1 Studentar som lukkast Kunnskap som endrar Strategisk plan 2014-2018 for HiSF (Vedteken på HiSF-styremøte 17.6.2014) 1
2 Innleiing Høg studiekvalitet og svært god studentgjennomstrøyming, relevant forsking av høg kvalitet, eit tett og forpliktande samarbeid med regionen vår og meir internasjonal utveksling og samarbeid. Dette skal vere retningslinjene for arbeidet ved HiSF dei neste åra. Gode yrkesretta bachelorutdanningar skal vere basis for utdanningsverksemda vår. Vi skal òg ha masterutdanningar og vidareutdanningar innanfor dei sentrale utdanningsområda våre. Undervisninga skal vere forskingsbasert. Vi skal vere ein fleksibel, endringsvillig og tilpassingsdyktig organisasjon som på ein god måte kan takle utfordringane vi møter dei nærmaste åra. «Kompetent, aktiv og tett på» er høgskulens kjerneverdiar. Verdiane uttrykkjer det vi står for, og skal stå for. Sikt høgare er visjonen vår, som viser at vi har store ambisjonar og siktar mot å verte betre på alle felt. Særleg skal vi styrke utdannings- og forskingskvaliteten og måten vi jobbar saman på. Alle tilsette og studentar skal vere med i dette arbeidet. Vi skal ha ein velfungerande organisasjon med høg kompetanse. Strategien vår inneheld hovudmål for dei ulike delane av verksemda vår, pluss nokre utdjupingar om kva vi skal leggje vekt på for å nå måla. Vi har i tillegg peikt ut fire viktige område vi skal ha ekstra merksemd på dei neste åra. 2
3 Visjon Sikt høgare HiSF si hovudoppgåve er å utdanne studentar som lukkast og å utvikle forsking som kan medverke til endringar i samfunnet. Visjonen «Sikt høgare» betyr at vi skal leggje lista høgare enn før. Vi skal styrke rekrutteringa av gode studentar og høgt kompetente tilsette. Vi ønskjer at studentane våre skal arbeide hardt med studia. Vi skal betre det fagleg gode og attraktive studiemiljøet ved dei to studiestadene Førde og Sogndal. Høg kvalitet og fagleg relevans skal vere hovudpilaren for forskingsarbeidet ved høgskulen. Forsking saman med arbeids- og næringsliv skal bidra til endring og utvikling. «Å sikte høgare» betyr at vi skal ha gjennomgåande høg studie-, utdannings- og forskingskvalitet. Undervisninga og studiemiljøa våre skal vere internasjonalt attraktive og på høgde med det beste i sektoren. Vi skal vere i forkant når det gjeld å ta i bruk ny undervisningsteknologi. Vi skal ha forsking av høg kvalitet på alle sentrale utdanningsområde. Minst eitt av forskingsområda våre skal vere i forskingsfronten. Vi siktar høgare når vi vil styrke det regionale samarbeidet. Men vi skal òg gjere oss meir gjeldande internasjonalt. Sikt høgare skal leggjast til grunn for verksemda ved HiSF på alle område den neste fireårsperioden. Verdigrunnlag Kompetent Aktiv Tett på Kompetent betyr at institusjonen skal vere godt kvalifisert for oppgåva den skal løyse: utdanne studentar som lukkast og levere forsking av høg kvalitet. Vi skal også ha godt kvalifiserte studentar. Studentar som vert uteksaminerte hjå oss, skal vere kompetente for krevjande arbeidsoppgåver i yrkeslivet. «Kompetent» inneber vidare at vi skal ha eigenskapar som set oss i stand til å samarbeide godt med regionen. Samtidig skal vi styrke kompetansen på det internasjonalt retta arbeidet vårt. Aktiv peikar på at vi er og skal vere ein høgskule prega av aktive tilsette og studentar. Vi skal vere aktive og stille større faglege krav til studentane våre. Vi vil òg ha aktive studentar som stiller høge krav til høgskulen. Konkurransen om studentane hardnar. Det same gjeld konkurransen om nasjonale og internasjonale forskingsmidlar. Ein fagleg god, synleg og aktiv høgskule er nødvendig for å lykkast i konkurransen. Samtidig stiller regionen krav til oss og har forventningar til oss. Vi skal vere ein aktiv høgskule som møter desse utfordringane med kompetanse og kvalitet. Tett på er det som mest av alt karakteriserer livet ved HiSF. Vi er tett på det meste: naturen, studiestadene, samarbeidspartane, yrkeslivet, lokalsamfunnet, alle fasilitetane osv. Studentane er tett på lærarane, praksisplassar og yrkesliv, og vi har ein brei studieportefølje med utstrekt samarbeid på tvers av fagområde. Alle kan bidra og vere viktige. Tett på er ein positiv verdi for oss som kan bidra til å byggje sterkare fagmiljø på tvers av utdanningar og avdelingar. 3
