Arbeidsreglement for Sogn brann og redning IKS (Sbr-Iks) 1. Innleiande I sakar som oppstår innafor område der Sbr-Iks p.t ikkje måtte ha eigne retningsliner vil vi inntil vidare sjå til dei retningslinene våre eigarkommunar måtte ha på det aktuelle området og anna offentleg regelverk. Jf. Arbeidsmiljølova, Lov om ferie, hovudavtalar, hovudtariffavtalar mv. 2. Kven reglementet omfattar Dette reglementet gjeld alle arbeidstakarar i eit fast forpliktande arbeidsforhold, jf.hovudtariffavtalen kap. 1 1. Reglane i reglementet gjeld ikkje når dei strir mot lov, tariffavtaler eller andre bindande reglar for Sbr-Iks. 3. Tilsetjing Arbeidstakaren vert tilsett for teneste i Sogn brann og redning og på dei løns- og arbeidsvilkår som går fram av gjeldande lover, reglement, tilsetjingsdokument og hovudtariffavtaler. 4. Arbeidsavtale Sbr-Iks skal gi skriftleg melding om tilsetting. Av arbeidsavtalen skal det gå fram kva for vilkår og plikter som gjeld for stillinga og ev tenestestad. Ved tilsetjing får arbeidstakaren utlevert eitt eksemplar av arbeidsreglementet. 5. Legeattest For stillingar der det blir stilt spesielle krav til helse, skal det leggjast fram tilfredsstillande legeattest før tilsetjinga. 6. Politiattest For alle stillingar skal det leggjast fram tilfredsstillande politiattest før arbeidstakar byrjar i stillinga. 7. Arbeids- og kviletid, avspassering Klokkesletta for arbeids- og kviletid skal gjerast kjende. Ordinær arbeidstid er 37,5 timer pr. veke eller 35,5 timer pr. veke etter reglane i
hovudtariffavtalen. Det er fleksitid for alle som har 100% stillingar, kjernetida er 0900-1400. Når arbeidets art gjer det naudsynt, kan det avtalast at matpausen vert ein del av arbeidstida. P.t. har alle tilsette i Sbr-Iks matpausen inkludert i arbeidstida. Grunnane til at matpausen er ein del av arbeidstida, kan vera at pauserommet ikkje er tilfredsstillande og/eller at tilsette ikkje har høve til å forlata arbeidsplassen i pausen. Tilsette med arbeidstid med meir enn 5 ½ timer pr. dag, har rett på pause, jf. arbeidsmiljølova 10-9 Lengda på matpausen er 30 minutt og den tilsette skal då vere tilgjengeleg for publikum mv. Tilsette med hovudstilling i selskapet kan etter avtale med leiar avspassere inntil 5 dagar samanhengande. Og det kan overførast inntil 40timar frå eit år til neste. Overskytande timar vert stroke. Det kan i spesielle høve søkast om å få overføre meir enn 40 timar eller ein kan søke om å få utbetalt timar. 8. Deltidstilsette ekstraarbeid/overtid, bæreplikt for radio/personsøkar Deltidstilsette kan ta på seg ekstraarbeid i tillegg til si ordinære stilling. Det totale timetalet skal i slike høve ikkje overstiga timetalet for 100% stilling. Med ekstraarbeid forstår ein her; vakter som ferie- og sjukevikar, samt ekstrahjelp og vakter grunna vakanse i stillingar. For stillingar i turnusordningar som har gjennomsnittsberekna arbeidstida si ved skriftleg avtale vert den enkelte arbeidstakar si arbeidstid pr. døgn og pr. veke å leggja til grunn. Arbeidstid utover desse grensene vert å sjå som overtid. For deltidstilsette vert det rekna meirarbeid for opp til full stilling. Den tilsette skal gje melding til næraste overordna som tilbyr ekstraarbeid, dersom timetalet overstig det som svarer til arbeidstid for 100% stilling. Deltidstilsette knytt til beredskapen har bæreplikt for radio/personsøkar, dette vert godtgjort særskilt. Dette inneber at ein skal bære radio/personsøkar på fritida når ein er i kommunen og ikkje er indisponert. (Kommentar: indisponert kan t.d vere at du er på fest og nyter alkohol. Men du er ikkje nødvendigvis indisponert om du t.d er på trening og oppheld deg utanfor 5 minuttars kravet til oppmøte for førsteutrykkinga. Dette er altså ikkje det same som å ha vakt, då kan ein ikkje vere indisponert). Dersom det vert oppdaga at personell med bæreplikt ikkje har med seg radio/personsøkar vert det gitt ei skriftleg åtvaring. Gjentekne brudd på bereplikta kan resultere i oppseiing.
