Fitjar kommune Arkivkode: L14 Saksmappe: 2008/992 Sakshandsamar: Atle Tornes Dato: 12.09.2013 MØTEBOK Ekstra høyring av "Interkommunal strandsoneplan for Sunnhordland". Utviding av vurderingstema i tilknyting til kommunedelplan for Fitjarøyane (øyane krins og Koløy) Utval sak Utval Møtedato 55/13 Utval for plan og miljø 19.09.2013 Vedlegg: 1. Planprogram for interkommunal strandsoneplan, dagsett mai 2012. 2. Tolking av kommuneplan, sak PS 126/12 i Utval for plan og miljø 12. desember 2012. Utrykte dokument: Sak PS 97/12 i Utval for plan og miljø. Interkommunal strandsoneplan for Sunnhordland. Godkjenning av planprogram og konsekvensanalyse. Kommuneplan for Fitjar dagsett 18. juni 2012, kart, føresegner og planomtale. Strandsonekartlegging i Fitjar, rapport dagsett 23. juni 2010. Forprosjekt: Næringsutvikling i Fitjarøyane, rapport dagsett 27.12.2007. Bakgrunn: Ved gjennomgangen av kommuneplanen i Fitjar vart det ikkje opna for nye tiltak i Øyane krins, men ein skulle venta på ein eigen kommunedelplan. I kommunen sin planstrategi er det vedteke at ein skal gjennomføra ein kommunedelplan med oppstart 2014. Utval for plan og miljø har vedteke at denne skal om mogleg startast opp hausten 2013. Parallelt med dette har Samarbeidsrådet gjort vedtak om å utarbeida ein interkommunal strandsoneplan. I tillegg til dei 8 kommunane i Sunnhordland er også Fusa kommune med. Fitjar har gjort vedtak om å delta i planen. Dette planarbeidet er i samsvar med eit prosjekt ovafor Miljøverndepartementet, med mål om at Sunnhordlandskommunane skal vera utanom det strengaste strandsonevernet, på permanent basis. Vilkåret for dette er at kommunane gjennomfører ein felles strandsoneplan, som munnar ut i eit felles regelverk. Interkommunal strandsoneplan vil få status som kommunedelplan i Fitjar. Dette arbeidet er no kome så langt at det kan innpassast i tid og samordnast med ein kommunedelplan for øyane i Fitjar. Den interkommunale planen skal vera det overordna styrande plandokumentet for all arealbruk og forvaltning av areal i strandsona til dei deltakande kommunane. Planen skal visa arealformål og omsynssoner for bruk og vern av areal i strandsona. Kvart kommunestyre i dei deltakande kommunar skal treffa endeleg vedtak for sitt område. Lovgrunnlaget: Plan- og bygningslova av 2008. Nasjonale føringar: Statlege retningsliner for differensiert forvaltning av strandsonen langs sjøen, dagsett 25. mars 2011.
