Månadsbrev for Blå, november 2015 Oppsummering/ evaluering av november Språkutvikling Leik Prosjektarbeid Me starta november med eit lite vekeprosjekt der me laga kolstift. Det var siste veka Torill student var med oss før ho drog på høgskulen att. 2011 kullet drog på tur til Grindane ein dag for å spikka pinnane, neste dag drog heile gruppa. Då fyrte me opp bålpanna, laga oss ostesmørbrød medan pinnane våre vart til kolstiftar. Neste dag i barnehagen teikna me portrett som heng i garderoben. Me har og trykt hendene våre på ei gardin som no heng i glaset. Den gjorde at det vart litt lunare på avdelinga når det er tidleg morgon og mørkt ute. Elles har me gjennomført mange foreldresamtalar, me har vore på tur og me har hatt minirøris. Siste halvdel av månaden byrja me å synge julesongar for å øve oss til julefesten 2.12 og me har hatt litt hemmeleg juleaktivitet Mange av borna på Blå er glad i å lesa bøker. Nokon har og hatt bibliotekleik i det siste, denne leiken har til tider gått litt hardt ut over nokre av bøkene I november har me dramatisert eventyr mange gonger. Me har dramatisert Bukkane Bruse og Gullhår. Borna prøver seg då i ulike rollar, og seier etter kvart replikkane sjølv eller får hjelp av den vaksne. Me syng og mykje på Blå, no går det mykje i julesongar. Me har hatt meir innetid denne månaden etter å ha vore mykje ute i fint haustver. Leikerommet er flittig brukt, der observerar me mykje god rolleleik. Mykje familieleik med mamma og baby, dei køyrer buss, reiser på Lustrabadet, leikar Karsten og Petra Me hadde ei veke med prosjektarbeid i aldersdelte grupper i november. Denne gongen med temaet fysisk aktivitet. Her ein liten oppsummering frå kvar gruppe: 2011 kullet: Atter ei kjekk veke der alle firåringane har fått vore mykje i lag. Me har vore ekstra aktive med minirøris og tur til Parken og ballbingen. På turane tok me med oss bokstavane og orda frå språkutviklingsprosjektet og leika ordstafett med dei. Flott gjeng!! 2012 kullet: 2012 kullet har hatt base på Blå i prosjektperioden med fysisk aktivitet. Som ein raud tråd har me hatt «Bjørnen sover». Den har me leika kvar dag, inne eller ute. Ein dag gjekk me tur til leikeplassen på Bruflat, der leika me «Bjørnen sover» og leika elles på leikeområdet. Maten vår åt me i gangen på idrettshallen. Elles har me vore på leikeplassen nedom barnehagen, i aulaen og me har hatt hinderløype inne på Blå. Det er elles kjekt å leike ilag med sine jamaldringar og bli kjent på tvers av avdelingane.
2013 kullet: Base på Grøn. Vi delte ein del i grupper, og gjekk på små turar i nærmiljøet, t.d til Grindane og andre stader der vi fann litt bakkar t.d, slik at borna fekk litt fysiske utfordringar. Dei rulla, kraup, hoppa, balanserte, og sprang. Vi var også i aulaen. Der hadde vi små stasjonar rundt om. Vi hoppa frå kasser og ned på tjukkas, vi hoppa på trampoline, vi åla og balanserte på benken, og klatra i ribbevegg og klatreveggen. Mål og innhald for desember Fau arrangerar julefest 2.12. Kvar dag i desember har me adventsamling. Me les då boka «24 dagar til jul». Den handlar om to mus, Erlando og veslebroren hans Magnuso. Dei bur på ein gard. Me føl musene dag for dag og ser kva som skjer med dei. Me fortset med juleaktivitet, noko av dette er litt hemmeleg Me har julebord den 16. Då er det kjekt om me pyntar oss litt. Me dekker då buffet i aulaen som me går og forsyner oss av. Me spelar julemusikk og kanskje me dansar litt? Denne dagen får 2011 og 2012 kullet tilbod om å reise på gudsteneste i kyrkja, gje beskjed til personalet om nokon ikkje vil at deira barn skal vere med. Dei yngre borna (2013) har eige fellesopplegg i barnehagen. Den 18.12 kjem det 6. klassenissar til oss. Fint om borna har noko raudt å ha på denne dagen, evt blått om nokon vil vere blånissar. Dei dagane det er påmelding i jula, kan det bli endring i kva avdeling me er på. Kjem nærmare informasjon. Bursdagar: Kamile 11.12 Eira 22.12 Anna informasjon o Me set fram gløgg og peparkaker ved henting onsdag 9.12 og torsdag 10.12. o Me har merka at nokon av dei som har fora regnbukser kan vere blaute dagen etter bruk, det gjeld og om støvlane heng i på andre regnbukser. Fint om de foreldre hjelper oss å passe på dette. Ikkje kjekt å ha på regnkle som har vore blaute frå dagen før. o Minner om: fint om borna har på litt finkle onsdag den 16. og noko raudt fredag den 18. desember. o Medio januar kjem startar nokre nye barn på Blå avdeling. o Lærling Andrea Berget startar på Blå i januar, velkommen til ho. o Hugs merka bytekle til ei kvar tid. Greitt med meir enn eit par vottar. o Sjekk gjerne korga med attgløymde kle, kanskje noko er ditt?
Bileter frå kolstiftprosjektet me hadde i starten av november. 2011 kullet var framme ein dag og spikka pinnar. Ein anna dag var alle framme, me laga oss ostesmørbrød samtidig som me klargjorde kolstiftane. Det vart mange fine portrett som no heng over plassane til borna i garderoben. Her jobbar me med å trykke hendene våre på ei gardin som no heng i glaset på Blå. Fargerik og fin vart den Det kom og snø i november, då vart det full fart i akebakken.
Her dramatiserar me «Bukkane Bruse» og «Gullhår og dei tre bjørnane». Alle som vil har fått delteke, mange opptil fleire gonger. Her er nokre bileter frå prosjektet vårt med fysisk aktivitet. Bjørnen ligg på bakken i biletet til venstre.