Fylkesveg 661 Haugen - Myrold Behov for utbetring

Fylkesveg 661 Haugen - Myrold Behov for utbetring Utgreiing som grunnlag for Regional transportplan 2014-2023 Sogn og Fjordane fylkeskommune SVEIS: 2012/155093-1 Region vest Vegavdeling Sogn og Fjordane Plan- og forvaltningsseksjonen Desember 2012

Forord Denne rapporten er ei utgreiing for ei strekning av fylkesveg 661 mellom Haugen og Myrold. Strekninga inngår i «Handlingsprogram for fylkesvegnettet 2010 2013 (19)» under kapittel 8.4 Marginallister. Under mindre investeringstiltak, utbetring av fylkesvegar, er fv. 661 Haugen Myrold oppført med 13 millionar 2010 kroner i perioden 2014 2019. Fylkestinget vedtok handlingsprogrammet 8. desember 2009. Utgreiinga er laga etter oppdrag frå Sogn og Fjordane fylkeskommune. Den er ei fagleg tilråding frå Statens vegvesen og vil vere eit av grunnlagsdokumenta for Regional transportplan. Denne vil bli handsama etter reglane i plan og bygningslova. Det er der prioriteringar og val vert gjorde. Fylkesveg 661 Haugen Myrold. Behov for utbetring. Desember 2012 1

Innhald Forord... 1 1. Innleiing... 3 2. Vegen sin noverande og framtidige funksjon... 4 2.1 Omfanget, utstrekninga og funksjonen til vegen... 4 3. Status og utfordringar for vegen... 5 3.1 Trafikktilhøve... 5 3.2 Geometrisk standard og framkomst... 5 3.3 Trafikktryggleik... 7 3.4 Miljøtilhøve... 8 4. Mål for utvikling av vegen... 8 4.1 Mål i eit 30 årsperspektiv... 8 4.2 Utfordringar for Haugen Myrold... 8 4.3 Mål for Haugen Myrold... 9 5. Strategiar og tiltak for å nå måla... 9 5.1 Investeringstiltak... 9 5.2 Mindre utbetringar. Utbetring av møteplassar. Opprusting av dekke, overbygning, underbygning og drenering... 9 5.3 Oppsummering... 9 2 Fylkesveg 661 Haugen Myrold. Behov for utbetring. Desember 2012

1. Innleiing Riksvegane er ryggrada i det overordna nasjonale vegsystemet. Dei bind landsdelar og regionar saman. Mellom riksvegane, og ut frå riksvegane, går fylkesvegane som fordeler trafikken i regionen. Mange av fylkesvegane, særleg dei som var riksvegar før regionreforma frå 1. januar 2010, har viktige hovudvegfunksjonar. Andre fylkesvegar, slik som fv. 661 er viktige for den lokale trafikken. Denne vegen har lokalvegsfunksjon for området aust for rv. 15 på den aktuelle strekninga, og knyter grendene til det nasjonale vegnettet (og dermed til kommunesenteret Nordfjordeid). Denne utgreiinga omfattar den 11,2 kilometer lange strekninga frå Haugen (krysset med rv.15) og til Myrold (krysset med armen til rv. 15). Dette utgjer hovudparsell 2 (Haugen Espe bru, 3,072 kilometer) og den første delen av hovudparsell 3 (Espe bru Myrold, 8,140 kilometer). Grunnlaget for utgreiinga er vegnormalane frå Statens vegvesen. Fylkeskommunen kan gjere fråvik frå dei, men det er i enkeltsaker og etter konkrete vurderingar. Dei viktigaste vegnormalane i denne samanhengen er 017 Veg og gateutforming (veggeometri for nye og utbetra vegar), 231 Rekkverk (sideområdet til vegen), 018 Vegbygging (oppbygging av vegkroppen) og 021 Vegtunneler. Det er openbert at full utbetring av strekninga til vegnormalstandard vil medføre svært høge kostnader. Sidan det i gjeldande handlingsprogram er sett av relativt avgrensa midlar til denne vegen, er ei slik utbetring behandla nokså summarisk. Det er i staden lagt vekt på å vurdere mindre tiltak. Kostnadane i utgreiinga er i 2012 kroner inkludert meirverdiavgift, om anna ikkje er angitt. Dei nye reglane for meirverdiavgift for vegtiltak (ingen fritak) er lagd til grunn. Utgreiinga er laga på eit overordna nivå, og er meint å vere det faglege grunnlaget for vidare prioriteringar. Denne utgreiinga vil vere eit grunnlagsdokument for fylkeskommunen sitt arbeid med Regional transportplan og for konkrete prioriteringar for perioden 2014 2023. Fylkesveg 661 Haugen Myrold. Behov for utbetring. Desember 2012 3

