Senterpartiet vil byggje samfunnet nedanfrå. Vi vil ha eit samfunn med frie og sjølvstendige menneskjer som med tru på eigne evner tek ansvar for sitt eige liv, for fellesskapet og natur og miljø. Partiets menneskjesyn har utspring i det kristne verdigrunnlaget og humanistiske verdiar i pakt med dette. Kvart menneskje er unikt og uerstatteleg, og respekten for menneskjeverdet er overordna andre verdiar. BØ SENTERPARTI Ei stemme til Bø Senterparti er ei støtte til: - Auka vekt på nærmiljø, folkehelse og klima - Framtidsretta næringsutvikling og norsk matproduksjon - Tenleg kommunestruktur basert på folkeavstemming Bø senterparti slår fast at nærmiljøet er viktig for den enkeltes trivsel og helse og for kommunens utvikling og folkehelse. Klimautslepp er den største utfordringa for miljøet i dag. Bø senterparti meiner det er potensiale for meir miljøvenleg utvikling av Bø. Bø senterparti legg stor vekt på å finne lokale klimavenlege løysingar i kommunen. Bø senterparti vil vidareutvikle kulturkommunen Bø. Bø har eit allsidig næringsliv med arbeidsplassar innan kultur, handel, forsking, utdanning, reiseliv, landbruk og industri. Bø senterparti meiner det er viktig å tilby nye næringsdrivande støtte i etableringsfasen, til dømes rimelege næringsareal og -lokale og ein fast stad å vende seg til for å få informasjon og råd. Bø senterparti vil vidareutvikle det interkommunale samarbeidet og sikre ein kommunestruktur som har brei folkeleg støtte. Økonomien i Bø kommune er i ubalanse. Bø senterparti vil ha rammer for kommunal aktivitet som gir balanse i økonomien så raskt som råd. Lovpålagte tenester må prioriterast høgt, og dette kan føre til streng prioritering av andre viktige tenester og formål i ein overgangsperiode.
STADUTVIKLING Bø kommune er inne i ei positiv utvikling kjenneteikna av vekst i folketalet, etablering av nye arbeidsplassar, auka bustadbygging og eit blømande kulturliv. Denne utviklinga har vore knytt til nærmiljø og stadutvikling, noko som truleg vil få auka verdi i framtida. Bø senterparti vil satse på å vidareutvikle Bø sentrum. Dette er ein føresetnad for å få til eit triveleg og miljøvenleg sentrum for fastbuande og tilreisande. Vi ønskjer betre bilfri tilgang til detaljhandel og servicefunksjoner og hindre ei uheldig spreiing av servicefunksjonar. Dette krev balansert utbygging og funksjonsfordeling mellom Bø sentrum, Grivijordet og Brenna industriområde. Berre særleg areal- og transportkrevjande verksemder bør bli etablert på Grivijordet, og Brenna bør reserverast for tyngre industri. Høgskule- og forskingsmiljøet i Bø har vore viktig for kommunen og for utviklinga av Bø sentrum. Bø senterparti vil framleis utnytte potensialet i dette miljøet. Vidareutvikling av høgskuleområdet (Campus Bø) vil vere ein viktig del av dette. I dag er det god tilgang på bustadtomter i kommunen. Dette sikrar folk stor valfridom i kvar dei ønskjer å bu. Bø senterparti meiner at det bør leggjast til rette for bustadbygging i alle krinsane, samtidig som det skal vere høve til å etablere sentrumsnære bustader. Dette er i samsvar med ønskje om jordvern og ei miljøvenleg utvikling. Mange som bur i Bø, også skule- og barnehagebarn, har ikkje tilgang til gang- og sykkelvegar for å kome seg til Bø sentrum. Det er eit mål å få til god tilgang til sentrumsfunksjonar både for dei som køyrer bil og dei som tek seg fram på anna måte. Bø senterparti meiner vidare utbygging av gang- og sykkelvegar er ein føresetnad for redusert bilbruk og auka bruk av syklar/elsyklar. Dette er også viktig for å få til bustadbygging i heile kommunen. Denne utbygginga vil måtte skje over tid, men det er viktig å utarbeide prioriterte planar no. Bø senterparti seier nei til ordinær handel på sun- og heilagdagar. Vi ønskjer ikkje sundagsopne butikkar. Vi vil at Bø sentrum skal opplevast som pulserande og aktivt på sundagar, men det bør skje gjennom andre aktivitetar som t.d. utvida kulturtilbod og utvikling av Evjudalen. Bø senterparti vil arbeide for betra tilgang til offentleg toalett i sentrum.