Nasjonale forventningar til regional og kommunal planlegging, fastsett 24.06.2011. Ei nærare opplisting av nasjonale føringar står i kapitel 3.2. i planprogrammet for den interkommunale planen. Regionale planar: Fylkesplan for Hordaland 2005-2008 (forlenga inntil den vert avløyst av regionale planar). Fylkesdelplan for Sunnhordland (vedteke 20.10.2005) Fylkesdelplan Fysisk aktivitet, idrett og friluftsliv 2008-2012 Fylkesdelplan for areal og transport på Haugalandet (vedteke i 2004) Ei nærare opplisting av regionale føringar står i kapitel 3.3. i planprogrammet for den interkommunale planen. Regionalt planarbeid: Regional kystsoneplan for Sunnhordland og Ytre Hardanger. Forvaltningsplan for vatn, vassregion Hordaland. Regional kulturplan 2014-2024 Gjeldande planar i Fitjar: Kommuneplan for Fitjar, arealdel, med kart, føresegner og planomtale, vedteke 18. juni 2012. Tolking av kommuneplan, vedtak i Utval for plan og miljø 12. desember 2012. Andre lokale føringar: Forprosjekt: Næringsutvikling i Fitjarøyane, rapport dagsett 27.12.2007. Saksopplysningar: Arbeidet med fastsetjing av funksjonell strandsone for Sunnhordland viste at dei nasjonale kriteria (SSB) for vurdering av inngrep i strandsona, og tilgjengelegheit, er sterkt misvisande for Sunnhordland, og gir til dels feil konklusjonar. Mellom anna er øyar utan fastlandssamband ikkje rekna med, og det er lagt til grunn for strenge kriteria knytt til manglande tilgjengelegheit på grunn av at terrenget er for bratt. Samarbeidsrådet utarbeidde difor ein eigen metodikk, som vart nytta til grov analyse av funksjonell strandsone i heile Sunnhordland. Basert på denne gjennomgangen viser det seg at Fitjar ligg svært høgt både kva gjeld inngrepsfri strandsone, med 84,2 % av strandsona, og 62,8 % som er tilgjengeleg. Sjølv om dette er gjennomsnittstal for Fitjar er det grunn til å tru at også Øyane krins ligg godt an, og at det kan vera grunn til å opna for ein del tiltak også i Øyane. Samarbeidsrådet sin plan omfattar heile Fitjar kommune, men er avgrensa til 100- metersbeltet på land(eller funksjonell strandsone), og 50 meter ut i sjø. Denne avgrensinga er ikkje absolutt, og det går fram av planprogrammet at grensene kan utvidast dersom det er behov for dette, noko som gjeld for Fitjarøyane. Det blir ikkje laga ein eigen analyse av den funksjonelle strandsona i kvar kommune som del av fellesprosjektet, slik at 100-metersgrensa vil gjelda dersom det ikkje er vedteke noko anna med grunnlag i funksjonell strandsone. Fylkeskommunen har og varsla oppstart på ein eigen kystsoneplan for Sunnhordland og Ytre Hardanger, der interkommunal strandsoneplan for Sunnhordland vil inngå som premiss. Samarbeidsrådet har og planlagt at det skal koma ein eigen akvakulturplan for Sunnhordland, men arbeidet med den er ikkje starta opp. Akvakultur er difor ikkje tema i den interkommunale planen. Som kommunedelplan i Fitjar vil Strandsoneplanen /Øyaplanen bli delt i 3 bolkar : Felles plandokument for alle kommunane, med felles malar for føresegner (styrande). Føresegner for Fitjar. Juridisk bindande. Plankart for Fitjar, der nødvendige tiltak må visast.
