1 Generelle vilkår for SIM sine tilbodskonkurransar Det følgjande er ei samanstilling av generelle vilkår som gjeld SIM sine tilbodskonkurransar. 1.1 Konkurransereglar og prosedyrer Forskrift om offentlige anskaffelser og oppdragsgjevar sitt konkurransegrunnlag gjeld som konkurransereglar. Det vert nytta prosedyre for Open tilbodskonkurranse. 1.2 Vilkår for deltaking Tilbydar må ha økonomisk og finansiell evne til å gjennomføra oppdraget, den tekniske og faglege kompetansen som trengs og erfaring frå liknande oppdrag. Oppdragsgjevar kan krevja at tilbydar legg fram revisorgodkjende årsrekneskapar og uavhengige kredittvurderingar og bankgarantiar. Oppdragsgjevar kan også be om konsern- eller morselskapsgaranti. 1.3 Rettingar i konkurransegrunnlaget Det kan koma rettingar, suppleringar og anna til konkurransegrunnlaget. 1.4 Feil i dokumenta Tilbydar pliktar å setja seg nøye inn i konkurransegrunnlaget. Dersom tilbydar finn feil, manglar eller motseiingar, eller er i tvil om tilhøve vedkomande dette, skal han varsla oppdragsgjevar skriftleg. 1.5 Om innhaldet i tilbodet Tilbodet skal vera utforma som omtalt annan stad i konkurransegrunnlaget. Dersom prisen ikkje inkluderer ytingar som er føreskrivne i konkurransegrunnlaget, eller som må inngå i ein funksjonsdyktig leveranse, skal tilbydar gjera særskilt merksam på dette i tilbodsbrevet. Det skal i så fall gjerast greie for kva avvik det dreiar seg om, og kva som er følgjene av endringane. 1.6 Tilbydar sine kostnader Tilbydar må dekka alle sine kostnader med utarbeiding og oversending av tilbodet, og med synfaring. 1.7 Avlysing Oppdragsgjevar kan avlysa konkurransane dersom det er sakleg grunn for det. Ved avlysing kan det ikkje krevjast kostnadsrefusjon.
1.8 Kontraktsdokument Følgjande dokument inngår i prioritert rekkefølgje i kontrakten: 1. Avtaledokument 2. Møtereferat 3. Skriftlege meldingar frå oppdragsgjevar om endringar i konkurransegrunnlaget 4. Oppdragsgjevar sitt konkurransegrunnlag 5. Oppdragstakar sitt tilbod. Alle kontraktsdokument skal vera på norsk, med unnatak av vedlegg, som kan vera på norsk, svensk eller dansk. Yngre vilkår gjeld framfor eldre, spesielle vilkår framfor generelle og særskilde vilkår for kontrakten framfor standardiserte vilkår. Avvik frå vilkåra i oppdragsgjevar sitt konkurransegrunnlag gjeld berre dersom dei er godtekne eller vist til i avtaledokument og/eller møtereferat. 1.9 Kommunikasjon i avtaleperioden Oppdragstakar sin representant skal kunna norsk, svensk eller dansk. Om ikkje anna er avtalt, skal skriftleg kommunikasjon skje på eitt av desse språka. 1.10 Overføring av plikter Oppdragsgjevar kan overdra særskilde rettar (til dømes kontrollar) i kontrakten til tredjemann. Oppdragstakar har rett til å la delar av pliktene sine i kontrakten bli utført av underoppdragstakar. Oppdragstakar sitt ansvar etter kontrakten overfor oppdragsgjevar vert ikkje endra ved bruk av underoppdragstakar. Før kontrakt med underoppdragstakar vert inngått, skal oppdragstakar gje oppdragsgjevar melding om kva deler av kontrakten han vil nytta underoppdragstakar til. 1.11 Arbeidsmøte Oppdragstakar pliktar å delta på møte som oppdragsgjevar kallar inn til utan ekstra kostnader for oppdragsgjevar. Oppdragstakar kan sjølv be om møte. Alle møte skal haldast hjå oppdragsgjevar, dersom ikkje anna er avtalt. 1.12 Kontrollar Oppdragsgjevar har rett til å føra kontroll med utføringa av oppdraget, oppdragstakar sitt utstyr og internkontrollsystem, behandlingsløysinga og underoppdragstakarar. Oppdragstakar skal utan kostnader for oppdragsgjevar leggja til rette for, og hjelpa til med, kontrollarbeidet. 1.13 Kontraktsstridige tilhøve Vert oppdragsgjevar merksam på tilhøve han meiner er i strid med kontrakten, skal han senda skriftleg melding om dette til oppdragstakar. Oppdragstakar pliktar straks og utan kompensasjon å framskaffa dei opplysningane som oppdragsgjevar ber om.