Arbeide for utvikling av Bø sentrum ved at utbygging av detaljhandel og tenestetilbod blir regulert slik at: - særleg arealkrevjande og transportavhengige verksemder blir lagt til Grivijordet, - øvrig handel og tenestetilbod får utnytte potensialet i noverande sentrum, - etablering av tyngre industri blir lagt til Brenna industriområde, - verksemder som styrkjer forskings- og høgskulemiljøet blir lagt til Campus Bø. Utgreie alternativ for gjennomgangstrafikken gjennom Bø sentrum Arbeide for at Evjudalen skal takast vare på som «grøn lunge» At det framleis skal leggast til rette for utbygging av sentrumsnære husvære og for bustadbygging i alle krinsane i kommunen Svare nei til sundagsopne butikkar i Bø NÆRMILJØ OG OPPVEKST Å gi alle barn stabile og trygge rammer for utvikling og oppvekst, uavhengig av utrustning, familie, bustad, sosial og kulturell bakgrunn er ei politisk målsetting. Det er viktig å gje flest mogleg ein trygg og god barndom med trivsel og støtte frå familie og nærmiljø. Tidleg innsats gjennom råd og hjelp til familien frå tilgjengelege og samarbeidande fagfolk og tenester kan snu og/eller motverke negativ utvikling. Gode opplevingar og positiv påverknad i oppvekstmiljøet utanom heimen er av stor verdi. Barnehagen og skulen er spesielt viktige for utvikling og læring, men også som kontaktpunkt for føresette og fagfolk. Tverrfagleg og tverretatleg innsats frå førstelinetenestene er viktig for førebygging og tidleg hjelp til barn, unge og barnefamiliar. BARNEHAGE Barnehagen er eit viktig utviklingstilbod for små barn. Bø senterparti vil arbeide for at barnehagane skal vere ein god og triveleg stad å vere for barna. Men barnehagen skal òg vere ein god samarbeidspartnar for dei føresette og ein god arbeidsplass for dei tilsette. Bø senterparti vil gje barnehagane rammer som sikrar eit godt pedagogisk tilbod, godt inneklima og allsidig uteområde. Barnehagen skal førebu barna for ein god sosial og fagleg overgang til skulen. Alt dette krev tilsette med god og relevant kompetanse. Bø senterparti
vil arbeide for å sikre kvaliteten i barnehagane gjennom å arbeide for å skaffe faglærte medarbeidarar. Barnehagen har eigenverdi også for lokalsamfunnet. Gode barnehagar, med god dekning og relevant opningstid, sikrar at foreldre kan planleggje kvardagen slik dei ønskjer. Eit godt utbygd barnehagetilbod gir foreldre høve til å delta i arbeidslivet, unge foreldre høve til å ta utdanning og studiar, og legg til rette for likestilling. Bø senterparti vil sikre full barnehagedekking i Bø, og arbeide for to barnehageopptak i året. Sikre full barnehagedekking i Bø kommune Sikre barnehagelærarar etter- og vidareutdanning ut frå behova i barnehagen Arbeide for to barnehageopptak i året SKULE Skulane er, saman med heimen, den viktigaste oppvekstarenaen for alle barn. Skulen skal vere ein trygg og triveleg stad å vere og lære for alle elevar. Både gjennom planlegging og realisering av det faglege innhaldet i skulen og tilrettelegging av undervisningsrom og uteområde skal skulen ta omsyn til alle elevar. Bø senterparti vil arbeide for at Bø kommune skal vere ein aktiv skuleeigar som syter for forsvarleg undervisning gjennom god lærardekning og tilstrekkeleg ressursar