ENDELEG TILSYNSRAPPORT

Midsund kommune v/rådmannen 6475 MIDSUND ENDELEG TILSYNSRAPPORT Tilsyn med Midsund kommune som barnehagemyndigheit 30.09.2014 Saksnummer: 14/3820 Fylkesmannen i Møre og Romsdal Maren Ørjasæter Aaland og Silje Veronika Reinaas

Innhald Samandrag... 4 1 Innleiing... 4 2 Om tilsynet med Midsund kommune... 4 2.1 Fylkesmannen fører tilsyn med kommunen som barnehagemyndigheit... 4 2.2 Tema for tilsyn... 4 2.3 Om gjennomføringa av tilsynet... 5 2.4 Om tilsynsrapporten... 6 3. Barnehagelova 8: Kommunen som barnehagemyndigheit... 6 3.1 Rettslege krav... 6 3.2 Fylkesmannen sine undersøkingar... 6 3.3 Fylkesmannen sine vurderingar... 7 3.4 Fylkesmannen sin konklusjon... 7 4. Barnehagelova 10: Godkjenning av barnehagar... 7 4.1 Rettslege krav... 7 4.2 Fylkesmannen sine undersøkingar... 8 4.3 Fylkesmannen sine vurderingar... 8 4.4 Fylkesmannen sin konklusjon... 8 5. Barnehagelova 12a: Rett til plass i barnehage... 8 5.1 Rettslege krav... 8 5.2 Fylkesmannen sine undersøkingar... 9 5.3 Fylkesmannen sine vurderingar... 9 5.4 Fylkesmannen sin konklusjon... 9 6. Barnehagelova 16, jf. 8 første ledd: Kommunen sitt tilsyn med barnehagane... 9 6.1 Rettslege krav... 9 6.2 Fylkesmannen sine undersøkingar...10 6.3 Fylkesmannen sine vurderingar...10 6.4 Fylkesmannen sin konklusjon...10 7. Barnehagelova 16, jf. Forskrift om pedagogisk bemanning 1: Kommunen sitt tilsyn med at barnehagane har tilstrekkeleg pedagogisk bemanning...10 7.1 Rettslege krav...10 7.2 Fylkesmannen sine undersøkingar...11 7.3 Fylkesmannen sine vurderingar...11 7.4 Fylkesmannen sin konklusjon...11 8. Barnehagelova 16 jf. 19: Kommunen sitt tilsyn med at barnehagane etterlever krava om politiattest...11 8.1 Rettslege krav...11

8.2 Fylkesmannen sine undersøkingar...12 8.3 Fylkesmannen sine vurderingar...12 8.4 Fylkesmannen sin konklusjon...12 9. Barnehagelova 16 jf. 22: Kommunen sitt tilsyn med at barnehagane etterlever krava om opplysingsplikt til barnevernet...12 9.1 Rettslege krav...12 9.2 Fylkesmannen sine undersøkingar...13 9.3 Fylkesmannen sine vurderingar...13 9.4 Fylkesmannen sin konklusjon...13 10. Frist for retting av lovbrot...13 11. Kommunen sin frist til å rette...14

Samandrag Fylkesmannen i Møre og Romsdal har gjennomført tilsyn med Midsund kommune som barnehagemyndigheit. Tilsynet er gjennomført som systemrevisjon og det vart avdekka lovbrot under tilsynet. Rapporten vart lagt fram for Midsund kommune på avtalt sluttmøte 13.11.2014. 1 Innleiing Fylkesmannen har i perioden frå 19.06.2014 til dags dato gjennomført tilsyn med kommunen som barnehagemyndigheit i Midsund kommune. I denne tilsynsrapporten er det fastsett frist for retting av lovbrot som er avdekte under tilsynet. Fristen er 15.03.2015. Dersom lovbrota ikkje er retta innan fristen, vil Fylkesmannen i Møre og Romsdal vedta pålegg om retting med heimel i kommunelova 60 d. 2 Om tilsynet med Midsund kommune 2.1 Fylkesmannen fører tilsyn med kommunen som barnehagemyndigheit Fylkesmannen fører tilsyn med kommunen som barnehagemyndigheit, jf. barnehagelova 9 andre ledd. Fylkesmannens tilsyn med kommunen som barnehagemyndigheit er tilsyn med det lovpålagde, jf. kommunelova 60 b. Fylkesmannen sitt tilsyn med kommunen som barnehagemyndigheit er utøving av myndigheit og skjer i samsvar med reglane for dette i forvaltningsretten. Tilsynet skal vere prega av openheit, likebehandling og at det er etterprøvbart og effektivt. I dei tilfella der Fylkesmannen konkluderer med at eit rettsleg krav ikkje er oppfylt, blir dette sett på som lovbrot, uavhengig av om det er barnehagelova eller forskrifter fastsett i medhald av denne lova som er brotne. Tilsynet er retta inn mot i kva grad kommunen oppfyller krav innanfor oppgitte emne, og rapporten viser lovbrot og merknader om dette vert avdekt under tilsynet. Rapporten gir såleis inga fullstendig tilstandsvurdering av kommunen som barnehagemyndigheit. 