2. Vegen sin noverande og framtidige funksjon 2.1 Omfanget, utstrekninga og funksjonen til vegen Fylkesveg 661 startar i krysset med riksveg 15 ved Haugen og går til krysset med rv. 15 ved Ytre Rød ei strekning på 15,6 km. Ved Myrold går det ein kort arm (0,3 km) ned til rv. 15. (Denne utgreiinga gjeld strekninga Haugen Myrold.) Vegen ligg i Eid kommune. Figur 2.1 Fylkesveg 661 Haugen Myrold ( Ytre Rød) 4 Fylkesveg 661 Haugen Myrold. Behov for utbetring. Desember 2012

3. Status og utfordringar for vegen 3.1 Trafikktilhøve Trafikken på vegen er relativt liten. Den er høgst mellom Haugen og Espe, og avtek vestover. I 2011 var årsdøgntrafikken (ÅDT 1 ) mellom Haugen og Espe 450. Tungtrafikkandelen var 10 %. Mellom Espe og Myrold var ÅDT 250 med tungtrafikkandel på 10 %. Vidare til Ytre Rød var trafikken ÅDT 150 med tungtrafikkandel på 10 %. 3.2 Geometrisk standard og framkomst 3.2.1 Vegstandard Vegnormalstandard Denne strekninga kan karakteriserast som samleveg. Ut frå trafikkmenga skal då i hovudsak dimensjoneringsklasse Sa3 (ÅDT 0 1 500 og fartsgrense 80 km/t) i handbok 017 «Veg og gateutforming» nyttast for nye vegstrekningar. (Dimensjoneringsklasse U Sa3, ÅDT 0 1500 og fartsgrense 60 eller 80 km/t i høyringsforslag til ny handbok 017 for utbetringsstrekningar.) I eit 20 årsperspektiv vil heile den aktuelle strekninga frå haugen til Myrold ha trafikkmengde på ÅDT 300 eller høgre og skal i utgangspunktet ha vegbreidde 6,5 meter. Når det gjeld Espe Myrold, ligg denne delen av vegen heilt på grensa, slik at 1 felts veg med 4,0 meter vegbreidde er aktuelt. Vegbreidde Vegbreidda varierer, men den ligg om lag på 4,15 meter. (Registreringane varierer mellom 3,6 meter og 4,5 meter.) Hovudparsellen mellom Espe og Myrold er den smalaste delen av vegen. I 2012 er fem korte strekningar med samla lengde på vel 300 meter utbetra til ei vegbreidde på om lag 6 meter. Desse utvidingane fungerer som møteplassar. Horisontalkurvatur Nærare 50 % av strekninga har rettlinje eller kurveradius over 200 meter som er minimumsradius i forslaget til ny handbok 017 (dagens krav er minimum 150 meter). 15 % av strekninga har radius under 150 meter og 6 % under 100 meter. 2 % har radius under 50 meter (4 kurver). Det er ein god del møteplassar på strekninga over 30. Det vil seie at det i gjennomsnitt er ca. 360 meter mellom kvar. Ingen har utforming i samsvar med vegnormalen. Dei er for korte, og dei fleste er berre ei lita utviding av vegen (kanskje så lite som ein meter). Likevel fungerer dei på eit vis for møting av personbilar, berre farten er låg nok. I tillegg er det svært mange avkjørsler langs vegen (nærare 100), der det også i mange tilfelle er mogeleg å møtast. Stigningstilhøve Vegen stig frå Haugen opp til Espe. Høgdeskilnaden er vel 100 meter. Det er nokre kortare parti med stigning rundt 8 % (som er maksimal stigning i høve til vegnormalen). Mellom Espe og Myrold fell først vegen om lag 30 meter for deretter å stige med 60 70 meter. Her er det berre kortare parti med stigning opp mot maksimal stigning i vegnormalen. 1 ÅDT, årsdøgntrafikk, gjennomsnittleg trafikk pr. døgn rekna over året Fylkesveg 661 Haugen Myrold. Behov for utbetring. Desember 2012 5