tilpassa elevane sine behov. Bø kommune skal også sjå til at skulane i Bø utviklar trygge psykososiale skulemiljø. Læraren er den viktigaste ressursen i skulen. Motiverte og kompetente lærarar er ein føresetnad for god læring og godt samarbeid med heimen. Bø senterparti vil legge til rette for etter- og vidareutdanning for lærarar ut frå dei behov som skulen har til ei kvar tid. Mat og fysisk aktivitet på skulen er viktige faktorar for trivsel og læringsutbyte. Bø senterparti vil arbeide for auka fysisk aktivitet og tilbod om frukt og grønt i skulen. Mange barn og unge slit med helsevanskar av ulike slag. Bø senterparti går inn for å utvide skulehelsetenesta og styrkje det tverrfaglege samarbeidet med andre kommunale tenester med ansvar for barn og unges helse og utvikling. Mange barn og foreldre nyttar seg av SFO i Bø. Bø senterparti vil vidareutvikle SFO-ordninga gjennom å styrke kvaliteten på innhaldet, blant anna ved å inkludere leksehjelp.
Bø senterparti vil arbeide for: At skulen får ressursar som gir forsvarleg lærardekning og undervisning som er tilpassa alle elevar Å sikre etter- og vidareutdanning for lærarar ut frå aktuelle behov i skulen Å fremje eit trygt psykososialt skulemiljø gjennom kompetanse og rutinar for å førebyggje og handtere mobbing, krenking, trakassering og diskriminering Å styrkje samarbeidet mellom skulen, føresette og andre tenester med ansvar for barn og unges oppvekst Å utvide skulehelsetenesta på skulen Å auke fysisk aktivitet i skulen At alle får frukt og grønt i barne- og ungdomsskulen, gjerne lokalprodusert Å kvalitetssikre innhaldet i SFO og leksehjelp HELSE OG OMSORG Bø er ein god kommune å bu i med gode sosial- og helsetenester. Nyare statistikk viser likevel teikn på at ikkje alle har det like bra i Bø. Kommunen har til dømes relativt mange med låg inntekt, uføretrygda, barn av einslege forsørgjarar og pasientar som har psykiske problem. Bø deler to av dei største utfordringane i samfunnet, nemleg aukande helseforskjellar og at fleire, også ungdom, slit psykisk. Bø senterparti vil ta vare på, utvikle og vidareutvikle helsefremjande lågterskeltilbod i Bø. Alle skal kunne finne fram til hjelp og kjenne seg velkomne. Det er viktig for helsa å ha ein stad og/eller ein person ein kan kontakte uansett kva slags behov ein har. Det er viktig at kommunen utformar og spreier lettfatteleg informasjon om kvar og kva slags hjelp ein kan få. Bø senterparti vil arbeide aktivt for gode nærmiljø med lett tilgjengelege møteplassar lagt til rette for brei medverknad og deltaking på tvers av generasjonar, sosiale og kulturelle skilje. Det handlar om å skape gode levekår for alle i eit livsløpsperspektiv. Ved overgangen mellom ungdomsskule og vidaregåande skule fell somme ut av opplæringsog arbeidstiltak. Desse kan bli blir gåande utan sysselsetting og kan utvikle psykososiale vanskar. Bø senterparti vil arbeide for at ungdom som fell utanfor blir fylgd opp med tilpassa tiltak frå eit breitt samarbeid mellom skuleslag, fagfolk, næringsliv, enkeltpersonar og frivillige lag og organisasjonar. Eldre og andre med korte eller langvarige skader og funksjonstap treng ofte ekstra hjelp til å halde helsa så godt det let seg gjere, så lenge råd er. For mange handlar det om å få tilpassa
