saksframlegg Dato: Referanse: Vår saksbehandlar: 15.03.2017 36408/2017 Anders Røynstrand Mari Anne Bjørkmann Saksnr Utval Møtedato Fylkesutvalet 03.04.2017 Statleg sikring av friluftsområde i Møre og Romsdal - søknader for 2017 - tilråding Bakgrunn Kommunar og interkommunale friluftsråd kan søkje om statleg økonomisk medverknad til sikring av område for friluftsliv. Det er Miljødirektoratet som lyser ut statlege midlar som kan nyttast til erverv av areal eller vederlag for avtalar om langvarig bruksrett (servituttavtale). Tilskotsordninga er omtalt i Rundskriv T-1/15 Tilskotsordningar for 2016 frå Klima- og miljødepartementet (under post 30). Det viktigaste føremålet med ordninga er at «friluftslivet skal styrkast som ein helsefremjande, trivselsskapande og miljøvenleg aktivitet.» Fylkeskommunen skal sende søknader frå Møre og Romsdal til Miljødirektoratet med ei tilråding innan 1. april 2017. Med bakgrunn i årets møtekalender for fylkesutvalet har fylkeskommunen fått utsett frist for å sende slik tilråding. Direktoratet prioriterer område som kjem store befolkningsgrupper til gode, som allment tilgjengeleg grønstruktur i byar og tettstader, samt nærområde til bustadområde som kan nåast utan bruk av bil eller båt. Også landfaste område i kystsona har høg prioritet. Det vert vidare lagt vekt på om søknadene er handsama og prioriterte i ein kommunal prosess etter plan- og bygningslova. Ordninga rettar seg særleg mot areal som blir/vil bli intensivt nytta, og som bør leggjast til rette for friluftslivsføremål. Vurdering Søknadsfrist til fylkeskommunen vart i år sett til 1. februar, og innan fristen kom det inn 10 søknader, frå Midsund, Rindal, Sunndal, Sykkylven, og Ålesund kommunar. Søknadene er kort omtalt under, og ei skjematisk oversikt over dei aktuelle områda ligg som vedlegg til saka. Fullstendige søknadsskjema med vedlegg (kart, bilete, kostnadsoverslag m.m.) kan sendast ut ved førespurnad til saksbehandlarar. Midsund kommune Sandan friluftsområde Sandan-området med Hamnaneset er eit populært utfartsområde i strandsona på Midøya, med fine tur- og bademoglegheiter. Området har fått ein sterk regional bruk dei siste åra gjennom å ha vore Stikk UT - mål fleire år. Det er behov for tilrettelagt parkering ved startpunkt for tursti ved fylkesvegen. Søknaden omfattar kostnader til grunnkjøp og til opparbeiding av parkeringsplassen.
Rindal kommune Igltjønna friluftsområde Igltjønna er eit av kommunens mest nytta område for friluftsliv, fysisk aktivitet og rekreasjon. Området er lett tilgjengeleg for ei større brukargruppe da det har ein geografisk nærleik til skule, helse- og omsorgssenter, Rindalhus og bustadområde. Området er mykje besøkt av eigne innbyggarar og tilreisande. Igltjønna er eit område med høg lokal- og regionalverdi. Det er underteikna ein intensjonsavtale med ein del forbehold ift kjøp av området mellom kommunen og eigar. Det er i søknaden søkt om 50 prosent medverknad til grunnkjøp og utarbeiding av informasjonstavle. Sunndal kommune Nerdalen - parkeringsplass Området er innfallsporten til Innerdalen landskapsvernområde og Trollheimen nasjonalpark, området er eit reiselivsfyrtårn for regionen og landet med si plassering og utgangspunkt for fine turar i fjellheimen. Det har vore stor auke av besøkande frå heile fylket i forbindelse med at området fikk Stikk UT- post. Parkeringsplassen i Nerdalen ligg 19 kilometer frå sentrum av Sunndalsøra, på vegen frå sentrum må ein gjennom ein tunell kor det ikkje er lov til å sykle eller gå. Det er behov for å opparbeide ein parkeringsplass ved startpunkt for turane. Kommunen har kjøpt arealet. Søknaden omfattar kostnader til grunnkjøp og til opparbeiding av parkeringsplassen. Sunndal kommune Brandstad - parkeringsplass Området er startpunkt for fleire turar inn til Sunndalsfjella og Dovrefjell nasjonalpark. Om vinteren er området av nasjonal verdi når det gjeld skiturar til kjente fjelltopper. Området blir då nytta av turfolk frå heile Skandinavia. Området