GENERELLE VILKÅR FOR TENESTEKJØP

GENERELLE VILKÅR FOR TENESTEKJØP 1. TENESTA Leverandøren skal utføre tenesta i samsvar med dei til einkvar tid gjeldande reglar som er relevante for utføringa av tenesta, og normer som gjeld for den aktuelle bransje. Leverandøren kan ikkje overdra oppdrag til ein tredjepart utan at Kunden skriftleg har godtatt dette. Eit slikt samtykke fritek ikkje Leverandøren for plikter som følgjer av avtalen. Leverandøren skal syte for at dei tilsette i eigen organisasjon og tilsette hos eventuelle underleverandørar ikkje har dårlegare løns- og arbeidstilhøve enn det som følgjer av tariffavtaler, regulativ eller det som er normalt for stad og yrke, jf. Forskrift om lønns- og arbeidsvilkår i offentlige kontraktar 8. februar 2008 nr. 112. Dette gjeld berre for tilsette som direkte medverkar til å oppfylle kontrakten. Fylkesutvalet i Hordaland fylkeskommune har vedtatt at desse vilkåra også skal gjelde for kontraktar under EØS-terskelverdi. Leverandøren skal på førespurnad leggje fram dokumentasjon om løns- og arbeidsvilkår til dei tilsette. På same vis skal Leverandøren sikre dokumentasjon frå aktuelle underleverandørar. Om Leverandøren ikkje etterlever desse pliktane, har Kunden rett til å halde tilbake delar av kontraktbeløpet til det er dokumentert at tilhøvet er kome i orden. Summen som vert halden tilbake skal tilsvare om lag 2 gonger den aktuelle innsparinga for Leverandøren. 2. PRIS Såframt ikkje anna er særskilt avtalt, skal prisane vere faste og eksklusiv meirverdiavgift, men inklusiv andre eventuelle offentlege avgifter. Vert skatte- og avgiftsreglar endra på ein slik måte at det får innverknad på prisen, skal denne endrast tilsvarande. Kunden har rett til å krevje revisjon av avtalen dersom avtalens vilkår i avtaleperioden er kome i utakt med tilsvarande vilkår for konkurrerande tenester i marknaden. Kunden betaler ikkje for tenester utover det bestillinga omfattar utan at tenesta og prisen er skriftleg godkjent av Kunden. 3. BETALING Betaling skal skje etterskotsvis innan 30 dager etter at tenesta er utført og faktura er motteken. 1

Leverandøren kan ikkje krevje gebyr i tillegg til prisen, anna enn offentlege avgifter. 4. FAKTURA Korrekt faktura skal vere så detaljert at Kunden kan kontrollere fakturerte postar opp mot det oppdraget faktureringa gjeld. Leverandøren skal leggje ved dokumentasjon som er naudsynt for at Kunden skal kunne kontrollere den fakturerte summen. Dersom Kunden nektar å godta motteken faktura, skal dei gje varsel til Leverandøren om dette innan fakturaen sin dato for forfall. Varsel skal innehalde informasjon om kva Kunden meiner manglar for at faktura skal være korrekt. Leverandøren skal utan ugrunna opphald rette opp dei manglar som ligg føre ved faktura, og sende kreditnota og ny korrekt faktura til Kunden. 5. STATISTIKK OG SAMARBEID På førespurnad skal Leverandøren, utan kostnad for Kunden, utarbeide statistikk over leveransar og kostnader. Kunden og Leverandøren har eit felles ansvar for å leggje til rette for aktivt samarbeid med sikte på å oppnå større effektivitet i alle ledd i avtaleforholdet. 6. MISLEGHALD FRÅ KONSULENTEN SI SIDE 6.1 Misleghald Det ligg føre misleghald hjå Leverandøren i følgjande tilfelle: dersom tenesta ikkje tilfredsstiller dei krav eller dekker dei føremål som går fram av spesifikasjonen av oppdraget. dersom kvaliteten på tenesta ikkje er i samsvar med dei normer som gjeld for den aktuelle bransjen. dersom Leverandøren overskrir avtalte tids- og ressursrammer. I høve til ein ekstraordinær situasjon (force majeure), vert avtala ikkje rekna som misleghalden i den tidslengd force majeure situasjonen held fram. Force majeure er ei uføresett hending utanfor Leverandøren sin kontroll, t.d. krig eller krigsliknande handlingar, terrorisme, naturkatastrofar. Streik, boikott eller liknande som gjeld Leverandøren sine tilsette vert ikkje rekna for å vere hendingar utanfor Leverandøren sin kontroll. Dersom force majeure situasjonen held fram meir enn 100 dagar, kan kvar av partane seie opp avtala med 30 dagars varsel. 6.2. Retting av mangel Dersom Kunden meiner at Leverandøren ikkje utfører tenesta i samsvar med kontrakten, må han reklamere skriftleg utan ugrunna opphald. 2