4 Den faglege aktiviteten Utdanning, forsking og utviklingsarbeid (FoU) og formidling utgjer kjerneverksemda ved høgskulen. Ved HiSF er utdanningsverksemda den mest omfattande. Å rekruttere motiverte og flinke studentar er den viktigaste utfordringa for høgskulen dei neste åra. Vi skal gjere dette gjennom å tilby relevante utdanningar av høg kvalitet, framifrå studiemiljø og dyktige lærarkrefter. Vi skal intensivere rekrutteringsarbeidet, og syte for at studentane frå første dag får ein god start på utdanninga. HiSF skal stå fram som ein høgskule med to levande campus, der særs gode utdanningar på bachelornivå skal vere grunnsteinen i utdanningsverksemda vår. Vi skal ha tilbod om masterutdanning på dei sentrale utdanningsområda våre. Vi skal ha tett fagleg oppfølging av og stille tydelege krav til studentane. HiSF har eit relativt breitt studietilbod med hovudvekt på lærarutdanning og yrkesfaglege bachelorutdanningar, som vi rekrutterer regionalt til. Høgskulen har òg nokre utdanningar som er utvikla med grunnlag i særlege føresetnader i regionen. Det gjeld særleg tilbod innanfor idrett og energi/naturressursar/miljø. Vi rekrutterer nasjonalt til desse studia. Forsking og utviklingsarbeid av høg kvalitet er eit viktig kjenneteikn ved ein god høgskule. HiSF har siste åra styrkt forskingsinnsatsen betydeleg. Å rekruttere og halde på høgt kompetent fagpersonale er vesentleg for vidare utvikling av forskinga ved høgskulen. Det er særleg viktig for høgskulen å utføre forsking av høg kvalitet innanfor dei sentrale satsingsområda våre. Relevante regionale problemstillingar og utfordringar har lenge spelt ei viktig rolle for forskinga ved høgskulen. Slik skal det vere også i åra framover. Både utdanning og forsking ved HiSF skal vere kjenneteikna av høg kvalitet. Forskingsbasert utdanning er det fremste bindeleddet mellom dei to. Vi ønskjer å verte ein høgskule med framifrå forskingsbasert undervisning. Vi vil stille høge krav til undervisningskompetanse hos tilsette i undervisnings- og forskarstillingar. Vi vil leggje vekt på å utvikle gode undervisnings- og læringsformer. Det internasjonale arbeidet vårt skal utvidast og forbetrast. Høgskulen skal i neste periode styrke IKT-kompetansen til støtte for forsking og undervisning. Vi skal òg greie ut spørsmålet om ei Ph.D-utdanning ved høgskulen. Omdømet til HiSF er avhengig av kvalitet og resultat når det gjeld utdanning og forsking. Synleggjering og profilering av forskinga og utdanninga skal bidra til auka kjennskap og tiltru til høgskulen regionalt, nasjonalt og i aukande grad også internasjonalt. Høgskulen vil derfor styrke arbeidet med formidling og samfunnskontakt. HiSF skal vere ein open, engasjert og synleg institusjon. Dei tilsette skal stimulerast til å ta del i det offentlege ordskiftet. Høgskulen skal delta aktivt på kunnskaps- og innovasjonsarenaer i fylket. I dette arbeidet inngår også styrking av innovasjonsarbeidet ved Fosshaugane Campus og Campus Førde, Hovudmål HiSF skal tilby utdanning av høg kvalitet basert på det fremste innanfor forsking, fagleg utviklingsarbeid og erfaringskunnskap utføre forsking og fagleg utviklingsarbeid av høg kvalitet som bidreg til endringar i samfunnet 4
