SUND KOMMUNE SAKSPAPIR Styre, utval, komite m.m. Møtedato Saksnr Forvaltningsstyret - Planutval Saksansvarleg Arkiv: N - 101.3 Arkivsaknr Mona Rabben Objekt: 16/2997 Rullering kommuneplanen sin arealdel vedteken 04.10.2011. Handsaming før høyring Samandrag av saka: Saksutgreiing: Framlegg til ny arealdel av kommuneplanen er utarbeidd og vert lagt fram for planutvalet til handsaming. Følgjande dokument utgjer arealdelen av kommuneplanen: plankart, føresegner planomtale. Følgjande dokument er naudsynte grunnlagsdokument for planen: konsekvensutreiing og ROS-analyse, rapport for akvakultur og rapport for funksjonell strandsone Bakgrunn for rulleringa: Kommunestyret har den 18.10.2016 i K-vedtak 100/16 vedteke at det skal gjennomførast ei mindre rullering av arealdelen til kommuneplanen. Mindre rullering inneber at det i planarbeidet vert sett fokus på einskilde element som vert teke opp til vurdering. Kommuneplanen består av ein samfunnsdel og ein arealdel. Arealdelen til kommuneplanen gjev hovudtrekka i arealdisponeringa og rammer for kva for tiltak og ny arealbruk som kan settast i verk i planperioden. Planen viser også kva for omsyn som må takast i vare på ved disponeringa av areala. Arealdelen byggjer på samfunnsdelen, og er såleis også eit virkemiddel for å sikre at arealbruken i kommunen bidrar til å nå måla som er vedtatt i samfunnsdelen.
Arealdelen omfattar plankart, føresegner og ei planomtale. Plankart og føresegner er juridisk bindande straks kommunestyre har vedteke planen. Planomtalen viser korleis dei overordna planane og føringane er ivaretatt, og gjev utfyllande informasjon til korleis ein skal forstå plankart og føresegner. Ein arealplan skal sjåast minimum i eit 12 årsperspektiv, og vurderingane må difor sjåast i eit langsiktig perspektiv. Kvart fjerde år, ved fastsetting av kommunal planstrategi, skal kommunestyret ta stilling til om det er behov for å rullere kommuneplanen. Rulleringa av kommuneplanen er teke inn som eit punkt i gjeldande planstrategi vedteke av kommunestyret 13.juni 2016. Denne rulleringa gjeld utviklinga i perioden 2018-2030. Bakgrunn for rulleringa: Det har vore ein viktig del av arbeidet å få rette opp og utfylle føresegner og plankart, då rådmannen har gjort seg erfaringar med at gjeldande arealdel av kommuneplanen har vore krevjande å bruke som styringsverktøy. Kommunestyret har vidare hatt som føresetnad at folkehelse skal vere eit gjennomgåande fokusområde for denne rulleringa. Det har også vore ein del av oppgåva å sjå på vidare utvikling av bygdene. Når det gjeld Spildepollen og Stranda/Kleppe har desse områda dei seinare åra utvikla seg til lokalsenter som kommunen ønskjer å vidareutvikle. Det har vore peika på behov for å vurdere fleire areal til bustad, tilgang til sjø, attraktive friområde og andre moment for gode sentrumsområde. Sentrumsområdet Skogsskiftet er ikkje ein del av denne rulleringa, då det vert utarbeidd eigen kommunedelplan for sentrumsområdet Skogsskiftet. Planutvalet har vore styringsgruppe for planarbeidet, og har gått gjennom alle innspel til planen, gjennomført synfaringar og vurdert innspela opp mot føresetnadane i planprogrammet. Multiconsult har vore inneleigd planfirma og har gjennomført konsekvensutgreiingar, ROS-analyse for nye arealføremål. Dei har vidare utarbeidd ei analyse med omsyn til nye akvakulturområder og dei har laga ein eigen rapport for strandsone. Det er også Mulitconsult som har utarbeidd planomtale, plankart og føresegner i nært samarbeid med administrativ arbeidsgruppe og politisk styringsgruppe. Planprosess: I «Kommunal planstrategi for Sund kommune 2016-2020» er arealdelen av kommuneplanen trekt fram som ei av fleire prioriterte planoppgåver. Arbeid med rulleringa av kommuneplanen starta i 2016 med kommunestyrevedtaket K-100/16. Intensjonen i vedtaket har vore å gjere ei «mindre rullering» av KPA. Planarbeidet har