Dersom tenesta er mangelfullt utført og det er reklamert i rett tid, er Leverandøren forplikta til å starte retting av mangelen omgåande. Arbeidet skal fullførast snarast mogleg. Retting kan skje ved utbetring, omlevering eller tilleggslevering eller på annan måte slik at tenesta vert oppfylt i samsvar med kontrakten. Dersom Leverandøren ikkje har byrja arbeidet med å avhjelpe mangelen omgåande eller innan avtalt tid dersom Kunden har gjeven ein tilleggsfrist, kan Kunden la tredjepart rette mangelen for Leverandøren si rekning etter nærare varsel. 6.3. Retting mot vederlag Dersom Kunden krev at Leverandøren foretar retting, og Leverandøren meiner at behovet for retting ikkje skuldast feil eller mangel som Leverandøren svarar for, plikter Leverandøren likevel å forta retting etter ptk 6.2. For at Leverandøren seinare skal kunne gjera gjeldande krav på vederlag for retting, må han på førehand ha levert eit forpliktande pristilbod for rettinga til Kunden. Dersom Leverandøren kan dokumentere at retting er ytt for manglar eller feil som Leverandøren ikkje er ansvarlig for, kan Leverandøren krevje dekning for kostnader i samsvar med det forpliktande pristilbodet. 6.4. Tilbakehaldsrett Ved misleghald frå Leverandøren si side kan Kunden halde tilbake så stor del av vederlaget som er påkravd for å avhjelpe verknadene av misleghaldet, inntil mislighaldet er retta opp. Der det ligg føre forventa misleghald, har Kunden rett til å innstille si yting og halde ytinga tilbake fram til Leverandøren stiller sikkerheit for si yting. Kunden må straks gi Leverandøren melding om dette. Dersom ikkje slik melding vert gjeven, kan Leverandøren krevje erstatta tap som kunne vore unngått dersom melding hadde vore gjeven. Om forventa misleghald, sjå pkt. 8. 6.5. Prisavslag Dersom det utførte oppdrag ikkje tilfredsstiller dei krava som følgjer av avtaleforholdet og konsulenten ikkje oppfyller si plikt til å utbetre, har Kunden krav på forholdsmessig prisavslag. Prisavslag er kompensasjon for redusert verdi av det leverte, og kjem i tillegg til eventuell erstatning. 6.6. Dagbot Ved forseinka levering som ikkje skuldast Kunden eller force majeure, kan Kunden krevje dagsbot på 0,5% per kalenderdag så lenge misleghaldet varar. Samla dagsbøter kan likevel ikkje overstige 10% av prisen på den del av tenestekjøpet som er misleghalden. Når dagsbotperioden er gått ut, vert forseinkinga rekna som vesentleg misleghald, jf. pkt. 8. 3

