedlagt saka: Framlegg til arbeidsprogram for plan for kulturminne, datert 19.07.2016 Merknader Adresseliste høyringspartar juli 2016 Saksopplysningar: Arbeidet med plan for kulturminne 2016-2020 er politisk forankra gjennom planstrategi for Fjell kommune 2016-2019, KS sak 17/12-2015 og vedtak i Komité for drift og forvalting (KDF), sak 60/16. Politisk arbeidsgruppe (PAU) har oppnemnd KDF som styringsgruppe for kulturminneplanen. Styringsgruppa har valt Andreas Skjalg Unneland (SV) til saksordførar. Kultursjefen er planeigar medan plan- og utbyggingssjefen har ansvar for prosjektleiing og sekretariat. Det er oppretta ei administrativ arbeidsgruppe med Plan- og utbyggingssjefen, Kultursjefen og Eigedomssjefen. Andre avdelingar vil bli invitert med etter behov. Offentleg høyring 20.07-21.09.2016 Varsel om oppstart av plan og høyring av framlegg til arbeidsprogram har vore kunngjort i Vestnytt og på www.fjell.kommune.no. Plandokumenta låg til offentleg ettersyn i Servicetorget i Rådhuset og Fjell folkeboksamling og vart sendt til alle på høyringslista, jf. adresseliste som ligg ved. I høyringsperioden har administrasjonen møtt i Fjell eldreråd og Ungdommens Kommunestyre ( UKS) og delteke i møte med Bjorøy og Tyssøy Velforening. Det har kome ni merknader. Sju er mottekne innan høyringsfristen. UKS fekk utsett frist til etter konstituerande møte 27. september. Merknad frå tidlegare elevar ved Brattholmen skule datert 15. november, er ikkje motteke innan høyringsfristen og vert avvist. Innspelet kan sendast på nytt ved høyring av kulturminneplanen. (Vedlegg 4) Statens vegvesen, datert 12.08.2016 Statens vegvesen oppmodar kommunen om å fokusere på kulturminne som kastar lys over samferdsla. Vegvesenet viser til arbeidsprogrammet sine visjonar om at kulturminna skal leggja vekt på oppleving, kunnskap og verdiskaping. Dette kan gje auka ferdsel, noko som vil krevje gode og vel fungerande kulturminneområde med tilrettelegging og trafikktryggleik. Rådmannen sin kommentar: Tekniske kulturminne og kulturminne knytt til samferdsle står på registreringslista. Spørsmål om tilrettelegging av areal og trafikktryggleik, vert handtert i arealdelen til kommuneplanen og trafikksikringsplanen.
(Vedlegg 5) Turøy Grendalag, datert 01.09.2016 Grendalaget er glade for at Turøyvarden er verna og listar opp tiltak dei meiner følgjer av vernetiltaket: informasjonsskilt, tilrettelegging, tilkomst og parkering. Grendalaget ber kommunen gå i drøftingar med eigar av ein skjeneflor som står nedst i løypa og utgreie tilstand og mogeleg bruk av bygningen. Rådmannen sin kommentar: Kommunen vil ta kontakt med Kystverket som ansvarleg vernemynde om skilting og informasjon. Verneverdien av skjenefloren kan undersøkjast i SEFRAK-registeret og ved synfaring. Når det gjeld tilkomst og tilrettelegging, vil kommunen oppmode Grendalaget om å gå i dialog med grunneigarar på staden. (Vedlegg 6) Fylkesmannen i Hordaland, datert 31.08.2016 Fylkesmannen er positiv til opplegget for medverknad. Målet om god oversikt og felles kunnskapsbasert verdiforståing av kulturminna i kommunen, vil vera ein føresetnad for god forvalting. Tradisjonelt landbruk og kulturlandskap inngår som del av kulturomgrepet og utgjer eit planfagleg område som kan skildrast og takast inn i arbeidet med kulturminneplanen. Utbyggingspress og manglande bruk av bygningsmiljø som følgje av nedleggingar i tradisjonelle næringar, er hovudårsak til tap av kulturminneverdiar. Kulturminneplanen bør difor gjere tydelig verdiar og vise viktige område for bruk og vern av areal med omsynssone på kart. Rådmannen sin kommentar: Når det gjeld tradisjonelt landbruk og kulturlandskap, vil rådmannen vise til Landskapsanalyse for Fjell, 2013 som er lagt til grunn for gjeldande arealplan. Eitt hovudmål med kulturminneplanen er å synleggjere kulturminneverdiar og avklare viktige område for bruk og vern. (Vedlegg 7) Fjell eldreråd, vedtak i møte 12.09.2016 «Fjell elderåd ber om at Borgastova, hovudhuset på Prestegarden på Fjell, må takast vare på i miljøet sitt. Dette handlar om vølingshistorikken til Borgastova.» Rådmannen sin kommentar: Borgstova på Fjell Prestegard er oppført som bustadhus i 1849. Manglande bruk og tilsyn har ført til langt kome forfall. Byggesaksavdelinga i Fjell gav 10.02.2016 løyve til riving. Det har i ettertid kome fram at verneverdien er større enn først rekna med. Mogleg restaurering og søknad om midlar til dette, vert følgd opp av Kultursjefen. Det er ikkje endeleg klarlagt om restaurering er praktisk mogeleg. (Vedlegg 8) Notat frå møte i Ungdommens kommunestyre. 