9. Ferie Ferien må ordnast i samsvar med reglane i gjeldande ferielov og tariffavtale. Einingsleiar eller leiar som har fått delegert mynde, fastset ferietid etter samråding med arbeidstakaren eller dei tillitsvalde vedkomande har. Ferielista skal som hovudregel gjerast kjend så tidleg som mogleg og seinast 2 månader før ferien tek til. Tilsette i vaktordningar må tilpasse ferie til vaktordninga. Arbeidsgivar må sjå til at medarbeidarane tek ferie som planlagd. Det kan overførast maks 10 arbeidsdagar eller 12 virkedagar frå eit år til neste. 10. Fråvær frå arbeidet Fråvær på grunn av sjukdom, ulykke eller andre årsaker skal straks meldast til næraste overordna. Eigenmelding kan nyttast når arbeidstakar har vore tilsett i minst 2 månader. Arbeidstakar med kortare tenestetid må levera sjukmelding. Arbeidstakar med hovedstilling i Sbr-iks kan nytta eigenmelding i tråd med kva regler som gjeld for IA verksemder dvs inntil 8 kalenderdagar om gongen og inntil 24 kalenderdagar i løpet av 12 månader. (kommentar: det er truleg ikkje praktisk mogleg at tilsette i små deltidsstillingar vert omfatta av dette, men dei vil likevel ha moglegheit til å levere eigenmelding ved sjukdom). Meir opplysningar går fram av skjema Eigenmelding 2. Eigemelding skal leverast 1. arbeidsdag etter fråværet. Ved sjukefråvær utover dette skal arbeidstakar levera legeerklæring. Arbeidstakar plikter ikkje å gje opplysningar om sjukdomsarten. Leiaren vil kontakta arbeidstakar innan 8. fråværsdag for å avklare oppfølginga i sjukmeldingsperioden. 11. Utbetaling av løn Månads- og årslønte får løn den 12. i månaden, eller næraste føregåande yrkedag. Kvar arbeidstakar skal kontrollera at det er betalt rett sum. Eventuell feil må meldast snarast råd. Arbeidstakaren kan be om forskot inntil ein gong i månaden. Det er einingsleiar som tilviser lønsforskot. Attendebetaling skal som hovudregel skje påfølgjande månad, time, dag- og vekelønte får utbetalt løn 1 gong pr. månad og den 12. i månaden, dersom anna ikkje er avtalt. Det vert utbetalt det beløp som er tent opp i føregåande månad. Den einskilde arbeidstakar skal så langt det er mogleg kontrollera at rett beløp er betalt ut. Berre i desse tilfella kan det bli gjort frådrag i lønningane: a. Lovbestemte trekk b. Pensjonsinnskot og trekk til OU-ordninga. Pensjonsinnskot vert trekt frå byrjingsdatoen. Mellombels tilsette og vikarar som sluttar utan å ha blitt tekne opp pensjonsordninga, får
tilbakebetalt trekt innskot når dei sluttar. c. Sum som på førehand er skriftleg avtalt mellom kommunen og arbeidstakaren. d. Fagforeiningskontingent dersom fagforeininga ber om det, jf hovudavtalen. e. Erstatning for skade eller tap av arbeidstakar med vilje eller med grov aktløyse har påført Sbr-Iks. Kravet for slikt trekk er at arbeidstakar skriftleg erkjenner erstatningsansvar, eller at det er fastslått ved dom, eller at arbeidstakar rettsstridig sluttar i stillinga si. Lønstrekk skal avgrensast til den delen av løna som er over det som er rimeleg å tru at arbeidstakaren treng for å forsørgje seg sjølv og husstanden sin. Før trekket blir gjennomført, skal det drøftast med dei tillitsvalde for arbeidstakaren. f. manglande oppmøte på øvingar (berre lovbestemte permisjonar, sjukemelding eller eigenmelding vert akseptert). 