Fjell kommune Arkiv: Saksmappe: 2017/4335-20851/2017 Sakshandsamar: Trine Marlen Wang Øren Dato: 14.08.2017 SAKSDOKUMENT Utvalsaksnr Utval Møtedato Formannskapet Lokal forskrift om forbodssone for oppskyting av privat fyrverkeri - Straume Samandrag av saka: Politisk leiing i Fjell kommune har bede rådmannen om å utarbeide eit forslag til lokal forskrift om forbod mot privat oppskyting av fyrverkeri på angjevne soner i Straumeområdet. Heimelen til ei slik lokal forskrifta er "Forskrift om håndtering av eksplosjonsfarlig stoff" 2-10a. Etter ei risikovurdering har kommunen sjølv tilgang til å leggje ned forbod mot fyrverkeri på nærare angjevne soner. Kommunen kan ikkje vedta eit totalforbod mot fyrverkeri i heile kommunen. Det er gjort ei risikovurdering av beredskapsleiar i Fjell kommune. Risikovurderinga viser at det generelt sett er låg frekvens for uønskte hendingar med fyrverkeri i Fjell kommune, men at det er ein generell risiko for ulukker i det området kor det vert føreslege forbod. Eit forbod vil bidra til å redusere risikoen for ulukker og betre kunne ta vare på liv, helse, miljø og materielle verdiar. Det har vore testa ut offentleg oppskyting av fyrverkeri på Straume i regi av Sartor Storsenter. Dette er i gangavstand for dei fleste innbyggjarane som vil bli berørte av eit eventuelt forbod mot privat oppskyting av fyrverkeri. Det vil vere naturleg at kostnadane med eit slikt fyrverkeri vert finansiert gjennom eit spleiselag mellom næringslivet og kommunen. Saka må ut på offentleg høyring i 2 månader før endeleg vedtak kan gjerast. Dersom det er politisk ønskje at ei forskrift skal vere gjeldande frå 31.12.17, må formannskapet sende saka på høyring i slutten av august. Saka kjem deretter tilbake til formannskapet for endeleg tilråding til kommunestyret, 08.11.17.
Innstilling: Formannskapet vedtek: Formannskapet legg høyringsframlegg om lokal forskrift om forbod mot fyrverkeri ut til høyring i to månadar. Straume, den 21.08.2017 Steinar Nesse Rådmann Dokument vedlagt saka: Brev frå DSB Forskrift om håndtering av eksplosjonsfarlig stoff: https://lovdata.no/forskrift/2002-06-26-922 Brann- og eksplosjonsvernlova: https://lovdata.no/lov/2002-06-14-20 Politivedtektene for Fjell kommune: https://lovdata.no/forskrift/2006-11-17-1278 Risikovurdering Kart over forbodssone Forslag til ny lokal forskrift Saksopplysningar: Rådmannen har fått i oppdrag frå politisk leiing å utgreie eit forslag om forbodssone for oppskyting av privat fyrverkeri i Straumeområdet. I denne saka vil det bli lagt fram eit forslag til ei lokal forskrift som er heimla i «Forskrift om håndtering av eksplosjonsfarlig stoff» 2-10a. Innleiing På nyttårssaftan vert det i Fjell kommune skote opp mykje fyrverkeri. Talet på ulukker er ikkje høgt, det er snakk om éin skadd i gjennomsnitt kvar nyttårssaftan. Likevel er det slik at oppskyting av fyrverkeri alltid vil utgjere ein risiko for liv, helse, miljø og materielle verdiar. Bergen kommune er eitt eksempel på ein kommune som har forbod mot oppskyting av fyrverkeri i delar av sentrumskjerna. Bakgrunnen for forbodet i Bergen er at det er tett trehusbusetnad. Erfaringane frå Bergen har så langt vore svært gode, og forbodssona har i stor grad blitt overhalde. I samsvar med eksplosivforskrifta skal oppsetting og avfyring av fyrverkeri klassa II, III og IV, illuminasjon med faklar og liknande, ikkje finna stad i tettgrend eller nær tørr skog eller andre brannfarlege omgivnader utan løyve frå leiar av brannvesenet, jf. 2-10 femte ledd. Unntak er gjort for avfyring av fyrverkeri klasse II og III på nyttårssaftan mellom kl. 18.00 og 02.00, med mindre anna er avgjort i eller i medhald av forskrifta, jf. 2-10 tredje ledd.
