Styret for Indremisjonsforbundet

Treårsmelding ImF, 2013-2015 Styret for Indremisjonsforbundet (ImF) legg med dette fram si treårsmelding for GF, og vi vil gi våre misjonsvener eit innblikk i vårt arbeid og virke dei tre siste åra. Som vanleg tek vi også med meldingar frå krinsane og skular som er direkte eigd av ImF, men vi har ikkje teke med forsamlingar denne gong. Med aukande tal på små og store forsamlingar, er det vanskeleg å trekke ei linje om kven ein skal ta med og kven ein skal utelate. Det meste av det som er skrive, vil ein kjenne igjen om ein har halde seg orientert med Sambåndet og nettsidene våre. Vi har lagt vinn på å skrive kort, men innhaldsmetta, slik at flest mogleg opplever meldinga overkomeleg å sette seg inn i. Styremøta Styret samlast fem gonger per år; januar, mars, mai, september og november. I tillegg har det vore telefonmøte ved behov. Første og andre varamedlem vert innkalla fast til alle møte. Styremøta vert stødig leia av formann, og sakene førebudd av eit arbeidsutval beståande av generalsekretær, formann, administrasjonsleiar og økonomileiar. Saklista er som oftast delt inn i referat frå ulike styrer og råd, økonomirapport, vedtakssaker og generalsekretæren/administrasjonen sin rapport. Den siste inneheld fleire små og store punkt, og er ofte grunnlaget for viktige samtalar i styret. Dei fleste styremøta er på Bildøy, men denne perioden har også styret besøkt Sogn og Fjordane Indremisjon (2013 i Luster), krinsane i Møre og Romsdal (2014 på Frænabu) og krinsane Midthordland Indremisjon og Nordhordland Indremisjon (2015 i Bergen). Vi ser det som viktig at ein i slike møtepunkt kan få djupare innsikt i kvarandre sin situasjon og bygge relasjonar mellom forbund, krinsar og institusjonane våre. Hyrderådet handsamar saker som er adressert direkte til dette organet, i tillegg til saker som generalsekretæren finn det naturleg å legge fram for rådet. Ein legg vinn på at flest mogleg saker vert handsama i styret. Samansetninga av Hyrderådet har vore generalsekretæren, styreformann Sverre Dag Ljønes, nestformann Reidar Røyland, styremedlem Arne Lindekleiv og rektor Gunnar Ferstad. I denne perioden er det særleg arbeidet med vegleiingsdokument om «Skilsmisse og gjengifte» og «Menn og kvinners teneste» som har vore lagt på Hyrderådet. Begge tema er utfordrande ved at dei vekkjer sterke kjensler, og derfor har det vore viktig for oss å bruke god tid og få innspel frå ulike personar og fora. Bakgrunnen for å lage desse dokumenta har vore reaksjonar på ImFs syn i forsamlingane våre, og vi har derfor sett det som nødvendig å grundigare inn i argumentasjon og kommunikasjon. Rådet har også arbeidd med råd frå ImF i kyrkjesituasjonen. I samband med offentleggjering av dokumenta, har Sambåndet følgd opp med temanummer og nettdebattar, utan at vi kan seie at det har vakt stort engasjement, men det er vårt håp at nokon har fått hjelp. Som konsekvens av argumentasjon i dokumentet om menn og kvinners teneste, tilrår styret at rådets namn endrast frå Hyrderåd til Lære- og tilsynsråd, og legg dette fram for GF. Samtalefora I tillegg til styre og hyrderåd, har generalsekretæren desse viktige fora for å samtale om teologiske og strategiske spørsmål: Leiargruppa: Denne består av administrasjonsleiar, økonomileiar, personalleiar, medieleiar og leiaren for ImF-UNG. Gruppa samlast som regel kvar tysdag morgon. Misjonsrådet: I januar-møtet møter generalsekretær, krinsleiarane og rektor for Bibelskulen. I mai-møtet utvidast rådet med ImFs leiargruppe, forsamlingsleiarar i minst 50% stilling og forstandarar i ImF Trossamfunn. Forsamlingsrådet: Medlemar her er generalsekretæren og forsamlingsleiarane Glenn Nord-Varhaug, Knut Kvamme og Runar Landro. Sistnemnde leier arbeidet i rådet. Personaldagane: Dette er to arbeidsdagar i august der forkynnarane og tilsette i administrasjonen møtest. Fokus er fagleg påfyll, deling av erfaringar i tenesta og åndeleg og sosialt fellesskap. Generalsekretæren og personalleiaren har ansvar for desse dagane. Rektormøtet: Dette er i samarbeid med NLM og Normisjon, og no er også DELK sine skular kome med. Møtet vert halde over to dagar i starten av