KOMMUNEPLAN FOR ÅSERAL EIGENGODKJENNING ARKIVKODE: SAKSNR.: SAKSHANDSAMAR: SIGN.: /513 Astrid Marie Engeli

Åseral kommune KOMMUNEPLAN FOR ÅSERAL 2010-2020 - EIGENGODKJENNING ARKIVKODE: SAKSNR.: SAKSHANDSAMAR: SIGN.: 140 2009/513 Astrid Marie Engeli UTV.SAKSNR.: UTVAL: MØTEDATO: 11/67 Kommunalutvalet 29.08.2011 11/31 Kommunestyret 08.09.2011 Vedlegg: 1 Arealdelen (plankart) 2 Samfunnsdelen med utfyllande føresegn til arealdelen 5 Planomtale - konsekvensutgreiing 6 Motsegn - Kommuneplan for Åseral 2010-2020 - NVE Norges vassdrags- og energidirektorat 7 Oversendelse av fylkesmannens uttalelse til forslag til kommuneplan for perioden 2010-2020 - Fylkesmannen i Vest-Agder 8 Innspill fra samfunnsavdelingen som falt ut i Fylkesmannens uttalelse til kommuneplanen - Fylkesmannen i Vest-Agder 9 Vedrørende Fylkesmannens innsigelser til revisjon av kommuneplan for Åseral - Fylkesmannen i Vest-Agder, Miljøvernavdelingen 10 Saksframstilling arealdel - Vest-Agder Fylkeskommune 11 Møtebok for Hovedutvalg for samferdsel, areal og miljø 09.03.2011, sak 17/11 - arealdelen 12 Kart 13 Saksframstilling - samfunnsdelen - Vest-Agder Fylkeskommune 14 Møtebok for Hovedutvalg for samferdsel, areal og miljø 09.03.2011, sak 18/11 + Hovedutvalg for kultur og utdanning 10.03.2011, sak 14/11 + Fylkesutvalget 15.03.2011, sak 30/11 + Framlegg til Fylkestinget i møte 27.04.2011 - samfunnsdelen 15 Saksprotokoll frå Fylkestinget 27.04.2011, sak 11/11 - samfunnsdelen 16 Åseral kommune. Kommuneplanens arealdel 2010-2020. Frafall av innsigelser - Vest- Agder Fylkeskommune, Plan og miljø 17 Kommuneplan for Åseral 2010-2020 - offentlig ettersyn - Statens Vegvesen Region Sør 18 Uttale frå Bygland kommune 19 Særutskrift - Høyring av framlegg til ny kommuneplan - uttale frå næringsutvalet 20 Særutskrift - Høyringsuttale til framlegget til kommuneplan 2010-2020 - uttale frå Helse og sosialutvalet 21 Særutskrift - Høyring av framlegg til ny kommuneplan - uttale frå Teknisk utval 22 Utskrift av møtebok for Åseral Landbruksnemnd 27.01.2011 - Sak 03/11: Kommuneplan for Åseral 2010-2020 - Offentleg ettersyn - Åseral Landbruksråd 24 Vedk. masseuttak og kommuneplan - Hans Ackermann 24 Innspill kommuneplan for Åseral 2010-2020 - Randi Damgård og Bernt Tunold 25 Merknader til kommuneplan for Åseral 2010-2012 - Elin og Turid Repstad 26 Uttale til "Kommuneplan for Åseral 2010-2020. Offentlig ettersyn" - Bydalsfeltet Velforening v/per Svein Holte 27 Innspill til ny kommuneplan 2010-2020 vedrørende tilkoplingsplikt for eldre fritidsboliger på Bortelid - Bortelid Velforening og Hyttelag v/kim Danielsen

28 Forslag til kommuneplanen - Audun Forgard 29 Ortofoto med foreslått trasè for gang- og sykkelveg mellom Åsland og Grokleiv 30 Skisse over foreslått nytt sentrumsbygg 31 Alternativ til Minne 32 Merknad i forbindelse med byggeområde med løpenummer 53 i forslag til kommuneplan med frist for innspill 25.02.11 - Kristiansen & Selmer-Olsen for Odd Arild Eikeland og Jan Erik Fiskland 33 Vedk. kommuneplanen - Roger Thorsland 34 Kart 34 Kommuneplan - merknad frå Grokleiv Vel v/anne Siv Lauen 34 Merknad til kommuneplanen - Svein Utsogn Bakgrunn: Kommunalutvalet vedtok 01.12.2009 å starte opp arbeidet med revidering av kommuneplanen for Åseral, jamfør planprogrammet. Kommuneplanen er samansett av ein samfunnsdel med handlingsdel og ein arealdel. I denne kommuneplanen har det vore fokus på arbeidet med samfunnsdelen. Ein har sett det som viktig at også samfunnsdelen blir eit meir levande dokument i det daglege arbeidet. Sjølv om samfunnsdelen ikkje er juridisk bindande, vil han vere retningsgjevande i høve til kva kommunen satsar på og kva ein skal arbeide med framover. I arbeidet har det vore lagt opp til medverknad på breitt hald. Kommunestyret var tidleg involvert i arbeidet med visjon og verdiar, samt fokusområde. Innbyggjarane har òg vorte oppmoda om å engasjere seg i planarbeidet. Det har vore utført fleire utgreiingar som er nytta som bakgrunnsmateriale ved utforminga av planen. Kommuneplanen har vore til offentleg ettersyn i perioden 16.12.2010-12.02.2011. Høyringsfristen vart utvida til 15.03.2011. Det har kome uttale frå 19 personar/instansar. Av desse har Vest-Agder fylkeskommune, Fylkesmannen i Vest-Agder og Norges vassdrags- og energidirektorat reist motsegner til planen. Vurdering: Uttalene går fram av vedlegga. Nedanfor er det gjeve