Kafédialog Ungdommens kommunestyre Problemstilling A1: Psykisk helse I UngData svarte elevane på spørsmål om psykisk helse. Særskilt spørsmåla om bekymring, og «føler at alt er eit slit» får høge tal. Kva trur du er grunnen til desse høge tala? Kva trur du kan gjerast for at ungdom bekymrar seg mindre og føler seg mindre slitne? Kven kan bidra til ei endring, trur du? Og kvifor akkurat desse? For mykje lekser og mykje aktivitet på fritida kombinert med press om å vere best og sjå bra ut verkar inn på desse tala. Samstundes føler spesielt jenter mykje ansvar. Det er status og kult å vere flink, og ein strevar for å vere god både i fag og idrett. Få ein plass der ein kan jobbe/gjere lekser etter skuletid, eventuelt starte leksehjelp (sjå til Leikanger, dei har leksehjelp). Foreldra har ikkje kunnskap til å hjelpe til med lekser når ein kjem opp på ungdomstrinnet. Bruka elevar frå vidaregåande til leksehjelp? Prøve å legge mindre press på seg sjølv, samstundes som foreldre og lærarar minner ein på at skule ikkje er alt. Kan lærarar ta omsyn dersom ein allereie har mykje prøvar og innleveringar ei veke? Unngå at alt samlar seg opp same vekene. For å endre kjensla av press og bekymring bør meir informasjon om psykisk helse (frå 4.klasse) inn i skulen, og ungdomsskulane bør starte med «MOT». Det er mange yrkesval å ta - det kan vere slitsomt å tenkje på, og gjev bekymring for at ein ikkje har valt det rette yrket. 1
Sjå NOVA rapport om stress og press blant ungdom her A2: Psykisk helse om å be om hjelp Generelt er det slik at majoriteten av ungdommen har det bra og er tilfreds. Likevel viser forsking at om lag 20 % av alle ungdommar slit med psykiske plagar som angst og depresjon. Det kan vere som følgje av problem med venner, skuleprestasjon, føresette som skal skiljast m.m. Studiar viser at mange unge vegrar seg for å be om hjelp til psykiske problem. Kva trur du kan vere årsaker til at det er vanskeleg å be om hjelp? Kven kan bidra til ei endring, trur du? Og kvifor akkurat desse? Innspel frå medlemmane i Ungdommens kommunestyre: Starte opp «MOT» på ungdomsskulane i Luster. Nytte sosiale mediar, som Facebook til å informere om psykisk helse. Ei side der ein kan finne informasjon om ulike diagnosar (spesielt angst og depresjon), svar på vanlege spørsmål og link til andre relevante sider (helsestasjon for ungdom osv.). Eventuelt opprette ei felles side for Helsestasjon for ungdom, psykisk helse og «saman om barna i Luster». Om ei slik side kjem opp og går bør ein sørgje for at link til denne sida ligg på skulane sine nettsider. NB! Viktig informasjon bør stå på fleire språk, ikkje alle meistrar norsk like godt. Moglegheit til å spørje spørsmål anonymt. Vil gjere terskelen lågare for å ta kontakt. Fokus på å normalisere psykisk helse. Reise ut til skulane og informere om psykisk helse, slik at det på sikt blir mindre tabu rundt det å slite psykisk. 2
Problemstilling B: Nettvett I UngData svarte elevane på spørsmål om nettvett. Særleg på spørsmål om utestenging og at nokon har skrive sårande ting til deg eller om deg, får høge tal. Kva trur du ligg bak/kan forklare resultata på desse to spørsmåla? Kva kan gjerast for å førebygge nettmobbing og utestenging (digital)? Kven kan bidra mest til ei endring? Og kvifor akkurat desse? Tala viser at det er mindre førekomst av nettmobbing på vidaregåande enn ungdomsskulen. Trur det kjem av at ein blir meir moden på vidaregåande, medan det er litt meir status å vere frekk i munnen på ungdomsskulenivå samstundes som mange er tøffare bak ein skjerm enn i verkelegheita. For å førebygge nettmobbing bør ein ha internettopplæring frå 4. klasse. Viktig å komme inn tidleg og førebygge, ikkje etter ting har eskalert. Her bør politiet vere med for å vise kor alvorleg dette er, og snakke om konsekvensane av slik mobbing. Viktig å vise dømer, men ein må då passe på å ikkje berre vise dømer på det verste som kan skje. Treng å sjå at nettmobbing også gjeld utestenging frå grupper på sosiale mediar og sleivete kommentarar som kanskje er morosame for avsendar, men ikkje for den det gjeld. Når det gjeld å bidra til endring har foreldra stor innverknad. Andre er lærarar, medelevar, andre personar som angår ungdommane og personar med status (t.d kjendisar som står opp mot nettmobbing). Informasjon om bruk av passord og kva er gode passord. 3
