SYMJETILBODET I LEIKANGER

SYMJETILBODET I LEIKANGER Rapport frå arbeidsgruppa: Haavard Stensvand Dina Lefdal Målfrid Sværen 29.februar 2012 1

Innhald 1. Bakgrunn... 3 1.1. Eksisterande symjebasseng... 3 1.2. Oppnemning av gruppa - mandat... 3 2. Arbeidet i gruppa... 4 2.1. Møte og arbeidsform... 4 2.2. Besøk til andre kommunar... 5 2.3. Bruk av ekstern konsulent... 5 3. Situasjonen i dag - identifikasjon av behov... 5 3.1. Krava i Opplæringslova... 5 3.2. Ynskjeleg del av kroppsøvingsfaget... 5 3.3. Organiseringa av symjeopplæringa i dag... 6 3.4. Røynsler og konsekvensar med dagens ordning... 6 3.5. Skulane sine ønskje... 7 3.6. Barnehagane... 8 3.7. Helsetenesta... 8 3.8. Symjing som idrettsaktivitet... 8 3.9. Andre behov... 9 3.10. Besøkstal (erfaringstal)... 9 4. Erfaringar frå Balestrand kommune... 9 5. Aktuelle løysingar... 10 5.1. Generelt:... 10 5.2. Leige av basseng... 11 5.3. Nytt opplæringsbasseng ved Leikanger barneskule... 11 5.4. Nytt opplæringsbasseng ved Leikanger ungdomsskule... 11 5.5. Nytt basseng ved Sognefjord Hotel... 11 6. Oppsummering... 12 Vedlegg 1... 13 Vedlegg 2... 14 2

1. Bakgrunn 1.1. Eksisterande symjebasseng Leikanger kommune fekk eit symjebasseng på 12,5 x 10,5 m, då ungdomsskulen stod ferdig i 1968. Bassenget vart bygd saman med gymnastikksalen i ein eigen fløy. Det er felles dusj og garderobar i underetasjen, og desse vart rehabiliterte i 2006. Fram til hausten 2007 vart bassenget brukt både til folkebading og symjeopplæring for begge skulane. Dei siste åra vart bruken konsentrert til om lag 3 månadar per år, enten mellom jul og påske, eller mellom haustferien og jul. Bruken var avhengig av årlege søknader og dispensasjon frå krav i forskriftene for badebasseng frå 1996. Langvarig bruk med høgare temperatur på vatnet enn bygget var konstruert for, førde til at tak- og veggkonstruksjonane fekk skader frå fukt og kondens. Lekkasjane frå himlingen i gymnastikksalen vart etter kvart så omfattande at bassenget måtte stengast. I budsjettet for 2009 vedtok kommunestyret at det skulle utarbeidast ein tilstandsanalyse for symjebassenget. Etter tilbodskonkurranse vart dette arbeidet utført av Asplan Viak AS, som la fram sin rapport i desember 2009. Rehabiliteringa tok utgangspunkt i minimumstiltak for å stetta forskriftene, men fleire av løysingane var korkje optimale eller framtidsretta: Garderobar og dusjanlegget vil framleis liggja i kjellar Ny HC-garderobe vil verta ein naudløysing når det gjeld universell utforming Normalkravet til fall på rampe i bassengrommet vil ikkje kunne stettast Kommunestyret slutta seg i møte 15. april 2010 seg til konklusjonane i rapporten, og vedtok å ikkje gå vidare med rehabilitering av symjebassenget. Kommunestyret vedtok òg at det skulle arbeidast vidare med ei framtidig løysing for symjehall i Leikanger. I dette låg bruk av eksisterande lokalisering, ny lokalisering og samarbeid med andre. Siktemålet var å få prosjektet inn i økonomiplanen. 1.2. Oppnemning av gruppa - mandat I møte 11.november 2010 gjorde kommunestyret dette vedtaket: Det vert oppnemnd ei arbeidsgruppe til å arbeida vidare med symjetilbodet i kommunen. Mandat for gruppa: A. Greia ut trongen for symjebasseng med desse tema: 1) Obligatorisk symjeopplæring 2) Ynskjeleg del av kroppsøvingsfaget 3) Folkebad som eit helse- og velværetilbod 4) Konkurranseidrett 3