blitt noko meir omfattande enn det ein såg føre seg ved utarbeiding av planprogrammet. Dette skuldast mellom anna mange innspel, manglar ved gjeldande plan. Det vart varsla oppstart av planarbeid i februar 2017. Den 24.04.2017 fatta planutvalet vedtak om å leggje planprogram ut på høyring. Planprogrammet låg ute til offentleg ettersyn med høyringsfrist sett til 07.06.2017, og vart vedteke i Sund kommunestyre den 14.11.2017. I høyringsperioden kom det inn uttale frå fem offentlege instansar: Fylkesmannen i Hordaland, Fiskeridirektoratet, Statens vegvesen, Hordaland fylkeskommune og Sund kyrkjelege fellesråd. Det kom i tillegg 73 private innspel både før og under høyringa av planprogrammet. Desse innspela knytta seg for det meste til forslag til endring av arealføremål og i liten grad det konkrete planprogrammet. Nokre innspel var relevante for planprogrammet, mellom anna
innspel om å opne for å justere kvoter i LNF og å leggje til rette for spreidd næring i naust der dette kan eigne seg. I samband med utarbeidinga av planforslaget har det vore gjennomført ei rekkje arbeidsmøter. Hausten 2016 hadde styringsgruppa to møter for å avklare vidare prosess. Våren 2017 var det gjennomført møter med dei politiske utvala «saksgruppe næring og utvikling» og «saksgruppe levekår og nærmiljø». Der var problemstillingar knytt til mellom anna næringsareal, idrett, friluftsliv, folkehelse, områder for vidare utvikling og behov i bygdene diskutert. Hausten 2017 var det gjennomført medverknadsmøter. Eit intressant funn i medverknadsmøtet med tema «Tilgang til sjø» var at det på tross av lang strandsone i Sund kommune er det mange som opplever at det er vanskeleg å kome seg til sjø i eige nærområde. Det er behov for tilrettelegging i form av parkering (i nærleiken av) gode badeviker og turterreng. Det er eit stort behov for båtplassar, og dei etablerte småbåthamnene greier ikkje å dekkje behovet. Det vart annonsert oppstart av planarbeidet med frist for å kome med innspel den 14. januar 2018. Fristen vart forlengja til den 5. februar. Det kom til saman 158 innspel, inkludert innspela som kom til planprogrammet. Styringsgruppa brukte våren på å vurdere dei ulike innspela ut frå kriteria i planprogrammet, samt å reise på synfaringar knytt til innspela. Til saman var det heldt 11 heildagsmøter, nokre også med synfaring. I juni 2018 vart det heldt anbodskonkurranse for planarbeidet, og Multiconsult AS vart vald til å utarbeide nytt planforslag og gjere dei utgreingar som har vore naudsynt for vidare prosess. Før utlegging til offentleg ettersyn er planarbeidet presentert i Regionalt planforum, der statlege og regionale etatar har høve til å kome med tidlege innspel og forventningar til planarbeidet. Sund kommune var i planforum den 29.01.2019, og viktige tema som metode for avgrensing av LNF-spreiddområda, tilnærming til akvakultur, strandsona, var teke opp og drøfta. Prosessen vidare: Det er planutvalet som legg høyringsforslaget ut til offentleg ettersyn. I tråd med plan- og bygningslova 11-14 skal planforslaget ha ein høyringsfrist på minimum 6 veker. Då planen vert lagt ut i sommarferien har fleire offentlege instansar varsla at dei vil trenge lenger høyringsfrist, og rådmannen rår til å leggje ut planen i minimum 8 veker. Planforslaget vil bli lagt ut på Sund kommune sine nettsider og annonsert i Vestnytt AS. Planforslaget vil i tillegg verte sendt direkte til ei rekkje instansar. Etter offentleg ettersyn vil merknadar og uttale verte samanfatta, og det vert vurdert om planforslaget skal reviderast før det vert lagt fram for planutvalet til ny handsaming. Det er kommunestyret som skal vedta arealdelen av kommuneplanen, jf. plan- og bygningslova 11-15. Då Sund kommune vert slått saman med nabokommunane Øygarden og Fjell frå og med 01.01.2020, gjeld overgangsreglar som kan gjere seg gjeldande for endeleg vedtak av arealdelen.