eit samandrag av innhaldet og korleis dei er vurdert (kursiv). Når det gjeld spreidde fritidshytter, har ein vidareført den øvre grensa med to fritidsbustader per bruk/driftseining/eigedom. Vidare er det teke omsyn til registreringane av kulturminne, vilt og område med viktige naturtypar. Nokre innspel kjem i konflikt med faresonene for steinsprang og snøskred. Til dette er det å seie at det i dei tilfella må gjerast konkret vurdering av den einskilde lokaliteten. Desse to temakarta er utarbeidd skjematisk i høve til høgdekoter. Det er då ikkje den heile og fulle sanninga som kjem fram, men likevel ein god indikasjon på farane. I tillegg må innspela òg vurderast ut frå flaumsonekartet

(200-årsflaum) som er utarbeidd. I hovudsak er nye område med enkelthytter avmerka med om lag eitt dekar tomt i kartet. Nummer 1-32 på plankartet er vidareført frå gjeldande kommuneplan og har ikkje blitt vurdert på nytt i denne rulleringa. I tillegg syner ein til planomtalen og konsekvensutgreiinga. Motsegn frå Norges vassdrags- og energidirektorat (NVE) Saknar ei skildring av korleis vurderingane av flaumfaren er utført. NVE har motsegn til planen inntil det er knytt føresegn til flaumsonene som tek vare på sikkerheita og forbyr eller set vilkår for bygging og tiltak. Temakarta for snøskred og steinsprang er ikkje innarbeidd på ein juridisk bindande måte. NVE har motsegn til planen inntil skredfaren er innarbeidd i plankart og føresegn på forsvarleg vis. _ For flaum er det knytt føresegn til omsynssona (pkt. 11.2 a) i kommuneplanen). Skredfare er innarbeidd i kartet som omsynssone med tilhøyrande føresegn (pkt. 11.2 b)). Motsegn frå Fylkesmannen i Vest-Agder Fylkesmannen reiser motsegn til forslag til spreidd hyttebygging. Grunngjevinga er at dei samfunnsmessige og miljømessige konsekvensane ikkje er klargjort. Det er heller ikkje føreteke ei fagleg vurdering av dei forslaga til spreidde hytter som grunneigarane har fremma. I tillegg er ei rekkje hytter foreslått innafor omsynssone villrein som er foreslått i planutkastet til regionalplan for Setesdalsområdet (Heiplanen). Fleire av hyttene planforslaget opnar for er òg lokalisert nær biotopar for trua og sårbare viltartar. Ved fleire høve har Fylkesmannen rost Åseral kommune for den godt planlagde og konsentrerte hytteutbygginga. I kommuneplanforslaget har kommunen gått bort frå dette ved at eit større tal spreidde fritidshytter er teken inn i planen. Fylkesmannen saknar eit overordna utbyggingsmønster. Vanlegvis vil ikkje Fylkesmannen tilrå at fritidshytter blir handtert gjennom dispensasjon, men vil likevel gje råd om at kommunen vurderer om det er føremålstenleg å handsame spreidde fritidshytter i samband med kommuneplanen. Vidare poengterer Fylkesmannen at lovverket ikkje opnar for rekreasjonskøyring med snøscooter og at dette har vorte fremma til kommunen. Det er likevel teken inn i kommuneplanen utan at plandokumentet drøftar temaet eller at det ligg føre konkrete forslag. Fylkesmannen meiner kommunen nyttar feil referanse når ein viser til Artsdatabanken som kjelde og ikkje Naturbasen til Direktoratet for naturforvaltning (DN). Kommunen bør ta ein gjennomgang av LNFR-sonene for spreidd bygging og tilpasse dei til terreng og kriterium. Fylkesmannen reiser motsegn til kommuneplanen sine føresegner pkt. 11.2 a), b) og c). Kommunen kan sette føresegner til plassering av tiltak knytt til landbruk, jf. pbl 11-11 nr. 1 og 5. Av lovkommentaren følgjer det at føresegnene ikkje skal hindre plassering av nødvendige tiltak der plasseringsfridomen er liten. Fylkesmannen meiner at føresegnene i pkt. 11.2 c) gjer akkurat det. Pkt. 11.2 b) gjev mogelegheit for utviding av eksisterande

fritidsbustader. Fylkesmannen kan ikkje sjå at det etter plan- og bygningslova (pbl.) er heimel til ei slik føresegn. Etter Fylkesmannen sitt syn vil òg formuleringa i pkt. 11.2 a) opne for meir enn det som følgjer av lova. I tillegg reiser Fylkesmannen motsegn til bustadtomtene det har kome innspel på gjennom kommuneplanprosessen samt arealet for spreidd bustadbygging på vestsida av Kyrkjebygd. Det er uheldig at kommunen legg opp til LNFR-føremål med spreidd bustadbygging så nær sentrum og punkterer landbruksarealet. Sjølv om Åseral og Kyrkjebygd ikkje kan samanliknast med ein bykommune, må utbygging gjennom større reguleringsplanar kunne krevjast på dei sentrumsnære areala. Ut