B. Komma med framlegg til lokalisering av aktuelle anlegg med kostnadsoverslag, finansieringsplan og driftskostnader. Alternativet med leige av basseng enten innanfor eller utanfor kommunen skal greiast ut. Gruppa kjem med framlegg til budsjett for arbeidet sitt. Gruppa legg fram ei førebels orientering til kommunestyret om arbeidet i løpet av april 2011. Endeleg rapport frå gruppa vert lagt fram innan 1. juni 2011. Gruppa får denne samansetjinga: 1) Haavard Stensvand (leiar) 2) Dina Lefdal 3) Representant frå skulane ( Rektor ved Leikanger barneskule Målfrid Sværen vart her valt) Tenesteleiar for kultur og fritid Ole O. Røthe og nærings- og utviklingssjef Per Holen ivaretek sekretariatsfunksjonen 2. Arbeidet i gruppa 2.1. Møte og arbeidsform Gruppa hadde sitt første møte 7. desember 2010. Den første arbeidsperioden (vinteren 2011) vart nytta til å skaffa basiskunnskap om dei ulike sidene av arbeidsområdet. Gruppa inviterte skulane, barnehagane og helsetenesta til å koma med sine tankar om behov for symjebasseng. Gruppa fekk òg skriftlege innspel frå desse. I tillegg var dei med på møte i gruppa, for å kunna utdjupa det skriftlege materialet, og svara på spørsmål. Gruppa samla seg om ein førebels konklusjon om at det var aktuelt å gå vidare med tre alternativ for bassengplassering; ved ungdomsskulen, ved barneskulen og ved Sognefjord hotel. For alternativet ved barneskulen kunne det vere fleire alternative løysingar, men gruppa valde berre å vurdere plassering på ei tomt der kommunen sjølv er grunneigar. Det vart halde eige møte med Jack Eggum ved Sognefjord Hotel. Hotellet hadde hausten 2009 fått utarbeidd skisser for eit basseng på 25 m plassert på Nokkaneset, søraust for hotellbygningen. Kommunestyret vedtok på møte 3. mars 2011 eit budsjett på 183.000 kr for arbeidet med utgreiinga. Via kommunen si heimeside vart innbyggjarane inviterte til å koma med synspunkt, m.a. på dei tre lokaliseringsalternativa, og storleiken på bassenget. I løpet av våren kom det 21 innlegg på heimsida. Av desse var eitt for ungdomsskulen, seks for barneskulen og ti for lokalisering ved hotellet. Sju meinte at 25 meter var den rette bassenglengda, medan éin heldt på 12,5 m. 28. mars inviterte gruppa til ope møte på Sognefjord Hotel. Til stades var òg Jack Eggum frå hotellet, og Eyvind Marcussen frå Asplan Viak (jobba m.a. med Luster bad). Konklusjonane frå gruppearbeida på møtet var samanfallande med dei behova og synspunkta som gruppa hadde frå møta med skulane, barnehagane og helsetenesta. 4

2.2. Besøk til andre kommunar Gruppa såg behovet å få sjå eit moderne 25 meter symjebasseng med eigne augo. I slutten av mars 2011 var i gruppa, sekretariatet og rådmannen på synfaring ved Strandebarm skule i Hardanger, og Osbadet utanfor Bergen. 2.3. Bruk av ekstern konsulent Gruppa fann det nødvendig å leige inn ekstern konsulent til den delen av utgreiinga som går på konkret planlegging og kostnadsvurdering, både for bygging og drift. Gruppa ønskte å få utarbeidd skisseprosjekt for dei tre aktuelle lokalitetane. Administrasjonen utarbeidde konkurransegrunnlaget, og tre kompetente firma innan planlegging av symjebasseng vart inviterte til å delta i konkurransen. Arkitektkontoret Nils Tveit frå Drammen vart engasjert til å utføra arbeidet. Dette arbeidet starta opp med synfaring med arkitekt og gruppa tidleg i september. Dei første utkasta frå arkitekten låg føre i slutten av oktober. Alternativet ved hotellet vart særskilt drøfta med styret i hotellet. Arkitekten sitt arbeid ligg føre som eige vedlegg. 