12. Vanleg orden Arbeidstakaren må vera på arbeidsstaden/mønstringsstaden når arbeidstida tek til. Ingen må gå frå arbeidsstaden i arbeidstida utan løyve frå nærmaste overordna. Ved utrykking er det utrykkingsleiar eller overordna vakt som bestemmer når den einskilde kan dimmiterast. Arbeidstakaren må ikkje vera påverka av alkohol eller anna rusande eller bedøvande middel i arbeidstida eller i samband med teneste og representasjon av brannvesenet. Det vil kunne vere grunn for oppseiing/avskjed. Det same gjeld for slikt misbruk utanfor arbeidstida som påviseleg går utover arbeidstakaren si utføring av arbeidet. (kommentar: alkoholisme og narkomani er i dag trygdemessig sett akseptert som sjukdomstilstandar. Imidlertid har Sentralforbundet etter å ha teke saka opp med Arbeidstilsynet fått opplyst at misbrukarar ikkje vert omfatta av føresegnene i Arbeidsmiljølova paragraf 15-8 oppseiingsvern ved sjukdom). Det er ikkje lov å røykje i bygg som Sbr-Iks disponerer eller i samband med innsats/utrykking og øvingar, eller i Sbr-Iks sine køyretøy eller uteområdet tilknytt arbeidsplassen. Ei utrykking/øving er ikkje ferdig før bilar og utstyr igjen er i operativ stand og stasjonen rydda iht vedteken standard. Utrykkingsleiar er ansvarleg for at så skjer. Alle tilsette skal bidra til å halde generell orden og ryddigheit på sin arbeidsplass og i fellesareal slik at den står fram som mest mogleg representativ. Sbr-Iks nyttar som minimum uniform ved tilsyn, utrykking og ved representasjon, uniforma skal vere ryddig og presentabel. Brann- og redningssjefen kan elles beordre bruk av uniform når han finn det naudsynt.
13. Handsaming av utstyr Alt inventar, verktøy, materiale o.l. må handsamast med omhug. Ein må vera varsam når ein brukar eld, lys og eldsfarlege saker. Arbeidstakaren må retta seg etter reglar og pålegg som er gjevne for å trygga liv, helse og eigedom, og bruka det verneutstyret som er påbode etter lover og forskrifter. Der det vert kravd eiga opplæring, pliktar den tilsette å ta denne opplæringa før utstyret vert teke i bruk. 14. Permisjon For permisjon gjeld reglane i tariffavtalen og ev permisjonsreglementet (det er p. t ikkje utarbeida eige permisjonsreglement for Sbr-Iks), alle søknadar om permisjon skal vere skriftleg og grunngjeven. 15. Anna løna arbeid Arbeidstakarar i 100% stilling i Sbr-Iks kan ikkje utan løyve frå arbeidsgjevar overta anna løna arbeid som vil vera av eit slikt omfang at det kan gå utover arbeidsytinga i Sbr-Iks. Det same gjeld ekstraarbeid som kan føra til ugildskap etter forvaltningslova kap. 2. 16. Informasjon Sbr-Iks har som mål å sikre openheit og dialog som arbeidsform i alle ledd i organisasjonen. Medarbeidarane i Sbr-Iks vert oppmoda til å bidra til offentlegheit med sin kunnskap innanfor sine arbeidsfelt, og alle medarbeidarar har som privatpersonar høve til å uttala seg i saker som ikkje er underlagt teieplikt. Er ein i tvil skal ein spørje overordna. Leiarane i Sbr-Iks har ansvar for å informera media. Den einskilde sakshandsamar kan gje faktaopplysningar i ei sak. I innsatssamanheng er det overordna vakt/fagleiar brann som uttalar seg på vegne av brannvesenet. 