Rapport frå Vevring grendalag si deltaking i Bygdeutviklingsprogrammet 2006-2008 Samandrag 2008 Vevring grendalag har gjennom året hatt 17 styremøte med 103 bokførde saker. Dei aller fleste av desse sakene har gått på bygdeutviklingsprogrammet. Laget har vore representert på Bygdeforum i Davik og Grendesamling på Skei. Av opne arrangement gjennom året har ein hatt Skjeltefest i januar og Sommarfest i juni. I september hadde vi kart og kalenderslepp på butikken. Ein har hatt møte med lag og organisasjonar i bygda og eigne møter med arbeidsgruppene i laget, i tillegg til møte med styret for Fjordbutikken A/S Gjennomføring i forhold til arbeidsplanen i søknaden. For 2008, og heile 3-års perioden samla Badestranda Fekk opprusta badestranda med skjelsand og godt dugnadsarbeid, høgtideleg opning i 2007. I vinter har vi rusta opp stranda mot butikken med ny mur. Ein ny og lun badeplass som er blitt svært populær, eit ekstra billass med sand må til. Kunstgalleri og internettkafe I 2006 arrangerte ein sommarutstilling på skulen I 2007 var ein med og arrangerte Slettemark-utstilling i bygda. I 2008 vedtok ein å støtte kunst i butikk: Kunstgalleri som tilbygg til butikken, kombinert med internettkafe og utvida kaffikrok. Grunnmur for tilbygget komt opp. 50000 av bumidlane går til dette tiltaket. Kunstvinklinga var truleg avgjerande for at SFE støttar prosjektet økonomisk. Vi trur at tiltaket vil styrke butikken sitt næringsgrunnlag, styrke staden som sosial møteplass, og styrke kunstryet til bygda.
Gjestebrygge Ein fekk tilbod på opparbeiding av båtopptrekk, der fastbuande og folk frå innlandet kunne sjøsetje og dra på land småbåtane sine. Av prisomsyn gjekk vi frå dette og tenkjer no ein eigen kran for same formål. Arbeidet er utsett då kaiområdet skal ombyggast først Marknadsføring Vi har fått utarbeida eit godt turkart, som også er blitt lagt merke til utom lokalområdet. Kartet inneheld også informasjon om kultur og natur. For fastbuande og turistar, fleire språk. Kunstkalenderen, som kunstgruppa i laget fekk laga, gjev god marknadsføring av bygda. Sommarfesten og presentasjon av kart og kalender, gav oss også merksemd i media. I tillegg til å vere god marknadsføring, gav også tiltaka salsinntekter til laget. Vi fekk ein del sponsormidlar og tilskot til kartet. Vi har vore i kontakt med NAF si vegbok, for å få fyldigare dekning der. Vegen til Vevring er dårleg skilta, Vegvesenet er kontakta om dette Logokonkurranse Denne var sett opp i arbeidsplanen, men gjekk ut, då einskildpersonar i bygda fekk laga ein Vevringlogo. Logoen prydar med anna ein eigen Vevring-bærepose. Merking av tursti Eit større arbeid har vore i sving med rydding og merking av turstiar. Innsatsen her har nok vore størst og best i Seljevollområdet. Ein del står nok att før kart (med oppteikna stiar) og terreng stemmer heilt. Parkering Vassbotten Parkeringsplass for turgåarar er opparbeidd. Vi har og bygd tilsvarande plass på Seljevollen. Gode utgangspunkt for turar både sommar og vinter. 17.mai-tog på nyopprusta bygdeveg Kunst og natur i Vevring
Gammal bygdeveg Bru og ein del av vegen blei høgtideleg opna i 2007. Nytt byggesteg blei ferdig i 2008. Opninga her var endå meir høgtideleg: Først med 17. mai tog. Seinare med assistanse av Fylkesordførar, og symbolsk kystvegoppstart med representantar frå kommunane Flora, Askvoll og Naustdal. Ein populær og sjarmerande skule og turveg på om lag 700 meter, finansiert av bu-midlar, smil-midlar og grunneigar Heimeside www.vevring.no Vi har ei fin heimeside, med mykje nyttig informasjon. Ny programvare er innkjøpt Vevringutstillinga Vi trur at både arbeidet med permanent kunstgalleri og ein årleg kunstkalender vil vere med og styrke den tradisjonrike og unike Vevringutstillinga, som har 30-års jubileum i år. Tilflytting Grendalaget fekk kommunen (næringsfondet) til å finansiere medlemskap i eit eige tilflyttingsprosjekt. Ei gruppe i laget har jobba med prosjektet. 3 familiar frå Nederland og Tyskland er komt til bygda desse åra. Det er fint å sjå at tilfyttarane tek del i bygdelivet: gjennom arbeid, som musikarar, som dyktig fotograf til kunstkalender, og i kulturlivet ellers. Fleire utflytte bygdefolk har også komt attende, og bygt nytt eller restaurert eldre hus. Ledige bustadtomtar i bygda er viste på heimesida. Dalåsen Redal Eiga arbeidsgruppe var nedsett for å jobbe med denne utsikts/rasteplassen. Redal grendalag har sagt ja til å fullføre prosjektet, og vert tildelt dei budsjetterte midlane om arbeidet vert utført i år. Avkøyrinsløyve frå Vegvesenet er innvilga. Grendahuset Redal Vi har løyvd midlar til eit triveleg og popuært forsamlingslokale Kvellestad I bu-søknaden er det budsjettert med kunstskulptur på Kvellestad. Bygdefolket ynskte å prioritere ballbinge Grendalaget har gjeve tilsagn om støtte. Det vert lagt ned eit imponerande arbeid med ballbingen,-ein håpa på endeleg klarsignal i 2008, men må prøve på nytt i 2009, Eit svært godt tiltak for born og ungdom i distriktet. Rasteplassen på Dalåsen får fin utsikt Badestrand, butikk og utsikt frå volleyballbane