3. Situasjonen i dag - identifikasjon av behov 3.1. Krava i Opplæringslova Læreplanverket for kunnskapsløftet (LK 06) har under faget kroppsøving følgjande kompetansemål til med symjeopplæringa i grunnskulen: Etter 4. årssteg: Etter 7. årssteg: Etter 10. årssteg: Vera trygg i vatn og vera symjedyktig Utføra grunnleggjande teknikkar i symjing på magen, på ryggen og under vatn Symja på magen, på ryggen og dykka. Forklara og utføra livberging i vatn og livbergande førstehjelp 3.2. Ynskjeleg del av kroppsøvingsfaget Sjølv om symjeopplæringa er det primære i denne utgreiinga, er det i mandatet òg bedt om at gruppa skal sjå på trongen for symjebasseng, med tanke på symjing som ein ynskjeleg del av kroppsøvingsfaget. Læreplan for Kunnskapsløftet er tydeleg på at opplæringa i kroppsøving skal medverka til at elevane opplever glede, inspirasjon og sjølvforståing. I den tida symjebassenget på ungdomsskulen fungerte, var det brukt i kroppsøvingsfaget i tillegg til symjeopplæringa. Elevane på alle steg hadde éin time bading i veka. Ved å leggja inn andre delar av kroppsøvingsfaget i eit basseng, er det mogleg å styrkja og vidareutvikla symjeopplæringa, på same tid som aktivitetar knytt til rørsle, leik og idrett vert 5

dekka opp. Kroppsøving er allmenndannande, og faget skal medverka til at mennesket sansar, opplever, lærer og skapar med kroppen. Dette kan godt gjerast i vatn og. I tillegg finst mange element i faget elles som eignar seg godt for tverrfagleg samarbeid med utgangspunkt i bassengaktivitetar. 3.3. Organiseringa av symjeopplæringa i dag Etter at bassenget på ungdomsskulen vart stengt, nytta begge skulane bassenget ved Sognefjord Hotel. Skulane har sett det som svært positivt at hotellet har kunna gi dette tilbodet. Bassenget på hotellet er frå 1972 og treng større utbetringar. For skulane var bruken av hotellet sitt basseng ei naudløysing. Garderobane er ikkje tilpassa skuleelevar, og det var difor nødvendig å ha ekstra personell med. Bassenget er òg for djupt til å kunne nyttast til opplæring for elevar under 4. klasse. Viss skulane skulle kunna halda fram med å ha opplæring på Sognefjord Hotel, måtte det gjerast utbetringar. Hotellet har gitt melding om at det ikkje vil satsa meir på bassenget. Sommaren 2010 retta kommunen førespurnad om leige av basseng frå og med skuleåret 2011/2012, til Vesterland feriepark på Kaupanger og Sogndal vidaregåande skule. Berre Vesterland feriepark kunne tilby plass for det tidsvolumet som kommunen bad om tilbod på. Det vart inngått avtale om leige av rom for 2 timar per veke i 25 veker frå 24. oktober 2011. Innafor dette spennet på 25 veker har barneskulen symjeopplæring alle vekene, og ungdomsskulen i sju av dei. Totalt får skulane 62 timar i bassenget vinteren 2012. I tillegg kjem reisetid. Kostnader eks.mva: Skyss til og frå: kr 1500 x 25 veker kr 37.500,- Leige av basseng og undervisingsrom: kr 1500 x 25 veker " 37.500,- Ekstra personell: kr.250,- x 4 timar x 25 veker " 25.000,- Sum per år Kr 100.000,- Sogndal vidaregåande skule seier at kapasiteten i bassenget er svært stram. Leikanger kommune har så langt ikkje kunna rekne med å få dekke sitt behov for symjetimar med leige av basseng der, men skulen seier at den vil prøve å prioritere Leikanger framfor det auka behovet som grunnskulen i Sogndal har. Tilbodet ved Vesterland feriepark framstår likevel som det einaste sikre alternativet for symjeopplæringa. Det nye badeanlegget som er under bygging i Gaupne vil kanskje kunne verta eit supplement, men det er korkje undersøkt nærare eller drøfta med skulane. 3.4. Røynsler og konsekvensar med dagens ordning Vedlegg 1 viser korleis skulane praktisk gjennomfører symjeopplæringa. Konsekvens av ordning med leige av basseng ved Vesterland feriepark kan oppsummerast slik: 6