2.2 Tema for tilsyn Tilsynet vart varsla i brev frå Fylkesmannen i Møre og Romsdal 19.06.2014. Tilsynet har omfatta kommunen si rolle som barnehagemyndigheit knytt til følgjande føresegner i barnehagelova (i kraft frå 1.1.2006) med forskrifter: - Barnehagelova 8: Kommunen som barnehagemyndigheit. - Barnehagelova 10: Godkjenning. - Barnehagelova 12a: Rett til plass i barnehage. - Barnehagelova 16 jf. 8: Kommunen sitt tilsyn med barnehagane. Kommunen sitt tilsyn med barnehagane har vore eksemplifisert med følgjande føresegner: - Forskrift om pedagogisk bemanning 1. Norm for pedagogisk bemanning.

- Barnehagelova 19: Politiattest for tilsette i barnehagen. - Barnehagelova 22: Opplysingsplikt til barnevernet. Formålet med tilsynet er å vurdere om Midsund kommune har tilfredsstillande styring i forhold til regelverket. Tilsynet omhandlar m.a. å undersøke om: - aktivitetar vert utførte slik som det går fram av skriftleg dokumentasjon og gjennom intervju med sentralt plasserte personar i kommunen - kommunen driv verksemda si innanfor eigne rammer og dei rammene som styresmaktene har sett. Val av tema er gjort med utgangspunkt i sentrale og tidsaktuelle tema for sektoren. Vidare gjennom kunnskap om Midsund kommune og det at Fylkesmannen i Møre og Romsdal har planlagt å gjennomføre eit omfattande tilsyn med kommunen som barnehagemyndigheit i alle kommunane i fylket. Lovbrot på føresegnene det er valt å føre tilsyn med, vil kunne ha store konsekvensar for tryggleik og kvalitet i barnehagetilbodet. 2.3 Om gjennomføringa av tilsynet Tilsyn med Midsund kommune vart opna gjennom brev av 19.06.2014. Kommunen er blitt pålagd å leggje fram dokumentasjon for Fylkesmannen med heimel i kommunelova 60 c. Fylkesmannen sine vurderingar og konklusjonar er baserte på skriftleg dokumentasjon og opplysningar frå intervju, og ved verifikasjon av at rutinar, prosedyrar og instruksar vert følgde opp i praksis. Følgjande dokument inngår i dokumentasjonsgrunnlaget for tilsynet: Årsmelding for kommunen og barnehagane Organisasjonskart for Midsund kommune Årsplan for Midsund barnehage Årsplan for Gjerdet barnehage Vedtekter for dei kommunale barnehagane i Midsund kommune Delegasjon av tilvisingsmynde Vedtak om dispensasjon frå utdanningskravet Godkjenning av Midsund barnehage Godkjenning av Gjerdet barnehage Plan og retningslinjer for tilsyn med barnehagar i Midsund kommune Barnehageplan 2003-2006 Fordeling av ansvar knytt til barnehage Saksframlegg, godkjenning av ny barnehage Det vart gjennomført tilsyn på staden 30.09.2014. Det var intervju med: Rådmann Ketil Ugelvik Rådgivar oppvekst Lasse Alexander Strømme Styrar i Midsund barnehage Anita Bugge Styrar i Gjerdet barnehage Birgitta Hole

