SENIORUNIVERSITETET I SOGN Årsmelding for 2012 2012 har vore det andre heile driftsåret for SUS «Senioruniversitetet i Sogn». I løpet av året har SUS i tråd med vedtektene gjennomført ulike typar program med hovudvekt på foredragskvelder og turar. I løpet av året har styret hatt 5 ordinære styremøte. Alle møta er haldne på HiSF/ALI. I tillegg til ordinære styremøte har styret i samband med fleire av arrangementa handsama mindre saker og spørsmål. Styret har i løpet av året arbeidd med å setja saman foredragsprogrammet og andre aktivitetar i regi av SUS. Aktivitetsprogram, økonomi, marknadsføring og medlemsverving er viktige stikkord for arbeidet i styret. Johs. Thaule har hatt hovudansvaret for innkalling, førebuing og oppfølging av vedtak i styret. I 2012 tok Erland Fagermoen over oppgåva som kasserar i SUS, og i løpet av våren oppnemnde styret Johs. Thaule, Erland Fagermoen og Bjørg Rimeslaatten som arbeidsutval i styret. Arbeidsutvalet har ikkje hatt eigne møte, men har i samband med framdrifta av einskilde saker hatt kontakt via telefon og e-post. Styret sende mot slutten av året inn melding til Brønnøysundregistra for registrering der. Etter at dette vert i orden, vil SUS få tildelt eit offentleg organisasjonsnummer. I planlegginga, gjennomføringa og oppfølginga av tiltak og aktivitetane i regi av senioruniversitetet, har styret hatt godt samarbeid med og svært god nytte av - Høgskulen i Sogn og Fjordane. Styret takkar HiSF for dette samarbeidet og fordi høgskulen stiller kontor og kontorfasilitetar til rådvelde for styreleiar i SUS, og for drifting av heimesida. Styret vil og takka Sogn Folkemuseum for samarbeidet om gjennomføringa av foredragsarrangementa på museet. Museet og dei tilsette har også i 2012 ytt god hjelp og sørvis for SUS. Årsmeldinga er lagt opp slik at vi i den første delen listar opp aktivitetane gjennom året, og vi summerer opp økonomien og rekneskapen. Vi avsluttar den innleiande delen med å sjå framover. I den andre delen kjem det utfyllande opplysningar om dei ulike arrangementa og om rekneskapen. 1
Styret i 2012 På årsmøtet 12. januar 2012 var det leiar i valnemnda Tor Eikemo som leia vala på grunnlag av framlegg frå valnemnda. Resultat: Johs. Thaule, leiar (1år) Styremedlemer (2 år): Bjørn Sørheim Sogndal, Inger Øyre Sogndal, Gerd Kleiven Sogndal. I tillegg sit frå før (1 år): Erland Fagermoen Balestrand, Bjørg Rimeslaatten Sogndal, Oddlaug Walaker Solvorn, Varamedl. til styret (1 år): Randi Berge Leikanger, Svein Are Ylvisåker Sogndal, Liv Berit Ellingsen Sogndal Revisorar (1 år): Kjell Skjeldestad Sogndal og Gunn S. Bremer Leikanger. Valnemnd: Tor Eikemo leiar og Turid Sivertsen og Jon Farestveit. Styret i SUS 2012: Framme frå venstre: Gerd Kleiven, Liv Berit Ellingsen, Inger Øyre, Randi Berge og Bjørg Rimeslaatten. Bak frå venstre: Svein Arne Ylvisåker, Erland Fagermoen, Johs. Thaule, Oddlaug Walaker og Bjørn Sørheim. 2
Medlemsverving I samband med årsmøtet starta SUS ei kampanje for medlemsverving der styremedlemer og andre medlemer i foreininga vart oppmoda om å ta direkte kontakt med mogleg interesserte med sikte på medlemskap. Walaker hotell i Solvorn sa seg viljug til å sponsa premie i form av middag for to på hotellet for den som verva flest nye medlemmer. Fleire var flinke å verva, og ved avsluttinga av vervinga ved påsketider var det Gerd Kleiven som vann prisen for beste vervar (7 nye medlemer) tett følgt av Randi Berge (6 medlemer). Vi takkar vervarane for innsatsen og Walaker hotell for vervepremien. Gjennom kampanjen for medlemsverving og andre