Sak 26/13. Fjellstyrebudsjettet for 2014 Budsjettframlegg er utarbeidd. Som samanlikningsgrunnlag er medteke rekneskapstala for 2012, budsjett og prognose for 2013. I prognosen for 2013 er det m.a. teke utgangspunkt i rekneskapstala pr. 31.10.13. Budsjettforslaget legg opp til eit årsunderskot på kr. 21000. Kommentarar til postane i budsjettet: INNTEKTSSIDA: 3011 Utleige arbeidskraft/snøscooter Gjeld avtalen om utleige av ½ årsverk til Aurland Setjefisk BA, ½ årsverk til Lærdal kommune (viltforvalting), inntekter frå SNO til jervregistrering og rovdyrskadedokumentasjon, i tillegg til anna arbeid for SNO og andre. Arbeidsomfang om lag det same som inneverande år, men inntekt justert i samsvar med auka timekostnad. 3012 Villreinutvalet - refusjon oppsyn/sekretær Reknar med omlag tilsvarande arbeidsmengd som i 2013. 3300 Statskog - ref. oppsynsutgifter Etter fjellova skal 50 % refunderast, men statsbudsjettet avgjer reèll refusjon. Eige budsjett for oppsynet er sendt til Statskog SF. Går i budsjettframlegget ut frå at tildelt sum vert noko avkorta i høve til omsøkt tilskot, ut frå kva som har vore normalen dei siste åra. 3302 Erstatningar Eco Vannkraft Desse vert indeksregulerte med visse mellomrom (kvart 4. år) Regulering skjedde sist ved utbetalinga i juli i 2010. Det skal då vera tid for ny oppjustering i juli 2014, men vanskeleg å vita kor mykje (truleg kring 6 %). 3303 Tilskot grunneigarfondet/ Statskog Ingen aktuelle prosjekt i 2014. Tilskot til friluftstiltak for born og unge er teke med her. Dette vert utbetalt av Statskog SF, men vert fordelt av regionalt oppsynsutval. Det er transporten av skuleborn til fiskedagar i fjellet fjellstyret har avtalt med skulane å dekka. Søknadssummen bør aukast, ut frå kostnadsauke dei siste åra. 3304 Oppsynstilskot grunneigarar For oppsyn på privat grunn, 1 øre pr. daa., i følgje avtale med grunneigarlaget.
(Sak 26/13, side 2) INNTEKTER, FRAMHALD: 3306 Fiske Interessa for fiske i Aurland er stor, så eg reknar med at fiskekortinntektene (garnfiske + fjellstyret sin del av Aurlandskortsalet) held seg på det nivået dei har lege på dei siste par åra. Prisane er samordna med kortprisane på dei private sonene i fiskekortordninga, og vart auka før sesongen 2013. 3307 Sal av fellingsløyve rein Går ut frå like stor kvote som i 2013. Prisane vart sist justerte i 2012. 3308 Sal av fellingsløyve hjort/elg Inntekta her avheng litt av om elgen vert skoten eller ikkje. Avtalane om hjort- og elgjakt i Nordheimsdalen vart forhandla på nytt i 2012. Då vart prisane noko oppjusterte. Fellingskvoten for både hjort og elg i Nordheimsdalen vart auka ein dei i fjor, grunna ny arealutrekning av valdet. 3309 Småviltjakt Fjellstyret sitt vedtak om 2 veker utsett jaktstart i fjor haust førde til eit stort fall i inntektene frå sal av jaktkort - salet vart ned mot 20 % av det som har vore vanleg. Det var slik som ein hadde rekna med då vedtaket vart gjort, og ein oppnådde det ein ynskte; redusert jakttrykk. I år har jaktkortsalet teke seg noko opp att, truleg grunna det fine veret i oktober, og at fleire område i nabokommunar er freda. 3310 Festeavgifter Fjellstyret har krav på 50 % av dei festeavgiftene som vert innbetalte til Statskog SF for hytter og overnattingsverksemder. I år måtte fjellstyret betala attende sin del av festeavgifta som Statskog SF hadde kravd inn frå Statsnett for hyttene Berdalsbu og Håbergsholene dei siste 5 åra etter at hyttene var overtekne av fjellstyret. Dette er grunnen til negativt tal på denne posten i prognosen for 2012. Neste år vert fjellstyret sin del av festeavgiftene meir som vanleg. 3311 Overnatting fjellstyrehytter Noko nedgang i overnattingsinntekter i 2012, truleg grunna den seine sommaren. Reknar med at desse inntektene vil halda seg på 2011-nivået framover, eller auka litt, sidan fleire no har vorte kjende med tilbodet. 3312 Sal av trykksaker fjellstyrekontoret Salet av bladet "Villreinen" og valdkartet for Nordfjella. 8070 Renteinntekter Renter av bankinnskot og av lån til Aurland Setjefisk BA. Rentenivået har vore lågt dei siste åra, og vil truleg halda seg lågt.
