saksframlegg Dato: Referanse: Vår saksbehandlar: 15.08.2019 91356/2019 Heidi Nerland Saksnr Utval Møtedato Samferdselsutvalet 04.09.2019 Alternativ tilrettelegging for syklistar ved innføring av sykkelforbod gjennom fv. 62 Øksendalstunnelen Bakgrunn Etter ein gjennomgang av trafikksikkerheita for mjuke trafikantar i tunnelane langs riks- og fylkesvegnettet i Møre og Romsdal, sendte Statens vegvesen (SVV) forslag om innføring av forbod for gåande og syklande i fem tunnelar i fylket ut på høyring. Ein av tunnelene det er foreslått innføring av forbod i er Øksendalstunnelen på fylkesveg 62 i Sunndal kommune. På bakgrunn av høyringsinnspel og risikovurdering anbefaler Statens vegvesen at det vert innført forbod for gåande og syklande gjennom Øksendalstunnelen, men at det samtidig vert tilrettelagt for sykling i sommarhalvåret langs gamlevegen over Vettamyra/Svinberget. Denne løysinga tar i vare syklistane på ein tilfredsstillande måte, både med tanke på framkomme og trafikksikkerheit. Gamlevegen må settast i stand før ei slik løysing kan realiserast. Denne saken tar for seg forslag til ansvarsforhold mtp eigeforhold og framtidig drift av vegen som sykkelveg om sommaren. Notat frå Statens vegvesen er vedlagt saken. Kort om innspel frå høyring: Sunndal kommune støttar forslag om forbod for gåande og syklande gjennom Øksendalstunnelen, men poengterer at syklande må sikrast tilkomst til Sunndal ved alternativ sykkelrute. Kommunen skriv: «Sunndal kommune har i mange år lagt godt til rette for syklister og profilert seg som en sykkelkommune. Sikkerheten for syklende og gående er et viktig tema, og kommunen støtter vegvesenet i forslaget. Kommunen mener likevel at alternativ sykkelrute bør prioriteres. Ved å ikke skilte en alternativ omkjøringsvei for syklister mister Sunndal enda en transportmulighet. Opdølstrandtunnelen er per i dag stengt for syklende og de må på eget ansvar sykle gamleveien. Denne er rasutsatt og stedvis ødelagt. Når Øksendalstunnelen blir stengt, reduseres mulighetene for daglige transportreiser med sykkel, og muligheten for syklister å oppleve Sunndal. Det er flere og flere som ønsker å sykle, også ofte på lengre strekninger mellom tettsteder. Det er da problematisk når Sunndal blir blokkert på grunn av at det ligger tunneler på to utfartsårer.»
Politiet er einige i forbod, men at det samtidig må leggast til rette for sykling langs gamlevegen. Om forbod vert innført utan kompenserande tiltak, vil ei slik regulering ikkje hindre at syklistar vil bryte forbodet jf. Opdølstrandtunnelen. Det vil vere utfordrande for politiet å handheve forbodet dersom kompenserande tiltak ikkje kjem på plass. Syklistenes landsforening og Forum for natur og friluftsliv i Møre og Romsdal vil begge går imot å innføre forbod i tunnelen utan at det samtidig vert lagt til rette for sykling langs gamlevegen. Statens vegvesen sin vurdering: Risikovurdering utført av Trafikksikkerhetsseksjonen på Regionvegkontoret i 2015, samt høyringsinnspel frå kommune og politi, er samstemte i at det av omsyn til trafikksikkerheit bør innførast «forbod for gåande og syklande» i Øksendalstunnelen. Alle høyringsinstansane peiker likevel på at det er viktig at det samtidig vert lagt til rette for sommarsykling langs gamlevegen på utsida av tunnelen. Ei slik tilrettelegging er også eit krav i Handbok N300 «Trafikkskilt» del 3 der det står at ved innføring av forbod for gåande og syklande skal det sikrast at det er tilfredsstillande alternativ rute på strekninga, og at ruta skal vere skilta dersom det ikkje er klart kor den går. Omsynet til gåande og syklande er også omtalt i Veglovens 3.7, kor det står at «Ved planlegging og utbygging av vegnettet skal det fastlegges hvordan gang- og sykkeltrafikken skal avvikles.» Det siste gjeld ved planlegging og utbygging av vegnettet, men det vil uansett ligge til grunn at gåande og syklande skal kunne «ta seg frem» også langs det eksisterande vegnettet. Det kan vere vanskelig å innfri ønske og forventningar til at vegnettet skal vere tilgjengeleg for alle. I denne saken ser Statens vegvesen (SVV) likevel at man med relativt små midlar kan legge til rette for sommarsykling langs gamlevegen, og meiner dette er noko man bør strekke seg for å få til. Fleire alternativ har vore vurdert (jf. vedlagt notat frå SVV), men tilrettelegging av sommarsykling på gamlevegen er det einaste alternativet som tar i vare dei syklande på ein tilfredsstillande måte, både med omsyn til framkomme og trafikksikkerheit. Tilrettelegging langs gamlevegen: SVV har gjennomført synfaring langs gamlevegen saman med geolog og leiar av driftskontrakt. Vegen ber litt preg av manglande bruk og vedlikehald, men den er likevel i relativt god forfatning. Det ligger noko stein/steinblokker i vegbanen etter steinsprang, asfalten er skada nokon stader av same årsak, og nokon stader er rekkverket skada/borte. Det er også ein del vegetasjon ved og over vegbanen som må fjernast, og nokon stader er asfalten mosegrodd. I tillegg har geologane vurdert faren for nye steinsprang, og eit par stader langs strekninga må det gjennomførast fjellrensk før ein eventuelt kan tillate sykling her. (Det er og anbefalt at det t.d. før opning kvart år blir gjennomført synfaring av geolog for å vurdere behov for ytterligare fjellrensk.) For å sette vegen i god nok stand til å kunne tillate sommarsykling er det estimert ein eingongskostnad på ca. kroner 500 000,- for å klargjere vegen, samt ein årleg vedlikehaldskostnad på ca. kroner 25 000,-. Kostnadane er spesifisert i vedlagt kostnadsoverslag.