6.7. Erstatning for tap Kunden kan krevje erstatning for alle dokumenterte direkte tap han har som følgje av Leverandøren sitt misleghald. Skuldast misleghaldet grov aktløyse eller forsett frå Leverandøren si side eller nokon han svarar for, kan Kunden i tillegg krevje indirekte tap og eventuelt konsekvenstap erstatta. 7. MISLEGHALD FRÅ KUNDEN SI SIDE 7.1. Misleghald Det ligg føre misleghald frå Kunden si side dersom Kunden ikkje oppfyller sine plikter etter avtalen. Unntak gjeld ved force majeure situasjon, jf. tilsvarande pkt. 6.1. Dersom misleghald frå Kunden hindrar Leverandøren i å oppfylle kontraktsforpliktingar, skal dette ikkje reknast som kontraktbrot frå Leverandøren. Leverandøren kan ikkje halde tilbake si teneste som følgje av misleghald frå Kunden. Dette gjeld likevel ikkje dersom misleghaldet er vesentleg. Leverandøren skal utan ugrunna opphald skriftleg varsle dersom han meiner at Kunden sine ytingar ikkje er i samsvar med kontrakten eller det ligg føre andre forhold som hindrar han i å oppfylle kontrakten, og som han meiner er Kunden sitt ansvar/ risiko. Dersom han ikkje gir slikt varsel, kan han ikkje gjere gjeldande forholda som grunnlag for fritak for ansvar for svik i eigne ytingar. Han kan heller ikkje gjere gjeldande forholda som grunnlag for erstatning. Dersom Leverandøren varslar om svikt i ytingane til Kunden i rett tid, skal kunden utan ugrunna opphald skriftleg svare på varselet, med klar melding om korleis Leverandøren skal innretta seg. Leverandøren kan fastsetje ein rimeleg tilleggsfrist for oppfylling av Kunden sine plikter etter kontrakten. 7.2. Morarente Dersom Kunden ikkje betaler det forfalne beløp til rett tid, har Leverandøren krav på morarente i samsvar med Lov om renter ved forsinket betaling m.m. av 17. desember 1979 nr. 100. (Forsinkelsesrenteloven). 7.3. Erstatning Dersom Kunden i aktløyse eller ved forsett forseinkar Leverandøren sitt arbeid med oppdraget og dette gjer at Leverandøren vert påført økonomisk tap, kan Leverandøren krevje tapet erstatta av Kunden. 8. HEVING AV AVTALEN Ved vesentleg misleghald av avtalen kan avtalen seiast opp av begge partar med augeblikkleg verknad. Avtalen vert rekna for å vere vesentleg misleghalden i følgjande tilfeller: 4

- Ved forseinking frå konsulenten, dersom forseinkinga varar utover dagbotperioden jf. pkt 6.6, eller der forseinkinga fører til at verdien av tenesta vert redusert vesentleg for Kunden. Dersom Leverandøren er innvilga ein tilleggsfrist kan Kunden likevel ikkje heve kontrakten før etter at fristen er gått ut. Dette gjeld likevel ikkje der Leverandøren har varsla at han ikkje vil levere innan denne fristen. - Ved forseinka betaling frå Kunden der kunden ikkje har betalt innan 30 dagar etter forfall. Dersom Kunden er innvilga tilleggsfrist for betaling kan Leverandøren ikkje heve kontrakten før etter utløpet av denne fristen. Dette gjeld likevel ikkje dersom Kunden har varsla at han ikkje kjem til å betale innan utløpet av slik frist. - Ved grove funksjonsmanglar som gjer at tenesta ikkje vert utført i samsvar med kontrakten. Før heving kan setjast i verk, skal den parten som ønskjer å heve, skriftleg ha gjeve den andre parten ein rimeleg frist til å rette forholdet, med varsel om heving dersom retting ikkje skjer. - Ved forventa misleghald, der det etter inngåing av kontrakt er klart på bakgrunn av handlemåten til parten, eller ein alvorleg svikt i parten sin kredittverdigheit eller evne til å oppfylle, at han ikkje kjem til å oppfylle ein vesentleg del av sine pliktar etter kontrakten. Heving kan avverjast dersom parten stiller sikkerheit for sine plikter. - Ved rettskraftig dom der Leverandøren er dømt for deltaking i ein kriminell organisasjon eller for korrupsjon, bedrageri, eller kvitvasking av pengar, eller er kjent skyldig i straffbare forhold som gjeld den yrkesmessige vandel. - Ved opning av gjeldsforhandlingar, akkord eller konkurs i verksemda til Leverandøren eller Leverandøren har innstilt verksemda er under avvikling eller er i tilsvarande prosess med heimel i nasjonale lover og forskrifter. - Brot på reglane om reklame, jf. pkt 11. - Brot på krav om gjengs løns- og arbeidsvilkår, jf. pkt.1. Dersom ikkje slike forhold vert retta opp utan ugrunna opphald, utgjer forholdet eit vesentleg kontraktbrot som fører til hevingsrett for Kunden. Heving av kontrakten skjer ved skriftleg erklæring til den andre parten. 8.1 Erstatning når Kunden hevar kontrakten Når Kunden hevar, kan han krevje erstatta nødvendige meirutgifter for å få utført teneste av same kvalitet og omfang som var kontraktsfesta mellom partane, frå hevingstidspunktet til det tidspunkt kontrakten ordinært har sitt opphør. 8.2 Erstatning når Leverandøren hevar kontrakten Når Leverandøren hevar, kan han krevje erstatta tapt forteneste frå hevingstidspunktet til det tidspunkt kontrakten ordinært har sitt opphør, samt eventuelle direkte påreknelege utgifter. 5