Interkommunal strandsoneplan vil omfattar heile Fitjar kommune, medan Øyaplanen berre vil omfatta deler av kommunen. Det er berre behov for marginale justeringar av Strandsoneplanen for å kunna bli ein Øyaplan. Arbeidet kan gjerast samordna og rasjonelt ved å starta no. Det er difor gode grunnar for å vurdera Øyaplanen og strandsoneplanen som ein plan i Fitjarøyane. Denne saka gjeld ei presisering av at planarbeidet med strandsoneplan vil bli utvida til å omfatta også areal innanfor strandsona, og mellom øyane, i Fitjarøyane, til den varsla Øyaplanen. Det blir ingen endringar for «Fastlandsfitjar». Vurdering: Ekstra høyring: Det er gjennomført høyring av utkastet til strandsoneplanen i regi av Samarbeidsrådet våren 2013. Grunnlaget for denne høyringa var planprogrammet. Diverre har det vist seg at dette har vore lite kjent, og det er svært få merknader i heile Sunnhordland. Me har registrert få, om nokon i Fitjar. Det er sterkt behov for ei ekstra høyring der også innbyggjarar og grunneigarar i Fitjar blir betre varsla om arbeidet, og høyrt i prosessen. Samarbeidsrådet sin strandsoneplan gjeld for strandsona, på land definert anten som 100 meters-beltet, eller som den funksjonelle strandsona, og i sjø ut til 50 meter frå stranda. Ein kommunedelplan vil måtta omfatta resten av sjøarealet, og arealet på land. Dvs vil område på øyane innanfor strandsona, og sjøområde utanfor strandsonane rundt øyane vil og bli tema. Det er små tilleggsområde som er aktuelt for vurdering av tiltak, og desse vil ha marginale konsekvensar for resten av planarbeidet. Kommunedelplanen bør definera nokre område som kan vera «KAN-område», etter bestemte kriteria. Og andre område som skal ha varig vern. Det synest sterkt ynskjeleg å starta opp arbeidet parallelt med Samarbeidsrådet sin plan, då det er to sider av same sak. Samarbeidsrådet sin plan vil i stor grad definera felles reglar, som vil gjelda også for øyane. Føresegner og rettleiing vil dermed ha ein felles del, og naturleg nok ein lokal del for Fitjar. Det er føresegnene og plankart for Fitjar som blir det juridisk bindande dokumentet. Merk at kommunedelplanen ikkje omfattar fastlandsdelen av Fitjar. Konsekvensanalyse. Det interkommunale strandsoneprogrammet omfattar ein konsekvensanalyse, som gjeld generelt også for Fitjar. Det er same vurderingstema i strandsoneplanen som i ein øyaplan, med ei marginal utviding av arealet i Øyane, noko strandsoneplanen har teke høgde for. Ein ser det difor unødvendig med ei eiga konsekvensanalyse for Øyaplanen. Vurderingstema i arbeidet med interkommunal strandsoneplan: Den interkommunale planen: Planen skal innehalda dei tema/ føremål som er naturleg å ta opp for ein arealplan som omfattar strandsona på eit kommunalt overordna nivå. Det vil her vera særleg aktuelt å sjå på tema som er felles for kommunane når det gjeld bruk og vern av areal i strandsona. Følgjande tema skal vurderast: Friluftsområde, regionale og lokale Område med spesielle natur- og landskapskvalitetar Sikring av større, viktige frilufts- og landskapsområde Kulturminneområde, kystkultur m.m. Område for næringsutvikling, hamneanlegg, reiselivsanlegg Felles båthamner/bryggeanlegg, naustområde, fellesnaust Bustadområde og område for fritidsbustader Fortettingsområde Som del av planarbeidet skal det utarbeidast felles føresegner for bygging av brygger, naust, rorbuer, spreitt utbygging, m.m. i strandsona og elles andre føresegner med retningsliner som gjeld bruk og forvaltning av strandsona. I dette planarbeidet er det ikkje føresett å vurdera einskildtiltak som brygger, naust, hytter og bustader og liknande plassert i strandsona. Slike einskildsaker må kommunane ta stilling til med heimel i føresegner og eventuelle