informasjonstiltak frå SUS har medlemstalet i 2012 vokse frå 51 til 83 betalande medlemer. Dette må seiast å vera ei god utvikling i medlemstalet. Informasjon og marknadsføring SUS har elles informert om verksemda og arrangementa via heimesida, men av ulike grunnar har informasjonen på heimesida vore noko mangelfull til tider. Styret har som ansvar og mål å få etablert ein betre praksis for driftinga av heimesida i tida framover. Annonsering av alle arrangementa har saman med pressemeldingar vore plasserte i Sogn Avis. Vi er glade for at avisa også som regel tek inn pressemeldinga vi sender i samband med annonseringa. Dei fleste medlemene i SUS har også e-postadresse, og før kvart arrangement får difor medlemene tilsendt e-post med melding og omtale av arrangementet. Sjølv om dei fleste e- postane kjem fram, har det vist seg at medlemer med e-postadresse har vorte utelatne. I nokre tilfelle har dette skuldast feil i e-postlistene. Dette er beklageleg, og vi vil prøva å retta opp denne typen feil ved e-postutsendingane våre. I løpet av året har vi også fått følgt opp Indre Sogn Sparebank si økonomiske støtte på kr. 10.000,- som vi i 2012 fekk etter søknad. Etter tilsegn om støtte tok vi ny kontakt med banken, og dei har no også betalt trykking av dei nye visittkorta som vi fekk laga tidleg i haust. SUS takkar Indre Sogn Sparebank for denne støtta, og vi vonar på framhald i sponsorsamarbeidet med banken. Fram- og baksida av det nye visittkortet er sett inn nedanfor. 3
Foredragsprogrammet I driftsåret har SUS gjennomført desse foredragsarrangementa med namn på foredragshaldaren og foredragstittelen.: Turar - 12. januar: Ivar Bjarne Underdal: Foredrag om «Nærøyfjorden verdsarvområde». - 15. februar: Gunnar Danbolt. Foredrag om «Kvifor kunst er viktig?» - 13. mars: Merete Johnsen Dale. Foredrag om «Kva er demens og korleis møter vi utfordringane?» - 8. mai: Per Egil Hegge: «Noreg og Russland» - 22. august: Hallvard Trohaug: «Lærdalskunstnaren Hans Gjesme». - 26. september: Rasmus Sunde: «Den norske utvandringa til Amerika med døme frå Sogn» - 22. oktober: Børge Sivertsen: «Søvn og søvnvanskar gjennom livet» - 15. november: Berit Ås: «Likeverd og likestilling i eit framtidsperspektiv». I tråd med målsettinga for SUS, har vi også i 2012 arrangert fleire turar. To av turane har blitt arrangert i kombinasjon med foredrag som er lagt til andre stadar enn Sogndal. 16. februar: Tur til Balestrand med opphald og guiding på Kviknes hotell og ein guida tur i Balestrand med lunsj på Ciderhuset. 22. august: Tur til Lærdal med foredrag og guida tur på gamle Lærdalsøyri 30. september: Tur til Opera Nordfjord på Nordfjordeid. Økonomi og rekneskap Rekneskapen for året viser eit overskot på kr. 4539,83. I banken pr. 31.12.2012 kr. 8550,83. Planar for arbeidet framover SUS har hatt ei god medlemsutvikling i 2012, og frammøtet på foredraga vil vi karakterisera som bra og i nokre tilfelle svært bra. Det krev sjølvsagt arbeid å skaffa gode foredragshaldarar. I løpet av året har vi fått gjennomgåande gode og rosande tilbakemeldingar frå tilhøyrarane på foredragskveldane. 4