heimetenester, hjelp, behandling og/eller trening heime for kortare eller lengre tid, og/eller tenester på legekontoret eller på sjukeheimen. For andre handlar det om å kome seg ut, møte andre og ta del i ulike aktivitetar. Bø senterparti vil støtte vidareutvikling og nyetablering av tilbod tilrettelagt for eldre og uføre. Bø senterparti vil også styrkje og vidareutvikle arbeidsstova på Bø sjukeheim, som i ei årrekkje har vore ein gjestfri helsebringande møtestad med sine aktivitetar og tilstellingar for eldre. Sikre alle god oppfylging frå jordmor og helsestasjon gjennom svangerskapet og framover Sikre at det blir lettare for alle å finne fram til ein stad å vende seg uansett behov knytt til helse og omsorg Sikre tverrfaglege oppfylgingstiltak for ungdom som fell ut av vidaregåande opplæring Styrkje bemanning og drift på arbeidsstova på Bø Sjukeheim FLYKTNINGAR Bø kommune har eit godt mottaksapparat for flykningar og bygda har gode tradisjonar knytt til integrering av desse. Kommunen har eit bredt internasjonalt miljø m.a. knytt til høgskulen. Bø senterparti meiner at tilhøva ligg godt til rette for at kommunen kan gjere ein ekstra innsats for å ta imot ein større del av flykningane som kjem til landet. At kommunen skal ta imot fleire flyktningar enn den del som følgjer av kommunens storleik Leggje til rette for flyktningars deltaking i lokalsamfunnet gjennom samarbeid med frivillige organisasjonar, arbeidslivet og enkeltpersonar KULTUR Kommunen har rike kulturtradisjonar og eit pulserande aktivt og allsidig kulturliv med kjende utøvarar i for- og notid. Bø senterparti vil arbeide for at Bø kommune tek vare på kulturarven gjennom støtte til Bø Museum og andre som arbeider for å ta vare på og synleggjere den. Kunst og kultur gir positive ringverknader i nærmiljøet og i kommunen. Eit
godt og variert kulturliv fremjar engasjement, fellesskap, livskvalitet, demokratiutvikling og betre helse. Det offentlege skal leggje til rette for at alle skal kunne engasjere seg og oppleve god kunst og kultur gjennom eigenaktivitet og fellesskap. Målet er at alle skal kunne ta del i kulturaktivitetar dei er interessert i og få tilgang til kulturopplevingar dei ynskjer ta del i. Kommunen må leggje særskilt til rette for folk med nedsett funksjonsevne og grupper som fell utanfor, til dømes på grunn av dårleg økonomi. I seinare tid har kulturtiltak og aktivitetar for eldre blitt lyfta fram. I Bø har kulturkontoret utvikla tett samarbeid med skulen/ kulturskulen og frivillige lag og organisasjonar for å utvikle aktuelle og tilgjengelege kulturtilbod. Utfordringa for Bø framover blir å finne kulturprosjekt og aktivitetar som engasjerer barn og/eller unge. Bø har i dag mange innbyggjarar som har utvikla kultur til arbeids- og næringsveg. Bø har mange større og mindre forsamlingshus. Bø senterparti vil arbeide for at lokale lag og foreiningar i bygda skal få fritak frå kommunale avgifter. Frivillige lag i Bø arrangerer årleg fleire faste festivalar, særleg innan musikk, kultur og idrett, som krev omfattande dugnadsinnsats og utvikling av spesialisert kompetanse. Bø senterparti vil arbeide for at Bø framleis kan utvikle seg ved å vere