5 gi studentar som byrjar på ei bachelorutdanning ved HiSF, utsikt til å fullføre ein mastergrad i HiSF, eventuelt i eit samarbeid mellom HiSF og andre utdanningsinstitusjonar vere ein open, tilgjengeleg og engasjert kunnskapsinstitusjon som gjennom det faglege formidlingsarbeidet er synleg og set spor etter seg; særleg regionalt, men også nasjonalt og internasjonalt Delmål HiSF skal: ha studentar som arbeider hardt og lukkast i utdanningane, og vere blant høgskulane med best gjennomstrøyming og høgast poengproduksjon per heiltidsekvivalent ha eit breitt tilbod av praksisnære bachelorutdanningar og tilbod om mastergrad på dei sentrale utdanningsområda ha fleire vidareutdanningar i samarbeid med regionalt arbeidsliv, knytte til høgskulens masterutdanningar møte nye studentar med god oppfølging og høge faglege krav, og syte for at dei har gode faglege kvalifikasjonar, skriveferdigheiter og akademisk danning ved fullført grad styrke arbeidet med kunnskapsbaserte prosjekt for vidareutvikling av undervisningsog læringsformer primært vere ein campushøgskule som er tett på studentar, tilsette og samarbeidspartar, men samtidig leggje til rette for nettbasert deltaking på nokre studium og aktivitetar styrke internasjonalt fagleg samarbeid og auke mobiliteten både blant tilsette og studentar utvikle sterkare FoU-miljø og forskingsgrupper som får tilslag på eksternt finansierte oppdrag og som har gode internasjonale relasjonar auke talet på publikasjonar til å bli ein høgskule med høg vitskapleg publisering styrke IKT-kompetansen til støtte for både undervisning og forsking greie ut spørsmålet om ei mogleg PhD-utdanning formidle resultata frå FoU-aktiviteten til samfunnet og auke bruken av «open access»- publisering arbeide for å få næringsmessige og andre ringverknader av FoU-aktiviteten aktivt bidra til innovasjon og verdiskaping i privat og offentleg sektor Organisasjon og menneskelege ressursar Høgskulens organisasjon og ressursar skal støtte opp under kjerneverksemda ved høgskulen og bidra til at vi når måla og løyser samfunnsoppdraget på ein god måte. Høgskulen skal vere ein attraktiv arbeidsplass for menneske med høg kompetanse, både i faglege og administrative stillingar. Å få fleire tilsette i undervisnings- og forskarstillingar med første- og toppkompetanse er no særskilt viktig. Ei sunn ressursforvaltning skal underbyggje dei strategiske prioriteringane. Dei administrative tenestene ved høgskulen skal ha høg kvalitet og bidra til ei effektiv ressursutnytting til kjerneoppgåvene undervisning, forsking og formidling. Dei neste åra skal campusutvikling prioriterast, i tråd med målsetjingar om gode studiemiljø og faglege nettverk. 5
6 HiSF skal vere ein lærande organisasjon kjenneteikna ved eit godt arbeidsmiljø med evne til kunnskapsutvikling og problemløysing under skiftande vilkår. Mangfald, likeverd og likestilling skal vere sentrale verdiar. Det skal leggjast vekt på god leiaropplæring. Høgskulen skal ha eit inkluderande arbeids- og læringsmiljø kjenneteikna av respekt og openheit. Organisasjonen skal ha gode og opne kommunikasjonskanalar for å sikre brei deltaking og engasjement i utviklinga av høgskulen. Både studentar og tilsette skal medverke i desse prosessane, og gjennom dette få eigarskap til høgskulen og bidra til best mogleg kvalitet på aktivitetane. Hovudmål HiSF skal ha ein effektiv, kunnskapsrik og målretta organisasjon som legg til rette for og støttar opp om kjerneaktivitetane ved høgskulen. Delmål HiSF skal: leggje moderne prinsipp om lærande organisasjonar til grunn for utvikling av ein velfungerande kunnskapsorganisasjon arbeide for systematisk kvalitetsutvikling og god leiing på alle nivå ha ei effektiv ressursforvaltning av høg kvalitet som skal underbyggje dei strategiske prioriteringane ved høgskulen drive målretta kompetansebygging, rekruttering og leiaropplæring for å sikre eit høgt kunnskapsnivå, god kvalitet og profesjonalitet i alle delar av den faglege og administrative verksemda auke delen fagtilsette med førstekompetanse og toppkompetanse til meir enn 50 pst. ha gode og opne kommunikasjonskanalar for å sikre deltaking og engasjement blant tilsette og studentar sikre studentar og tilsette medverknad og involvering i avgjerdsprosessar ved høgskulen på ein målretta måte byggje opp gode fag- og studiemiljø på campus i Sogndal og i Førde 6
