Forskingsutvalet Protokoll: Møte i Forskingsutvalet (FU) nr 7/2014. Tid: Tysdag 14. oktober kl 12.15-14.00. Møterom: BK 220 (VIP-romet). Faste medlemmer: Eining Møtt Per Halse (leiar) Rektor X Ketil Jarl Halse (nestleiar) ASH (dekan) X Inger Marie Okkenhaug ASH X Arne Myklebust AHL (dekan) X Peder Haug AHL Anders Aschim (vara for Haug) AHL Aud Folkestad AKF (dekan) X Karen Brænne AKF X Sverre Liestøl AMF (dekan) X Pål Aam AMF X Anne Randi Fagerlid Festøy Stipendiatane X Alexandra Endresen Studenttinget X Serghei Levcenco Studenttinget X Sakshandsamar og skrivar: Johann Roppen FoU-rådgivar X Observatørar: Jacob Kjøde jr Direktør, HVO X Bente Gunn Lien Biblioteket, HVO X Geir Tangen FoU-konsulent, HVO X Finn Ove Båtevik Møreforsking Volda X Elisabeth Maråk Støle Direktør, Møreforsking AS FU sak 43-2014 Godkjenning av møteinnkalling og sakliste. Jørgen Amdam orienterte i starten av møtet orientere om Fjordkonferansen 2015. Jf sak 49-2014. Nye studentreprensentantar er valde av studenttinget. Oppdatert liste over medlemmer i Forskingsutvalet ligg på utvalets nettsider og som vedlegg til protokoll. Møteinnkalling og sakliste godkjend. FU sak 44-2014 Godkjenning av protokoll frå FU-møte 6/2014, 16. september Framlegg til offentleg protokoll låg som vedlegg 1 i sakspapira. Protokoll godkjend. FU sak 41-2014 Utlysing av stipendiatstillingar (teken opp att frå førre møte) Vedlegg 2: Utkast til stillingsutlysing av 8 stipendiatstillingar.
2 Saka vart drøfta på FU møte 6/2014, 19. juni 2014 utan at det vart gjort vedtak. Saka vert no teken opp på nytt. Nytt i saksførebuinga er at ut frå diskusjonen i førre møte vert det lagt fram eit utkast til stillingsutlysing. Endeleg stillingsutlysing blir gjort i samråd med personalkontoret. Det er viktig at avdelingane og fagmiljøa får tydeleg beskjed om at denne utlysinga skil seg frå tidlegare utlysingar ved at den ikkje er avgrensa til bestemte prosjekt men er langt meir open. På den andre sida blir det då i større grad opp til fagfolk og aktuelle søkjarar å finne fram til kvarandre og å utvikle prosjekta i lag. Eitt viktig moment i utlysinga er at ph.d.-utdanninga i helse- og sosial både må ha eit visst omfang av studentar for å kunne kome i gang på forsvarleg vis hausten 2015, noko det er teke høgde for i samarbeidsavtalen med Høgskolen i Molde. Vidare vil studentar på vår eiga ph.d.-utdanninga få ein enklare opptaksprosess ved at dei kan få opptak lokalt gjennom vårt eige ph.d.-utval og ikkje må gå vegen om opptak ved annan institusjon. Vedtak: Utlysingsteksten vert justert i tråd med det som kom fram i drøfting på møtet, og ny versjon vert lagt fram for dekanane før utlysing. FU sak 45-2014 SHP-søknadene evaluering av prosess Merknad til saksutgreiinga: FoU-rådgivar deltek på Forskingsrådets SHP-konferanse 8.-9. oktober 2014 der prosessen omkring årets tildeling er tema og vil på møtet i Forskingsutvalet kome med oppdatert informasjon. Forskingsutvalet har som oppgåve blant anna å prioritere mellom forskingssøknader. Forskingrådet informerte tidleg i 2013 om at det ville bli lyst ut ein ny runde strategiske høgskuleprosjekt (SHP) med søknadsfrist tidleg i 2014. Etter mønster frå tidlegare utlysingar og grep gjort ved andre høgskular som har fått gjennomslag for SHP-prosjekt vart fagmiljøa ved HVO i mai 2013 inviterte til å kome med framlegg til aktuelle SHP-prosjekt, og samtidig vart det sett av kr 300.000 i satsingsmidlar til fordeling mellom prosjekta som vart prioriterte.