februar. Generalsekretærmøtet: Her møtest generalsekretærane for ImF, NLM, NMS, Normisjon, Israelsmisjonen, Søndagsskulen, og NKSS. Samlast to gonger per år. Evangelisk Luthersk Nettverk: Stifta i 2012 av leiarane for ImF, NLM, Normisjon, DELK og Frikyrkja. Formål og innsikt i arbeidet kan ein lese på eln.nu. Arbeidet i nettverket har vore veldig viktig for oss i perioden med tanke på den kyrkjepolitiske situasjonen. ANDRE SENTRALE SAMLINGAR Generalforsamlinga 2013 var lagd til KVS Lyngdal, og vart avvikla på ein god måte av tilsette og frivillige. Hovudsaka var framlegging av ny langsiktig strategiplan, men det vart og lovendring om GF kvart tredje år. Vi fekk gode bibeltimar frå Leif Nummela, og lytte til utfordrande forkynning frå m.a. Irene K. Alnes, Rolf Kjøde, Øivind Augland. Vi hadde med gode ressursar innan song- og musikk, mellom anna var Divisi med heile tida. Med eit godt program på eit flott skuleanlegg, og med bakgrunn i ein omfattande strategiprosess i organisasjonen, hadde vi sett for eit større utsendingstal enn det som var tilfellet. For øvrig vart Sommarstemnet lagt ned i denne perioden. I staden for å samle mykje ressursar i ei bestemt veke under Bibelcampen, noko som også skapte ein del reaksjonar for andre gjestar ved campen, har vi tilført alle fire bibelcamp-veker eit generelt løft med tanke på song- og musikk. Dette har vore godt motteke. Arbeidarmøtet i januar har også denne perioden hatt god oppslutning, og vi har fått gode tilbakemeldingar frå deltakarane. Vi trur denne samlinga er enormt viktig for å gje den enkelte fagleg og åndeleg utbytte, for å bygge gode relasjonar mellom ulike greiner i misjonen, og for å bygge identitet i organisasjonen. Arbeidarmøtet inneheld også den store Arbeidarfesten, der det kjem vel 250 gjestar som på ulikt vis har tilknytning til ImF og Bibelskulen. Singing in the city og Song- og musikkhelg på Furutangen Dette er helge-arrangement der ein tilbyr ein pakke med mykje evangelisk song og musikk og forkynning. I denne perioden har SITC vore lagt til Sandnes, Valderøy og Karmøy. Forkynninga har misjonens eigne tilsette stått for, medan songarar og musikarar er henta frå inn- og utland. Økonomi har vore i balanse for SITC, og Song- og Musikkhelga på Furutangen har gitt fine overskot. Styret er særleg takksam til Johan Halsne som har vore primus motor for desse arrangementa. 4

Seniorarbeid «Bibel og Fellesskap 55+» i juni på Bibelskulen har hatt stabilt god oppslutning, og får gode tilbakemeldingar frå deltakarane. Det som før heitte «55+» under Lyngdal Bibelcamp, kallar vi no berre Kveldsopent. Det gjer at alle «godt vaksne» kan kjenne seg inkludert i tilbodet, og dette er blitt godt tatt imot. Vi er glade for at også fleire krinsar og lokale forsamlingar set seniorarbeidet på dagsorden med regionale og lokale eldresamlingar. Påskemøte på Bibelskulen Etter nokre års pause, arrangerte vi på nytt møter i påskehøgtida på Bibelskulen. Dette er gjort i samarbeid med krinsar og forsamlingar i nærområdet. Det er viktig for oss å legge til rette for samlingar der bodskapen om den krossfeste og oppstadne Jesus Kristus vert forkynt i vår største høgtid. Kvinnefest på Bibelskulen Dette arrangementet har vore eit fast innslag i første del av mai dei siste åra, og samlar mange kvinner i nærområdet. Kvinnefesten vert arrangert i samarbeid med Bergens Indremisjon og Bibelskulen vår. VIKTIGE ARBEIDSOMRÅDE Forkynnarog forsamlingsarbeidet ImF sitt motto: Med Guds Ord til folket, vert på ein særleg måte forvalta av forkynnarane våre. Dei er trufaste i arbeidet med å forkynne evangeliet rundt om i krinsar og forsamlingar. Forkynnarane gir uttrykk for at dei merkar at den kristne kunnskapen er meir og meir på retur i folket. Samtidig ser ein store skilnader lokalt; nokre forsamlingar blir færre, men det er også eksempel på at forsamlingar veks. Dette særlig der enkeltpersonar, gjerne unge, går saman og på ulikt vis satsar nytt. Dette kan vere både gjennom ein kombinasjon av fellessamlingar på bedehuset og ulike husgrupper, eller fornying av møta. Utviklinga med at det blir mindre samanhengande møteverksemd held fram. Mange stader satsar