9. ENDRINGAR Kunden har rett til å føreskrive endringar av einkvar art, som naturleg ville kunne forventast på avtaletidspunktet. Ei endring kan gå ut på at Leverandøren skal yte noko i tillegg til eller i staden for det opphavleg avtalte. Endringar vert først sett i verk etter skriftleg varsel frå Kunden. Kunden skal betale for endringar som påfører Leverandøren kostnader som går utover dei avtalte vilkåra. 10. OPPSEIING Såframt det skulle bli naudsynt, kan Kunden skriftleg seie opp kontrakten heilt eller delvis. Slik oppseiing skal grunngjevast og skal fastsette opphøyrsdato og kva Leverandøren skal foreta seg i samband med oppseiinga. Dersom oppseiinga ikkje skuldast misleghald frå Leverandøren si side som gjev Kunden rett til å heve kjøpet, har Leverandøren krav på betaling for alt utført arbeid. Kunden har i tillegg plikt til å dekke påviselege kostnader og tap som Leverandøren er påført som følgje av oppseiinga. Dersom Leverandøren ikkje treff rimelege tiltak for å avgrense kostnadene ved oppseiinga, skal det endelege vederlaget reduserast tilsvarande. 11. RETT TIL RESULTAT Kunden har eksklusiv eigedomsrett til resultat av oppdraget etterkvart som det blir utført. Dokument, teikningar og dataprogram som vert utvikla som følgje av oppdraget vert rekna som del av resultatet. Leverandøren skal innhente førehandsgodkjenning frå Kunden dersom denne, for reklameføremål eller på annan måte, ønskjer å gje offentlegheita informasjon om avtalen eller resultat ut over generell referanse. 12. TEIEPLIKT Personalet til Kunden skal overhalde teieplikt i samsvar med reglane i lov av 10. februar 1967 (forvaltningslova). Leverandøren og hans personell har tilsvarande ein plikt til å overhalde teiepliktreglane i forvaltningslova. Teieplikta gjeld partane sine tilsette, underleverandørar eller tredjepartar som handlar på deira vegne i samband med gjennomføring av kontrakten. 6

Teieplikta er ikkje til hinder for at Kunden kan utnytte erfaring og kompetanse som vert opparbeidd i samband med gjennomføring av kontrakten. Teieplikt etter reglane nemnt ovanfor er ikkje til hinder for utlevering av informasjon som kan krevjast lagt fram i samsvar med lov eller forskrift, herunder lov av 19. mai 2006 (offentleglova). Teieplikta gjeld også etter at avtalen er opphøyrd. Tilsette eller andre som sluttar i teneste hos ein av partane skal verte pålagt teieplikt også etter at dei har trede ut av stilling om forhold nemnt ovanfor. Informasjon som Kunden blir kjent med i samband med kontrakten, og gjennomføring av kontrakten skal behandlast konfidensielt og ikkje gjerast tilgjengelig for utanforståande utan samtykke frå den andre parten. Leverandøren skal følgje dei same reglane som dei som gjeld for personalet til Kunden i høve til sikring av konfidensiell informasjon. 13. TVISTESPØRSMÅL Dersom det oppstår tvistar i samband med kontrakten, skal saka søkjast løyst ved forhandlingar. Fører forhandlingane ikkje fram skal saka avgjerast av dei ordinære domstolane, med mindre partane blir samde om å bringe saka inn til avgjerd for voldgift. At ein tvist er brakt inn for avgjerd for domstol eller voldgift, fritar i seg sjølv ikkje partane frå å oppfylle sine plikter etter avtalen. Dersom ikkje anna er avtalt, skal norsk rett leggjast til grunn for løysing av tvistar. Bergen tingrett er verneting dersom partane ikkje kan bli samde om annan stad. 7