3 På Forskingsutvalets møte i juni 2013 vart dei innkomne framlegga behandla under FU-sak 39/2013. Dei fire innkomne søknadene vart vurderte, og tre av dei vart prioriterte. Ein fjerde søknad fekk midlar til prosjektutvikling, men fekk ikkje høve til å søkje om SHP-midlar. Tre prosjekt vart så utvikla og søknader sende. Prosjekttitlane står nedanfor, og tittelen er nytta er den som blei brukt på den endelege prosjektsøknaden: «BE MOVED - How artful experiences may facilitate change.» Prosjektleiar: Marit Ulvund, AKF. «Literature and History: Norwegian Angles» Prosjektleiar: Giuliano d Amico, AHL. «Framing Professional Responsibility.Professional Practice and Reflexive Governing in the Welfare State. Challenges and Dilemmas.» Prosjektleiar: Tor-Johan Ekeland, ASH. Alle dei tre søknadene vart sende innan fristen 12. februar 2014. I alt mottok Forskingsrådet 55 søknader. To søknader vart avviste. Forskingsrådet offentleggjorde resultatet av søknadsbehandlinga i e-post til prosjektleiarane i juni 2014. 1 Resultatet blei at Høgskulen i Volda heller ikkje denne gongen fekk gjennomslag for sine søknader. Forskingsrådet har gjort greie for hovudresultatet i vurderinga av alle dei 55 SHP-søknadene. 2 Karakterskalaen til evaluerarane går frå 0 til 7, med 7 som beste karakter. Fordelinga på søknader mellom ulike karakterar går fram av tabellen nedanfor. I tabellen står også gjennomsnittsfordeling på hovudkarakterar på FRISAM (Frie midlar, samfunnsfag). Det syner seg at det er stor likskap i karakterfordelinga mellom SHP og FRISAM - særleg i det øvste karaktersjiktet. 3 I alt Hovudkarakter 1 2 3 4 5 6 7 Ta prosjekt SHP 0 0 9 16 17 9 2 53 Fordeling SHP 17 % 30 % 32 % 17 % 4 % 100 % Fordeling FRISAM 1 % 4 % 12 % 32 % 28 % 18 % 5 % 100 % Det er ikkje offentleg kjent kva som var karakteren til prosjekta som fekk gjennomslag, men sidan det var 7 prosjekt som fekk tilslag er det klart at heller ikkje prosjekt som får hovudkarakteren 6 er sikra løyving. Voldas prosjekt fekk hovudkarakteren 3, 4 og 4 og var nok eit stykke frå å få løyving. Av dei 7 prosjekta som fekk tilslag gjekk tre til det ein kan kalle spissa eller eineståande norske fagmiljø: Politihøgskolen, Samisk høgskole og Høgskolen Stord Haugesund (einaste høgskule som 1 http://www.forskningsradet.no/no/artikkel/shp_soknadsresultat_frist_1222014/1253997414160?lang=no 2 http://www.forskningsradet.no/en/article/shp_outcome_of_assessment_process_with_deadline_1222014/12539974141 99 3 Forskingsrådet: Fri prosjektstøtte. Oppsummering av søknadsbehandlingen for 2013.
