Kurs i gamle handverk Overflatebehandling av eldre hus Praktisk øving i turrmuring
Kurs i gamle handverk I samband med restaureringa av Bjørkheimstølen (94/1) i Vestre Slidre Statsallmenning, arrangerer Valdresmusea AS ein kursserie i eldre handverksteknikkar og byggjekonstruksjonar. Målet med kursa er å byggje nettverk og varig kompetanse som vil koma handverkarar, eigarar, produsentar og verneinteresserte i regionen til gode. Valdresmusea AS er administrativt og fagleg ansvarleg for kursa. Kurs Kursserie 1 1. Praktisk øving i turrmuring. 11. 12. september. 2. Overflatebehandling av eldre hus, ute og inne. 17. 18. september. Kursserie 2 3. Restaurering av glas og dører, våren 2010. 4. Taktekking med never og torv, våren 2010. Kursserie 3 5. Restaurering av pipe og eldstad, hausten 2010. 6. Taktekking med skifer, hausten 2010. Kostnad Alle kursa blir arrangert i Valdres, på Valdres Folkemuseum og Bjørkheimstølen. Kursavgifta er kroner 1000 per kurs. Kursavgifta inkluderer mat, kursperm og kursbevis. Hovudmålgruppe er handverkarar. Verneinteresserte, museumsfolk og eigarar av hytter og stølar er òg velkomne til å melde seg på. Sjå elles informasjon for dei enkelte kursa. Påmeldingsfrist, kursserie 1 15. august 2009. Bindande påmelding, kursserie 1 Det er bindande påmelding til kursserie 1. Dersom du likevel må trekke deg er fristen for dette 1. september. Dei som trekker utan å ha meldt i frå før fristen, blir fakturert reelle kurskostnader, kroner 4000. Kontaktinfo Ole Aastad Bråten Kulturhistorikar Valdresmusea Tlf: 61 35 99 11 E-post: ole-aastad.braten@valdres.museum.no
Bjørkheimstølen Bjørkheimstølen (94/1) ligg i Vestre Slidre Statsallmenning, tilhøyrande bruket Bjørkheim (88/3) i Vestre Slidre kommune. Bjørkheim (før 1927 Ulvestadhagen) var opphavleg husmannsplass under garden Ulvestad. Plassen vart truleg rydda i 1770-åra. Fleire husmenn budde her fram til 1881. Då vart plassen dregen innunder hovudbølet att. I 1894 vart plassen seld til Skraddar n, Ole Olsen Magistad, som i 1907 selde han til Ole Olsen Lahaug. I 1927 døypte han plassen om til Bjørkheim. I 1983 overtok Astrid Nordli (Lahaug, 50/2 i Vestre Slidre kommune) Bjørkheim og Bjørkheimstølen etter syskenbarna til faren: Ola (1905 1999), Øystein (1907 1958) og Olga Bjørkheim (1913 1981). Valdres Natur- og Kulturpark og Verdiskapingsprogrammet for kulturminne Valdres Natur- og Kulturpark er ein bygdeutviklingsregion som gjennom langsiktig merkevarebygging knytt til lokale natur- og kulturverdiar, skal gje auka verdiskaping og livskraft i lokalsamfunna. Slik vil Valdres ta vare på og utvikle viktige verdiar av lokal, nasjonal og internasjonal karakter. Kunnskapen knytt til heile spekteret av vår materielle og immaterielle kulturarv er viktige verkemidel i denne verdiskapinga. I 2006 starta Riksantikvaren satsinga Verdiskapingsprogrammet for kulturminne. Hensikta var å bidra til at kulturminne og kulturmiljø vart tatt i bruk i utviklinga av lokalsamfunn og næringsliv. Valdres er saman med Nord-Gudbrandsdalen ein av elleve pilotar for Verdiskapingsprogrammet for kulturminne. Dette betyr ei ekstra satsing på tiltak som kan gje auka verdiskaping i Valdres. Hovudintensjonen med programmet i Valdres er å styrke kulturarvsdimensjonane, med vekt på stølsliv og stavkyrkjer. I Valdres finn ein det største samanhengande stølsområdet i Nord-Europa. 400 av totalt 1600 stølsbrukarar i landet held til her. Valdres står også i ei særstilling i stavkyrkjesamanheng. Seks av dei 28 stavkyrkjene i Noreg ligg i Valdres. Kursserien er støtta av Valdres natur- og kulturpark gjennom Verdiskapingsprogrammet.