manglar stor nok parkeringsplass både for sommar- og vinterbruk. Kommunen har kjøpt arealet. Det er søkt om medverknad til grunnkjøp og opparbeiding av parkeringsplass, bygging av toalettbygg med vatn- og avløpsanlegg, og etablering av bålplass med gapahuk. Sunndal kommune Trolltind - parkeringsplass Området blir nytta som turområde for omliggande kommunar og tilreisande turistar, særleg vinterstid med toppturar og familieturar i snøsikkert område. Området har behov for ein parkeringsplass. Området er svært mykje nytta og har behov for ein parkeringsplass. Sist vinter blei det talt opp 100 bilar som var parkert i området. Kommunen har kjøpt arealet. Det er søkt om medverknad til grunnkjøp og opparbeiding av parkeringsplass, bygging av toalettbygg med vatn- og avløpsanlegg. Sykkylven kommune Dravlausstølskiftet Området ligg i sørenden av Sætrevatnet, nær Fjellsætra og Nysætervatnet. Området er eit av dei viktigaste utfartsområda for Nordre Sunnmøre og Ålesund, med varierte moglegheiter for tur og friluftsaktivitet sommar og vinter. Dravlausstølskiftet er ein innfallsport frå Velledalen og eit startpunkt for skiløyper og toppturar. Området har betydelege parkeringsutfordringar på utfartsdagar, og det er behov for tilrettelegging. Søknaden omfattar sikring av parkeringsareal og eit tilliggande utmarksareal med urørt strandsone ved Sætrevatnet og start på skiløypetrasé rundt Sætrevatnet og Nysetervatnet. Det er inngått avtale om
grunnkjøp med grunneigar. Det blir søkt om tilskot til å dekke grunnkjøp og til opparbeiding av parkeringsplass. Sykkylven kommune Fausaskiftet - parkeringsplass Fausaskiftet er knutepunkt for køyrevegar og løyper i nordenden av Nysætervatnet, og eit oppmarsjområde for populære toppturar, m.a. populære Auskjeret (Ausekaret). Også her er parkeringsmoglegheitene svært avgrensa, og det er behov for tilrettelegging. Det er inngått avtale med grunneigar om kjøp av areal til parkering, og søknader omfattar kostnader til grunnkjøp og opparbeiding av parkeringsplass. Sykkylven kommune Straumen friområde Området er eit regulert friområde ved Straumen mellom Fitjavatnet og Sykkylvsfjorden, og eit nærfriluftsområde for busetnaden på Straumgjerde. Området er først og fremst eit viktig lokalt friluftsområde for bading og friluftsaktivitet ved ferskvatn, men tiltrekk seg også fiskarar frå heile fylket sommarstid. Det er tidlegare sikra eit strandsoneareal nedstraums brua over Straumen, og sikring av det aktuelle arealet ovanfor brua vil sikre eit heilskapleg friluftsområde langs Straumen. Det er søkt om 50 prosent medverknad til grunnkjøp. Ålesund kommune Hundsvær-Tyskholmen brygge Området ligg i Borgundfjorden mellom Ålesund og Sula kommunar. Friområdet inngår i eit skjærgårdsnettverk saman med Langevågholmane, og med Svinøya og Vikholmen i Ellingsøyfjorden. Tyskholmen er ein populær badeplass og utfartsområde for Ålesunds befolkning. Området kan i hovudsak brukas til strand- og vassbaserte aktiviteter, men også for korte turar for å oppdage kulturhistoriske spor og samanhengar. Området kan berre nåast med båt. Tyskholmen og det meste av Hundsvær er eigd av Ålesund kommune, og det et søkt om vederlagsfri omgjering til statleg sikra område. Det er vidare søkt tilretteleggingsmidlar til å oppgradere enkel flytebrygge til ei universelt utforma brygge med landgang. Ålesund kommune Vikholmen-Lauvholmen brygge Området ligg i Ellingsøyfjorden som med sine mange øyer og holmar er svært attraktiv for sjøbasert friluftsliv. Friluftsområdet inngår i eit skjærgårdsnettverk saman med Svinøya, og med Hundsvær-Tyskholmen og Langevågholmane i Borgundfjorden. Området kan brukast til bading og strandbaserte aktivitetar i saltvatn, leik og allsidige aktivterter, telting og anna friluftsaktivitet. Området kan bare nås med båt. Det er søkt om vederlagsfri omgjering til statleg sikra område og tilskot til å tilrettelegge området med ny gjestebrygge, betre bål- og grillplass, og rydding og merking av stiar.