4 utdannar branningeniørar). Dei fire siste prosjekta gjekk til fagområde innanfor helseinformasjon, skule og psykisk helse, betongteknologi og fornybar energi. Prosjektet innan fornybar energi gjekk til Høgskulen i Sogn og Fjordane som dermed også i 2014 fekk tildelt eit SHP-prosjekt - det femte SHP-prosjektet til høgskulen i Sogn og Fjordane. Tema for 2014- prosjektet var lokale konsekvensar av utbygging av fornybar energi, og er eit prosjekt basert på avdeling for ingeniør- og naturfag ved høgskulen og avdeling for økonomi. Vestlandsforsking har også arbeidd med desse og nærliggande spørsmål over lang tid og har blant anna fått VRI-midlar i arbeidet. Prosjektet har i tillegg fire nasjonale og fire utanlandske samarbeidspartnarar. Sogn og Fjordane Fylkeskommune vedtok i sak 0022/14 at fylket skulle gje eit bidrag til prosjektet med kr 850.000. Av sakspapira går det også fram at Sparebanken Sogn og Fjordane og Sogn og Fjordane Energi har gått inn i prosjektet med til saman 3,4 millionar kroner. Høgskulen i Sogn og Fjordane fekk også i 2013 gjennomslag for eit prosjekt der sterk regional støtte og partnarskap var avgjerande for at prosjektet skulle bli realisert. 4 Det er vanskeleg å sjå at regionale miljø kan gje særleg sterkare støtte til eit forskingsprosjekt enn å stille opp så mykje som har vorte gjort i Sogn og Fjordane. Også SHP-prosjekta tildelt Høgskolen i Hedmark og Høgskolen i Sør-Trøndelag hadde tydelege regionale samarbeidspartar som Elverum kommune, Bergen kommune og Trondheim kommune. Saksbehandlar sine merknader: FoU-rådgivar Johann Roppen er saksbehandlar i denne saka og følgde også opp dei tre prosjekta. FoU-rådgivar si rolle var å følgje med på prosessen, delta på prosjektmøte, sette opp utkast til budsjett og elles rettleie i spørsmål av formell og uformell karakter i høve til Forskingsrådets signal. Det er blant anna laga ei sjekkliste på ca 70 punkt ut frå slike krav. Prosjektleiarane seier seg stort sett nøgde med den administrative støtta i prosjektarbeidet. Dei tre prosjektsøknadene som vart sende frå Høgskulen i Volda hadde nokre fellestrekk: Dei sprang ut av fagmiljø som har lagt for dagen ambisjonar for utvikling dei siste åra. Blant anna fekk alle dei tre søknadsmiljøa ulike former for stønader frå den interne programsatsinga. Å levere ein forskingssøknad var ei naturleg vidareføring av tidlegare arbeid innanfor kultur og helse, litteratur og historie og i tilknytning til den planlagte ph.d.-utdanninga i helse og sosial. 4 http://www.forskningsradet.no/servlet/satellite?blobcol=urldata&blobheader=application%2fpdf&blobheadername1=co ntent- Disposition%3A&blobheadervalue1=+attachment%3B+filename%3D%22SigmundAnderssen.pdf%22&blobkey=id&blo btable=mungoblobs&blobwhere=1274502628790&ssbinary=true
5 Alle dei tre søknadsmiljøa har kompetanse både på professor og førstekompetansenivå. Alle dei tre søknadsmiljøa hadde i større eller mindre grad samarbeid med internasjonale partnarar. Forskingssamarbeidet er ikkje mykje utvikla i form av til dømes sampublisering eller gjennomføring av felles forskingsprosjekt. På den andre sida må det noterast at to av prosjekta i beste fall har svak forankring til masterutdanning. Tidlegare kunne SHP-prosjekt grunngjevast med at prosjekta skulle medverke til å byggje opp fagmiljø rundt masterutdanningar ved høgskulane. No er det såpass mange mastermiljø både i Volda og andre stader at dette nok ikkje er eit tungt argument lenger. Dei tre fagmiljøa hadde frå starten av ikkje ein klar prosjektleiar dette vart avklara undervegs i prosessen og handla mykje om praktiske spørsmål som å få undervisningsplanar til å gå opp. Ein generell kommentar frå dei eksterne fagfellene er at den indre samanhengen mellom hovudprosjekt og delprosjekt var for svak i søknadene. Dette er ein type kommentar som tyder på at prosjektleiarane hadde for lita tid til å utvikle søknadene. HVO har ein stor