3. og 4 klasse på Straumøy Gard måndag 29.09.09 Då ungdomsskulebussen stoppa i Straumøykrysset kom 3. og 4. klasse veltande ut av bussen, klar til ein ny dag på Straumøy Gard. Marta, Marie og Janna var og med frå 6. og 7.klasse. Dei var med som hjelparar og gjorde ein god jobb. Då me kom ut til garden, stod Thomas i tunet og tok imot oss. Thomas skal jobba hos oss dette halvåret, og det er veldig godt å ha han med seg som ein ekstra vaksen. På veg ut til garden fortalde eg elevane at det hadde kome grisungar. Dei kom til verda natt til søndag 28.09, og var berre eit døgn gamle. Miss Piggy fekk 6 grisungar, og det ser ut til at ho er flink til å ta seg av dei. Ho gryntar og pratar med ungane sine og dei gryntar til svar. Når ungane drikk mjølk av ho, gryntar ho rytmiske grynt for at alle ungane skal halda same takt når dei syg. Oppgåvene under fjøsstellet var fordelt mellom alle elevane på førehand. Etter kvart kom Øystein og Vanja og hjalp til. Leif som er bonden, var der og saman med Kåre som jobbar her kvar måndag og to burmesiske flyktningar. Henrik og Sylvia var og innom, så det er absolutt ikkje tomt for folk her på garden
Det gjer at dyra våre er vant til folk, og tek det med stoisk ro om ein tredje- eller fjerdeklassing blir vel høgrøsta. Ein annan ting er at ei viktig lærdom med dagane på garden blir å kunna vera roleg saman med dyra. Me går roleg inne i dyreromma, og me snakkar lågt. I dag var det viktig med rett åtferd for at Miss Piggy ikkje skulle bli stressa. Ein stressa gris kan finna på å eta ungane sine. Dei fleste klarte det veldig bra, medan nokon gløymde seg ut og måtte minnast på det. Ein regel til som me må jobba med, er å komma med ein gong me høyrer kubjølla. Då er det noko som skal skje eller ein melding som skal formidlast. Sjølv om det blei mykje regelsnakk ei stund, gjekk fjøsstellet veldig bra. Alle gjorde oppgåvene sine, og dyra fekk mat. Etterpå var det vår tur å eta. Me åt nistepakken på Gamlelåven då det regna trollkjerringar ute. Etter kvart letta det, og me gjekk i gong med andre økta. Me laga meterstokkar og halvmeterstokkar av svarthylltreet. Svarthyll veks fleire meter på ein sommar og får veldig rette greiner som er gode å bruka til målereiskap. Etterpå blei gruppa delt i to der Thomas tok halve gjengen med seg og målte lengd og breidd på kaninhuset og Nyahuset. Me andre målte sauehuset.
Etterpå flytta med Dina som er ein artstypisk gris slik dei såg ut på 1950-talet. Det er berre 10-11 griser i Noreg av hennar type. Ho er veldig stor, har lengre nase og er meir krum over ryggen enn vanleg norsk gris av i dag. Ho har gått ute på eit beite, men på grunn av all nedbøren blei det veldig vått og me måtte difor få ho i hus. Me lokka ho med kraftfor, og etter nokre omvegar her og der, fekk me ho inn. No stod saueklypping på programmet. Det står tre lam inne, eit svart og to kvite. Det svarte lammet har fått ein augesjukdom som gjer at ho er blind. Ho hadde gått med mora si i fjellet og kome vekk frå ho. Heldigvis var det nokre sauebønder som fann ho nord for Haukeli, og dei fekk ho heim. Våre sauer går i Valldalen om sommaren, og lammet hadde gått ut av vårt beite og over i nabobeitet. Leif er ein ganske rask saueklyppar, så det var fort gjort å skrella av dei ulla. Elevane var med på å sortera ulla i to sekker, ein sekk for ulla som var skitten, ein sekk for rein ull. Den svarte ulla blei pakka i ein tredje sekk. Ulla blir levert til eit ullmottak på Karmøy og sendt vidare til foredling. Til slutt kan me kjøpa ulla frå sauene våre som garn i butikkane Noko av ulla skal me ta med oss til skulen, og kanskje blir det strikkegarn av ho?
Me snakka litt om ulike typar landskap før me gjekk opp på beitet for å laga demning. Kva er skilnaden på eng og beite? Kva er åker? Kor kan me laga åker? Mange av elevane kunne svara på det, for andre var det nytt. Dette skal me jobba vidare med på skulen etter haustferien. Me tok med oss alt me fann av gravereiskap, 7 spadar, 2 krafser og 1 hakke før me sette kursen mot grøfta som kryssar Beitet. Det me kallar Beitet er eit område som far til Leif rydda og grøfta. Det ligg på ein høgde på Straumøy med god utsikt mot sør og vest og skog mot nord og aust. Grøfta buktar seg mellom småkollar før vatnet renn utforbakke ned mot Peratjødno. Me bygde demninga rett før vatnet rann utfor, og medan me laga demninga, auka vasstanden på innsida. Neste gong 3. og 4.klasse kjem til gards, skal me opna denne demninga og følgja vassvegen ned til sjøen. Det var ein veldig møkkete gjeng som forlét demninga. Jord og vatn er ein herleg blanding for ungane, men kanskje ein dårleg blanding for dei skal vaska kleda?? Heldigvis har me ein god vasslange på mjølkerommet. Alle måtte spylast etter tur før dei gjekk tilbake til bussen i Straumøykrysset. Eg trur nok nokre av elevane var våte både her og der Fin og travel dag saman med flotte ungar fulle av pågangsmot og energi! Mvh Anne K. Grutle
Oppgåver i matematikk. Måndag 29.09.09 laga me meter- og halvmeterstokkar av treet svarthyll. Dei har lange og rette greiner som gjer dei godt eigna meterstokkar. Etterpå målte me opp lengd og breidd på ulike hus på garden. Set meterstokken ned på bakken. Kor langt når den på deg i høgd? Hald ein meterstokk mellom nevane dine. Prøv å hugs sånn cirka kor langt det er utan at du held meterstokken. Gjer det same med ein halvmeterstokk. Finn arealet på dei ulike husa på garden. Sauehuset: 15 x 11,5m Kaninhuset: 3,5 x 2,5m. Luftegarden utgjer 2 x 2,5 m av dette arealet. Nyahuset (skulestova): 14m 3,5 m 8 m 2,5 m 4,5m 11,5 m Kor mange ulike rekneforteljingar kan me laga ut av dette? Me var 9 elevar, 3 hjelpeassistentar, 2 vaksne og 2 hundar som bygde demning. Me hadde med oss 7 spadar, 2 krafser og 1 hakke.