2.4 Om tilsynsrapporten Denne tilsynsrapporten inneheld frist for retting av ulovlege forhold avdekt under tilsyn, jf. kommunelova 60 d. Frist for retting er 15.03.2015. Dersom forholdet ikkje er retta innan den fastsette rettefristen, vil Fylkesmannen vedta pålegg om retting. Eit eventuelt pålegg om retting vil ha status som enkeltvedtak og kan klagast på etter reglane for dette i forvaltningslova, jf. forvaltningslova kapittel VI. 3. Barnehagelova 8: Kommunen som barnehagemyndigheit 3.1 Rettslege krav Kommunen er lokal barnehagemyndigheit og skal sikre eit heilskapleg barnehagetilbod som er av god kvalitet og tilpassa lokale forhold og behov. Kommunen har fått nye store oppgåver i sektoren dei seinare år, og kommunane si myndigheitsrolle er tydeleg styrka. Kommunen er godkjenningsmyndigheit, jf. barnehagelova 10 og 11. Kommunen er også tilsynsmyndigheit, jf. 16. Det inneber at kommunen har myndigheit til å føre tilsyn med den enkelte barnehageverksemd. Etter 16 kan kommunen gi pålegg om retting av ulovlege eller uforsvarlege forhold og/eller stenging av barnehagen. Det følgjer av barnehagelova 8 at (sitat): «Kommunen er lokal barnehagemyndighet. Kommunen skal gi veiledning og påse at barnehagene drives i samsvar med gjeldende regelverk.» Kommunen har eit overordna ansvar for å sikre at barna får eit godt og forsvarleg barnehagetilbod. Kommunen skal ved godkjenninga og gjennom aktiv rettleiing og tilsyn sjå til at barnehagane i kommunen vert drivne i tråd med dei krava som er sett i barnehagelova med tilhøyrande forskrifter. Det vert stilt mange krav til barnehagen sine lokale og drift også i anna regelverk, jf. mellom anna plan- og bygningslova, byggforskrifta, arbeidsmiljølova og forskrift om miljøretta helsevern i barnehagar og skoler. Helsemyndigheitene, plan- og bygningsmyndigheitene og andre har sjølv ansvaret for sine område, men barnehagemyndigheita har eit overordna ansvar for barnehagane og må leggje opp til eit nært samarbeid med dei øvrige aktuelle instansane både i godkjenningsprosessen og ved seinare tilsyn. 3.2 Fylkesmannen sine undersøkingar Fylkesmannen etterspurte i tilsynet korleis Midsund kommune tek i vare krava til myndigheitsoppgåvene i tilknyting til barnehagane. Kommunenivået har jamnlege møte med styrarane i barnehagane, og held seg på den måten orientert om situasjonen. Det er opplyst at kommunen har ein plan for tilsyn, men at det ikkje er gjennomført tilsyn. Når det gjeld godkjenningar er det i praksis ein barnehagestyrar som gjer dette arbeidet, men rådmannen (kommunenivået) signerer godkjenningar. Det er ein assisterande styrar som gjennomfører opptaket.

Kommunenivået vurderer ikkje behovet for rettleiing. Når styrarane melder behov er kommunenivået hjelpsame med å finne svar. 3.3 Fylkesmannen sine vurderingar Gjennom tilsynet fekk Fylkesmannen inntrykk av at kommunenivået ikkje tek myndigheitsrolla si på alvor/alvorleg nok. Ein får inntrykk av at kommunen set sin lit til at styrarane er så flinke at dei ikkje treng noko oppfølging og/eller kontroll. Vi finn det problematisk at kommunen ikkje har eit system for kontroll/tilsyn. På denne måten vert barnehagetilbodet personavhengig. Kommunen skal ha eit system som gjer at ein ikkje er avhengig av visse personar for å sikre at barnehagetilbodet fungerer som det skal. Vi vurderer derfor kommunen sin praksis til å ikkje vere i tråd med lovkrava. 3.4 Fylkesmannen sin konklusjon Fylkesmannen finn ikkje at Midsund kommune tek i vare myndigheitsrolla si på ein slik måte at det tilfredsstiller krava i barnehagelova 8. Fylkesmannen finn dermed grunnlag for å gi varsel om pålegg om retting. 