Kunstplan for sentrumsparken i Sogndal Innhald: 1. Om prosjektet 2. Situasjonen, området 3. Om parken, brukarar, aktivitetar 4. Overordna ide for kunstprosjektet 5. Prioriterte områder for kunstprosjekt 6. Aktuelle kunstnarar 7. Budsjett 8. Framdriftsplan 1.Om prosjektet Namn på prosjekt: Kunstprosjekt for sentrumsparken i Sogndal sentrum Prosjektansvarleg: Sogndal kommune, ved Torun Torheim. Kunstkonsulent: Gerd Endestad Kunstutval: Sogndal kommune har eit kunstutval beståande av ein politisk representant frå kommunestyret, ein arkitekt/landskapsarkitekt og ein kunstnar. Administrasjonen er sekretær for kunstutvalet. Sogndal opna Sentrumsparken 11.september 2008. Hovudsakleg finansiert av kommunen (16 mill.). Den overordna målsettinga for kommunen er fleire innbyggjarar, og meir trivsel i Sogndal. Eit av dei styrande måla i Sogndal er folkehelse. Kommunen ønskjer å legge til rette for spontan aktivitet der folk ferdast og bur; parken er tenkt som ein plass for trivsel og aktivitet for alle aldrar. 2. Sentrumsparken: skildring av området
Blant målsetjingane bak sentrumsparken er eit ønskje om å skape eit visuelt grøntdrag, med ein akse for gang- og sykkeltrafikk som kan gje betre kontakt med fjorden. Parken fungerar også som ein sambinding av den gamle delen av sentrum, mot sør og fjorden, med små butikkar og verksemder, - og den nyare delen av sentrum, nord om Gravensteinsgata, med Sogningen Storsenter og Sogndal Kulturhus. Parken har store opne flater, utan særleg nivåskilnader. I det opne område framfor rådhuset er det plassert varmestein (rund) og fontene (berre i bruk om sommaren), samt steinblokker som er i bruk som benkar. Dette området er lagt med asfalt med eit tynt steindekkje oppå. Ein del tre (hovudsakleg epletre) og busker, blomsterbed, samt sandkasse, klatreskulptur, trampoline og huskestativ er å finne på dei andre delane i parken. Parken er oppdelt med asfalterte og gruslagde gang- og sykkelvegar. I figur 1 har vi delt parken inn i ulike soner. Plassen framom kommunehuset er omtalt som «kommunehusplassen», aust for denne har vi ein «hage» og området langs austsida av kommunehuset er omtalt som «hjorten», der hjorteskulpturen er plassert. På vestsida av kommunehuset har vi «kirsebærlunden», kring Kafé Krydder har vi område for «leik» og «kafé», mellom Bondevikhuset og kommunehusplassen har vi eit område med større epletrær og grasflate omtalt som «piknik/sitje på graset-sone». Lengst sør i parken har vi i Svedalshagen eit område omtalt som «roleg eplehage». Figur 1: Utstrekning av parken (noverande situasjon) med gang- og sykkelsamband i grått.
3. Om parken: Brukarar og aktivitetar i parken Parken har mange ulike brukargrupper, som barnefamiliar, skuleungdom, studentar, og eldre. Kafeen og leikeplassen i nordvestleg del tiltrekker seg mykje folk, men også området framfor kommunehuset vert mykje nytta (sykling, skating, samtalar på benkane og leik i fontena for å nemne noko). Parken vert altså mykje nytta til uorganiserte aktivitetar og leik, både på dagtid og kveldstid, men den vert også nytta til organiserte samlingar. Døme på dette er julegrantenning, konsertar på scene eller kommunehustrappa, haustmarknad, bodsal, studiestart, politiske parti under valkamp, Lerumscup, tivoli, idrettsarrangement (t.d. SIL, Jotunheimen rundt), marknadsføring, utdelingar/taler og mykje meir. 4. Overordna ide for kunstprosjektet Sogndal har målsetjing om å vere ein av dei fremste kommunane i landet på folkehelse, og ønskjer med dette å legge til rette for spontan aktivitet der folk ferdast. I sentrumsparken er dette tydleg ivareteke med godt tilrettelagde område for leik og aktivitet. Det er ønskeleg i dette kunstprosjektet å vidareføre denne tanken om spontan aktivitet. Det fysiske kunstverket skal framstå som eit sjølvstendig visuelt utforma verk. Tilleggsfunksjonen er at det også kan nyttast. Dermed bør verket tiltrekke seg såpass tydeleg merksemd i utforminga at det medfører