Leikanger barneskule (25 veker symjeopplæring) Det går med éin time til symjeopplæring, éin time til andre fag og to undervisningstimar til reising kvar veke. Tap av to undervisningstimar til reisetid i 25 veker utgjer to skuleveker på eitt år (elevane har 38 skuleveker i året). Leikanger ungdomsskule (sju veker symjeopplæring) Samla tid er 4 undervisningstimar. Av desse er éin time til symjeopplæring og livredning, éin time til andre fag og to undervisningstimar til reising. Tap av to undervisningstimar til reisetid i sju veker er vel to heile dagar på eitt år (har 38 skuleveker per år). Røynslene med symjeopplæringa på Vesterland fram til no kan oppsummerast slik: Avstand og reisetid vert opplevd som slitsam Mykje av undervisningsdagen går med til reise og symjeopplæring (det går vekk to undervisningstimar i reisetid kvar gong) Leige av basseng utanfor kommunen gjer at skulane vert bundne i tid, og får ikkje lagt opp undervisninga så fleksibelt som ønskjeleg for å nå opplæringsmåla Symjedugleik På barneskulen kan halvparten av elevane på 3. steget no symje, eller i ferd med å lære det. Den andre halvdelen kan ikkje. På 4. steget kan ein tredjedel framleis ikkje symja. Ungdomsskulen har ikkje tilsvarande opplysningar om symjedugleiken, men det er klart at ein del elevar ikkje kan symja. Desse resultata viser at skulane ikkje klarar å stette krava i opplæringslova med den ordninga som er i dag. For barneskulen sin del betyr det at 2. steget må koma med frå neste år. Ut frå røynslene vil kostnadane difor går opp frå neste år. 3.5. Skulane sine ønskje Begge skulane meiner at den beste løysinga er å ha eige basseng, som kan nyttast når skulane vil. Det vil gjere det lettare å driva tilpassa opplæring, ved at behova til den einskilde eleven kan prioriterast. Grupper som treng noko ekstra kan få opplæring, utan at det er nødvendig å organisera ekstra skyss og skaffa ekstra personale. Opplæringa kan organiserast slik at progresjonen blir meir naturleg enn når faste klassesteg får tilbod om symjeopplæring. Opplæringa kan skje kontinuerleg gjennom heile året. Borna lærer ikkje å symja på nokre veker. Basseng på skulen vil gi maksimal utnytting av personalressursane. Det vert ikkje nødvendig å bruke vikarar/ekstra personell. Eit basseng på barneskulen vil bety at skulefritidsordninga kan gje eit godt tilbod i opningstida si. Dette er ei god hjelp for å få mengdetrening og oppleving av meistring i vatnet. For begge skulane vil eit 12,5 m basseng vil tena føremålet godt. For barneskulen er det viktig at bassenget er grunt i den eine enden, og at det ikkje er for smalt. Det grunne området må utgjera plass nok til ei opplæringsgruppe. 7

For ungdomsskulen er det viktig at det er nok djupn til at elevane kan ta startstup frå kanten, og ha noko å dukka på. Skulen meiner at minimum storleik på bassenget må vere som dagens basseng på ungdomsskulen. For barneskulen vil reisetid til og frå eit basseng ved ungdomsskulen eller Sognefjord hotell utgjera ein knapp halvtime. Dei yngste treng noko ekstra tid til påkledning og gange til busshaldeplassane. 