Vår ref: 17/00505-1 Dykkar ref: Dato: 23.05.2017 Nytt program for internasjonalisering i lærarutdanninga Invitasjon til innspel og møte i Bergen 14. juni 2017 Senter for internasjonalisering av utdanning (SIU) vil med dette brevet invitere universitet og høgskular som tilbyr grunnskulelærarutdanning til å komme med innspel til utvikling av ei ny støtteordning for internasjonalt samarbeid i lærarutdanningane. Kunnskapsdepartementet (KD) har som eit ledd i gjennomføringa av strategien «Lærerløftet på lag for kunnskapsskolen» gitt SIU i oppdrag å utvikle eit internasjonalt partnarskapsprogram, med samla årleg budsjett på 10 millionar kroner. Programmet skal bidra til å heve kvaliteten i grunnskulelærarutdanningane gjennom internasjonalisering. Det er eit ønskje å stimulere til at både fagmiljø og lærarstudentar i større grad søkjer internasjonalt samarbeid enn det som er tilfelle i dag. For å sikre at programmet er tilpassa føresetnadene og behova hos institusjonane som tilbyr lærarutdanning, vil vi invitere til innspel på ulike aspekt ved utforminga av programmet. Vi inviterer relevante aktørar til eit informasjons- og innspelsmøte om det nye programmet. Møtet finn stad den 14. juni kl. 11-14 ved Høgskulen på Vestlandet, Campus Kronstad, Aud3 (C121). Meir informasjon om program for dagen o.a. kjem i eigen invitasjon. Formål KD ønskjer å styrke den internasjonale profilen til grunnskulelærarutdanningane, som ledd i kvalitetsutviklinga av utdanningane. Internasjonalisering kan bidra til høgare kvalitet i lærarutdanninga gjennom fagleg samarbeid med sterke internasjonale partnarar. SENTER FOR INTERNASJONALISERING AV UTDANNING Postadresse Besøksadresse Telefon Sakshandsamar Postboks 1093 Fortunen 1 +47 55 30 38 00 Jon Gunnar Mølstre Simonsen 5809 Bergen Hjemmeside Foretaksregisteret jon.simonsen@siu.no post@siu.no http://www.siu.no 986 339 523 +47 412 70 290
Bakgrunnen for dette er mellom anna nedfelt i Meld. St. 16 (2016-2017), «Kultur for kvalitet i høyere utdanning». Meldinga slår fast at internasjonalisering er ein føresetnad for å sikre kvalitet i norsk høgare utdanning og ser internasjonalt samarbeid og internasjonale perspektiv som grunnleggjande for å handtere dei globale samfunnsutfordringane. Programmet kan også knytast til mål som er omtalt i strategien «Lærerløftet På lag med kunnskapsskolen», Meld. St. 21 (2016-2017) «Lærelyst Tidlig innsats og kvalitet i skolen» og Meld. St. 28 (2015-2016) «Fag fordypning forståelse. En fornyelse av kunnskapsløftet». Sterke faglege fellesskap, også internasjonale, er med på å utvikle lærarrolla og å gjere kommande lærarar betre skodd til å vere aktive pådrivarar for ein betre skule og handtere arbeidet med å førebur born og unge på ei framtid med aukande mangfald, usikkerheit og mogelegheiter. For å bidra til dette, vil departementet med det nye lærarutdanningsprogrammet stimulere til at fagmiljøa ved lærarutdanningane deltar meir aktivt i internasjonale samarbeid og nettverk, og at lærarutdanningsinstitusjonane set i verk tiltak for å innarbeide studentutveksling på ein betre måte i studieprogramma. Programmet vert innført i samband med dei nye femårige grunnskulelærarutdanningane og skal primært støtte opp om kvalitetsutvikling i desse utdanningane, innanfor nasjonale rammeplanar og regelverk. Programmet skal føre til: langsiktige og strategiske partnarskap med internasjonalt anerkjente lærarutdanningsinstitusjonar fagleg utvikling av lærarutdanningane utviklings- og forskingssamarbeid mellom norske og utanlandske fagmiljø utvikling og gjennomføring av felles studietilbod med internasjonale partnarar klare og føreseielege rammer for gjensidig utveksling av studentar og vitskapleg tilsette Spørsmål 1: På bakgrunn av dette, korleis ser dykkar institusjon og fagmiljø for seg å kunne bruke eit slikt internasjonaliseringsprogram i kvalitetsarbeidet dykkar? Innretning Programmet er tenkt utforma med utgangspunkt i erfaringar frå eksisterande partnarskapsprogram for internasjonalt utdanningssamarbeid som SIU forvaltar. For best mogeleg å kunne tilpasse det nye programmet til behova hos institusjonane som tilbyr lærarutdanning, ønskjer SIU innspel til den konkrete utforminga av programmet, når det gjeld prioriteringar, rammer for einskildprosjekt, støtteverdige tiltak og framdrift. 2