Kurs 1 Praktisk øving i turrmuring innføring i tradisjonen I løpet av dei to kursdagane ser vi på ulike prinsipp for turrmuring. Enkel teori skal overførast til praktisk kunnskap gjennom bygging av ein frittståande kistemur. Kistemuren som murtype er ofte utført som turrmur. Vi finn mange døme på dette, til dømes steingjerder og murar under bustadhus. Ved muring av kistemur må ein beherske alle grunnleggande prinsipp for muring, som seinare kan overførast til andre murtypar. Deltakarane får øve seg på å sjå form og storleik, sett i system, ved å legge stein etter stabile prinsipp for muren. Deltakarane får elles vera med å planlegge muringa på ein måte som bevarar stabiliteten i muren. Kunnskapen som blir tileigna under denne delen av samlinga skal overførast til arbeidet med istandsetting av grunnmuren på eit tradisjonelt stølshus. Initiativtakar og samarbeidspartnar i kursserien, Else Sprossa Rønnevig presenterer kurset og Bjørkheimstølen med foredraget Verd å verne? JUST DO IT! Tid og stad Tid: 11. 12. september (fredag og laurdag). Stad: Bjørkheimstølen, Vestre Slidre kommune. Kursavgift: 1000 kroner. Deltakarar får mat, kursperm og kursbevis. Maks ti deltakarar. Målgruppe Røynde handverkarar i Valdres. Støls- og gardseigarar i Valdres. Museumsfolk og andre verneinteresserte i Valdres. Kursleiar Espen Marthinsen har sin yrkesfaglige utdanning gjennom prosjektarbeid i samarbeid med Norsk handverksutvikling (NHU). I perioden 2003 2006 var Marthinsen tilsett som handverksstipendiat ved NHU. Då jobba han spesielt med kunnskapen knytt til turrmuring og muring med leire. I tillegg til sin yrkesfaglege kunnskap har Marthinsen akademisk bakgrunn gjennom eit 3-årig ingeniørstudie frå 1989 1992. Marthinsen driv i tillegg firmaet MURING. Firmaet jobbar med eldre murkonstruksjonar og murteknikkar. MURING leverer ulike tenester; utførande, rådgjevande, instruksjon og forelesing, og er ein viktig aktør innan bygningsvernet i Noreg med fleire oppdrag i regi av Riksantikvaren og fylkeskommunane. Musea er òg ein viktig kunde, i tillegg til private eigarar som ynskjer å ta vare på unike bygg og anlegg. Påmelding/kontaktinfo E-post: ole-aastad.braten@valdres.museum.no Tlf: 61 35 99 11
Kurs 2 Overflatebehandling av eldre hus, ute og inne Materialar og fargebruk Torsdag 17. september 09.00 09.15 Registrering, kaffi og presentasjon av kurset. 09.15 10.00 Verd å verne? JUST DO IT! Foredrag ved Else Sprossa Rønnevig. 10.00 12.00 Tradisjonell overflatebehandling, dekor og fargebruk. Interiør. Forelesing ved Jon Brænne. 12.00 12.45 Lunsj. 12.45 14.15 Workshop: Interiør, del 1. Skade- og tilstandsbedømming av eldre måla og dekorerte overflater. Utarbeide forslag til tiltak. 14.15 14.45 Kaffi. 14.45 16.30 Workshop: Interiør, del 2. Presentasjon av resultata frå workshopens del 1. 16.30 17.30 Middag og kaffi. 18.00 20.00 Tradisjonell overflatebehandling, material- og fargebruk. Eksteriør. Forelesing ved Jon Brænne. Forelesinga er ope for alle interesserte. Fredag 18. september 09.00 10.30 Workshop: Eksteriør, del 1. Skade- og tilstandsbedømming av eldre overflater. Utarbeide forslag til tiltak. 10.30 10.45 Kaffi. 10.45 12.30 Workshop: Eksteriør, del 2. Presentasjon av resultata frå workshopens del 1. 12.30 13.30 Lunsj. 13.30 16.00 Ekskursjon til Bjørkheimstølen (og andre stølar i nærområdet). Sjå og drøfte moglegheiter for tiltak i samband med restaureringa av Bjørkheimstølen. 16.00 17.00 Oppsummering, spørsmål og diskusjon. Tid og stad Tid: 17. 18. september (torsdag og fredag). Stad: Valdres Folkemuseum, Fagernes. Kursavgift: 1000 kroner. Deltakarar får mat, kursperm og kursbevis. Maks 15 deltakarar. Målgruppe Røynde handverkarar i Valdres. Gards- og stølseigarar i Valdres. Fargehandlarar, museumsfolk og andre verneinteresserte i Valdres. Påmelding/kontaktinfo E-post: ole-aastad.braten@valdres.museum.no Tlf: 61 35 99 11
Kursleiar Jon Brænne er målerikonservator og seniorforskar ved Norsk Institutt for Kulturminneforsking (NIKU). Brænne har stor røynsle med konservering og restaurering av dekorasjonsmåling og veggfast dekor i oljemåling og limfarge, og har stor kunnskap om overflatebehandling, farge-, material- og dekorhistorie. Brænne held jamleg kurs og foredrag om desse emna og underviser fast ved ulike universitet i Noreg, Sverige og Danmark.