reguleringsplanar, noko som Fitjar vil gjera i gjennom utvida høyring som skissert nedanfor. Fitjar sin del av felles vurdering. Funksjonell strandsone - avgrensing av kartlegging. Når det gjeld beskriving av funksjonell strandsone viser ein til Planomtalen til kommuneplanen, punkt 4.2.1 og rapport frå strandsonekartlegginga. I arbeidet med kommuneplanen vart den funksjonelle strandsona kartlagt for «fastlandet», og for Fodno. Det er no sterkt ynskjeleg å kartleggja resten av øyane. Dette tilseier Øyane krins, og Koløy, som høyrer til Øvrabygdo krins. Det er ikkje nødvendig å analysera heile den funksjonelle strandsona på alle øyane. Nokre øyar er så små at heile, eller det meste av øyane, vil inngå. Det er då ikkje nødvendig å føreta ei kartlegging. Men ein del av desse mindre øyane er bebygt. Det blir dermed eit tema om ein bør avgrensa strandsona i området kring bygningane? Det er fleire «freda» øyar, reservat, friluftsområde m.v., som ikkje treng kartleggast, då me ikkje ynskjer å redusera vernet ved å opna for tiltak. Me vil då stå att me nokre større øyar, der det både er opna for større og mindre tiltak, som må analyserast, og tiltaksområde definerast. Men det er og ein del større øyar der det i dag få tiltak. Gardar der det ikkje har vore gjort tiltak i den seinare tida er ikkje omfatta av omsynssona for kystgardar og kystlynghei. Skal dei vera «sperra» for all framtid, eller bør kommunen likevel opna for ein viss aktivitet/tiltak? Målet ved ei slik kartlegging er å definera område som kan opnast for tiltak. Så vil føresegnene opna for kva type tiltak, og kva vilkår som vert sett. Kartlegginga skal og definera område som bør ha varig vern, eller som skal nyttast berre til fellestiltak. Kystgardar og kystlynghei. Kommuneplanen av 2012 inneheld i punkt 1.3 eit eige avsnitt om kystgardar og kystlynghei, og det er etablert ein eigen omsynssone for kystgardar og kystlynghei, jf. punkt 9.3.2 i føresegnene. Kommunen legg opp til å vidareføra desse reglane iarbeidet med interkommunal plan/øyaplan, med dei presiseringar som vart gjort av Utvalet i november 2012(sak). Ein del av gardstuna ligg i strandsona, og ein bør vurdera å kartfesta omsynssonane i tilknyting til Strandsone-/Øyaplanen. Forenkling av søknadsprosessane: Forenkla planarbeid: Det er ynskjeleg å forenkla prosessane med tiltak i strandsona utan å gå vegen om en full planprosess. I dag krev også svært små tiltak ein plan, og det er ikkje noko plannivå under reguleringsplan. Forenkla søknadsprosess på eksisterande bygg/andre tiltak: Kan tiltak på eksisterande bygg/andre typar tiltak kunna gjerast utan dispensasjon frå kommuneplan og generelle strandsoneføresegner? Prosjektet bør kunna finna enklare prosessar for vurdering av endringar på eksisterande tiltak i strandsona utan at det konkrete tiltaket er omtalt i kommuneplan/kommunedelplan. Friluftsliv (Kommunedelplan for idrett og friluftsliv.). Planarbeidet skal definera friluftsområde, regionale og lokale, område med spesielle natur- og landskapskvalitetar mogleg planar for sikring av større, viktige frilufts- og landskapsområde. Ein viser til det som vart kartlagt under arbeidet med kommuneplanen i 2011/12, merk særleg punkta 1.4, 4.6.1., 6.1, 8.8.3 og 9.3.3. i føresegnene og kapitel 8.4 i planomtalen, samt skriv frå Friluftsrådet Vest dagsett 30. november 2011. Fitjar kommune arbeider med ein Plan for idrett og friluftsliv, men arbeidet er framleis i ein tidleg fase. Det er sannsynleg at denne vil definera tiltak i Øyane. Planane vil i tilfelle bli søkt samordna.
