Skrivekurset på Voss Januar 2002: I oktober 2001 starta Prosjekt Eldrepedagogikk i samarbeid med biblioteket ved SILK, Tvildemoen opp eit kreativt skrivekurs for eldre i Voss kommune. Lærarar på kurset er Oddgeir Synnes og Mona Steiner Sæle, og til no har det blitt arrangert fem møte. Ulikt dei andre kursa, er det her overvekt av menn - i alt er vi seks menn og to kvinner forutan lærarane som annankvar tysdag møtest i biblioteket til SILK på Tvildemoen. Og det er litt av ein gjeng vi har fått samla! Som de ser av tekstane som er lagt ut, og som etter kvart vil bli lagt ut, finn vi tekstar som femnar breitt både når det gjeld stil og innhald - og kvaliteten på produkta er det ikkje noko å seie på. Mona S. Sæle og Magnhild Vestrheim Halle Skjervheim og Knut Mørkve Olav Tvilde, Lars Jørdre og Marta Ringheim Arefjord
Februar 2003: Det er er vel åtte månader sidan kurset på Voss vart avslutta, men deltakarane held fram med å møtast. Eitt av desse møta kan du lese om her: Skrivekurset på Voss vart formelt avslutta i juni 2002. Men deltakarane hadde så mykje på hjarta at skrivinga laut halde fram. Etter kursslutt har dei møttest kvar fjortande dag heime hjå kvarandre for skriving, opplesing og oppleving. Tysdag 4. februar vart vi lærarane inviterte oppover for å vere med på eit av skrivesamkoma deira. Her ser vi skrivegruppa saman med kurslærar Mona Steiner Brekkan og Halvor på fire og ein halv månad! Denne gongen fann møtet stad heime hjå Olav. I lekse hadde dei fleste førebudd tekstar til oppgåva "Rasteplass", men her var også rom for andre løysingar. Det vart ei herleg stund, som tekstane kan gi eit lite innblikk i. Berre synd at Knut og Sigmund ikkje var til stades denne gongen. Derimot var det gledeleg å få treffe Sigbjørn Lien som har kome til som nytt medlem av skrivegruppa.
Vårsol og skriving på Voss Mai 2004: To år etter at skrivekurset var ferdig, held framleis deltakarane på Voss koken. Den 26. mai var eg invitert til Voss for å treffe gjengen att, og sjå korleis det gjekk med skrivinga: Skrivegruppa på Voss samla rundt kaffibordet Juni 2004 For to år sidan hadde eg gleda av å vere ein av to lærarar ved skrivekurset på Voss. Etter 12 skriveøkter vart kurset avslutta i juni 2002. Deltakarane hadde då skrive tekstar i ulike litterære sjangrar som haiku-dikt, novelle, forteljing og kåseri, og dei hadde førebudd og framført munnlege forteljingar. Men noko slutt på skrivinga ville ikkje deltakarane finne seg i. Dei hadde framleis mykje uskrive, og kurset hadde synt at skriveevnene absolutt var til stades. Resultatet vart at skrivegruppa heldt fram med jamlege møte. Så ein gong i månaden treffast dei heime hjå kvarandre og les opp tekstar til oppgåver dei har kome fram til i fellesskap. Men sjølv om gruppa har blitt "sjølvstyrande" er det godt at dei ikkje gløymer sine tidlegare lærarar. Den 26. mai vart eg invitert til Voss av skrivegruppa. Denne gongen var det Magnhild og Martha som hadde tatt initiativet til ein guida tur med ymse stopp rundt om i Voss kommune. Etter kaffistopp med innlagde foredrag på Norheim, enda turen til slutt i Voss sentrum. Der var det duka for middag og dessert, og ikkje minst ein smakebit av tekstane dei hadde skrive til denne samlinga. Temaet denne gongen var "Ei oppleving", og det var retteleg ei oppleving å høyre korleis deltakarane hadde løyst denne oppgåva på ulikt vis.
Skrivegruppa samla på Norheim med Lønahorgi i bakgrunnen. Frå venstre: Olav K. Dugstad, Olav Fr. Tvilde, Magnhild Vestrheim, Marta Ringheim Arefjord, Sigbjørn Lien, Lars Jørdre og Knut K. Mørkve. Magnhild Vestrheim kåserer over farne tider på Voss.
Skrivekurset på Radøy Mai 2002 Skrivekurset på Radøy vart starta opp 16. april som eit samarbeid mellom Prosjekt Eldrepedagogikk og Radøy kommune. Vi er så heldige å få møtast i den gamle prestegarden på Manger, same hus som den kjende Michael Sars budde i då han var prest på Manger. Lokala forpliktar, og det er kjekt å kunne melde at tekstane som kjem frå Radøy svarar til dei høge forventningane vi hadde ved oppstarten av kurset. Vi har no hatt fire samlingar før vi tok sommarferie. I august startar vi opp att og held fram med samlingane i prestegarden. Gro Borgund, Maren Hole og Svanhild Grindheim under avslutningskurset no i vår. Gro Borgund, Maren Hole og Svanhild Grindheim under avslutningskurset no i vår. Berit Kvalvik og kursleiar Oddgeir Synnes prøver å smile naturleg
Skrivekurset i Fyllingsdalen Oktober 2003: Skrivekurset i Fyllingsdalen blei starta i april 2003. Annankvar torsdag møtast vi i kafeen på Borghilds Minne i Lillehatten til skriving, opplesing av tekstar og til samtalar over kaffikoppen. Latteren sit laust - her er mykje moro, men og alvor som blir formidla gjennom dikt, noveller og forteljingar. Kurset har resultert i mange fine tekstar. Men kurset har framleis ein del møter att å sjå fram til før vi nærmar oss avslutning ved juletider. Her kjem det til å kome mange fleire tekstar etterkvart, så følg med! Inger-Karin og Annie i ivrig samtale Randi og Kjell studerer ei nyskriven novelle
Skrivekurset ved Slettebakken Menighets Eldresenter November 2003: Skrivekurset ved Slettebakken Menighets Eldresenter blei starta i mars i år. Lesarar av Eldreveven har lenge kunne gleda seg over mange av dei fine tekstane som har kome fram på kurset, og no kan ein også sjå nokre av skribentane på bileta under. Kurset har vore svært vellukka, og det er vemodig at det nærmar seg slutten. Men sjukeheimen ved styrar Janneke Eide har planar om at skrivegruppa skal halde fram, og fleire tilsette har vore på kurs for nye kurshaldarar hos Prosjekt Eldrepedagogikk. Så her blir det mykje spennande å sjå fram til! Johanne, Janneke og Borghild under skrivegruppa 13. november. Thomy og Ewald Elna og kursleiar Odd i lystig lag.
Stine, Lilly og Solveig lytter til ein av tekstane om romantikk før i tiden.