Næringsutvikling Ein har løyvd midlar til vidare utvikling av Fjordbutikken, og til ny danseutstyrsbutikk Laget var representert på seminar om eventuell mineralutvinning i Engebøfjellet Ein ynskjer å vere med og arrangere seminar om konsekvensanalysen for fjellet, når denne er klar. Næringsutvikling har utover dette ikkje vore fokusert særleg på. Grunnen er uvissa kring mineralutvinning, der ein ikkje enno veit om bygda blir ei industribygd, eller held fram som før. Veglys Ei arbeidsgruppe var nedsett for å få veglys langs riksvegen gjennom Vevring. Arbeidet er ikkje fullført Utførde oppgåver i tillegg til arbeidsplanen Tall Ship Race Å få vitjing av Tall Ship Race er nemt i søknaden. Russiske Mir la til kaia på Engebø, og fleire hundre personar var med skipet til Naustdal. Laget var engasjert med vakter i Naustdal, så vi kom frå Tall Ship Race med overskot! Sommarfest Både i 2007 og 2008 var det sommarfest på Myraløa. Dagen starta med ungdomseminar, der alle ungdomane frå bygda, under 35 år var inviterte, til å seie noko om framtida for bygda, og kva som må til for at dei utflytta kjem attende. Dei fekk og sei si meining til dei inviterte gjestane: I 2007 Ordførar Jan Herstad, og leiar for bu-prosjektet i fylket, Oddveig Birkeland. I 2008 hadde ein besøk av fylkesordførar Nils R. Sandal og varaordførar i Naustdal, Harald Kvame Seinare på dag var det bruopning, badestrandopning og vegopning, der gjestane fekk æra av å vere snorklipparar. Vegar var litt av fokuset i 2008: bygdeveg, kystveg og riksveg. Med fylkesordførar, og leiar i Sogn og Fjordane Ap, som lokale vegopnarar, var kanskje vårt vesle stunt med og gjorde litt til at fylkestinget før jul løyvde 50 millionar til utviding av Rv 611, dei første kilometerane frå Naustdal sentrum. Sommarfesten heldt fram med bygdefest på kvelden. Partytelt er innkjøpte, til eigne festlege arrangement, og utleige til andre.
Sandvolleyballbane Under sommarfestane fekk ungdomane kome med ynskje om aktivitetar og tilbod. Ei ungdomsgruppe har vore samla for å prioritere tiltak og ynskjer å ta til med ei sandvolleyballbane. Ein var og på synfaring for å sjå på aktuell plassering. Arbeidet med innhenting av pristilbod og søknad om tippemidlar er i gang. Måloppnåing På bu-samlingar har ein lært at klarer ein å innfri halvparten av tiltaka i bu-søknaden, har ein grunn til å vera fornøgd. Det er derfor litt spennande å bla gjennom søknaden, og sjå at dei aller fleste tiltaka er gjennomførde, eller er i ferd med å bli det. Fleire tiltak er også komne til under vegs. Viktige erfaringar Tida i bu-prosjektet går svært fort. I tillegg er perioden i praksis berre to og eit halv år, då søknaden er innvilga tidleg på sommaren første året. Kanskje ein skulle utvide perioden til 4 år, der fjerde året var eit ferdigstillingsår, utan ekstra løyvingar, men med rapporteringsplikt og invitasjon til deltaking i samlingane på fylkesplan Det har vore interressant å vere med i bu-prosjektet, med spennande samlingar på fylkesnivå, der mange dyktige innleiarar og deltakarar har vore med. Enkelte kunne nok vore meir konkrete i bodskapen sin. Bygdene har sendt avgarde mange taleføre folk, så tidsskjema og tema har gjerne sprukke når desse har slept til. Kanskje ein skal vere tydelegare på om det er årsrapport som skal leggast fram, eller det er ei framsyning av alt bygda har å by på. Ein detalj i lagsarbeidet, i desse datatider er å slå eit slag for den gamle gode handskrivne møteboka, der lause ark ikkje vert tatt ut, eller gløymd å setje på plass. Eit viktig grunnlag når ein diskuterer kva vedtak som verkeleg blei gjort, og ikkje minst eit viktig hjelpemiddel når årsrapport skal skrivast. Kvar går vegen vidare Arbeidsplanen viser at det meste av arbeidet er utført, og at det vert arbeidd vidare med det som enno ikkje er ferdig. Grendalaget er alt i sving med nye arbeidsoppgåver. Vi håpar at dei tiltaka som er sette i verk og som er i ferd med å bli sette ut i livet, vil gjere Vevringområdet til ein god plass å bu, i tida som kjem. Takk for innsatsen til bygdefolket. Takk for støtte frå Naustdal kommune Takk for tilliten til Bygdeuviklingsprogrammet til Fylkesmannen i Sogn og Fjordane, som let oss vera med i eit spennande og nyttig bygdeuviklingsprosjekt.