(Sak 26/13, side 3) UTGIFTSSIDA: 5010 Løner oppsyn (refusjonsgjevande) Omlag 45 % av dei samla lønskostnadene for 2013 gjeld refusjonsgjevande arbeid for fjellstyret reknar med om lag same fordeling av arbeidstida neste år. Det er teke utgangspunkt i tala i oppsynsbudsjettet for 2014 som er vedteke av fjellstyret og sendt Statskog SF til godkjenning. I tillegg til 2,5 årsverk faste tilsette, er det rekna med innleige av ferievikar tilsvarande 1 månadsverk til ettersyn med setjefiskanlegg og anna arbeid. Grunna eit lønshopp i 2014 som me veit ligg i tariffavtalen for den sist tilsette i fjelloppsynet er løønskostnadene auka noko meir enn det som normalt vert lagt inn (3-3,5%) 5410 Arbeidsgjevaravgift 10,6 % av lønsutgiftene ovanfor. 5440 Pensjons- og yrkesskadeforsikring I samsvar med inngåtte avtalar med dei tilsette (4 % av løn). 5450 Bilgodtgjersle Oppdrag frå andre instansar (som t.d. SNO og Aurland Setjefisk) fører til mykje køyring. På den andre sida kjem ein del av dette att på inntektssida, ved at køyringa vert fakturert. Det vert lagt opp til ei halvering av utbetalinga til bilgodtgjersle i 2014, dersom fjellstyret kjøper inn ein fimabil til å ta den tyngste køyringa og dei lengste turane. 5460 Diettgodtgjersle Nivået på denne er nokså stabil. 5600 Oppsyn anna arbeid (ikkje refusjonsgjevande) Lønskostnader i samband med arbeid for andre instansar, som er inntektsgjevande for fjellstyret. Utgjer i 2013 omlag 55 % av arbeidsmengda. 5610 Møtegodtgjersle Kommunestyret vedtok i januar 2009 godtgjersler til fjellstyremedlemane. Eg har lagt desse til grunn i budsjettframlegget. 5660 Arbeidsgjevaravgift 10,6 % av ikkje-refusjonsgjevande lønskostnader (Andre lønsutgifter og Møtegodtgjersle). 6471 Driftsutgifter materiell Drifts- og vedlikehaldsutgifter av snøscooter, tilhengar, båtar m.v. Det er særleg vedlikehald av snøskuter som kan dra opp denne kostnaden.
(sak 26/13, side 4) 6472 Firmabil (ny post i budsjettet) Eingongsinnskot ved inngåing av leasingavtale, månadleg leasingavgift, drivstoff, årsavgift, forsikring og andre utgifter til bilhald. Det er laga eit eige notat med utrekningar av ymse alternativ. 6475 Andre utgifter oppsynsordninga Skal dekka arbeidsklede, pålagt sikringsutstyr og godtgjersle for bruk av eige utstyr i samsvar med tariffavtale, og supplering og fornying av dette. Avgifter for sikringsradio og abonnement mobiltelefon kjem og på denne budsjettposten. 6610 Rekneskap/revisjon Må rekna med ein viss auke, i samsvar med kostnadsnivået elles. 6710 Kontorutgifter Litt oppjustert i høve til 2012-2013. 7000 Reinsjakt (fellingsavg. m.m.) Omlag på same nivå som i 2013. Fellingsavgifta for hjort og elg ligg og inne i denne summen. 7001 Fiske Hovuddelen av summen gjeld betaling av setjefisk kjøpt frå Aurland Setjefisk BA. 7002 Hytter, drift Den oppsette summen skal dekka kostnadene med drift og rutinemessig vedlikehald av fjellstyrehyttene. 7003 Tilskot til tiltak i allmenningen Ingen større planlagde tiltak me veit om no. Kostnaden med planlagde fiskedagar for skuleklassar vert ført her. 7004 Tilskot til allmennyttige føremål Kan løyvast av overskotet i fjellkassa, jfr. 11 i Fjellova. 7010 Møte/kurs/reiser Skal m.a. dekka kurs- og møteutgifter både for fjellstyremedlemar og tilsette. Noko større utgifter enn i 2013, då det vert landsmøte i fjellstyresambandet.