7 Særskilt viktige område Studentrekruttering Å halde oppe, og om mogleg auke, den gode studentrekrutteringa er den største utfordringa for HiSF dei neste åra. Vi må derfor styrke arbeidet vårt på dette feltet. Særleg ønskjer vi å rekruttere fleire godt kvalifiserte studentar. Rekrutteringa frå folkerike delar av landet som Bergensområdet og det sentrale Austlandsområdet må verte betre. Undersøkingar viser at ca. 40 pst. av studentane frå andre delar av landet vert verande i arbeid i Sogn og Fjordane etter avslutta utdanning. Dei fleste studentane frå Sogn og Fjordane får også jobb her i fylket. I det vidare arbeidet med å rekruttere dyktige studentar til høgskulen ønskjer vi å samarbeide med arbeids- og næringslivet i fylket. HiSF og regionen Ein fagleg sterk og god høgskule er vesentleg for den vidare utvikling av Sogn og Fjordane. Kandidatane vi utdannar, spelar ei svært viktig rolle som arbeidstakarar i skule-, helse- og sosialsektoren i heile fylket. Også i det lokale næringslivet har mange delar av utdanninga si frå HiSF. Fleire av vidareutdanningane våre er utvikla saman med arbeidslivet i fylket. Viktige delar av forskinga vår er også regionalt forankra. Det er nødvendig for HiSF å ha eit godt og konstruktivt samarbeid med regionen. Vi vil saman med regionen vidareutvikle innovative miljø og kunnskapsklyngjer kring campus i Sogndal og Førde, med spreiing til resten av fylket. Vi skal vere opne for å utvikle næringsretta studium og utdanningar på område der høgskulen ikkje har eigen kompetanse, saman med andre høgare utdanningsinstitusjonar. Det er òg eit mål å vidareutvikle samarbeidet med Fagskulen i Sogn og Fjordane. HiSF i det framtidige UH-Noreg HiSF er ein høgskule med ei brei studieportefølje og mange yrkesretta bachelorutdanningar. Vi utdannar kandidatar som er svært viktige for arbeidslivet i fylket. Av den grunn er det vesentleg for HiSF å halde fram som ein sjølvstendig høgskule. Både frå arbeidslivet i fylket og frå studentane vert dette sterkt understreka. Men for å styrke høgskulens faglege verksemd ser vi det som sterkt ønskjeleg å utvide samarbeidet innanfor UH-nett Vest. Institusjonane i dette nettverket vil no styrke samarbeidet, både innanfor utdanning, forsking og administrative oppgåver. Dette inneber ei sterkare arbeidsdeling og ei meir effektiv ressursutnytting for institusjonane. For HiSF er eit meir forpliktande samarbeid mellom UHinstitusjonane på Vestlandet, helst innanfor ramma av UH-nett Vest, både ønskjeleg og nødvendig. Men HiSF skal også samarbeide med andre høgare utdannings- og forskingsinstitusjonar, når dette er riktig og nødvendig for å utvikle meir solide fagmiljø og betre utdanningar. Internasjonalisering Meir enn nokosinne er kunnskapen global. Dette skal i sterkare grad avspegle arbeidet ved HiSF. Vi skal styrke den internasjonale aktiviteten, auke kvaliteten i arbeidet og vere ein attraktiv partnar for internasjonalt samarbeid. Internasjonalisering skal vere ein integrert del av verksemda til høgskulen. Det inneber ei klarare forankring både på institusjons- og avdelingsnivå. Vi skal ha ei strategisk oppbygging og vidareutvikling av det internasjonale arbeidet, med konkrete målsetjingar og planar samt ei klar ansvarsdeling. Arbeidet skal vere fagleg forankra, bidra til kvalitetsheving av institusjonen, og byggje på samarbeid med viktige partnarar som styrker vår regionale posisjon. Vi skal rekruttere fleire utvekslingsstudentar ved å opprette engelskunderviste emne integrert i eksisterande studieprogram. Vi skal oppmuntre studentane våre om å ta delar av studiet i utlandet. 7