Dekketilstand og bereevne Vegen står oppført i Vegliste 2012 Fylkes og kommunale vegar Sogn og Fjordane med bruksklasse BkT8. Det gjeld heile strekninga og betyr at vegen berre kan trafikkerast med kjøretøy med maksimal aksellast 8 tonn. Største boggilast (to akslar) er 14 tonn. Grunnen til dette er at Solheim bru ikkje toler større last. Dekket er nedslite på store delar av strekninga med mykje synlege skader på grunn av låg bereevne. Både spordjupne og jamnheit på dekket er dårlegare enn kravet. Det er spesielt store problem med redusert bereevne om våren, men det vert ikkje sett i verk ekstra aksellastrestriksjonar. Det er gjennomført måling av bereevna på strekninga hausten 2012 i samband med denne utgreiinga. Målingane vart utførde av Vegdirektoratet og er såkalla nedbøyingsmålingar 2. Mellom Haugen og Espe er strekningsbereevna 3 8,1 tonn. Lågaste målte bereevne i eit punkt er 6,9 tonn. 20 % av strekninga har bereevne under 10 tonn og treng forsterkning dersom den skal tillatast for Bk10. På dei dårlegaste punkta ligg svakheita i undergrunnen, elles er det berelaget som er problemet. Rekkverk Det er rekkverk på om lag 17 % av strekninga. Det er framleis strekningar der det er behov for rekkverk i følgje kriteria i vegnormalen. Men det er stort sett god dekning med rekkverk. Ein del av rekkverket er av gammal årgang, og det finst også nokre låge støypekantar og til og med stabbesteinar på ei kort strekning. Dessutan gjeld det generelt at rekkverka ikkje er avslutta slik som dagen vegnormal krev (utbøying, ettergjevande rekkverksendar), og nokre er for låge eller har dårleg innfesting i vegkanten. Strekningar med spesielt dårleg standard Praktisk tala heile strekninga har låg standard, men parsellen mellom Espe og Myrold er dårlegast. Smal veg og dårlege møteplassar (spesielt mellom Espe og Myrold) og låg bereevne er største problemet. Det gjeld heile strekninga. 3.2.2 Fartsgrenser Frå Haugen til Espe og vidare mot Myrold er fartsgrensa 80 km/t. Frå km 6,6 ved Holene (like før kryss med kommunal veg til Torvika) er det fartsgrense 60 km/t. Like før kryss med armen til Stårheim (slutten på den aktuelle strekninga i denne utgreiinga) tek ein kort 50 km/t sone til. 2 Nedbøyingsmålingar vert gjennomførde med fallodd (Dynatest 8002 073). Vegen vert påført ei kjend belastning med eit lodd som fell ned på vegen. Deformasjonen av overflata vert målt i lastsenteret og i seks andre punkt i avstand 20 cm til 150 cm. Ut frå forma på nedbøyinga kan vi seie noko om kor svakheiten i konstruksjonen ligg (i dekket, i overbygninga eller i undergrunnen). Når vi kjenner talet på tunge kjøretøy og dekketype, kan vi rekne ut bereevna til vegen. Resultata kan nyttast til å planleggje eventuelle utbetringstiltak, det vil seie kva som skal gjerast og kor det skal gjerast 3 Strekningsbereevne er ein målt verdi og gir uttrykk for strekninga sin generelle bereevne. Strekningsbereevna vert sett slik at 90 % av strekninga har høgre bereevne (10 % kvantilen). Bereevne er pr. definisjon den største aksellasta ein veg kan ta over ein tidsperiode (dimensjoneringsperioden 20 år) utan at vegen sin tilstand, ved normalt vedlikehald, fell under ei definert akseptabel grense. Dårleg bereevne gir seg utslag i ei dekkelevetid som er lågare enn normert dekkelevetid 6 Fylkesveg 661 Haugen Myrold. Behov for utbetring. Desember 2012