Vurdering: Nedanfor vil rådmannen gje ei kort oppsummering av hovudgrepa som er gjort med omsyn til dei tre hovudtema for rulleringa: bustadutvikling, næringsutvikling og tilgang til sjø. Eit gjennomgåande tema for arbeide skulle vere folkehelse. Vidare skulle ein gjere planen betre eigna som styringsverkstøy. Folkehelse: Kommunestyret har bedt om at folkehelse vert eit gjennomgåande tema i planarbeidet. Folkehelsearbeid vert på regjeringa si nettside definert som «samfunnets innsats for å påvirke faktorer som direkte eller indirekte fremmer befolkningens helse og trivsel, forebygger psykisk og somatisk sykdom, skade eller lidelse, eller som beskytter mot helsetrusler, og arbeid for en jevnere fordeling av faktorer som direkte eller indirekte påvirker helsen.» Fleire grep for å støtte positiv utvikling av folkehelsa er gjort i føresegnene til planen. Det er teke inn føresegner som skal sikre drikkevasskjelda Kørelen betre mot forureining. Desse er likelydande med føresegnene i Fjell kommune sin KPA. Det er teke inn føresegner knytt til barn og unge sine interesser, nærturterreng, gang- og sykkelveg, friluftsliv, vasskvalitet og føresegner om støy. Tilgang til strandsone, bademoglegheiter og båtliv, det å ivareta vakkert landskap og naturverdiar er også faktorar som indirekte fremjar helse og trivsel. Bustadutvikling. Det er gjort kartleggingar av bustadreserven i gjeldande kommuneplan, i tillegg til at ein har vurdert innspela til nye bustadområder. Bustadreserven i gjeldande plan er god, men fleire bustadområder har lagt i fleire planperiodar utan å ha blitt aktuelle for utbygging. Nokre av desse ligg også mindre gunstig til med omsyn til skulestruktur, kollektivdekning og vass- og avlaupsutbygginga. Det er fleire «gule» områder som er foreslått fjerna, medan det er lagt til nye bustadområder med meir sentral plassering anten i forhold til skulane i Spildepollen og Stranda (Forland/Steinsland), eller i etablerte bygder som Telavåg og Glesvær. Det er også lagt inn nye kvotar for bygging i LNF spreidd områda. LNF spreidd områda er også justert der det er i direkte konflikt med dyrka eller dyrkbar jord. Desse områda har uansett ikkje vore aktuelle å byggje på, og slik avgrensinga no er vist i kartet gjev dette eit meir realistisk bilete på kor det kan vere aktuelt med utbygging i spreidd-områda. Områder der ein ikkje vil rå til meir utbygging i spreiddområda har fått kvote sett til 0. Dei fleste reguleringsplanane vert vidareført i ny kommuneplan, men rådmannen foreslår å ikkje vidareføre nokre eldre planar som er utdaterte eller har ei lite eigna plassering. Dette gjeld følgjande planar: 1. to reguleringsplanar for hytteområder på Viksøy 2. reguleringsplan for bustadbygging på Børnes Næringsutvikling og akvakultur: I denne rulleringa har ein hatt eit særskilt fokus på dei marine næringane. Akvakulturnæringa er i utvikling mellom anna med landbaserte anlegg der fisken går lenger i lukka anlegg enn det som har vore mogleg tidlegare og i resirkuleringsanlegg som krev mindre vassforbruk. Akvakulturnæringa har framleis mykje av drifta i «opne» anlegg i sjø, og det er utfordringar med omsyn til lakselus og påverknad på andre artar som til dømes torsk. Nye akvakulturanlegg må sjåast i samanheng med det ansvar ein har for naturmangfaldet.
Det er utarbeidd ein eigen rapport for akvakultur, og det er foreslått å setje av nye areal til akvakulturnæringa. Nokre av dei områda som har vist seg lite eigna til oppdrett av laks og aure er vidareført, men med opning for anna type oppdrett. Vi syner til rapport, plankart og planomtale for nærare informasjon om dei nye områda. For eksisterande akvakulturanlegg har det vore viktig å få avsatt tilstrekkeleg areal. Fleire av anlegga er utvida og/eller har fått endra plassering i nytt framlegg til KPA. For næringsområder på land er det i hovudsak utvidingar av eksisterande områder kommunen har lagt opp til ved denne rulleringa. Det er foreslått å utvide i Porsvika, som i dag har vorte ei viktig fiskerihamn i regionen. Det er foreslått ei mindre justering/auke av næringsareal på Kausland. I Kvernavika og på Golta er det foreslått å auke næringsarealet for å leggje til rette for landbaserte akvakulturanlegg. Det er foreslått å endre på plasseringa av næringsareal i Austefjorden. Ein legg no opp til å trekkje seg vekk frå automatisk freda kulturminne og nytte noko areal i sjø slik at ein kan få til eit kaianlegg i tilknyting til næringsområdet. Det er ikkje foreslått å legge ut eit nytt næringsareal på Lundaneset