ein invitasjon til å takast i bruk. Kunstverket må vere av så solid utforming og materiale at det toler den omtala bruken, og ikkje ha skarpe kantar mm., som kan føre til skader. Vesentlege vedlikehaldsutgifter bør ein planlegge å unngå. Kunstverket skal invitere og utfordre; mane til ettertanke, refleksjon og gjerne diskusjon. Kunstverket kan gjerne ta opp i seg det kjende (som former, fargar frå Sogndal og landskapet rundt), men også avspegle bygda slik bygda ønskjer å vere; eit fargerikt og mangfaldig sentrum, der omsyn til både det nye og gamle, nyvinning og tradisjonar er ivareteke. Kunstverket til parken kan omfatte ein eller fleire permanente kunstverk. 5. Prioriterte områder for kunstprosjekt Det er ønskeleg å få aktivisert områder av parken som no ligg meir ubrukte, særleg gjeld dette for Svedalshagen, «roleg eplehage», som ligg sør i parken. Men vi ønskjer ikkje å sette dette som krav for utføringa og plassering av kunstverket, det er ønskeleg å vere open for å bruke dei områda som er best eigna for at kunstverket skal fungere best mogeleg. Plassering av kunstverket må og tilpassast eksisterande element som trær, stiar, bygg og kunst. Område tilrettelagd for leik og kommunehusplassen er
ønskeleg å halde open og tilgjengeleg som no. Kunstnar må i skisseprosjektet grunngje plassering av kunstprosjektet utifrå verkets art. 6. Aktuelle kunstnarar Det vert teke kontakt med 2-3 aktuelle kunstnarar, som vert presenterte for kunstutvalet. Av desse vert det så tilrådd ein som får oppdraget. Kunstnarar til presentasjon for kunstutvalet, aktuelle for oppdrag er: Magnhild Øen Nordahl Kent Fonn Skåre Olve Sande. Alle er nyutdanna unge kunstnarar, som også har tilknyting til fylket. Kunstnarane sender over presentasjonsmateriale til kunstkonsulent innan utgangen av august månad, dette vert vidaresendt til Sogndal kommune og kunstutval i god tid før møtet i september. 7.Budsjett Kunstprosjekt 250 000 Skilting 1 000 Kunstkonsulent 12 000(eigentleg 11630) 5% BKH(av oppdragssum) 12 000 ( avgift til Bildende Kuntners Hjelpefond) Reserve 25 000 Samla budsjett 300 000 Det vil bli arbeidd med å auke budsjettet, med målsetjing om at sjølve kunstprosjektet kan få ei ramme på minst 300 000. Andre kostnader utanom oppsett budsjett: Anleggskostnader/belysning som eventuelt kan kome i tillegg vert etter samråding dekka av kommunen. Ei reise for kunstnaren til Sogndal for synfaring i parken og Sogndal sentrum vert dekka av kommunen utan om kunstprosjektet, inntil kr 3000. Opningsfest/markering av kunstverket i parken. Kunstnar og kunstkonsulent vert invitert til dette, med dekka reise (som over). Med auka støtte kan nokre av desse kostnadene vurderast å inngå i samla budsjett. 8. Framdriftsplan Innan medio juli -14, forslag til kunstplan er klar, med forslag om aktuelle kunstnarar.
September -14, møte i Sogndal med kunstutval, kommune og konsulent. Møtet vil kome med ei tilråding til formannskapet. Slutten av okt -14: formannskapet tek avgjerd om kunstplan og avgjerd om kven av kunstnarane som får oppdraget. Kunstnar får deretter kontrakt på oppdraget, må legge fram forsikringsbevis, og kan få utbetalt 1/3 av oppdragssum. Start desember -14: Kunstnar har klar ide og skisser for kunstverk, med budsjett. Medio desember -14: Samrådings-/godkjenningsmøte (skype/videomøte for konsulent), mellom utsmykkingsutval/kommune/konsulent for å godkjenne kunstnaren sitt forslag, evt. be om justeringar, eller ikkje godkjent. Sist i desember-14/start januar -15: godkjent skisseforslag frå kunstnar= utbetal 1/3del til kunstnar. Kunstkonsulent overdreg oppfølgingsarbeidet til kommunen. Kunstnar har frist til 31. mai 2015 med å ferdigstille kunstverket, dvs ferdig montert i Sentrumsparken i Sogndal. Start juni mnd 2015: Godkjent kunstverk = restutbetaling til kunstnar siste 1/3 Opningsfest/markering av kunstverket i parken. Kunstnar, kunstkonsulent og kunstutvalet, samt andre deltakande partar er invitert til dette.