4. Barnehagelova 10: Godkjenning av barnehagar 4.1 Rettslege krav Det følgjer av barnehagelova 10 at (sitat): «Kommunen avgjør søknad om godkjenning etter en vurdering av barnehagens egnethet i forhold til formål og innhold, jf. 1, 1a, og 2. Kommunen kan ved godkjenningen sette vilkår for driften med hensyn til antall barn, barnas alder og oppholdstid. Kommunens vedtak kan påklages fylkesmannen.» Med utgangspunkt i denne føresegna vert det stilt krav om at fysiske rammer må vere eigna til barnehagedrift. Vidare må barnehagen legge til rette for leik, livsutfalding og meiningsfylte aktivitetar og opplevingar i trygge og utfordrande omgjevnader. Barnehagen må ta omsyn til kroppslege utfordringar, samt at det vert sett gode vilkår for læring, leik, meistring og omsorg. Vidare må bemanningsplanen vise at drifta av barnehagen vil bli forsvarleg og at barnehagen kan oppfylle lova og rammeplanen sine krav til innhaldet i barnehagen. Vurderinga av om barnehagen er eigna i forhold til føremålet og innhaldet er ei vurdering som må gjerast i tillegg til andre lovfesta kriterium for godkjenning av barnehagebygg. Sjå også Ot.prp. nr. 72 (2004-05). Barnehagen skal vere godkjend etter 10 innan oppstart av barnehagedrifta. Det må gjevast ny godkjenning når endringar i barnetal/bygningsmasse tilseier dette i forhold til den gjeldande godkjenninga, vidare når barnehagen skiftar eigar. Barnehagen må til ei kvar tid vere godkjend for den verksemda ein faktisk driv.

4.2 Fylkesmannen sine undersøkingar Fylkesmannen har gått gjennom og vurdert innhaldet i innsendt dokumentasjon som m.a. inneheld gjeldande godkjenning og godkjenningsvedtak av barnehage. Vidare er opplysningar gitt i intervjua tatt med i våre vurderingar av kommunen si oppfylling av lovkrava i regelverket. 4.3 Fylkesmannen sine vurderingar Kommunen som barnehagemyndigheit skal ved handsaming av søknad om godkjenning av barnehagar gjere ei konkret vurdering av om barnehagen er eigna til barnehageverksemd i forhold til dei krava som kan utleiast av 1, 1a og 2, barnehagen sitt formål og innhald. Av desse føresegnene går det mellom anna fram at barnehagen skal vere ei pedagogisk verksemd og at barnehagen skal gi høve til leik, livsutfalding og meiningsfylte opplevingar og aktivitetar. Dette medfører krav både til utforming, innhald og bemanning. Vidare skal barnehagen vere godkjent etter 10 før oppstart av drifta av barnehagen. Etter å ha gått gjennom dokumentasjonen kan vi ikkje sjå at ein har vurdert om Gjerdet barnehage var eigna i forhold til formål og innhald, slik lova krev. Gjennom intervjua kom det heller ikkje fram opplysningar som tilseier at det har vore ei konkret vurdering av dette. Gjerdet barnehage opna 15.09.2011, men vart ikkje formelt godkjent før 06.01.2012. Lova krev at barnehagen skal vere godkjent før drifta vert sett i gang. 4.4 Fylkesmannen sin konklusjon Midsund kommune har ikkje vurdert om barnehagen er eigna i forhold til formål og innhald når dei har godkjent barnehagen, jf. barnehagelova 10, jf. 1, 1a og 2. Kommunen har heller ikkje godkjent barnehagen før drifta vart sett i gang. Fylkesmannen finn dermed grunnlag for å gi varsel om pålegg om retting. 5. Barnehagelova 12a: Rett til plass i barnehage 5.1 Rettslege krav Det følgjer av barnehagelova 12a at (sitat): «Barn som fyller ett år senest innen utgangen av august det året det søkes om barnehageplass, har etter søknad rett til å få plass i barnehage fra august i samsvar med denne loven med forskrifter. Barnet har rett til plass i barnehage i den kommunen der det er bosatt. Kommunen skal ha minimum ett opptak i året. Søknadsfrist til opptaket fastsettes av kommunen.» I tillegg til å oppfylle retten til barnehageplass i bustadkommunen til barnet frå august, bør kommunen også ha system som sikrar at kommunen har oversikt over omtrentleg behov for barnehageplassar i kommunen i den næraste framtida.