27.09.2016 Prosjektleiar for planen var invitert til UKS for snakke om arbeidet med kulturminneplanen. Etterpå var det ei orientering om medverknad i planprosessar og om Fjell-ungdommen si deltaking i planprosessar gjennom skule, fritid og UKS. UKS-medlemmene kartfesta utvalde område i kommune for seinare å blinke ut særlege kulturminne. Vedtak i ungdommens kommunestyre 27.09.2016: Ungdommens kommunestyre (UKS) i Fjell deltek i work-shop saman med prosjektleiar for kulturminneplanen. I arbeidet vil dei kartlegge og prioritere kulturminne dei er opptekne av. Dato for work-shop er sett til 10. januar 2017.
(Vedlegg 9) Bjorøy og Tyssøy velforening, datert 20.09.2016 Viser til tidlegare kontakt med kommunen og legg fram liste over faste kulturminne og immaterielle kulturminne som stadnamn, tekster, foto og lokalhistorie. Velforeininga er oppteken av at resultat av registreringsarbeidet og kan bli brukt i skulesamanheng og slik bidra til betre forståing for å bevare kulturminne for framtida. Rådmannen sin kommentar: Velforeninga sitt arbeid med registreringar og dokumentasjon, er av stor verdi lokalt og i kommunen elles. Neste fase i samarbeidet vil vera synfaring på Bjorøyna i våren 2017. (Vedlegg 10) Hordaland fylkeskommune, Kultur- og idrettsavdelinga, datert 21.09.2016 Kultur- og idrettsavdelinga gjev ein grundig presentasjon av framlegg til arbeidsprogram. Denne gjennomgangen er avgrensa til nokre hovudpunkt. Under generelle merknader heiter det at integrering av kulturminne i heilskapleg samfunnsog arealplanlegging er eit hovudmål for kulturminneplanlegginga. Gode planar med sterkt lokalt eigarskap vil vera viktig for å målet og for å hindre tap av kulturminne. Arbeidsprogrammet legg fornuftige rammer og føringar for det vidare arbeidet. Det vert understreka at kommentarane er retta mot det å gjera arbeidsprogrammet til ein enda betre styringsreiskap: Plantype: Framlegg til arbeidsprogram som er til høyring samsvarar i stor grad med eit planprogram etter plan- og bygningslova. Fylkeskommune rår kommunen til å utarbeida ein kommunedelplan for kulturminne etter plan- og bygningslova. Ein kommunedelplan er meir forpliktande og føreseieleg for politikarar, administrasjon og innbyggjarar. Organisering av planarbeidet: Organisering av planarbeidet vert oppfatta som arbeidskrevjande med uklar fordeling av oppgåver og mynde. Avgrensing av plan: Kommunen har valt å prioritere vekk gjenstandar og immaterielle kulturminne, som er viktige kjelder til kunnskap og oppleving. Handlingsplanen bør difor drøfte desse tema og seie noko om korleis gjenstandar og immaterielle kulturminne vert handsama i Fjell kommune. Status for planarbeidet: Det er viktig at kulturminneplanen vert innarbeidd i arealdelen til kommuneplanen med generelle føresegner, arealføremål og omsynssoner med retningsliner. Fylkeskommunen viser til dei fire kulturmiljøa med omsynssoner i gjeldande arealplan, og etterlyser andre av dei registrerte sjøbruksmiljø og andre typar kulturmiljø, noko som vil utvide kunnskapsgrunnlaget til andre typar kulturmiljø. Handlingsplan: Eit realistisk og gjennomtenkt handlingsprogram er viktig for å styrkje kulturminnearbeidet i kommunen. Av punkta kan nemnast økonomi, Rådmannen sin kommentar: At kulturminneplanen skulle utarbeidast som temaplan har vore klart sidan første planvedtak i 2013. Dette er sidan stadfesta i kommunal planstrategi og rapportert til Fylkeskommunen gjennom årleg tilbakemelding om kulturminne i kommunane. Organisering av planarbeidet er forankra i politiske vedtak. I Fjell kommune ligg prosjektleiing og sekretariat for planarbeid til Planavdelinga hjå Plan- og utviklingssjefen.