over dette gir Fylkesmannen følgjande faglege råd: Plankartet refererer til spreidd bustadbygging og ikkje næring og bustader som i plandokumentet elles. Samstundes etterlyser Fylkesmannen ei evaluering av funksjonalitet og bruk av LNFR-førmålet. Kommunen bør gå gjennom LNFR-spreiddsona for å tilpasse ho til terreng og kriterium. Fylkesmannen presiserer at driftshytter er i tråd med LNFR-føremålet viss dei er naudsynte for tradisjonell landbruksdrift. I plandokumentet bør det kome tydeleg fram kva som ligg i omgrepet driftshytte og om mogeleg knytte retningsliner til korleis slike søknader skal vurderast og kva som skal vektleggast. Fylkesmannen har òg gjort ei vurdering av plankart og teiknforklaring. Ein går ikkje nærare inn på det her, men syner til høyringsuttalen. _ Åseral kommune hadde møte med Fylkesmannen 30.06.2011 der tema var motsegnene som Fylkesmannen hadde reist til planen. Målet var å sjå om ein kunne kome til semje m.o.t. korleis motsegnene kan løysast. Og me kom i mål. Resultatet blir omtala nedanfor. Konsekvensutgreiinga er utarbeidd på ein meir utførleg måte. Fylkesmannen meinte i møte 30.06.2011 at grunnlaget for å ta stilling til dei aktuelle nye hyttene var tilfredsstillande. I møte 28. februar 2011 mellom Fylkesmannen og kommunen vart det semje om kvar grensene for bygdeutviklingssona og sone for villreinen sitt leveområde skulle gå innafor Åseral kommune sine grenser, jf. Heiplanen. Det er med undring ein ser at Fylkesmannen slår fast at en rekke hytter (er) foreslått innenfor den hensynssone villrein som er foreslått i foreliggende planutkast til Regionalplan for Setesdalsområdet. Etter at Fylkesmannen og kommunen vart samde m.o.t. grensene for villreinen sitt leveområde 28.02.2011 ligg ingen av dei føreslegne fritidshyttene innafor villreinen sitt leveområde. Ei av dei føreslegne hyttene ligg i utkanten av område der kongeørn er registrert. Kva som er stoda per d.d. har ein ikkje oppdatert informasjon om. Ved Bortelid er det ein kjent lokalitet av kongeørn relativt nært eit utfartsområde. Det viser at nokre individ toler mykje menneskeleg aktivitet. På Juvasstøl er det busetnad størstedelen av året. Ved at det er menneskeleg aktivitet det meste av året kan ein ikkje sjå at ei hytte til i same området vil ha særleg innverknad. Den andre hytta som ligg innafor eit område med registrering av trua og sårbare viltartar ligg i eit område med registreringar som ikkje er offentlege. Tomta kan evt. flyttast noko vestover, jf. innspel frå grunneigaren. Etter forhandlingar med Fylkesmannen 30.06.2011 tek Åseral kommune ut hytte nr. 41 (Juvatn), 74 (Midtheia, Breland), 35 (Handeland), 36 (Kittelstad), 63 (Tveit), 65 (Nesland). I

tillegg må hyttene på område nr. 61 samlast ved Nere Øygard (Rosseland) og hyttene på område 76 samlast ved Øvre Øygard (Rosseland). All nummerering refererer til høyringsutkastet. For mange av innbyggjarane i Åseral er det viktig å kunne nytte skog og hei i fritida, som rekreasjon i den delen av kommunen dei har ei tilknyting til. Ein del av denne opplevinga vil vere å ha høve til å byggje ein fritidsbustad i det området. Alternativet er sjeldan å byggje hytte i eit av utbyggingsområda. Kommunen ser på spreidd bygging av fritidsbustader som eit verkemiddel for å halde på den relativt strenge låma med å konsentrere utbyggingsområda for fritidsbustader med full standard til Bortelid, Ljosland og Eikerapen. Åseral kommune fekk ved førre rullering av kommuneplanen råd frå Fylkesmannen om å ta innspel om spreidde fritidshytter inn i planprosessen. Det er vidareført ved denne rulleringa. Når det gjeld rekreasjonskøyring med snøscooter, er kommunen sjølvsagt klar over at det ikkje er heimel til det i gjeldande lovverk. Likevel er det ønskje om å arbeide med saka og eventuelt endre lovverket eller få dispensasjon. Dette ligg noko fram i tid, men kommunen finn det rett å ta det med i kommuneplanen. Ved vurdering av t.d. sårbare viltartar har kommunen nytta Artsdatabanken som kjelde. Det blir noko uforståeleg at Fylkesmannen uttalar at det er feil referanse når det faktisk er Artsdatabanken som er brukt. Fylkesmannen er i sin fulle rett til å meine at ein òg skulle ha nytta Naturbasen til DN. Det er no gjort. Spreidd bygging av bustader og næring ser kommunen som eit viktig moment for å vise ei positiv haldning til folk som vil bu utanfor regulerte