Fjell kommune Arkiv: 460 Saksmappe: 2010/25-6998/2010 Sakshandsamar: Espen Elstad Dato: 09.04.2010 SAKSDOKUMENT Utvalsaksnr Utval Møtedato 27/10 Komite for finans og forvaltning 20.04.2010 Høyring - ny handsaming - uttale til klimaplan for Hordaland Samandrag av saka: Hordaland Fylkeskommune (Hfk) har utarbeida ein klimaplan som er ute på høyring hos alle kommunane i Hordaland pluss ei rekkje andre fylkeskommunar, andre offentlege instansar, interesseorganisasjonar m.v. Frist for uttale er sett til 31.mars 2010. Planen er ein regional plan heimla i Plan og bygningslova, og såleis rådgjevande i høve kommunen sin innsats på dette området. Den er bygd opp kring tre hovudtema: 1. Utslepp av klimagassar 2. Energi 3. Tilpassing til klimaendringar Planen gjev gode råd for eventuelle tiltak kring reduksjon i forbruk av energi og av klimagassutslepp. Det faglege innhaldet i planen er godt og gjennomarbeidd, medan tiltaksdelen burde vore meir konkret, t.d når det gjeld framlegg til ansvarsplassering og former for samarbeid. Mange av strategiane, mål og tiltak ligg og utanfor Fylkeskommunen sitt ansvarsfelt, men ein ser for seg eit samarbeid mot kommunar, næringsliv og andre offentlege verksemder. Planen kan vere eit tenleg supplement til Fjell kommune sin nyleg vedtekne klima, energi og miljøplan. Rådmannen saknar eit større fokus oppfølging av Kollektivmeldinga 2009 og på å løyse problemstillingane rundt kollektivtilbodet mellom Bergen og omegnskommunane. Han rår til at ein tar planen til etterretning. Referansegruppa (oppnemnt i KFF 09.03.2010) har samarbeidd med rådmannen om ny innstilling. Innstilling: Komite for finans og forvaltning gjer slikt vedtak: Fjell kommune har vurdert framlegg til Klimaplan for Hordaland 2010 2020. Planutkastet er eit grundig og gjennomarbeidd dokument som kan verta ein god referanse innan arbeidet med reduksjon av klimagassutslepp og energiforbruk.
For å gjera Hordaland mest mogleg budd på klimaendringane ber Fjell kommune om at HFK vurderar merknadene i saksutgreiinga. Straume, den 09.04.2010 Steinar Nesse Rådmann Willy Sørensen Plan- og utbyggingssjef Handsama i Komité for finans og forvaltning - 20.04.2010: Innstillinga vart samrøystes vedteke. Vedtak i Komité for finans og forvaltning - 20.04.2010: Fjell kommune har vurdert framlegg til Klimaplan for Hordaland 2010 2020. Planutkastet er eit grundig og gjennomarbeidd dokument som kan verta ein god referanse innan arbeidet med reduksjon av klimagassutslepp og energiforbruk. For å gjera Hordaland mest mogleg budd på klimaendringane ber Fjell kommune om at HFK vurderar merknadene i saksutgreiinga. Handsama i Komité for finans og forvaltning - 09.03.2010: Framlegg frå Ranveig Frøiland om at saka utsettes til neste møte i komité for finans og forvaltning. Framlegget fekk 10 røyster, mot ei røyst (Frp), og vart vedteke. Vidare sakshandsaming, samrøystes: Administrasjonen sender brev til Hordaland Fylkeskommune om at Fjell kommune vil gje uttale til klimaplan for Hordaland, og at den vert ettersendt 21.04.10. Det vart sett saman ei referansegruppe Ranveig Frøiland (Ap) Glenn Bjærum (FrP) Kjell Rune Garlid (H) Jørund Dahl (SL) Inge Ree (KrF) som skal arbeida vidare saman med administrasjonen om ei høyringsuttale som skal leggast fram for komité for finans og forvaltning i møte 20.04.10.