ei aktiv festival- og stemnebygd. Arbeide for auka bruk av offentlege kultur- og idrettsbygg, skuleanlegg og private eller lagseigde forsamlingshus med uteområde Arbeide for at Bø framleis skal vere ei attraktiv festival- og stemnebygd Arbeide for at Gullbring Kulturhus framleis skal spele ei viktig rolle i kulturlivet og i profileringa av Bø Leggje til rette for etablering meir kulturbasert næring i Bø Bruke kultur i merkevarebygging av Bø Legge til rette for at barn frå familiar med dårleg økonomi og innvandrarbarn får delta gratis i kultur og idrettsaktivitetar Legge til rette for at kultur- og idrettstilbod blir tilgjengelege for folk med funksjonsvanskar Arbeide for at lokale lag og foreiningar i bygda skal få fritak frå kommunale avgifter
FRIVILLIG INNSATS Frivillige lag og organisasjonar er og har vore sentrale i idretts-, kultur- og samfunnslivet i Bø gjennom generasjonar. Dei har skapt meining, opplevingar, møteplassar og hus. Dei har kome med viktige initiativ og starta opp viktige prosessar av sosial, kulturell, frilyndt eller religiøs karakter i Bø. Bø senterparti vil arbeide for at kommunen skal leggje aktivt til rette for at denne mangfaldige tradisjonen i samarbeid med frivillige lag og organisasjonar blir ført vidare. Mange klarar seg ikkje åleine i det daglege og treng eit lågterskeltilbod. Dette kan vere i form av praktisk hjelp eller transport for dei som bur utanfor sentrum og er avhengig av offentlege eller private transporttenester. Bø frivilligsentral spelar ei viktig rolle i å mobilisere frivillig innsats og finne udekte behov i kommunen. Sikre at frivillige lag og foreiningar blir høyrt i planarbeid om vidare utvikling av kommunen Opprette eit frivilligforum der kommunen, lag og foreiningar har faste møte for gjensidig informasjon Gje frivillige lag og foreiningar gode vilkår og rammer for innsatsen sin Arbeide for at Bø frivilligsentral får utvikle seg vidare KLIMA OG MILJØ Den største miljøutfordringa i dag er kampen mot klimautslepp. Bø kommune har i dag miljøfokus på fleire område. Dette arbeidet bør styrkast. Som knutepunkt har Bø eit ansvar for å legge til rette for miljøvenlege transportalternativ. I samband med opprusting av stasjonsvegen meiner Bø senterparti at stasjonsområdet må bli rusta opp med fleire parkeringsplassar og tjuverisikkert område for parkering av syklar. Det bør i tillegg plasserast ladestasjon for elbil på området og på fleire stader i sentrum. Bø senterparti meiner at fjernvarme basert på bioenergi er ei god miljøvennleg løysing som bør vidareutviklast. Bø har mange flotte høve til friluftsliv. Vi har turområde og turmål i sentrum, tett ved dei fleste bustadområda, langs elva og på fjellet. Vi kan padle, gå på tur, bade, fiske, jakte, klatre