felt og evt. starte næringsverksemd utanom industriområdet. I pkt. 11.2 a) (no: 11.4 a)) har ein endra føresegnene til å omfatte alle tiltak, ikkje berre bustadhus og næringsbygg. Intensjonen var ikkje å opne for meir enn det pbl. gjev heimel til. Det same gjeld pkt. 11.2 b). Dette punktet er teken ut av planen. Når det gjeld pkt. 11.2 c) (no: 11.4 b)), har kommunen hatt ei medvite haldning til at avstandskravet til vassdrag skal gjelde alle bygg. Det er likevel teke inn eit unntak for landbruksbygg viss anna plassering ikkje er mogeleg eller føremålstenleg. Kommunen ser at det kan vere uheldig å ha eit generelt område for spreidde bustader og næringsbygg i Kyrkjebygd. Her er det andre alternativ, både for bustader og næringsbygg. Kommunen tek motsegna til følgje og tek ut dette området. På den andre sida ønskjer ikkje kommunen å utelukke alle tomtemogelegheiter utanfor regulerte felt. Det har kome inn tre konkrete innspel på bustadtomter i Bubakka og på Skarpeteigen. Etter at desse er vurdert i konsekvensutgreiinga ønskte kommunen å ta desse med i kommuneplanen. I møtet 30.06.2011 meinte Fylkesmannen framleis at det var svært uheldig å stykke opp LNFRområdet med føremålet bebyggelse og anlegg. Fylkesmannen tilrådde at desse bustadtomtene heller kunne handsamast som dispensasjonssaker. Desse tre tomtene er no teken ut av planen. Åseral kommune ønskjer å halde fram med relativt store område for spreidd bustadbygging. I denne rulleringa er desse områda innskrenka langs fv. 455 frå kommunegrensa i sør til Kyrkjebygd etter innspel frå Statens vegvesen. Denne sona blir til dels tilpassa kriteria som er knytt til ho.

Driftshytter blir ikkje merka av på plankartet. Søknad om driftshytte blir handsama etter dei reglane som til ei kvar tid gjeld. Kommentarar knytt til teiknforklaring og føresegner går ein ikkje nærare inn på her, men syner til høyringsuttalen. Noko av dette er endra, medan andre ting ønskjer kommunen å ha slik det ligg i forslaget. Motsegn frå Vest-Agder fylkeskommune Fylkeskommunen etterlyser ei klarare binding mellom mål/ambisjonar (samfunnsdelen) og arealforvaltning/arealpolitikk. Dei tilrår kommunen å utarbeide konkrete overordna prinsipp for arealforvaltninga basert på ønska utvikling i Åseral. Ei sentral problemstilling er om arealbruken medverkar til å nå kommunen si overordna målsetting. Kommunen bør sjå både eksisterande og framtidig arealbruk i samanheng for å kunne danne seg eit bilete av dei samla konsekvensane for miljø og samfunn. Fylkeskommunen reiser motsegn til manglande omsynssone for kulturminne og kulturmiljø. Fylkeskommunen reiser motsegn til spreidd hyttebygging i LNFR-områda for følgjande punktlokalisering pga. av manglande vurdering: Nr. 39, 41, 43, 46, 51, 54, 61, 68, 72, 74, 75, 76, 79 og 80 (sjå vedlagte kart i A4-format). Fylkeskommunen vil gjere ei ny vurdering av lokaliseringsspørsmålet når det føreligg ei vurdering av områda basert på overordna arealforvaltingsprinsipp. I nokre av områda der kommunen har gått inn for spreidd hyttebygging i form av punktlokalisering framstår områda som samanhengande natur- og friluftsområde. I 12 av dei 16 områda for spreidd hyttebygging kan det vere fare for snøskred og steinsprang. Etter fylkeskommunen si meining bør rasfare avklarast på dette plannivået og ikkje skuvast over på grunneigar/utbyggjar. Der snøskredfaren er av ein slik karakter at området ikkje er eigna for bebyggelse bør området takast ut av planen, særleg når det dreier seg om punktlokalisering. Åseral kommune må framleis fokusere på trafikktryggleik i kommunen, både gjennom eiga verksemd og nullvisjonsprosjektet i Indre Agder. Ut over dette har fylkeskommunen knytt kommentarar til teiknforklaring og føresegner til planen. Fylkeskommunen er positiv til fokusområda kommunen har valt. Desse harmonerer med strategiane i Regionplan Agder 2020. Fylkeskommunen vil oppmode kommunen til å arbeide meir med følgjande tema: Åseral som heilårs hyttekommune Potensiale for næringslivet og t.d. dimensjonering av det kommunale tenestetilbodet. Levekår og likestilling Kva er hovudutfordringane, og kva er bra/dårlig? Kva er årsaka til at Åseral kommune er i kategorien kommunar med låg grad av likestilling? Fylkeskommunen tilrår at kommunen særleg ser på levekåra til born og unge. Bulyst utvikling av varierte butilbod, sosiale møteplassar og kultur- og fritidstilbod. Fylkeskommunen tilrår å endre utforminga av plandokumentet slik fylkesadministrasjonen har skissert i saksutgreiinga. Det vil bidra til å styrke plandokumentet som eit styringsreiskap. Då må plandokumentet i mykje større grad gje ei avklaring av langsiktige mål og strategiar