5.2 Fylkesmannen sine undersøkingar Gjennom intervjua kom det fram at kommunen har nok barnehageplassar. Kommunen opplever auke i folketalet, men det er muleg å auke talet på plassar dersom det vert naudsynt, i forhold til areal. Det kan eventuelt bli utfordrande å få tak i nok pedagogar. Kommunen har oversikt over talet på barn som vert fødd. Det er ein del tilflytting til kommunen. Dette er ikkje like føreseieleg. 5.3 Fylkesmannen sine vurderingar Fylkesmannen vurderer det slik at kommunen skaffar seg god oversikt over behovet for barnehageplassar. 5.4 Fylkesmannen sin konklusjon Alle som har rett til barnehageplass i Midsund kommune får tilbod om dette i tråd med barnehagelova 12a. 6. Barnehagelova 16, jf. 8 første ledd: Kommunen sitt tilsyn med barnehagane 6.1 Rettslege krav Det følgjer av barnehagelova 8 første ledd at (sitat): «Kommunen er lokal barnehagemyndighet. Kommunen skal gi veiledning og påse at barnehagene drives i samsvar med gjeldende regelverk.» Kommunen sitt ansvar for å sjå til at barnehagane vert drivne i tråd med gjeldande regelverk vert utdjupa i barnehagelova 16, der det står at (sitat): «Kommunen fører tilsyn med virksomheter etter denne lov. Kommunen kan gi pålegg om retting av uforsvarlige eller ulovlige forhold ved godkjente eller godkjenningspliktige virksomheter. Hvis fristen for å etterkomme pålegget ikke overholdes, eller hvis forholdet ikke lar seg rette, kan kommunen vedta tidsbegrenset eller varig stenging av virksomheten. Kommunens stengingsvedtak skal sendes fylkesmannen til orientering. Vedtak om retting og stenging kan påklages til fylkesmannen.» Kommunen skal føre tilsyn med at barnehagene i kommunen vert drivne i tråd med barnehagelova. Tilsyn er noko anna enn rettleiing, dette er ei sjølvstendig oppgåve som også ligg til kommunen som barnehagemyndigheit, jf. barnehagelova 8 første ledd. Overfor sine eigne verksemder er kommunen sitt tilsyn også heimla i kommunelova kap. 12. På grunn av at tilsynsrolla har ei viktig side mot nettopp rettleiing, er det viktig å definere tilsynet som noko som skjer ovanfrå og ned, der ei viktig oppgåve vil vere å gi pålegg til barnehagane i kommunen dersom det vert drive i strid med lovverket. Tilsynet må gjennomførast på ein måte som sikrar at eventuelle lovbrot vert oppdaga og sanksjonert. I denne samanhengen må tilsynet organiserast på ein måte som gjer at kommunen faktisk «påser» at barnehagane i kommunen vert drivne i tråd med regelverket. Barnehagelova gir ingen bindingar på korleis tilsynet skal gjennomførast, og det er opp til kommunestyret å avgjere kva for organ som skal utføre tilsynet, jf. kommunelova 10,

12 og 23. Det er viktig at ein ser til at tilsynet vert utøvd i tråd med delegasjonsreglementet i kommunen. 6.2 Fylkesmannen sine undersøkingar Fylkesmannen har gått gjennom innsendt dokumentasjon. Kommunen har ein skriftleg plan for tilsyn med barnehagane. Gjennom intervjua kom det fram at kommunen ikkje har gjennomført tilsyn. Kommunen har vore avventande fordi det vil kome ei ny barnehagelov, og meiner det framleis er usikkert kven som vil føre tilsyn med barnehagane i framtida. 6.3 Fylkesmannen sine vurderingar Slik regelverket er i dag, er det kommunen som barnehagemyndigheit som skal føre tilsyn med barnehagane i kommunen. Kommunen si rolle som tilsynsmyndigheit er å forstå som dei aktivitetane som kommunen utøver for å sikre at barnehagane vert drivne i samsvar med lov og forskrifter. I arbeidet kommunen utfører er det nokre aktivitetar som kjem inn under tilsynsomgrepet. Døme på dette er innhenting av informasjon gjennom årsplanar, rapportar, årsmeldingar og vedtekter. Dette er med på å gi kommunen innsyn i den einskilde verksemd. Kommunen har også regelmessige møte med styrarane i barnehagane. I tillegg til dette skal kommunen gjennomføre varsla tilsynsbesøk i barnehagane og hendingsbaserte tilsyn når det er behov for det. Slik er tilsynsarbeidet ei sentral oppgåve som