(sak 26/13, side 5) 7020 Hytter, bygningstiltak Det vart i 2011 utført el-sjekk av fjellstyret si hytte i Håbergsholene, og det var budsjettert med utbetring av anlegget i år, berekna å kosta kr. 21.000. Av ulike årsaker vart dette arbidet ikkje utført, og bør difor setjast opp att på budsjettet for 2014. Ein vasslekkasje under hytta vart ordna i år. Det er mogeleg at dette eliminerer problemet ein har hatt med grunnforholda. Viss ikkje, bør det gjerast noko med stabilisering av fundamentet til hytta for å hindra at ho «stig og søkk» etter årstida. Drenering rundt hytta er truleg naudsynt. Maskinarbeid (3 dagar) inkl. transport, grus/pukk og røyr er kostnadsrekna til kr. 30.000, og er føreslege sett opp att på budsjettet. Nedgraving av ny vasslange er medrekna i summen. 7420 Kontingent Norges fjellstyresamband Landsmøtet til fjellstyresambandet i 2012 vidareførde tidlegare nytta kontingentsats, som seier at kontingenten skal vera 4 % av bruttoinntektene til fjellstyret året før (3 % for fjellstyre med bruttoinntekt under 200.000). 7425 Kontingent og tilskot villreinutvalet Fjellstyret betalar fast kontingent. I tillegg er det innført eit oppsynstilskot for å dekka noko av villreinutvalet sitt oppsyn. For fjellstyra er dette på 3 øre pr. daa (2 øre for dei private jaktfelta). 7426 Kontingent Samarbeidsorganet for fjellstyra på Hardangervidda Dette er ein informasjonskontingent" som fjellstyret betalar for å få all informasjon som vert utsend. Fjellstyret har møterett i dette organet. 7510 Forsikring hytter og materiell Går ut frå same nivå på forsikringspremien som det siste året. 7005 Trykkeutgifter og informasjonstiltak Utlegging av informasjon om tilboda i Aurland på Inatur sine sider og på fjellstyret si eiga nettside. Utgifter til trykking av jakt- og fiskekort og anna infomateriell kjem og på denne posten, sameleis annonsering av fjellstyremøta. Kjøp av bladet «Villreinen» til alle som tek ut jaktkort for villrein utgjer ein vesentleg kostnad. 7006 Mobiltelefon/sikringsradio Ny sikringsradio vart kjøpt i år. Ingen planlagde kjøp i 2014, men ein liten sum vert avsett i tilfelle det vert trong for utskifting.
(sak 26/13, side 6) 7007 Båt/naust/motor Den minste påhengsmotoren til fjellstyret, ein Yamaha 6 hk, har fått ein skade på godset som må vølast. Det er lagt inn ein sum til dette. Elles er det ikkje forslag om kjøp av nye båtar dette året. 7008 Kontorutstyr Det er ikkje planlagt særskilde kjøp i 2014, då det meste av datautstyret er rimeleg nytt. 7009 Byte av snøskuter/kjelke/tilhengar Ingen planlagde kjøp i 2014. 7021 Garasje Garasjeleiga til Aurland Setjefisk BA er kr. 11.000 i året. I tillegg er det sett opp ein sum til planering og asfaltering av plassen framfor garasjen. Dette var sett opp på budsjettet for 2013, men vart ikkje gjennomført. Det er rimeleg å gå ut frå at kalkulert kostnad med dette, kr. 35.000, vert delt likt mellom fjellstyret og Aurland Setjefisk SA. 8169 Finansutgifter Gebyr og rentekostnader. Fjellstyrekontoret, den 5.12.13 Harald Skjerdal