Om initiativtakarane Valdresmusea AS Valdresmusea AS vart stifta i 2007 og er den konsoliderte driftsorganisasjonen for Bautahaugen Samlinger, Bagn Bygdesamling og Valdres Folkemuseum. Ved dei to avdelingane i Sør-Aurdal er det aktive eigarorganisasjonar (båe stiftingar), ved Valdres Folkemuseum er det eit passivt styre (AS). Ved dei tre avdelingane er det venelag som er med og organiserer den friviljuge verksemda. Jamfør vedtektene for Valdresmusea AS er formålet å drive Kulturhistorisk bevaring, formidling og forsking, spesielt knytt til den lokale kulturarven. Det internasjonale museumsforbundets formålsparagraf skal ligge til grunn. Selskapet skal vidare drive sal av produkt og tenester, samt utøve annan aktivitet som er samsvarande med hovudformålet. Selskapet skal vera ein aktiv partnar i den regionale utviklinga av reiselivet i Valdres. Valdresmusea AS har 22 fast tilsette på heil- og deltid. Else Sprossa Rønnevig For om lag 25 år sidan fekk Else Rønnevig oppnamnet Sprossa. Bakgrunnen var eit brennande engasjement for den lokale bygningsarven og kraftige protestar mot det ho meinte var unødvendige og øydeleggande glasutskifting med falske sprosser på gamle hus. Rønnevig er interessert i bygningsvern fordi ho meiner det ikkje er likegyldig korleis det ser ut rundt oss. Vi har eit ansvar overfor dei som bygde og levde før oss og for dei som kjem etter oss. Godt utprøvde løysningar blir ofte forkasta til fordel for kjappe snarvegløysingar, seier Sprossa. Sprossa har skrive ei mengd bøker og artiklar og kjend frå aviser og vekeblad og program i radio og tv. Heime og på støle Stølsbruket i Vestre Slidre kommune er det mest aktive og intakte i landet. Kommunen og fjellstyret ynskjer å bruke eit treårig områdetiltak som oppstart på eit langsiktig arbeid med å sikre stølsdrifta i kommunen. Hanne Lykkja er tilsett i full stilling som prosjektleiar. Stølane har i mange hundre år vore viktige for landbruket i Slidrebygdene, og kulturlandskapet i fjellet ber sterkt preg av dette. Landbruket i Vestre Slidre har den mest aktive stølsbruken i heile landet, over 95 % av mjølkebruka tek buskapen til fjells om sommaren. Nedgangen i landbruket trugar no dette landskapet og den livsforma som har skapt stølslandskapet vi kjenner i dag. Det gamle kulturlandskapet med levande tradisjonar og stort biologisk mangfald er Valdreslandbruket sitt viktigaste bidrag til storsamfunnet. Skal vi redde stølsdrifta i Vestre Slidre, må vi jobbe både heime og på støle med tilbod til dei 91 mjølkebruka og alle andre som ynskjer å bruke stølane aktivt. Prosjektet vil få ansvar for mobiliseringsarbeid i lag med stølsbrukarane, arbeid med beitebruksplan, SMIL-midlar og andre utviklingsprosjekt.
Valdresmusea as www.valdresmusea.no www.valdres.no www.sprossa.no