kommunen skal utføre kontinuerleg. Barnehagelova gir ingen bindande reglar for korleis og kor ofte tilsynet skal utførast. Det må leggast til grunn at lova føreset ein viss regularitet og eit visst minimumsomfang på tilsynsverksemda. Fylkesmannen finn at Midsund kommune ikkje er nok medviten si rolle som tilsynsmyndigheit. Kommunen har laga ein plan for nokre år sidan, men den har aldri vore tatt i bruk. Det tilseier at kommunenivået eigentleg veit at kommunen er tilsynsmyndigheit, men ikkje tar det fullt ut på alvor. Det kan synest som at ein av årsakene til det er at kommunenivået finn at styrarane er svært kompetente og gjer det dei skal. Fylkesmannen har også inntrykk av at det vert arbeidd godt i barnehagane. Vi finn det likevel problematisk at kommunen ikkje fører tilsyn. Systemet vert då personavhengig. Ein vert då svært sårbar dersom ein styrar sluttar i jobben eller vert sjuk. Kommunen må ha eit system som sikrar at oppgåvene vert gjort, uavhengig av kven som innehar dei ulike stillingane. 6.4 Fylkesmannen sin konklusjon Midsund kommune fører ikkje tilsyn med barnehagane i kommunen, noko som er eit brot på barnehagelova 16, jf. 8. Fylkesmannen finn dermed grunnlag for å gi varsel om pålegg om retting. 7. Barnehagelova 16, jf. Forskrift om pedagogisk bemanning 1: Kommunen sitt tilsyn med at barnehagane har tilstrekkeleg pedagogisk bemanning 7.1 Rettslege krav Det følgjer av forskrift om pedagogisk bemanning 1 at (sitat):

«Det skal være minimum en pedagogisk leder per 14 18 barn når barna er over tre år og en pedagogisk leder per 7 9 barn når barna er under tre år og barnas daglige oppholdstid er over seks timer. I barnehager der barna har kortere oppholdstid per dag, kan barnetallet økes noe per pedagogisk leder». Norm for pedagogisk bemanning tilseier at det skal vere «en» pedagogisk leiar per 14-18/7-9 «barn». Dette inneber at ein må tilsette ein pedagog i full stilling ved inntak av det 19. eller 10. barnet. Norma gjeld heile stillingar, og tek ikkje omsyn til omfanget av opphaldstida til barna i barnehagen. Kommunen skal føre tilsyn med at denne norma vert følgd i barnehagane i kommunen. Kommunen som barnehagemyndigheit må ha ei korrekt forståing av pedagognorma. 7.2 Fylkesmannen sine undersøkingar Det kom fram under tilsynet at kommunen har ei korrekt forståing av pedagognorma og at det 10. barnet under tre år og det 19. barnet over tre år, utløyser ei ny heil stilling. Tilsynet gav fylkesmannen informasjon om at styrarane følgjer dette tett opp, og at pedagogisk bemanning vert vurdert og rekna på for kvart barn som får tilbod om barnehageplass. Kommunen, ved rådgivar, vert orientert ved innsending av årsmeldingar. 7.3 Fylkesmannen sine vurderingar Fylkesmannen vurderer det slik at styrarane i Midsund kommune har god oversikt og «påser» at barnehagane i kommunen overheld krava i forskrifta om pedagogisk bemanning. Vi kan derimot ikkje sjå at kommunen som barnehagemyndigheit «påser» dette. Fylkesmannen oppmodar kommunen som barnehagemyndigheit om å vurdere om eigen praksis sikrar oppfylling av lovkravet. Midsund kommune legg til rette for kompetanseheving for dei tilsette i barnehagane som har dispensasjon frå utdanningskravet. Fylkesmannen ser dette som svært positivt. 7.4 Fylkesmannen sin konklusjon Midsund kommune har ei korrekt forståing av innhaldet i forskrifta. Barnehagane i Midsund kommune har ein praksis for pedagogisk bemanning som er i tråd med krava i regelverket. Det vert vist til 16 om kommunen sitt tilsyn med barnehagar. 8. Barnehagelova 16 jf. 19: Kommunen sitt tilsyn med at barnehagane etterlever krava om politiattest 8.1 Rettslege krav Det følgjer av barnehagelova 19 at (sitat): «Den som skal arbeide i barnehage må legge fram tilfredsstillende politiattest. Attesten skal vise om vedkommende er siktet, tiltalt eller dømt for seksuelle overgrep mot barn. Personer som er dømt for seksuelle overgrep mot barn, er utelukket for arbeid i barnehager.