for den utviklinga Åseral ser føre seg i planperioden. Overordna målsetting bør omsetjast til konkrete mål og strategiar innafor fokusområda. Ein må då ha klart føre seg kva hovudutfordringane innafor fokusområda er og kva som påverkar desse. Kommunen må avklare korleis ein kan påverke desse indikatorane og ut frå det formulere mål, strategiar og tiltak. Det blir visualisert gjennom ein figur med desse elementa: Fokusområde Mål Strategi Tiltak Ei slik oppbygging vil i større grad klargjere kva kommunen ønskjer å oppnå og korleis ein ser føre seg at dette kan gjerast. Konkrete tiltak ser ein att i handlingsdelen. Planen er òg noko ordknapp. Ein breiare omtale av dei ulike punkta vil gje meir forståing for dei val som kommunen gjer. Utgreiingane som er gjort vedkomande pendlingsstruktur, samanheng mellom utdanning og val av stad å bu samt levekår må kome fram på ein betre måte i plandokumentet slik at kommunen kan gjere seg nytte av desse opplysningane. _ Ambisjonane som kjem fram i kommuneplanen er i liten grad avhengige av areal. Av denne grunn kan det sjå ut som om det er for svak relasjon mellom arealdelen og samfunnsdelen. Ein av ambisjonane våre er at Åseral skal ha eit lønsamt og variert næringsliv og vere ein attraktiv stad å etablere og drive næringsverksemd. Konsekvensen av dette er at ein i arealdelen har sett av areal til nytt industriområde, samt lagt til rette for å sette opp næringsbygg utanom stadbunden næring i LNFR-spreiddsone. Åseral kommune ser på variasjonen i mogelege stader å busette seg i kommunen som ein styrke for busettinga. Likeså er tilrettelegging med framtidig industriområde samt mogelegheiter for spreidd næringsverksemd andre stader i kommunen ein faktor for å stimulere til privat næringsutvikling. Som det går fram av kommunen sine kommentarar til Fylkesmannen sin uttale vil kommunen arbeide for etablering av trasèar for rekreasjonskøyring med snøscooter. Det er eit stykke fram til det, men ein meiner det er rett å ta det med i samfunnsdelen som ei av oppgåvene det skal arbeidast med framover, sjølv om det ikkje kan kartfestast i denne omgang. Når det gjeld turstiar, er nokre av dei større løypene teken med på kommuneplankartet. Ein del av dei eksisterande, og planlagde, løypene vil snautt vere leselege i den målestokk som ein nyttar til kommuneplanen. Åseral kommune har difor planar om å utarbeide ein eigen temaplan for turløyper. Fylkeskommunen må sjølv avgrense kvar omsynssona for kulturminne og miljø skal gå. Ein ser det ikkje som føremålstenleg å ta inn alle opplysningane frå SEFRAK-karta (SEkretariatet For Registrering Av faste Kulturminner) og Askeladdenkarta (database for kulturminne). I møte med fylkeskonservatoren 03.06.2011 kom ein til semje om kvar omsynssone for kulturminne og -miljø skal ligge. Det vart i delar av følgjande område: Breland, Eikerapen, Hamkoll/Reiersdal, Kylland, kring Handelandsvatnet, Mjåland, Åmland og Lognavatn/Austegard/Espelid. I tillegg ferdselsvegar som omfattar Nordmannsvegen (Espelid kommunegrensa i aust), Den gamle byvegen (Kyrkjebygd Sveindal) og Futevegen (Flystveit/kommunegrensa i aust Skjerkevatn). Konsekvensutgreiinga er gjort på ein meir utfyllande måte, sjå kommentaren til Fylkesmannen sin uttale. Elles er det å nemne at nr. 75 og 80 på kommuneplankartet er

driftshytter, nr. 43 er bod til område 27 medan nr. 72 gjeld frådeling av tomt rundt eksisterande bygning. For desse er det ikkje noko meining i at dei skal visast på plankartet. Kommuneplankartet kan gje eit skeivt bilete av stoda m.o.t. bygningar i LNFR-område. Eksisterande bygningar blir ikkje vist på kartet, så då er det vanskeleg å vite om ei fritidshytte ligg i eit samanhengande natur- og friluftsområde. I relativt stor grad er innspela om nye fritidshytter i nærleiken av andre bygningar. Etter møtet med fylkeskommunen 01.07.2011 vart det semje med kommunen om at omsynssonene for kulturminne og -miljø er avklart. I tillegg vart ein samde om at hytte nr. 41 (Juvatn) og 74 (Midtheia, Breland) måtte takast ut av planen. Samstundes måtte hyttene på område nr. 61 og 76 samlast