3.6. Barnehagane Nybø barnehage hadde i mange år timar med dei eldste borna i bassenget på ungdomsskulen, noko både barnehagen, borna og foreldra syntest var kjekt og nyttig. Dette krov at det alltid var folk med godkjent livredningskurs i barnehagen. Barnehagane har interesse av å få eit basseng i bygda. Det er både praktisk og økonomisk vanskeleg å dra ut av bygda for dei. Uansett plassering vil to av barnehagane få avstand til eit basseng i bygda. Mange foreldre nyttar seg av tilbodet om babysymjing i Sogndal. 3.7. Helsetenesta Helsetenesta meiner at det er mange i kommunen som kunne hatt god nytte av eit lokalt basseng. Den merkar at det er meir krevjande enn før for pasientar å få tilgang til basseng, og ser klart at eit høveleg basseng vil vera eit stort gode for innbyggarane. Bad har vore brukt i svært lang tid for å få god helse og for behandling for sjuke. Sett ut frå eit helseperspektiv er det difor mange gode grunnar til å ha symjebasseng: Det er godt dokumentert at bading, symjing og fysisk aktivitet er eit gode for helsa Bading er eit godt førebyggande tiltak og fleire vert fysisk aktive (det førebyggjer overvekt, diabetes, hjerte/karsjukdom og depresjon) Bading er eit folkehelsetiltak, fungerer som ein sosial arena, og gir velvære og trivsel Bading er ein familieaktivitet som det er vi lang og god erfaring med i Leikanger Symjeopplæring førebyggjer drukningsulukker Trening i vatn som alternativ ved sjukdom er gunstig fordi: Astmapasientar tåler slik aktivitet betre enn t.d. løp og ballspel Revmatikarar tåler symjing betre enn løp og gange Rehabilitering ved trening i basseng er bra fordi det gir mindre leddbelastning, både etter operasjonar og ved t.d. lammelse Bassengtrening er god alternativ trening ved idrettsskader Trening i basseng er ofte god behandling ved muskelsmerter 3.8. Symjing som idrettsaktivitet I konkurransesamanheng er bassenglengda eit sentralt spørsmål. Skal det drivast aktiv symjing er det behov for 25 m basseng. Syril ser det som viktig å gi symjeopplæring til alle, 8

noko som eventuelt kan gjerast i mindre basseng. Det er og andre aktivitetar som kan gjerast i mindre basseng, slik som trening kajakk (eskimorulle) og dykking Primært ynskjer Syril eit 25 m basseng for konkurranse, men ser det som viktig at bygda i alle fall får eit basseng der barn og unge kan få eit tilbod om symjeopplæring. Det er lite heldig med kombinasjonen symjetrening og oppvarma basseng. 3.9. Andre behov I kommunen sin plan for idrett og fysisk aktivitet er eitt av dei tre hovudmåla følgjande: Idrett og fysisk aktivitet er viktige faktorar for utvikling og vedlikehald av fysisk, psykisk og sosial helse. Det er såleis felles målsetting for arbeidet innan idrett og fysisk aktivitet at dette skal bidra til utvikling og vedlikehald av god fysisk, psykisk og sosial helse for alle innbyggjarane. Ved sida av det helsemessige motivet, er gleda ved opplevingar og aktivitet viktig for mange. Den sosiale faktoren må også nemnast som svært viktig i denne samanheng. Eit symjebasseng vil gje aktivitetstilbod til alle aldersgrupper, og vil gi folk i Leikanger høve til meir fysisk fostring og auka aktivitet. Fysisk utfalding gjennom aktivitet i organisert eller uorganisert form er viktig for folkehelsa. Gjennom symjing og andre vassaktivitetar vil folk kunna oppleva glede og velvere ved å verte i betre fysisk form. Eit basseng vil difor kunne gi positive verknadar for både for mental og fysisk helse. Eit basseng vil òg vere ein viktig sosial møteplass for alle aldersgrupper, særleg i haust- og vintermånadene. Det vil vera ein viktig trivselsfaktor, og kan bidra til at Leikanger vert opplevd som ein meir attraktiv stad å bu. 3.10. Besøkstal (erfaringstal) Då bassenget ved ungdomsskulen var i full drift, var 1997 eit år med godt besøkstal. Bassenget var då ope i 6 månader, frå haustferien til påskeferien. Det året var det 1250 betalande i bassenget, fordelt på 900 born og 350 vaksne. Billettprisane var 10 kr for born og 20 for vaksne. 