Med verknad frå 4.oktober 2013 vart det tatt inn ein ny føresegn i 2-10 a i forskrift om handtering av eksplosjonsfarleg stoff (eksplosjonsforskrifta), som gir kommunen heimel til å gje lokale forskrifter om bruk av fyrverkeri. I forskrifta, som må fastsetjast av kommunestyret, kan det etter ei risikovurdering knytt til lokale forhold, leggjast avgrensingar på bruk av fyrverkeri i spesifikt angjevne område i kommunen, der det erfaringsmessig vil oppstå fare for liv, helse, miljø og materielle verdiar. Forbodssone Føresegna 2-10 A krev ei risikovurdering av lokale tilhøve, og eit eventuelt forbod skal vere knytt til eit spesifikt område. Som grunnlag for denne føresegna er området definert til å vere det same som kommunedelplanen for Straume. Sjå vedlagde kart. Grunngjevinga for val av Straumeområdet er den fortettinga som skjer i samband med byutvikling og som igjen vil auke risikoen for skadar og uønskte hendingar i samband med oppskyting av privat fyrverkeri. Samstundes finst det i dette området eit tilbod om offentleg oppskyting av fyrverkeri, som kan vege opp for det tapet innbyggjarane får dersom forskrift om forbodssone vert vedteken. Juridiske rammer Det er ikkje lov å skyta opp fyrverkeri når som helst, og kvar som helst. Politivedtektene i Fjell kommune regulerer bruk av fyrverkeri på offentleg stad. Etter vedtektene er det forbode å skyta opp fyrverkeri på offentleg stad. Det vil difor vere tale om forbod på private stadar i den lokale forskrifta. Føresegna seier i 2-10, 3. ledd om generell bruk av fyrverkeri: "Forbrukere kan avfyre fyrverkeri klasse II og III på nyttårsaften mellom kl. 18.00 og 02.00, med mindre annet er bestemt i eller i medhold av denne forskriften." Politivedtektene for Fjell kommune seier i 5 (Farleg eller skremmande verksemd): "På, ut over, eller like attmed offentleg stad er det forbode: 2. å brenne av krutt, fyrverk eller sprengstoff utan at politiet har gjeve løyve " I nokre tilfelle må ein og søke lokalt brannvesen om løyve, jfr. Brann- og eksplosjonsvernføresegna. Heimel for å kunne utarbeide ei lokal forskrift for forbod mot oppskyting av fyrverkeri lyder: 2-10A. Fullmakt for kommunen til å fastsette regionale begrensninger i bruk av fyrverkeri «Etter en risikovurdering knyttet til lokale forhold, kan kommunestyret selv fastsette forskrifter om begrensninger i bruk av fyrverkeri i spesifikt angitte områder der det erfaringsmessig vil oppstå fare for liv, helse, miljø eller materielle verdier. Det kan herunder opprettes lokale forbudssoner i kommunen.»
Med heimel i forskrifta kan Fjell kommune utarbeide ei lokal forskrift for å sikre liv, helse, miljø og materielle verdiar. Risikovurderinga Utgangspunkt for risikovurderinga Før lokal forskrift kan fastsetjast må det finnast ei risikovurdering knytt til dei lokale tilhøva i Fjell kommune. Lokale tilhøve i område der kommunen erfaringsmessig opplever store utfordringar, vil kunna vektleggjast. Vurderingar av lokalbefolkninga sine eigenskapar til å handtere fyrverkeri, vil likevel ikkje kunna leggjast til grunn. Kommunen kan heller ikkje totalforby bruk av fyrverkeri i kommunen, men det kan opprettast lokale forbodssoner i kommunen. Avgrensingane kommunen vil kunne gje gjennom ei lokal forskrift, skal knytast opp mot ei risikovurdering av faren ved oppskyting av fyrverkeri på den enkelte stad, men vil gjelde uavhengig av om det er snakk om ein offentleg stad eller ikkje. Avgrensingar for bruk av fyrverkeri kan dermed i teorien setjast for ein kvar stad i kommunen, så lenge det kan dokumenterast at det vil kunna oppstå fare for skade på liv, helsa, miljø eller materielle verdiar. Risikovurderinga Risikovurderinga er ei objektiv vurdering av området som vert vurdert å inngå i forskrifta om forbod mot fyrverkeri. Risikovurderinga gjev ikkje noko spesielt utslag anten for eller i mot eit forbod i det angjevne området. Etter vurderinga er det ikkje noko som tyder på at det er stor fare for liv, helse, miljø og materielle verdiar. Det som skil seg ut i vurderinga er «Nr 7: Vald fyrverkeri vert medvite retta mot andre personar». Etter vurderinga er det ikkje noko statistikk som viser at dette skjer. På den andre sida tyder røynsle på at det finst, og at dette skjer kvart år. Sjølv om statistikken viser lågt skadetal, kjem det fram i vurderinga at det truleg er små marginar som avgjer om det endar i skade eller ikkje. Andre hendingar som det er sett på i risikovurderinga: «Nr. 4: Brann i bil, båt, eigedom, eigedelar mm: Nr. 5: Personskade Nr. 6: Skadeverk» Risikovurderinga viser at det generelt er låg frekvens for uønskte hendingar med fyrverkeri i Fjell kommune. Dei hendingane som førekjem, fører oftast til mindre skadar på materiell og personskadar. Hendingar som fører til større skadar på materiell, eigedom, bygningar og personar er relativt sjeldne. Sjå elles vedlagde risikovurdering. Høyring Utarbeiding av forskrift følgjer normale forvaltningsrettslege regler, jfr. forvaltningslova kapittel 7. Forslaget til ny forskrift må sendast til rørde verksemder og organisasjonar for utsegn, jfr. forvaltningslova 37, 2.ledd.