ved Nere og Øvre øygard (Rosseland). All nummerering refererer til høyringsutkastet. Kart som viser snøskred og steinsprang er utarbeidd skjematisk i høve til høgdekoter. Det vil seie at dei gjev ein god indikasjon på kvar det er fare for snøskred og steinsprang. På den andre sida er det ikkje sikkert at det er konkret rasfare alle stader der kartet indikerer rasfare. Difor er det viktig at fagkunnige på fagfeltet undersøkjer arealet før det blir gjeve byggjeløyve. Vi ser det som urealistisk at kommunen skal gjere desse undersøkingane for alle område på dette nivået så lenge det er tale om spreidde hytter/hus/næringsbygg. Kommunen ønskjer å halde på forma og innhaldet i kommuneplanen slik han vart sendt på offentleg ettersyn. Vi har lagt inn meir tekst og gjort endringar etter høyringsperioden med bakgrunn i dei innspela som har kome. Dei tema som fylkeskommunen trekk fram at kommunen bør arbeide meir med ligg i ambisjonane våre. Ein kan alltid diskutere om det er tydeleg nok og graden av vektlegging. For kommunen vart det i prosessen med utarbeiding av samfunnsdelen klart korleis samanhengen frå overordna mål og til handlingsprogrammet skulle vere. Merknad frå Statens vegvesen Statens vegvesen ser positivt på at område for spreidd bustadbygging langs fv. 455 stort sett er endra i tråd med deira innspel til planarbeidet. Dei vil sterkt tilrå at området ved Mjåland blir avgrensa i den sørlege delen av området langs fylkesvegen. I tillegg gjev dei råd om at område for spreidd bustadbygging i Vestredalen (fv. 352), Austredalen (fv. 351) og Fiskårdalen (fv. 353) i stor grad blir avgrensa til område der det er eksisterande bebyggelse. I lokaliseringskriterium for spreidd bustadbygging bør det innarbeidast at nye bustader skal skje i tilknyting til eksisterande grendemiljø. I tillegg har dei eit par kommentarar til utforming av plankartet, jf. spesifikasjon for teiknereglar. Åseral kommune har i stor grad imøtekome Statens vegvesen ved å innskrenke områda for spreidd bustadbygging langs fv. 455. Ut over dette vil kommunen i hovudsak gå inn for planforslaget slik det vart lagt ut til høyring. Merknad frå Bygland kommune Oppmodar Åseral kommune om å kartfeste trasè for vegsambandet mellom Beinsvatn i Åseral og Skomedal i Bygland i den nye kommuneplanen.

I kommunedelplan for Bortelid er vegen vist til kommunegrensa ved Beinsvatn. Den del av vegen som måtte kome til å liggje i Åseral ut over dette må ein kome tilbake til i samband med utarbeiding av reguleringsplan. Merknad frå Næringsutvalet Næringsutvalet er samd i prioriteringane og vurderingane i planen. Med omsyn til eit mogleg bustadfelt på Egså, så ville eit slikt område få langt større attraktivitet med ei vegløysing til Bjørndalsvatnområdet. Då ville bebuarar langt lettare kunne dra nytte av arbeidsmarknaden på Evje. Det bør arbeidast vidare med å få til ei slik vegløysing. Ein ser det ikkje som aktuelt å sjå på vegutløysing til Bjørndalsvatnområdet i denne rulleringa av kommuneplanen. Merknad frå Helse- og sosialutvalet Helse- og sosialutvalet ser utkast til kommuneplan som eit godt grunnlag for vidare utvikling av kommunen. Merknad frå Teknisk utval Teknisk utval er samd i prioriteringane og vurderingane med følgjande tilleggskommentar: Side 13 i kommuneplan for Åseral 2010-2020: 1. Punkt 11.3a første punkt endrast til: Bygg skal plasserast i høveleg avstand frå vatn 2. Punkt 11.2c andre kulepunkt endrast til: Takvinkel skal vera mellom 20 o og 34 o 3. Punkt 11.2c femte kulepunkt endrast til: Bygningane skal ha mørk brun eller svart farge. Det kan søkast om dispensasjon i spesielle høve som for eksempel ved kledning av osp. Vindaugo og dører kan ha annan farge. Bygningane skal framleis plasserast 50 m frå vassdrag. Takvinkel kan endrast til å vere mellom 20 og 34. Det kan alltid søkjast dispensasjon frå føresegnene, slik at det ikkje er naudsynt å spesifisere i føresegnene. Merknad frå Åseral Landbruksråd Grunneigarsamarbeid: Kommunen må vere merksam på at den formuleringa som ligg her kan føre til organisering av grunneigarlag som ikkje omfattar store nok område til at ein kan få ei rettferdig fordeling av rettar og plikter ved ei utbygging. Landbruksrådet er positive til at kriteria for driftshytter er vidareført frå eksisterande plan. Det bør ikkje vere eit absolutt krav om torvtak for driftshytter og spreidde fritidshytter.