4. Erfaringar frå Balestrand kommune Sagatun skule i Balestrand nyttar bassenget i Høyanger, og elevane får tilbod om symjeopplæring i 4. og 5. klasse. Skulen har som overordna mål at alle skal kunne symje ved utgangen av 5. klasse. Symjeopplæringa er organisert slik at 4. klasse har 12 turar før jul, og 5. klasse har 12 turar etter jul. Elevane reiser frå skulen kl. 08.30, og returnerer kl. 11.00. Elevane får då om lag 1 time i bassenget på kvar tur. Sidan det går med 3 timar kvar veke til transport/bassengtid når klassen har symjeopplæring, vert kroppsøvingsopplegget redusert i denne perioden. I 8. klasse får elevane tilbod om 3-4 turar, der hovudvekta er lagt på livredningsaktivitetar. I tillegg har klassen hjarte- og lungeredningsteori, og praksis på skulen under leiing av 9

ambulansepersonell. For å utnytte busstransporten reiser 8. klasse saman med 5. klasse om våren. Dette betyr at kvar elev samla får i underkant av 30 t symjeopplæring. Når elevane byrjar i 1.klasse får foreldra informasjon om korleis symjeopplæringa vil verte organisert, og foreldra vert oppmoda om å ta med ungane i basseng/bade i sjøen før dei kjem i 4. klasse. Mange elevar har difor lært å symje før dei kjem i 4. klasse, og har difor god nytte av opplegget dei får i 4. og 5. klasse. I tillegg er det elevar med særskilde behov i ulike klassar som nyttar tilbodet i fleire år som ein del av det generelle aktivitetstilbodet på skulen. Kostnaden er såleis busstransport + bassengleige + lærarstyrking, alt etter elevtalet i gruppa. 5. Aktuelle løysingar 5.1. Generelt: Vasstemperatur: Ulike brukargrupper ynskjer til dels ulike temperaturar i vatnet, frå 26 o til 35 o C. Både fagfolk og brukarar som gruppa har vore i kontakt med, tilrår sterkt å halda ein fast temperatur i vatnet. Det vil bidra til både å spara energi, og det vil gjere at bassenget får ei optimal levetid. 10

Store temperaturvekslingar vil gi spenningar i armering og i bassengkroppen, og med ulike utvidingskoeffisientar på materiala vil dette gi lekkasjar på sikt. For offentlege basseng er det tilrådd ein temperatur på mellom 27 o og 29 o C. Lufttemperaturen bør vera 2-3 o høgare enn vasstemperaturen. Nedtapping: Moderne bassengdrift legg opp til å ha vatn i bassenget heile året, òg den tida av året bassenget ikkje er i bruk. Besøkande: Tal besøkande og billettprisar er viktige faktorar for inntektene ved badet. Det vil likevel ikkje vera billettinntekter nok til å dekka lønsutgiftene for badevaktene. Erfaringane frå større bad er at sal av kioskvarer er med på å gi betre økonomi for bassengdrifta. 5.2. Leige av basseng Vi viser til avsnitt 3.4. 5.3. Nytt opplæringsbasseng ved Leikanger barneskule Det er laga eit skisseprosjekt for eit basseng på 12,5 x 10,5 meter, plassert på nordaustsida av det eldste byggesteget ved skulen, tett ved dusj- og garderobebygget. Som nemnt i kapittel 2.1. har gruppa valt å berre vise denne plasseringa, fordi kommunen sjølv er grunneigar her. I arealdelen i kommuneplanen er det sett av areal til skule- og idrettsanlegg sørvest for stadion, saman med nytt parkeringsareal for området. Dette området er i privat eige. Kostnader med eit nytt frittståande bassenganlegg er rekna til 33.110.000 kr. inkl.mva. Med spelemidlar