jobb å gjere med å vidareutvikle fagfolk til å kunne ta rolla som prosjektleiarar på framtidige prosjekt. Det at HVO for tida har få eksternt finansierte forskingsprosjekt i arbeid kan lett føre til ein sjølvforsterkande negativ spiral. Få prosjekt gjer at det ikkje blir utvikla prosjektleiarar, som igjen fører til at det ikkje blir utvikla nye prosjekt. Møreforsking og UH Nett Vest er døme på arenaer som er tilgjengelege for prosjektutvikling. Regionale aktørar gav Høgskulen i Sogn og Fjordanes SHP-prosjekt tilskot på ca kr 4 millionar under føresetnad av at det vart oppnådd gjennomslag for SHP-prosjektet. Dette betyr ikkje at høgskulen hadde 4 mill tilgjengeleg til å utvikle prosjektet, men med ein slik gevinst i potten var det nok lettare for høgskulen å prioritere betydelege interne ressursar til søknadsarbeidet, samtidig som sjansane for gjennomslag truleg auka sterkt. HVOs interne støtte på kr kr 75.000 framstår i lys av dette som små midlar. Samtidig er det vanskeleg å vite om HVO hadde klart å prioritere eitt av prosjekta internt og deretter vore i stand til å fått ekstern støtte til prosjekta frå eksterne aktørar. Høgskulen i Sogn og Fjordane framstår etter dei to siste SHP-rundane som svært god til å knytte regionale samarbeid. HVOs fagområde konkurrerer om merksemd og fylkeskommunalt fokus og ressursar med aktørar som maritim og marine næringsklynger som står svært sterkt i Møre og Romsdal og til tider kan HVO framstå som marginalisert i sitt eige fylke. Samarbeidet med Høgskolen i Molde og andre aktørar knytt til ph.d.- studiet potensiale til å kunne få ei slik rolle i vår region. Høgskulen i Volda har i sin strategiplan sagt at høgskulen i Volda skal vere høgskulen for samfunnsog humanvitskapane i Møre og Romsdal. Humanistiske og kunstfaglege prosjekt har vel knapt nok vorte prioritert i SHP-samanheng tidlegare, og ein kan difor lure på om det er ei strategisk feilvurdering av HVO å løfte fram prosjekt frå desse fagområda. Eventuelt må HVO arbeide for å få
6 endra måten Forskingsrådet arbeider på. Prosjektleiarane på dei to prosjekta er då også i tvil om SHP-ordninga høver for deira fagområde, men ser føre seg andre former for forskingssamarbeid i åra som kjem. Kvar er dei strategiske vala frå høgskulens side, som aktuelle prosjekt kan støtte seg på? Har vi for stort mangfald? Ingen av dei interne forskingsprogramma ved HVO som fekk midlar til «store prosjekt» i åra 2012-2015 deltok i denne søknadsrunden. Det kan framstå som noko inkonsekvent at høgskulen først peikar ut tre forskingsgrupper og gjev dei store interne satingsmidlar, for deretter å oppleve at prosjekta og prosjektleiarane ikkje melder seg på når det kjem eit høve til å få verkeleg store eksterne forskingsmidlar. Det bør her nemnast at eitt aktuelt prosjekt tydeleg hadde oversett søknadsfristen og prøvde å kome inn i prosessen på eit seinare tidspunkt, noko som vart avvist av forskingsutvalet. Programma vert omtala i ei eiga sak på neste møte i Forskingsutvalet. Vedtak: a) Forskingsutvalet vil beklage at HVO heller ikkje i 2014 fekk gjennomslag for SHP-prosjekt. Forskingsutvalet takkar dei tre fagmiljøa og særleg prosjektleiarane for innsatsen dei har gjort i søknadsprosessen. b) Forskingsutvalet bør vurdere grundig prosessen omkring prioritering av prosjektsøknader i god tid før liknande utlysingar igjen blir tilgjengelege. FU sak 46-2014 Forskingsgrupper ved HVO Vedlegg 3: Program for forskingsgruppeseminar 15. september 2014. Presentasjonar frå seminaret er tilgjengelege her: https://www.dropbox.com/sh/chq9z9x5rwksx9t/aad26xhzdn9c3cr-j0yca1rba?dl=0 Vedlegg 4: Samandrag av svar på kartlegging av forskingsgrupper. Bakgrunn: Denne saka er ei oppfølgjing av sak 22-2014 Forskingsgrupper ved HVO, eit internt seminar om forskingsgrupper og forskingssamarbeid som vart halde 15. september 2014 og dessutan ei pågåande kartleggjing av forskingsgrupper ved HVO.