ein i all hovudsak på møter søndagen. Det er vanskelegare å samle folk til møter og enkeltmøter i vekedagar. Men det skjer framleis at møteveker og evangeliske aksjonar samlar mykje folk, og av og til blir møteserier forlenga. Erfaring syner at dette kan samle folket og styrke fellesskapet mellom dei som går på bedehuset, gjerne på tvers av generasjonane. Vi gler oss særlig over at også denne perioden har vi opplevd at nye har blitt kristne, og at det har skjedd fornying i fellesskap og forsamlingar. Vi registrerer også ein stille bønnevekkelse fleire stader. Når større eller mindre grupper samlast til bønn, får det konsekvensar for fellesskapet, for dei som tek del og for evangelisering og misjon. Fleire har teke imot Jesus gjennom dette arbeidet. Gjennom forkynnararbeidet vil ein gjerne vere med å stimulere til vidare forbønn og systematisering av bønnearbeidet. I tillegg til arbeidet på bedehusa, vert det gjort eit omfattande forkynnararbeid på skulane våre. Det er flott å oppleve at unge blir bevart, veks i trua og at nye tek imot Jesus! Frå vår side er yngre forkynnarar og ImF team særlig aktive her. Vi gler oss også over forkynnarteneste utanom bedehuset. Mange møter evangeliet gjennom å laste ned talar på nett, via nærradio, Lyngdal Bibelcamp, P7 og Si-reiser. Gud har kalla oss til å dele evangeliet med folket, og vi er opptekne av å bruke ulike kanalar for å gjere det. Det har vore ein del utskifting i forkynnarstaben. Johan Halsne og Andreas Evensen har gått over til arbeid i krins, og andre som Ruben Lie Monsen, har avslutta tenesta i ImF. Vi har i perioden leigd inn unge forkynnarar, Håkon Garvo og Marie Hornnes (Lode). ImF gjekk i bresjen for å arrangere konferansen «Lev Livet» i Sandnes hausten 2013, og fekk med oss nokre andre organisasjonar på det. Fokuset var trusformidling i heimen, noko som er punkt to i vår strategiplan. Konferansen samla vel 300 deltakarar, noko vi var brukbart nøgde med, men økonomisk vart dette litt tungt for ImF. Avviklinga gjekk kjempebra all ære til ImF Sandnes for det. Innhaldet var også stort sett bra, og «det amerikanske trekkplasteret» George Barna si undervisning var grundig og god. Undersøkinga som NLA arbeidde fram gav oss nokre signal om korleis situasjonen er i Norge. Under konferansen fekk vi styrka eit kontaktpunkt med organisasjonen Awana, noko som har ført til at vi er i ferd med å få nye og gode ressursar i barne- og ungdomsarbeidet vårt. I perioden har vi arrangert fleire regionale forsamlingsdagar, noko som vert positivt motteke, og som gjer at det skjer knoppskyting i forsamlingsarbeidet. I tillegg til dette, oppsøkjer forsamlingskonsulent Runar Landro krinsar og forsamlingar for å gje råd og hjelp. Mange stader er det fleire organisasjonar som er involvert i arbeidet på Bedehuset, og det kan oppstå spenningar når nokon vil ha endringar i arbeidet. Felles forsamlingsbygging med andre organisasjonar er noko ImF har oppmuntra til, men ofte kjem ein ikkje vidare fordi ein ikkje finn ut av måten å organisere på. Ein felles komité vart derfor nedsett med medlemer frå ImF, NLM og Normisjon, og denne la fram sitt arbeid på nyåret 2016. Det er vårt håp at dette kan gje gode modellar for korleis ein kan bygge felles forsamlingar. Organisasjonane si betyding må aldri verte viktigare enn forsamlinga si betyding. Skule- og barnehagearbeidet Det er generalsekretæren som representerer ImF i vårt årlege rektormøte som vi arrangerer saman med NLM, Normisjon og DELK. I tillegg møter personalleiar og leiar for ImF- UNG. Dette er eit viktig møtepunkt, og vi har eiga samling med ImF-rektorane. I denne perioden har Danielsen Skular starta opp ein ny ungdomsskule på Karmøy, slik at stiftinga no driv åtte skular. Då det er behov for betydelege ressursar for å gje alle skulane best moglege lokale, er stiftinga i ein konsolideringsfase. Det er også svært gledeleg at Sunnmøre Indremisjon har starta ein ny grunnskule i Skodje kommune. KVS Lyngdal har bygd nytt internat, nytt uteområde, nye kontorlokale, nytt kjøkken og utvida matsal. Eit flott skuleanlegg er blitt enno betre, og er også betre egna for vår bibelcamp om sommaren. Framnes KVS vil