på 2.500.000 kr, og mva-refusjon på 6.622.00, vil det gi ein netto byggekostnad på 23.988.000 kr. Årleg driftstilskot frå kommunen er rekna til mellom 400.000 og 600.000 kr. 5.4. Nytt opplæringsbasseng ved Leikanger ungdomsskule Løysinga viser gjenbruk av eksisterande basseng, ved at det vert montert eit stålbasseng (eventuelt i anna materiale) inne i bassenget. Garderobane er i eit tilbygg austover. Kostnader med anlegget er rekna til 22.025.000 kr inkl.mva. Med spelemidlar på 2.500.000 kr og mva-refusjon på 4.405.000, vil det gi ein netto byggekostnad på 15.120.000 kr. Årleg driftstilskot frå kommunen 400.000-600.000 kr 5.5. Nytt basseng ved Sognefjord Hotel Bassenget er vist på austsida av hotellet som eit frittståande anlegg. Bassenget er 25 x 8,5 m. Dette området er i privat eige. 11

Kostnader med bassenganlegget er rekna til 52.710.000 kr inkl.mva. Med spelemidlar på 7.500.000, og mva-refusjon på kr. 10.542.000, vi dette gi ein netto byggekostnad på 34.668.000 kr. Årleg driftstilskot frå kommunen på mellom 800.000,- og 1.000.000 kr. Eit basseng i tilsvarande storleik som vist på barneskulen og ungdomsskulen, vil gi om lag same investeringskostnadar som prosjektet på barneskulen. Sognefjord Hotel har i brev av 31.01.12 (Vedlegg 2) komme med sine kommentarar til teikningane frå arkitekten, tomta og driftsmodell. 6. Oppsummering Arbeidsgruppa er samd om følgjande: 1. Leikanger kommune skal gi ei symje- og livredningsopplæring som gjer det mogleg for elevane, som eit minimum, å nå kompetansemåla i læreplanane etter opplæringslova 2. «Nullalternativet», med leige av basseng utanfor kommunen, er ei mellombels naudløysing. Det er så krevjande å gjennomføre symjeopplæringa på Vesterland at omfanget vert på eit minimumsnivå. Dette gjer det vanskeleg å nå kompetansemåla. I tillegg går tida til transport fram og tilbake går ut over opplæringa i andre fag 3. Det er mogleg å byggje basseng alle dei tre stadene som gruppa har vurdert; på barneskulen, på ungdomsskulen og ved Sognefjord Hotel 4. Dei vurderte alternativa til nytt symjebasseng i kommunen vil legge til rette for kravet om ei symje- og livredningsopplæring der kompetansemåla etter opplæringslova blir tilfredsstilt 5. Eit basseng i kommunen vil gi tilbod til mange fleire brukargrupper enn skulane, og vil kunne ha positive effekt for folkehelsearbeid, fritidsbruk/velvære, symjeidrett/andre organiserte vassaktivitetar osb. 6. Eit basseng vil forsterke inntrykket av Leikanger som ein attraktiv kommune å bu i 7. Eit symjebasseng ved Sognefjord Hotel vil kunne ha ein positiv effekt for utviklinga av hotellet 8. Gruppa kan ikkje sjå at det ligg til mandatet å tilrå ei bestemt løysing. Dette meiner vi rådmannen må gjera ut frå opplysningar i rapporten, høyringsuttaler og økonomiske vurderingar 12

Vedlegg 1 Organisering av symjeopplæringa skuleåret 2011/2012 Den praktiske gjennomføringa ved Vesterland feriepark blir vinteren 2012 organisert slik: Leikanger barneskule (25 veker symjeopplæring) Måndagar: Start kl 10.00 og tilbakekomst kl 13.45/14.00. Samla tid er fire undervisningstimar. Av desse er éin time til symjeopplæring, éin time til andre fag og to undervisningstimar til reising. Tap av to undervisningstimar til reisetid i 25 veker utgjer to skuleveker på eit år. Elevane har 38 skuleveker i året. 4. steg får 28 timar og 3. steg får 22 timar. Desse dagane har ikkje elevane friminutt. Dei et på bussen og i undervisningsøkta på Vesterland. Leikanger ungdomsskule (sju veker