og boltre oss i spennande natur. Friluftslivet i Bø har god tilgang til skog og mark heile året. Bø senterparti ønskjer å stimulere til god tilrettelegging og godt samarbeid med grunneigarar. Senterpartiet ser friluftsliv som ein viktig faktor for god folkehelse, og vil ha fokus på dette i planarbeid og i møte med frivillige lag og organisasjonar. Støtte tiltak som fremjar ei berekraftig utvikling i Bø Arbeide for ein miljøplan for heile kommunen der ulike tiltak blir prioritert Arbeide for ein miljøvenleg utvikling i Bø sentrum ved utvikling av gang og sykkelvegar, samtidig som tilgang for bilar og funksjonshemma blir ivaretatt Arbeide for ei framtidsretta opprusting av stasjonen, med fleire parkeringsplassar, tjuverisikkert område for syklar, ladestasjon for elbil og gode løysningar for av- og påstiging Setje inn tiltak for å redusere ulykkesrisikoen i trafikken Stimulere til god tilrettelegging og sikre godt samarbeid og god dialog med grunneigarane Vidareutvikle turstiar for rullestolbrukarar Arbeide for auka bruk av bioenergi Stimulere til ordningar som fører til mindre kasting av mat NÆRINGSUTVIKLING Bø senterparti vil arbeide for at Bø skal vere ein attraktiv kommune for næringsutøvarar innanfor landbruk, små og store bedrifter. Bø senterparti vil stimulere og støtte eksisterande næringsliv i kommunen innanfor t.d. primærnæring, handel, bygg og anlegg, reiseliv og kultur. For Bø og Telemark er reiselivet blitt ein viktig næringslivsaktør der Bø Sommarland, Kanalen og tilgang til fine naturområde er viktige drivkrefter. Bø senterparti vil bidra til å styrkje dette ved å hjelpe aktørane til auka samarbeid med fokus på aktivitetar og attraksjonar som Bø og Telemark kan tilby turistane. Kultur er ei viktig næring som bidreg positivt til anna næringsliv i kommunen. Bø senterparti vil arbeide for ei fortsatt prioritering av kulturskulen. Ulike arrangement, festivalar og
stemne er ein viktig inntektskjelde i Bø. Bø senterparti vil arbeide for at Bø kommune skal spele ei aktiv rolle i dette. Bø kommune har saman med Sauherad kommune etablera Brenna industriområde for tyngre industri / næringsverksemd. Bø senterparti vil arbeide for at dette arealet vert attraktivt for næringslivet. Bø kommune har næringsareal til bruk for "lettare" næring både på Grivijordet og i sentrum. Tomteareal for bustadbygging er også viktig for heilskapleg næringsutvikling. Bø senterparti meiner at Lifjell er viktig for næringsutvikling i Bø, og at kommunen legg til rett for god utnytting av området. Bø senterparti meiner at høgskulen og kompetansebedriftene i Bø er viktige, og ynskjer å legge til rette for at desse kan utvikle seg vidare. Høgskuleområdet (Campus Bø) er ein del av dette. Styrkje sentrum som attraktivt næringsområde Støtte nytt og eksisterande næringsliv i Bø Bidra til at Bø har nok tilgang på attraktive tomteareal Arbeide for at alle bustader i Bø får breiband Utvikle og utnytte Lifjell som tur- og turistområde Arbeide for å styrkje høgskulen og høgskuleområdet LANDBRUK Jord- og skogbruk har lange tradisjonar i Bø og er viktige for matproduksjon, sysselsetting og busetnad. I tillegg er landbruket viktig som forvaltar av kulturlandskap og naturressursar i eit langsiktig perspektiv. Bø senterparti vil legge til rette for at landbruket i Bø i framtida skal ha ei viktig rolle som produsent av mat, trevirke og energi, og som aktør i næringsutvikling, friluftsliv og busetnad. I ei tid med auka utfordringar knytt til klimaendringar og meir ekstremvær er det viktig med ein oppdatert rådgjevingsteneste knytt til innovasjon, nye metodar og sortar tilpassa klimaendringane. Landbrukets hus har ein viktig funksjon for kommunens landbruk.