Kommunen kan kreve politiattest etter første ledd også for andre personer som regelmessig oppholder seg i barnehagen. Departementet gir utfyllende forskrifter om politiattester.» Kommunen skal føre tilsyn med at barnehagane har tilfredsstillande rutiner for framlegging av politiattest for alle som skal arbeide i barnehagen. Det er her viktig å merke seg at lova ikkje stiller krav om at den som skal legge fram politiattesten må vere tilsett i barnehagen, det er tilstrekkeleg at vedkomande skal utføre arbeid i barnehagen. Kravet gjeld dermed også personar som er tilsett hjå andre, til dømes innleigde vikarar, vaktmeistrar, reinhaldarar med meir. 8.2 Fylkesmannen sine undersøkingar Det kom fram under tilsynet at styrarane ser til at dei som arbeider i barnehagen legg fram politiattest ved tilsetting. Det vert nytta skjema og nedteikna ein merknad om at politiattest er framlagt. Vidare vert attesten makulert. Det kom imidlertid fram under tilsynet at det berre er styrar i barnehagen som kontrollerer politiattestane. Ved utlysing av ledig stilling går det fram at politiattest vil bli innhenta. Kommunenivået har ikkje ein kontrollrutine som sikrar at det faktisk vert gjort. 8.3 Fylkesmannen sine vurderingar Vi finn at barnehagane i Midsund kommune handhevar plikta til framlegging av politiattest i tråd med krava i barnehagelova. Det er lagt opp til eit system som er etterprøvbart i sak-journalsystemet i kommunen, men kommunenivået kontrollerer ikkje at slik attest vert innhenta. Fylkesmannen oppmodar kommunen som barnehagemyndigheit om å vurdere om eigen praksis stettar lovkrava på dette punktet. 8.4 Fylkesmannen sin konklusjon Barnehagane i Midsund kommune si handsaming av politiattestar ved tilsetting er i tråd med krava i barnehagelova 19. Det vert vist til 16 om kommunen sitt tilsyn med barnehagar. 9. Barnehagelova 16 jf. 22: Kommunen sitt tilsyn med at barnehagane etterlever krava om opplysingsplikt til barnevernet 9.1 Rettslege krav Det følgjer av barnehagelova 22 at (sitat): «Barnehagepersonalet skal i sitt arbeid være oppmerksom på forhold som kan føre til tiltak frå barneverntjenestens side. Utan hinder av taushetsplikt skal barnehagepersonalet av eget tiltak gi opplysninger til barneverntjenesten, når det er grunn til å tro at et barn blir mishandlet i hjemmet eller det foreligger andre former for alvorlig omsorgssvikt, jf. lov om barneverntjenester 4-10, 4-11, 4-12, eller når et barn har vist vedvarende alvorlige adferdsvansker, jf. same lov 4-24. Også etter pålegg fra de organer som er ansvarlige for gjennomføringen av lov om barneverntjenester, plikter barnehagepersonalet å gi slike opplysninger. Opplysninger skal normalt gis av styrer.»

