Unner du borna det unike? Runde kystleirskule

Unner du borna det unike? Runde kystleirskule

Runde kystleirskule Stupbratte klipper med yrande liv. Grøne bakkar mot djupblått hav. Eit samfunn omkransa av skumsprøyt. Idyllisk busetnad, men også ei dramatisk historie. Øya Runde er norskekysten i miniatyr. Konsentrert. Forsterka. Eit eineståande stykkje kystnatur, med tusen historier å fortelje om alle som lever mellom havbotn og himmelrand. Kvar vår kjem dei hit, for å finne kvarandre, og bere livet vidare. Kvart år, på same stad, til same tid, mellom vennar og fiendar, mellom hav og himmel, svermar dei. Lundefuglane. Men også alke, lomvi, havsule, krykkje, toppskarv, storjo, havørn og mange fleire - til saman i hundretusental. Fuglefjellet på Runde er einaste i Sør-Noreg, det mest artsrike i heile landet og eit minne for livet for alle som får oppleve det. Fisk og sild. Berebjelken i kystsamfunnet sitt levebrød så lenge nokon kan minnast. I dag Norskekysten sin viktigaste berekraftige ressurs. Havet er rikt, men også mektig og brutalt. Historiene om losane, fyra og forlisa vitnar om dét. Store verdiar har forsvunne i djupet, skattar har vorte funne att. Ein av skattane er spora etter dei som har levd her. Spor frå ei anna tid, som vi kan fylgje gjennom rik forteljartradisjon og eit særmerkt kulturlandskap.

Kunnskap Leirskule er ikkje ferie, men skule. Skule på ein litt annan måte, læring som inneber at elevar og lærarar kan verte våte. Undervisninga er ikkje berre undervisning, men også levande møte med levande liv. For øya Runde er ikkje berre ei øy, men også ein biotop, ja ein heim, for eit stort mangfald av ulike artar. Planter, dyr, fuglar og menneske; dei bur her. Kvifor hekkar sjøfuglane akkurat her på Runde? Kva er eit naturreservat? Kvifor minkar somme artar i tal medan nye kjem til? Møtet med den mangfaldige, men sårbare havnaturen aktualiserer mange spørsmål. Nokre har vi svaret på, andre svar må vi leite etter. Og undervegs får vi kanskje ei djupare forståing; naturen er eit stort samspel, som også vi er ein del av, med vår bruk, vår forvalting og våre liv. Læring er ikkje berre å huske. Læring er også å vekse. Vi er alle ulike, har vårt potensiale, kan vekse som oss. Når vi kjem til nye stadar, møter nye menneske, opplever nye situasjonar, brukar kroppen, sansane, då har vi sjansen til å kunne vekse litt, på vår måte. Kanskje må vi våge litt meir og yte litt meir enn vanleg. Men gjer vi det i fellesskap, kan vi verte betre kjende med både oss sjølve og kvarandre. Finst det noko betre grunnlag for kunnskap enn å oppleve meistring?

Vennskap Det er spesielt å bu på Runde kystleirskule, med soverom som er innreidde som båtlugarar, og med panoramautsikt over storhavet frå kjøken og middagsbordet. Men det mest spesielle er nok å ha huset fullt av leikekameratar, døgnet rundt. Kva er då kjekkare enn fritid? Leik, ballspel, brettspel, stongfiske, osb. Berre fantasien set grenser, det er heilt sikkert nokon som vil vere med! Nokon må ta oppvasken. Gangen må moppast, opphaldsroma ryddast, det må dekkast på bordet til neste måltid. Leirskulen er heimen til elevane i ei veke, og i ein heim er det mange oppgåver som må løysast. Det er kjekt også, å få medverke litt til fellesskapet sin trivsel, og sjå at din innsats betyr noko for fleire. Saman kan vi ha det bra. Det er eit overordna mål at alle som kjem til leirskulen skal oppleve tryggleik og trivsel. Leirskulebygget har universell utforming, og vi gjer det vi kan for å legge opphaldet best mulig til rette for alle som kjem hit. Slik håpar vi at alle skal få oppleve å kjenne seg verdsette og inkluderte i fellesskapet. Den største skatten du kan finne på Runde er vennskap.

VELKOMNE TIL RUNDE KYSTLEIRSKULE VI HAR LEDIGE LEIRSKULEVEKER BÅDE PÅ KORT OG LANG SIKT. BESTILLING TA KONTAKT MED OSS PÅ TELEFON ELLER E-POST, SÅ GIR VI DEG EIT PRISTILBOD, SAMT RESERVERER LEIRSKULEPLASS TIL KLASSEN DIN INNTIL VIDARE. Vi tek i mot leirskuleelevar både vår og haust. Vi held til i eit omskifteleg landskap, der undervisningsopplegget må tilpassast årstid og vêrforhold. - Lurer du på noko? Ta gjerne kontakt for ein uforpliktande leirskuleprat. Vi fortel gjerne meir om Runde og Runde kystleirskule, og gjer det vi kan for å legge til rette leirskuleopphaldet etter dine behov. Kapasitet: ca. 80 elevar Sesong: mars, april, mai, juni, august, september og oktober Opphaldstid: måndag fredag

RUNDE KYSTLEIRSKULE ADRESSE: LANGENESET, 6096 RUNDE TELEFON: 700 85 950 E-POST: leirskule@christineborg.no HEIMESIDE: www.christineborg.no/runde_kystleirskule