17. Intern varsling Sbr-Iks har p.t ikkje utarbeida eigne retningsliner for internvarsling (i samsvar med Arbeidsmiljølova 2-4, 2-5 og 3-6). Men tilsette vert oppfordra til å varsle internt om kritikkverdige tilhøve, og Sbr-Iks legg vekt på at all intern varsling skal følgjast opp. Sjølv om Sbr-iks p.t ikkje har eigne retningsliner for intern varsling må det som minimum skje på forsvarleg vis ved å sikre den som varslar og den det blir varsla om. Det er ei målsetting å utarbeide eigne retningsliner for varsling. Dersom det skulle oppstå slike saker før
vi har på plass eigne retningsliner er det naturleg å ev. sjå på kva retningsliner våre eigarkommunar har. 18. Teieplikt Alle arbeidstakarar har plikt til å gjera seg kjende med reglane om teieplikt i offentleg forvaltning, og skal underskriva erklæring om teieplikt. Når ei sak er undergjeve teieplikt medhald av lov, reglar eller når det følgjer av saksart, må ingen arbeidstakar omtale saka overfor nokon utanforståande. Nye naudnettsradioar utfordrar teieplikta, det er ikkje tillate å lytte på talegrupper som ein ikkje er vorte bedd om å lytte på, dette gjeld spesielt dei såkalla BAPS gruppene. Radio må heller ikkje stå med open høgtalar ute blant folk. Gjentekne brot knytt til lytting på grupper som ein ikkje er blitt beden om å lytte på kan resultere i oppseiing. Brot på teieplikta kan medføra straff etter straffelova 121. 19. Oppseiing Oppseiinga skal vera skriftleg frå begge partar. Arbeidstakar kan krevja grunngjeving for oppseiinga. Denne kan krevjast i skriftleg form. Ved oppseiing frå Sbr-Iks skal oppseiinga innehalda opplysningar om at arbeidstakar har rett til å krevja forhandlingar, reise søksmål, og kva slag fristar som gjeld. Før slik oppseiing skjer skal det drøftast med dei tillitsvalde for arbeidstakaren. Oppseiingsfristane skal vera i samsvar med gjeldande regler i lov og tariffavtale. Om dei rettane arbeidstakar har ved oppseiing, vert elles vist til kapittel 15 i arbeidsmiljølova og reglane i forvaltningslova. Når arbeidstakaren sluttar, vert det laga sluttattest om arbeidstakaren ber om det. 20. Avskil Sbr-Iks kan gjeva ein arbeidstakar avskil med påbod om å slutta straks dersom vedkomande har gjort seg skuldig i grovt pliktbrot eller anna vesentleg mishald av arbeidsavtalen og/eller arbeidsreglementet. Avskil skal gjevast skriftleg og innehalda opplysningar om rett til å krevja forhandling, reise søksmål, og kva slags fristar som gjeld. Medan spørsmålet om avskil blir handsama, kan arbeidstakaren i heilt spesielle tilfelle bli suspendert frå stillinga. Vilkåret for å kunne suspendera nokon er at det er nødvendig av omsyn til at det gagnar tenesta best at arbeidstakaren straks blir fjerna frå den noverande stilling, og at det må vera grunn til å tru av vilkåra for avskil etter arbeidsmiljølova 15-14 er til stades. Arbeidstakaren har krav på å få ha løna si fram til vedtaket om avskil er avgjort.
Før det vert gjort vedtak om avskil eller suspensjon, skal det drøftast med dei tillitsvalde for arbeidstakaren med mindre arbeidstakaren ikkje ønskjer dette. Ved suspensjon har arbeidstakaren krav på at denne blir grunngjeven. Om rettane til arbeidstakaren elles, blir det vist til forvaltningslova. I spørsmål om avskil vert det og vist til arbeidsmiljølova 15-14.