Det er eit mål for framtida å halda oppe god kvalitet på foredragsarrangementa, og vi vil halda fram med i størst mogleg grad å kunna tilby betalande medlemer gratis inngang på slike arrangement samstundes som vi legg opp til halda på praksisen med inngangspengar for ikkjemedlemer. Eit foredragsarrangement i månaden utanom i feriemånader er eit naturleg mål for framtida. Sjølv om oppslutnaden om arrangementa i 2012 har vore god, er det ei utfordring for SUS å framstå som eit breiddetilbod for folk flest over 60 år. Organisasjonen må difor leggja vekt på folkeopplysningsperspektivet og den sosiale dimensjonen i verksemda vår. I tråd med målsettinga om å utvikla seg vidare som breiddetilbod, ligg det og eit mål om i aukande grad å bli eit tilbod for seniorar i heile sogneregionen. Vi ønskjer difor m.a å halda fram med å arrangera turar i regionen og gjerne kombinera turane med foredragsarrangement på staden vi reiser til. Ved sida av å arbeida med å få på plass gode foredragshaldarar, har styret ved fleire høve også hatt temaet «turar» oppe til diskusjon. Også turarrangement krev arbeid og organisering, og det kan difor vera føremålstenleg å etablera ei undergruppe som får meir ansvar for førebuing og gjennomføring av turar. Vi har tidlegare i 2011 også lagt opp til å gjennomføra kurs for medlemene i SUS. Sjølv om påmeldinga til våre datakurs i 2011 var for svak, kan det også i framtida vera aktuelt å gjennomføra ulike typar kursverksemd for SUS-medlemene. Auken i medlemstalet har vore god i 2012, men vi ser det også som viktig å kunna halda fram med å arbeida for auke i medlemstalet. Ved sida av marknadsføring gjennom annonser, visittkort og heimeside m.v, er gode arrangement og aktiv medlemsverving. I arbeidet for ei god utvikling av SUS, vil samarbeid med andre institusjonar og lag vera positivt. Sjølv om SUS i høve nokre arrangement har hatt noko samarbeid med andre, ser vi det som positivt å kunna utvikla slikt samarbeid vidare. Døme på samarbeidstiltak kan vera samordna bruk av foredragshaldar, felles turar o.a. Aktive medlemer og innspel til styret er viktige bidrag til å utvikla SUS vidare i 2013 og i åra framover. ----------------------------------------------------- 5
Utfyllande orientering om arrangementa og rekneskapen 2012 Foredragsprogrammet: Nedanfor følgjer ei orientering om foredragsarrangementa 2012. I tråd med vår målsetting om å vera eit tilbod for seniorar i heile Sogn, har senioruniversitetet lagt vekt på å kombinera nokre av foredraga med turar til kommunar i Indre og Midtre Sogn. Andre foredrag er gjennomførde på Sogn Folkemuseum. Januarforedraget vart gjennomført i samband med at vi arrangerte årsmøtet same kvelden. I kombinasjon med årsmøtet starta vi foredragsserien på Sogn Folkemuseum. På foredragsarrangementa har det jamt over vore godt frammøte, og arrangementa har også fungert godt som arena for medlemsverving. Frammøtet har variert mellom om lag 60 og opp mot 100. Inngangspengar for ikkje-medlemer har og sytt for eit bra økonomiske tilskot. I gjennomgangen nedanfor har vi ført opp foredragstitlane og vi gir en kort presentasjon av foredragshaldarane. 12. januar: Ivar Bjarne Underdal: Foredrag om «Nærøyfjorden verdsarvpark». Nærøyfjorden verdsarvpark er no blitt ein realitet, og verdsarvparken har ambisjon om å vera premissleverandør for kvalitet og bærekraft i heile Fjord-Norge. Tidlegare ordførar i Aurland Ivar Bjarne Underdal og pådrivar for opprettinga av verdsarvområdet rundt Nærøyfjorden - heldt 12. januar foredrag på Sogn Folkemuseum om «Nærøyfjorden verdsarvpark». Vår plan var å kombinera foredraget med ein guida tur i verdsarvområdet i løpet av mai månad, men som følgje av noko for svak påmelding måtte turen avlysast. Ivar Bjarne Underdal 6