Landbruksrådet er positive til bustadtomter på Egså og Fiskland. Det bør òg leggast til rette for frådeling av spreidde bustadtomter for dei som ønskjer å busette seg i andre område som dei har tilknyting til. Kommunen har hatt formuleringa om grunneigarsamarbeid til nøye vurdering og meiner at ho er meir omfattande enn kva som ligg i gjeldande kommuneplan. Avgrensing av området skal godkjennast av kommunen. LNFR-sonene for spreidd bustadbygging er vidareført frå eksisterande kommuneplan med unntak av strekninga mellom kommunegrensa i sør og Kyrkjebygd. Her er arealet avgrensa til grendene der det er busetnad frå før. Ein meiner såleis at mogelegheiter for spreidd bustadbygging er ivareteke. Merknad frå Hans Ackermann Ønskjer å få med eit eksisterande masseuttak på Ljosland. Det er ikkje aktuelt å endre arealbruken innafor grensene til kommunedelplanane no i rulleringa av kommuneplanen. Det må ein koma attende til i arbeidet med rullering av kommunedelplanane. Merknad frå Randi Damgård og Bernt Tunold Økonomi og plassering var viktige moment ved erverv av hytta. Nærleik til naturen utan naboar tett på, mangel på veg, vatn og avløp blir opplevd som eit pluss og noko av det som var tiltrekkande ved hyttekjøpet. Dei ber kommunen vurdere å ikkje tvinge fram tilkopling til vatn og avløp av omsyn til miljøet i området. I tillegg er det ikkje alle som har økonomiske ressursar til å gjennomføre ei slik tilknyting til vatn- og avløpsnettet. Åseral kommune meiner det er rett å innføre obligatorisk tilkopling til vatn- og avløpsnettet for fritidsbustader. Det er likevel ikkje automatikk i at alle må kople seg på. Her vil ein måtte gjere vurderingar innafor kva plan- og bygningslova gjev rom for. Merknad frå Elin og Turid Repstad Dei er imot innføring av tilknytingsplikt til vatn- og avløpsnettet for eksisterande hytter. Ei slik tilknytingsplikt vil krevje ombygging og truleg påbygging av hytta. Truleg vil òg sjølve tilknytinga vere kostbar. Tilknyting vil påføre dei store kostnader og må difor vere ei friviljug ordning. Elles viser dei til hyttevelet sin uttale om at heller ikkje miljøomsyn er avgjerande for innføring av tilknytingsplikt i dette tilfellet. Åseral kommune meiner det er rett å innføre obligatorisk tilkopling til vatn- og avløpsnettet for fritidsbustader. Det er likevel ikkje automatikk i at alle må kople seg på. Her vil ein måtte gjere vurderingar innafor kva plan- og bygningslova gjev rom for. Merknad frå Bydalsfeltet Hyttevel Velforeininga ser tilknytingsplikt til vatn- og avløpsnettet som eit urimeleg pålegg med bakgrunn i dei store kostnadene dette medfører overfor den einskilde hytteeigar. Det må

kunne praktiserast ei friviljug ordning. Det skal òg nemnast at einskilde ser positivt på tilknyting til vatn og avløp ved akseptable kostnader og god planlegging. Hytteeigarar har ved fleire høve blitt presentert for planar for utbygging og fortetting i området utan at det er blitt realisert. Det skaper uro og gjev grobotn for mistrivsel. Fleire hytteeigarar har festekontraktar med klausul mot fortetting. Åseral kommune meiner det er rett å innføre obligatorisk tilkopling til vatn- og avløpsnettet for fritidsbustader. Det er likevel ikkje automatikk i at alle må kople seg på. Her vil ein måtte gjere vurderingar innafor kva plan- og bygningslova gjev rom for. I eit område der ein plan syner framtidig arealbruk kan det dukke opp moment undervegs i prosessen som gjer at føresetnadene endrar seg. Det gjer at ein kan få fleire planprosessar utan at dei vert avslutta med t.d. ein ny detaljreguleringsplan. Merknad frå Bortelid Velforening og Hyttelag Kommunen bør vurdere konkret under planarbeidet med den einskilde reguleringsplan om eksisterande fritidsbustader har akseptable private vatn- og avløpsløysingar slik at tilkoplingsplikt ikkje blir teken inn i planen. Mange av medlemmene har eldre fritidsbustader med enkel standard. Det vil m.a. seie at dei ikkje kan legge inn vatn- og avløp utan å foreta større bygningsmessige oppgraderingar. For å hindre at kostnaden blir uforholdsmessig høg for hytteeigar, bør kommunen sette eit kostnadstak for planar som innfører tilkoplingsplikt. Åseral kommune meiner det er rett å innføre obligatorisk tilkopling til vatn- og avløpsnettet for fritidsbustader. Det er likevel ikkje automatikk i at alle må kople seg på. Her vil ein måtte gjere vurderingar innafor kva plan- og bygningslova gjev rom for. Det gjeld òg spørsmålet om grense for kva kommunen meiner er ein uforholdsmessig kostnad. Merknad frå Audun Forgard Ønskje om ei gang- og sykkelbru mellom Åsland og Grokleiv for å binde bygda betre saman. Forslag om eit nytt sentrumsbygg på trekanten som kan innehalde eit minimeieri, lokale for Åseral Tradisjonsmat, veterinærkontor, bibliotek, fritidsbutikk, bakeri og kanskje ein daglegvarebutikk. Eit stjerneobservatorium på Sjåvass i samarbeid med Universitetet i Agder er ein god idè. Kommunen kan spare store pengar på å bytte operativsystem for datanettverket sitt ved å gå over frå Windows til ei open Linuxløysing. Ei bruløysing over elva mellom aust og vest har vore tema når løyper i Kyrkjebygd har vore diskutert. Førebels har ein konsentrert seg om å få til gode løysingar på turløypene på fast mark. Ei bru kan gjerne kome i framtida. Frå tid til anna har det vore ulike planar for eit nytt sentrumsbygg. Dette høyrer heime i områdereguleringsplanen for sentrum.