Prioriteringar SIU ser for seg følgjande prioriteringar for programmet: Målgruppa for programmet er dei nye femårige grunnskulelærarutdanningane. Andre lærarutdanningar kan inkluderast dersom det samla sett bidrar til å heve kvaliteten i grunnskulelærarutdanningane. Programmet vil kunne støtte samarbeid mellom to eller fleire lærarutdanningsinstitusjonar i Noreg og utlandet, og tverrsektorelle samarbeid som til dømes inkluderer lærarutdanningsinstitusjonar, skuleeigarar og skular i Noreg og utlandet. Programmet skal i utgangspunktet ikkje ha geografiske avgrensingar. Programmet vil legge vekt på at faglege resultat, erfaringar, beste praksis og modellar for samarbeid og utveksling vert delte og spreidde også til lærarutdanningsinstitusjonar som ikkje har fått prosjektmidlar. Spørsmål 2: I kva grad møter desse prioriteringane behova til lærarutdanningsinstitusjonane i samband med kvalitetsutvikling av grunnskulelærarutdanningane? Kva eventuelle andre prioriteringar meiner de bør få plass i utforminga av programmet? Rammer for einskildprosjekt Programma SIU forvaltar lyser ut midlar til ulike typar prosjekt. Nokre utlysingar gir støtte til prosjekt med ei tidsramme på om lag to år, med ei samla budsjettramme på 300 000 kr eller 500 000 kr per prosjekt. Slike utlysingar legg blant anna til rette for etablering og utvikling av nye partnarskap med få partnarinstitusjonar. Typiske aktivitetar kan vere å arrangere felles seminar, workshops eller intensivkurs, eller å samarbeide om å utvikle rammer for god student- og praksisutveksling. Endå mindre prosjekt kan også vere aktuelle. Andre utlysingar støttar prosjekt med ei tidsramme på tre til fem år, og med årlege budsjett på 500 000 kr eller meir. Slike utlysingar legg til rette for prosjekt med meir omfattande og ambisiøse mål og vil ofte inkludere fleire partnarar. Typiske aktivitetar kan vere samarbeid om utvikling av studieplanar, utvikling og gjennomføring av felles studietilbod, utveksling av tilsette og studentar, tiltak for å inkludere studentar i forskings- og utviklingsaktivitetar o.a. Spørsmål 3: Kva prosjekttypar (budsjettrammer, tidsramme o.a.) vil komme dykkar institusjon best til nytte for å nå måla med programmet og dekke behovet for kvalitetsutvikling og internasjonalisering i grunnskulelærarutdanningane? 3
Støtteverdige tiltak SIUs program gir typisk støtte til følgjande aktivitetar: Tilrettelegging for studentutveksling og praksisopphald i utlandet, for eksempel gjennom etablering av utvekslingsavtalar og utvikling av fagleg tilrettelagde studie- og/eller praksistilbod Mobilitet for tilsette i samband med besøk til partnarinstitusjonar, felles utdanningsaktivitetar, gjesteforelesingar o.a. Planlegging og gjennomføring av felles workshops, seminar, intensivkurs, sommarskolar m.m. Felles pensumutvikling og utvikling av felles emne eller studieprogram Utvikling av nytt utdanningsmateriale og nye metodar (inkludert digitale læringsformer) Planleggingsmøte og prosjektmøte Tilrettelegging for å inkludere studentar i forskingsaktivitetar og samarbeid med praksisfeltet Formidling av resultat og beste praksis frå utdanningssamarbeidet Spørsmål 4: Kva type internasjonale samarbeidsaktivitetar vil egne seg best i