ha klar sin nye hall neste vår, noko som vil bety eit stort løft for denne viktige skulen. Hallen vil ha tilsvarande fasiliteter som KVS Lyngdal sin. Molde Friskule (tidlegare Romsdal Friskule) sleit ei stund med låge elevtal, men gjorde eit vellukka grep med å inkludere barnetrinnet, og har dermed «kome seg over kneika». Dei siste par åra har også KVS Bygland sine elevtal våre lågare enn det som er forsvarleg for langvarig drift, men også her ser ein negativ trend ut til å vere snudd, og det er ei stor lette og eit bønesvar. Ny idrettslinje kjem i gong frå komande haust, og det vil nok gje breiare grunnlag for elevrekruttering. Uforståelege krav frå skattekontoret om å tilbakebetale mva-refusjon er ei bekymring, men vi er takksame for å ha ein organisasjon som Kristne Friskolers Forbund i ryggen når slikt skjer. Egill Danielsen Stiftelse er i ei konsolideringsfase etter oppstarten av fleire skular for nokre år sidan. Det er gjort store investeringar i skuleanlegg, og meir er i kjømda. Omstrukturering av skulestyra vil gje oss som eigarar utfordring i å skaffe mange nye styremedlemer, men det er eit naudsynt grep for ei verksemd som har hatt kraftig vekst. Det å skaffe kvalifiserte styremedlemer til skulane våre er for øvrig noko som generelt er utfordrande, men vi i administrasjonen har gjort grep dei to siste åra for å kome tidleg i gong med rekrutteringsarbeidet. 5

Elles vil ImF arrangere ein stor leiarkonferanse i 2017, i staden for Arbeidermøtet. Det er vårt håp at dette skal vere aktuelt for tilsette ved skulane våre å vere med på, og ikkje minst håper vi at vi skal få nytte ein del av kompetansen frå skulane i undervisning av leiarane i indremisjonsarbeidet. Utforming av program vert gjort no i mai. Vi har kvart år fornya søknaden om å starte ein ny folkehøgskule for 16-åringar, og Folkehøgskulerådet har no sett denne øvst på si prioriteringsliste. Så langt har ikkje skifte av politisk farge i Undervisningsdepartementet frå mørkeraud til mørkeblå gitt oss noko anna signal enn før, men vi lever enno i håpet. Når det gjeld barnehagane, må vi dessverre melde om at vi med noverande bemanning ikkje er i stand til å følgje opp desse slik vi skulle ønskje. Det er ingen barnehagar som er direkte eigde av ImF sentralt, men vi skulle gjerne gitt faglege samlingar som også kan styrke samhald og identitet. Ein av våre barnehagar er lagd ned i perioden, og nokre slit nok med tronge kommunale rammetilskot. Likevel er det vårt inntrykk at drifta generelt er god, og eit par barnehagar har bygd ut, eller planlegg nybygg/utviding. ImF Trossamfunn ImF Trossamfunn vart oppretta for å gje eit tilbod om kyrkjerettsleg registrering gjennom indremisjonen, samstundes som ein ikkje skulle profilere dette på ein måte som skal binde folks samvit i spørsmål om kyrkjemedlemskap. Talet på medlemer pr 31.12.2015 var 418, det vil seie ca 100 nye medlemer på tre år. I snitt har vi hatt 7-8 vigslar i året. Ein informasjonsfoldar er blitt laga, og vart sendt ut til våre kontakter mot slutten av 2015. Vi har no sju forstandarar: Erik Furnes, Gunnar Ferstad, Frank Rott, Andreas Evensen, Jørgen Tønnesen og Runar Landro med vigselsrett i heile landet, og Glenn Nord-Varhaug med vigselsrett i Hordaland. Vi har heller lite arbeid med å administrere trussamfunnet. Den statlege delen av det offentlege tilskotet går til drifta sentralt, medan den kommunale delen går til det lokale ImF Trussamfunn: arbeidet som kvar enkelt medlem ønskjer å støtte. Nedanfor er nokre nøkkeltal for trussamfunnet: ImF Media ImF Media produserer bladet Sambåndet på papir og som e-blad og driv nettstaden sambåndet.no. Avdelinga lagar dessutan brosjyrar, plakatar og anna grafisk materiale for arrangement både sentralt og for krinsar. ImF Meida kan og tilby hjelp til nettsider. I tillegg sel ein tenester til eksterne aktørar, og fleire bøker for Sambåndet Forlag får grafisk formgjeving på avdelinga. ImF Media sørgjer også for at Sambåndet og Indremisjonsforbundet er til stades på sosiale medier, så som Facebook, Twitter og Instagram. Bladet Sambåndet kjem ut med 12 nummer per år, og det er per i dag fire krinsblad som er integrert. Her