1.14 Løns- og arbeidsvilkår Oppdragstakar, eller hans underoppdragstakar, skal ha løns- og arbeidsvilkår som ikkje er dårlegare enn det som følger av gjeldande landsfemnande tariffavtale, eller det som elles er normalt for vedkomande stad og yrke. Oppdragstakar skal på førespurnad frå oppdragsgjevar dokumentere løns- og arbeidsvilkåra til dei som utfører kontrakten. Dersom det viser seg at løns- og arbeidsvilkåra ikkje oppfyller gjeldande regelverk, kan oppdragsgjevar krevje oppdragstakar for dagmulkt. Oppdragsgjevar kan krevje dagmulkt dersom oppdragstakar eller nokre av underoppdragstakarane nyttar ulovleg arbeidskraft, eller arbeidskraft i strid med kontrakten, og dette ikkje vert retta opp etter ein frist definert av oppdragsgjevar. Oppdragsgjevar kan også krevje dagmulkt dersom underoppdragstakar ikkje rettar seg etter vilkåra i kontrakten mellom oppdragsgjevar og oppdragstakar. Mulkta gjeld frå fristen til det kontraktstridige tilhøvet vert avslutta. 1.15 Streik eller force majeure Dersom oppdragstakar på grunn av streik eller force majeure ikkje får utført kontraktsarbeidet, har oppdragsgjevar høve til å få det utført i eigen regi eller ved hjelp av andre. 1.16 Tilgrising Oppdragstakar skal straks, og for eiga rekning, rydda opp etter seg dersom han tilgrisar omgjevnaden. Dersom oppdragstakar har fått melding om at han har grisa til, og likevel ikkje ryddar opp etter seg, kan oppdragsgjevar organisera opprydding for oppdragstakar si rekning. 1.17 Krav om tilleggspris Tilhøve som oppdragstakar meiner kvalifiserer til tilleggspris, skal meldast skriftleg til oppdragsgjevar straks. Meldinga skal innehalda grunngjeving for kravet med referanse til punkt i kontrakten og storleik på kravet. 1.18 Fakturering Oppdragstakar kan senda første faktura etter første månadsskifte etter oppstart. Deretter kan det sendast faktura éin gong i månaden. Fakturaen skal vera utforma slik oppdragsgjevar krev, med mengder og tilleggsarbeid spesifisert. 1.19 Betaling Betaling skjer etterskotsvis, éin gong i månaden. Betalingsfrist er 30 dagar etter at rett faktura er motteken. 1.20 Uomtvista krav Oppdragsgjevar pliktar å betala uomtvista krav innan 30 dagar etter at han har motteke faktura. Føresetnaden er at fakturaen er formulert i samsvar med kontrakt.