Eigarforhold: Mellom Sunndal og Øksendal er første del av strekninga kommunal veg og i daglig bruk. Frå der den kommunale vegen stoppar (avgravd og sperra med store steinblokker), og fram til båthamna i Øksendal er det Staten som er grunneiger. Dette som ein følge av at vegen var nedlagt som offentleg veg då forvaltningsreforma kom, og dermed ikkje overført til fylkeskommunen. Det vil seie at SVV er grunneigar, men at vedlikehald og bruksrett er privat (open for allmenn ferdsel). Strekninga frå båthamna i Øksendal og fram til X fv. 62 er kommunal veg.
Eigedomsseksjonen i SVV har skissert eit forslag om å overføre vegen vederlagsfritt til Sunndal kommune ev. om det er aktuelt om fylkeskommunen overtar denne vegstrekninga. Vurdering Av omsyn til trafikksikkerheit er det eit klart behov for å innføre forbod for gåande og syklande gjennom Øksendalstunnelen. Samtidig er det viktig å legge til rette for alternativ rute for syklistar om sommaren. Om ikkje vil tilkomsten til Sunndal kommune vere «stengd» for syklistar frå to innfartsårer sidan Opdølstandtunnelen har eit slikt forbod. Ved innføring av forbod er det fylkeskommunen som eigar av fv. 62 som vil mangle eit tilbod for gåande og syklande langs sitt vegnett. Fylkeskommunen har dermed eit ansvar for å sørge for tilrettelegging av alternativ rute. Samtidig er Statens vegvesen eigar av den delen av gamlevegen som må settast i stand for å opprette eit tilbod til syklistar i sommarhalvåret. Sunndal kommune har også interesse av at det vert lagt til rette på denne strekninga, og er dessutan eigar av tilstøytande vegnett. Det vil ikkje vere naturleg eller hensiktsmessig for fylkeskommunen å overta ei kort vegstrekning med kommunal veg på begge sider. Fylkesrådmannen meiner det er mest hensiktsmessig at denne biten vert overført vederlagsfritt frå Staten til Sunndal kommune. Som grunneigar må Staten gjere minimumsoppgardering av strekninga før den vert overført. Som det går fram av kostnadsoverslaget frå SVV er dette snakk om ca. kroner 500 000,-. Sidan fylkeskommunen har eit ansvar for å sørge for tilrettelegging for syklistar når det vert innført forbod i Øksendalstunnelen på fv. 62, er det naturleg at fylkeskommunen bidrar med midlar til drift av gamlevegen som sommarsykkelveg. Det er stipulert ein årleg vedlikehaldskostnad på ca. 25 000,- kroner. Fordeling av driftskostnader mellom kommune og fylkeskommune kan avtalast nærare etter at vegen er klargjort og overført til Sunndal kommune. Forslag til vedtak: Samferdselsutvalet støttar innføring av forbod for gåande og syklande gjennom fv. 62 Øksendalstunnelen og at det samtidig vert tilrettelagt for sykling i sommarhalvåret langs gamlevegen over Vettamyra/Svinberget. Samferdselsutvalet ber Statens vegvesen om å gå i dialog med Sunndal kommune om vederlagsfri overføring av eigarskap. Som grunneigar bør Staten koste nødvendig klargjering av vegen før overføring. Møre og Romsdal fylkeskommune er positiv til å bidra med midlar til drift av sommarsykkelvegen etter at vegen er klargjort og overført til kommunen. Ottar Brage Guttelvik fylkesrådmann Arild Fuglseth samferdselssjef
Vedlegg 1 Notat frå SVV - Øksendalstunnelen sykkel 2 Fv. 62 Gamlevegen over Svinberget - vurdering som sykkelveg 3 Risikovurdering sykkel fv. 62 Øksendalstunnelen 4 Kostnadsoverslag istandsetting av gamlevegen 5 Vurdering av eigedomsforhold