grunna negativ konsekvensutgreiing, og mange konflikttema. På Vorland vert næringsareal teke ut att og lagt tilbake til LNF. På Trellevik er det foreslått å gjere ei lita justering av eksisterande næringsareal. Dette ser ikkje ut til å vere lagt inn i plankartet, og det bør gjerast før saka vert lagt ut til offentleg ettersyn. Det er lagt inn nokre nye områder for LNF der spreidd næring er tillat. I desse områda er det sett kvoter for utbygginga. Rådmannen vil rå til at ein også set andre rammer for desse områda som kva type næringsverksemd som skal vere tillat og storleik på tiltaka ved å sette maksimal BRA. Tilgong til sjø: Det er utarbeidd ein rapport om funksjonell strandsone for Sund etter sju kartleggingskriterier. Desse kriteria vil til saman gje eit heilskapleg og konkret grunnlag for kvalitetsvurderingar og diffrensiering av strandsona. Det vert lagt inn byggjegrense i alle byggjeområde i nytt plankart, og funksjonell strandsone vert vist gjennomgåande langs strandsona i kommunen. Det er gjennomgåande forsøkt å leggje til rette for at behov for tilgang til sjø vert løyst i eksisterade eller nye områder for småbåthamn. Det er ikkje sett av nye områder til naustutbygging. Grunngjevinga er at enkeltståande naust byggjer ned strandsona og gjer den mindre tilgjengeleg for almenta. Dette er også bakgrunn for at det vert foreslått å ikkje leggje ut nye kvotar i LNF-spreidd naustområder ved denne rulleringa. Fellesanlegg som småbåthamner med fellesnaust/bodar legg betre til rette for marine miljø som ikkje stengjer allmenta ute frå strandsona. Det vert foreslått å leggje ut eit nytt friområde på Trellevik. Området har vore mykje i bruk som utgangspunkt for brettsegling og anna sjøsport.
Det er kome innspel til områder som har kvalitet som badevik. Desse vert liggjande som LNF områder. I Telavåg, på Steinsland og Klokkarvik er bustadområde trekt tilbake frå strandsona og arealføremålet endra til LNF der spreidd naust er tillat. Desse områda er alt prega av spreidd naustbygging. Slik attspeglar arealføremålet faktisk bruk, samstundes som det hindrar bustadbygging og ytterlegare nedbygging av strandsona. Plankart: Endringar i plankart skal vere på bakgrunn av dei prosessvedtak som planutvalet har fatta. Plankartet har nokre få manglar, og desse må rettast før planen vert lagt ut til offentleg ettersyn. Det er ikkje lagt inn omsynsone for flystøy, og gjennomføringssonene har ikkje fått nummerering. Næringsområdet på Trellevik er ikkje utvida. Føresegner: Ved utarbeiding av føresegner til KPA har ein sett til Fjell kommune sine føresegner med omsyn til nært føreståande kommunesamanslåing. Dette inneber at utnyttingsgrad og krav til MUA vert endra, for å nemne noko. Det er likevel gjort tilpassingar ut frå lokale vurderingar og omsyn. Drikkevasskjelda Kørelen: Det vert teke inn føresegner som skal sikre drikkevasskjelda Kørelen mot forureining. Likelydande føresegner er teke inn i Fjell kommune sin KPA. Gravplass Klokkarvik: Kyrkjeleg fellesråd har hatt innspel til KPA og bedt kommunen setje av areal for utviding av gravplassen. Det er fulgt opp. Om innspel som er kome etter fristen: Det er kome nokre innspel etter fristen var gått ut. Heilt nye innspel om å endre arealføremål etter at arbeid med vurdering og konsekvensutgreiing er kome i gang har ein ikkje vurdert. I dei tilfella er det gjeve tilbakemelding om at innspelet er kome for seint. Det er kome ein førespurnad om å få vidareføre eit bustadføremål på Høyland som har lagt sidan 2004. Oppsummering: Rådmannen si vurdering er at planforslaget slik det ligg føre har fulgt opp intensjonen i planprogrammet. Rådmannen rår til at planforslaget vert lagt ut til offentleg ettersyn/høyring. Tilråding til vedtak: Med heimel i plan- og bygningslova 11-14 legg planutvalet forslag til arealdelen av kommuneplanen ut til offentleg ettersyn. Før planen vert lagt ut til offentleg ettersyn skal følgjande rettingar vere gjennomført: 1. Det skal leggjast inn oppdaterte flystøysoner i plankartet 2. Plankart og føresegner skal oppdaterast i høve reguleringsplanar som skal vidareførast eller ikkje vidareførast i ny KPA
3. Plankart skal oppdaterast med nummerering av soner 4. Det skal fastsetjast nærare føresegner knytt til kvart område for LNF der spreidd næring er tillatt 5. Plankart skal rettast i høve planutvalet sitt vedtak når det gjeld mindre justering av næringsområde i Trellevik 6. Det kan elles gjerast mindre rettingar eller tilføyingar i dokumenta som ikkje rokkar ved innhaldet i planforslaget.