er det mogleg for fleire å slutta seg til. Petter Olsen vart fast tilsett i stillinga som medieleiar i august 2014 då Torgeir Hauge sa opp etter at permisjonstida var over. Staben er elles sett saman av journalist/informasjonsmedarbeidar Vilhelm Viksøy og mediegrafikar Ole-Jacob Ebbesen. Avdelinga vart styrka med grafikar Beate Augestad i 50% stilling frå sommaren 2014. Ho sa opp etter vel eit år grunna giftarmål og flytting. Brit Rønningen har vore knytt til avdelinga som journalist frå sommaren 2014. Grafikar Cathrine Rane kom inn frå sommaren 2015 og er tilsett i 50 prosent stilling. NAV gjev støtte til inntil 100% stilling på avdelinga. Utanom dette er Kjetil Fyllingen leigd inn for å ta hand om nettevangeliserings-konseptet omgud.net og hvorforjesus.net. I perioden er dette styrka med mystory.me, og hvorforjesus-kurset er fornya. Personalarbeid Personalarbeid tek stadig større ressursar. Ein har halde fram med å organisere grupper der tilsette i organisasjonen saman med tilsette i andre organisasjonar kan få tilbod om å vere med i vegleiingsgrupper (ABV). Ei eiga gruppe for krinsleiarane og generalsekretæren har fungert godt i heile perioden, og det er etablert gruppe også for tilsette forsamlingsleiarar. Elles er personalleiaren ein ressurs på personalspørsmål og nytta inn mot ulike personalsamlingar i krinsar og skular. Ho har personalansvar for forkynnarane, har ansvar for reiserute-planlegging, er fagperson i vårt arbeid med å førebygge og handtere seksuelle krenkingar. Vi må dessverre melde om at koordineringsgruppa for seksuelle krenkingar har måtte handsama tre saker i perioden. Sakene vert handsama i tråd med retningslinjene, og som vanleg krev dette mykje tid og tankeverksemd, og er tappande for alle involverte. Det var gjennomført ei ny medarbeidarundersøking vinteren 2014/2015 for å få eit best mogleg bilde av personalsituasjonen i forbund, krinsar, leirstader, forsamlingar, etc. Dette gjev oss mogleg hjelp til å bli betre på å ta oss av våre tilsette. Personalarbeidet vert leia av personalleiar Aud Karin Kjølvik Ringvoll. Ho har 80% stilling, i tillegg til at ho er arbeider i forsamlinga på Flekkerøy i 20% stilling. Administrasjonen Økonomiavdelinga har vore samansett av Ingebrigt Sørfonn som økonomileiar fram til 31/5-2013 i 100% der 20% var som forkynnar, rekneskapsleiar Edith Molland i 100%, rekneskapsfullmektig Anne Karine Lauvrak i deltidsstilling og med svangerskapspermisjon frå mai 2015, rekneskapsmedarbeidar Marit Dåvøy Natås i 70% stilling frå 1/2-2015 og rekneskapsmedarbeidar Solveig Ådlandsvik i ulik prosent. Trond Gjøvåg har vore økonomileiar frå 1/3-2014 og ut 2015. Økonomileiar har ivaretatt det overordna ansvar for økonomi, og kontakt inn mot kundar og revisor. I tillegg har denne også hatt overordna ansvar for budsjettarbeidet i samarbeid med dei ulike avdelingsleiarane, generalsekretær og ImF - styret. Denne har også hatt ulike styreverv. Økonomi og rekneskapsavdelinga har hatt ansvar for å føra rekneskap for oss sjølve og ca 20 eksterne kundar. Kontoravdelinga har vore samansett av Anja S. Ulveseth Heggen som administrasjonsleiar i 70-100% prosent, Kari Anne Hetland Huse som kontorleiar i 80-100%, Solveig Kopperud som kontorfullmektig i deltidsstilling samt Øyvind Angelskår som IT- leiar i 100%. Årstal Statleg tilskot Kommunalt tilskot (sendt vidare til lokale lag) Netto årsresultat 2013 134.196 195.855 84.440 337 2014 150 415 208.715 115.192 377 2015 179.820 245.433 121.500 422 Medlemer ved årets slutt IT-leiar Øyvind Angelskår har teke seg av den daglege drifta av den fellesløysinga som ImF, Bibelskulen og krinsane har etablert. Administrasjonsleiar har mellom anna ivaretatt avtalar og oppfylgjing av ulike samarbeidspartnarar, vore sekretær for programarbeidet på Lyngdal bibelcamp, oppfylgjing, sal og oppussing av ulike eigedomar, ansvar for 6