Dersom oppdragstakar er skuldig dagmulkt, eller har anna skuld som følgje av avvik, kan oppdragsgjevar halda tilbake så mykje av betalinga at han har sikring for å dekka eit spesifisert krav. 1.21 Dagmulkt og erstatning Oppdragsgjevar kan krevja dagmulkt dersom oppdragstakar ikkje overheld sine plikter etter avtaledokumenta. Grunnlag for dagmulkt kan vera: 1. Henting av avfall er forseinka i høve til avtalt tidspunkt, herunder at oppdragstakar er på etterskot med avvikling av eksisterande lager. 2. Løns- og arbeidsvilkår som ikkje oppfyller gjeldande regelverk. 3. Andre brot på kontraktsvilkår og avtalte fristar. Mulkta er kr 3 000 per døgn. Den gjeld frå det tidspunktet oppdragsgjevar krev, men tidlegast frå dagen etter at oppdragstakar er varsla om tilhøvet. Dersom oppdragstakar innan 10 kalenderdagar ikkje har retta opp i tilhøve som er grunnlag for dagmulkt, kan oppdragsgjevar få ordna opp på oppdragstakar si rekning. 1.22 Heving av kontrakt Den eine parten har rett til å heva kontrakten dersom den andre parten i vesentleg grad mislegheld pliktene sine og ikkje rettar opp tilhøva innan den frist som vert fastsett etter skriftleg varsel. Som vesentleg misleghald reknar ein t.d. at den eine parten ved fleire tilfelle ikkje har betalt uomtvista krav til rett tid. Oppdragsgjevar kan heva kontrakten dersom det går meir enn 14 kalenderdagar utan at oppdragstakar har retta opp i tilhøve som er grunnlag for dagmulkt. Dersom oppdragsgjevar kan påvisa opplagde lovbrot/brot på konsesjonar i oppdragstakar sin måte å gjennomføra arbeidet på, kan oppdragsgjevar straks heva kontrakten utan å venta på eventuell juridisk saksprosess eller rettargang. Går oppdragstakar konkurs, eller vert prova eller erkjent insolvent, kan oppdragsgjevar heva kontrakten, med mindre det med ein gong vert godtgjort at oppdraget kan fullførast i samsvar med avtaledokumenta. 1.23 Garanti/sikring Oppdragstakar skal stilla sikring for sine plikter i kontrakten, herunder morarenter og kostnader ved inndriving. Sikringa skal vera formulert i samsvar med vedlegg og leggjast fram for oppdragsgjevar seinast ved kontraktsinngåing. Sikringa skal stillast som selvskyldnerkausjon frå bank, forsikringsselskap eller anna kredittinstitusjon. Lovnaden om kausjon frå garantisten skal rettast direkte til oppdragsgjevar. Garantien skal gjelda i heile kontraktsperioden og kan ikkje kallast tilbake. (sjå eksakte summar i pkt. Feil! Fant ikke referansekilden.). Krav under garantien skal leggjast fram skriftleg og innehalda ei erklæring om at oppdragstakar har misleghalde sine plikter. Krav kan bli fremja inntil maksimalbeløpet er nådd.
Dersom garantiansvaret blir gjort gjeldande, pliktar garantisten å betala med ein gong ( on demand ), utan at det kan gjerast innvendingar til forholdet mellom oppdragstakar og oppdragsgjevar, eller til andre forhold. Alle dagmulkter skal kunna trekkjast frå garantien, likeeins utgifter som oppdragsgjevar måtte få som følgje av at oppdragstakar ikkje har utført sine plikter etter avtalen. Garantiansvaret kan ikkje gjerast gjeldande utan at oppdragstakar har fått rimeleg frist til å retta opp i tilhøva som er påklaga. Oppdragsgjevar stiller inga sikring. 1.24 Forsikring Oppdragstakar skal ha ei ansvarsforsikring med vanlege vilkår. Forsikringa skal dekkja erstatningsansvar for skade han og underoppdragstakarane hans kan påføra oppdragsgjevar eller tredjemann sin person eller eigedom i samband med utføring av oppdraget. Forsikringssummen for kvart skadetilfelle skal ikkje vera mindre enn 150 G, men oppdragstakar sitt ansvar er ikkje avgrensa til denne summen. Forsikringspolisen skal ikkje innehalda vilkår som reduserer oppdragsgjevar sin rett til å krevja erstatning direkte frå forsikringsselskapet, eller som kan redusera kravet hans på grunn av den forsikra sine tilhøve etter tidspunktet for forsikringstilfellet. Polisane skal leggjast fram for oppdragsgjevar for kontroll dersom han ber om dette. 1.25 Tvist Partane sine rettar og plikter ved inngåing av kontrakt på dette konkurransegrunnlaget er underlagt norsk rett. Dersom usemje om kontrakten ikkje kan løysast med forhandling, og partane ikkje vert samde om voldgift, skal tvisten avgjerast ved Sunnhordland tingrett.