HORDALAND FYLKESKOMMUNE Regionalavdelinga Planseksjonen Arkivsak 201103659-64 Arkivnr. 712.T07 Saksh. Taule, Eva Katrine Saksgang Møtedato Fylkesutvalet 24.04.2013-25.04.2013 REGIONAL KYSTSONEPLAN FOR SUNNHORDLAND OG YTRE HARDANGER. VEDTAK AV PLANPROGRAM SAMANDRAG Fylkesutvalet vedtok 22.11.2012 å senda forslag til planprogram for regional kystsoneplan for Sunnhordland og ytre Hardanger til høyring og offentleg ettersyn i minimum 6 veker. Det er mottatt 23 fråsegner frå: 6 kommunar, 1 regionråd, 5 regionale statsetatar, 7 næringsaktørar og 4 andre. Sentrale moment i fråsegnene er: Positiv haldning til planarbeidet og at planen vert sett på som viktig, særleg i høve til akvakulturnæringa. Geografisk avgrensing, særleg i høve til Vindafjord kommune i Rogaland. Ønskje om meir fokus på fiskeri og marint naturgrunnlag. Ønskje om meir fokus på friluftsliv og sjøen som ressurs for båtliv og reiseliv. Ønskje om deltaking i planarbeidet. Innspela er vurdert og det er gjort framlegg om utviding av planområdet med sjøarealet i nordre delen av Vindafjord kommune, Rogaland. Dette er med føresetnad om sams vedtak i Rogaland fylkeskommune. Det er også gjort framlegg om justering av planprogrammet innafor plantemaet berekraftig kystsoneplanlegging. Framdriftsplanen er uendra med planvedtak i juni 2015. Fylkesutvalet skal vedta planprogrammet i tråd med delegasjonsreglementet. Fylkesutvalet skal oppnemne representantar frå fylkestinget til styringsgruppa.
FORSLAG TIL VEDTAK 1. Fylkesutvalet vedtek med heimel i plan- og bygningslova 8-3 planprogram for regional kystsoneplan for Sunnhordland og ytre Hardanger med følgjande endringer: a. Planområdet vert utvida med sjødelen av nordre del av Vindafjord kommune, Rogaland. b. Tidsperspektivet på planen er 12 år. c. Plantemaet berekraftig kystsoneplanlegging vert tydeleggjort i høve til fiskeri og marint naturgrunnlag, friluftsliv og sjøen som ressurs for båtliv og reiseliv. 2. Fylkesutvalet oppnemner 2 medlemmer frå fylkestinget; ein av desse som leiar: Leiar:... Medlem:.. 3. Samarbeidsrådet peiker ut medlemmar frå regionen til den administrative prosjektgruppa. Fylkesrådmannen får fullmakt til å oppnemna andre kommunar og øvrige medlemmer. 4. Vedtaket vert gjort med føresetnad om sams vedtak i Rogaland fylkeskommune. Rune Haugsdal fylkesrådmann Bård Sandal regionaldirektør Vedlegg: Planprogram. Regional kystsoneplan for Sunnhordland og ytre Hardanger. Høyringsutkast. Høyringsrapport planprogram. 2
FYLKESRÅDMANNEN, 11.04.2013: 1.0 Bakgrunn Fylkestinget vedtok i Regional planstrategi for Hordaland 2010-2012 arbeid med Regional plan for Sunnhordland sjø, strandsoneareal og transport som eitt av planarbeida som skulle startast opp i perioden. Fylkesutvalet vedtok oppstart av planarbeidet og organisering av arbeid med planprogram 10.11.2011. Føremålet med planarbeidet er å sikra ei berekraftig forvalting av sjøareal og strandsone i Sunnhordlandsregionen og ytre Hardanger. Planen skal sikre gode rammevilkår for havbruksnæringa som ei stor og viktig næring i regionen, samt maritim sektor med trygge farleier, hamneområde og sjøretta næringsareal. Det vart etablert eit politisk kontaktutval med ein representant frå fylkesutvalet og to representantar frå kommunane. Det vart også etablert ein administrativ programkomite med representantar frå fylkeskommunen, kommunane og regionale statsetatar. Fylkesutvalet gjorde 22.11.2012 slikt vedtak: Med heimel i plan- og bygningslova 4-1(planprogram) og 8-3(utarbeiding av regionalplan) vedtek Fylkesutvalet å senda forslag til planprogram for regional kystsoneplan for Sunnhordland og ytre Hardanger på høyring og offentleg ettersyn i minimum 6 veker. Det vert vist til saksutgreiinga i denne saka som beskriv føremål, bakgrunn, plantema og planprosess. 2.0 Høyringsprosessen Planprogrammet vart sendt på høyring med frist 25.januar 2013. Høyringa vart gjennomført ved kunngjering på Hordaland fylkeskommune si nettside, ved annonse i Bergens Tidende og Haugesunds avis og ved utsending som brev til aktuelle høyringspartar, om lag 70. I tillegg vart forslag til planprogram sendt alle hovudbibliotek og kundesenter i kommunane, og til ulike avdelingar internt i fylkeskommunen. Det vart lagt til rette for at ein kunne gi innspel direkte på fylkeskommunen si nettside, som epost og som ordinære brev. Alle innspel er lagt ut på fylkeskommunen si nettside. 17.januar 2013 vart det arrangert høyringskonferanse på Stord med 44 deltakarar frå kommunane i planområdet og nabokommunar, Kystverket, Mattilsynet, Fylkesmannen, Fiskeridirektoratet, Friluftsrådet Vest, forsking og oppdrettsnæringa. Planprogrammet vart presentert og dei ulike plantema vart belyst gjennom innlegg frå ulike aktørar. 3.0 Høyringsrapport og tilrådde endringar Det er motteke 23 innspel til planprogrammet; 6 kommunar, 1 regionråd, 5 regionale statsetatar, 7 næringsaktørar og 3 andre. Det vert vist til høyringsrapport for meir detaljert informasjon, og vidare til link til fullstendige høyringsinnspel. Sentrale moment i innspela er: Positiv haldning til planarbeidet og at planen vert sett på som viktig, særleg i høve til akvakulturnæringa. Geografisk avgrensing, særleg i høve til Vindafjord kommune i Rogaland. Ønskje om meir fokus på fiskeri og marint naturgrunnlag. Ønskje om meir fokus på friluftsliv og sjøen som ressurs for båtliv og reiseliv. Ønskje om deltaking i planarbeidet. Rammer Tidsperspektivet på 12 år skal gå fram av planprogrammet. 3