Bibel og Fellesskap 55+, sekretær i Løns- og personalutvalet (LPU) og Evangeliseringsfondet og styreverv for Si-REISER. I tillegg var administrasjonleiar fungerande dagleg leiar medan generalsekretæren hadde 1,5 mnd studiepermisjon hausten 2015. Vi er takksame for gode medarbeidarar som er positive og fleksible i ein til tider hektisk arbeidskvardag. Stillingar På sidene 36 og 37 finn ein oversikt over tilsette i ImF sentralt, og kva stillingsstorleik den enkelte hadde ved utgongen av 2015. Vi er takksame over å ha dugande og arbeidsvillige tilsette, både i administrasjonen og mellom forkynnarane. Konkrete saker Styret har handsama 71, 57, og 64 saker i desse tre åra. Protokollane vert delt med krinsane våre, og nokre saker av allmenn interesse vert kommentert i Sambåndet. Vi har her plukka ut nokre slike saker: Kyrkjesituasjonen: Denne treårsmeldinga vert skriven i det Den norske kyrkja nett har gjort eit historisk vedtak om kyrkjeleg vigsel for likekjønna par. ImF har sendt ut ein lengre uttale med tre råd i den aktuelle situasjonen, og slik sett kommenterer vi den ikkje meir her, men dette har vore ei enkeltsak som har hatt mykje fokus i ImF og i ulike fora der vi har møtt. Likevel er det vårt eige arbeid og misjonsoppdrag som skal ha mest fokus. Midt i ei turbulent tid, treng vi å minnast Jesu ord til sine læresveinar: «Lat ikkje hjarta dykkar uroast. Tru på Gud og tru på meg!». Herren har kontrollen, og vi må feste vårt blikk på han som er trua sin opphavsmann og fullendar. Der er kraftkjelda til eit heilagt liv. Planting og sending: I mars 2014 vart den store DAWN-konferansen halden i Oslo, der tema var planting av nye forsamlingar i Norge, og sending av kristne til stader der det er lite kristen verksemd. Takka vere stort engasjement i våre største forsamlingar, hadde ImF den største representasjonen med 115 delegatar. Vi har også hatt dette som hovudtema under Arbeidarmøtet og i Misjonsrådet. Styret var open for å tilsette ein person i halv stilling som kunne ha dette feltet som si arbeidsoppgåve, men vi har ikkje lukkast å rekruttere her. På grunn av ei testamentarisk gåve i 2014, kunne vi derimot vere med å løne tre arbeidarar som ville flytte til Vest- og Aust-Finnmark, og det er vårt håp at fleire vil gå på Jesu kall til å vere misjonærar i vårt eige land. Kvinnenettverk: Styret har sett det som viktig at det vert arrangert møtepunkt der kvinner kan kome saman for å samtale om misjons- og forsamlingsarbeid ut frå sin synsvinkel. Vi er ein organisasjon som kommuniserer eit visst skilje mellom menn og kvinners teneste, og då er det viktig for oss at begge kjønn får frimod til å virke som forkynnarar og leiarar ikkje minst dei unge. Personalleiar har arrangert slike nettverkssamlingar på Brusdalsheimen (Sunnmøre), på Bildøy Bibelskule, og på Audnastrand (ImF Sør). Generalvedlikehaldet på Bibelskulen starta opp våren 2013, og vert kommentert i skulen si årsmelding. Som skuleeigar er vi svært takksame for personalet, styret og ikkje minst alle gjevarane som har gjort det mogleg å kome i mål med eit så stort prosjekt. Sjølv om ein del vedlikehaldsarbeid står att på hovudbygget, er det ikkje tvil om at anlegget står betre rusta enn på mange år. Leigeavtalen mellom ImF og skulen er endra, slik at skulen sjølv no har alt ansvar for drift og vedlikehald av anlegget. Bergen Kristne Bokhandel: Etter nedlegginga av Vestbok og salet av eigendomen Vetrlidsallmenning 1 i Bergen, var Norges nest største by utan kristen bokhandel i to år. Så kom eit initiativ frå Johannes Kleppa og Tarald Ueland om å starte bokhandel basert på driftsmodellen til gjenbruksbutikkar, det vil seie bruk av mykje frivillig arbeidskraft. ImF ønskte ikkje å verte hovudaksjoner denne gongen, men vi gjekk inn med 100.000 i aksjekapital. I tillegg gav vi kr 250.000 i gåve, kr 250.000 i rentefritt lån, og gratis rekneskapsføring i tre år. Vi gleder oss over at bokhandelen har hatt ei positiv utvikling etter starten hausten 2015. Straume Forum: Det nye forsamlingsbygget til Brattholmen Indremisjon (no ImF Straume) er i sluttfasen, og vi ser fram til å flytte inn i nye lokalar i løpet av august 2016. Som tidlegare vedteke så har ein seld administrasjonsbygget på Søre Bildøy for å vera med å realisera eit forsamlingsbygg sentralt på Straume. Fjell kommune vart ny eigarar av ImF sitt tidlegare administrasjonsbygg hausten 2014, og administrasjonen har fått disponera 1.etasje fram til ein flyttar til