Den einskilde fagavdeling er planeigar. Politisk arbeidsgruppe oppnemner sakskomite for planen. Komiteen vel saksordførar. Kommunen har valt å avgrense planarbeidet til faste kulturminne samt gjenstandar som inngår som del av desse. Immaterielle kulturminne som stadnamn, lokalhistorie og tradisjonar vil vera viktige kjelder til kunnskap om kulturminna og vil bli omtalt der dette er relevant for kulturminne og kulturmiljø. Kommunen har i saksutgreiingar og plandokument gjort grundig greie for den todelte planprosessen. Prioritering av fire kulturmiljø med omsynssone i Fase A i kulturminneplanen, skuldast dels kapasitet og tidsramme, men hovudgrunnen var at desse hadde høgaste verneverdi A. At kommunen i det vidare planarbeidet vil ta for seg dei andre sjøbruksmiljø i verneklasse B og C samt andre typar kulturmiljø er sjølvsagt. (Vedlegg 11 ) Framlegg frå Øygarden kommune om felles planmøte, datert 27.07.2016 Kulturleiaren i Øygarden inviterte 27. juli Fjell og Sund til fellesmøte. Målet var å konkretisera korleis ein kunne dra vekslar på kvarandre i dei lokale planprosessane. Det var forslag om å lage ein framdriftsplan der kommunane skulle ha vedtaksklare kulturminneplanar i 2018. Prosjektleiaren i Sund meldte tilbake 4. august at kulturminneplanen i Sund er utarbeidd som temaplan i medhald av politiske føringar og at planarbeidet skal sluttførast i 2016. Rådmannen sin kommentar: Invitasjonen til felles planmøte kom tidleg i Fjell sin høyringsperiode. Etter samtalar med dei andre kommunane var det klart at Øygarden hadde hatt kommunedelplan for kulturminne på høyring, mens Fjell og Sund arbeidde med temaplanar, den siste i innspurten. Prosjektleiarane for kulturminneplanane vart etter dette samde om å vente med fellesmøte til eit seinare tidspunkt. Vurdering: Arbeidsprogrammet skal gjere greie for formål med planarbeidet, planprosess medverknad og behov for utgreiingar. Rådmannen si vurdering er samla kring nokre hovudtema. Faste kulturminne og immaterielle kulturarv Planen vil fokusere på faste kulturminne; jord- og eller stadfaste kulturminne samt gjenstandar som inngår som del av kulturminne. Immateriell kulturarv som lokalhistorie, stadnamn og tradisjonar utgjer kjelder til kunnskap om kulturminne og kulturmiljø. Dei vil bli omtalt der dette er relevant for kulturminne og kulturmiljø. Vern av kulturminne og kulturminnemiljø Innkomne framlegg om vern og vøling av bygningar og bygningsmiljø vil bli vurdert for eventuell prioritering i handlingsplanen. Her vil vern gjennom bruk vera avgjerande. Vurdering av bygningar og bygningsmiljø med tilhøyrande buffersoner vil kunne danne grunnlag for framtidig bruk arealbruk ved neste rullering av kommuneplanen. Framtidig samarbeid om kulturminneplanar Fjell, Sund og Øygarden arbeider ut frå forskjellige plantypar og er i ulike fasar av planprosessane. Etter rådmannen sitt syn bør kommunane sluttfører sine kulturminneplanar i medhald av lokale føringar. På eit seinare tidspunkt vil materiale frå desse planane kunne danne grunnlag for ein kulturminneplan for den nye kommunen. Fjell kommune har invitert samarbeidskommunane til eit felles møte på nyåret.
Rådmannen rår til at framlegg til arbeidsprogram for plan for kulturminne 2016-2020 vert godkjend slik det ligg føre.