Vedtak i Komité for finans og forvaltning - 09.03.2010: Saka vert utsett til møte i komité for finans og forvaltning 20.04.10. Dokument relevant for saka: - Hordaland Fylkeskommune: Notat 20.08.2008: Framlegg til planprogram. - Høyringsbrev frå Hordaland Fylkeskommune, datert 17.desember 2009. - Klimaplan for Hordaland 2010-2020 samandrag, innhaldsoversyn og innleiing. (Heile planen er tilgjengeleg på fylkeskommunen si heimeside). Alle dokumenta vart sendt til medlemmane i KFF i førre møte Saksopplysningar: Komite for finans og forvaltning (KFF) vedtok i møte 09.03.2010 å utsette saka for komplettering. Det vart sett ned ei referansegruppe beståande av fem av komiteens medlemmar for å utarbeide eit framlegg til KFF. Kompletteringa er gjort til sist i rådmannen si vurderinga av saka. Hordaland Fylkeskommune (Hfk) har utarbeida framlegg til Klimaplan for Hordaland 2010-2020. Planen er ute på høyring hos alle kommunane i Hordaland pluss ei rekkje andre fylkeskommunar, andre offentlege instansar, interesseorganisasjonar m.v. Frist for uttale er sett til 31.mars 2010. Planen er ein regional plan heimla i Plan og bygningslova, og såleis rådgjevande i høve kommunen sin innsats på dette området. Planen er bygd opp kring tre hovudtema: 1. Utslepp av klimagassar 2. Energi 3. Tilpassing til klimaendringar Det er forsøkt å talfeste milepæler med tilhøyrande prosenttal for reduksjon med utgangspunkt i 1991 (år for kyotoprotokollen). Det er knytt regionale strategiar opp mot kvart hovudsatsingsområde. Klimaplanen er initiert av fylkestinget for å få ein komplett og heilskapleg handlingsplan for Hordland. Planen er ein fylkesdelplan og vert rådgjevande for kommunal og statleg planlegging i regionen. Planen har teke opp i seg det som ligg føre av forsking frå FN`s klimapanel. I 2005 vart det berekna at det samla økologiske fotavtrykket til alle menneska på jorda utgjorde 1,3 jordklode, dvs. at menneskeheita nyttar dei økologiske ressursane 1,3 gonger så fort som jorda klarar å fornye dei. Strategiar og tiltak er knytt opp mot dei venta konsekvensane fram mot år 2100, som for Hordaland er; 1,9-4,2 grader auke i temperatur 75 cm høgare havnivå (+/- 25 cm) i Bergen Opp mot 240 cm stormflo i utsette kommunar Opp mot 36 % auka nedbørsmengd Opp mot 50 % auka avrenning over året i ytre strok, mindre om sommaren, meir på hausten og vinteren Dette er bakteppe for dei delmål og tiltak som Hfk foreslår i planen. Fylkeskommunen har
arrangert høringsmøte i høringsrunden for å få konkrete innspel til utfordringane vi overfor. Hfk har ambisiøse mål for investeringar og drift i eigne verksemder. Alle einingar skal miljøsertifiserast og det er krav til vesentleg reduksjon innan både energibruk og avfallsmengd. I følgje planen skal Hordaland verte eit føregangsfylke når det gjeld forsking og produksjon av fornybar energi. Ein del av dei sentrale delmåla vert lista opp her: Utslepp av klimagassar i Hordaland skal reduserast med 22 % i 2020 i høve til 1991. Energibruk til stasjonære og prosessføremål skal reduserast med 30 % innan 2020 og 50 % innan 2050. Når det gjeld måla for avfallsmengd i fylket så er det å stoppe veksten i avfallsmengda innan 2020. Bruk av fossile brensel i bygningar skal reduserast med 80 % innan utgangen av 2013. For å få ein meir effektiv arealbruk skal kommunane mellom anna fastsetja ei langsiktig utbyggingsgrense i kommuneplanen mot LNF- områda. Hordaland skal ha et transportnett som prioriterer miljøvenleg transport. I Bergensregionen skal tal på reiser med kollektivtransport auke frå 12 % til 50 % innan 2020. Biltrafikken skal reduserast til 30 % av alle reiser i 2030. Vurdering: Rådmannen meiner planen kan vere tenleg som utgangspunkt for vidare handling kring reduksjon i forbruk av energi og av klimagassutslepp. Det faglege innhaldet i planen er godt og gjennomarbeidd, medan tiltaksdelen kunne vore meir konkret. Særlig er det mangel på ansvarsplassering som gjør planen mindre effektfull enn