7 Saka må også sjåast i samanheng med budsjettarbeidet for 2015 og at dei store interne programsatsingane går ut i 2015 og det dermed er eit godt tidspunkt å vurdere tidlegare satsingar og vurdere vidareføring, utviding eller omleggingar. Hovudpunkt frå seminaret 15. september: På seminaret 15. september deltok ca 50 tilsette frå Høgskulen i Volda i tillegg til tre eksterne gjester. Dei som heldt innlegg var frå HVO rektor, Peder Haug, Rune Kvalsund, Marie Nedregotten Sørbø og Jan Inge Sørbø. Frå Høgskolen i Molde heldt professor Eva Gjengedal og viserektor for forsking Harald Hjelle innlegg. Frå Senter for helseforsking i Sogn og Fjordane heldt senterleiar Marit Solheim innlegg. Møreforsking Molde AS har i praksis vore Høgskolen i Moldes oppdragsforskingsinstitutt i 30-40 år. Høgskulen er ikkje sjølv «geara til å drive prosjektadministrasjon». Møreforsking Molde har ca 24 tilsette og gjekk i 2013 med eit overskot på ca 1 mill og vil få meir i 2014. Fordelane ved å ha Møreforsking Molde sett frå Høgskolens side er auke høve til ekstraarbeid for tilsette, potensiale for dobbelt uttelling: Både ekstrainntekt og meriterande forsking, Møreforsking Molde AS kan fungere som rekrutteringsbase for nye faglege tilsette, og Møreforsking Molde kan vere meir fleksibel til dømes ved tilsettingar enn det høgskulen klarer. Fire av ca 20 forskingsgrupper ved Høgskolen i Molde har medlemmer både frå Høgskolen og frå Møreforsking. Hovudressursane er den einskilde forskarens forskingstid + ekstern finansiering. Medlemskap i gruppene er friviljug. Høgskolen har ambisjonar om å utvikle gruppene gjennom krysslæring, større søknadsaktivitet, auka publiseringsaktivitet og å gjere dei til gode arenaer for ph.d.-studentar. Høgskulen i Sogn og Fjordane og Helse Førde var begge for ca 8-9 år sidan utsette for kritikk fordi forskingsaktiviteten var låg. Senter for Helseforsking vart etablert som ein fellesinstitusjon, med Marit Solheim som leiar. Målet var å dra saman for å stå sterkare og å utnytte ressursane betre. Så langt har dette gjeve gode resultat gjennom auka forskingsinntekter, auka publisering og auka kompetanse. Eit viktig hinder var å skape ein felles «vi»-kultur dette skulle bli ei reelt samarbeid. Det har blant anna skjedd i form av delte stillingar mellom institusjonane. Eit fellestrekk ved Molde og Sogn og Fjordane er at dei har hatt ei meir positiv utvikling enn Volda dei siste åra når det gjeld samla aktivitet, særleg i høve til å skaffe eksterne forskingsmidlar. Dette har skjedd trass i at forskingsaktiviteten ved dei to høgskulane og Helse Førde var på eit lågt omfang for 4-8 år sidan. Førebelse resultat frå undersøking av forskingsgrupper:
8 FoU-administrasjonen har besøkt avdelingane ved HVO for å kartlegge kva forskingsgrupper som finst. Det rår noko uvisse i avdelingane om kva ei forskingsgruppe er, og kva aktivitetar og omfang som skal til for å kvalifisere til ein slik tittel. Få eller ingen av forskingsgrupper vert presenterte på nettsidene til HVO. For å finne ut meir om forskingsgruppene vart det difor sendt e-post til aktuelle kontaktpersonar i alt 20 grupper. Ni forskingsgrupper har så langt levert svar. Samandrag av svara ligg i vedlegg 4. Kartlegginga bør gjennomførast med purring slik at alle gruppene leverer svar. Svara så langt syner at slett ikkje alle forskingsgruppene oppfattar seg sjølve som forskingsgrupper. Somme reknar seg meir som meir eller mindre permanente seminar. I høve til strategiske mål som internasjonalisering, å dra med studentar i forsking og å skaffe eksterne prosjektinntekter er det mykje å gå på. Studentar er i liten grad med i gruppene, gruppene har med eit par unntak nær ikkje klart å skaffe eksterne inntekter, men orienterer seg internasjonalt. Dei meiner at å drive forskingsprogram og i mindre grad utviklingsarbeid - er ei viktig oppgåve for gruppene. Alle forskingsgruppene har nasjonale eller internasjonale samarbeidspartar. Få av gruppene er optimistiske med tanke på å skaffe eksterne prosjektinntekter. Fleire av gruppene som så langt ikkje har svara på undersøkinga driv faktisk forskingsprosjekt, og svara vil difor kunne endre seg når dei blir med i kartlegginga. Saksbehandlar si vurdering: Det bør leggast til rette for måtar å stimulere aktiviteten i forskingsgruppene på. Det kan vere tiltak som såkornmidlar, tildeling av tid til leiing av forskingsgrupper og avgrensa driftsmidlar til forskingsgrupper som oppfyller eit sett av krav til omfang, aktivitetsnivå, inkludering av studentar og internasjonalisering. Vedtak: a) Arbeidet med å kartlegge og synleggjere forskingsgrupper ved Høgskulen i Volda bør halde fram. b) Til neste møte i Forskingsutvalet vert det lagt fram forslag til tiltak som kan auke aktiviteten i forskingsgruppene.