Kulturminneplan: Den interkommunale planen/øyaplanen skal kartleggja kulturminneområde, kystkultur m.m. Fitjar kommune arbeider med ein kulturminneplan som vil omfatta Fitjarøyane. Arbeidet med kulturminneplanen vil bli samordna med Øyaplanen. Presisering av tilleggstema som ikkje inngår i interkommunal strandsone/ Vurderingstema i ein Øyaplan: Den interkommunale strandsoneplanen og Øyaplanen vil i stor grad overlappa kvarandre, men på dei større øyane vil vurderingane i Øyaplanen og omfatta areal innanfor strandsona, slik den er definert i interkommunal plan. Det er teke atterhald i strandsoneplanen om at sona kan utvidast til områda i kring, dersom det er føremålstenleg, noko som no blir gjort. Øyaplanen vil og omfatta sjøareal mellom øyane. Dette vil stort sett vera ein inngrepsfri sone, og ein ventar ikkje at det vil koma nye tiltak her. Dersom dette likevel kjem, kan ein i den/dei konkrete sakene vurdera eventuell trong for tilleggsvurderingar. Som vist ovanfor er det i arbeidet med strandsoneplan ikkje føresett å vurdera einskildtiltak som brygger, naust, hytter og bustader og liknande plassert i strandsona. Slike einskildsaker må kommunane ta stilling til seinare med heimel i føresegner og eventuelle reguleringsplanar. Øyaplanen vil vurdera slike tiltak innanfor dei tema som det vert opna for nedanfor. Vurderingane vil måtta omfatta ei konsekvensanalyse for kvart einskildtiltak. Prosjektet vil dessutan vurdera eventuelt behov for å ta inn vurderingar knytt til akvakultur. I desse vurderingane må ein vurdera moglege totale konsekvensar for prosjektet av å ta inn akvakultur, og eventuell trong for tilleggsvurderingar. Nye hytter: Ved gjennomgang av kommuneplanen vart behovet for nye hytter vurdert i heile kommunen. Men det vart (med unntak av Hageberg krins) ikkje opna for nye tiltak i noko del av kommunen ved denne rulleringa av kommuneplanen(dvs ikkje berre øyane). Kor mange nye hytter vil me eventuelt opna for i ein ny øyaplan? Det er kring 500 ledige tomtar som er definert i kommuneplanen, noko som tilseier at det er nok hyttetomtar til å dekka behovet over mange år. Eit alternativ er dermed at kommunen ikkje skal opna for nokon auke i talet på nye hytter, men ein kan flytta hytteområde frå område der det ikkje har vore aktivitet, til nye område, innan øyane. I Øyane er det ca 55 matrikulerte tomtar og 37 andre grunnareal, som idag ikkje er bebygt. Dette gjeld både hyttetomtar, nausttomtar, areal utan definert føremål og friområde. Nokre ligg svært utsett til på holmar, nes, m.v, og dei langt fleste nær stranda. Mange er tinglyste for svært lang tid tilbake. Ein bør vurdera om planarbeidet skal omfatta ein gjennomgang av desse tomtane/areala, for å vurdera om det kan opnast for tiltak på nokon. Andre tiltak i øyane, t.d. næring. Den interkommunale strandsoneplanen vil ha eit eige avsnitt om næring i strandsona. Ein del av dette vil vera relevant for Fitjarøyane. Det og gjort ein del arbeid i regi av Interesselaget for øyane, jf. «Forprosjekt: Næringsutvikling i Fitjarøyane», rapport dagsett 27.12.2007. Kommunedelplanen må byggja på desse arbeida, og ein må ta inn naudsynte formuleringar. Faste bustader: Det er i dag mindre enn 10 fastbuande i øyane, hovudsakleg på Fodno, Engesund, Ålforo, og Koløy (som ikkje er del av Øyane krins). Planarbeidet skal avklara kor vidt kommunen bør opna for nye faste bustader i øyane. Administrasjonen vil rå til at det ikkje blir opna for ny fast busetnad, med unntak for det som er nødvendig for drift av kystgardar og anna stadbunden næring. Naust: Planarbeidet skal vurdera eventuelt behov for naust til bruk for hytter i øyane. Administrasjonen vil rå til at det ikkje blir opna for naust til bruk for hytter. Evt behov er vel helst på fastlandet for at båten skal vera tilgjengeleg når ein kjem tilreisande. Ein