Straume Forum. Vi har stor tru på at det nye forsamlingsbygget er eit godt reiskap til å gjera Jesus kjent i eit område som er i stor vekst. Vedlikehald av Bibelskulen og sal av personalbustader: I denne perioden er det blitt veldig tydeleg for oss at etterslepet i vedlikehaldet av Bibelskulen no er så stort at det krev eit skikkeleg løft. Anslaget for prosjektet er 20 million, pluss meirverdiavgift. For å kome i mål med dette, må vi selje ein del av personalbustadane ved skulen, og vi har hatt eit krevjande arbeid med omregulering for å realisert sal. Vi har no god von om å kome i mål med dette før sommaren 2016. Bedehus i Finnmark: Misjonen eig nokre Bedehus i Finnmark, og grunna mangel på lokale misjonsvener som kan ta vare på desse husa, har vi ikkje anna val en å selje. Bedehuset i Bjørnevatn er lagd ut for sal, men det har vore lite interesse så langt. Betania Laksevåg: Eigedomen Betania på Laksevåg (Bergen) trengte ei omfattande renovering av 4.etasje. Der har ein i mange år leigd ut hyblar til studentar. Vi starta opp arbeidet med dette i oktober 2014 samarbeid med byggmester Valde. Dette vart ferdigstilt i april / mai 2015. Sjølve oppussinga blei høgare enn budsjettert (nærare 5 millionar kroner), men då har hybelkomplekset med 10 hyblar, felles stove, eit stort kjøken og eit mindre te-kjøken, stort sanitæropplegg, moderne ventilasjonsanlegg, nytt elektrisk anlegg, nye varmekjelder og godkjent vaskerom ein såpass høg standard at ein er konkurransedyktige i høve til leigemarknaden i Bergen og omegn både på pris og kvalitet. Eigedomen er no verditaksert til kr 12 million. Vi leiger fyrst og fremst ut hyblane til studentar som er tilknytta Bergen Indremisjon (BI). Vi har ein visjon om å skapa eit studenfellesskap som utover det å leige hybel også vert med i eit utadretta arbeid til folket på Laksevåg. Torgeir Skrunes er tilsett i ein prosentstilling i BI for å ivareta dette arbeidet og han og kona Ragnhild er også bestyrarar for heile bygget. Dei bur i leilighet i Betania og er tett på studentane. Ein ynskjer at alle hyblane skal bli fylt opp av studentar som vil realisera visjonen, men dersom det ikkje lukkast leiger ein ut til andre aktuelle. Revidering av Lov for ImF: Etter siste generalforsamling har styret gått gjennom dei ulike paragrafane i Lov for ImF, og dette var lagt fram for Rådsmøtet i februar 2016. Ytterlegare justeringar er gjort etter det, og forslag vert no lagt fram for Generalforsamlinga. Debatt om NLA sin basis: Gjennom avisa Dagen kom det frå tre ungdomar kritikk mot det bibelsyn som nokre av lærarane ved NLA forfektar. Sjølv om innlegga var svart/kvitt og til dels sarkastiske, var det all grunn til å ta debatten på alvor. Når vi ser korleis eit bibeloppløysande syn har undergrave samlivsetikken i Den norske kyrkja, er det vår plikt som eigar å kjempe for eit konservativt bibelsyn ved vår eigen høgskule. Vi har hevda vårt syn under arbeidet med revidering av høgskulens basisdokument, og det er ein prosess som ikkje er sluttført. Økonomien Vi må erkjenne at gåveinntekter, fast gjevarteneste og testamentariske gåver ikkje viser nokon positiv trend for indremisjonsarbeidet. Vi har mange trufaste gjevarar, men det er utfordrande å synleggjere for nye generasjonar at både forsamling, krins og forbund treng midlar for å kunne utføre sitt misjonsoppdrag. Dei tre årsresultata vert i stor grad prega av nokre store transaksjonar som gjev store 7

utslag i negativ og positiv lei, og dermed «forstyrrar» bildet av den normale driftssituasjonen: Sal av Vetrlidsalmenning 1, sal av Administrasjonsbygget, investeringa i Straume Forum, realisering av fondsplasseringar, generalvedlikehaldet ved Bibelskulen, renovering av Betania Laksevåg, omregulering av personalbustader, etc. Innkomne testamentariske gåver er ikkje avsett, men nytta direkte i misjonsretta tiltak som vi ser er aktuelle. Likvide midlar er i stor grad lånt ut til skuleanlegg som har hatt kapitalbehov ved utbygging/vedlikehald (KVS Lyngdal og Bibelskulen) og til dels også drift (KVS Bygland), eller investert i bygningsmasse der vi har/får leigeinntekter (Betania Laksevåg og Straume Forum). Med dei låge