Stjerneobservatorium er ein spenstig idè, men er nok ikkje det som kommunen først og fremst satsar på. Val av operativsystem for datanettverket i kommunen blir gjort etter ei grundig vurdering. I 2010 vart det gjort ei oppgradering slik at ein ikkje ser det som realistisk å endre dette no. Merknad frå Kristiansen & Selmer-Olsen I forslaget til kommuneplan skal vatn og avløp løysast med private anlegg for bustadtomtene på Egså. Dei ser at det kan vere ei god løysing òg for deira byggjeområde på Fiskland. Dei to områda kan samanliknast på fleire område, og Kristiansen & Selmer-Olsen ber om at det blir lagt til grunn same vilkår for dei to felta så langt det er fornuftig. Detaljane i ei utbygging må ein kome tilbake til ved detaljregulering og utforming av utbyggingsavtale. Det ligg likevel godt til rette for å kople seg på det kommunale VA-nettet i Eikerapen. Merknad frå Roger Thorsland Ønskjer å få med to fritidshytter ved Svartevatn, gnr. 2, bnr. 19. Då det vart varsla oppstart av rullering av kommuneplanen, blei fristen for innspel sett til 25.01.2010. Ein tok likevel med innspel som kom etter denne dato fram til planen vart sendt til fyrste gongs handsaming. Det hadde ikkje innverknad på framdrifta til planarbeidet. Ved å ta nye innspel til vurdering no vil det medføre ein meir uryddig prosess og planarbeidet vil bli utsett. Konklusjonen blir difor at når kommuneplanen er sendt til fyrste gongs handsaming, tek ein ikkje omsyn til nye innspel. Merknad frå Grokleiv Vel Det bør koma gang- og sykkelsti frå Grokleiv ned til Krossen. Den var på teikningane då tomtene vart kjøpt og var ein vesentleg grunn til at dei kjøpte tomter så høgt oppe i feltet. Ønskje om merka fotgjengarovergang ved Kaddebergbrua. Svært mange nyttar denne overgangen. Der er uoversiktleg og velet har fått tilbakemeldingar om at det er vanskeleg å sjå born når dei skal over vegen her. Det blir heller ikkje brøyta i gjennomgangen i autovernet. På tidlegare synfaring med kommunen vart det lova at det skulle koma eit ekstra gateljos i botnen ved enden av kommunal veg (før vegen går opp til Trudy). Desse innspela høyrer ikkje til i kommuneplanen og blir formidla til rette vedkomande. Merknad frå Svein Utsogn Ønskjer å reise to bygningar sør for Lonevikodden.

Då det vart varsla oppstart av rullering av kommuneplanen, blei fristen for innspel sett til 25.01.2010. Ein tok likevel med innspel som kom etter denne dato fram til planen vart sendt til fyrste gongs handsaming. Det hadde ikkje innverknad på framdrifta til planarbeidet. Ved å ta nye innspel til vurdering no vil det medføre ein meir uryddig prosess og planarbeidet vil bli utsett. Konklusjonen blir difor at når kommuneplanen er sendt til fyrste gongs handsaming, tek ein ikkje omsyn til nye innspel. Kommuneplanen er no oppdatert i høve til ovannemnde. Framlegg til tilråding: Kommunestyret vedtek kommuneplan for Åseral 2010-2020, jf. plan- og bygningslova 11-15. Arealdelen (plankartet) går fram av vedlegg 1. Samfunnsdelen og føresegner til arealdelen går fram av vedlegg 2, medan planomtale og konsekvensutgreiing går fram av vedlegg 3. Saksprotokoll i Kommunalutvalet - 29.08.2011 Framlegg til tilråding vart samrøystes vedteke. Tilråding: Kommunestyret vedtek kommuneplan for Åseral 2010-2020, jf. plan- og bygningslova 11-15. Arealdelen (plankartet) går fram av vedlegg 1. Samfunnsdelen og føresegner til arealdelen går fram av vedlegg 2, medan planomtale og konsekvensutgreiing går fram av vedlegg 3. Saksprotokoll i Kommunestyret - 08.09.2011 Planleggjar Astrid Marie Engeli orienterte om habilitetsreglar i overordna plansaker. Habilitet: Representantane Arna Berg, Odd Arne Røyland, Frode Forgard, Lennart Reiersdal, Toralf Tveit, Bjarne Verdal og Tove Hagen forlot møtet. Fylgjande vararepresentantar møtte: Hilde Stuestøl for Arna Berg Hans Ackermann for Odd Arne Røyland Lars Kittelstad for Frode Forgard Jens Røysland for Lennart Reiersdal Cay Håvorstad for Toralf Tveit Kari Anne Thorsland for Bjarne Verdal Aanen Breilid for Tove Hagen I tillegg til ovannemnde så ba Unni Berntsen kommunestyret vurdera hennar habilitet i saka.

Det møtte ikkje vararepresentant for Berntsen. Vedtak habilitet: Representantane vart samrøystes vedteke erklært habile og deltok vidare i handsaminga. Handsaming: Kommunalutvalet si tilråding vart samrøystes vedteke. Vedtak: Kommunestyret vedtek kommuneplan for Åseral 2010-2020, jf. plan- og bygningslova 11-15. Arealdelen (plankartet) går fram av vedlegg 1. Samfunnsdelen og føresegner til arealdelen går fram av vedlegg 2, medan planomtale og konsekvensutgreiing går fram av vedlegg 3.