bør vurdera om det alternativt bør opnast for mindre reiskapsbuer til oppbevaring av reiskap, kajakkar o.a. utstyr, særleg i tilknyting til eventuelle felles kaianlegg. Naust på kystgardar er vurdert og definert i føresegnene for kystlynghei. Ein legg til grunn at dette blir vidareført. Infrastruktur (Kaiar og kaitilkomstar, felles kaiar, flyte- eller faste kaiar), vegar og stiar. Det er i dag svært lite offentleg infrastruktur i øyane. Det er kommunal kal i Fodno, og nokre offentlege bryggjer på ulike øyar i friluftsområde, men ingen kaiar eller båtplassar som er opne for ålmenta i større byggjeområde, t.d. Hatlevik, Tranøy, Ivarsøy og liknande. Ein bør vurdera løysingar på slike utfordringar i prosjektet. For private bryggjer viser me til vurderingane i sak PS 126/12 til utvalet i desember 2012. Planen bør og innehalda ei vurdering av behov for felles vegar og opparbeidde gangstiar, samt private stiar, trapper, o.l. tiltak i og utanfor strandsona i alle område. Akvakultur: Bør ein Øyaplan også vurdera temaet nye område for akvakultur, eller bør ein venta på ein felles plan for akvakulturi regi av samarbeidsrådet? I tilfelle vil også dette medføra ei utviding av tema i høve interkommunal plan. Der er varsla at Samarbeidsrådet sin plan kjem om ikkje lenge, men ikkje når. Administrasjonen meiner at øyaplanen ikkje bør omfatta nye tiltak innanfor akvakultur, men at ei endeleg avklaring på dette punktet kan gjerast etter at saka har vore på høyring. Grensesnitt Bømlo: Dersom det er ulike vurderingar i Bømlo, i høve same tema i Fitjar, så bør dette avklarast og samordnast. Det same gjeld overlappande omsynssonar (t.d. fiskefelt, område for akvakultur). Prosedyre: Funksjonell strandsone Me må bestilla ein analyse av funksjonell strandsone i Øyane, til bruk i begge planane. Først må me avgrensa kriteria etter vurderingane ovanfor. Utviding av høyringstema og geografisk område: Kommunen ved Utval for plan og miljø vil i denne saka varsla utviding av det geografiske området for planen. Høyringstema er godt kjent frå strandsoneplanen, slik at det berre gjeld marginal utviding av areal. Me kan såleis leggja til grunn konsekvensanalyse og dei fleste vurderingstema frå den interkommunale strandsoneplanen. Folkemøte: Når den funksjonelle strandsona er kartlagt bør me innkalla til folkemøte for å orientera om planarbeidet, og opna for innspel, i dei områda kommunen vil opna for tiltak. Opna for innspel Me bør deretter opna for innspel, men avgrensa til tema og geografiske område som er definert i saka. Kommunen kan setja formkrav til innspela, t.d. kart, konsekvensanalyse, andre kriteria? Det er naturleg at det vert utarbeidd ein konsekvensanalyse for kvart tiltak slik som i kommuneplanarbeidet, og at tiltakshavar betaler denne analysen. Det trengst ikkje gjerst konsekvensanalyse av tiltak som kommunen ikkje vil gå vidare med. Tidsplan for Strandsonearbeidet: Samarbeidsrådet har lagt opp til endra framdriftsplan. Det blir dermed rom for ein øyaplan, som vil vera parallell med strandsoneplanen frå mai 2014. Revidert tidplan interkommunal plan: 1. april 2011 ressursgruppe etablert. Planprogramarbeidet starta opp Desember 2011 planprogram vert sendt på høyring med varsel om oppstart
15. februar 2012 høyringsfrist ute April/mai planprogram godkjent i kommunane Januar 2013 planarbeidet startar opp Planseminar sept/okt 2013 Medio april 2014 planforslag ligg føre Mai 2014 vedtak om høyring Desember 2014 planvedtak Tidplan for det kommunale arbeidet: September 2013 Vedtak om oppstart September 2013 Oppstart av arbeid med funksjonell strandsone Oktober/november 2013 Folkemøte om arbeidet 1 januar 2014 Frist for innspel til planen Februar 2014: Konsekvensanalyse av tiltak som kommunen vil gå vidare med. Medio april 2014 Planforslag ligg føre Mai desember 2014: Som for interkommunal strandsoneplan. Økonomi Kommunen har kr 100.000 i planmidlar, som kan nyttast. Kommunen har heller ikkje ei full bemanning på planavdelinga, og dermed liten