kvalitetsutviklinga av grunnskulelærarutdanningane ved dykkar institusjon? Det er også mogeleg å foreslå andre aktivitetar enn dei som er lista opp her. Aktuelle kostnader i programmet Støtta frå SIU er tenkt å finansiere meirkostnader hos lærarutdanningsinstitusjonane i samband med dei internasjonale samarbeidsaktivitetane. Typiske kostnader tenkt dekka av programmet er mellom anna: Kostnader til møte, seminar og andre samarbeidsaktivitetar: Programmet vil kunne dekke kostnader til å gjennomføre internasjonale prosjektmøte, seminar og liknande, knytt mellom anna til tiltaka i lista over. Likeeins vil programmet kunne dekke kostnader til å planlegge og gjennomføre kortvarige felles studietilbod, som til dømes intensivkurs og sommarskular. Reisekostnader: Programmet vil kunne dekke reisekostnader for tilsette og andre prosjektdeltakarar i samband med gjennomføringa av internasjonale prosjekt. Kostnader til formidling: Programmet vil kunne dekke kostnader til formidling av resultat og beste praksis frå det internasjonale utdanningssamarbeidet. Kostnader til løn og administrasjon: Dei fleste partnarskapsprogramma som SIU forvaltar, kan gi delvis støtte til å dekke lønskostnader. Normalt kan maksimalt 10 eller 20 prosent av totalbudsjettet for eit prosjekt gå til å dekke lønskostnader (inkl. dekningsbidrag). Støtta frå SIU kan dekke bidrag til løn for fagleg og administrativt tilsette, assistentar, eventuelle konsulenthonorar og andre tenester. Kostnader til løn utover dette må institusjonane dekke sjølve. Det vert dermed viktig at dei internasjonale prosjekta er forankra i og heng tett saman med dei ordinære utviklings- og utdanningsaktivitetane ved institusjonane. 4
Spørsmål 5: Samsvarar dette med korleis de vurderer behovet ved dykkar institusjon, sett i høve til måla med programmet? Støtte til studentar Det nye programmet ønskjer å stimulere til meir og betre utveksling i grunnskulelærarutdanningane. Programmet skal primært kunne brukast til å utvikle rammer som legg til rette for auka studentutveksling og for å ta delar av praksis i utlandet. Generelt har norske studentar gode finansieringsordningar gjennom Lånekassen for studieopphald i utlandet, inkludert reisestøtte. Både utreisande og innreisande studentar kan i noko grad få stipend frå Erasmus+, Nordplus eller andre stipendprogram. I utgangspunktet har programmet difor ikkje tenkt å tilby stipend for normal studentutveksling. I den grad det er nødvendig for å prøve ut nyutvikla rammer for studentutveksling og praksisopphald i utlandet i ein pilotfase, vil vi vurdere om programmet også skal kunne gje avgrensa finansiering til sjølve opphaldet i utlandet, for ekstrakostnader som studentane ikkje kan få støtte til frå Lånekassen. Spørsmål 6: I kva grad samsvarar dette med behova til studentane ved dykkar institusjon sett i høve til måla med programmet og andre tilgjengelege finansieringsordningar for studentmobilitet? Vi ber også om innspel til andre tiltak som kan legge til rette for å auke talet på innreisande studentar til grunnskulelærarutdanningane gjennom utvekslingsavtalar. Framdriftsplan SIU har som mål å annonsere første utlysing i programmet rundt 1. september, med tentativ søknadsfrist i november og tildeling tidleg i 2018. Det er ikkje bestemt kva prosjekttypar som skal kunne finansierast gjennom første utlysning (sjå spørsmål 3 over). 5
SIU ser fram til å motta kommentarar og innspel til utforminga av det nye programmet for internasjonalt samarbeid i lærarutdanningane. Frist for å sende inn skriftlege innspel er 19. juni 2017. Innspela kan sendast til post@siu.no. Med helsing Else Kathrine Nesmoen avdelingsdirektør Jon Gunnar Mølstre Simonsen seniorrådgjevar Dokumentet er elektronisk signert og har derfor ikkje handskrivne signaturar. 6