renteinntektene som vi får i dag, har det altså vore styret sin politikk å la likvide midlar kome til nytte der det har vore behov. Krinsar og forsamlingar betalar misjonstilskot til ImF for forkynnartenester og andre fellesoppgåver. Prosentsatsen har vore tema frå ImF si side ved fleire høve, men det har ikkje vore signal om å redusere denne. Likevel har to krinsar sett det som naudsynt å gå ned på tilskotet på grunn av den økonomiske situasjonen den eine midlertidig og den andre sannsynlegvis permanent. Dette gjer det naudsynt å ta ein ny runde om dette. For oss har det vore viktig å kommunisere at krinsane og forsamlingane skal få den sentralorganisasjonen dei sjølve har bruk for. Styret har i perioden innvilga stønad til fleire enkeltprosjekt. Her er nokre døme: Lønsmidlar til ungdomsarbeidarar i Finnmark ca kr 850.000 Etableringsstønad til ny barne- og ungdomsskule i Skodje Kommune - kr 150 000. Tilskot til Fredheim Forsamling for å utarbeide nye ressursar i barne- og ungdomsar beidet vårt kr 100.000, pluss 20% stilling i eitt år. Tilskot til KVS-Bygland for å løne to miljø arbeidarar skuleåret 2015/2016 ca kr 200.000 Aksjekapital, gåve, samt rente- og av dragsfritt lån til Bergen Kristne Bokhandel kr. 600.000 Stønad til Damaris for å gjere deira ressursar tilgjengelege for alle våre lag kr 66.000 per år. Nøkkeltal For driftsåret 2013 var det budsjettert med overskot på kr 17. Driftsresultatet vart på kr 1.596 og totalresultatet på kr 10.887. Dette skuldast netto-resultat etter sal av aksjar i Vetrlidsalmenning 1 AS på 9.643, testamentariske gåver på 1.759, og verdiauke på marknadsbaserte på 1.188. Desse postane var utan budsjett. Det var gitt konsernbidrag til Bibelskulen på 2.600. For driftsåret 2014 var det budsjettert med eit underskot på kr 267. Driftsresultat vart kr 856, og eit resultat etter finans på kr 1.369. Det vart gitt eit konsernbidrag til Bibelskolen på kr 4.500, så det endelege resultatet synte eit underskot på kr. 3.130 For driftsåret 2015 var det budsjettert med eit underskot på kr 267. Driftsresultat vart kr 8.409, og eit resultat etter finans på kr 9.142. Her gjer gevinst ved sal av Administrasjonsbygget eit stort utslag med kr 11.891, men også forskotering av vedlikehaldsmidlar til Bibelskulen speler inn. Desse siste midlane skal hentast inn ved sal av personalbustader våren 2016. Når det gjeld ImF sitt konsernrekneskap, viser me til eiga oppstilling. Samarbeid med andre Utanom det ImF har mannskap til å arbeide med sjølv, er det ein stor rikdom å stå saman med andre arbeidslag. Per i dag er ImF medlem eller aksjonær i følgjande: Familie & Medier Norsk organisasjon for misjon og evangelisering (NORME) Blå Kors Si-REISER (24% av eigedomselskap og 19% av driftsselskap) Kristen Riksradio / P7 Menneskeverd Nordisk Indremisjonsråd GuttogJente.no Til Helhet Kristeleg pressekontor (KPK) ImF ønskjer å følgje opp sine medlemskap og aksjonærpostar så langt våre ressursar strekk til, og vi må også evaluere om desse tiltaka er ei forlenging av vårt kallsoppdrag. Takk Takka rettar vi først til Herren, Han som tiltrudde oss kallet, gav si kraft til tenesta, og stått ved sine løfter. All ære til Gud! Vi takkar misjonsfolket som har vist oss tillit og omsorg i offer og bønn, og som har stått med i kallet. Vi takkar kvar kvinne og mann, ung og eldre, som trufast står med i arbeidet rundt i landet. Vi takkar alle medarbeidarar sentralt, i krinsane og forsamlingane, barnehagar, skular, institusjonar og lokalt for dyktig arbeid, trufast teneste, og samfunn i arbeidet for evangeliet. Takk også til ektefellar og familiar som deler kallet. Vi takkar alle samarbeidspartnarar rundt i landet og i Norden som vi har fått dela kall og teneste med. Vi helsar alle med ordet i Sef 3:17 Herren din Gud er hjå deg, ei kjempe som kan frelsa. Han gleder og frydar seg over deg, tek deg atter inn i sin kjærleik. Han jublar over deg med fryd, Sverre Dag Ljønes (formann) Reidar Røyland (nestformann) Arne Lindekleiv (medlem av hyrderådet) Anne Bente Klokk Svendsvik, Odd Asbjørn Nybø Vegard Soltveit Marit Hauge Gudmund Furnes (1 vara) Anne Ma Timenes (2 vara) Erik Furnes (generalsekretær) 8