Det vil seie at om lag 14 % av den aktuelle strekninga har nedsett fartsgrense. 3.2.3 Reisetid Reisetid er vurdert på fleire måtar. For det første er det brukt Statens vegvesen sin reiseplanleggjar Visveg. Dette programmet tek ikkje omsyn til vegstandard, men baserer seg i stor grad på fartsgrenser. På vegar med så dårleg standard som her, gir denne metoden for kort reisetid. I dette tilfellet blir resultatet 11 minutt. Reisetida er også berekna med programmet EFFEKT. Denne metoden gjer det mogeleg å vurdere konsekvensane av å utbetre vegen. Resultatet herfrå er vel 18 minutt. I tillegg er strekninga prøvekøyrd. Gjennomsnittleg kjøretid var om lag 13 minutt. 3.2.4 Kollektivtransport Det er ein skilta haldeplass for buss på den aktuelle strekninga. Det ligg ved vegkrysset på Hjelmeland. Her er det og leskur. Det går skolebuss kvar dag. I tillegg går det ei rute kvar veke i kvar retning. 3.2.5 Skredsikring Det er registrert eitt skred på den aktuelle strekninga. Dette var eit lite steinsprang mellom Haugen og Espe som ikkje førde til stenging. Statens vegvesen la 15. desember 2011 fram ein oversikt over behov for skredsikringstiltak for riksog fylkesvegane i regionen. Det er ikkje med tiltak for fv. 661. 3.2.6 Gang og sykkelvegar Det er ikkje gang og sykkelvegar på denne strekninga. 3.2.7 Drift og vedlikehald Det er ingen store bruer (over 100 meter) på fylkesveg 661. Det er 5 mindre bruer på denne vegen. Solheim bru er ei 1 felts bru bygd i 1950. Denne brua ligg på den delen av hovudparsell 03 som ikkje er med i denne utgreiinga, det vil seie strekninga mellom Myrold og Ytre Rød. (Den treng oppgradering for 1,8 millionar kroner for å kunne tillate Bk10.) Espe bru treng 1 million kroner til vedlikehald. Dersom vegen elles er sterk nok, kan dermed strekninga frå Haugen, via Espe til Myrold, med arm til rv. 15, skrivast opp til Bk10. Tidlegare rapportert behov for oppretting av forfallet og for oppgradering av heile fylkesveg 661 (inkludert strekninga Myrold Ytre Rød) er 6,4 millionar kroner. Av dette utgjer drenering 400 000 kroner, rekkverk og vegutstyr 900 000 kroner og overbygning og dekke 5,1 millionar kroner. Med grunnlag i nye bereevneregistreringar, der det går fram at om lag 20 % av strekninga har for låg bereevne, er det rekna med 16 millionar kroner til forsterking. 3.3 Trafikktryggleik 3.3.1 Ulykkessituasjonen Det er registrert ei politirapportert trafikkulykke i perioden frå og med 2001 til og med 2010 (10 år). Denne ulykka var ei personskadeulykke med lettare personskade. Fylkesveg 661 Haugen Myrold. Behov for utbetring. Desember 2012 7