9 FU sak 47-2014 Søknad om stønad til utanlandsopphald (UOFF). Saksutgreiinga er ikkje offentleg fordi den inneheld opplysningar om private forhold (Offentleglova 13, forvaltningslova 13) og idear til forskingsprosjekt (Offentleglova 26, 4. ledd). FU sak 48-2014 Rapport frå Forskingsdagane 2014 Vedlegg 5: Oppsummering av Forskingsdagane 2014 ved FoU-konsulent Geir Tangen. Bakgrunn: Nasjonalt tema for Forskingsdagane i 2014 var «Kommunikasjon». Forskingsdagane 2014 ved Høgskulen i Volda vart arrangert i tida 19.-23. september 2014. I alt vart det gjennomført 22 arrangement med ei blanding av dag- og kveldstidsarrangement, arrangement i Volda/Ørsta og i andre kommunar og med varierte former for formidling frå føredrag til Pecha Kucha truleg for første gong i regi av Høgskulen i Volda. Dei direkte kostnadene ved Forskingsdagane var i 2014 litt over kr 100.000. I tillegg kjem naturlegvis arbeidstid til tilsette som har vore involvert i arbeidet på FoU-kontoret, infokontoret og alle forskarane si tid til å førebu og framføre innlegga. Omfanget på dette er vanskeleg å stipulere, men dei 22 arrangementa kravd nok ca 50 personar som kanskje utførte ca 1 dagsverk kvar altså ca to månadsverk. FoU-kontoret og infokontorets tidsbruk handlar nok også om fleire månadsverk til saman. Fagleg tilsette har formidling som ein del av sitt arbeid, men saknar ofte arenaer til formidling. Formidlinga som blir generert av Forskingsdagane er nok i stor grad eit resultat av Forskingsdagane sjølv, og den nasjonale festivalen det er ein del av. Saksbehandlar si vurdering: Det er verdifullt og inspirerande å sjå at Forskingsdagane både utviklar seg når det gjeld programformer og innhald, men også geografisk ved at fleire arrangement har vorte lagt til andre kommunar enn Volda og Ørsta. Dette bør vidareførast i 2015. HVO kan også vere nøgd med at arrangementet har vorte meir kompakt og fokusert når det gjeld tidsbruk, noko som er i tråd med kommentarar frå Forskingsutvalet i samband med Forskingsdagane for 2013.
10 Forskingsdagane er eit stort arrangement som Høgskulen i Volda i fleire år har brukt store ressursar på. Som forskingsformidling er Forskingsdagane ein etablert institusjon som ein skal vere varsam med å endre mykje på. Samtidig er det klart at Høgskulen i Volda har store utfordringar når det gjeld å formidle det store, mangfaldige og verdifulle arbeidet som foregår ved Høgskulen. Vi treng både fleire og styrka samarbeid med aktørane i regionen, og samarbeid om arrangement under Forskingsdagane er ein måte å nå dette målet på. Det er alltid ein fare for at Forskingsdagane får størst betydning og merksemd internt på HVO. Årets forskingsdagar fekk bra gjennomslag i lokale og regionale media. Ekstern formidling må skje heile året. FoU-kontoret ønskjer i samarbeid med KEV og Infokontoret å sette forskingsfomidling på dagsorden og vil kome tilbake med ei samla vurdering av dette seinare. I dette bildet er det viktig å få ei vurdering frå Forskingsutvalet av Forskingsdagane si rolle i forskingsformidlinga ved HVO. Vedtak: a) Forskingsutvalet vil takke bidragsytarar og koordinator for Forskingsdagane 2014 for vel utført arbeid, som har sett FoU-arbeid ved Høgskulen i Volda på kartet, både lokalt, regionalt og nasjonalt. b) Forskingsdagane bør også i åra framover vere eit viktig element i høgskulens strategi for forskingsformidling. c) Forskingsdagane for 2015 bør arrangerast over same lest som Forskingsdagane 2014. FU sak 49-2014 Fjordkonferansen 2014 Vedlegg 6: Dokument frå Jørgen Amdam: Bakgrunnsmateriale for Fjordkonferansen og førebels plan for Fjordkonferansen for 2015. Bakgrunn: Fjordkonferansen har vorte arrangert i 2013 og 2014 og vil bli arrangert for tredje gong i juni 2015. Konferansen er i stor grad finansiert av ei løyving frå Sparebanken Sogn og Fjordane og er eit samarbeidstiltak for fagfok frå høgskulane i Møre og Romsdal og Sogn og Fjordane. I 2015 blir Høgskulen i Volda igjen arrangør av konferansen, med professor Jørgen Amdam som fagleg leiar.