ønskjeleg. Det er eit mål å redusera bruk av bil til 30 % av alle reiser innan 2030. Samstundes skal ein auke mengda av gåande, syklande og dei nyttar kollektiv transport. Svakheita er at planen ikkje seier noko om ansvaret for å nå dei ulike måla. I kapitlet om næringsutvikling, er strategiane spreidd litt utover i kapitlet. Rådmannen saknar i dette kapitlet noko meir kring landbruket si rolle, og verdien av å ikkje byggje ned jordbruksland i eit klimaperspektiv. Det offentlege bør prioritere sine innkjøp mot mat med eit positivt klimarekneskap eller det bør koma fram andre tiltak for å nå strategiane for meir miljø- og klimavenleg matproduksjon. Innafor nokre av målområda er det mange framlegg til strategiar, mål og tiltak. Planen kunne vore tent med å ha nokre prioriterte tiltak for kvart målområde; det kan vera tiltak som ein ser det hastar med å setje i gang, har god effekt, er lett å setje i verk, ikkje er for kostnadskrevjande osb. Tiltaksdelen kunne vore tydelegare med ei opplisting til slutt i dokumentet. Mange av strategiane, mål og tiltak ligg og utanfor Fylkeskommunen sitt ansvarsområde, men ein ser for seg eit samarbeid mot kommunar, næringsliv og andre offentlege verksemder. Dette kunne planen ha sagt noko meir om; korleis ein kan samarbeide med andre aktørar for å nå mål, gjennomføre tiltak og gjere ansvarleg.
Samla sett meiner rådmannen at framlegg til klimaplan for Hordaland er eit grundig dokument som kan verta eit godt reiskap innan arbeid med reduksjon av klimagassutslepp og redusert energiforbruk. Utfyllande vurdering: Fjell kommune er usamd i at det bør vera ein fast framtidig utbyggingsgrense mot LNFområda. Dette samsvarar ikkje med Fjell kommune sin kommuneplan. HFK ønskjer at biltrafikken skal reduserast til 30 % av alle reiser i 2030. Fjell kommune meiner dette er ein visjon meir enn eit delmål. Dei planane og signala som er lagt for utbygging av infrastruktur i Bergen og omegnskommunane vil ikkje bidra til å nå dette målet. Fjell kommune saknar konkrete tiltak for å følgje opp kollektivmeldinga frå 2009. Klimaplan for Hordaland burde hatt eit større fokus på å løyse den akutte problemstillinga rundt personog godstransport til og frå Bergen. Innfartsparkeringar på sentrale stader rundt Bergen burde vore ein del av ei konkret tiltakspakke. Fjell kommune ser positivt på at HFK vil arbeida for energiøkonomisering og miljøtilpassing av eigne bygg. Det offentlege har ei oppgåve med å gå føre med eit godt eksempel når det gjeld miljø og klimaarbeid. Fjell kommune vil gjennom oppfølging av sine eigen energi, miljø og klimaplan gjere det same. Hordaland bør bli eit føregangsfylke når det gjeld fornybar energi og forsking på energi generelt. Vi har allereie ulike miljø som er i verdsklasse innan sine område. Kommunane treng miljø- og klimanettverk for å ta del i/og auke kunnskapen ikring felta energi og miljø. I den samanheng bør HFK ha ei meir aktiv rolle i fylket. I tillegg til å auke kompetansen i eiga fylke bør HFK ta mål av seg å vere ein pådrivar overfor staten i regionalt viktige miljø og klimaspørsmål. I dag har ein eksemplar på at boss frå vår region vert kjørt til Sverige, når det trengst i Rådalen, og mange andre saker der vårt nasjonale skatte og avgiftsregime motarbeidar dei gode løysingane for klima og miljø. Desse sakane bør takast raskt tak i for å unngå nedlegging av positive regionale og lokale initiativ. Fjell kommune har i vår energi, miljø og klimaplan forsøkt å vere konkrete med tanke på reduksjon av klimagassar og såleis bidra til å nå nasjonale målsetjingar og våre forpliktelser mot Kyoto-protokollen. Ved å ta tak i konkrete problemområde med oppfølgjande tiltak får man eit tiltaksretta dokument. HFK bør i større grad ta tak i dei problemområda der det er størst sjanse for at Hordaland kan lykkast med å bidra til å nå nasjonale målsettingar og internasjonale avtalar. Referansegruppa (oppnemnt i KFF 09.03.2010) har samarbeidd med rådmannen om ny innstilling.