Samla vurdering Fylkesrådmannen registrerer at eit fleirtal av søknadene om sikring gjeld område med ein regional bruk, der det er behov for tilrettelegging for parkering på innfallsportar til regionalt, og til dels nasjonalt, verdifulle friluftslivområde. Søknadene frå Rindal og Ålesund og for Straumen friområde i Sykkylven gjeld lokalt viktige nærfriluftsområde. Av desse merkar Igltjønna friluftsområde seg ut som eit velfungerande friluftsområde sentralt i kommunesenteret i Rindal, med god tilkomst og god eksisterande tilrettelegging, og der sikring er viktig for å sikre ei heilskapleg utvikling av området. Samla kostnader til sikring ved erverv av areal til friluftsformål er for dei 10 søknadene på knapt 1,4 mill. kroner og totalt søknadsbeløp er på vel 1 mill. kroner. Dette er lågare enn tidlegare års samla løyvingar til Møre og Romsdal. Samstundes er det i fleire av søknadene søkt om større beløp til opparbeiding av parkeringsplassar, og det er totalt søkt om tilskot på nærare 6,3 mill. kroner til «grunnleggende istandsetting» av friluftsområda (sjå vedlegg 2). Miljødirektoratet vil neppe kunne imøtekome dette søknadsbeløpet, men vil i utgangspunktet fordele tilgjengelege midlar skjønnsmessig ut frå budsjettramme. Fylkeskommunen kan gi tilråding om kor midlar til Møre og Romsdal bør prioriterast. Blant søknadene om tilrettelegging av friluftsparkering finn fylkesrådmannen at det kan vere særlege grunnar for å tilrå at Miljødirektoratet prioriterer midlar til opparbeiding av utvida parkering i Nerdalen, sidan området er innfallsport til dei nasjonalt verdifulle friluftsområda i Innerdalen landskapsvernområde og Trollheimen nasjonalpark. Dette området skil seg også ut i reiselivssamanheng. Ut over dette stiller dei ulike parkeringsområda seg nokså likt m.o.t. behov for grunnleggande istandsetting. For dei to områda i Ålesund er opparbeidingsmidlar knytt til etablering/ oppgradering av brygger for betre tilkomst med båt til dei aktuelle holmane. Søknadsbeløpa er moderate samanlikna med parkeringsanlegga. Tilrettelegginga vil nå ei avgrensa gruppe som har tilgang på båt, men områda ligg geografisk svært nær store befolkningsgrupper i Ålesund og omegn. Det kan difor vere grunn til å prioritere også desse områda. Fylkesrådmannen legg til grunn at Miljødirektoratet prioriterer tilskot til å gjennomføre sikring for alle områda før det blir fordelt midlar til grunnleggande istandsetting. Fylkesrådmannen minner elles om at for alle område som blir statleg sikra kan det seinare årleg søkast om tilskot til tiltak, der fylkeskommunen får ei årleg ramme til fordeling (post 78).
Forslag til vedtak: Fylkesutvalet viser til innsendte søknader frå Møre og Romsdal for 2017, og rår til at dei ti aktuelle områda blir sikra som statleg sikra friluftsområde. Fylkesutvalet ser det som særleg viktig at Igltjønna friluftsområde og parkeringsplass i Nerdalen blir sikra og tilrettelagt. Ottar Brage Guttelvik fylkesrådmann Ole Helge Haugen fylkesplansjef Vedlegg 1 Statleg sikring av friluftsområde i Møre og Romsdal - søknader for 2017 - oversiktsliste 2 Statleg sikring av friluftsområde i Møre og Romsdal - søknader for 2017 - kostnadsoversikt