11 Saksbehandlar si vurdering: Fjordkonferansen er eit verdifullt tiltak både som samarbeidsarena mellom høgskulane i Møre og Romsdal og Sogn og Fjordane men også som lågterskeltilbod for forskarar som er i startgropa når det gjeld publisering. Fjordkonferansen har også delvis vore ein arena for stipendiatar og andre i kvalifiseringsløp. Det er difor bra at konferansen held fram også i 2015. Det komande året må dei involverte høgskulane bli samde om ein modell for vidare drift av konferansen og kome fram til ein samarbeidsavtale om korleis det skal gjennomførast. Det er viktig også med administrativ kontinuitet i denne typen av arrangement. For framtidige konferansar kan Høgskulen i Voldas kompetanse når det gjeld forskingsformidling og konferanselogistikk stillast til rådvelde for konferansen slik at alternerande arrangørar kan konsentrere seg om det faglege innhaldet i konferansen. Vedtak: a) Forskingsutvalet støttar planane frå Jørgen Amdam når det gjeld Fjordkonferansen 2015 og oppmodar han om å søkje om midlar til konferansen. b) Høgskulen i Volda vil støtte konferansen i 2015 ved å drifte nettsider, ordne med påmeldingar og å drive formidling frå det faglege innhaldet på konferansen. Orienteringssaker: O1: Regionale møte med KD ang kvalitet og struktur i høgre utdanning (SAKS-møte). Rektor orienterer på møtet. O2: Referat frå møte i publiseringsutvalet. Sjå vedlegg 7. O3: FoU-melding for 2014 FoU-meldinga vart handsama i møte 6/2014, men Forskingsutvalet ønskja seg meir omtale av utviklingsprosjekt ved avdelingane. Avdelingane fekk frist til fredag 3. oktober til å kome med
12 omtale av utviklingsprosjekt og svara er innarbeidde i ein revidert versjon av Forskingsmeldinga. Denne blir ettersendt. Andre orienteringssaker: Doktorgradsdisputasar: o Ingen nye Søknader om midlar: o UH Nett Vest Tildeling til Nettverk for barnevernsforsking (kr 50.000). o Regional forskingsfond Midt-Norge, institusjonsprosjekt Digital journalistikk (AMF/AKF) Aschim (AHL/Møreforsking) o Rådet for anvendt medieforsking Digital journalistikk (AMF/AKF) o Innovasjon Norge - Trondheim Kompetanseutvikling i regionale næringsmiljø (AMF/AKF) Møte, arrangement med meir: o 15. september 2014: Seminar ang forskargrupper og forskingssamarbeid, HVO. o 17. september: Regionalt møte ang kvalitet og struktur i høgare utdanning. o 17.-18. september 2014: Utdanning for framtidas arbeidsliv, Ålesund. o 19.-23. september 2014: Forskingsdagane 2014, Volda/Ørsta/Ulstein/Herøy. o 20.-12. november 2014: Media and the second Cold War 1975-1991, HVO. o 10.-11. mars 2015: Solstrand-seminar (UH Nett Vest), Solstrand Os. o 18.-19. juni 2015: Fjordkonferansen 2015, Loen. Vedlegg: 1) Framlegg til offentleg protokoll frå FU-møte 6/2014, 16. september. 2) Utlysingstekst for 8 stipendiatstillingar 3) Program for forskingsgruppeseminar 15. september 2014. Presentasjonar frå seminaret er tilgjengelege her: https://www.dropbox.com/sh/chq9z9x5rwksx9t/aad26xhzdn9c3crj0yca1rba?dl=0 4) Samandrag av svar på kartlegging av forskingsgrupper. 5) Oppsummering av Forskingsdagane 2014 ved FoU-konsulent Geir Tangen. 6) Dokument frå Jørgen Amdam: Bakgrunnsmateriale for Fjordkonferansen og førebels plan for Fjordkonferansen for 2015. 7) Referat frå møte i publiseringsutvalet. 8) Oppdatert liste over medlemmer i Forskingsutvalet (vart delt ut på møtet).
13