kapasitet til dette arbeidet, i tillegg til anna arbeid, slik at det kan bli nødvendig med ekstraløyving i 2013, og behov for nye midlar i 2014. Ein foreslår kr 100.000 i ytterlegare løyving for 2013, og at midlar for 2014 blir vurdert i budsjett. Omdisponering? Styringsgruppe: Samarbeidsrådet er styringsgruppe for den interkommunale strandsoneplanen. Ein rår til at Utval for plan og miljø, supplert med ordførar og rådmann, vert styringsgruppe for arbeidet med Øyaplan. Dette sikrar nødvendig koordinering mellom dei to styringsgruppene. Delings- og byggjeforbod. Ved arbeidet med kommuneplanen såg me at det kom inn fleire søknader i perioden frå oppstart av planarbeidet, og til me vart ferdige. Innspela var oftast i motsetnad til tankane bak planarbeidet, og i motstrid til dågjeldande kommuneplan. For å få naudsynlege ro i arbeidet, og unngå parallell handsaming av same vurdering er det ynskjeleg å ha byggje- og delingsforbod i krinsen/medrekna Koløy så lenge arbeidet pågår. Dette blir teke med i forslaget til vedtak. Ein har vurdert byggje- og delingsforbod berre for tiltak som er i strid med kommuneplanen, men avgrensingane kan bli vanskelege, og det kan vera ynskjeleg å endra også gjeldande planar. Difor ynskjer ein byggje- og delingsforbod for alle tiltak, men viser til at tiltakshavarar kan søkja om dispensasjon frå forbodet for tiltak som er kurante i høve gjeldande kommuneplan. Framlegg til vedtak: Utval for plan og miljø viser til vedtak om oppstart og konsekvensanalyse for interkommunal strandsoneplan for Sunnhordland, i regi av Samarbeidsrådet. Utval for plan og miljø vedtek oppstart av tilleggsutgreiing til strandsoneplanen for øyane krins (Øyaplan), i samsvar med sakstilfanget. Tilleggsutgreiinga skal samordnast i tid med den interkommunale strandsoneplanen, og det endelege resultatet skal integrerast som ein kommunedelplan for Fitjarøyane (Øyaplan). Tilleggsutgreiinga vil opna for å vurdera einskildtiltak innanfor tema som det vert opna for etter høyring. Utval for plan og miljø, supplert med ordførar og rådmann, vert styringsgruppe for arbeidet med Øyaplan. Utvalet ber formannskapet om å stilla kr 100.000 ut over gjeldande budsjett for 2013 til disposisjon for arbeidet, finansiert ved disposisjonsfond. Eventuelt behov for midlar i 2014 vert å ta med i budsjett 2014.
Jfr. Pbl 13.1 vert det vedteke byggje- og delingsforbod for Øyane i Fitjar gjeldande frå 24. september 2013 og inntil vidare, dog ikkje lenger enn 4 år, jfr. Pb. 13.2. Behandling i Utval for plan og miljø - 19.09.2013: Utvalet drøfta saka og kom med slikt framlegg til endring i siste avsnitt: Jfr. Pbl 13.1 vert det vedteke byggje- og delingsforbod for Øyane i Fitjar medan planarbeidet pågår, gjeldande frå 24. september 2013 og inntil vidare, dog ikkje lenger enn 2 år, jfr. Pb. 13.2. Representanten Bård Inge Sørfonn KrF: kom med framlegg om at leiar i interesselaget for Fitjar-øyane, Bernt Christian Petterson, vert med i styringsgruppa. Utvalet hadde ingen merknader til dette. Utvalet vedtok at siste avsnitt i følgjande avsnitt i saksutgreiinga skal fjernast og lyde slik: «Faste bustader: Det er i dag mindre enn 10 fastbuande i øyane, hovudsakleg på Fodno, Engesund, Ålforo, og Koløy (som ikkje er del av Øyane krins). Planarbeidet skal avklara kor vidt kommunen bør opna for nye faste bustader i øyane.» Vedtak: (Samrøystes) Som framlegg frå administrasjonen med slik endring av siste avsnitt: Jfr. Pbl 13.1 vert det vedteke byggje- og delingsforbod for Øyane i Fitjar medan planarbeidet pågår, gjeldande frå 24. september 2013 og inntil vidare, dog ikkje lenger enn 2 år, jfr. Pb. 13.2. Atle Tornes Rådmann