symjeopplæring) Onsdagar: Ulike starttidspunkt og sluttidspunkt ut frå kva klassesteg som reiser. Samla tid er 4 undervisningstimar. Av desse er éin time til symjeopplæring og livredning, éin time til andre fag og to undervisningstimar til reising. Tap av to undervisningstimar til reisetid i sju veker er vel to heile dagar på eit år. Elevane har 38 skuleveker i året. 10. steg får seks timar, 8. steg får to timar og 7. steg får seks timar. Elevane har ikkje friminutt, og dei et i bussen. Røynslene med symjeopplæringa på Vesterland fram til no kan oppsummerast slik: Undervisninga gir best utbyte med éin samanhengande time i bassenget. Lengre tid kan medføra trøyttleik og ubehag. Bassenget er godt eigna for å gje eit tilfredstillande tilbod. Vesterland feriepark har rom som kan nyttast til vanleg undervisning for grupper som ikkje er i bassenget. Støynivået i bassengrommet er høgt. Det er utfordringar med overlapping frå andre skular/grupper som nyttar bassenget. Avstand og reisetid kan opplevast som slitsamt. Mykje av undervisningsdagen går med til reise og symjeopplæring ( misser to undervisningstimar i reisetid kvar gong). Med leige av basseng utanfor kommunen gjer at skulane vert bundne i tid, og får ikkje lagt opp undervisninga så fleksibelt som ønskjeleg for å nå opplæringsmåla. Kommunen kan rekne med å få nytte same tilbodet seinare skuleår. Kostnadene er kjende på førehand ( sparer på å bruka eigen skulebuss inn, men ekstrabuss på retur). Elevane har ikkje hatt anna kroppsøvingsundervisning dei vekene dei har vore på Vesterland. Elevar som ikkje kan symja på 5. og 6. steget har fått vera med 4. steget til Vesterland nokre gonger. 13

Vedlegg 2 Til Leikanger kommune Bassenggruppa SOGNEFJORD HOTEL Leikanger 31.01.2012 Bassenganlegg ved Sognefjord Hotel Viser til nye teikningar frå Arkitekt Nils Tveit og vi har følgjande kommentarar. Bassengbygget: Vi er nøgd med at arkitekten har flytta bassengbygget lenger austover og derfor ikkje er til hinder for andre aktivitetar som hotellet driv med i høgsesongen. Me er også opptekne av at bygget ikkje vert for dominerande i terrenget og det er mogleg at det bør vurderast trekt endå lengre aust. Dette kjem ikkje så godt fram på dei siste skissene til arkitekten, men dette vart også trekt fram som viktig for oss under møtet vi hadde i desember. Massen som må vekk bør nyttast til å lage eit badeanlegg ved fjorden på austsida av Nokkaneset. Då kan ein betre nytte fjorden som badeplass i samanheng med bassenganlegget. Vidare meinar vi at bassengbygget bør vera eit signal- og miljøbygg for Leikanger kommune. Utstrakt bruk av miljøskapande sparetiltak innan oppvarming og andre driftsløysningar er viktig. Tomt: Hotellet ser føre seg å bidra med tomt til bassengbygget som aksjekapital til eigedomsselskapet. Verdien og storleiken på tomta kan ein komme attende til etter kvart. Driftsmodell: Hotellet bidreg med tomt som aksjekapital til ein fastsett verdi inn i eigedomsselskapet. Hotellet kjøper tenester av driftsselskapet, dvs at våre gjester som nyttar seg av bassenget betaler ein avtalt pris pr person. Vidare så kan også hotellet kjøpe tenester av driftsselskapet innanfor oppvarming og liknande. Hotellets bruk av driftsselskapets personell ved einskilde høve ser vi også som naturleg, men dette er også noko som ein må komma attende til etter kvart. Med venleg helsing Sognefjord Hotel as Jack Eggum Sognefjord Hotel as Sognefjordvegen 20 6863 Leikanger Tlf: 57651100 Fax:57651101 E-mail: hotel@sognefjordhotel.no 14