Kommunen avgjer sjølv korleis høyringa skal gjennomførast, jfr. forvaltningslova 37, 3.ledd. Høyringsfristen er to månader. Gjennom høyringa skal offentlege og private organisasjonar som vert berørte av forskrifta få høve til å uttale seg om framlegget. I utarbeiding av risikovurderinga vart det henta informasjon frå kommunelega, brannvesenet og politiet. Det er naturleg at høyringsframlegget vert sendt til desse for ein formell uttale. I tillegg vil kommunen annonsera høyringa i lokalavisa og på eigne heimesider slik at også innbyggjarar som vert berørt av forbodet, får høve til å uttale seg. Offentleg oppskyting av fyrverkeri på Straume På Straumeområdet ved Sartor senter, har det blitt prøvd ut oppskyting av offentleg fyrverkeri i regi av Sartor senter. For at innbyggjarar i den føreslegne forbodssona også skal ha eit tilbod om fyrverkeri på nyttårsaftan, vil det vere ein føresetnad at eit offentleg fyrverkeri held fram. Det vil vere naturleg at kostnadane med eit slikt fyrverkeri vert finansiert gjennom eit spleiselag mellom næringslivet og kommunen. Rådmannen vil i så fall innarbeide den offentlege andelen av fyrverkeriet i kommunen sitt budsjett. Vurdering: Noverande politivedtekter førebygger ikkje i tilstrekkelig grad risiko som gjeld fare for liv, helse, miljø eller materielle verdiar på erfaringsmessig utsette område i Fjell kommune i samband med oppskyting av privat fyrverkeri. Rådmannen støttar seg til Ot.prp. nr. 65 (2008-2009) der departementet meiner at bruk av lokale politivedtekter for å regulere oppskyting av fyrverkeri er uheldig. Lokale politivedtekter gjeld oppskyting på offentleg stad og dekker difor berre delvis behovet for forskriftsregulering på någjeldande område. Det må difor utarbeidast særskilte lokale vedtekter dersom kommunestyret ønskjer å få redusert risiko ved oppskyting av fyrverkeri, då med heimel i «Forskrift om håndtering av eksplosjonsfarlig stoff» 2-10a. Risikovurderinga som er laga i samband med saka viser ikkje heilt tydeleg at det er ein risiko for skade ved oppskyting av fyrverkeri på det aktuelle området, slik som t.d. i Bergen som har tett trehusbusetnad som lett tek fyr. Vi kan ikkje finne dei same argumenta i Fjell kommune for det angjevne området. Rådmannen finn det likevel føremålstenleg å formalisere eit forbod gjennom ei lokal forskrift. Risikovurderinga viser at det finst ein risiko ved oppskyting av fyrverkeri. Det er ikkje eit krav i lova at risikoen skal vere av ein viss storleik. Det vert berre kravd at det finst ein erfaringsmessig risiko. Rådmannen meiner at risikovurderinga for Straumeområdet viser at det finst ein erfaringsmessig risiko ved oppskyting av fyrverkeri i det angjevne området. Lovkravet er difor etter rådmannen si meining dekka. Det må også takast omsyn til at fyrverkeri er viktig for mange innbyggjarar på nyttårsaftan. Det er viktig at folk, særleg dersom ei forbodssone vert vedteken, har ein stad å samlast og sjå på fyrverkeri når klokka slår tolv. Rådmannen meiner at eit offentleg fyrverkeri på Straume v/sartor storsenter, vil vere eit godt alternativ til privat oppskyting av rakettar i dette området, og som bør finansierast som eit spleiselag mellom næringslivet og kommunen.