Dette var ei utforkjøringsulykke. Ulykka skjedde i Remmedalen. Gjennomsnittleg ulykkesfrekvens 4 for perioden 2001 til 2010 er 0,23. Til samanlikning er gjennomsnittleg ulykkesfrekvens på vegnettet i Noreg 0,21. 2 feltsveg med fartsgrense 80 km/t har gjennomsnittleg ulykkesfrekvens på 0,14. 3.4 Miljøtilhøve 3.4.1 Vegtrafikkstøy Det er utført ei overordna berekning av støy frå vegtrafikken for Eid kommune 5. Det er nokre bustadhus på strekninga som ligg i eller nær inntil «gul sone», det vil seie at dei har utandørsnivå mellom 55 og 60 dba. Det er ingen personar som bur i hus som ligg over tiltaksgrensa etter forureiningslova 6, noko som ville ført til ansvar for vegeigaren til å gjennomføre tiltak. 3.4.2 Luftureining Det er ikkje gjort berekning av luftureining på denne strekninga. 3.4.3 Natur og kulturmiljø Det er ikkje kjende konfliktar med naturmiljø eller friluftsinteresser på den aktuelle strekninga. Det er mange registrerte bygningar av kulturhistorisk interesse langs vegen, men det er ingen freda bygningar. Det er ikkje kjende automatisk freda kulturminne langs vegen. 4. Mål for utvikling av vegen 4.1 Mål i eit 30 årsperspektiv Det er naturleg å ta utgangspunkt i den målstrukturen som vil bli nytta i Nasjonal transportplan 2014 2023 for utvikling av transportsystemet: Betre framkomst og reduserte avstandskostnader for å styrkje konkurransekrafta i næringslivet og for å bidra til samanknyting av felles bu og arbeidsområde Transportpolitikken skal byggjast på ein visjon om at det ikkje skal vere ulykker med drepne eller hardt skadde i transportsekstoren Transportpolitikken skal bidra til å avgrense klimagassutslepp, redusere miljøskadelege verknader av transport og bidra til å oppfylle nasjonale mål og Noreg sine internasjonale forpliktingar på miljøområdet Transportsystemet skal vere universelt utforma 4.2 Utfordringar for Haugen Myrold Dei viktigaste utfordringane er: 4 Ulykkesfrekvens: Tal på personskadeulykker pr. million kjøretøykilometer 5 Berekninga er utført av Statens vegvesen Region vest, ressursavdelinga, planseksjonen med programmet Vstøy/Vluft 6.0.3 6 Tiltaksgrensa etter forureiningslova er 42 db innandørs. Når vi gjer tiltak innandørs etter T 1442, brukar vi teknisk forskrift (NS8175 klasse C) som gir eit støynivå på høgst 30 db gjennomsnittleg i opphaldsrom 8 Fylkesveg 661 Haugen Myrold. Behov for utbetring. Desember 2012

Redusert framkomst og høge avstandskostnader pga. dårleg vegstandard (smal, svingete, ujamn veg) Låg bereevne, spesielt i teleløysingsperioden Generelt forfall på vegen 4.3 Mål for Haugen Myrold Statens vegvesen legg til grunn desse måla for strekninga: Framkomsten skal betrast ved betre drenering og utbetring av overbygninga slik at bereevna vert auka Forfallet på veg og bru må takast att 5. Strategiar og tiltak for å nå måla 5.1 Investeringstiltak Det er lite aktuelt å utbetre heile eller deler av strekninga til vegnormalstandard. Sjølv ei utbetring som inneber 2 feltsveg berre mellom Haugen og Espe og 1 feltsveg vidare til Myrold, kan komme til å koste over 200 millionar kroner. Det er langt over det som tidlegare har vore aktuelt i handlingsplanen for fylkesvegane. Det er derfor ikkje gått meir i detalj på slike alternativ. Med den låge trafikkmengda og den spreidde busetnaden, er det heller ikkje grunnlag for bygging av gang og sykkelveg. 5.2 Mindre utbetringar. Utbetring av møteplassar. Opprusting av dekke, overbygning, underbygning og drenering Vegen har liten trafikk og er lite ulykkesbelasta. Det er derfor ikkje grunnlag for å setje i verk spesielle trafikksikkerheitstiltak. Det er relativt mange møteplassar på vegen, sjølv om det er langt mellom dei enkelte stader. Største problemet er at møteplassane er for små. Det bør derfor setjast av midlar til dette. Statens vegvesen går ut frå ei fagleg vurdering inn for at det vert nytta 1 million kroner til bygging av nye møteplassar og til utbetring av eksisterande. Det er registrert eit behov for nytt rekkverk og utbetring av eksisterande. Vi vurderer behovet til å vere 1 million kroner. Største problemet på denne vegen er bereevna. Dei undersøkingane som er gjorde, tyder på at det er behov for forsterking av vel 2 kilometer av vegen. Tiltak vil kunne vere utskifting av overbygning og betre drenering. Det må gjennomførast meir detaljert planlegging av desse tiltaka. Ut frå ei fagleg vurdering går vi inn for at det vert nytta 20 millionar kroner til utbetring av overbygninga og til drenering. Espe bru bør utbetrast. Vi tilrår at det vert nytta 1 million kroner til dette. 5.3 Oppsummering Statens vegvesen si faglege vurdering er at det bør nyttast 23 millionar kroner til opprusting av fylkesveg 661 mellom Haugen og Myrold. Fylkesveg 661 Haugen Myrold. Behov for utbetring. Desember 2012 9

Region vest Askedalen 4 6863 Leikanger 57 65 58 28 olav.svangstu@vegvesen.no