15. februar: Gunnar Danbolt: «Kvifor er kunst viktig» Gunnar Danbolt Gunnar Danbolt gjennomførde foredraget sitt 15. februar. Danbolt er professor i europeisk kunsthistorie ved Universitetet i Bergen. Han har skrive ei rad bøker og artiklar om maleri og skulptur frå antikken, middelalderen og renessansen, og om moderne kunst, kunstteori, kunsthandverk og barnekultur. Han er mykje nytta som foredragshaldar og har motteke prisar for si evne til å formidla kunst og kunsthistorie. I samband med at Danbolt sitt foredrag på Kviknes hotell i Balestrand arrangerte vi ein kunstog opplevingstur til Balestrand med utvida program, middag og overnatting. For dei som vart med på heile programmet i Balestrand, hadde vi fått eit godt tilbod frå Kviknes hotell om middag og overnatting med frukost. Om lag 30 av dei frammøtte nytta tilbodet om overnatting og guida tur. Etter frukost starta kulturvandringa frå Høyviksalen på hotellet før deltakarane gjekk vidare over kaien med orientering om historia til kunstnarkolonien i Balestrand, Balahaugen med Fridjovsagaen og eit par av drakestilsvillaene før vandringa enda vandringa i Ciderhuset med lunsj for dei som ville det.. 13. mars: Merete Johnsen Dale. Foredrag om «Kva er demens og korleis møter vi utfordringane?» Foredragshaldaren var førstelektor ved sjukepleieutdanninga til HiSF Merete Johnsen Dale. Ho har i fleire år arbeidd mykje med problematikk knytt til demens. Ho har m.a bak seg artiklar i fagtidsskrift og aviser om demens og det å leva med demens og med demente i nære omgjevnader. Merete Johnsen Dale 7
8. mai: Per Egil Hegge: «Noreg og Russland» Foredraget var lagt til 8.mai på Sogn Folkemuseum. Hegge har vore m.a redaktør i Aftenposten, korrespondent i Washington, London og Moskva. Han er i dag også kjent for den faste språkspalta han har i Aftenposten. Hegge har også bak seg ein stor bokproduksjon, og har m.a skrive bøker om USA, Sovjetunionen/Russland. Per Egil Hegge 22. august: Hallvard Trohaug: «Lærdalskunstnaren Hans Gjesme». Foredrag på Sogn Kunstsenter Gjesmegalleriet og guida tur på Lærdalsøyri. Foredraget til Trohaug 22.8 var lagt til Sogn Kunstsenter Gjesmegalleriet i Lærdal, og vart etterfølgt av ein guida rundtur på gamle Lærdalsøyri med orientering om trehusarkitekturen på staden. (Sjå nærare omtale og bilete under avsnittet om «turar») 28. september: Rasmus Sunde: «Den norske utvandringa til Amerika med døme frå Sogn» 26. september held Sunde foredraget sitt på Sogn Folkemuseum. Sunde er frå Vik, oppvaksen i Jølster og busett i Balestrand. Han er historikar med doktorgrad i migrasjonshistorie, og tidlegare førsteamanuensis ved Høgskulen i Sogn og Fjordane. No er Sunde sjølve ein aktiv pensjonist både som reiseleiar og som foredragshaldar. Han har m.a skrive fleire bøker om migrasjonshistorie Rasmus Sunde 8
22. oktober: Børge Sivertsen: «Søvn og søvnvanskar gjennom livet» Foredraget 22. september på Sogn Folkemuseum var det professor i psykologi - Børge Sivertsen som sto for. Han er oppvaksen i Sogndal, og arbeider no på Psykologisk fakultet på Universitetet i Bergen.Sivertsen er ein anerkjent forskar på søvn og søvnvanskar og korleis vi kan møta slike problem. Søvnvanskar er mellom dei vanlegaste helseplagene i befolkninga. Dette er vanskar som kan føra til ei rekke ulike negative konsekvensar, noko som ikkje minst gjeld oss seniorar. Den vanlegaste behandlinga helsevesenet tilbyr for søvnvanskar er sovemedisinar. Dette skjer sjølv om vi veit at bruk av sovemedisin utover nokre veker fører med seg risiko for å bli avhengig med behov for stadig aukande doser. I forskinga si har Sivertsen m.a arbeidd mykje med å finna fram til psykologiske alternativ til sovemedisinar, og han har funne at ulike psykologiske teknikkar verkar betre enn sovemedisin. Børge Sivertsen - og ei lydhøyr forsamling på Sogn Folkemuseum 