Denne føresegna pålegg personalet i barnehagen ei plikt både til å vere merksam på forhold som kan føre til tiltak frå barneverntenesta, og å gje opplysningar til barnevernet uhindra av teieplikta. Ein føresetnad for at denne føresegna skal etterlevast i barnehagane er at personalet der er kjende med innhaldet i barneverntenesta, samt at ein kjenner til kva som ligg i omgrepet «omsorgssvikt». Spørsmålet blir dermed om kommunen fører tilsyn med at dei som arbeider i barnehagane er kjende med innhaldet i opplysingsplikta etter 22, og om denne føresegna vert etterlevd i barnehagane i kommunen. 9.2 Fylkesmannen sine undersøkingar Under tilsynet kom det fram at opplysningsplikta til barnevernet har vore tema på personalmøte i barnehagen med jamne mellomrom. Barnehagane har med i årshjulet at det skal vere gjennomgang på dette temaet med alle tilsette ein gong i året. Kommunen kjøper barneverntenester av Molde kommune. Gjennom intervjua kom det fram at Midsund kommune er veldig godt fornøgd med slik det no fungerer. Styrarane tek kontakt med barnevernet i Molde dersom dei har spørsmål. 9.3 Fylkesmannen sine vurderingar Styrarane i Midsund kommune set jamnleg søkjelys på innhaldet i opplysingsplikta overfor dei tilsette i barnehagane. Fylkesmannen finn ikkje at dette er noko kommunenivået kontrollerer eller har tilsyn med. Vår vurdering er at styrarane sitt kontinuerlege arbeid på dette området er svært positivt, men kommunenivået er ikkje involvert og kontrollerer heller ikkje at dette vert gjort. Kommunenivået finn at styrarane er svært kompetente og kjenner seg trygge på at dei gjer det dei skal. Under tilsynet kom det ikkje fram opplysningar om det motsette, men vi finn det problematisk at kommunen ikkje har eit system for kontroll/tilsyn. Fylkesmannen oppmodar kommunen som barnehagemyndigheit om å vurdere om eigen praksis sikrar oppfylling av lovkravet. 9.4 Fylkesmannen sin konklusjon Fylkesmannen konkluderer med at barnehagane i kommunen etterlever opplysingsplikta til barnevernet slik den går fram av barnehagelova 22. Det vert vist til 16 om kommunen sitt tilsyn med barnehagar. 10. Frist for retting av lovbrot Fylkesmannen har i kapitla 3, 4 og 6 konstatert lovbrot. I denne rapporten får Midsund kommune frist til å rette det ulovlege forholdet, jf. kommunelova 60 d. Frist for retting er 15.03.2015. Kommunen må innan denne datoen sende Fylkesmannen ei erklæring om at det ulovlege forholdet er retta, og ei utgreiing om korleis lovbrotet er retta. Dersom forholdet ikkje er retta innan den fastsette rettefristen, vil Fylkesmannen vedta pålegg om retting. Eit eventuelt pålegg om retting vil ha status som enkeltvedtak og kan klagast på etter reglane for dette i forvaltningslova, jf. forvaltningslova kapittel VI. Følgjande pålegg er aktuelle å vedta etter utløpet av rettefristen i denne rapporten: Kravet til at kommunen skal ta i vare myndigheitsrolla si i samsvar med barnehagelova 8

1. Midsund kommune må ta i vare myndigheitsrolla si på ein slik måte at det tilfredsstiller krava i barnehagelova 8. I samband med dette må kommunen: a. Etablere eit system for rettleiing i regelverket til barnehagane. b. Etablere eit system for å sjå til at barnehagane vert drivne i samsvar med regelverket. Kravet til kommunen sin godkjenningsmyndigheit, jf. 10 2. Midsund kommune må etablere eit system for godkjenning av barnehagar som sikrar at det vert vurdert om barnehagen er egna i forhold til formål og innhald, jf. 1, 1a og 2. a. Etablere rutinar som sikrar at ein ved handsaming av søknad om godkjenning av barnehagar, gjer ei konkret vurdering av om barnehagen er egna til barnehageverksemd i forhold til formål og innhald. b. Etablere rutinar som sikrar at barnehagen er godkjent før oppstart av barnehagedrifta. Kravet til kommunen sitt tilsyn med barnehagane, jf. 16, jf. 8 3. Midsund kommune må etablere eit system for å sjå til at barnehagane blir drivne i samsvar med regelverket. a. Etablere rutinar for tilsyn med barnehagane. 11. Kommunen sin frist til å rette Som nemnt i kapittel 10 ovanfor, har kommunen fått ein frist for å rette dei ulovlege forholda som er konstaterte i denne rapporten. Frist for tilbakemelding er 15.03.2015. Kommunen har rett til innsyn i saksdokumenta, jf. forvaltningslova 18. Silje Veronika Reinaas Fagkoordinator klage og tilsyn