Arbeide for at utbygging primært ikkje skal skje på dyrka mark Bidra til å sikre grunneigarinteresser og rettar Stimulere til eit samspel mellom primærnæring andre næringar for å utvikle nye berekraftige næringsvegar Sikre gode og sterke fagmiljø knytt til landbrukets hus Arbeide for auka produksjon og omsetting av lokal mat KOMMUNEREFORMEN Bø senterparti meiner at det er nødvendig å vurdere organisering og grenser for kommunen i høve til ein stram økonomi, behovet for å effektivisere kommunale tenester, auke vekst- og utviklingspotensialet og redusere kommunale administrasjonskostnadar. Bø senterparti meiner at auka interkommunalt samarbeid og/eller kommunesamanslåing kan vere eit middel til å oppnå dette. Bø senterparti meiner at det bør leggast opp til ein meir variert storleik på kommunane målt i innbyggjartal enn det regjeringa legg opp til. Avstandar, kulturtradisjonar og andre faktorar tilseier at mange kommunar fortsatt bør vere vesentleg mindre enn regjeringas minimumstal på 15 000 innbyggjarar. Ein føresetnad for vellykka samanslåing av kommunar er brei støtte blant innbyggjarane. Bø senterparti meiner at det kan ligge til rette for etablering av ein større kommune i Midt- Telemark, som utløyser nye arbeidsplasser, betre kommunale tenester og vekst i kulturlivet, og samtidig tek omsyne til miljøvenleg utvikling og lokaldemokratiet. I ein slik vurderingsprosess er det viktig at ein fokuserer på tiltak og løysingar som alle delar av den nye kommunen ser seg tent med, med vekt på felles mål og lagånd. Ei eventuell samanslåing til ein større kommune vil likevel ikkje fjerne behovet for interkommunalt samarbeid, som Bø kommune har lang erfaring med. Gå inn for at Bø skal bli del av ein større kommune dersom det samla sett gir betre tenester for innbyggjarane. Vurderinga bør basere seg på folkeavstemming Legge vekt på tiltak som alle delar av ein eventuell ny kommune ser seg tent med Vidareføre/ etablere nye interkommunale samarbeidsprosjekt avhengig av eventuell ny kommunestruktur
SAMFERDSEL Telemark har store utfordringar knytt til samferdsel. E-134 som hovudtrase mellom aust og vest vil føre til auka ferdsel av tyngre kjøretøy på RV 36 frå Seljord til Grenland. Dette vil auke ulempene for Bø så lenge riksvegen går gjennom sentrum. Ein gjennomgangstrafikk som kjem i konflikt med ei framtidsretta sentrumsutvikling. Senterpartiet vil arbeide for at det vert utarbeidd alternativ trase for RV 36 som tek omsyn til at Bø sentrum også skal vere attraktiv å reise gjennom. Bø senterparti vil arbeide for at dei sentrale sentrumsvegane får god standard med fokus på miljø. Bø senterparti ser g/s-utbygging som ein føresetnad for redusert bilbruk og auka bruk av syklar/ elsyklar mv, og for vidare bustadbygging i heile kommunen. God tilgang til sentrumsfunksjonane både for dei som brukar bil, gåande og andre må vere eit mål. Bø senterparti vil arbeide for å etablere ei utleigeordning for syklar og ladestasjonar for syklar på sentrale stader i sentrum. Det bør også etablerast ein tjuverifri sykkelparkering på stasjonsområdet. Sidan Sørlandsbanen blei bygd har Bø vore eit sentralt trafikknutepunkt for midtre og vestre del av Telemark. Senterpartiet vil arbeide for å oppretthalde Bø stasjon som knutepunkt for buss og tog og arbeide for betre korrespondanse mellom buss og bane. Bø senterparti vil støtte arbeidet med å etablere nye og klimamoderne jernbaneløysingar. Bøbussen må halde fram som eit viktig lokalt transportmiddel for mange grupper, studentar, eldre og for tilreisande i samband med store arrangement i bygda. Eit utvida samferdselsomgrep inkluderer breiband og mobildekning. I Bø er det utbygging av fibernettverk som på sikt sikrar eit godt breiband for mange. Bø SP vil arbeide for god mobildekning for dei delar av Bø-bygda som i dag har mangelful dekning. Arbeide for utbetring og vedlikehald av RV 36 Utgreie alternativ for gjennomgangstrafikken i Bø sentrum Legge til rette for auka bruk av sykkel Arbeide for vidare etablering av G/S-vegar i Bø Arbeide for eit framtidig godt jernbanetilbod i Bø Oppretthalde Bø-bussen Sikre eit best mogleg breibandtilbod i Bø og god mobildekningi heile kommunen