Geografisk avgrensing av planområdet Det har kome fleire innspel på innleming av Vindafjord kommune i planarbeidet, både frå kommunen sjølv og nabokommunen Etne, i tillegg til Kystverket og fleire næringsaktørar. Vindafjord (nordre del, gamle Ølen kommune) er ein naturleg del av sjøarealet i Sunnhordland. Høyringsframlegget foreslo å ta med Vindafjord i kunnskapsgrunnlaget, men at sjølve planen berre skulle omfatta Hordaland. Det vert no foreslått å innlema sjødelen av Vindafjord kommune i planområdet. Rogaland fylkeskommune har ikkje kome med innspel til planprogrammet. Endeleg vedtak av planprogrammet krev at Rogaland fylkeskommune gjer likelydande vedtak. Det har også kome innspel på at heile Hardangerfjorden skal inkluderast i planområdet. Strenge restriksjonar på sjømatproduksjon i denne delen gjer at området no er lite eigna til akvakultur. Foreslått plangrense i Hardangerfjorden vert ikkje endra. Føremål Det er ikkje lagt opp til endring av føremålet. Føringar for planarbeidet I tida etter planprogrammet vart lagt til høyring har det kome fleire nasjonale dokument som har påverknad på planarbeidet, til dømes Sjømatmeldinga (Meld.St. 22), Høyring av forskrift om nytt forvaltningsregime i Hardangerfjorden og Endringer i småbåtloven (bruk av vannscooter). Desse vert tatt med i sjølve planarbeidet og ikkje i oppdatert planprogram. Plantema Det er foreslått fiskeri og friluftsliv som eige plantema. Det vert likevel rådd til å halde på 4 plantema som i planprogrammet: berekraftig kystsoneplanlegging, strandsona, akvakultur og sjøtransport/maritim næring. Plantemaet berekraftig kystsoneplanlegging famnar vidt. Det har kome fleire innspel på dette. Fiskeri og marint naturgrunnlaget har fleire kommentert som lite tydeleg i planprogrammet. Det har også kome innspel om tydeleggjering av sjøen som ressurs for friluftsliv, båtliv og reiseliv. Det vert foreslått å tydeleggjere plantemaet berekraftig kystsoneplanlegging på desse punkta. Utgreiingar Det er peikt på frå NVE at skred- og flaumfare vert tatt inn i ROS-analysen. Dette vert gjort. Medverknad Det er stor interesse for å delta i planarbeidet frå høyringspartane. Alle som ønskjer å delta i temagrupper, vert invitert til det. Samarbeidsrådet for Sunnhordland har kome med ynskje om å peike ut representantar frå kommunane i regionen til dei ulike gruppene. Dette vert tilrådd. 4.0 Organisering og deltakarar Politisk styringsgruppe med to medlemmar frå Fylkeskommunen, to frå Samarbeidsrådet sine medlemmar og ein frå kommunane Fusa, Kvam og Jondal. Det vert opna for representasjon frå Vindafjord kommune/rogaland fylkeskommune. Fylkesutvalet oppnemnar dei to representantane frå Hordaland fylkeskommune. Prosjektgruppe med administrative representantar frå kommunane, Fylkesmannen, Fiskeridirektoratet, Mattilsynet og Kystverket. Samarbeidsrådet peiker ut representantar til gruppa frå regionen. Det vert foreslått at Fylkesrådmannen får fullmakt til å oppnemna kommunar og øvrige medlemmar i den administrative arbeidsgruppa. Representant for Hordaland fylkeskommune ved regionalavdelinga vert leiar av arbeidsgruppa. 4
Temagrupper innafor dei fire plantema: berekraftig kystsoneplanlegging, strandsona, akvakultur og sjøtransport/maritim næring. Her vert det invitert til brei deltaking. 5.0 Økonomi Det er utarbeidd rammebudsjett for planen. På bakgrunn av endeleg planprogram vert det laga detaljbudsjett for gjennomføring av planarbeidet. Kostnaden til planarbeidet vert dekka innafor regionale planstrategimidlar og konsesjonsmidlar for akvakultur. 6.0 Samla vurdering og vidare arbeid Det er positiv haldning til planarbeidet hos høyringspartane og planen vert sett på som viktig for utviklinga av ein berekraftig akvakulturnæring i Hordaland. Planområdet vert foreslått utvida til også å gjelda sjøarealet i Vindafjord kommune, Rogaland med føresetnad om sams vedtak i Rogaland fylkeskommune. Plantemaet berekraftig kystsoneplanlegging vert tydeleggjort i høve til fiskeri og marint naturgrunnlag, friluftsliv og sjøen som ressurs for båtliv og reiseliv. Dette vert endra i planprogrammet. Forslag til planprogram med dei foreslåtte endringane vil vera godt tenleg for planarbeidet. Planarbeidet startar når planprogrammet er vedtatt. Endeleg vedtak i fylkestinget er lagt opp til juni 2015. 5