Problemstilling C: Oppvekstvilkår Visjon i Luster kommune sin kommuneplan er «Trivsel og utvikling i Luster». Hovudmål for barn og unge i kommuneplanen er: «Alle barn og unge skal ha gode og likeverdige oppvekstvilkår som stimulerar til aktiv samfunnsdeltaking og legg til rette for god psykisk og fysisk helse». Kva meinar du er dei viktigaste tiltaka for å skape gode oppvekstvilkår for barn og unge i Luster? Samfunnsdeltaking: Gjere det lettare å få deltidsjobb eller sommarjobb. Rus og psykisk helse: Meir fokus på desse områda i skulen. Hente inn ekstern førelesar på ungdomstrinna ein gong per skuleår. I tillegg er det viktig med små dosar om begge tema heile skuleåret, kanskje som eiga fag eller gjennom MOT. Fritid: Få fleire aktivitetar som ikkje berre er idrett. Få opp nettsider for dei ulike aktivitetane. Ungdomskveldar er det bra av, men kunne vore fint med fleire felleskveldar for Gaupne og Hafslo. Skule: Varierte læringsmetodar, ynskjer meir praktisk læring, til dømes bedriftsbesøk. Få til ei anonym varslingsteneste for mobbing, til dømes eit nummer ein kan sende ein anonym SMS til. I forhold til mobbekartlegging så må spørsmål bli meir detaljerte enn dei er i dag, om ein skal klare å fange opp mest mogleg. Helse: Viktig å opplyse og gi tilpassa informasjon til dei ulike aldersgruppene. Er litt lite tilbod til dei under 16 år. Kanskje få inn psykolog i ungdomsskulane og miljøarbeidarar på barneskulane? Viktig å informere tidleg om psykisk helse heilt frå barneskulen, ungar kan vere pårørande. Samleplass for ungdom, der alle kan møtast til aktivitetar. Ein stad der alle kan delta og føle seg vel. Ynskjer informasjon om korleis kroppen reagerer på rus, korleis ein skal førebygge, og kva ein kan gjere i ulike situasjonar. Dette bør undervisast i etter alder, korleis ein drikk på ein ansvarleg måte. Det må lærast, ikkje berre frå rådast. Alkohol blir nytta i mange samanhengar. Viktig at foreldre er gode førebilete for borna sine - vere bevisste på det. UK er bra at unge kan få delta politisk. «Blås Grønt» er bra. Viktig at politiet er «nær» borna. 4
Problemstilling D: Helsestasjon for ungdom Alle kommunar er pålagde å ha tilbod til ungdom opp til 20 år På ungdomsskulane har helsesøster fast kontortid på faste dagar. Dette er tilbod til ungdom mellom 13 og 16 år. På dei vidaregåande skulane er det ôg helsestasjonstilbod. I Sogndal er det helsesøster tilgjengeleg kvar dag i skuletida. I Luster har me i fleire år hatt HFU kvar onsdag kl 15.00 17.00. Jordmor Kine eller ei helsesøster er til stades mellom 15.00 og 17.00. Helsestasjonslege Sofie er til stades mellom 15.00 og 16.00. Kva tykkjer de om onsdagar som fast dag? Kva tykkjer de om opningstida 15.00 17.00? Kva trur du skal til for at dette tilbodet blir brukt meir? Innspel frå medlemmane i Ungdommens kommunestyre: Ynskje om seinare opningstider. Fredag er ein betre dag enn onsdag. Ei rullerande ordning med ulik opningsdag i partalsveker og oddetalsveker kunne fungert godt. Nokre opne dagar i sommarferien og andre ferier. To månadar stengt blir for lenge. Moglegheit til å kunne stille spørsmål på Facebook eller andre sosiale media. Vil gjere terskelen for å be om hjelp lågare. Ein av årsakane til at tilbodet ikkje blir brukt meir kan vere at elevar ved vidaregåande nyttar helsesøster der. Ynskje om midlertidig ordning på gratis vaksine for hjernehinnebetennelse. 5