15. november: Berit Ås: «Likeverd og likestilling i eit framtidsperspektiv». Torsdag 15. november hadde pensjonert psykologiprofessor Berit Ås ansvar for foredraget på Sogn Folkemuseum. Foredragshaldaren er kjent som mangeårig forkjempar for likestilling og likeverd mellom kvinner og menn. Men ho har og bak seg ei akademisk og politiske karriere. Ho avslutta si akademiske karriere som professor i sosialpsykologi på Universitetet i Oslo i 1994. Hennar faglege innsats omfattar mellom anna studiar av kvinnekultur, økonomi og andre sosiale problemstillingar. På den faglege sida er ho kanskje mest kjent for sitt arbeid 9
omkring hersketeknikkar basert på studiar av korleis kommunikasjonen mellom kjønna kan fungera som maktmiddel. Berit Ås identifiserte hersketeknikkane, og med det ga ho mange kvinner (og andre) ein nøkkel til å forstå kva som skjer når dei ikkje vert lytta til eller blir overkøyrde på andre måtar. Berit Ås Turar i 2012 ----------------------------------- I tråd med målsettinga for SUS, har vi også i 2012 arrangert fleire turar. To av turane har blitt arrangert i kombinasjon med foredrag som er lagt til andre stadar enn Sogndal. Balestrandturen 15. 16. februar Den første av desse turane var turen til Balestrand med opphald og guiding på Kviknes hotell og ein guida tur i Balestrand med lunsj på Ciderhuset. Om lag 30 personar nytta overnattingstilbodet på Kviknes hotell 15. februar etter Gunnar Danbolt sitt foredrag, og gruppa var og med på den guida turen den 16. Lærdalsturen 22. august Den andre var ein kombinasjonstur til Sogn Kunstsenter Gjesmegalleriet og foredrag om lærdalskunstnaren Hans Gjesme ved arkitekt Halvor Trohaug som etter foredraget viste oss rundt og fortalde om gamle Lærdalsøyri. Om lag 30 personar var med på denne turen. Biletet nedanfor viser Trohaug som her er i gang med omvisinga for turdeltakarar på gamle Lærdalsøyri. 10
Halvard Trohaug guidar SUS-folk på Lærdalsøyri Operatur til Nordfjordeid 30. september 30. september arrangerte SUS tur til Opera Nordfjord på Nordfjordeid med Inger Øyre frå SUS som organisator og reiseleiar. Til og frå Nordfjord reiste den store gruppa operainteresserte vel 30 personar med felles og eigen busstransport. Før SUS-folket inntok operaen for å sjå og høyra førestillinga «Madama Butterfly», hadde gruppa felles middag på Nordfjord hotell. Arbeidet med informasjon, påmelding, innkrevjing av betaling og gjennomføring av ein slik tur er arbeidskrevjande, og vi vil takka Inger Øyre for arbeidet ho la ned i samband med denne turen. ----------------------------------------- 11
Senioruniversitetet i Sogn REKNESKAP 2012 Inntekter: 2012 konto 3705 19 20792 konto 3730 04 21904 Tilskot IS Sparebank kr 10 000,00 Medl.kontingent kr 33 600,00 kr 1 200,00 Inngangspenger kr 5 500,00 kr 2 000,00 Inntekt operatur kr 14 150,00 Turkonto kr 1 300,00 Mottat del av honorar kr 1 250,00 Renter kr 40,00 kr 0,83 Sum inntekter kr 65 840,00 I SFspbank pr. 1/1-12 kr 4 011,00 Utgifter: 2012 Honorar/reise kr 33 907,50 Annonser kr 13 909,00 Porto, kopiering kr 334,00 Blomster kr 789,00 Regnskapsbok kr 79,00 Utgift operatur kr 13 950,00 Turkonto kr 1 300,00 Utlegg arr. kr 75,00 Overf.ISSp kr 4 819,00 kr 4 819,00 Gebyr kr 157,50 Sum utgifter kr 69 320,00 I SFspbank pr. 31/12-12 kr 531,00 I ISspbank pr, 31/12-12 kr 8 019,83 kr 69 851,00 kr 69 851,00 Overskot i 2012: kr 4539,83 Sogn & Fjordane spbank kr 531,00 Indre Sogn spbank kr 8 019,83 Aktiva pr. 1.1.2013: kr 8 550,83 Balestrand, 5.januar 2013 Erland Fagermoen Kjell Skjeldestad Gunn S. Bremer kasserar revisorar 12
13